શ્રીવિષ્ણુભુજઙ્ગપ્રયાતસ્તોત્રમ્

શ્રીવિષ્ણુભુજઙ્ગપ્રયાતસ્તોત્રમ્ 

ચિદંશં વિભું નિર્મલં નિર્વિકલ્પમ્
નિરીહં નિરાકારમોઙ્કારગમ્યમ્.
ગુણાતીતમવ્યક્તમેકં તુરીયમ્
પરં બ્રહ્મ યં વેદ તસ્મૈ નમસ્તે..૧..

વિશુદ્ધં શિવં શાન્તમાદ્યન્તશૂન્યમ્
જગજ્જીવનં જ્યોતિરાનન્દરૂપમ્.
અદિગ્દેશકાલવ્યવચ્છેદનીયમ્
ત્રયી વક્તિ યં વેદ તસ્મૈ નમસ્તે..૨..

મહાયોગપીઠે પરિભ્રાજમાને
ધરણ્યાદિતત્ત્વાત્મકે શક્તિયુક્તે.
ગુણાહસ્કરે વહ્નિબિમ્બાર્ધમધ્યે
સમાસીનમોઙ્કર્ણિકેઽષ્ટાક્ષરાબ્જે..૩..

સમાનોદિતાનેકસૂર્યેન્દુકોટિ-
પ્રભાપૂરતુલ્યદ્યુતિં દુર્નિરીક્ષમ્.
ન શીતં ન ચોષ્ણં સુવર્ણાવદાત-
પ્રસન્નં સદાનન્દસંવિત્સ્વરૂપમ્..૪..

સુનાસાપુટં સુન્દરભ્રૂલલાટમ્
કિરીટોચિતાકુઞ્ચિતસ્નિગ્ધકેશમ્.
સ્ફુરત્ પુણ્ડરીકાભિરામાયતાક્ષમ્
સમુત્ફુલ્લરત્નપ્રસૂનાવતંસમ્..૫..

લસત્ કુણ્ડલામૃષ્ટગણ્ડસ્થલાન્તમ્
જપારાગચોરાધરં ચારુહાસમ્.
અલિવ્યાકુલામોલિમન્દારમાલમ્
મહોરસ્ફુરત્કૌસ્તુભોદારહારમ્..૬..

સુરત્નાઙ્ગદૈરન્વિતં બાહુદણ્ડૈઃ
ચતુર્ભિશ્ચલત્કઙ્કણાલઙ્કૃતાગ્રૈઃ.
ઉદારોદરાલઙ્કૃતં પીતવસ્ત્રમ્
પદદ્વન્દ્વનિર્ધૂતપદ્માભિરામમ્..૭..

સ્વભક્તેષુ સન્દર્શિતાકારમેવમ્
સદા ભાવયન્ સન્નિરુદ્ધેન્દ્રિયાશ્વઃ.
દુરાપં નરો યાતિ સંસારપારમ્
પરસ્મૈ પરેભ્યોઽપિ તસ્મૈ નમસ્તે..૮..

શ્રિયા શાતકુમ્ભદ્યુતિસ્નિગ્ધકાન્ત્યા
ધરણ્યા ચ દૂર્વાદલશ્યામલાઙ્ગ્યા.
કલત્રદ્વયેનામુના તોષિતાય
ત્રિલોકીગૃહસ્થાય વિષ્ણો નમસ્તે..૯..

શરીરં કલત્રં સુતં બન્ધુવર્ગમ્
વયસ્યં ધનં સદ્મ ભૃત્યં ભુવં ચ.
સમસ્તં પરિત્યજ્ય હા કષ્ટમેકો
ગમિષ્યામિ દુઃખેન દૂરં કિલાહમ્..૧૦..

જરેયં પિશાચીવ હા જીવતો મે
વસામક્તિ રક્તં ચ માંસં બલં ચ.
અહો દેવ સીદામિ દીનાનુકમ્પિમ્
કિમદ્યાપિ હન્ત ત્વયોદાસિતવ્યમ્..૧૧..

કફવ્યાહતોષ્ણોલ્બણશ્વાસવેગ-
વ્યથાવિસ્ફુરત્સર્વમર્માસ્થિબન્ધામ્.
વિચિન્ત્યાહમન્ત્યામસઙ્ખ્યામવસ્થામ્
બિભેમિ પ્રભો કિં કરોમિ પ્રસીદ..૧૨..

લપન્નચ્યુતાનન્ત ગોવિન્દ વિષ્ણો
મુરારે હરે નાથ નારાયણેતિ.
યથાઽનુસ્મરિષ્યામિ ભક્ત્યા ભવન્તમ્
તથા મે દયાશીલ દેવ પ્રસીદ..૧૩..

ભુજઙ્ગપ્રયાતં પઠેદ્યસ્તુ ભક્ત્યા
સમાધાય ચિત્તે ભવન્તં મુરારે.
સ મોહં વિહાયાશુ યુષ્મત્પ્રસાદાત્
સમાશ્રિત્ય યોગં વ્રજત્યચ્યુતં ત્વામ્..૧૪..