శ్రీవిష్ణుసహస్రనామస్తోత్రమ్

.. పూర్వపీఠికా ..
శుక్లామ్బరధరం విష్ణుం శశివర్ణం చతుర్భుజమ్ .
ప్రసన్నవదనం ధ్యాయేత్ సర్వవిఘ్నోపశాన్తయే .. 1 ..

యస్య ద్విరదవక్త్రాద్యాః పారిషద్యాః పరశ్శతమ్ .
విఘ్నం నిఘ్నన్తి సతతం విష్వక్సేనం తమాశ్రయే .. 2 ..

వ్యాసం వసిష్ఠనప్తారం శక్తేః పౌత్రమకల్మషమ్ .
పరాశరాత్మజం వన్దే శుకతాతం తపోనిధిమ్ .. 3 ..

వ్యాసాయ విష్ణురూపాయ వ్యాసరూపాయ విష్ణవే .
నమో వై బ్రహ్మనిధయే వాసిష్ఠాయ నమో నమః .. 4 ..

అవికారాయ శుద్ధాయ నిత్యాయ పరమాత్మనే .
సదైకరూపరూపాయ విష్ణవే సర్వజిష్ణవే .. 5 ..

యస్య స్మరణమాత్రేణ జన్మసంసారబన్ధనాత్ .
విముచ్యతే నమస్తస్మై విష్ణవే ప్రభవిష్ణవే .. 6 ..

ఓం నమో విష్ణవే ప్రభవిష్ణవే .
శ్రీవైశమ్పాయన ఉవాచ .
శ్రుత్వా ధర్మానశేషేణ పావనాని చ సర్వశః .
యుధిష్ఠిరః శాన్తనవం పునరేవాభ్యభాషత .. 7 ..

యుధిష్ఠిర ఉవాచ .
కిమేకం దైవతం లోకే కిం వాప్యేకం పరాయణమ్ .
స్తువన్తః కం కమర్చన్తః ప్రాప్నుయుర్మానవాః శుభమ్ .. 8 ..

కో ధర్మః సర్వధర్మాణాం భవతః పరమో మతః .
కిం జపన్ముచ్యతే జన్తుర్జన్మసంసారబన్ధనాత్ .. 9 ..

శ్రీ భీష్మ ఉవాచ .
జగత్ప్రభుం దేవదేవమనన్తం పురుషోత్తమమ్ .
స్తువన్నామసహస్రేణ పురుషః సతతోత్థితః .. 10 ..

తమేవ చార్చయన్నిత్యం భక్త్యా పురుషమవ్యయమ్ .
ధ్యాయన్ స్తువన్నమస్యంశ్చ యజమానస్తమేవ చ .. 11 ..

అనాదినిధనం విష్ణుం సర్వలోకమహేశ్వరమ్ .
లోకాధ్యక్షం స్తువన్నిత్యం సర్వదుఃఖాతిగో భవేత్ .. 12 ..

బ్రహ్మణ్యం సర్వధర్మజ్ఞం లోకానాం కీర్తివర్ధనమ్ .
లోకనాథం మహద్భూతం సర్వభూతభవోద్భవమ్ .. 13 ..

ఏష మే సర్వధర్మాణాం ధర్మోఽధికతమో మతః .
యద్భక్త్యా పుణ్డరీకాక్షం స్తవైరర్చేన్నరః సదా .. 14 ..

పరమం యో మహత్తేజః పరమం యో మహత్తపః .
పరమం యో మహద్బ్రహ్మ పరమం యః పరాయణమ్ .. 15 ..

పవిత్రాణాం పవిత్రం యో మఙ్గలానాం చ మఙ్గలమ్ .
దైవతం దైవతానాం చ భూతానాం యోఽవ్యయః పితా .. 16 ..

యతః సర్వాణి భూతాని భవన్త్యాదియుగాగమే .
యస్మింశ్చ ప్రలయం యాన్తి పునరేవ యుగక్షయే .. 17 ..

తస్య లోకప్రధానస్య జగన్నాథస్య భూపతే .
విష్ణోర్నామసహస్రం మే శృణు పాపభయాపహమ్ .. 18 ..

యాని నామాని గౌణాని విఖ్యాతాని మహాత్మనః .
ఋషిభిః పరిగీతాని తాని వక్ష్యామి భూతయే .. 19 ..

ఋషిర్నామ్నాం సహస్రస్య వేదవ్యాసో మహామునిః .
ఛన్దోఽనుష్టుప్ తథా దేవో భగవాన్ దేవకీసుతః .. 20 ..

అమృతాంశూద్భవో బీజం శక్తిర్దేవకినన్దనః .
త్రిసామా హృదయం తస్య శాన్త్యర్థే వినియుజ్యతే .. 21 ..

విష్ణుం జిష్ణుం మహావిష్ణుం ప్రభవిష్ణుం మహేశ్వరమ్ .
అనేకరూప దైత్యాన్తం నమామి పురుషోత్తమమ్ .. 22 ..

అస్య శ్రీవిష్ణోర్దివ్యసహస్రనామస్తోత్ర మహామన్త్రస్య శ్రీ వేదవ్యాసో భగవానృషిః అనుష్టుప్ ఛన్దః, శ్రీమహావిష్ణుః పరమాత్మా శ్రీమన్నారాయణో దేవతా, అమృతాంశూద్భవో భానురితి బీజమ్, దేవకీనన్దనః స్రష్టేతి శక్తిః, ఉద్భవః క్షోభణో దేవ ఇతి పరమో మన్త్రః, శఙ్ఖభృన్నన్దకీ చక్రీతి కీలకమ్, శార్ఙ్గధన్వా గదాధర ఇత్యస్త్రమ్, రథాఙ్గపాణిరక్షోభ్య ఇతి నేత్రమ్, త్రిసామా సామగస్సామేతి కవచమ్, ఆనన్దం పరబ్రహ్మేతి యోనిః, ఋతుస్సుదర్శనః కాల ఇతి దిగ్బన్ధః, శ్రీ విశ్వరూప ఇతి ధ్యానమ్, శ్రీమహావిష్ణు ప్రీత్యర్థే సహస్రనామ జపే వినియోగః ..

ధ్యానమ్ .
క్షీరోదన్వత్ప్రదేశే శుచిమణివిలసత్సైకతే మౌక్తికానాం
మాలాక్లుప్తాసనస్థః స్ఫటికమణినిభైర్మౌక్తికైర్మణ్డితాఙ్గః .శుభ్రైరభ్రైరదభ్రైరుపరివిరచితైర్ముక్తపీయూషవర్షై-
-రానన్దీ నః పునీయాదరినలినగదాశఙ్ఖపాణిర్ముకున్దః .. 1 ..

భూః పాదౌ యస్య నాభిర్వియదసురనిలశ్చన్ద్ర సూర్యౌ చ నేత్రే
కర్ణావాసాః శిరో ద్యౌర్ముఖమపి దహనో యస్య వాస్తేయమబ్ధిః .
అన్తఃస్థం యస్య విశ్వం సురనరఖగగోభోగిగన్ధర్వదైత్యైః
చిత్రం రంరమ్యతే తం త్రిభువనవపుషం విష్ణుమీశం నమామి .. 2 ..

శాన్తాకారం భుజగశయనం పద్మనాభం సురేశం
విశ్వాకారం గగనసదృశం మేఘవర్ణం శుభాఙ్గమ్ .
లక్ష్మీకాన్తం కమలనయనం యోగిహృద్ధ్యానగమ్యం
వన్దే విష్ణుం భవభయహరం సర్వలోకైకనాథమ్ .. 3 ..

మేఘశ్యామం పీతకౌశేయవాసం
శ్రీవత్సాఙ్కం కౌస్తుభోద్భాసితాఙ్గమ్ .
పుణ్యోపేతం పుణ్డరీకాయతాక్షం
విష్ణుం వన్దే సర్వలోకైకనాథమ్ .. 4 ..

అధికశ్లోక
నమః సమస్తభూతానామాదిభూతాయ భూభృతే .
అనేకరూపరూపాయ విష్ణవే ప్రభవిష్ణవే .. 5 ..

సశఙ్ఖచక్రం సకిరీటకుణ్డలం
సపీతవస్త్రం సరసీరుహేక్షణమ్ .
సహారవక్షఃస్థలశోభికౌస్తుభం
నమామి విష్ణుం శిరసా చతుర్భుజమ్ .. 6 ..

అధికశ్లోక
ఛాయాయాం పారిజాతస్య హేమసింహాసనోపరి
ఆసీనమమ్బుదశ్యామమాయతాక్షమలఙ్కృతమ్ .
చన్ద్రాననం చతుర్బాహుం శ్రీవత్సాఙ్కిత వక్షసం
రుక్మిణీ సత్యభామాభ్యాం సహితం కృష్ణమాశ్రయే .. 7 ..

హరిః ఓం .
విశ్వం విష్ణుర్వషట్కారో భూతభవ్యభవత్ప్రభుః .
భూతకృద్భూతభృద్భావో భూతాత్మా భూతభావనః .. 1 ..

పూతాత్మా పరమాత్మా చ ముక్తానాం పరమాగతిః .
అవ్యయః పురుషస్సాక్షీ క్షేత్రజ్ఞోఽక్షర ఏవ చ .. 2 ..

యోగో యోగవిదాం నేతా ప్రధానపురుషేశ్వరః .
నారసింహవపుః శ్రీమాన్ కేశవః పురుషోత్తమః .. 3 ..

సర్వశ్శర్వశ్శివస్స్థాణుర్భూతాదిర్నిధిరవ్యయః .
సమ్భవో భావనో భర్తా ప్రభవః ప్రభురీశ్వరః .. 4 ..

స్వయమ్భూశ్శమ్భురాదిత్యః పుష్కరాక్షో మహాస్వనః .
అనాదినిధనో ధాతా విధాతా ధాతురుత్తమః .. 5 ..

అప్రమేయో హృషీకేశః పద్మనాభోఽమరప్రభుః .
విశ్వకర్మా మనుస్త్వష్టా స్థవిష్ఠః స్థవిరో ధ్రువః .. 6 ..

అగ్రాహ్యశ్శాశ్వతః కృష్ణో లోహితాక్షః ప్రతర్దనః .
ప్రభూతస్త్రికకుబ్ధామ పవిత్రం మఙ్గలం పరమ్ .. 7 ..

ఈశానః ప్రాణదః ప్రాణో జ్యేష్ఠః శ్రేష్ఠః ప్రజాపతిః .
హిరణ్యగర్భో భూగర్భో మాధవో మధుసూదనః .. 8 ..

ఈశ్వరో విక్రమీ ధన్వీ మేధావీ విక్రమః క్రమః .
అనుత్తమో దురాధర్షః కృతజ్ఞః కృతిరాత్మవాన్ .. 9 ..

సురేశశ్శరణం శర్మ విశ్వరేతాః ప్రజాభవః .
అహస్సంవత్సరో వ్యాలః ప్రత్యయస్సర్వదర్శనః .. 10 ..

అజస్సర్వేశ్వరస్సిద్ధస్సిద్ధిస్సర్వాదిరచ్యుతః .
వృషాకపిరమేయాత్మా సర్వయోగవినిస్సృతః .. 11 ..

వసుర్వసుమనాస్సత్యస్సమాత్మా సమ్మితస్సమః .
అమోఘః పుణ్డరీకాక్షో వృషకర్మా వృషాకృతిః .. 12 ..

రుద్రో బహుశిరా బభ్రుర్విశ్వయోనిశ్శుచిశ్రవాః .
అమృతశ్శాశ్వతస్స్థాణుర్వరారోహో మహాతపాః .. 13 ..

సర్వగస్సర్వవిద్భానుర్విష్వక్సేనో జనార్దనః .
వేదో వేదవిదవ్యఙ్గో వేదాఙ్గో వేదవిత్కవిః .. 14 ..

లోకాధ్యక్షస్సురాధ్యక్షో ధర్మాధ్యక్షః కృతాకృతః .
చతురాత్మా చతుర్వ్యూహశ్చతుర్దమ్ష్ట్రశ్చతుర్భుజః .. 15 ..

భ్రాజిష్ణుర్భోజనం భోక్తా సహిష్ణుర్జగదాదిజః .
అనఘో విజయో జేతా విశ్వయోనిః పునర్వసుః .. 16 ..

ఉపేన్ద్రో వామనః ప్రాంశురమోఘశ్శుచిరూర్జితః .
అతీన్ద్రస్సఙ్గ్రహస్సర్గో ధృతాత్మా నియమో యమః .. 17 ..

వేద్యో వైద్యస్సదాయోగీ వీరహా మాధవో మధుః .
అతీన్ద్రియో మహామాయో మహోత్సాహో మహాబలః .. 18 ..

మహాబుద్ధిర్మహావీర్యో మహాశక్తిర్మహాద్యుతిః .
అనిర్దేశ్యవపుః శ్రీమానమేయాత్మా మహాద్రిధృత్ .. 19 ..

మహేష్వాసో మహీభర్తా శ్రీనివాసస్సతాంగతిః .
అనిరుద్ధస్సురానన్దో గోవిన్దో గోవిదాంపతిః .. 20 ..

మరీచిర్దమనో హంసస్సుపర్ణో భుజగోత్తమః .
హిరణ్యనాభస్సుతపాః పద్మనాభః ప్రజాపతిః .. 21 ..

అమృత్యుస్సర్వదృక్సింహస్సన్ధాతా సన్ధిమాన్ స్థిరః .
అజో దుర్మర్షణశ్శాస్తా విశ్రుతాత్మా సురారిహా .. 22 ..

గురుర్గురుతమో ధామ సత్యస్సత్యపరాక్రమః .
నిమిషోఽనిమిషస్స్రగ్వీ వాచస్పతిరుదారధీః .. 23 ..

అగ్రణీర్గ్రామణీః శ్రీమాన్న్యాయో నేతా సమీరణః .
సహస్రమూర్ధా విశ్వాత్మా సహస్రాక్షస్సహస్రపాత్ .. 24 ..

ఆవర్తనో నివృత్తాత్మా సంవృతస్సమ్ప్రమర్దనః .
అహస్సంవర్తకో వహ్నిరనిలో ధరణీధరః .. 25 ..

సుప్రసాదః ప్రసన్నాత్మా విశ్వసృడ్విశ్వభుగ్విభుః .
సత్కర్తా సత్కృతస్సాధుర్జహ్నుర్నారాయణో నరః .. 26 ..

అసఙ్ఖ్యేయోఽప్రమేయాత్మా విశిష్టశ్శిష్టకృచ్ఛుచిః .
సిద్ధార్థస్సిద్ధసఙ్కల్పస్సిద్ధిదస్సిద్ధిసాధనః .. 27 ..

వృషాహీ వృషభో విష్ణుర్వృషపర్వా వృషోదరః .
వర్ధనో వర్ధమానశ్చ వివిక్తః శ్రుతిసాగరః .. 28 ..

సుభుజో దుర్ధరో వాగ్మీ మహేన్ద్రో వసుదో వసుః .
నైకరూపో బృహద్రూపః శిపివిష్టః ప్రకాశనః .. 29 ..

ఓజస్తేజో ద్యుతిధరః ప్రకాశాత్మా ప్రతాపనః .
ఋద్ధస్స్పష్టాక్షరో మన్త్రశ్చన్ద్రాంశుర్భాస్కరద్యుతిః .. 30 ..

అమృతాంశూద్భవో భానుః శశబిన్దుస్సురేశ్వరః .
ఔషధం జగతస్సేతుస్సత్యధర్మపరాక్రమః .. 31 ..

భూతభవ్యభవన్నాథః పవనః పావనోఽనలః .
కామహా కామకృత్కాన్తః కామః కామప్రదః ప్రభుః .. 32 ..

యుగాదికృద్యుగావర్తో నైకమాయో మహాశనః .
అదృశ్యో వ్యక్తరూపశ్చ సహస్రజిదనన్తజిత్ .. 33 ..

ఇష్టోఽవిశిష్టశ్శిష్టేష్టః శిఖణ్డీ నహుషో వృషః .
క్రోధహా క్రోధకృత్కర్తా విశ్వబాహుర్మహీధరః .. 34 ..

అచ్యుతః ప్రథితః ప్రాణః ప్రాణదో వాసవానుజః .
అపాంనిధిరధిష్ఠానమప్రమత్తః ప్రతిష్ఠితః .. 35 ..

స్కన్దః స్కన్దధరో ధుర్యో వరదో వాయువాహనః .
వాసుదేవో బృహద్భానురాదిదేవః పురన్దరః .. 36 ..

అశోకస్తారణస్తారః శూరశ్శౌరిర్జనేశ్వరః .
అనుకూలశ్శతావర్తః పద్మీ పద్మనిభేక్షణః .. 37 ..

పద్మనాభోఽరవిన్దాక్షః పద్మగర్భశ్శరీరభృత్ .
మహర్ధిరృద్ధో వృద్ధాత్మా మహాక్షో గరుడధ్వజః .. 38 ..

అతులశ్శరభో భీమస్సమయజ్ఞో హవిర్హరిః .
సర్వలక్షణలక్షణ్యో లక్ష్మీవాన్ సమితిఞ్జయః .. 39 ..

విక్షరో రోహితో మార్గో హేతుర్దామోదరస్సహః .
మహీధరో మహాభాగో వేగవానమితాశనః .. 40 ..

ఉద్భవః క్షోభణో దేవః శ్రీగర్భః పరమేశ్వరః .
కరణం కారణం కర్తా వికర్తా గహనో గుహః .. 41 ..

వ్యవసాయో వ్యవస్థానః సంస్థానః స్థానదో ధ్రువః .
పరర్ధిః పరమస్పష్టస్తుష్టః పుష్టశ్శుభేక్షణః .. 42 ..

రామో విరామో విరజో మార్గో నేయో నయోఽనయః .
వీరశ్శక్తిమతాం శ్రేష్ఠో ధర్మో ధర్మవిదుత్తమః .. 43 ..

వైకుణ్ఠః పురుషః ప్రాణః ప్రాణదః ప్రణవః పృథుః .
హిరణ్యగర్భశ్శత్రుఘ్నో వ్యాప్తో వాయురధోక్షజః .. 44 ..

ఋతుస్సుదర్శనః కాలః పరమేష్ఠీ పరిగ్రహః .
ఉగ్రస్సంవత్సరో దక్షో విశ్రామో విశ్వదక్షిణః .. 45 ..

విస్తారస్స్థావరస్థాణుః ప్రమాణం బీజమవ్యయమ్ .
అర్థోఽనర్థో మహాకోశో మహాభోగో మహాధనః .. 46 ..

అనిర్విణ్ణస్స్థవిష్ఠో భూర్ధర్మయూపో మహామఖః .
నక్షత్రనేమిర్నక్షత్రీ క్షమః క్షామస్సమీహనః .. 47 ..

యజ్ఞ ఇజ్యో మహేజ్యశ్చ క్రతుస్సత్రం సతాంగతిః .
సర్వదర్శీ విముక్తాత్మా సర్వజ్ఞో జ్ఞానముత్తమమ్ .. 48 ..

సువ్రతస్సుముఖస్సూక్ష్మః సుఘోషస్సుఖదస్సుహృత్ .
మనోహరో జితక్రోధో వీరబాహుర్విదారణః .. 49 ..

స్వాపనస్స్వవశో వ్యాపీ నైకాత్మా నైకకర్మకృత్ .
వత్సరో వత్సలో వత్సీ రత్నగర్భో ధనేశ్వరః .. 50 ..

ధర్మగుబ్ధర్మకృద్ధర్మీ సదసత్క్షరమక్షరమ్ . [**సదక్షరమసత్క్షరమ్**]
అవిజ్ఞాతా సహస్రాంశుర్విధాతా కృతలక్షణః .. 51 ..

గభస్తినేమిస్సత్త్వస్థస్సింహో భూతమహేశ్వరః .
ఆదిదేవో మహాదేవో దేవేశో దేవభృద్గురుః .. 52 ..

ఉత్తరో గోపతిర్గోప్తా జ్ఞానగమ్యః పురాతనః .
శరీరభూతభృద్భోక్తా కపీన్ద్రో భూరిదక్షిణః .. 53 ..

సోమపోఽమృతపస్సోమః పురుజిత్పురుసత్తమః .
వినయో జయస్సత్యసన్ధో దాశార్హస్సాత్త్వతామ్పతిః .. 54 ..

జీవో వినయితా సాక్షీ ముకున్దోఽమితవిక్రమః .
అమ్భోనిధిరనన్తాత్మా మహోదధిశయోఽన్తకః .. 55 ..

అజో మహార్హస్స్వాభావ్యో జితామిత్రః ప్రమోదనః .
ఆనన్దో నన్దనో నన్దస్సత్యధర్మా త్రివిక్రమః .. 56 ..

మహర్షిః కపిలాచార్యః కృతజ్ఞో మేదినీపతిః .
త్రిపదస్త్రిదశాధ్యక్షో మహాశృఙ్గః కృతాన్తకృత్ .. 57 ..

మహావరాహో గోవిన్దస్సుషేణః కనకాఙ్గదీ .
గుహ్యో గభీరో గహనో గుప్తశ్చక్రగదాధరః .. 58 ..

వేధాస్స్వాఙ్గోఽజితః కృష్ణో దృఢస్సఙ్కర్షణోఽచ్యుతః .
వరుణో వారుణో వృక్షః పుష్కరాక్షో మహామనాః .. 59 ..

భగవాన్ భగహాఽఽనన్దీ వనమాలీ హలాయుధః .
ఆదిత్యో జ్యోతిరాదిత్యస్సహిష్ణుర్గతిసత్తమః .. 60 ..

సుధన్వా ఖణ్డపరశుర్దారుణో ద్రవిణప్రదః .
దివిస్పృక్సర్వదృగ్వ్యాసో వాచస్పతిరయోనిజః .. 61 ..

త్రిసామా సామగస్సామ నిర్వాణం భేషజం భిషక్ .
సన్న్యాసకృచ్ఛమశ్శాన్తో నిష్ఠా శాన్తిః పరాయణమ్ .. 62 ..

శుభాఙ్గశ్శాన్తిదస్స్రష్టా కుముదః కువలేశయః .
గోహితో గోపతిర్గోప్తా వృషభాక్షో వృషప్రియః .. 63 ..

అనివర్తీ నివృత్తాత్మా సఙ్క్షేప్తా క్షేమకృచ్ఛివః .
శ్రీవత్సవక్షాః శ్రీవాసః శ్రీపతిః శ్రీమతాంవరః .. 64 ..

శ్రీదః శ్రీశః శ్రీనివాసః శ్రీనిధిః శ్రీవిభావనః .
శ్రీధరః శ్రీకరః శ్రేయః శ్రీమాన్ లోకత్రయాశ్రయః .. 65 ..

స్వక్షస్స్వఙ్గశ్శతానన్దో నన్దిర్జ్యోతిర్గణేశ్వరః .
విజితాత్మా విధేయాత్మా సత్కీర్తిశ్ఛిన్నసంశయః .. 66 ..

ఉదీర్ణస్సర్వతశ్చక్షురనీశశ్శాశ్వతస్థిరః .
భూశయో భూషణో భూతిర్విశోకశ్శోకనాశనః .. 67 ..

అర్చిష్మానర్చితః కుమ్భో విశుద్ధాత్మా విశోధనః .
అనిరుద్ధోఽప్రతిరథః ప్రద్యుమ్నోఽమితవిక్రమః .. 68 ..

కాలనేమినిహా వీరశ్శౌరిశ్శూరజనేశ్వరః .
త్రిలోకాత్మా త్రిలోకేశః కేశవః కేశిహా హరిః .. 69 ..

కామదేవః కామపాలః కామీ కాన్తః కృతాగమః .
అనిర్దేశ్యవపుర్విష్ణుర్వీరోఽనన్తో ధనఞ్జయః .. 70 ..

బ్రహ్మణ్యో బ్రహ్మకృద్బ్రహ్మా బ్రహ్మ బ్రహ్మవివర్ధనః .
బ్రహ్మవిద్బ్రాహ్మణో బ్రహ్మీ బ్రహ్మజ్ఞో బ్రాహ్మణప్రియః .. 71 ..

మహాక్రమో మహాకర్మా మహాతేజా మహోరగః .
మహాక్రతుర్మహాయజ్వా మహాయజ్ఞో మహాహవిః .. 72 ..

స్తవ్యస్స్తవప్రియస్స్తోత్రమ్ స్తుతిస్స్తోతా రణప్రియః .
పూర్ణః పూరయితా పుణ్యః పుణ్యకీర్తిరనామయః .. 73 ..

మనోజవస్తీర్థకరో వసురేతా వసుప్రదః .
వసుప్రదో వాసుదేవో వసుర్వసుమనా హవిః .. 74 ..

సద్గతిస్సత్కృతిస్సత్తా సద్భూతిస్సత్పరాయణః .
శూరసేనో యదుశ్రేష్ఠస్సన్నివాసస్సుయామునః .. 75 ..

భూతావాసో వాసుదేవః సర్వాసునిలయోఽనలః .
దర్పహా దర్పదోఽదృప్తో దుర్ధరోఽథాపరాజితః .. 76 ..

విశ్వమూర్తిర్మహామూర్తిర్దీప్తమూర్తిరమూర్తిమాన్ .
అనేకమూర్తిరవ్యక్తశ్శతమూర్తిశ్శతాననః .. 77 ..

ఏకో నైకస్స్తవః కః కిం యత్తత్పదమనుత్తమమ్ .
లోకబన్ధుర్లోకనాథో మాధవో భక్తవత్సలః .. 78 ..

సువర్ణవర్ణో హేమాఙ్గో వరాఙ్గశ్చన్దనాఙ్గదీ .
వీరహా విషమశ్శూన్యో ఘృతాశీరచలశ్చలః .. 79 ..

అమానీ మానదో మాన్యో లోకస్వామీ త్రిలోకధృత్ .
సుమేధా మేధజో ధన్యస్సత్యమేధా ధరాధరః .. 80 ..

తేజోవృషో ద్యుతిధరస్సర్వశస్త్రభృతాం వరః .
ప్రగ్రహో నిగ్రహో వ్యగ్రో నైకశృఙ్గో గదాగ్రజః .. 81 ..

చతుర్మూర్తిశ్చతుర్బాహుశ్చతుర్వ్యూహశ్చతుర్గతిః .
చతురాత్మా చతుర్భావశ్చతుర్వేదవిదేకపాత్ .. 82 ..

సమావర్తోఽనివృత్తాత్మా దుర్జయో దురతిక్రమః .
దుర్లభో దుర్గమో దుర్గో దురావాసో దురారిహా .. 83 ..

శుభాఙ్గో లోకసారఙ్గస్సుతన్తుస్తన్తువర్ధనః .
ఇన్ద్రకర్మా మహాకర్మా కృతకర్మా కృతాగమః .. 84 ..

ఉద్భవస్సున్దరస్సున్దో రత్ననాభస్సులోచనః .
అర్కో వాజసనశ్శృఙ్గీ జయన్తస్సర్వవిజ్జయీ .. 85 ..

సువర్ణబిన్దురక్షోభ్యస్సర్వవాగీశ్వరేశ్వరః .
మహాహ్రదో మహాగర్తో మహాభూతో మహానిధిః .. 86 ..

కుముదః కున్దరః కున్దః పర్జన్యః పావనోఽనిలః .
అమృతాంశోఽమృతవపుస్సర్వజ్ఞస్సర్వతోముఖః .. 87 ..

సులభస్సువ్రతస్సిద్ధః శత్రుజిచ్ఛత్రుతాపనః .
న్యగ్రోధోదుమ్బరోఽశ్వత్థశ్చాణూరాన్ధ్రనిషూదనః .. 88 ..

సహస్రార్చిస్సప్తజిహ్వస్సప్తైధాస్సప్తవాహనః .
అమూర్తిరనఘోఽచిన్త్యో భయకృద్భయనాశనః .. 89 ..

అణుర్బృహత్కృశః స్థూలో గుణభృన్నిర్గుణో మహాన్ .
అధృతః స్వధృతస్స్వాస్థ్యః ప్రాగ్వంశో వంశవర్ధనః .. 90 ..

భారభృత్కథితో యోగీ యోగీశస్సర్వకామదః .
ఆశ్రమః శ్రమణః క్షామః సుపర్ణో వాయువాహనః .. 91 ..

ధనుర్ధరో ధనుర్వేదో దణ్డో దమయితా దమః .
అపరాజితస్సర్వసహో నియన్తా నియమో యమః .. 92 ..

సత్త్వవాన్ సాత్త్వికస్సత్యస్సత్యధర్మపరాయణః .
అభిప్రాయః ప్రియార్హోఽర్హః ప్రియకృత్ప్రీతివర్ధనః .. 93 ..

విహాయసగతిర్జ్యోతిస్సురుచిర్హుతభుగ్విభుః .
రవిర్విలోచనస్సూర్యస్సవితా రవిలోచనః .. 94 ..

అనన్తో హుతభుగ్భోక్తా సుఖదో నైకజోఽగ్రజః .
అనిర్విణ్ణస్సదామర్షీ లోకాధిష్ఠానమద్భుతః .. 95 ..

సనాత్సనాతనతమః కపిలః కపిరవ్యయః .
స్వస్తిదస్స్వస్తికృత్స్వస్తి స్వస్తిభుక్స్వస్తిదక్షిణః .. 96 ..

అరౌద్రః కుణ్డలీ చక్రీ విక్రమ్యూర్జితశాసనః .
శబ్దాతిగశ్శబ్దసహః శిశిరశ్శర్వరీకరః .. 97 ..

అక్రూరః పేశలో దక్షో దక్షిణః క్షమిణాంవరః .
విద్వత్తమో వీతభయః పుణ్యశ్రవణకీర్తనః .. 98 ..

ఉత్తారణో దుష్కృతిహా పుణ్యో దుస్స్వప్ననాశనః .
వీరహా రక్షణస్సన్తో జీవనం పర్యవస్థితః .. 99 ..

అనన్తరూపోఽనన్తశ్రీర్జితమన్యుర్భయాపహః .
చతురశ్రో గభీరాత్మా విదిశో వ్యాదిశో దిశః .. 100 ..

అనాదిర్భూర్భువో లక్ష్మీస్సువీరో రుచిరాఙ్గదః .
జననో జనజన్మాదిర్భీమో భీమపరాక్రమః .. 101 ..

ఆధారనిలయో ధాతా పుష్పహాసః ప్రజాగరః .
ఊర్ధ్వగస్సత్పథాచారః ప్రాణదః ప్రణవః పణః .. 102 ..

ప్రమాణం ప్రాణనిలయః ప్రాణభృత్ప్రాణజీవనః .
తత్త్వం తత్త్వవిదేకాత్మా జన్మమృత్యుజరాతిగః .. 103 ..

భూర్భువస్స్వస్తరుస్తారస్సవితా ప్రపితామహః .
యజ్ఞో యజ్ఞపతిర్యజ్వా యజ్ఞాఙ్గో యజ్ఞవాహనః .. 104 ..

యజ్ఞభృద్యజ్ఞకృద్యజ్ఞీ యజ్ఞభుగ్యజ్ఞసాధనః .
యజ్ఞాన్తకృద్యజ్ఞగుహ్యమన్నమన్నాద ఏవ చ .. 105 ..

ఆత్మయోనిస్స్వయఞ్జాతో వైఖానస్సామగాయనః .
దేవకీనన్దనస్స్రష్టా క్షితీశః పాపనాశనః .. 106 ..

శఙ్ఖభృన్నన్దకీ చక్రీ శార్ఙ్గధన్వా గదాధరః .
రథాఙ్గపాణిరక్షోభ్యస్సర్వప్రహరణాయుధః .. 107 ..

శ్రీసర్వప్రహరణాయుధ ఓం నమ ఇతి .
వనమాలీ గదీ శార్ఙ్గీ శఙ్ఖీ చక్రీ చ నన్దకీ .
శ్రీమాన్నారాయణో విష్ణుర్వాసుదేవోఽభిరక్షతు .. 108 ..

శ్రీ వాసుదేవోఽభిరక్షతు ఓం నమ ఇతి
.. ఉత్తరపీఠికా ..
శ్రీ భీష్మ ఉవాచ .
ఇతీదం కీర్తనీయస్య కేశవస్య మహాత్మనః .

నామ్నాం సహస్రం దివ్యానామశేషేణ ప్రకీర్తితమ్ .. 1 ..

య ఇదం శృణుయాన్నిత్యం యశ్చాపి పరికీర్తయేత్ .
నాఽశుభం ప్రాప్నుయాత్కిఞ్చిత్సోఽముత్రేహ చ మానవః .. 2 ..

వేదాన్తగో బ్రాహ్మణస్స్యాత్ క్షత్రియో విజయీ భవేత్ .
వైశ్యో ధనసమృద్ధస్స్యాచ్ఛూద్రస్సుఖమవాప్నుయాత్ .. 3 ..

ధర్మార్థీ ప్రాప్నుయాద్ధర్మమర్థార్థీ చార్థమాప్నుయాత్ .
కామానవాప్నుయాత్కామీ ప్రజార్థీ చాప్నుయాత్ప్రజాః .. 4 ..

భక్తిమాన్ యస్సదోత్థాయ శుచిస్తద్గతమానసః .
సహస్రం వాసుదేవస్య నామ్నామేతత్ప్రకీర్తయేత్ .. 5 ..

యశః ప్రాప్నోతి విపులం యాతి ప్రాధాన్యమేవ చ .
అచలాం శ్రియమాప్నోతి శ్రేయః ప్రాప్నోత్యనుత్తమమ్ .. 6 ..

న భయం క్వచిదాప్నోతి వీర్యం తేజశ్చ విన్దతి .
భవత్యరోగో ద్యుతిమాన్బలరూపగుణాన్వితః .. 7 ..

రోగార్తో ముచ్యతే రోగాద్బద్ధో ముచ్యేత బన్ధనాత్ .
భయాన్ముచ్యేత భీతస్తు ముచ్యేతాపన్న ఆపదః .. 8 ..

దుర్గాణ్యతితరత్యాశు పురుషః పురుషోత్తమమ్ .
స్తువన్నామసహస్రేణ నిత్యం భక్తిసమన్వితః .. 9 ..

వాసుదేవాశ్రయో మర్త్యో వాసుదేవపరాయణః .
సర్వపాపవిశుద్ధాత్మా యాతి బ్రహ్మ సనాతనమ్ .. 10 ..

న వాసుదేవభక్తానామశుభం విద్యతే క్వచిత్ .
జన్మమృత్యుజరావ్యాధిభయం నైవోపజాయతే .. 11 ..

ఇమం స్తవమధీయానః శ్రద్ధాభక్తిసమన్వితః .
యుజ్యేతాత్మా సుఖక్షాన్తి శ్రీధృతిస్మృతికీర్తిభిః .. 12 ..

న క్రోధో న చ మాత్సర్యం న లోభో నాశుభామతిః .
భవన్తి కృత పుణ్యానాం భక్తానాం పురుషోత్తమే .. 13 ..

ద్యౌస్సచన్ద్రార్కనక్షత్రం ఖం దిశో భూర్మహోదధిః .
వాసుదేవస్య వీర్యేణ విధృతాని మహాత్మనః .. 14 ..

స సురాసురగన్ధర్వం సయక్షోరగరాక్షసమ్ .
జగద్వశే వర్తతేదం కృష్ణస్య సచరాచరమ్ .. 15 ..

ఇన్ద్రియాణి మనో బుద్ధిస్సత్త్వం తేజో బలం ధృతిః .
వాసుదేవాత్మకాన్యాహుః క్షేత్రం క్షేత్రజ్ఞ ఏవ చ .. 16 ..

సర్వాగమానామాచారః ప్రథమం పరికల్పితః .
ఆచారప్రభవో ధర్మో ధర్మస్య ప్రభురచ్యుతః .. 17 ..

ఋషయః పితరో దేవా మహాభూతాని ధాతవః .
జఙ్గమాజఙ్గమం చేదం జగన్నారాయణోద్భవమ్ .. 18 ..

యోగో జ్ఞానం తథా సాఙ్ఖ్యం విద్యాశ్శిల్పాది కర్మ చ .
వేదాశ్శాస్త్రాణి విజ్ఞానమేతత్సర్వం జనార్దనాత్ .. 19 ..

ఏకో విష్ణుర్మహద్భూతం పృథగ్భూతాన్యనేకశః .
త్రీన్లోకాన్వ్యాప్య భూతాత్మా భుఙ్క్తే విశ్వభుగవ్యయః .. 20 ..

ఇమం స్తవం భగవతో విష్ణోర్వ్యాసేన కీర్తితమ్ .
పఠేద్య ఇచ్ఛేత్పురుషః శ్రేయః ప్రాప్తుం సుఖాని చ .. 21 ..

విశ్వేశ్వరమజం దేవం జగతః ప్రభుమవ్యయమ్ .
భజన్తి యే పుష్కరాక్షం న తే యాన్తి పరాభవమ్ .. 22 ..

న తే యాన్తి పరాభవమ్ ఓం నమ ఇతి .
అర్జున ఉవాచ .
పద్మపత్రవిశాలాక్ష పద్మనాభ సురోత్తమ .
భక్తానామనురక్తానాం త్రాతా భవ జనార్దన .. 23 ..

శ్రీ భగవానువాచ .
యో మాం నామసహస్రేణ స్తోతుమిచ్ఛతి పాణ్డవ .
సోఽహమేకేన శ్లోకేన స్తుత ఏవ న సంశయః .. 24 ..

స్తుత ఏవ న సంశయ ఓం నమ ఇతి .
వ్యాస ఉవాచ .
వాసనాద్వాసుదేవస్య వాసితం తే జగత్త్రయమ్ .
సర్వభూతనివాసోఽసి వాసుదేవ నమోఽస్తు తే .. 25 ..

శ్రీ వాసుదేవ నమోఽస్తుత ఓం నమ ఇతి .
పార్వత్యువాచ .
కేనోపాయేన లఘునా విష్ణోర్నామసహస్రకమ్ .
పఠ్యతే పణ్డితైర్నిత్యం శ్రోతుమిచ్ఛామ్యహం ప్రభో .. 26 ..

ఈశ్వర ఉవాచ .
శ్రీరామ రామ రామేతి రమే రామే మనోరమే .
సహస్రనామ తత్తుల్యం రామ నామ వరాననే .. 27 ..

శ్రీరామనామ వరానన ఓం నమ ఇతి .
బ్రహ్మోవాచ .
నమోఽస్త్వనన్తాయ సహస్రమూర్తయే
సహస్రపాదాక్షిశిరోరుబాహవే .

సహస్రనామ్నే పురుషాయ శాశ్వతే
సహస్రకోటీయుగధారిణే నమః .. 28 ..

సహస్రకోటీయుగధారిణే ఓం నమ ఇతి .
సఞ్జయ ఉవాచ .
యత్ర యోగేశ్వరః కృష్ణో యత్ర పార్థో ధనుర్ధరః .
తత్ర శ్రీర్విజయో భూతిర్ధ్రువా నీతిర్మతిర్మమ .. 29 ..

శ్రీ భగవానువాచ .
అనన్యాశ్చిన్తయన్తో మాం యే జనాః పర్యుపాసతే .
తేషాం నిత్యాభియుక్తానాం యోగక్షేమం వహామ్యహమ్ .. 30 ..

పరిత్రాణాయ సాధూనాం వినాశాయ చ దుష్కృతామ్ .
ధర్మసంస్థాపనార్థాయ సమ్భవామి యుగే యుగే .. 31 ..

ఆర్తా విషణ్ణాశ్శిథిలాశ్చ భీతాః
ఘోరేషు చ వ్యాధిషు వర్తమానాః .
సఙ్కీర్త్య నారాయణశబ్దమాత్రం
విముక్తదుఃఖాస్సుఖినో భవన్తి .. 32 ..

అధికశ్లోకాః
యదక్షర పదభ్రష్టం మాత్రాహీనం తు యద్భవేత్ .
తత్సర్వం క్షమ్యతాం దేవ నారాయణ నమోఽస్తు తే ..

కాయేన వాచా మనసేన్ద్రియైర్వా బుద్ధ్యాత్మనా వా ప్రకృతేస్స్వభావాత్ .
కరోమి యద్యత్సకలం పరస్మై నారాయణాయేతి సమర్పయామి ..

ఇతి శ్రీమహాభారతే శతసహస్రికాయాం సంహితాయాం వైయాసిక్యాం అనుశాసనపర్వాన్తర్గత అనుశాసనికపర్వణి మోక్షధర్మే భీష్మ యుధిష్ఠిర సంవాదే శ్రీ విష్ణోర్దివ్యసహస్రనామస్తోత్రమ్ నామ ఏకోనపఞ్చాశదధికశతతమోఽధ్యాయః .

.. ఇతి శ్రీవిష్ణుసహస్రనామ స్తోత్రమ్ ..