অথ শ্রীসুদর্শনশতকম্

শ্রীসুদর্শনায নমঃ
সৌদর্শন্যুজ্জিহানা দিশি ভ়িদিশি তিরস্কৃত্য সাভ়িত্রমর্চি-
র্বাহ্যাবাহ্যান্ধকারক্ষতজগদগদঙ্কারভূম্না স্বধাম্না ।
দোঃখর্জূদূরগর্জদ্বিবুধরিপুভ়ধূকণ্ঠভ়ৈকল্যকল্যা
জ্বালা জাজ্বল্যমানা ভ়িতরতু ভভ়তাং ভ়ীপ্সযাঽভীপ্সিতানি ॥ ১॥

প্রত্যুদ্যাতং মযূখৈর্নভসি দিনকৃতঃ প্রাপ্তসেভ়ং প্রভাভি-
র্ভূমৌ সৌমেরভ়ীভির্দিভ়ি ভ়রিভ়সিতং দীপ্তিভির্দেভ়ধাম্নাম্ ।
ভুযস্যৈ ভূতযে ভ়ঃ স্ফুরতু সকলদিগ্ভ্রান্তসান্দ্রস্ফুলিঙ্গং
চাক্রং জাগ্রৎপ্রতাপং ত্রিভুভ়নভ়িজযভ়্যগ্রমুগ্রং মহস্তৎ ॥ ২॥

পূর্ণে পূরৈঃ সুধানাং সুমহতি লসতস্সোমবিম্বালভ়ালে-
বাহাশাখাভ়রুদ্ধক্ষিতিগগনদিভ়শ্চক্ররাজদ্রুমস্য ।
জ্যোতিশ্ছদ্মা প্রভ়ালঃ প্রকটিতসুমনস্সম্পদুত্তংসলক্ষ্মীং
পুষ্ণন্নাশামুখেষু প্রদিশতু ভভ়তাং সপ্রকর্ষং প্রহর্ষম্ ॥ ৩॥

আরাদারাৎসহস্রাদ্বিসরতি ভ়িমতক্ষেপদক্ষাদ্যদক্ষা-
ন্নাভের্ভাস্বৎসনাভের্নিজভ়িভভ়পরিচ্ছিন্নভূমেশ্চ নেমেঃ ।
আম্নাযৈরেককণ্ঠৈঃ স্তুতমহিম মহো মাধভ়ীযস্য হেতে-
স্তদ্বো দিক্ষ্বেধমানং চতসৃষু চতুরঃ পুষ্যতাৎপূরুষার্থান্ ॥ ৪॥

শ্যামং ধামপ্রসৃত্যা ক্বচন ভগভ়তঃ ক্বাপি বভ্রু প্রকৃত্যা
শুভ্রং শেষস্য ভাষা ক্বচন মণিরুচা ক্বাপি তস্যৈভ় রক্তম্ ।
নীলং শ্রীনেত্রকান্ত্যা ক্বচিদপি মিথুনস্যাদিমস্যেভ় চিত্রং
ভ়্যাপ্তন্বানং ভ়িতানশ্রিযমুপচিনুতাচ্ছর্ম ভ়শ্চক্রভানম্ ॥ ৫॥

শংসন্ত্যুন্মেষমুচ্ছোষিতপরমহসো ভাস্বতঃ কৈটভারে-
রিন্ধে সন্ধ্যেভ় নক্তঞ্চরভ়িলযকরী যা জগদ্বন্দনীযা ।
বন্ধূকচ্ছাযবন্ধুচ্ছভ়িঘটিতঘনচ্ছেদমেদস্বিনী সা
রাথাঙ্গী রশ্মিভঙ্গী প্রণুদতু ভভ়তাং প্রত্যহোত্থানমেনঃ ॥ ৬॥

সাম্যং ধূম্যাপ্রভ়ৃদ্ধ্যা প্রকটযতি নভস্তারকাজালকানি
স্ফৌলিঙ্গীং যান্তি কান্তিং দিশতি যদুদযে মেরুরঙ্গারশঙ্কাম্ ।
অগ্নির্মগ্নার্চিরৈক্যং ভজতি দিননিশাভ়ল্লভৌ দুর্লভাভৌ
জ্বালাভ়র্তাভ়িভ় স্তঃ প্রহরণপতিজং ধাম ভ়স্তদ্ধিনোতু ॥ ৭॥

দৃষ্টেঽধিভ়্যোমচক্রে ভ়িকচনভ়জপাসন্নিকাশে সকাশং
স্বর্ভানুর্ভানুরেষ স্ফুটমিতি কলযন্নাগতো ভ়েগতোঽস্য ।
নিষ্টপ্তো যৈর্নিভ়ৃত্তো ভ়িধুমিভ় সহসা স্প্রষ্টুমদ্যাপি নেষ্টে
ঘর্মাংশুং তে ঘটন্তামহিতভ়িহতযে ভানভ়ো ভাস্বরা ভ়ঃ ॥ ৮॥

দেভ়ং হেমাদ্রিতুঙ্গং পৃথুভুজশিখরং বিভ্রতীং মধ্যদেশে
নাভিদ্বীপাভিরামামরভ়িপিনভ়তীং শেষশীর্ষাসনস্থাম্ ।
নেমিং পর্যাযভূমিং দিনকরকিরণাদৃষ্টসীমঃপরীত্য
প্রীত্যৈ ভ়শ্চক্রভ়ালাচল ইভ় ভ়িলসন্নস্তু দিভ়্যাস্ত্ররশ্মিঃ ॥ ৯॥

একং লোকস্য চক্ষুর্দ্বিভ়িধমপনুদৎকর্ম নম্রত্রিনেত্রং
দাত্রর্থানাং চতুর্ণাং গমযদরিগণং পঞ্চতাং ষড্গুণাঢ্যম্ ।
সপ্তার্চিঃশোষিতাষ্টাপদনভ়কিরণশ্রেণিরজ্যদ্দশাংশং
পর্যস্যাদ্বঃ শতাঙ্গাভ়যভ়পরিভ়ৃঢজ্যোতিরীতীঃ সহস্রম্ ॥ ১০॥

উচ্চণ্ডে যচ্ছিখণ্ডে নিবিডযতি নভঃ ক্রোডমর্কোঽটতি দ্যা-
মভ্যস্য প্রৌঢতাপগ্লপিতভ়পুরপো বিভ্রতীরভ্রপঙ্ক্তীঃ ।
ধত্তে শুষ্যৎসুধোৎসো ভ়িধুরপমধুনঃ ক্ষৌদ্রকোশস্য সাম্যং
রক্ষন্ত্বস্ত্রপ্রভোস্তে রচিতসুচরিতভ়্যুষ্টযো ঘুষ্টযোঃ ভ়ঃ ॥ ১১॥

পদ্মৌঘো দীর্ঘিকাম্ভস্যভ়নিধরতটে গৈরিকাম্বুপ্রপাতঃ
সিন্দূরং কুঞ্জরাণাং দিশি দিশি গগনে সান্ধ্যমেঘপ্রবন্ধঃ ।
পারাভ়ারে প্রভ়ালো ভ়নভুভ়ি চ তথা প্রেক্ষ্যমাণঃ প্রমুগ্ধৈঃ
সাধিষ্ঠং ভ়ঃ প্রমোদং জনযতু দনুজদ্বেষিণস্ত্বৈষরাশিঃ ॥ ১২॥

ভানো ভা নো ত্বদীযা স্ফুরতি কুমুদিনীমিত্র তে কুত্র তেজ-
স্তারাস্তারাদধীরোঽস্যনল ন ভভ়তঃ স্বৈরমৈরম্মদার্চিঃ ।
শংসন্তীত্থং নভঃস্থা যদুদযসমযে চক্ররাজাংশভ়স্তে
যুষ্মাকং প্রৌঢতাপপ্রভভ়গদাপক্রমায ক্রমন্তাম্ ॥ ১৩॥

জগ্ধ্বা কর্ণেষু দূর্ভ়াঙ্কুরমরিসুদৃশামক্ষিষু স্বর্ভ়ধূনাং
পীত্বা চাম্ভশ্চরন্ত্যঃ সভ়ৃষমনুগতা ভ়ল্লভ়েনাদিমেন ।
গাভ়ো ভ়শ্চক্রভর্তুঃ পরমমৃতরসং প্রশ্রিতানাং দুহানাঃ
ঋদ্ধিং স্বালোকলুপ্তত্রিভুনতমসঃ সানুবন্ধাং দদন্তাম্ ॥ ১৪॥

সেনাং সেনাং মঘোনো মহতি রণমুখেঽলং ভযং লম্ভযন্তী-
রুৎসেকোষ্ণালুদোষ্ণাং প্রথমদিভ়িষদামাভ়লীর্যাভ়লীঢে ।
ভ়িশ্বং ভ়িশ্বম্ভরাদ্যং রথপদধিপতের্লীলযা পালযন্তী
ঋদ্ধিঃ সা দীধিতীনাং ভ়ৃজিনমনুজনুর্মার্জযত্বার্জিতং ভ়ঃ ॥ ১৫॥

তপ্তা স্বেনোষ্মণেভ় প্রতিভটভ়পুষামস্রধারাং ধযন্তী
প্রাপ্তেভ় ক্ষীবভাভ়ং প্রতিদিশমসকৃত্তন্বতী ঘূর্ণিতানি ।
ভ়ংশাস্থিস্ফোটশব্দং প্রকটযতি পটূন্যাঽঽভ়হন্ত্যট্টহাসান্
ভা সা ভ়ঃ স্যন্দনাঙ্গপ্রভুসমুদযিনী স্পন্দতাং চিন্তিতায ॥ ১৬॥

দেভ়ৈরাসেভ়্যমানো দনুজভটভুজাদণ্ডদর্পোষ্ণতপ্তৈ-
রাশারোধোঽতিলঙ্ঘী লুঠদুডুপটলীলক্ষ্যডিণ্ডীরপিণ্ডঃ ।
রিঙ্গজ্জ্বালাতরঙ্গত্রুটিতরিপুতরুভ়্রাতপাতোগ্রমার্গ-
শ্চাক্রো ভ়ঃ শোচিরোধঃ শমযতু দুরিতাপহ্নভ়ং দাভ়ভ়হ্নিম্ ॥ ১৭॥

ভ্রাম্যতী সংশ্রিতানাং ভ্রমশমনকরী চ্ছন্ন সূর্যপ্রকাশা
সূর্যালোকানুরূপা রিপুহৃদযতমস্কারিণী নিস্তমস্কা ।
ধারাসম্পাতিনী চ প্রকটিতদহনা দীপ্তিরস্ত্রেশিতুর্ভ়-
শ্চিত্রা ভদ্রায ভ়িদ্রাভ়িতভ়িমতজনা জাযতামাযতায ॥ ১৮॥

নিন্যে ভ়ন্যেভ় কাশীদভ়শিখিজটিলজ্যোতিষা যেন দাহং
কৃত্যা ভ়ৃত্ত্যা ভ়িলিল্যে শলভসুলভযা যত্র চিত্রপ্রভাভ়ে ।
রুদ্রোঽপ্যদ্রের্দুহিত্রা সহ গহনগুহাং যদ্ভযাদভ্যযাসীৎ
দিশ্যাদ্বিশ্বার্চিতো ভ়ঃ স শুভমনিভৃতং শৌরিহেতিপ্রতাপঃ ॥ ১৯॥

উদ্যন্‌বিম্বাদুদারান্নযনজলহিমং মার্জযন্নির্জরীণা-
মজ্ঞানধ্বান্তমূর্চ্ছাকরজনিরজনীভঞ্জনভ়্যঞ্জিতাধ্বা ।
ন্যক্কুর্ভ়াণো গ্রহাণাং স্ফুরণমপহরন্নর্চিষঃ পাভ়কীযা-
শ্চক্রেশার্কপ্রকাশো দিশতু দশ দিশো ভ়্যশ্নুভ়ানং যশো ভ়ঃ ॥ ২০॥

ভ়র্গস্য স্বর্গধাম্নামপি দনুজনুষাং ভ়িগ্রহং নিগ্রহীতুং
দাতুং সদ্যোঽবলানাং শ্রিযমতিশযিনীং পত্রভঙ্গানুভ়ৃত্যা ।
যোক্তুং দেদীপ্যতে যা যুগপদপি পুরো ভূতিময্যা প্রকৃত্যা
সা ভ়ো নুদ্যাদভ়িদ্যাং দ্যুতিরমৃতরসস্যন্দিনী স্যান্দনাঙ্গী ॥ ২১॥

দাহং দাহং সপত্নান্সমরভুভ়ি লসদ্ভস্মনা ভ়র্ত্মনা যান্
ক্রভ়্যাদপ্রেতভূতাদ্যভিলষিতপুষা প্রীতকাপালিকেন ।
কঙ্কালৈঃ কালধৌতং গিরিমিভ় কুরুতে যঃ স্বকীর্তের্ভ়িহর্তুং
ঘৃষ্টিঃ সান্দৃষ্টিকং ভ়ঃ সকলমুপনযত্বাযুধাগ্রেসরস্য ॥ ২২॥

দগ্ধানাং দানভ়ানাং সভসিতনিচযৈরস্থিভিঃ সর্ভ়শুভ্রাং
পৃথ্বীং কৃত্বাপি ভূযো নভ়রুধিরঝরীকৌতুকং কৌণপেভ্যঃ ।
কুর্ভ়াণং ভ়াষ্পপূরৈঃ কুচতটঘুসৃণক্ষালনৈস্তদ্বধূনাং
পাপং পাপচ্যমানং শমযতু ভভ়তাং শস্ত্ররাজস্য তেজঃ ॥ ২৩॥

মাগান্মোষং ললাটানল ইতি মদনদ্বেষিণা ধ্যাযতেভ়
স্রষ্ট্রা প্রোন্নিদ্রভ়াসাম্বুজদলপটলপ্লোষমুৎপশ্যতেভ় ।
ভ়জ্রাগ্নির্মা স্ম নাশং ভ়্রজদিতি চকিতেনেভ় শক্রেণ বদ্ধৈঃ
স্তোত্রৈরস্ত্রেশ্বরস্য দ্যতু দুরিতশতং দ্যোতমানা দ্যুতির্ভ়ঃ ॥ ২৪॥

শস্ত্রাস্ত্রং শাত্রভ়াণাং শলভকুলমিভ় জ্বালযা লেলিহানা
ঘৌষৈঃ স্বৈঃ ক্ষোভযন্তী ভ়িঘটিতভগভ়দ্যোগনিদ্রান্সমুদ্রান্ ।
ভ়্যূঢোরঃপ্রৌঢচারত্রুটিতপটুরটৎকীকসক্ষুণ্ণদৈত্যা
নেমিঃ সৌদর্শনী ভ়ঃ শ্রিযমতিশযিনীং দাশতাশতাব্দম্ ॥ ২৫॥

ধারা চক্রস্য তারাগণকপিশঘৃণিদ্যোতিতদ্যুপ্রচারা
পারাভ়ারাম্বুপূরক্বথনপিশুনিতোত্তালপাতালযাত্রা ।
গোত্রাদ্রিস্ফোটশব্দপ্রকটিতভ়সুধামণ্ডলীচণ্ডযানা
পন্থানং ভ়ঃ প্রদিশ্যাৎপ্রশমনকুশলা পাপ্মনামাত্মনীনম্ ॥ ২৬॥

যাত্রা যা ত্রাতলোকা প্রকটিতভ়রুণত্রাসমুদ্রে সমুদ্রে
সত্ত্বাসত্ত্বাসহোষ্ণাকৃতসগরুদগস্পন্দদানা দদানা ।
হানিং হা নিন্দিতানাং জগতি পরিষদাং দানভ়ীনাং নভ়ীনাং
চক্রে চক্রেশনেমিঃ শমমুপহরতু সপ্রভাভ়প্রভা ভ়ঃ ॥ ২৭॥

যত্রামিত্রান্দিধক্ষৌ প্রভ়িশতি বলিনো ধাম নিঃসীমধাম্নি
গ্রস্তাপস্তাপশীর্ণৈঃ প্রগুণিতসিকতো মৌক্তিকৈঃশৌক্তিকেযৈঃ ।
রাশির্ভ়ারামপারাং প্রকটযতি পুনর্ভ়ৈরিদারাশ্রুপূরৈঃ
ভ়ৃদ্ধিং নির্যাতি নির্যাপযতু স দুরিতান্যস্ত্ররাজপ্রধির্ভ়ঃ ॥ ২৮॥

কক্ষ্যাতৌল্যেন কদ্রূতনযফণমণীন্কল্যদীপস্য যুঞ্জন্
পাতালান্তঃ প্রতাপী নিখিলমপি তমঃ স্বেন ধাম্না নিগীর্য ।
দৈতেযপ্রেযসীনাং ভ়মতি হৃদি হতপ্রেযসাং ভূযসাং য-
শ্চক্রাগ্রীযাগ্রদেশো দহতু ভ়িলসিতং ভূযসামংহসাং ভ়ঃ ॥ ২৯॥

কৃষ্ণাম্ভোদস্য ভূষা কৃতনযননযভ়্যাহতির্ভার্গভ়স্য
প্রাপ্তামাভ়েদযন্তী প্রতিভটসুদৃশামুদ্ভটাং ভ়াষ্পভ়ৃষ্টিম্ ।
নিষ্টপ্তাষ্টাপদশ্রীঃ সমমমরচমূগর্জিতৈরুজ্জিহানা
কীর্তি ভ়ঃ কেতকীভিঃ প্রথযতু সদৃশীং চঞ্চলা চক্রধারা ॥ ৩০॥

ভ়প্রাণাং ভেদিনীং যঃ পরিণতিমখিলশ্লাঘনীযাং দধানঃ
ক্ষুণ্ণাং নক্ষত্রমালাং দিশি দিশি ভ়িকিরন্বিদ্যুতা তুল্যকক্ষ্যঃ ।
নির্যাণেনোৎকটেন প্রকটযতি নভ়ং দানভ়ারিপ্রকর্ষং
চক্রাধীশস্য ভদ্রো ভ়শযতু ভভ়তাং স প্রধিশ্চিত্তভ়ৃত্তিম্ ॥ ৩১॥

নাকৌকঃ শত্রুজত্রুত্রুটনভ়িঘটিতস্কন্ধনীরন্ধ্রনির্যন্
নভ়্যক্রভ়্যাস্রহভ়্যগ্রসনরসলসজ্জ্বালজিহ্বালভ়হ্নিম্ ।
যং দৃষ্ট্বা সাংযুগীনং পুনরপি ভ়িদধত্যাশিষো ভ়ীর্যভ়ৃদ্ধ্যৈ
গীর্ভ়াণা নির্ভ়ৃণানা ভ়িতরতু স জযং ভ়িষ্ণুহেতিপ্রধির্ভ়ঃ ॥ ৩২॥

ধন্বাধ্বন্যস্য ধারাসলিলমিভ় ধনং দুর্গতস্যেভ় দৃষ্টি-
র্জাত্যন্ধস্যেভ় পঙ্গোঃ পদভ়িহৃতিরিভ় প্রীণনী প্রেমভাজাম্ ।
পত্যুর্মাযাক্রিযাযাং প্রকটপরিণতির্ভ়িশ্বরক্ষাক্ষমাযাং
মাযামাযামিনীং ভ়স্ত্রুটযতু মহতী নেমিরস্ত্রেশ্বরস্য ॥ ৩৩॥

ত্রাণং যা ভ়িষ্টপানাং ভ়িতরতি চ যযা কল্প্যতে কামপূর্তি-
র্ন স্থাতুং যৎপুরস্তাৎপ্রভভ়তি কলযাপ্যোষধীনামধীশঃ ।
উন্মেষো যাতি যস্যা ন সমযনিযতিং সা শ্রিযং ভ়ঃ প্রদেযা-
ন্ন্যক্কৃত্য দ্যোতমানা ত্রিপুরহরদৃশং নেমিরস্ত্রেশ্বরস্য ॥ ৩৪॥

নক্ষত্রক্ষোদভূতিপ্রকরভ়িকিরণশ্বেতিতাশাভ়কাশা
জীর্ণৈঃ পর্ণৈরিভ় দ্যাং জলধরপটলৈশ্চূর্ণিতৈরূর্ণুভ়ানা ।
আজাভ়াজানভ়াজানতরিপুজনতারণ্যমাভ়র্তমানা
নেমির্ভ়াত্যেভ় চাক্রী প্রণুদতু ভভ়তাং সংহতং পাপতূলম্ ॥ ৩৫॥

ক্ষিপ্ত্বা নেপথ্যশাটীমিভ় জলদঘটাং জিষ্ণুকোদণ্ডচিত্রাং
তারাপুঞ্জং প্রসূনাঞ্জলিমিভ় ভ়িপুলে ভ়্যোমরঙ্গে ভ়িকীর্য ।
নির্ভ়েদগ্লানিচিন্তাপ্রভৃতিপরভ়শানন্তরা দানভ়েন্দ্রান্
নৃত্যন্নানালযাঢ্যং নট ইভ় তনুতাং শর্ম চক্রপ্রধির্ভ়ঃ ॥ ৩৬॥

দৌর্গত্যপ্রৌঢতাপপ্রতিভটভ়িভভ়া ভ়িত্তধারাঃসৃজন্তী
গর্জন্তী চীৎক্রিযাভির্জ্বলদনলশিখোদ্দামসৌদামনীকা ।
অভ়্যাৎক্রভ়্যাদ্বধূটীনযনজলভরৈর্দিক্ষু নভ়্যাননাভ়্যান্
পুষ্যন্তী সিন্ধুপূরান্ রথচরণপতের্নেমিকাদম্বিনী ভ়ঃ ॥ ৩৭॥

সন্দোহং দানভ়ানামজসমজমিভ়ালভ্য জাজ্বল্যমানে
ভ়হ্নাভ়হ্নায জুহ্বত্ত্রিদশপরিষদে স্বস্বভাগপ্রদাযী ।
স্তোত্রৈর্বহ্মাদিগীতৈর্মুখরপরিসরং শ্লাঘ্যশস্ত্রপ্রযোগং
প্রাপ্তঃ সঙ্গ্রামসত্রং প্রধিরসুররিপোঃ প্রার্থিতং প্রস্নুতাং ভ়ঃ ॥ ৩৮॥

উৎপাতালাতকল্পান্যসুরপরিষদামাহভ়প্রার্থিনীনা-
মধ্বানধ্বাভ়ভ়োধক্ষপণচণতমঃ ক্ষেপদীপোপমানি ।
ত্রৈলোক্যাগারভারোদ্বহনসহমণিস্তম্ভসম্পৎসখানি
ত্রাযন্তামন্তিমাযাং ভ়িপদি সপদি ভ়োঽরাণি সৌদর্শনানি ॥ ৩৯॥

জ্বালাজালপ্রভ়ালস্তবকিতশিরসো নাভিমাভ়ালযন্ত্যঃ
সিক্তা রক্তাম্বুপূরৈঃ শকলিতভ়পুষাং শাত্রভ়ানীকিনীনাম্ ।
চক্রাক্রীডপ্ররূঢাভুজগশযভুজোপঘ্ননিঘ্নপ্রচারাঃ
পুষ্প্যন্ত্যঃকীর্তিপুষ্পাণ্যরকনকলতাঃ প্রীতযে ভ়ঃ প্রথন্তাম্ ॥ ৪০॥

জ্বালাজালাব্ধিমুদ্রং ক্ষ্তীভ়লযমিভ়াবিভ্রতী নেমিচক্রং
নাগেন্দ্রস্যেভ় নাভেঃ ফণপরিষদিভ় প্রৌঢরত্নপ্রকাশা ।
দত্তাং ভ়ো দিভ়্যহেতের্মতিমরভ়িততিঃ খ্যাতসাহস্রসঙ্খ্যা
সঙ্খ্যাভ়ৎসঙ্ঘচিত্তশ্রভ়ণহরগুণস্যন্দিসন্দর্ভগর্ভাম্ ॥ ৪১॥

ব্রহ্মেশোপক্রমাণাং বহুভ়িধভ়িমতক্ষোদসম্মোদিতানাং
সেভ়াযৈ দেভ়তানাং দনুজকুলরিপোঃ পিণ্ডিকাদ্যঙ্গভাজাম্ ।
তত্তদ্ধামান্তসীমাভ়িভজনভ়িধযে মানদণ্ডাযমানা
ভূমানং ভূযসা ভ়ো দিশতু দশশতী ভাস্বরাণামরাণাম্ ॥ ৪২॥

জ্বালাকল্লোলমালানিবিডপরিসরাং নেমিভ়েলাং দধানে
পূর্ভ়েণাক্রান্তমধ্যে ভুভ়নমযহভ়ির্ভোজিনা পূরুষেণ ।
প্রস্ফূর্জৎপ্রাজ্যরত্নে রথপদজলধাভ়েধমানৈঃ স্ফুলিঙ্গৈঃ
ভদ্রং ভ়ো ভ়িদ্রুমাণাং শ্রিযমরভ়িততির্ভ়িস্তৃণানা ভ়িধত্তাম্ ॥ ৪৩॥

নাসীরস্বৈরভগ্নপ্রতিভটরুধিরাসারধারাভ়সেকা-
নেকান্তস্মেরপদ্মপ্রকরসহচরচ্ছাযযা প্রাপ্য নাভ্যা ।
মুক্তানীভ়াঙ্কুরাণি স্ফুরদনলশিখাদর্শিতপ্রাক্প্রভ়ালা-
ন্যভ়্যাঘাতেন ভভ়্যং প্রদদতু ভভ়তাং দিভ়্যহেতেররাণি ॥ ৪৪॥

দাভ়োল্কামণ্ডলীভ় দ্রুমগণগহনে বাডভ়স্যেভ় ভ়হ্নে-
র্জ্বালাভ়ৃদ্ধির্মহাব্ধৌ প্রভ়যসি তমসি প্রাতরর্কপ্রভেভ় ।
চক্রে যা দানভ়ানাং হযকরটিঘটাসঙ্কটে জাঘটীতি
প্রাজ্যং সা ভ়ঃ প্রেদেযাৎপদমরপরিষৎপদ্মনাভাযুধস্য ॥ ৪৫॥

তাপাদ্দৈত্যপ্রতাপাতপসমুচিতাত্ত্রাযমাণং ত্রিলোকীং
লোলৈর্জ্বালাকলাপৈঃ প্রকটযদভিতশ্চীনপট্টাঞ্চলানি ।
ছত্রাকারং শলাকা ইভ় কনককৃতাঃ শৌরিদোর্দণ্ডলগ্নং
ভূযাসুর্ভূষযন্ত্যো রথচরণমরস্ফূর্তযঃকীর্তযে ভ়ঃ ॥ ৪৬॥

নাভীশালানিখাতাং নহনসমুচিতাং ভ়ৈরিলক্ষ্মীভ়শানাং
সংযদ্বারীহৃতানাং সমনুভ়িদধতী কাঞ্চনালানপঙ্ক্তিম্ ।
রাজ্যা চ প্রাজ্যদৈত্যভ়্রজভ়িজযমহোত্তম্ভিতানাং ভুজানাং
তুল্যা চক্রারমালা তুলযতু ভভ়তাং তূলভ়চ্ছত্রুলোকম্ ॥ ৪৭॥

আনেমেশ্চক্রভ়ালাত্ত্বিষ ইভ় ভ়িততাঃপিণ্ডিকাচণ্ডদীপ্তে-
র্দীপ্তা দীপা ইভ়ারাদ্গহনরণতমীগাহিনঃ পূরুষস্য ।
শাণে রেখাযিতানাং রথচরণমযে শত্রুশৌণ্ডীর্যহেম্নাং
রেখাঃ প্রত্যগ্রলগ্না ইভ় ভুভ়নমরশ্রেযণঃ প্রীণযন্তু ॥ ৪৮॥

দীপ্তৈরর্চিঃপ্ররোহৈর্দলভ়তি ভ়িধৃতে বাহুনালেনভ়িষ্ণো-
রুদ্যৎপ্রদ্যোতনাভম্প্রথযতি পুরুষং কর্ণিকাভ়র্ণিকাযাম্ ।
চূডালং ভ়েদমৌলিং কলযতি কমলে চক্রনাম্নোপলক্ষ্যে
লক্ষ্মীং স্ফারামরাণি প্রতিভ়িদধতু ভ়ঃ কেসরশ্রীকরাণি ॥ ৪৯॥

ধাতুস্যন্দৈরমন্দৈঃ কলুষিতভ়পুষো নির্ঝরাম্ভঃপ্রপাতা-
নর্চিষ্মত্যা স্বমূর্ত্যা রথচরণগিরের্নেমিনাভীতটস্য ।
ভ়্যাকুর্ভ়াণারপঙ্ক্তির্ভ়িতরতু ভ়িভুতাভ়িস্তৃতিং ভ়িত্তকোটী-
কোটীরচ্ছত্রপীঠীকটককরিঘটাচামরস্রগ্বিণীং ভ়ঃ ॥ ৫০॥

ঐক্যেন দ্বাদশানামশিশিরমহসাং দর্শযন্তী প্রভ়ৃত্তিং
দত্তঃ স্বর্লোকলক্ষ্ম্যাস্তিলক ইভ় মুখে পদ্মরাগদ্রভ়েণ ।
দেযাদ্দৈতেযদর্পক্ষতিকরণরণপ্রীণিতাম্ভোজনাভি-
র্নাভির্নাভিত্বমুর্ভ়্যাস্সুরপতিভ়িভভ়স্পর্শি সৌদর্শনী ভ়ঃ ॥ ৫১॥

শস্ত্রশ্যামে শতাঙ্গক্ষিতিভৃতি তরলৈরুত্তরঙ্গে তুরঙ্গৈ-
স্ত্বঙ্গন্মাতঙ্গনক্রে কুপিতভটমুখচ্ছাযমুগ্ধপ্রভ়ালে ।
অস্তোকং প্রস্নুভ়ানা প্রতিভটজলধৌ পাটভ়ং ভ়াডভ়স্য
শ্রেযো ভ়স্সংভ়িধত্তাং শ্রিতদুরিতহরা শ্রীধরাস্ত্রস্য নাভিঃ ॥ ৫২॥

জ্বালাচূডালকালানলচলনসমাডম্বরা সাম্পরাযং
যাসাভ়াসাদ্য মাদ্যৎসুরসুভটভুজাস্ফোটকোলাহলাঢ্যম্ ।
দৈত্যারণ্যং দহন্তী ভ়িরচযতি যশোভূতিশুভ্রাং ধরিত্রীং
সা ভ়শ্চক্রস্য নক্রস্যদমৃদিতগজত্রাযিণী নাভিরভ়্যাৎ ॥ ৫৩॥

ভ়িন্দন্তী সান্ধ্যমর্চির্ভ়িদলিতভ়পুষঃপ্রত্যনীকস্য রক্তৈঃ
স্ফাযন্নক্ষত্ররাশির্দিশি দিশি কণশঃ কীকসৈঃ কীর্যমাণৈঃ ।
নাকৌকঃপক্ষ্মলাক্ষীনভ়মদহসিতচ্ছাযযা চন্দ্রপাদান্
রাথাঙ্গী ভ়িস্তৃণানা রচযতু কুশলং পিণ্ডিকাযামিনী ভ়ঃ ॥ ৫৪॥

নিঃসীমং নিস্সৃতাযা ভুজধরণিধরাঘাটতঃকৈটভারে-
রাশাকূলঙ্কষর্দ্ধেরহিতবলমহাম্ভোধিমাসাদযন্ত্যাঃ ।
চক্রজ্বালাপগাযাশ্চলদরলহরীমালিকাদন্তুরাযাঃ
বিভ্রত্যাভ়র্তভাভ়ং ভ্রমযতু ভুভ়নে পিণ্ডিকা ভ়ঃ প্রশস্তিম্ ॥ ৫৫॥

পাণৌ কৃত্বাহভ়াগ্রে প্রতিভটভ়িজযোপার্জিতাং ভ়ীরলক্ষ্মী-
মানীতাযাস্ততোঽস্যাঃ স্বসভ়িধমসুরদ্বেষিণা পূরুষেণ ।
প্রাসাদং ভ়াসহেতোর্ভ়িরচিতমরুণৈ রশ্মিভিঃ সূচযন্তী
নাভির্ভ়ো নির্মিমীতাং রথচরণপতের্নিভ়ৃতিং নির্ভ়িঘাতাম্ ॥ ৫৬॥

ডিণ্ডীরাপাণ্ডুগণ্ডিররিযুভ়তিমুখৈঃ পিণ্ডিকা কৃষ্ণহেতে-
রুচ্চণ্ডাশ্রুপ্রভ়র্ষৈরুপরততিলকৈরুক্তশৌণ্ডীর্যচর্যা ।
দ্বিত্রগ্রামাধিপত্যদ্রুহিণমদমষীদূষিতাক্ষক্ষমাভৃৎ
সেভ়াহেভ়াকপাকং শমযতু ভভ়তাং কর্ম শর্মপ্রতীপম্ ॥ ৫৭॥

পর্যাপ্তামুন্নতিং যা প্রথযতি কমলং যা তিরোভাভ়্য ভাতি
স্রষ্টুস্সৃষ্টের্দভ়ীযঃ কুভ়লযমহিতং যা বিভর্তি স্বরূপম্ ।
ভূম্না স্বেনান্তরিক্ষং কবলযতি চ যা সা ভ়িচিত্রা ভ়িধত্তাং
দৈতেযারাতিনাভির্দ্রভ়িণপতিপদদ্রোহিণীং সম্পদং ভ়ঃ ॥ ৫৮॥

ভ়াণীভ়াঙ্গৈশ্চতুর্ভিঃ সদসি সুমনসাং দ্যোতমানস্বরূপা
বাহ্বন্তঃস্থা মুরারেরভিমতমখিলং শ্রীরিভ় স্পর্শযন্তী ।
দুর্গেভ়োগ্রাকৃতির্যা ত্রিভুভ়নজননস্থেমসংহারধুর্যা
মর্যাদালঙ্ঘনং ভ়ঃ ক্ষপযতু মহতী হেতিভ়র্যস্য নাভিঃ ॥ ৫৯॥

স্রগ্ভিঃ সন্তানজাভির্মধুরমধুরসস্যন্দসন্দোহিনীভিঃ
পাটীরৈঃ প্রৌঢচন্দ্রাতপচযসুষমালোপনৈর্লেপনৈশ্চ ।
ধূপৈঃ কালাগরূণামপি সুরসুদৃশো ভ়িস্রমর্চাসু যস্যাঃ
গন্ধং রুন্ধন্তি সা ভ়শ্চিরমসুরভিদো নাভিরভ়্যাদভভ়্যাৎ ॥ ৬০॥

অংহস্সংহৃত্য দগ্ধ্বা প্রীতিজনিজনিতং প্রৌঢসংসারভ়ন্যা
দূরাধ্বন্যানধন্যান্মহতি ভ়িনতিভির্ধামনি স্থাপযন্তী ।
ভ়িশ্রান্তিং শাশ্বতীং যা নযতি রমযতাং চক্ররাজস্য নাভিঃ
সংযন্মোমুহ্যমানত্রিদশরিপুদশাসাক্ষিণী সাঽক্ষিণী ভ়ঃ ॥ ৬১॥

অথাক্ষভ়র্ণনম্
শ্রুত্বা যন্নাম শব্দং শ্রুতিপথকটুকং দেভ়নক্রডনেষু
স্বর্ভ়ৈরিস্বৈরভ়ত্যো ভযভ়িভ়শধিযঃ কাতরন্যস্তশারাঃ ।
মন্দাক্ষং যান্ত্যমন্দং প্রতিযুভ়তিমুখৈর্দর্শিতোৎপ্রাসদর্পৈ-
রক্ষং সৌদর্শনং তৎক্ষপযতু ভভ়তামেধমানাং ধনাযাম্ ॥ ৬২॥

ভ়্যস্তস্কন্ধং ভ়িশীর্ণপ্রসভ়পরিকরং প্রত্তপত্রোপমর্দং
সংযদ্বর্ষাসু তর্ষাতুরখগপরিষৎপীতরক্তোদকাসু ।
অক্ষং রক্ষস্তরূণামশনিভ়দশনৈরাপতন্মূর্ধ্নি-মূর্ধ্নি
স্তাদস্ত্রাধীশিতুর্ভ়ঃ স্তবকিতযশসে দ্বেষিণাং প্লোষণায ॥ ৬৩॥

দীক্ষাং সঙ্গামসত্রে মহতি কৃতভ়তো দীপ্তিভিস্সংহতাভিঃ
জিহ্বালে সপ্তজিহ্বে দনুজকুলহভ়ির্জুহ্বতো নেমিজুহ্বা ।
ভ়ৈকুণ্ঠাস্ত্রস্য কুণ্ডং মহদিভ় ভ়িলসৎপিণ্ডিকাভ়েদিমধ্যে
দিশ্যাদ্দিভ়্যর্দ্ধিদেশ্যং পদমিহ ভভ়তামক্ষতোন্মেষমক্ষম্ ॥ ৬৪॥

তুঙ্গাদ্দোরদ্রিশৃঙ্গাদ্দনুজভ়িজযিনঃ স্পষ্টদানোদ্যমানাং
শত্রুস্তম্বেরমাণং শিরসি নিপততঃ স্রস্তমুক্তাস্থিপুঞ্জে ।
রক্তৈরভ্যক্তমূর্তের্ভ়িদলনগলিতৈর্ভ়্যক্তভ়ীরাযিতর্দ্ধে-
র্হর্যক্ষস্যারিভঙ্গং জনযতু জগতামীডিতং ক্রীডিতং ভ়ঃ ॥ ৬৫॥

উন্মীলৎপদ্মরাগং কটকমিভ় ধৃতং বাহুনা যন্মুরারে-
র্দীপ্তান্ রশ্মীন্দধানং নযনমিভ় যদুত্তারকং ভ়িষ্টপস্য ।
চক্রেশার্কস্য যদ্বাপরিধিরভিদধদ্দৈত্যহত্যামিভ় দ্রা-
গক্ষং পক্ষে পতিত্বা পরিঘটযতু ভ়স্তদ্দ্রঢিষ্ঠাং প্রতিষ্ঠাম্ ॥ ৬৬॥

ক্রীডৎপ্রাক্ক্রোডদংষ্ট্রাহতিদলিতহিরণ্যাক্ষভ়ক্ষঃকভ়াট-
প্রাদুর্ভূতপ্রভূতক্ষতজসমুদিতারুণ্যমুদ্রং সমুদ্রম্ ॥

উন্মীলৎকিংশুকাভৈরুপহসদমিতৈরংশুভিঃ সংশযঘ্নী-
মক্ষং চক্রস্য দত্তামঘশতশমনং দাশুষীং শেমুষীং ভ়ঃ ॥ ৬৭॥

পদ্মোল্লাসপ্রদং যজ্জনযতি জগতীমেধমানপ্রবোধাং
যস্যচ্ছাযাসমানা লসতি পরিসরে রোহিণী তারকাগ্র্যা ।
নানাহেত্যুন্নতত্ত্বং প্রকটযতি চ যৎপ্রাপ্তকৃষ্ণপ্রযাণং
ত্রেধা ভিন্নস্য ধাম্নস্সমুদয ইভ় তৎপাতু ভ়শ্চাক্রমক্ষম্ ॥ ৬৮॥

শোচির্ভিঃ পদ্মরাগদ্রভ়সমসুষমৈশ্শোভমানাভ়কাশং
প্রত্যগ্রাশোকরাগপ্রতিভটভ়পুষা ভূষিতং পূরুষেণ ।
অন্তঃ স্বচ্ছন্দমগ্নোত্থিতভৃগুতনযং ক্ষত্রিযাণাং ক্ষতানা-
মারব্ধং শোণিতৌঘৈস্সর ইভ় ভভ়তো দিভ়্যহেত্যক্ষমভ়্যাৎ ॥ ৬৯॥

মত্তানামিন্দ্রিযাণাং কৃতভ়িষযমহাকাননক্রীডনানাং
সৃষ্টং চক্রেশ্বরেণ গ্রহণধিষণযা ভ়ারিভ়দ্বারণানাম্ ।
গম্ভীরং যন্ত্রগর্তং কমপি কৃতধিযো মন্বতে যৎপ্রদেযা-
দস্থূলাং সংভ়িদং ভ়স্ত্রিজগদভিমতস্থূললক্ষং তদক্ষম্ ॥ ৭০॥

প্রণাদীন্সন্নিযম্য প্রণিহিতমনসাং যোগিনামন্তরঙ্গে
তুঙ্গং সঙ্কোচ্য রূপং ভ়িরচিতদহরাকাশকৃচ্ছ্রাসিকেন ।
প্রাপ্তং যৎপূরুষেণ স্বমহিমসদৃশং ধাম কামপ্রদং ভ়ো
ভূযাভূর্ভুভ়স্স্বস্ত্রযভ়রিভ়সিতং পুষ্করাক্ষাযুধাক্ষম্ ॥ ৭১॥

ভ়িদ্ধান্বীধ্রেণ ধাম্না চরণনখভুভ়া বদ্ধভ়াসস্য মধ্যে
চক্রাধ্যক্ষস্য বিভ্রৎপরিহসিতজপাপুষ্পকোশান্প্রকাশান্ ।
শুভ্রৈরভ্রৈরদভ্রৈশ্শরদি তত ইতো ভ়্যোম ভ়িভ্রাজমানং
প্রাতস্ত্যাদিত্যরোচিস্ততমিভ় ভভ়তঃ পাতু রাথাঙ্গমক্ষম্ ॥ ৭২॥

শ্রীভ়াণীভ়াঙ্মৃডান্যো ভ়িদধতি ভজনং শক্তযো যস্য দিক্ষু
প্রাহ ভ়্যূহং যদাদ্যং প্রথমমপি গুণং ভারতী পাঞ্চরাত্রী ।
ঘোরাং শান্তাং চ মূর্তিং প্রথযতি পুরুষঃ প্রাক্তনঃ প্রার্থনাভি-
র্ভক্তানাং যস্য মধ্যে দিশতু তদনঘামক্ষমধ্যক্ষতাং ভ়ঃ ॥ ৭৩॥

রক্ষঃপক্ষেণ রক্ষৎক্ষতমমরগণং লক্ষ্যভ়ৈলক্ষ্যমাজৌ
লক্ষ্মীমক্ষীযমাণাং বলমথনভুজে ভ়জ্রশিক্ষানপেক্ষে ।
নিক্ষিপ্য ক্ষিপ্রমধ্যক্ষযতি জগতি যদ্দক্ষতাং দিভ়্যহেতে-
রক্ষামামক্ষমাং তাং ক্ষপযতু ভভ়তামক্ষজিল্লক্ষ্যমক্ষম্ ॥ ৭৪॥

॥ ইত্যক্ষভ়র্ণনম্ ॥

অথসুদর্শনপুরুষভ়র্ণনম্
জ্যোতিশ্চূডালমৌলিস্ত্রিনযনভ়দনঃ ষোডশোত্তুঙ্গবাহুঃ
প্রত্যালীঢেন তিষ্ঠন্প্রণভ়শশধরাধারষট্কোণভ়র্তী ।
নিস্সীমেন স্বধাম্না নিখিলমপি জগৎক্ষেমভ়ন্নির্মিমাণো
ভূযাৎসৌদর্শনো ভ়ঃ প্রতিভটপরুষঃ পূরুষঃ পৌরুষায ॥ ৭৫॥

ভ়াণী পৌরাণিকী যং প্রথযতি মহিতং প্রেক্ষণং কৈটভারেঃ
শক্তির্যস্যেষুদংষ্ট্রানখপরশুমুখভ়্যাপিনী তদ্বিভূত্যাম্ ।
কর্তুং যত্তত্ত্ববোধো ন নিশিতমতিভির্নারদাদ্যৈশ্চ শক্যো
দৈভ়ীং ভ়ো মানুষীং চ ক্ষিপতু স ভ়িপদং দুস্রামস্ত্ররাজঃ ॥ ৭৬॥

রূঢস্তারালভ়ালে রুচিরদলচযঃ শ্যামলৈশ্শস্ত্রজালৈ-
র্জ্বালাভিস্সপ্রভ়ালঃ প্রকটিতকুসুমো বদ্ধসঙ্ঘৈঃ স্ফুলিঙ্গৈঃ ।
প্রাপ্তানাং পাদমূলং প্রকৃতিমধুরযা ছাযযা তাপহৃদ্বো
দত্তামুদ্দোঃপ্রকাণ্ডঃ ফলমভিলষিতং ভ়িষ্ণুসঙ্কল্পভ়ৃক্ষঃ ॥ ৭৭॥

ধাম্নামৈরম্মদানাং নিচযমিভ় চিরস্থাযিনাং দ্বাদশানাং
মার্তণ্ডানাং সমূঢং মহ ইভ় বহুলাং রত্নভাসামিভ়র্দ্ধিম্ ।
অর্চিস্সঙ্ঘাতমেকীকৃতমিভ় শিখিনাং ভ়াডভ়াগ্রেসরাণাং
শঙ্কন্তে যস্য রূপং স ভভ়তু ভভ়তাং তেজসে চক্ররাজঃ ॥ ৭৮॥

উগ্রং পশ্যাক্ষমুদ্যদ্ভ্রুকুটি সমুকুটং কুণ্ডলিস্পষ্টদংষ্ট্রং
চণ্ডাস্ত্রৈর্বাহুদণ্ডৈর্লসদনলসমক্ষৌমলক্ষ্যোরুকাণ্ডম্ ।
প্রত্যালীঢস্থপাদং প্রথযতু ভভ়তাং পালনভ়্যগ্রমগ্রে
চক্রেশোঽকালকালেরিতভটভ়িকটাটোপলোপায রূপম্ ॥ ৭৯॥

চক্রং কুন্তং কৃপাণং পরশুহুতভ়হাভ়ঙ্কুশং দণ্ডশক্তী
শঙ্খং কোদণ্ডপাশৌ হলমুসলগদাভ়জ্রশূলাংশ্চ হেতীন্ ।
দোর্ভিস্সভ়্যাপসভ়্যৈর্দধততুলবলস্তম্ভিতারাতিদর্পৈ-
র্ভ়্যূহস্তেজোভিমানী নরকভ়িজযিনো জৃম্ভতাং সম্পদে ভ়ঃ ॥ ৮০॥

পীতং কেশে রিপোরপ্যসৃজি রথপদে সংশ্রিতেঽপ্যুৎকটাক্ষং
চন্দ্রাধঃকারি যন্ত্রে ভ়পুষি চ দলনে মণ্ডলে চ স্বরাঙ্কম্ ।
হস্তে ভ়ক্ত্রে চ হেতিস্তবকিতমসমং লোচনে মোচনে চ
স্তাদস্তোকায ধাম্নে সুরভ়রপরিষৎসেভ়িতং দৈভ়তং ভ়ঃ ॥ ৮১॥

চিত্রাকারৈস্স্বচারৈর্মিতসকলজগজ্জাগরূকপ্রতাপো
মন্ত্রং তন্ত্রানুরূপং মনসি কলযতো মানযন্নাত্মগুহ্যান্ ।
পঞ্চাঙ্গস্ফূর্তিনির্ভ়র্তিতরিপুভ়িজযো ধাম ষণ্ণাং গুণানাং
লক্ষ্মীং রাজাসনস্থো ভ়িতরতু ভভ়তাং পূরুষশ্চক্রভ়র্তী ॥ ৮২॥

অক্ষাভ়ৃত্তাভ্রমালান্যরভ়িভ়রলুঠচ্চন্দ্রচণ্ডদ্যুতীনি
জ্বালাজালাভ়লীঢস্ফুটদুডুপটলীপাণ্ডুদিঙ্মণ্ডলানি ।
চক্রান্তাক্রান্তচক্রাচলচলিতমহীচক্রভ়ালার্তশেষা-
ণ্যস্ত্রগ্রামাগ্রিমস্য প্রদদতু ভভ়তাং প্রার্থিতং প্রস্থিতানি ॥ ৮৩॥

শূলং ত্যক্তাত্মশীলং সৃণিরণুকঘৃণিঃ পট্টসঃ স্পষ্টসাদঃ
শক্তিশ্শালীনশক্তিঃ কুলিশমকুশলং কুণ্ঠধারঃ কুঠারঃ ।
দণ্ডশ্চণ্ডত্বশূন্যো ভভ়তি তনুধনুর্যৎপুরস্তাৎস ভ়ঃ স্তাদ্
গ্রস্তাশেষাস্ত্রগর্ভ়ো রথচরণপতিঃ কর্মণে শার্মণায ॥ ৮৪॥

ক্ষুণ্ণাজানেযভ়ৃন্দং ক্ষুভিতরথগণং সন্নসান্নাহ্যযূথং
ক্ষ্বেলাসংরম্ভহেলাকলকলভ়িগলৎপূর্ভ়গীর্ভ়াণগর্ভ়ম্ ।
কুর্ভ়াণঃসাম্পরাযং রথচরণপতিঃ স্থেযসীং ভ়ঃপ্রশস্তিং
দুগ্ধাং দুগ্ধাব্ধিভাসং ভযভ়িভ়শশুনাসীরনাসীরভ়র্তী ॥ ৮৫॥

দ্রুহ্যদ্দোশ্শালিমালিপ্রহরণরভসোত্তানিতে ভ়ৈনতেযে
ভ়িদ্রাতি দ্রাক্প্রযুক্তঃ প্রধনভুভ়ি পরাভ়র্তমানেন ভর্ত্রা ।
নির্জিত্য প্রত্যনীকং নিরভ়ধিকচরদ্ধাস্তিকাশ্বীযরথ্যং
পথ্যং ভ়িশ্বস্য দাশ্বান্প্রথযতু ভভ়তো হেতিরিন্দ্রানুজস্য ॥ ৮৬॥

নন্দিন্যানন্দশূন্যে গলতি গণপতৌ ভ়্যাকুলে বাহুলেযে
চণ্ডে চাকিত্যকুণ্ঠে প্রমথপরিষদি প্রাপ্তভ়ত্যাং প্রমাথম্ ।
উচ্ছিদ্যাজৌ বলিষ্ঠং ভ়লিজভুজভ়নং যো দদাভ়াদিভিক্ষো-
র্ভিক্ষাং তৎপ্রাণরূপাং স ভভ়দকুশলং কৃষ্ণহেতিঃক্ষিণোতু ॥ ৮৭॥

রক্তৌঘাভ্যক্তমুক্তাফললুলিতললদ্বীচিভ়ৃদ্ধৌ মহাব্ধৌ
সন্ধ্যাসম্বদ্ধতারাজলধরশবলাকাশনীকাশকান্তৌ ।
গম্ভীরারম্ভমম্ভশ্চরমসুরকুলং ভ়েদভ়িঘ্নং ভ়িনিঘ্নন্
নিভ়িঘ্নং ভ়ঃ প্রসূতাং ভ়্যপগতভ়িপদং সম্পদং চক্ররাজঃ ॥ ৮৮॥

কাশীভ়িপ্লোষচৈদ্যক্ষপণধরণিজধ্বংসসূর্যাপিধান-
গ্রাহদ্বেধাত্বমালিত্রুটনমুখকথাভ়স্তুসৎকীর্তিগাথাঃ ।
গীযন্তে কিন্নরীভিঃ কনকগিরিগুহাগেহিনীভির্যদীযা
দেযাদ্দৈতেযভ়ৈরী স সকলভুভ়নশ্লাঘনীযাং শ্রিযং ভ়ঃ ॥ ৮৯॥

নানাভ়র্ণান্বিভ়ৃণ্বন্বিরচিতভুভ়নানুগ্রহান্ ভ়িগ্রহান্ যঃ
চক্রেষ্বষ্টাসু মৃষ্টাসুরভ়রতরুণীকণ্ঠকস্তূরিকেষু
। আতারাদর্ণমালাভ়ধিষু ভ়সতি যঃ পূরুষো ভ়স্স দেযাৎ
ভ়্যধ্বৈরুদ্ধূতসত্ত্বৈরুপহিতমবহির্ধ্বান্তমধ্বান্তভ়র্তী ॥ ৯০॥

দ্বাত্রিংশৎষোডশাষ্টপ্রভৃতিপৃথুভুজস্ফূর্তির্ভিমূর্তিভেদৈঃ
কালাদ্যে চক্রষট্কে প্রকটিতভ়িভভ়ঃপঞ্চকৃত্যানুরূপম্ ।
অর্থানামর্থিতানামহরহরখিলং নির্ভ়িলম্বৈর্ভ়িলম্বৈঃ
কুর্ভ়াণো ভক্তভ়র্গং কুশলিনমভ়তাদাযুধগ্রামণীর্ভ়ঃ ॥ ৯১॥

কোণৈরর্ণৈস্সরোজৈরপি কপিশগুণৈঃ ষড্ভিরুদ্ভিন্নশোভে
শ্রীভ়াণীপূর্ভ়িকাভির্দধতি ভ়িকসতশ্শক্তিভিঃ কেশভ়াদীন্ ।
তারান্তে ভূপুরাদৌ রথচরণগদাশার্ঙ্গখড্গাঙ্কিতাশে
যন্ত্রে তন্ত্রোদিতে ভ়ঃ স্ফুরতু কৃতপদং লক্ষ্ম লক্ষ্মীসখস্য ॥ ৯২॥

দংষ্ট্রাকান্ত্যা কডারে কপটকিটিতনোঃ কৈটভারেরধস্তা-
দূর্ধ্বং হাসেন ভ়িদ্ধে নরহরিভ়পুষো মণ্ডলে ভ়াসভ়ীযে ।
প্রাক্প্রত্যক্সান্ধ্যসান্দ্রচ্ছভ়িভরভরিতে ভ়্যোম্নি ভ়িদ্যোতমানো
দৈতেযোৎপাতশংসী রভ়িরিভ় রহযত্বস্ত্ররাজো রুজং ভ়ঃ ॥ ৯৩॥

কোণে ক্বাপি স্থিতোঽপি ত্রিভুভ়নভ়িততশ্চন্দ্রধামাপি রূক্ষো
রুক্মচ্ছাযোঽপি কৃষ্ণাকৃতিরনলমযোঽপ্যাশ্রিতত্রাণকারী ।
ধারাসারোঽপি দীপ্তো দিনকররুচিরোঽপ্যুল্লসত্তারকশ্রী-
শ্চক্রেশশ্চিত্রভূমা ভ়িতরতু ভ়িমতত্রাসনং শাসনং ভ়ঃ ॥ ৯৪॥

শুক্লশ্শক্র স্তভ়স্তে সহ দহন কলাং কাল তেঽযং ন কালঃ
কিং ভ়ো রক্ষাংসি রক্ষা তভ় ফলতু পতে যাদসাং পাদসেভ়া ।
ভ়াযো হৃদ্যোঽসি ভর্তুস্ত্যজ ধনদ মদং সেভ়্যতাং ত্রযম্বকেতি
প্রাহুর্যদ্যন্ত্রপালাস্স দনুজভ়িজযী হন্তু তন্দ্রালুতাং ভ়ঃ ॥ ৯৫॥

গাযত্র্যর্ণারচক্রে প্রথমমনুসখস্স্মেরপত্রারভ়িন্দে
বিম্বং ভ়হ্নেস্ত্রিকোণং ভ়হতি জযিজযাদ্যষ্টশক্তৌ নিষণ্ণা ।
শোকং ভ়োঽশোকমূলে পদসভ়িধলসদ্ভীমভীমাক্ষভীমা-
পুংসো দিভ়্যাস্ত্রধামা পুরুষহরিমযী মূর্তিরস্যত্বপূর্ভ়া ॥ ৯৬॥

পাশ্চাত্যাশোকপুষ্পপ্রকরনিপতিতৈঃ প্রাপ্তরাগং পরাগৈঃ
সন্ধ্যারোচিস্সগন্ধৈঃ স্বপদশশধরং প্রেক্ষ্য তারানুষক্তম্ ।
পদ্মানাবদ্ধকোশানিভ় সুরনিভ়হৈরঞ্জলীন্ কল্প্যমানাং-
শ্চক্রাধীশোঽভিনন্দন্প্রদিশতু সদৃশীমুত্তমশ্লোকতাং ভ়ঃ ॥ ৯৭॥

রক্তাশোকস্য ভ়েদস্য চ ভ়িহিতপদং প্রাপ্তশাখস্য মূলে
চক্রৈরস্ত্রৈস্তদাদ্যৈরপি মহিতচতুর্দ্বিশ্চতুর্ভ়াহুদণ্ডম্ ।
আসীনং ভাসমানং স্থিতমপি ভযতস্ত্রাযতাং তত্ত্বমেকং
পশ্চাৎপূর্ভ়ত্র ভাগে স্ফুটনরহরিতামানুষং জানুষাদ্বঃ ॥ ৯৮॥

প্রাণে দত্তপ্রযাণে মুষিতদিশি দৃশি ত্বক্তসারে শরীরে
মত্যাং ভ়্যামোহভ়ত্যাং সতমসি মনসি ভ়্যাহতে ভ়্যাহৃতে চ ।
চক্রান্তর্ভ়র্তি মৃত্যুপ্রতিভযমুভযাকারচিত্রং পভ়িত্রং
তেজস্তত্তিষ্ঠতাং ভ়স্ত্রিদশকুলধনং ত্রীক্ষণং তীক্ষ্ণদংষ্ট্রম্ ॥ ৯৯॥

যস্মিন্বিন্যস্য ভারং ভ়িজযিনি জগতাং জঙ্গমস্থাভ়রাণাং
লক্ষ্মীনারাযণাখ্যং মিথুনমনুভভ়ত্যত্যুদারান্বিহারান্ ।
আরোগ্যং ভূতিমাযুঃ কৃতমিহ বহুনা যদ্যদাস্থাপদং ভ়-
স্তত্তৎসদ্যঃ সমস্তং দিশতু স পুরুষো দিভ়্যহেত্যক্ষভ়র্তী ॥ ১০০॥

পদ্যানাং তত্ত্বভ়িদ্যাদ্যুমণিগিরিশভ়িধ্যঙ্গসঙ্খ্যাধরাণা-
মর্চিষ্বঙ্গেষু নেম্যাদিষু চ পরমতঃ পুংসি ষড্বিংশতেশ্চ ।
সঙ্ঘৈঃ সৌদর্শনং যঃ পঠতি কৃতমিদং কূরনারাযণেন -
স্তোত্রং নির্ভ়িষ্টভোগো ভজতি স পরমাং চক্রসাযুজ্যলক্ষ্মীম্ ॥ ১০১॥