હરિસ્તોત્રમ્

જગજ્જાલપાલં કચત્કણ્ઠમાલં
શરચ્ચન્દ્રભાલં મહાદૈત્યકાલમ્ .
નભોનીલકાયં દુરાવારમાયં
સુપદ્માસહાયં ભજેઽહં ભજેઽહમ્ .. ૧..

સદામ્ભોધિવાસં ગલત્પુષ્પહાસં
જગત્સન્નિવાસં શતાદિત્યભાસમ્ .
ગદાચક્રશસ્ત્રં લસત્પીતવસ્ત્રં
હસચ્ચારુવક્ત્રં ભજેઽહં ભજેઽહમ્ .. ૨..

રમાકણ્ઠહારં શ્રુતિવ્રાતસારં
જલાન્તર્વિહારં ધરાભારહારમ્ .
ચિદાનન્દરૂપં મનોજ્ઞસ્વરૂપં
ધૃતાનેકરૂપં ભજેઽહં ભજેઽહમ્ .. ૩..

જરાજન્મહીનં પરાનન્દપીનં
સમાધાનલીનં સદૈવાનવીનમ્ .
જગજ્જન્મહેતું સુરાનીકકેતું
ત્રિલોકૈકસેતું ભજેઽહં ભજેઽહમ્ .. ૪..

કૃતામ્નાયગાનં ખગાધીશયાનં
વિમુક્તેર્નિદાનં હરારાતિમાનમ્ .
સ્વભક્તાનુકૂલં જગદ્વૃક્ષમૂલં
નિરસ્તાર્તશૂલં ભજેઽહં ભજેઽહમ્ .. ૫..

સમસ્તામરેશં દ્વિરેફાભકેશં
જગદ્બિમ્બલેશં હૃદાકાશદેશમ્ .
સદા દિવ્યદેહં વિમુક્તાખિલેહં
સુવૈકુણ્ઠગેહં ભજેઽહં ભજેઽહમ્ .. ૬..

સુરાલિબલિષ્ઠં ત્રિલોકીવરિષ્ઠં
ગુરૂણાં ગરિષ્ઠં સ્વરૂપૈકનિષ્ઠમ્ .
સદા યુદ્ધધીરં મહાવીરવીરં
મહામ્ભોધિતીરં ભજેઽહં ભજેઽહમ્ .. ૭..

રમાવામભાગં તલાનગ્રનાગં
કૃતાધીનયાગં ગતારાગરાગમ્ .
મુનીન્દ્રૈઃ સુગીતં સુરૈઃ સમ્પરીતં
ગુણૌધૈરતીતં ભજેઽહં ભજેઽહમ્ .. ૮..

.. ફલશ્રુતિ ..

ઇદં યસ્તુ નિત્યં સમાધાય ચિત્તં
પઠેદષ્ટકં કણ્ઠહારં મુરારેઃ .
સ વિષ્ણોર્વિશોકં ધ્રુવં યાતિ લોકં
જરાજન્મશોકં પુનર્વિન્દતે નો .. ૯..