হরিস্তোত্রম্
জগজ্জালপালং কচৎকণ্ঠমালং
শরচ্চন্দ্রভালং মহাদৈত্যকালম্ ।
নভোনীলকাযং দুরাভ়ারমাযং
সুপদ্মাসহাযং ভজেঽহং ভজেঽহম্ ॥ ১॥
সদাম্ভোধিভ়াসং গলৎপুষ্পহাসং
জগৎসন্নিভ়াসং শতাদিত্যভাসম্ ।
গদাচক্রশস্ত্রং লসৎপীতভ়স্ত্রং
হসচ্চারুভ়ক্ত্রং ভজেঽহং ভজেঽহম্ ॥ ২॥
রমাকণ্ঠহারং শ্রুতিভ়্রাতসারং
জলান্তর্ভ়িহারং ধরাভারহারম্ ।
চিদানন্দরূপং মনোজ্ঞস্বরূপং
ধৃতানেকরূপং ভজেঽহং ভজেঽহম্ ॥ ৩॥
জরাজন্মহীনং পরানন্দপীনং
সমাধানলীনং সদৈভ়ানভ়ীনম্ ।
জগজ্জন্মহেতুং সুরানীককেতুং
ত্রিলোকৈকসেতুং ভজেঽহং ভজেঽহম্ ॥ ৪॥
কৃতাম্নাযগানং খগাধীশযানং
ভ়িমুক্তের্নিদানং হরারাতিমানম্ ।
স্বভক্তানুকূলং জগদ্বৃক্ষমূলং
নিরস্তার্তশূলং ভজেঽহং ভজেঽহম্ ॥ ৫॥
সমস্তামরেশং দ্বিরেফাভকেশং
জগদ্বিম্বলেশং হৃদাকাশদেশম্ ।
সদা দিভ়্যদেহং ভ়িমুক্তাখিলেহং
সুভ়ৈকুণ্ঠগেহং ভজেঽহং ভজেঽহম্ ॥ ৬॥
সুরালিবলিষ্ঠং ত্রিলোকীভ়রিষ্ঠং
গুরূণাং গরিষ্ঠং স্বরূপৈকনিষ্ঠম্ ।
সদা যুদ্ধধীরং মহাভ়ীরভ়ীরং
মহাম্ভোধিতীরং ভজেঽহং ভজেঽহম্ ॥ ৭॥
রমাভ়ামভাগং তলানগ্রনাগং
কৃতাধীনযাগং গতারাগরাগম্ ।
মুনীন্দ্রৈঃ সুগীতং সুরৈঃ সম্পরীতং
গুণৌধৈরতীতং ভজেঽহং ভজেঽহম্ ॥ ৮॥
॥ ফলশ্রুতি ॥
ইদং যস্তু নিত্যং সমাধায চিত্তং
পঠেদষ্টকং কণ্ঠহারং মুরারেঃ ।
স ভ়িষ্ণোর্ভ়িশোকং ধ্রুভ়ং যাতি লোকং
জরাজন্মশোকং পুনর্ভ়িন্দতে নো ॥ ৯॥