ಶ್ರೀವೈಕುಣ್ಠಗದ್ಯಮ್

ಶ್ರೀವೈಕುಣ್ಠಗದ್ಯಮ್
ಯಾಮುನಾರ್ಯಸುಧಾಮ್ಭೋಧಿಮವಗಾಹ್ಯ ಯಥಾಮತಿ .
ಆದಾಯ ಭಕ್ತಿಯೋಗಾಖ್ಯಂ ರತ್ನಂ ಸನ್ದರ್ಶಯಾಮ್ಯಹಮ್ ..

ಸ್ವಾಧೀನತ್ರಿವಿಧಚೇತನಾಚೇತನಸ್ವರೂಪಸ್ಥಿತಿಪ್ರವೃತ್ತಿಭೇದಂ,
ಕ್ಲೇಶಕರ್ಮಾದ್ಯಶೇಷದೋಷಾಸಂಸ್ಪೃಷ್ಟಂ,ಸ್ವಾಭಾವಿಕಾನವಧಿಕಾತಿಶ-ಜ್ಞಾನಬಲೈಶ್ವರ್ಯವೀರ್ಯಶಕ್ತಿತೇಜಃಪ್ರಭೃತ್ಯಸಙ್ಖ್ಯೇಯಕಲ್ಯಾಣಗುಣಗಣೌಘಮಹಾರ್ಣವಂ,
ಪರಮಪುರುಷಂ, ಭಗವನ್ತಂ, ನಾರಾಯಣಂ, ಸ್ವಾಮಿತ್ವೇನ ಸುಹೃತ್ತ್ವೇನ ಗುರುತ್ವೇನ ಚ
ಪರಿಗೃಹ್ಯ ಐಕಾನ್ತಿಕಾತ್ಯನ್ತಿಕತತ್ಪಾದಾಮ್ಬುಜದ್ವಯಪರಿಚರ್ಯೈಕಮನೋರಥಃ,
ತತ್ಪ್ರಾಪ್ತಯೇ ಚ ತತ್ಪಾದಾಮ್ಬುಜದ್ವಯಪ್ರಪತ್ತೇರನ್ಯನ್ನ ಮೇ ಕಲ್ಪಕೋಟಿಸಹಸ್ರೇಣಾಪಿ
ಸಾಧನಮಸ್ತೀತಿ ಮನ್ವಾನಃ, ತಸ್ಯೈವ ಭಗವತೋ ನಾರಾಯಣಸ್ಯಾಖಿಲಸತ್ತ್ವ-
ದಯೈಕಸಾಗರಸ್ಯಾನಾಲೋಚಿತಗುಣಗಣಾಖಣ್ಡಜನಾನುಕೂಲಮರ್ಯಾದಾಶೀಲವತಃ
ಸ್ವಾಭಾವಿಕಾನವಧಿಕಾತಿಶಯಗುಣವತ್ತಯಾ ದೇವತಿರ್ಯಙ್ಮನುಷ್ಯಾದ್ಯಖಿಲಜನ-
ಹೃದಯಾನನ್ದನಸ್ಯ ಆಶ್ರಿತವಾತ್ಸಲ್ಯೈಕಜಲಧೇಃ ಭಕ್ತಜನಸಂಶ್ಲೇಷೈಕಭೋಗಸ್ಯ
ನಿತ್ಯಜ್ಞಾನಕ್ರಿಯೈಶ್ವರ್ಯಭೋಗಸಾಮಗ್ರೀಸಮೃದ್ಧಸ್ಯ ಮಹಾವಿಭೂತೇಃ
ಶ್ರೀಮಚ್ಚರಣಾರವಿನ್ದಯುಗಲಮನನ್ಯಾತ್ಮಸಞ್ಜೀವನೇನ ತದ್ಗತಸರ್ವಭಾವೇನ ಶರಣಮನುವ್ರಜೇತ್ ..

ತತಶ್ಚ ಪ್ರತ್ಯಹಮಾತ್ಮೋಜ್ಜೀವನಾಯೈವಮನುಸ್ಮರೇತ್ .
ಚತುರ್ದಶಭುವನಾತ್ಮಕಮಣ್ಡಂ ದಶಗುಣಿತೋತ್ತರಂ ಚಾವರಣಸಪ್ತಕಂ
ಸಮಸ್ತಂ ಕಾರ್ಯಕಾರಣಜಾತಮತೀತ್ಯ ಪರಮವ್ಯೋಮಶಬ್ದಾಭಿಧೇಯೇ
ಬ್ರಹ್ಮಾದೀನಾಂ ವಾಙ್ಮನಸಾಽಗೋಚರೇ ಶ್ರೀಮತಿ ವೈಕುಣ್ಠೇ ದಿವ್ಯಲೋಕೇ
ಸನಕವಿಧಿಶಿವಾದಿಭಿರಪಿ ಅಚಿನ್ತ್ಯಸ್ವಭಾವೈಶ್ವರ್ಯೈಃ
ನಿತ್ಯಸಿದ್ಧೈರನನ್ತೈಃ ಭಗವದಾನುಕೂಲ್ಯೈಕಭೋಗೈಃ ದಿವ್ಯಪುರುಷೈಃ
ಮಹಾತ್ಮಭಿರಾಪೂರಿತೇ, ತೇಷಾಮಪಿ ಇಯತ್ಪರಿಮಾಣಮಿಯದೈಶ್ವರ್ಯಂ
ಈದೃಶಸ್ವಭಾವಮಿತಿ ಪರಿಚ್ಛೇತ್ತುಮಯೋಗ್ಯೇ ದಿವ್ಯಾವರಣಶತಸಹಸ್ರಾವೃತೇ ದಿವ್ಯಕಲ್ಪಕತರೂಪಶೋಭಿತೇ ದಿವ್ಯೋದ್ಯಾನಶತಸಹಸ್ರಕೋಟಿಭಿರಾವೃತೇ ಅತಿಪ್ರಮಾಣೇ ದಿವ್ಯಾಯತನೇ ಕಸ್ಮಿಂಶ್ಚಿದ್ವಿಚಿತ್ರದಿವ್ಯರತ್ನಮಯದಿವ್ಯಾಸ್ಥಾನಮಣ್ಡಪೇ ದಿವ್ಯರತ್ನಸ್ತಮ್ಭಶತಸಹಸ್ರಕೋಟಿಭಿರುಪಶೋಭಿತೇ ದಿವ್ಯನಾನಾರತ್ನಕೃತಸ್ಥಲವಿಚಿತ್ರಿತೇ ದಿವ್ಯಾಲಙ್ಕಾರಾಲಙ್ಕೃತೇ ಪರಿತಃ ಪತಿತೈಃ ಪತಮಾನೈಃ ಪಾದಪಸ್ಥೈಶ್ಚ ನಾನಾಗನ್ಧವರ್ಣೈಃ ದಿವ್ಯಪುಷ್ಪೈಃ ಶೋಭಮಾನದಿವ್ಯಪುಷ್ಪೋಪವನೈರುಪಶೋಭಿತೇ, ಸಙ್ಕೀರ್ಣಪಾರಿಜಾತಾದಿಕಲ್ಪದ್ರುಮೋಪಶೋಭಿತೈರಸಙ್ಕೀರ್ಣೈಶ್ಚ ಕೈಶ್ಚಿದನ್ತಸ್ಥಪುಷ್ಪರತ್ನಾದಿನಿರ್ಮಿತದಿವ್ಯಲೀಲಾಮಣ್ಟಪಶತಸಹಸ್ರೋಪ- ಶೋಭಿತೈಸ್ಸರ್ವದಾನುಭೂಯಮಾನೈರಪ್ಯಪೂರ್ವವದಾಶ್ಚರ್ಯಮಾವಹದ್ಭಿಃ ಕ್ರೀಡಾಶೈಲಶತಸಹಸ್ರೈರಲಙ್ಕೃತೈಃ ಕೈಶ್ಚಿನ್ನಾರಾಯಣದಿವ್ಯಲೀಲಾಽಸಾಧಾರಣೈಃ ಕೈಶ್ಚಿತ್ಪದ್ಮವನಾಲಯಾ ದಿವ್ಯಲೀಲಾಸಾಧಾರಣೈಃ ಕೈಶ್ಚಿಚ್ಛುಕಶಾರಿಕಾಮಯೂರಕೋಕಿಲಾದಿಭಿಃ ಕೋಮಲಕೂಜಿತೈರಾಕುಲೈಃ ದಿವ್ಯೋದ್ಯಾನಶತಸಹಸ್ರಕೋಟಿಭಿರಾವೃತೇ, ಮಣಿಮುಕ್ತಾಪ್ರವಾಲಕೃತಸೋಪಾನೈಃ ದಿವ್ಯಾಮಲಾಮೃತರಸೋದಕೈಃ ದಿವ್ಯಾಣ್ಡಜವರೈರತಿರಮಣೀಯದರ್ಶನೈಃ
ಅತಿಮನೋಹರಮಧುರಸ್ವರೈರಾಕುಲೈಃ ಅನ್ತಸ್ಸ್ಥಮುಕ್ತಾಮಯದಿವ್ಯಕ್ರೀಡಾಸ್ಥಾನೋಪಶೋಭಿತೈಃ
ದಿವ್ಯಸೌಗನ್ಧಿಕವಾಪೀಶತಸಹಸ್ರೈಃ ದಿವ್ಯರಾಜಹಂಸಾವಲೀವಿರಾಜಿತೈರಾವೃತೇ,
ನಿರಸ್ತಾತಿಶಯನಾನನ್ದೈಕರಸತಯಾ ಚಾನನ್ತ್ಯಾಚ್ಚ ಪ್ರವಿಷ್ಟಾನುನ್ಮಾದಯದ್ಭಿಃ
ಕ್ರೀಡೋದ್ದೇಶೈರ್ವಿರಾಜಿತೇ, ತತ್ರ ತತ್ರ ಕೃತದಿವ್ಯಪುಷ್ಪಪರ್ಯಙ್ಕೋಪಶೋಭಿತೇ,
ನಾನಾಪುಷ್ಪಾಸವಾಸ್ವಾದಮತ್ತಭೃಙ್ಗಾವಲೀಭಿರುದ್ಗೀಯಮಾನದಿವ್ಯಗಾನ್ಧರ್ವೇಣಾಪೂರಿತೇ
ಚನ್ದನಾಗರುಕರ್ಪೂರದಿವ್ಯಪುಷ್ಪಾವಗಾಹಿ ಮನ್ದಾನಿಲಾಸೇವ್ಯಮಾನೇ, ಮಧ್ಯೇ
ಪುಷ್ಪಸಞ್ಚಯವಿಚಿತ್ರಿತೇ, ಮಹತಿ ದಿವ್ಯಯೋಗಪರ್ಯಙ್ಕೇ ಅನನ್ತಭೋಗಿನಿ,
ಶ್ರೀಮದ್ವೈಕುಣ್ಠೈಶ್ವರ್ಯಾದಿ ದಿವ್ಯಲೋಕಮಾತ್ಮಕಾನ್ತ್ಯಾ ವಿಶ್ವಮಾಪ್ಯಾಯಯನ್ತ್ಯಾ
ಶೇಷಶೇಷಾಶನಾದಿ ಸರ್ವಂ ಪರಿಜನಂ ಭಗವತಸ್ತತ್ತದವಸ್ಥೋಚಿತಪರಿಚರ್ಯಾಯಾಮಾಜ್ಞಾಪಯನ್ತ್ಯಾ,
ಶೀಲರೂಪಗುಣವಿಲಾಸಾದಿಭಿರಾತ್ಮಾನುರೂಪಯಾ ಶ್ರಿಯಾ ಸಹಾಸೀನಂ,
ಪ್ರತ್ಯಗ್ರೋನ್ಮೀಲಿತಸರಸಿಜಸದೃಶನಯನಯುಗಲಂ, ಸ್ವಚ್ಛನೀಲಜೀಮೂತಸಙ್ಕಾಶಂ
ಅತ್ಯುಜ್ವಲಪೀತವಾಸಸಂ ಸ್ವಯಾ ಪ್ರಭಯಾಽತಿನಿರ್ಮಲಯಾಽತಿಶೀತಲಯಾಽತಿಕೋಮಲಯಾ
ಸ್ವಚ್ಛಮಾಣಿಕ್ಯಾಭಯಾ ಕೃತ್ಸ್ನಂ ಜಗದ್ಭಾವಯನ್ತಂ
ಅಚಿನ್ತ್ಯದಿವ್ಯಾದ್ಭುತನಿತ್ಯಯೌವನಸ್ವಭಾವಲಾವಣ್ಯಮಯಾಮೃತಸಾಗರಂ,
ಅತಿಸೌಕುಮಾರ್ಯಾದೀಷತ್ಪ್ರಸ್ವಿನ್ನವದಾಲಕ್ಷ್ಯಮಾಣಲಲಾಟಫಲಕ-
ದಿವ್ಯಾಲಕಾವಲೀವಿರಾಜಿತಂ, ಪ್ರಬುದ್ಧಮುಗ್ಧಾಮ್ಬುಜಚಾರುಲೋಚನಂ,
ಸವಿಭ್ರಮಭ್ರೂಲತಮುಜ್ವಲಾಧರಂ, ಶುಚಿಸ್ಮಿತಂ, ಕೋಮಲಗಣ್ಡಮುನ್ನಸಂ,
ಉದಗ್ರಪೀನಾಂಸವಿಲಮ್ಬಿಕುಣ್ಡಲಾಲಕಾವಲೀಬನ್ಧುರಕಮ್ಬುಕನ್ಧರಂ,
ಪ್ರಿಯಾವತಂಸೋತ್ಪಲಕರ್ಣಭೂಷಣಶ್ಲಥಾಲಕಾಬನ್ಧವಿಮರ್ದಶಂಸಿಭಿಃ
ಚತುರ್ಭಿರಾಜಾನುವಿಲಮ್ಬಿಭಿರ್ಭುಜೈರ್ವಿರಾಜಿತಂ, ಅತಿಕೋಮಲ
ದಿವ್ಯರೇಖಾಲಙ್ಕೃತಾತಾಮ್ರಕರತಲಂ, ದಿವ್ಯಾಙ್ಗುಲೀಯಕವಿರಾಜಿತಂ
ಅತಿಕೋಮಲದಿವ್ಯನಖಾವಲೀವಿರಾಜಿತಮತಿರಕ್ತಾಙ್ಗುಲೀಭಿರಲಙ್ಕೃತಂ,
ತತ್ಕ್ಷಣೋನ್ಮೀಲಿತಪುಣ್ಡರೀಕಸದೃಶಚರಣಯುಗಲಮತಿಮನೋಹರಕಿರೀಟಮಕುಟಚೂಡಾವತಂಸ-
ಮಕರಕುಣ್ಡಲಗ್ರೈವೇಯಕಹಾರಕೇಯೂರಕಟಕಶ್ರೀವತ್ಸಕೌಸ್ತುಭಮುಕ್ತಾದಾಮೋದರಬನ್ಧನಪೀತಾಮ್ಬರ-
ಕಾಞ್ಚೀಗುಣನೂಪುರಾದಿಭಿರತ್ಯನ್ತಸುಖಸ್ಪರ್ಶೈರ್ದಿವ್ಯಗನ್ಧೈರ್ಭೂಷಣೈರ್ಭೂಷಿತಂ, ಶ್ರೀಮತ್ಯಾ ವೈಜಯನ್ತ್ಯಾ
ವನಮಾಲಯಾ ವಿರಾಜತಂ, ಶಙ್ಖಚಕ್ರಗದಾಸಿಶಾರ್ಙ್ಗಾದಿದಿವ್ಯಾಯುಧೈಃ ಸೇವ್ಯಮಾನಂ,
ಸ್ವಸಙ್ಕಲ್ಪಮಾತ್ರಾವಕೢಪ್ತಜಗಜ್ಜನ್ಮಸ್ಥಿತಿಧ್ವಂಸಾದಿಕೇ ಶ್ರೀಮತಿ ವಿಷ್ವಕ್ಸೇನೇ
ನ್ಯಸ್ತಸಮಸ್ತಾತ್ಮೈಶ್ವರ್ಯಂ, ವೈನತೇಯಾದಿಭಿಃ ಸ್ವಭಾವತೋ ನಿರಸ್ತಸಮಸ್ತಸಾಂಸಾರಿಕಸ್ವಭಾವೈಃ ಭಗವತ್ಪರಿಚರ್ಯಾಕರಣಯೋಗ್ಯೈರ್ಭಗವತ್ಪರಿಚರ್ಯೈಕಭೋಗೈಃ ನಿತ್ಯಸಿದ್ಧೈರನನ್ತೈರ್ಯಥಾಯೋಗಂ
ಸೇವ್ಯಮಾನಮಾತ್ಮಭೋಗೇನಾನುಸಂಹಿತಪರಾದಿಕಾಲಂ,
ದಿವ್ಯಾಮಲಕೋಮಲಾವಲೋಕನೇನ ವಿಶ್ವಮಾಹ್ಲಾದಯನ್ತಮೀಷದುನ್ಮೀಲಿತ-
ಮುಖಾಮ್ಬುಜೋದರವಿನಿರ್ಗತೇನ ದಿವ್ಯಾನನಾರವಿನ್ದಶೋಭಾಜನನೇನ
ದಿವ್ಯಗಾಮ್ಭೀರ್ಯೌದಾರ್ಯಸೌನ್ದರ್ಯಮಾಧುರ್ಯಾದ್ಯನವಧಿಕಗುಣಗಣವಿಭೂಷಿತೇನ
ಅತಿಮನೋಹರದಿವ್ಯಭಾವಗರ್ಭೇಣ ದಿವ್ಯಲೀಲಾಲಾಪಾಮೃತೇನ
ಅಖಿಲಜನಹೃದಯಾನ್ತರಾಣ್ಯಾಪೂರಯನ್ತಂ ಭಗವನ್ತಂ ನಾರಾಯಣಂ
ಧ್ಯಾನಯೋಗೇನ ದೃಷ್ಟ್ವಾ ತತೋ ಭಗವತೋ ನಿತ್ಯಸ್ವಾಮ್ಯಮಾತ್ಮನೋ
ನಿತ್ಯದಾಸ್ಯಂ ಚ ಯಥಾವಸ್ಥಿತಮನುಸನ್ಧಾಯ ಕದಾಹಂ ಭಗವನ್ತಂ
ನಾರಾಯಣಂ ಮಮ ಕುಲನಾಥಂ ಮಮ ಕುಲದೈವತಂ ಮಮ ಕುಲಧನಂ ಮಮ ಭೋಗ್ಯಂ ಮಮ ಮಾತರಂ ಮಮ ಪಿತರಂ ಮಮ ಸರ್ವಂ ಸಾಕ್ಷಾತ್ಕರವಾಣಿ ಚಕ್ಷೂಷಾ .
ಕದಾಹಂ ಭಗವತ್ಪಾದಾಮ್ಬುಜದ್ವಯಂ ಶಿರಸಾ ಸಙ್ಗ್ರಹೀಷ್ಯಾಮಿ .
ಕದಾಹಂ ಭಗವತ್ಪಾದಾಮ್ಬುಜದ್ವಯಂ ಪರಿಚರ್ಯಾಽಽಶಯಾ ನಿರಸ್ತಸಮಸ್ತೇತರ-
ಭೋಗಾಶೋಽಪಗತಸಮಸ್ತಸಾಂಸಾರಿಕಸ್ವಭಾವಃ ತತ್ಪಾದಾಮ್ಬುಜದ್ವಯಂ
ಪ್ರವೇಕ್ಷ್ಯಾಮಿ . ಕದಾಹಂ ಭಗವತ್ಪಾದಾಮ್ಬುಜದ್ವಯಂ ಪರಿಚರ್ಯಾಕರಣಯೋಗ್ಯಃ
ತತ್ಪಾದೌ ಪರಿಚರಿಷ್ಯಾಮಿ . ಕದಾ ಮಾಂ ಭಗವಾನ್ ಸ್ವಕೀಯಯಾಽತಿಶೀತಲಯಾ
ದೃಶಾಽವಲೋಕ್ಯ ಸ್ನಿಗ್ಧಗಮ್ಭೀರಮಧುರಯಾ ಗಿರಾ ಪರಿಚರ್ಯಾಯಾಂ
ಆಜ್ಞಾಪಯಿಷ್ಯತೀತಿ ಭಗವತ್ಪರಿಚರ್ಯಾಯಾಮಾಶಾಂ ವರ್ಧಯಿತ್ವಾ
ತಯೈವಾಶಯಾ ತತ್ಪ್ರಸಾದೋಪಬೃಂಹಿತಯಾ ಭಗವನ್ತಮುಪೇತ್ಯ ದೂರಾದೇವ
ಭಗವನ್ತಂ ಶೇಷಭೋಗೇ ಶ್ರಿಯಾ ಸಹಾಸೀನಂ ವೈನತೇಯಾದಿಭಿಃ
ಸೇವ್ಯಮಾನಂ ``ಸಮಸ್ತಪರಿವಾರಾಯ ಶ್ರೀಮತೇ ನಾರಾಯಣಾಯ ನಮ''
ಇತಿ ಪ್ರಣಮ್ಯೋತ್ಥಾಯೋತ್ಥಾಯ ಪುನಃ ಪುನಃ ಪ್ರಣಮ್ಯ ಅತ್ಯನ್ತ
ಸಾಧ್ವಸವಿನಯಾವನತೋ ಭೂತ್ವಾ ಭಗವತ್ಪಾರಿಷದಗಣನಾಯಕೈರ್ದ್ವಾರಪಾಲೈಃ
ಕೃಪಯಾ ಸ್ನೇಹಗರ್ಭಯಾ ದೃಶಾಽವಲೋಕಿತಃ ಸಮ್ಯಗಭಿವನ್ದಿತೈಃ
ತೈಸ್ತೈರೇವಾನುಮತೋ ಭಗವನ್ತಮುಪೇತ್ಯ ಶ್ರೀಮತಾ ಮೂಲಮನ್ತ್ರೇಣ ಮಾಂ
ಐಕಾನ್ತಿಕಾತ್ಯನ್ತಿಕಪರಿಚರ್ಯಾಕರಣಾಯ ಪರಿಗೃಹ್ಣೀಷ್ವೇತಿ ಯಾಚಮಾನಃ
ಪ್ರಣಮ್ಯಾತ್ಮಾನಂ ಭಗವತೇ ನಿವೇದಯೇತ್ .
ತತೋ ಭಗವತಾ ಸ್ವಯಮೇವಾತ್ಮಸಞ್ಜೀವನೇನ ಮರ್ಯಾದಾಶೀಲವತಾ
ಅತಿಪ್ರೇಮಾನ್ವಿತೇನಾವಲೋಕನೇನಾವಲೋಕ್ಯ ಸರ್ವದೇಶಸರ್ವಕಾಲ-
ಸರ್ವಾವಸ್ಥೋಚಿತಾತ್ಯನ್ತಶೇಷಭಾವಾಯ ಸ್ವೀಕೃತೋಽನುಜ್ಞಾತಶ್ಚ
ಅತ್ಯನ್ತಸಾಧ್ವಸವಿನಯಾವನತಃ ಕಿಙ್ಕುರ್ವಾಣಃ ಕೃತಾಞ್ಜಲಿಪುಟೋ
ಭಗವನ್ತಮುಪಾಸೀತ .
ತತಶ್ಚಾನುಭೂಯಮಾನಭಾವವಿಶೇಷಃ ನಿರತಿಶಯಪ್ರೀತ್ಯಾಽನ್ಯತ್ಕಿಞ್ಚಿತ್
ಕರ್ತುಂ ದ್ರಷ್ಟುಂ ಸ್ಮರ್ತುಮಶಕ್ತಃ ಪುನರಪಿ ಶೇಷಭಾವಮೇವ ಯಾಚಮಾನೋ
ಭಗವನ್ತಮೇವ ಅವಿಚ್ಛಿನ್ನಸ್ತ್ರೋತೋರೂಪೇಣಾವಲೋಕಯನ್ನಾಸೀತ .
ತತೋ ಭಗವತಾ ಸ್ವಯಮೇವಾತ್ಮಸಞ್ಜೀವನೇನಾವಲೋಕನೇನಾವಲೋಕ್ಯ
ಸಸ್ಮಿತಮಾಹೂಯ ಸಮಸ್ತಕ್ಲೇಶಾಪಹಂ ನಿರತಿಶಯಸುಖಾವಹಮಾತ್ಮೀಯಂ
ಶ್ರೀಮತ್ಪಾದಾರವಿನ್ದಯುಗಲಂ ಶಿರಸಿ ಕೃತಂ ಧ್ಯಾತ್ವಾಽಮೃತಸಾಗರಾನ್ತಃ
ನಿಮಗ್ನಸರ್ವಾವಯವಃ ಸುಖಮಾಸೀತ ..