.. ಶ್ರೀಬ್ರಹ್ಮಾಣ್ಡಪುರಾಣೇ ಶ್ರೀಹಯಗ್ರೀವಾಷ್ಟೋತ್ತರಶತನಾಮಸ್ತೋತ್ರಮ್ ..

ವನ್ದೇ ಪೂರಿತಚನ್ದ್ರಮಣ್ಡಲಗತಂ ಶ್ವೇತಾರವಿನ್ದಾಸನಂ
ಮನ್ದಾಕಿನ್ಯಮೃತಾಬ್ಧಿಕುನ್ದಕುಮುದಕ್ಷೀರೇನ್ದುಹಾಸಂ ಹರಿಮ್ .
ಮುದ್ರಾಪುಸ್ತಕಶಙ್ಖಚಕ್ರವಿಲಸಚ್ಛ್ರೀಮದ್ಭುಜಾಮಣ್ಡಿತಮ್
ನಿತ್ಯಂ ನಿರ್ಮಲಭಾರತೀಪರಿಮಲಂ ವಿಶ್ವೇಶಮಶ್ವಾನನಮ್ ..

ಓಂ ಋಗ್ಯಜುಃಸಾಮರೂಪಾಯ ವೇದಾಹರಣಕರ್ಮಣೇ .
ಪ್ರಣವೋದ್ಗೀಥವಚಸೇ ಮಹಾಶ್ವಶಿರಸೇ ನಮಃ ..

ಶ್ರೀಹಯಗ್ರೀವಾಯ ನಮಃ .

ಜ್ಞಾನಾನನ್ದಮಯಂ ದೇವಂ ನಿರ್ಮಲಂ ಸ್ಫಟಿಕಾಕೃತಿಮ್ .
ಆಧಾರಂ ಸರ್ವವಿದ್ಯಾನಾಂ ಹಯಗ್ರೀವಮುಪಾಸ್ಮಹೇ .. ೧..

ಹಯಗ್ರೀವೋ ಮಹಾವಿಷ್ಣುಃ ಕೇಶವೋ ಮಧುಸೂದನಃ .
ಗೋವಿನ್ದಃ ಪುಣ್ಡರೀಕಾಕ್ಷೋ ವಿಷ್ಣುರ್ವಿಶ್ವಮ್ಭರೋ ಹರಿಃ .. ೨..

ಆದೀಶಃ ಸರ್ವವಾಗೀಶಃ ಸರ್ವಾಧಾರಃ ಸನಾತನಃ .
ನಿರಾಧಾರೋ ನಿರಾಕಾರೋ ನಿರೀಶೋ ನಿರುಪದ್ರವಃ .. ೩..

ನಿರಞ್ಜನೋ ನಿಷ್ಕಲಙ್ಕೋ ನಿತ್ಯತೃಪ್ತೋ ನಿರಾಮಯಃ .
ಚಿದಾನನ್ದಮಯಃ ಸಾಕ್ಷೀ ಶರಣ್ಯಃ ಸರ್ವದಾಯಕಃ .. ೪..

ಶ್ರೀಮಾನ್ ಲೋಕತ್ರಯಾಧೀಶಃ ಶಿವಃ ಸಾರಸ್ವತಪ್ರದಃ .
ವೇದೋದ್ಧರ್ತ್ತಾವೇದನಿಧಿರ್ವೇದವೇದ್ಯಃ ಪುರಾತನಃ .. ೫..

ಪೂರ್ಣಃ ಪೂರಯಿತಾ ಪುಣ್ಯಃ ಪುಣ್ಯಕೀರ್ತಿಃ ಪರಾತ್ಪರಃ .
ಪರಮಾತ್ಮಾ ಪರಞ್ಜ್ಯೋತಿಃ ಪರೇಶಃ ಪಾರಗಃ ಪರಃ .. ೬..

ಸಕಲೋಪನಿಷದ್ವೇದ್ಯೋ ನಿಷ್ಕಲಃ ಸರ್ವಶಾಸ್ತ್ರಕೃತ್ .
ಅಕ್ಷಮಾಲಾಜ್ಞಾನಮುದ್ರಾಯುಕ್ತಹಸ್ತೋ ವರಪ್ರದಃ .. ೭..

ಪುರಾಣಪುರುಷಃ ಶ್ರೇಷ್ಠಃ ಶರಣ್ಯಃ ಪರಮೇಶ್ವರಃ .
ಶಾನ್ತೋ ದಾನ್ತೋ ಜಿತಕ್ರೋಧೋ ಜಿತಾಮಿತ್ರೋ ಜಗನ್ಮಯಃ .. ೮..

ಜರಾಮೃತ್ಯುಹರೋ ಜೀವೋ ಜಯದೋ ಜಾಡ್ಯನಾಶನಃ .
ಜಪಪ್ರಿಯೋ ಜಪಸ್ತುತ್ಯೋ ಜಪಕೃತ್ಪ್ರಿಯಕೃದ್ವಿಭುಃ .. ೯..

ವಿಮಲೋ ವಿಶ್ವರೂಪಶ್ಚ ವಿಶ್ವಗೋಪ್ತಾ ವಿಧಿಸ್ತುತಃ .
ವಿಧಿವಿಷ್ಣುಶಿವಸ್ತುತ್ಯಃ ಶಾನ್ತಿದಃ ಕ್ಷಾನ್ತಿಕಾರಕಃ .. ೧೦..

ಶ್ರೇಯಃಪ್ರದಃ ಶ್ರುತಿಮಯಃ ಶ್ರೇಯಸಾಂ ಪತಿರೀಶ್ವರಃ .
ಅಚ್ಯುತೋಽನನ್ತರೂಪಶ್ಚ ಪ್ರಾಣದಃ ಪೃಥಿವೀಪತಿಃ .. ೧೧..

ಅವ್ಯಕ್ತೋ ವ್ಯಕ್ತರೂಪಶ್ಚ ಸರ್ವಸಾಕ್ಷೀ ತಮೋಹರಃ .
ಅಜ್ಞಾನನಾಶಕೋ ಜ್ಞಾನೀ ಪೂರ್ಣಚನ್ದ್ರಸಮಪ್ರಭಃ .. ೧೨..

ಜ್ಞಾನದೋ ವಾಕ್ಪತಿರ್ಯೋಗೀ ಯೋಗೀಶಃ ಸರ್ವಕಾಮದಃ .
ಯೋಗಾರೂಢೋ ಮಹಾಪುಣ್ಯಃ ಪುಣ್ಯಕೀರ್ತಿರಮಿತ್ರಹಾ .. ೧೩..

ವಿಶ್ವಸಾಕ್ಷೀ ಚಿದಾಕಾರಃ ಪರಮಾನನ್ದಕಾರಕಃ .
ಮಹಾಯೋಗೀ ಮಹಾಮೌನೀ ಮುನೀಶಃ ಶ್ರೇಯಸಾಂ ನಿಧಿಃ .. ೧೪..

ಹಂಸಃ ಪರಮಹಂಸಶ್ಚ ವಿಶ್ವಗೋಪ್ತಾ ವಿರಟ್ ಸ್ವರಾಟ್ .
ಶುದ್ಧಸ್ಫಟಿಕಸಙ್ಕಾಶಃ ಜಟಾಮಣ್ಡಲಸಂಯುತಃ .. ೧೫..

ಆದಿಮಧ್ಯಾನ್ತರಹಿತಃ ಸರ್ವವಾಗೀಶ್ವರೇಶ್ವರಃ .
ಪ್ರಣವೋದ್ಗೀಥರೂಪಶ್ಚ ವೇದಾಹರಣಕರ್ಮಕೃತ್ .. ೧೬..

ನಾಮ್ನಾಮಷ್ಟೋತ್ತರಶತಂ ಹಯಗ್ರೀವಸ್ಯ ಯಃ ಪಠೇತ್ .
ಸ ಸರ್ವವೇದವೇದಾಙ್ಗಶಾಸ್ತ್ರಾಣಾಂ ಪಾರಗಃ ಕವಿಃ .. ೧೭..

ಇದಮಷ್ಟೋತ್ತರಶತಂ ನಿತ್ಯಂ ಮೂಢೋಽಪಿ ಯಃ ಪಠೇತ್ .
ವಾಚಸ್ಪತಿಸಮೋ ಬುದ್ಧ್ಯಾ ಸರ್ವವಿದ್ಯಾವಿಶಾರದಃ .. ೧೮..

ಮಹದೈಶ್ವರ್ಯಮಾಪ್ನೋತಿ ಕಲತ್ರಾಣಿ ಚ ಪುತ್ರಕಾನ್ .
ನಶ್ಯನ್ತಿ ಸಕಲಾನ್ ರೋಗಾನ್ ಅನ್ತೇ ಹರಿಪುರಂ ವ್ರಜೇತ್ .. ೧೯..