శ్రీవిష్ణుభుజఙ్గప్రయాతస్తోత్రమ్

శ్రీవిష్ణుభుజఙ్గప్రయాతస్తోత్రమ్ 

చిదంశం విభుం నిర్మలం నిర్వికల్పమ్
నిరీహం నిరాకారమోఙ్కారగమ్యమ్.
గుణాతీతమవ్యక్తమేకం తురీయమ్
పరం బ్రహ్మ యం వేద తస్మై నమస్తే..1..

విశుద్ధం శివం శాన్తమాద్యన్తశూన్యమ్
జగజ్జీవనం జ్యోతిరానన్దరూపమ్.
అదిగ్దేశకాలవ్యవచ్ఛేదనీయమ్
త్రయీ వక్తి యం వేద తస్మై నమస్తే..2..

మహాయోగపీఠే పరిభ్రాజమానే
ధరణ్యాదితత్త్వాత్మకే శక్తియుక్తే.
గుణాహస్కరే వహ్నిబిమ్బార్ధమధ్యే
సమాసీనమోఙ్కర్ణికేఽష్టాక్షరాబ్జే..3..

సమానోదితానేకసూర్యేన్దుకోటి-
ప్రభాపూరతుల్యద్యుతిం దుర్నిరీక్షమ్.
న శీతం న చోష్ణం సువర్ణావదాత-
ప్రసన్నం సదానన్దసంవిత్స్వరూపమ్..4..

సునాసాపుటం సున్దరభ్రూలలాటమ్
కిరీటోచితాకుఞ్చితస్నిగ్ధకేశమ్.
స్ఫురత్ పుణ్డరీకాభిరామాయతాక్షమ్
సముత్ఫుల్లరత్నప్రసూనావతంసమ్..5..

లసత్ కుణ్డలామృష్టగణ్డస్థలాన్తమ్
జపారాగచోరాధరం చారుహాసమ్.
అలివ్యాకులామోలిమన్దారమాలమ్
మహోరస్ఫురత్కౌస్తుభోదారహారమ్..6..

సురత్నాఙ్గదైరన్వితం బాహుదణ్డైః
చతుర్భిశ్చలత్కఙ్కణాలఙ్కృతాగ్రైః.
ఉదారోదరాలఙ్కృతం పీతవస్త్రమ్
పదద్వన్ద్వనిర్ధూతపద్మాభిరామమ్..7..

స్వభక్తేషు సన్దర్శితాకారమేవమ్
సదా భావయన్ సన్నిరుద్ధేన్ద్రియాశ్వః.
దురాపం నరో యాతి సంసారపారమ్
పరస్మై పరేభ్యోఽపి తస్మై నమస్తే..8..

శ్రియా శాతకుమ్భద్యుతిస్నిగ్ధకాన్త్యా
ధరణ్యా చ దూర్వాదలశ్యామలాఙ్గ్యా.
కలత్రద్వయేనామునా తోషితాయ
త్రిలోకీగృహస్థాయ విష్ణో నమస్తే..9..

శరీరం కలత్రం సుతం బన్ధువర్గమ్
వయస్యం ధనం సద్మ భృత్యం భువం చ.
సమస్తం పరిత్యజ్య హా కష్టమేకో
గమిష్యామి దుఃఖేన దూరం కిలాహమ్..10..

జరేయం పిశాచీవ హా జీవతో మే
వసామక్తి రక్తం చ మాంసం బలం చ.
అహో దేవ సీదామి దీనానుకమ్పిమ్
కిమద్యాపి హన్త త్వయోదాసితవ్యమ్..11..

కఫవ్యాహతోష్ణోల్బణశ్వాసవేగ-
వ్యథావిస్ఫురత్సర్వమర్మాస్థిబన్ధామ్.
విచిన్త్యాహమన్త్యామసఙ్ఖ్యామవస్థామ్
బిభేమి ప్రభో కిం కరోమి ప్రసీద..12..

లపన్నచ్యుతానన్త గోవిన్ద విష్ణో
మురారే హరే నాథ నారాయణేతి.
యథాఽనుస్మరిష్యామి భక్త్యా భవన్తమ్
తథా మే దయాశీల దేవ ప్రసీద..13..

భుజఙ్గప్రయాతం పఠేద్యస్తు భక్త్యా
సమాధాయ చిత్తే భవన్తం మురారే.
స మోహం విహాయాశు యుష్మత్ప్రసాదాత్
సమాశ్రిత్య యోగం వ్రజత్యచ్యుతం త్వామ్..14..