ನಾರಾಯಣಸೂಕ್ತಮ್

.. ನಾರಾಯಣಸೂಕ್ತಮ್ ..

ಓಂ ಸ॒ಹ ನಾ॑ವವತು . ಸ॒ಹ ನೌ॑ ಭುನಕ್ತು . ಸ॒ಹ ವೀ॒ರ್ಯಂ॑ ಕರವಾವಹೈ .
ತೇ॒ಜ॒ಸ್ವಿನಾ॒ವಧೀ॑ತಮಸ್ತು॒ ಮಾ ವಿ॑ದ್ವಿಷಾ॒ವಹೈ᳚ ..

ಓಂ ಶಾನ್ತಿಃ॒ ಶಾನ್ತಿಃ॒ ಶಾನ್ತಿಃ॑ ..

ಓಂ .. ಸ॒ಹ॒ಸ್ರ॒ಶೀರ್॑ಷನ್ದೇ॒ವಂ॒ ವಿ॒ಶ್ವಾಕ್ಷಂ॑ವಿಁ॒ಶ್ವಶ॑ಮ್ಭುವಮ್ .
ವಿಶ್ವಂ॑ ನಾ॒ರಾಯ॑ಣನ್ದೇ॒ವ॒ಮ॒ಕ್ಷರಂ॑ ಪರ॒ಮಮ್ಪದಮ್ .
ವಿ॒ಶ್ವತಃ॒ ಪರ॑ಮಾನ್ನಿ॒ತ್ಯಂ॒ವಿಁ॒ಶ್ವಂ ನಾ॑ರಾಯ॒ಣಗ್ಂ ಹ॑ರಿಮ್ .
ವಿಶ್ವ॑ಮೇ॒ವೇದಮ್ಪುರು॑ಷ॒ಸ್ತದ್ವಿಶ್ವಮುಪ॑ಜೀವತಿ .
ಪತಿಂ॒ವಿಁಶ್ವ॑ಸ್ಯಾ॒ತ್ಮೇಶ್ವ॑ರ॒ಗ್ಂ ಶಾಶ್ವ॑ತಗ್ಂ ಶಿ॒ವಮ॑ಚ್ಯುತಮ್ .
ನಾ॒ರಾಯ॒ಣಂ ಮ॑ಹಾಜ್ಞೇ॒ಯಂ॒ವಿಁ॒ಶ್ವಾತ್ಮಾ॑ನಮ್ಪ॒ರಾಯ॑ಣಮ್ .
ನಾ॒ರಾಯ॒ಣಪ॑ರೋ ಜ್ಯೋ॒ತಿ॒ರಾ॒ತ್ಮಾ ನಾ॑ರಾಯ॒ಣಃ ಪ॑ರಃ .
ನಾ॒ರಾಯ॒ಣಪರಂ॑ ಬ್ರ॒ಹ್ಮ॒ ತತ್ತ್ವಂ ನಾ॑ರಾಯ॒ಣಃ ಪ॑ರಃ .
ನಾ॒ರಾಯ॒ಣಪ॑ರೋ ಧ್ಯಾ॒ತಾ॒ ಧ್ಯಾ॒ನಂ ನಾ॑ರಾಯ॒ಣಃ ಪ॑ರಃ .
ಯಚ್ಚ॑ ಕಿ॒ಞ್ಚಿಜ್ಜಗತ್ಸ॒ರ್ವಂ॒ ದೃ॒ಶ್ಯತೇ᳚ ಶ್ರೂಯ॒ತೇಽಪಿ॑ ವಾ ..

ಅನ್ತ॑ರ್ಬ॒ಹಿಶ್ಚ॑ ತತ್ಸ॒ರ್ವಂ॒ವ್ಯಾಁ॒ಪ್ಯ ನಾ॑ರಾಯ॒ಣಃ ಸ್ಥಿ॑ತಃ .
ಅನನ್ತ॒ಮವ್ಯಯಂ॑ ಕ॒ವಿಗ್ಂ ಸ॑ಮು॒ದ್ರೇಂಽತಂ॑ವಿಁ॒ಶ್ವಶ॑ಮ್ಭುವಮ್ .
ಪ॒ದ್ಮ॒ಕೋ॒ಶಪ್ರ॑ತೀಕಾ॒ಶ॒ಗ್ಂ ಹೃ॒ದಯಂ॑ ಚಾಪ್ಯ॒ಧೋಮು॑ಖಮ್ .
ಅಧೋ॑ ನಿ॒ಷ್ಟ್ಯಾ ವಿ॑ತಸ್ಯಾ॒ನ್ತೇ॒ ನಾ॒ಭ್ಯಾಮು॑ಪರಿ॒ ತಿಷ್ಠ॑ತಿ .
ಜ್ವಾ॒ಲ॒ಮಾ॒ಲಾಕು॑ಲಮ್ಭಾ॒ತೀ॒ ವಿ॒ಶ್ವಸ್ಯಾ॑ಯತ॒ನಂ ಮ॑ಹತ್ .
ಸನ್ತ॑ತಗ್ಂ ಶಿ॒ಲಾಭಿ॑ಸ್ತು॒ ಲಮ್ಬ॑ತ್ಯಾಕೋಶ॒ಸನ್ನಿ॑ಭಮ್ .
ತಸ್ಯಾನ್ತೇ॑ ಸುಷಿ॒ರಗ್ಂ ಸೂ॒ಕ್ಷ್ಮನ್ತಸ್ಮಿನ್᳚ ಸ॒ರ್ವಮ್ಪ್ರತಿ॑ಷ್ಠಿತಮ್ .
ತಸ್ಯ॒ ಮಧ್ಯೇ॑ ಮ॒ಹಾನ॑ಗ್ನಿರ್ವಿ॒ಶ್ವಾರ್ಚಿ॑ರ್ವಿ॒ಶ್ವತೋ॑ಮುಖಃ .
ಸೋಽಗ್ರ॑ಭು॒ಗ್ವಿಭ॑ಜನ್ತಿ॒ಷ್ಠ॒ನ್ನಾಹಾ॑ರಮಜ॒ರಃ ಕ॒ವಿಃ .
ತಿ॒ರ್ಯ॒ಗೂ॒ರ್ಧ್ವಮ॑ಧಶ್ಶಾ॒ಯೀ॒ ರ॒ಶ್ಮಯ॑ಸ್ತಸ್ಯ॒ ಸನ್ತ॑ತಾ .
ಸ॒ನ್ತಾ॒ಪಯ॑ತಿ ಸ್ವನ್ದೇ॒ಹಮಾಪಾ॑ದತಲ॒ಮಸ್ತ॑ಕಃ .
ತಸ್ಯ॒ ಮಧ್ಯೇ॒ ವಹ್ನಿ॑ಶಿಖಾ ಅ॒ಣೀಯೋ᳚ರ್ಧ್ವಾ ವ್ಯ॒ವಸ್ಥಿ॑ತಃ .
ನೀ॒ಲತೋ॑ಯದ॑ಮಧ್ಯ॒ಸ್ಥಾ॒ದ್ವಿ॒ಧ್ಯುಲ್ಲೇ॑ಖೇವ॒ ಭಾಸ್ವ॑ರಾ .
ನೀ॒ವಾರ॒ಶೂಕ॑ವತ್ತ॒ನ್ವೀ॒ ಪೀ॒ತಾ ಭಾ᳚ಸ್ವತ್ಯ॒ಣೂಪ॑ಮಾ .
ತಸ್ಯಾಃ᳚ ಶಿಖಾ॒ಯಾ ಮ॑ಧ್ಯೇ ಪ॒ರಮಾ᳚ತ್ಮಾ ವ್ಯ॒ವಸ್ಥಿ॑ತಃ .
ಸ ಬ್ರಹ್ಮ॒ ಸ ಶಿವಃ॒ ಸ ಹರಿಃ॒ ಸೇನ್ದ್ರಃ॒ ಸೋಽಕ್ಷ॑ರಃ ಪರ॒ಮಃ ಸ್ವ॒ರಾಟ್ ..

ಋತಗ್ಂ ಸ॒ತ್ಯಮ್ಪ॑ರಮ್ಬ್ರ॒ಹ್ಮ॒ ಪು॒ರುಷಂ॑ ಕೃಷ್ಣ॒ಪಿಙ್ಗ॑ಲಮ್ .
ಊ॒ರ್ಧ್ವರೇ॑ತಂವಿಁ॑ರೂಪಾ॒ಕ್ಷಂ॒ವಿಁ॒ಶ್ವರೂ॑ಪಾಯ॒ ವೈ ನಮೋ॒ ನಮಃ॑ ..

ಓಂ ನಾ॒ರಾ॒ಯ॒ಣಾಯ॑ ವಿ॒ದ್ಮಹೇ॑ ವಾಸುದೇ॒ವಾಯ॑ ಧೀಮಹಿ .
ತನ್ನೋ॑ ವಿಷ್ಣುಃ ಪ್ರಚೋ॒ದಯಾ᳚ತ್ ..

.. ಓಂ ಶಾನ್ತಿಃ॒ ಶಾನ್ತಿಃ॒ ಶಾನ್ತಿಃ॑ ..