નારાયણસૂક્તમ્

.. નારાયણસૂક્તમ્ ..

ૐ સ॒હ ના॑વવતુ . સ॒હ નૌ॑ ભુનક્તુ . સ॒હ વી॒ર્યં॑ કરવાવહૈ .
તે॒જ॒સ્વિના॒વધી॑તમસ્તુ॒ મા વિ॑દ્વિષા॒વહૈ᳚ ..

ૐ શાન્તિઃ॒ શાન્તિઃ॒ શાન્તિઃ॑ ..

ૐ .. સ॒હ॒સ્ર॒શીર્॑ષન્દે॒વં॒ વિ॒શ્વાક્ષં॑વિઁ॒શ્વશ॑મ્ભુવમ્ .
વિશ્વં॑ ના॒રાય॑ણન્દે॒વ॒મ॒ક્ષરં॑ પર॒મમ્પદમ્ .
વિ॒શ્વતઃ॒ પર॑માન્નિ॒ત્યં॒વિઁ॒શ્વં ના॑રાય॒ણગ્ં હ॑રિમ્ .
વિશ્વ॑મે॒વેદમ્પુરુ॑ષ॒સ્તદ્વિશ્વમુપ॑જીવતિ .
પતિં॒વિઁશ્વ॑સ્યા॒ત્મેશ્વ॑ર॒ગ્ં શાશ્વ॑તગ્ં શિ॒વમ॑ચ્યુતમ્ .
ના॒રાય॒ણં મ॑હાજ્ઞે॒યં॒વિઁ॒શ્વાત્મા॑નમ્પ॒રાય॑ણમ્ .
ના॒રાય॒ણપ॑રો જ્યો॒તિ॒રા॒ત્મા ના॑રાય॒ણઃ પ॑રઃ .
ના॒રાય॒ણપરં॑ બ્ર॒હ્મ॒ તત્ત્વં ના॑રાય॒ણઃ પ॑રઃ .
ના॒રાય॒ણપ॑રો ધ્યા॒તા॒ ધ્યા॒નં ના॑રાય॒ણઃ પ॑રઃ .
યચ્ચ॑ કિ॒ઞ્ચિજ્જગત્સ॒ર્વં॒ દૃ॒શ્યતે᳚ શ્રૂય॒તેઽપિ॑ વા ..

અન્ત॑ર્બ॒હિશ્ચ॑ તત્સ॒ર્વં॒વ્યાઁ॒પ્ય ના॑રાય॒ણઃ સ્થિ॑તઃ .
અનન્ત॒મવ્યયં॑ ક॒વિગ્ં સ॑મુ॒દ્રેંઽતં॑વિઁ॒શ્વશ॑મ્ભુવમ્ .
પ॒દ્મ॒કો॒શપ્ર॑તીકા॒શ॒ગ્ં હૃ॒દયં॑ ચાપ્ય॒ધોમુ॑ખમ્ .
અધો॑ નિ॒ષ્ટ્યા વિ॑તસ્યા॒ન્તે॒ ના॒ભ્યામુ॑પરિ॒ તિષ્ઠ॑તિ .
જ્વા॒લ॒મા॒લાકુ॑લમ્ભા॒તી॒ વિ॒શ્વસ્યા॑યત॒નં મ॑હત્ .
સન્ત॑તગ્ં શિ॒લાભિ॑સ્તુ॒ લમ્બ॑ત્યાકોશ॒સન્નિ॑ભમ્ .
તસ્યાન્તે॑ સુષિ॒રગ્ં સૂ॒ક્ષ્મન્તસ્મિન્᳚ સ॒ર્વમ્પ્રતિ॑ષ્ઠિતમ્ .
તસ્ય॒ મધ્યે॑ મ॒હાન॑ગ્નિર્વિ॒શ્વાર્ચિ॑ર્વિ॒શ્વતો॑મુખઃ .
સોઽગ્ર॑ભુ॒ગ્વિભ॑જન્તિ॒ષ્ઠ॒ન્નાહા॑રમજ॒રઃ ક॒વિઃ .
તિ॒ર્ય॒ગૂ॒ર્ધ્વમ॑ધશ્શા॒યી॒ ર॒શ્મય॑સ્તસ્ય॒ સન્ત॑તા .
સ॒ન્તા॒પય॑તિ સ્વન્દે॒હમાપા॑દતલ॒મસ્ત॑કઃ .
તસ્ય॒ મધ્યે॒ વહ્નિ॑શિખા અ॒ણીયો᳚ર્ધ્વા વ્ય॒વસ્થિ॑તઃ .
ની॒લતો॑યદ॑મધ્ય॒સ્થા॒દ્વિ॒ધ્યુલ્લે॑ખેવ॒ ભાસ્વ॑રા .
ની॒વાર॒શૂક॑વત્ત॒ન્વી॒ પી॒તા ભા᳚સ્વત્ય॒ણૂપ॑મા .
તસ્યાઃ᳚ શિખા॒યા મ॑ધ્યે પ॒રમા᳚ત્મા વ્ય॒વસ્થિ॑તઃ .
સ બ્રહ્મ॒ સ શિવઃ॒ સ હરિઃ॒ સેન્દ્રઃ॒ સોઽક્ષ॑રઃ પર॒મઃ સ્વ॒રાટ્ ..

ઋતગ્ં સ॒ત્યમ્પ॑રમ્બ્ર॒હ્મ॒ પુ॒રુષં॑ કૃષ્ણ॒પિઙ્ગ॑લમ્ .
ઊ॒ર્ધ્વરે॑તંવિઁ॑રૂપા॒ક્ષં॒વિઁ॒શ્વરૂ॑પાય॒ વૈ નમો॒ નમઃ॑ ..

ૐ ના॒રા॒ય॒ણાય॑ વિ॒દ્મહે॑ વાસુદે॒વાય॑ ધીમહિ .
તન્નો॑ વિષ્ણુઃ પ્રચો॒દયા᳚ત્ ..

.. ૐ શાન્તિઃ॒ શાન્તિઃ॒ શાન્તિઃ॑ ..