ચરણશૃઙ્ગરહિત નટરાજ સ્તોત્રમ્

.. ચરણશૃઙ્ગરહિત નટરાજ સ્તોત્રમ્ ..

સદઞ્ચિતમુદઞ્ચિતનિકુઞ્ચિતપદં ઝલઝલઞ્ચલિતમઞ્જુકટકમ્
પતઞ્જલિદૃગઞ્જનમનઞ્જનમચઞ્ચલપદં જનનભઞ્જનકરમ્.
કદમ્બરુચિમમ્બરવસં પરમમમ્બુદકદમ્બકવિડમ્બકગલમ્
ચિદમ્બુધિમણિં બુધહૃદમ્બુજરવિંપરચિદમ્બરનટં હૃદિ ભજ..૧..

હરં ત્રિપુરભઞ્જનમ્ અનન્તકૃતકઙ્કણમ્ અખણ્ડદયમન્તરહિતં
વિરિઞ્ચિસુરસંહતિપુરન્ધરવિચિન્તિતપદં તરુણચન્દ્રમકુટમ્.
પરં પદવિખણ્ડિતયમં ભસિતમણ્ડિતતનું મદનવઞ્ચનપરમ્
ચિરન્તનમમું પ્રણવસઞ્ચિતનિધિં પરચિદમ્બરનટં હૃદિ ભજ..૨..

અવન્તમખિલં જગદભઙ્ગગુણતુઙ્ગમમતં ધૃતવિધું સુરસરિત્
તરઙ્ગનિકુરમ્બધૃતિલમ્પટજટં શમનદમ્બસુહરં ભવહરમ્.
શિવં દશદિગન્તરવિજૃમ્ભિતકરં કરલસન્મૃગશિશું પશુપતિં
હરં શશિધનઞ્જયપતઙ્ગનયનં પરચિદમ્બરનટં હૃદિ ભજ..૩..

અનન્તનવરત્નવિલસત્કટકકિઙ્કિણિઝલં ઝલઝલં ઝલરવં
મુકુન્દવિધિહસ્તગતમદ્દલલયધ્વનિધિમિદ્ધિમિતનર્તનપદમ્.
શકુન્તરથબર્હિરથનન્દિમુખશૃઙ્ગિરિટિભૃઙ્ગિગણસઙ્ઘનિકટમ્
સનન્દસનકપ્રમુખવન્દિતપદં પરચિદમ્બરનટં હૃદિ ભજ..૪..

અનન્તમહસં ત્રિદશવન્દ્યચરણં મુનિહૃદન્તરવસન્તમમલમ્
કબન્ધવિયદિન્દ્વવનિગન્ધવહવહ્નિમખબન્ધુરવિમઞ્જુવપુષમ્.
અનન્તવિભવં ત્રિજગન્તરમણિં ત્રિનયનં ત્રિપુરખણ્ડનપરમ્
સનન્દમુનિવન્દિતપદં સકરુણં પરચિદમ્બરનટં હૃદિ ભજ..૫..

અચિન્ત્યમલિવૃન્દરુચિબન્ધુરગલં કુરિતકુન્દનિકુરમ્બધવલમ્
મુકુન્દસુરવૃન્દબલહન્તૃકૃતવન્દનલસન્તમ્અહિકુણ્ડલધરમ્.
અકમ્પમનુકમ્પિતરતિં સુજનમઙ્ગલનિધિં ગજહરં પશુપતિમ્
ધનઞ્જયનુતં પ્રણતરઞ્જનપરં પરચિદમ્બરનટં હૃદિ ભજ..૬..

પરં સુરવરં પુરહરં પશુપતિં જનિતદન્તિમુખષણ્મુખમમું
મૃડંકનકપિઙ્ગલજટં સનકપઙ્કજરવિં સુમનસં હિમરુચિમ્.
અસઙ્ઘમનસં જલધિજન્મકરલં કવલયન્તમતુલં ગુણનિધિમ્
સનન્દવરદં શમિતમિન્દુવદનં પરચિદમ્બરનટં હૃદિ ભજ..૭..

અજં ક્ષિતિરથં ભુજગપુઙ્ગવગુણં કનકશૃઙ્ગિધનુષં કરલસત્
કુરઙ્ગપૃથુટઙ્કપરશું રુચિરકુઙ્કુમરુચિં ડમરુકં ચ દધતમં.
મુકુન્દવિશિખં નમદવન્ધ્યફલદં નિગમવૃન્દતુરગં નિરુપમં
સચણ્ડિકમમું ઝટિતિ સંહૃતપુરં પરચિદમ્બરનટં હૃદિ ભજ..૮..

અનઙ્ગપરિપન્થિનમજં ક્ષિતિધુરન્ધરમલં કરુણયન્તમખિલં
જ્વલન્તમનલં દધતમન્તકરિપું સતતમિન્દ્રમુખવન્દિતપદમ્.
ઉદઞ્ચદરવિન્દકુલબન્ધુશતબિમ્બરુચિસંહતિસુગન્ધિવપુષં
પતઞ્જલિનુતં પ્રણવપઞ્જરશુકં પરચિદમ્બરનટં હૃદિ ભજ..૯..

ઇતિ સ્તવમમું ભુજગપુઙ્ગવકૃતં પ્રતિદિનં પઠતિ યઃ કૃતમુખઃ
સદઃ પ્રભુપદદ્વિતયદર્શનપદં સુલલિતં ચરણશૃઙ્ગરહિતમ્.
સરઃપ્રભવસમ્ભવહરિત્પતિહરિપ્રમુખદિવ્યનુતશઙ્કરપદં
સ ગચ્છતિ પરં ન તુ જનુર્જલનિધિં પરમદુઃખજનકં દુરિતદમ્..૧૦..