శ్రీవైకుణ్ఠగద్యమ్

శ్రీవైకుణ్ఠగద్యమ్
యామునార్యసుధామ్భోధిమవగాహ్య యథామతి .
ఆదాయ భక్తియోగాఖ్యం రత్నం సన్దర్శయామ్యహమ్ ..

స్వాధీనత్రివిధచేతనాచేతనస్వరూపస్థితిప్రవృత్తిభేదం,
క్లేశకర్మాద్యశేషదోషాసంస్పృష్టం,స్వాభావికానవధికాతిశ-జ్ఞానబలైశ్వర్యవీర్యశక్తితేజఃప్రభృత్యసఙ్ఖ్యేయకల్యాణగుణగణౌఘమహార్ణవం,
పరమపురుషం, భగవన్తం, నారాయణం, స్వామిత్వేన సుహృత్త్వేన గురుత్వేన చ
పరిగృహ్య ఐకాన్తికాత్యన్తికతత్పాదామ్బుజద్వయపరిచర్యైకమనోరథః,
తత్ప్రాప్తయే చ తత్పాదామ్బుజద్వయప్రపత్తేరన్యన్న మే కల్పకోటిసహస్రేణాపి
సాధనమస్తీతి మన్వానః, తస్యైవ భగవతో నారాయణస్యాఖిలసత్త్వ-
దయైకసాగరస్యానాలోచితగుణగణాఖణ్డజనానుకూలమర్యాదాశీలవతః
స్వాభావికానవధికాతిశయగుణవత్తయా దేవతిర్యఙ్మనుష్యాద్యఖిలజన-
హృదయానన్దనస్య ఆశ్రితవాత్సల్యైకజలధేః భక్తజనసంశ్లేషైకభోగస్య
నిత్యజ్ఞానక్రియైశ్వర్యభోగసామగ్రీసమృద్ధస్య మహావిభూతేః
శ్రీమచ్చరణారవిన్దయుగలమనన్యాత్మసఞ్జీవనేన తద్గతసర్వభావేన శరణమనువ్రజేత్ ..

తతశ్చ ప్రత్యహమాత్మోజ్జీవనాయైవమనుస్మరేత్ .
చతుర్దశభువనాత్మకమణ్డం దశగుణితోత్తరం చావరణసప్తకం
సమస్తం కార్యకారణజాతమతీత్య పరమవ్యోమశబ్దాభిధేయే
బ్రహ్మాదీనాం వాఙ్మనసాఽగోచరే శ్రీమతి వైకుణ్ఠే దివ్యలోకే
సనకవిధిశివాదిభిరపి అచిన్త్యస్వభావైశ్వర్యైః
నిత్యసిద్ధైరనన్తైః భగవదానుకూల్యైకభోగైః దివ్యపురుషైః
మహాత్మభిరాపూరితే, తేషామపి ఇయత్పరిమాణమియదైశ్వర్యం
ఈదృశస్వభావమితి పరిచ్ఛేత్తుమయోగ్యే దివ్యావరణశతసహస్రావృతే దివ్యకల్పకతరూపశోభితే దివ్యోద్యానశతసహస్రకోటిభిరావృతే అతిప్రమాణే దివ్యాయతనే కస్మింశ్చిద్విచిత్రదివ్యరత్నమయదివ్యాస్థానమణ్డపే దివ్యరత్నస్తమ్భశతసహస్రకోటిభిరుపశోభితే దివ్యనానారత్నకృతస్థలవిచిత్రితే దివ్యాలఙ్కారాలఙ్కృతే పరితః పతితైః పతమానైః పాదపస్థైశ్చ నానాగన్ధవర్ణైః దివ్యపుష్పైః శోభమానదివ్యపుష్పోపవనైరుపశోభితే, సఙ్కీర్ణపారిజాతాదికల్పద్రుమోపశోభితైరసఙ్కీర్ణైశ్చ కైశ్చిదన్తస్థపుష్పరత్నాదినిర్మితదివ్యలీలామణ్టపశతసహస్రోప- శోభితైస్సర్వదానుభూయమానైరప్యపూర్వవదాశ్చర్యమావహద్భిః క్రీడాశైలశతసహస్రైరలఙ్కృతైః కైశ్చిన్నారాయణదివ్యలీలాఽసాధారణైః కైశ్చిత్పద్మవనాలయా దివ్యలీలాసాధారణైః కైశ్చిచ్ఛుకశారికామయూరకోకిలాదిభిః కోమలకూజితైరాకులైః దివ్యోద్యానశతసహస్రకోటిభిరావృతే, మణిముక్తాప్రవాలకృతసోపానైః దివ్యామలామృతరసోదకైః దివ్యాణ్డజవరైరతిరమణీయదర్శనైః
అతిమనోహరమధురస్వరైరాకులైః అన్తస్స్థముక్తామయదివ్యక్రీడాస్థానోపశోభితైః
దివ్యసౌగన్ధికవాపీశతసహస్రైః దివ్యరాజహంసావలీవిరాజితైరావృతే,
నిరస్తాతిశయనానన్దైకరసతయా చానన్త్యాచ్చ ప్రవిష్టానున్మాదయద్భిః
క్రీడోద్దేశైర్విరాజితే, తత్ర తత్ర కృతదివ్యపుష్పపర్యఙ్కోపశోభితే,
నానాపుష్పాసవాస్వాదమత్తభృఙ్గావలీభిరుద్గీయమానదివ్యగాన్ధర్వేణాపూరితే
చన్దనాగరుకర్పూరదివ్యపుష్పావగాహి మన్దానిలాసేవ్యమానే, మధ్యే
పుష్పసఞ్చయవిచిత్రితే, మహతి దివ్యయోగపర్యఙ్కే అనన్తభోగిని,
శ్రీమద్వైకుణ్ఠైశ్వర్యాది దివ్యలోకమాత్మకాన్త్యా విశ్వమాప్యాయయన్త్యా
శేషశేషాశనాది సర్వం పరిజనం భగవతస్తత్తదవస్థోచితపరిచర్యాయామాజ్ఞాపయన్త్యా,
శీలరూపగుణవిలాసాదిభిరాత్మానురూపయా శ్రియా సహాసీనం,
ప్రత్యగ్రోన్మీలితసరసిజసదృశనయనయుగలం, స్వచ్ఛనీలజీమూతసఙ్కాశం
అత్యుజ్వలపీతవాససం స్వయా ప్రభయాఽతినిర్మలయాఽతిశీతలయాఽతికోమలయా
స్వచ్ఛమాణిక్యాభయా కృత్స్నం జగద్భావయన్తం
అచిన్త్యదివ్యాద్భుతనిత్యయౌవనస్వభావలావణ్యమయామృతసాగరం,
అతిసౌకుమార్యాదీషత్ప్రస్విన్నవదాలక్ష్యమాణలలాటఫలక-
దివ్యాలకావలీవిరాజితం, ప్రబుద్ధముగ్ధామ్బుజచారులోచనం,
సవిభ్రమభ్రూలతముజ్వలాధరం, శుచిస్మితం, కోమలగణ్డమున్నసం,
ఉదగ్రపీనాంసవిలమ్బికుణ్డలాలకావలీబన్ధురకమ్బుకన్ధరం,
ప్రియావతంసోత్పలకర్ణభూషణశ్లథాలకాబన్ధవిమర్దశంసిభిః
చతుర్భిరాజానువిలమ్బిభిర్భుజైర్విరాజితం, అతికోమల
దివ్యరేఖాలఙ్కృతాతామ్రకరతలం, దివ్యాఙ్గులీయకవిరాజితం
అతికోమలదివ్యనఖావలీవిరాజితమతిరక్తాఙ్గులీభిరలఙ్కృతం,
తత్క్షణోన్మీలితపుణ్డరీకసదృశచరణయుగలమతిమనోహరకిరీటమకుటచూడావతంస-
మకరకుణ్డలగ్రైవేయకహారకేయూరకటకశ్రీవత్సకౌస్తుభముక్తాదామోదరబన్ధనపీతామ్బర-
కాఞ్చీగుణనూపురాదిభిరత్యన్తసుఖస్పర్శైర్దివ్యగన్ధైర్భూషణైర్భూషితం, శ్రీమత్యా వైజయన్త్యా
వనమాలయా విరాజతం, శఙ్ఖచక్రగదాసిశార్ఙ్గాదిదివ్యాయుధైః సేవ్యమానం,
స్వసఙ్కల్పమాత్రావకౢప్తజగజ్జన్మస్థితిధ్వంసాదికే శ్రీమతి విష్వక్సేనే
న్యస్తసమస్తాత్మైశ్వర్యం, వైనతేయాదిభిః స్వభావతో నిరస్తసమస్తసాంసారికస్వభావైః భగవత్పరిచర్యాకరణయోగ్యైర్భగవత్పరిచర్యైకభోగైః నిత్యసిద్ధైరనన్తైర్యథాయోగం
సేవ్యమానమాత్మభోగేనానుసంహితపరాదికాలం,
దివ్యామలకోమలావలోకనేన విశ్వమాహ్లాదయన్తమీషదున్మీలిత-
ముఖామ్బుజోదరవినిర్గతేన దివ్యాననారవిన్దశోభాజననేన
దివ్యగామ్భీర్యౌదార్యసౌన్దర్యమాధుర్యాద్యనవధికగుణగణవిభూషితేన
అతిమనోహరదివ్యభావగర్భేణ దివ్యలీలాలాపామృతేన
అఖిలజనహృదయాన్తరాణ్యాపూరయన్తం భగవన్తం నారాయణం
ధ్యానయోగేన దృష్ట్వా తతో భగవతో నిత్యస్వామ్యమాత్మనో
నిత్యదాస్యం చ యథావస్థితమనుసన్ధాయ కదాహం భగవన్తం
నారాయణం మమ కులనాథం మమ కులదైవతం మమ కులధనం మమ భోగ్యం మమ మాతరం మమ పితరం మమ సర్వం సాక్షాత్కరవాణి చక్షూషా .
కదాహం భగవత్పాదామ్బుజద్వయం శిరసా సఙ్గ్రహీష్యామి .
కదాహం భగవత్పాదామ్బుజద్వయం పరిచర్యాఽఽశయా నిరస్తసమస్తేతర-
భోగాశోఽపగతసమస్తసాంసారికస్వభావః తత్పాదామ్బుజద్వయం
ప్రవేక్ష్యామి . కదాహం భగవత్పాదామ్బుజద్వయం పరిచర్యాకరణయోగ్యః
తత్పాదౌ పరిచరిష్యామి . కదా మాం భగవాన్ స్వకీయయాఽతిశీతలయా
దృశాఽవలోక్య స్నిగ్ధగమ్భీరమధురయా గిరా పరిచర్యాయాం
ఆజ్ఞాపయిష్యతీతి భగవత్పరిచర్యాయామాశాం వర్ధయిత్వా
తయైవాశయా తత్ప్రసాదోపబృంహితయా భగవన్తముపేత్య దూరాదేవ
భగవన్తం శేషభోగే శ్రియా సహాసీనం వైనతేయాదిభిః
సేవ్యమానం ``సమస్తపరివారాయ శ్రీమతే నారాయణాయ నమ''
ఇతి ప్రణమ్యోత్థాయోత్థాయ పునః పునః ప్రణమ్య అత్యన్త
సాధ్వసవినయావనతో భూత్వా భగవత్పారిషదగణనాయకైర్ద్వారపాలైః
కృపయా స్నేహగర్భయా దృశాఽవలోకితః సమ్యగభివన్దితైః
తైస్తైరేవానుమతో భగవన్తముపేత్య శ్రీమతా మూలమన్త్రేణ మాం
ఐకాన్తికాత్యన్తికపరిచర్యాకరణాయ పరిగృహ్ణీష్వేతి యాచమానః
ప్రణమ్యాత్మానం భగవతే నివేదయేత్ .
తతో భగవతా స్వయమేవాత్మసఞ్జీవనేన మర్యాదాశీలవతా
అతిప్రేమాన్వితేనావలోకనేనావలోక్య సర్వదేశసర్వకాల-
సర్వావస్థోచితాత్యన్తశేషభావాయ స్వీకృతోఽనుజ్ఞాతశ్చ
అత్యన్తసాధ్వసవినయావనతః కిఙ్కుర్వాణః కృతాఞ్జలిపుటో
భగవన్తముపాసీత .
తతశ్చానుభూయమానభావవిశేషః నిరతిశయప్రీత్యాఽన్యత్కిఞ్చిత్
కర్తుం ద్రష్టుం స్మర్తుమశక్తః పునరపి శేషభావమేవ యాచమానో
భగవన్తమేవ అవిచ్ఛిన్నస్త్రోతోరూపేణావలోకయన్నాసీత .
తతో భగవతా స్వయమేవాత్మసఞ్జీవనేనావలోకనేనావలోక్య
సస్మితమాహూయ సమస్తక్లేశాపహం నిరతిశయసుఖావహమాత్మీయం
శ్రీమత్పాదారవిన్దయుగలం శిరసి కృతం ధ్యాత్వాఽమృతసాగరాన్తః
నిమగ్నసర్వావయవః సుఖమాసీత ..