ಹರಿಸ್ತೋತ್ರಮ್

ಜಗಜ್ಜಾಲಪಾಲಂ ಕಚತ್ಕಣ್ಠಮಾಲಂ
ಶರಚ್ಚನ್ದ್ರಭಾಲಂ ಮಹಾದೈತ್ಯಕಾಲಮ್ .
ನಭೋನೀಲಕಾಯಂ ದುರಾವಾರಮಾಯಂ
ಸುಪದ್ಮಾಸಹಾಯಂ ಭಜೇಽಹಂ ಭಜೇಽಹಮ್ .. ೧..

ಸದಾಮ್ಭೋಧಿವಾಸಂ ಗಲತ್ಪುಷ್ಪಹಾಸಂ
ಜಗತ್ಸನ್ನಿವಾಸಂ ಶತಾದಿತ್ಯಭಾಸಮ್ .
ಗದಾಚಕ್ರಶಸ್ತ್ರಂ ಲಸತ್ಪೀತವಸ್ತ್ರಂ
ಹಸಚ್ಚಾರುವಕ್ತ್ರಂ ಭಜೇಽಹಂ ಭಜೇಽಹಮ್ .. ೨..

ರಮಾಕಣ್ಠಹಾರಂ ಶ್ರುತಿವ್ರಾತಸಾರಂ
ಜಲಾನ್ತರ್ವಿಹಾರಂ ಧರಾಭಾರಹಾರಮ್ .
ಚಿದಾನನ್ದರೂಪಂ ಮನೋಜ್ಞಸ್ವರೂಪಂ
ಧೃತಾನೇಕರೂಪಂ ಭಜೇಽಹಂ ಭಜೇಽಹಮ್ .. ೩..

ಜರಾಜನ್ಮಹೀನಂ ಪರಾನನ್ದಪೀನಂ
ಸಮಾಧಾನಲೀನಂ ಸದೈವಾನವೀನಮ್ .
ಜಗಜ್ಜನ್ಮಹೇತುಂ ಸುರಾನೀಕಕೇತುಂ
ತ್ರಿಲೋಕೈಕಸೇತುಂ ಭಜೇಽಹಂ ಭಜೇಽಹಮ್ .. ೪..

ಕೃತಾಮ್ನಾಯಗಾನಂ ಖಗಾಧೀಶಯಾನಂ
ವಿಮುಕ್ತೇರ್ನಿದಾನಂ ಹರಾರಾತಿಮಾನಮ್ .
ಸ್ವಭಕ್ತಾನುಕೂಲಂ ಜಗದ್ವೃಕ್ಷಮೂಲಂ
ನಿರಸ್ತಾರ್ತಶೂಲಂ ಭಜೇಽಹಂ ಭಜೇಽಹಮ್ .. ೫..

ಸಮಸ್ತಾಮರೇಶಂ ದ್ವಿರೇಫಾಭಕೇಶಂ
ಜಗದ್ಬಿಮ್ಬಲೇಶಂ ಹೃದಾಕಾಶದೇಶಮ್ .
ಸದಾ ದಿವ್ಯದೇಹಂ ವಿಮುಕ್ತಾಖಿಲೇಹಂ
ಸುವೈಕುಣ್ಠಗೇಹಂ ಭಜೇಽಹಂ ಭಜೇಽಹಮ್ .. ೬..

ಸುರಾಲಿಬಲಿಷ್ಠಂ ತ್ರಿಲೋಕೀವರಿಷ್ಠಂ
ಗುರೂಣಾಂ ಗರಿಷ್ಠಂ ಸ್ವರೂಪೈಕನಿಷ್ಠಮ್ .
ಸದಾ ಯುದ್ಧಧೀರಂ ಮಹಾವೀರವೀರಂ
ಮಹಾಮ್ಭೋಧಿತೀರಂ ಭಜೇಽಹಂ ಭಜೇಽಹಮ್ .. ೭..

ರಮಾವಾಮಭಾಗಂ ತಲಾನಗ್ರನಾಗಂ
ಕೃತಾಧೀನಯಾಗಂ ಗತಾರಾಗರಾಗಮ್ .
ಮುನೀನ್ದ್ರೈಃ ಸುಗೀತಂ ಸುರೈಃ ಸಮ್ಪರೀತಂ
ಗುಣೌಧೈರತೀತಂ ಭಜೇಽಹಂ ಭಜೇಽಹಮ್ .. ೮..

.. ಫಲಶ್ರುತಿ ..

ಇದಂ ಯಸ್ತು ನಿತ್ಯಂ ಸಮಾಧಾಯ ಚಿತ್ತಂ
ಪಠೇದಷ್ಟಕಂ ಕಣ್ಠಹಾರಂ ಮುರಾರೇಃ .
ಸ ವಿಷ್ಣೋರ್ವಿಶೋಕಂ ಧ್ರುವಂ ಯಾತಿ ಲೋಕಂ
ಜರಾಜನ್ಮಶೋಕಂ ಪುನರ್ವಿನ್ದತೇ ನೋ .. ೯..