অথ অষ্টমোঽধ্যাযঃ

অর্জুন উভ়াচ ।
কিং তদ্ ব্রহ্ম কিমধ্যাত্মং কিং কর্ম পুরুষোত্তম ।
অধিভূতং চ কিং প্রোক্তমধিদৈভ়ং কিমুচ্যতে ॥ ৮-১॥

অধিযজ্ঞঃ কথং কোঽত্র দেহেঽস্মিন্মধুসূদন ।
প্রযাণকালে চ কথং জ্ঞেযোঽসি নিযতাত্মভিঃ ॥ ৮-২॥

শ্রীভগভ়ানুভ়াচ ।
অক্ষরং ব্রহ্ম পরমং স্বভাভ়োঽধ্যাত্মমুচ্যতে ।
ভূতভাভ়োদ্ভভ়করো ভ়িসর্গঃ কর্মসংজ্ঞিতঃ ॥ ৮-৩॥

অধিভূতং ক্ষরো ভাভ়ঃ পুরুষশ্চাধিদৈভ়তম্ ।
অধিযজ্ঞোঽহমেভ়াত্র দেহে দেহভৃতাং ভ়র ॥ ৮-৪॥

অন্তকালে চ মামেভ় স্মরন্মুক্ত্বা কলেভ়রম্ ।
যঃ প্রযাতি স মদ্ভাভ়ং যাতি নাস্ত্যত্র সংশযঃ ॥ ৮-৫॥

যং যং ভ়াপি স্মরন্ভাভ়ং ত্যজত্যন্তে কলেভ়রম্ ।
তং তমেভ়ৈতি কৌন্তেয সদা তদ্ভাভ়ভাভ়িতঃ ॥ ৮-৬॥

তস্মাৎসর্ভ়েষু কালেষু মামনুস্মর যুধ্য চ ।
ময্যর্পিতমনোবুদ্ধির্মামেভ়ৈষ্যস্যসংশযঃ ॥ ৮-৭॥ (সংশযম্)
অভ্যাসযোগযুক্তেন চেতসা নান্যগামিনা ।
পরমং পুরুষং দিভ়্যং যাতি পার্থানুচিন্তযন্ ॥ ৮-৮॥

কভ়িং পুরাণমনুশাসিতার-
মণোরণীযংসমনুস্মরেদ্যঃ ।
সর্ভ়স্য ধাতারমচিন্ত্যরূপ-
মাদিত্যভ়র্ণং তমসঃ পরস্তাৎ ॥ ৮-৯॥

প্রযাণকালে মনসাঽচলেন
ভক্ত্যা যুক্তো যোগবলেন চৈভ় ।
ভ্রুভ়োর্মধ্যে প্রাণমাভ়েশ্য সম্যক্
স তং পরং পুরুষমুপৈতি দিভ়্যম্ ॥ ৮-১০॥

যদক্ষরং ভ়েদভ়িদো ভ়দন্তি
ভ়িশন্তি যদ্যতযো ভ়ীতরাগাঃ ।
যদিচ্ছন্তো ব্রহ্মচর্যং চরন্তি
তত্তে পদং সঙ্গ্রহেণ প্রভ়ক্ষ্যে ॥ ৮-১১॥

সর্ভ়দ্বারাণি সংযম্য মনো হৃদি নিরুধ্য চ ।
মূর্ধ্ন্যাধাযাত্মনঃ প্রাণমাস্থিতো যোগধারণাম্ ॥ ৮-১২॥

ওমিত্যেকাক্ষরং ব্রহ্ম ভ়্যাহরন্মামনুস্মরন্ ।
যঃ প্রযাতি ত্যজন্দেহং স যাতি পরমাং গতিম্ ॥ ৮-১৩॥

অনন্যচেতাঃ সততং যো মাং স্মরতি নিত্যশঃ ।
তস্যাহং সুলভঃ পার্থ নিত্যযুক্তস্য যোগিনঃ ॥ ৮-১৪॥

মামুপেত্য পুনর্জন্ম দুঃখালযমশাশ্বতম্ ।
নাপ্নুভ়ন্তি মহাত্মানঃ সংসিদ্ধিং পরমাং গতাঃ ॥ ৮-১৫॥

আব্রহ্মভুভ়নাল্লোকাঃ পুনরাভ়র্তিনোঽর্জুন ।
মামুপেত্য তু কৌন্তেয পুনর্জন্ম ন ভ়িদ্যতে ॥ ৮-১৬॥

সহস্রযুগপর্যন্তমহর্যদ্ ব্রহ্মণো ভ়িদুঃ ।
রাত্রিং যুগসহস্রান্তাং তেঽহোরাত্রভ়িদো জনাঃ ॥ ৮-১৭॥

অভ়্যক্তাদ্ ভ়্যক্তযঃ সর্ভ়াঃ প্রভভ়ন্ত্যহরাগমে ।
রাত্র্যাগমে প্রলীযন্তে তত্রৈভ়াভ়্যক্তসংজ্ঞকে ॥ ৮-১৮॥

ভূতগ্রামঃ স এভ়াযং ভূত্বা ভূত্বা প্রলীযতে ।
রাত্র্যাগমেঽভ়শঃ পার্থ প্রভভ়ত্যহরাগমে ॥ ৮-১৯॥

পরস্তস্মাত্তু ভাভ়োঽন্যোঽভ়্যক্তোঽভ়্যক্তাৎসনাতনঃ ।
যঃ স সর্ভ়েষু ভূতেষু নশ্যৎসু ন ভ়িনশ্যতি ॥ ৮-২০॥

অভ়্যক্তোঽক্ষর ইত্যুক্তস্তমাহুঃ পরমাং গতিম্ ।
যং প্রাপ্য ন নিভ়র্তন্তে তদ্ধাম পরমং মম ॥ ৮-২১॥

পুরুষঃ স পরঃ পার্থ ভক্ত্যা লভ্যস্ত্বনন্যযা ।
যস্যান্তঃস্থানি ভূতানি যেন সর্ভ়মিদং ততম্ ॥ ৮-২২॥

যত্র কালে ত্বনাভ়ৃত্তিমাভ়ৃত্তিং চৈভ় যোগিনঃ ।
প্রযাতা যান্তি তং কালং ভ়ক্ষ্যামি ভরতর্ষভ ॥ ৮-২৩॥

অগ্নির্জ্যোতিরহঃ শুক্লঃ ষণ্মাসা উত্তরাযণম্ ।
তত্র প্রযাতা গচ্ছন্তি ব্রহ্ম ব্রহ্মভ়িদো জনাঃ ॥ ৮-২৪॥

ধূমো রাত্রিস্তথা কৃষ্ণঃ ষণ্মাসা দক্ষিণাযনম্ ।
তত্র চান্দ্রমসং জ্যোতির্যোগী প্রাপ্য নিভ়র্ততে ॥ ৮-২৫॥

শুক্লকৃষ্ণে গতী হ্যেতে জগতঃ শাশ্বতে মতে ।
একযা যাত্যনাভ়ৃত্তিমন্যযাভ়র্ততে পুনঃ ॥ ৮-২৬॥

নৈতে সৃতী পার্থ জানন্যোগী মুহ্যতি কশ্চন ।
তস্মাৎসর্ভ়েষু কালেষু যোগযুক্তো ভভ়ার্জুন ॥ ৮-২৭॥

ভ়েদেষু যজ্ঞেষু তপঃসু চৈভ়
দানেষু যৎপুণ্যফলং প্রদিষ্টম্ ।
অত্যেতি তৎসর্ভ়মিদং ভ়িদিত্বা
যোগী পরং স্থানমুপৈতি চাদ্যম্ ॥ ৮-২৮॥

ওঁ তৎসদিতি শ্রীমদ্ভগভ়দ্গীতাসূপনিষৎসু ব্রহ্মভ়িদ্যাযাং যোগশাস্ত্রে শ্রীকৃষ্ণার্জুনসংভ়াদে অক্ষরব্রহ্মযোগো নামাষ্টমোঽধ্যাযঃ ॥ ৮॥