ಚರಣಶೃಙ್ಗರಹಿತ ನಟರಾಜ ಸ್ತೋತ್ರಮ್

.. ಚರಣಶೃಙ್ಗರಹಿತ ನಟರಾಜ ಸ್ತೋತ್ರಮ್ ..

ಸದಞ್ಚಿತಮುದಞ್ಚಿತನಿಕುಞ್ಚಿತಪದಂ ಝಲಝಲಞ್ಚಲಿತಮಞ್ಜುಕಟಕಮ್
ಪತಞ್ಜಲಿದೃಗಞ್ಜನಮನಞ್ಜನಮಚಞ್ಚಲಪದಂ ಜನನಭಞ್ಜನಕರಮ್.
ಕದಮ್ಬರುಚಿಮಮ್ಬರವಸಂ ಪರಮಮಮ್ಬುದಕದಮ್ಬಕವಿಡಮ್ಬಕಗಲಮ್
ಚಿದಮ್ಬುಧಿಮಣಿಂ ಬುಧಹೃದಮ್ಬುಜರವಿಂಪರಚಿದಮ್ಬರನಟಂ ಹೃದಿ ಭಜ..೧..

ಹರಂ ತ್ರಿಪುರಭಞ್ಜನಮ್ ಅನನ್ತಕೃತಕಙ್ಕಣಮ್ ಅಖಣ್ಡದಯಮನ್ತರಹಿತಂ
ವಿರಿಞ್ಚಿಸುರಸಂಹತಿಪುರನ್ಧರವಿಚಿನ್ತಿತಪದಂ ತರುಣಚನ್ದ್ರಮಕುಟಮ್.
ಪರಂ ಪದವಿಖಣ್ಡಿತಯಮಂ ಭಸಿತಮಣ್ಡಿತತನುಂ ಮದನವಞ್ಚನಪರಮ್
ಚಿರನ್ತನಮಮುಂ ಪ್ರಣವಸಞ್ಚಿತನಿಧಿಂ ಪರಚಿದಮ್ಬರನಟಂ ಹೃದಿ ಭಜ..೨..

ಅವನ್ತಮಖಿಲಂ ಜಗದಭಙ್ಗಗುಣತುಙ್ಗಮಮತಂ ಧೃತವಿಧುಂ ಸುರಸರಿತ್
ತರಙ್ಗನಿಕುರಮ್ಬಧೃತಿಲಮ್ಪಟಜಟಂ ಶಮನದಮ್ಬಸುಹರಂ ಭವಹರಮ್.
ಶಿವಂ ದಶದಿಗನ್ತರವಿಜೃಮ್ಭಿತಕರಂ ಕರಲಸನ್ಮೃಗಶಿಶುಂ ಪಶುಪತಿಂ
ಹರಂ ಶಶಿಧನಞ್ಜಯಪತಙ್ಗನಯನಂ ಪರಚಿದಮ್ಬರನಟಂ ಹೃದಿ ಭಜ..೩..

ಅನನ್ತನವರತ್ನವಿಲಸತ್ಕಟಕಕಿಙ್ಕಿಣಿಝಲಂ ಝಲಝಲಂ ಝಲರವಂ
ಮುಕುನ್ದವಿಧಿಹಸ್ತಗತಮದ್ದಲಲಯಧ್ವನಿಧಿಮಿದ್ಧಿಮಿತನರ್ತನಪದಮ್.
ಶಕುನ್ತರಥಬರ್ಹಿರಥನನ್ದಿಮುಖಶೃಙ್ಗಿರಿಟಿಭೃಙ್ಗಿಗಣಸಙ್ಘನಿಕಟಮ್
ಸನನ್ದಸನಕಪ್ರಮುಖವನ್ದಿತಪದಂ ಪರಚಿದಮ್ಬರನಟಂ ಹೃದಿ ಭಜ..೪..

ಅನನ್ತಮಹಸಂ ತ್ರಿದಶವನ್ದ್ಯಚರಣಂ ಮುನಿಹೃದನ್ತರವಸನ್ತಮಮಲಮ್
ಕಬನ್ಧವಿಯದಿನ್ದ್ವವನಿಗನ್ಧವಹವಹ್ನಿಮಖಬನ್ಧುರವಿಮಞ್ಜುವಪುಷಮ್.
ಅನನ್ತವಿಭವಂ ತ್ರಿಜಗನ್ತರಮಣಿಂ ತ್ರಿನಯನಂ ತ್ರಿಪುರಖಣ್ಡನಪರಮ್
ಸನನ್ದಮುನಿವನ್ದಿತಪದಂ ಸಕರುಣಂ ಪರಚಿದಮ್ಬರನಟಂ ಹೃದಿ ಭಜ..೫..

ಅಚಿನ್ತ್ಯಮಲಿವೃನ್ದರುಚಿಬನ್ಧುರಗಲಂ ಕುರಿತಕುನ್ದನಿಕುರಮ್ಬಧವಲಮ್
ಮುಕುನ್ದಸುರವೃನ್ದಬಲಹನ್ತೃಕೃತವನ್ದನಲಸನ್ತಮ್ಅಹಿಕುಣ್ಡಲಧರಮ್.
ಅಕಮ್ಪಮನುಕಮ್ಪಿತರತಿಂ ಸುಜನಮಙ್ಗಲನಿಧಿಂ ಗಜಹರಂ ಪಶುಪತಿಮ್
ಧನಞ್ಜಯನುತಂ ಪ್ರಣತರಞ್ಜನಪರಂ ಪರಚಿದಮ್ಬರನಟಂ ಹೃದಿ ಭಜ..೬..

ಪರಂ ಸುರವರಂ ಪುರಹರಂ ಪಶುಪತಿಂ ಜನಿತದನ್ತಿಮುಖಷಣ್ಮುಖಮಮುಂ
ಮೃಡಂಕನಕಪಿಙ್ಗಲಜಟಂ ಸನಕಪಙ್ಕಜರವಿಂ ಸುಮನಸಂ ಹಿಮರುಚಿಮ್.
ಅಸಙ್ಘಮನಸಂ ಜಲಧಿಜನ್ಮಕರಲಂ ಕವಲಯನ್ತಮತುಲಂ ಗುಣನಿಧಿಮ್
ಸನನ್ದವರದಂ ಶಮಿತಮಿನ್ದುವದನಂ ಪರಚಿದಮ್ಬರನಟಂ ಹೃದಿ ಭಜ..೭..

ಅಜಂ ಕ್ಷಿತಿರಥಂ ಭುಜಗಪುಙ್ಗವಗುಣಂ ಕನಕಶೃಙ್ಗಿಧನುಷಂ ಕರಲಸತ್
ಕುರಙ್ಗಪೃಥುಟಙ್ಕಪರಶುಂ ರುಚಿರಕುಙ್ಕುಮರುಚಿಂ ಡಮರುಕಂ ಚ ದಧತಮಂ.
ಮುಕುನ್ದವಿಶಿಖಂ ನಮದವನ್ಧ್ಯಫಲದಂ ನಿಗಮವೃನ್ದತುರಗಂ ನಿರುಪಮಂ
ಸಚಣ್ಡಿಕಮಮುಂ ಝಟಿತಿ ಸಂಹೃತಪುರಂ ಪರಚಿದಮ್ಬರನಟಂ ಹೃದಿ ಭಜ..೮..

ಅನಙ್ಗಪರಿಪನ್ಥಿನಮಜಂ ಕ್ಷಿತಿಧುರನ್ಧರಮಲಂ ಕರುಣಯನ್ತಮಖಿಲಂ
ಜ್ವಲನ್ತಮನಲಂ ದಧತಮನ್ತಕರಿಪುಂ ಸತತಮಿನ್ದ್ರಮುಖವನ್ದಿತಪದಮ್.
ಉದಞ್ಚದರವಿನ್ದಕುಲಬನ್ಧುಶತಬಿಮ್ಬರುಚಿಸಂಹತಿಸುಗನ್ಧಿವಪುಷಂ
ಪತಞ್ಜಲಿನುತಂ ಪ್ರಣವಪಞ್ಜರಶುಕಂ ಪರಚಿದಮ್ಬರನಟಂ ಹೃದಿ ಭಜ..೯..

ಇತಿ ಸ್ತವಮಮುಂ ಭುಜಗಪುಙ್ಗವಕೃತಂ ಪ್ರತಿದಿನಂ ಪಠತಿ ಯಃ ಕೃತಮುಖಃ
ಸದಃ ಪ್ರಭುಪದದ್ವಿತಯದರ್ಶನಪದಂ ಸುಲಲಿತಂ ಚರಣಶೃಙ್ಗರಹಿತಮ್.
ಸರಃಪ್ರಭವಸಮ್ಭವಹರಿತ್ಪತಿಹರಿಪ್ರಮುಖದಿವ್ಯನುತಶಙ್ಕರಪದಂ
ಸ ಗಚ್ಛತಿ ಪರಂ ನ ತು ಜನುರ್ಜಲನಿಧಿಂ ಪರಮದುಃಖಜನಕಂ ದುರಿತದಮ್..೧೦..