ಶ್ರೀವಿಷ್ಣುಭುಜಙ್ಗಪ್ರಯಾತಸ್ತೋತ್ರಮ್

ಶ್ರೀವಿಷ್ಣುಭುಜಙ್ಗಪ್ರಯಾತಸ್ತೋತ್ರಮ್ 

ಚಿದಂಶಂ ವಿಭುಂ ನಿರ್ಮಲಂ ನಿರ್ವಿಕಲ್ಪಮ್
ನಿರೀಹಂ ನಿರಾಕಾರಮೋಙ್ಕಾರಗಮ್ಯಮ್.
ಗುಣಾತೀತಮವ್ಯಕ್ತಮೇಕಂ ತುರೀಯಮ್
ಪರಂ ಬ್ರಹ್ಮ ಯಂ ವೇದ ತಸ್ಮೈ ನಮಸ್ತೇ..೧..

ವಿಶುದ್ಧಂ ಶಿವಂ ಶಾನ್ತಮಾದ್ಯನ್ತಶೂನ್ಯಮ್
ಜಗಜ್ಜೀವನಂ ಜ್ಯೋತಿರಾನನ್ದರೂಪಮ್.
ಅದಿಗ್ದೇಶಕಾಲವ್ಯವಚ್ಛೇದನೀಯಮ್
ತ್ರಯೀ ವಕ್ತಿ ಯಂ ವೇದ ತಸ್ಮೈ ನಮಸ್ತೇ..೨..

ಮಹಾಯೋಗಪೀಠೇ ಪರಿಭ್ರಾಜಮಾನೇ
ಧರಣ್ಯಾದಿತತ್ತ್ವಾತ್ಮಕೇ ಶಕ್ತಿಯುಕ್ತೇ.
ಗುಣಾಹಸ್ಕರೇ ವಹ್ನಿಬಿಮ್ಬಾರ್ಧಮಧ್ಯೇ
ಸಮಾಸೀನಮೋಙ್ಕರ್ಣಿಕೇಽಷ್ಟಾಕ್ಷರಾಬ್ಜೇ..೩..

ಸಮಾನೋದಿತಾನೇಕಸೂರ್ಯೇನ್ದುಕೋಟಿ-
ಪ್ರಭಾಪೂರತುಲ್ಯದ್ಯುತಿಂ ದುರ್ನಿರೀಕ್ಷಮ್.
ನ ಶೀತಂ ನ ಚೋಷ್ಣಂ ಸುವರ್ಣಾವದಾತ-
ಪ್ರಸನ್ನಂ ಸದಾನನ್ದಸಂವಿತ್ಸ್ವರೂಪಮ್..೪..

ಸುನಾಸಾಪುಟಂ ಸುನ್ದರಭ್ರೂಲಲಾಟಮ್
ಕಿರೀಟೋಚಿತಾಕುಞ್ಚಿತಸ್ನಿಗ್ಧಕೇಶಮ್.
ಸ್ಫುರತ್ ಪುಣ್ಡರೀಕಾಭಿರಾಮಾಯತಾಕ್ಷಮ್
ಸಮುತ್ಫುಲ್ಲರತ್ನಪ್ರಸೂನಾವತಂಸಮ್..೫..

ಲಸತ್ ಕುಣ್ಡಲಾಮೃಷ್ಟಗಣ್ಡಸ್ಥಲಾನ್ತಮ್
ಜಪಾರಾಗಚೋರಾಧರಂ ಚಾರುಹಾಸಮ್.
ಅಲಿವ್ಯಾಕುಲಾಮೋಲಿಮನ್ದಾರಮಾಲಮ್
ಮಹೋರಸ್ಫುರತ್ಕೌಸ್ತುಭೋದಾರಹಾರಮ್..೬..

ಸುರತ್ನಾಙ್ಗದೈರನ್ವಿತಂ ಬಾಹುದಣ್ಡೈಃ
ಚತುರ್ಭಿಶ್ಚಲತ್ಕಙ್ಕಣಾಲಙ್ಕೃತಾಗ್ರೈಃ.
ಉದಾರೋದರಾಲಙ್ಕೃತಂ ಪೀತವಸ್ತ್ರಮ್
ಪದದ್ವನ್ದ್ವನಿರ್ಧೂತಪದ್ಮಾಭಿರಾಮಮ್..೭..

ಸ್ವಭಕ್ತೇಷು ಸನ್ದರ್ಶಿತಾಕಾರಮೇವಮ್
ಸದಾ ಭಾವಯನ್ ಸನ್ನಿರುದ್ಧೇನ್ದ್ರಿಯಾಶ್ವಃ.
ದುರಾಪಂ ನರೋ ಯಾತಿ ಸಂಸಾರಪಾರಮ್
ಪರಸ್ಮೈ ಪರೇಭ್ಯೋಽಪಿ ತಸ್ಮೈ ನಮಸ್ತೇ..೮..

ಶ್ರಿಯಾ ಶಾತಕುಮ್ಭದ್ಯುತಿಸ್ನಿಗ್ಧಕಾನ್ತ್ಯಾ
ಧರಣ್ಯಾ ಚ ದೂರ್ವಾದಲಶ್ಯಾಮಲಾಙ್ಗ್ಯಾ.
ಕಲತ್ರದ್ವಯೇನಾಮುನಾ ತೋಷಿತಾಯ
ತ್ರಿಲೋಕೀಗೃಹಸ್ಥಾಯ ವಿಷ್ಣೋ ನಮಸ್ತೇ..೯..

ಶರೀರಂ ಕಲತ್ರಂ ಸುತಂ ಬನ್ಧುವರ್ಗಮ್
ವಯಸ್ಯಂ ಧನಂ ಸದ್ಮ ಭೃತ್ಯಂ ಭುವಂ ಚ.
ಸಮಸ್ತಂ ಪರಿತ್ಯಜ್ಯ ಹಾ ಕಷ್ಟಮೇಕೋ
ಗಮಿಷ್ಯಾಮಿ ದುಃಖೇನ ದೂರಂ ಕಿಲಾಹಮ್..೧೦..

ಜರೇಯಂ ಪಿಶಾಚೀವ ಹಾ ಜೀವತೋ ಮೇ
ವಸಾಮಕ್ತಿ ರಕ್ತಂ ಚ ಮಾಂಸಂ ಬಲಂ ಚ.
ಅಹೋ ದೇವ ಸೀದಾಮಿ ದೀನಾನುಕಮ್ಪಿಮ್
ಕಿಮದ್ಯಾಪಿ ಹನ್ತ ತ್ವಯೋದಾಸಿತವ್ಯಮ್..೧೧..

ಕಫವ್ಯಾಹತೋಷ್ಣೋಲ್ಬಣಶ್ವಾಸವೇಗ-
ವ್ಯಥಾವಿಸ್ಫುರತ್ಸರ್ವಮರ್ಮಾಸ್ಥಿಬನ್ಧಾಮ್.
ವಿಚಿನ್ತ್ಯಾಹಮನ್ತ್ಯಾಮಸಙ್ಖ್ಯಾಮವಸ್ಥಾಮ್
ಬಿಭೇಮಿ ಪ್ರಭೋ ಕಿಂ ಕರೋಮಿ ಪ್ರಸೀದ..೧೨..

ಲಪನ್ನಚ್ಯುತಾನನ್ತ ಗೋವಿನ್ದ ವಿಷ್ಣೋ
ಮುರಾರೇ ಹರೇ ನಾಥ ನಾರಾಯಣೇತಿ.
ಯಥಾಽನುಸ್ಮರಿಷ್ಯಾಮಿ ಭಕ್ತ್ಯಾ ಭವನ್ತಮ್
ತಥಾ ಮೇ ದಯಾಶೀಲ ದೇವ ಪ್ರಸೀದ..೧೩..

ಭುಜಙ್ಗಪ್ರಯಾತಂ ಪಠೇದ್ಯಸ್ತು ಭಕ್ತ್ಯಾ
ಸಮಾಧಾಯ ಚಿತ್ತೇ ಭವನ್ತಂ ಮುರಾರೇ.
ಸ ಮೋಹಂ ವಿಹಾಯಾಶು ಯುಷ್ಮತ್ಪ್ರಸಾದಾತ್
ಸಮಾಶ್ರಿತ್ಯ ಯೋಗಂ ವ್ರಜತ್ಯಚ್ಯುತಂ ತ್ವಾಮ್..೧೪..