అథ శ్రీసుదర్శనశతకమ్

శ్రీసుదర్శనాయ నమః
సౌదర్శన్యుజ్జిహానా దిశి విదిశి తిరస్కృత్య సావిత్రమర్చి-
ర్బాహ్యాబాహ్యాన్ధకారక్షతజగదగదఙ్కారభూమ్నా స్వధామ్నా .
దోఃఖర్జూదూరగర్జద్విబుధరిపువధూకణ్ఠవైకల్యకల్యా
జ్వాలా జాజ్వల్యమానా వితరతు భవతాం వీప్సయాఽభీప్సితాని .. 1..

ప్రత్యుద్యాతం మయూఖైర్నభసి దినకృతః ప్రాప్తసేవం ప్రభాభి-
ర్భూమౌ సౌమేరవీభిర్దివి వరివసితం దీప్తిభిర్దేవధామ్నామ్ .
భుయస్యై భూతయే వః స్ఫురతు సకలదిగ్భ్రాన్తసాన్ద్రస్ఫులిఙ్గం
చాక్రం జాగ్రత్ప్రతాపం త్రిభువనవిజయవ్యగ్రముగ్రం మహస్తత్ .. 2..

పూర్ణే పూరైః సుధానాం సుమహతి లసతస్సోమబిమ్బాలవాలే-
బాహాశాఖావరుద్ధక్షితిగగనదివశ్చక్రరాజద్రుమస్య .
జ్యోతిశ్ఛద్మా ప్రవాలః ప్రకటితసుమనస్సమ్పదుత్తంసలక్ష్మీం
పుష్ణన్నాశాముఖేషు ప్రదిశతు భవతాం సప్రకర్షం ప్రహర్షమ్ .. 3..

ఆరాదారాత్సహస్రాద్విసరతి విమతక్షేపదక్షాద్యదక్షా-
న్నాభేర్భాస్వత్సనాభేర్నిజవిభవపరిచ్ఛిన్నభూమేశ్చ నేమేః .
ఆమ్నాయైరేకకణ్ఠైః స్తుతమహిమ మహో మాధవీయస్య హేతే-
స్తద్వో దిక్ష్వేధమానం చతసృషు చతురః పుష్యతాత్పూరుషార్థాన్ .. 4..

శ్యామం ధామప్రసృత్యా క్వచన భగవతః క్వాపి బభ్రు ప్రకృత్యా
శుభ్రం శేషస్య భాషా క్వచన మణిరుచా క్వాపి తస్యైవ రక్తమ్ .
నీలం శ్రీనేత్రకాన్త్యా క్వచిదపి మిథునస్యాదిమస్యేవ చిత్రం
వ్యాప్తన్వానం వితానశ్రియముపచినుతాచ్ఛర్మ వశ్చక్రభానమ్ .. 5..

శంసన్త్యున్మేషముచ్ఛోషితపరమహసో భాస్వతః కైటభారే-
రిన్ధే సన్ధ్యేవ నక్తఞ్చరవిలయకరీ యా జగద్వన్దనీయా .
బన్ధూకచ్ఛాయబన్ధుచ్ఛవిఘటితఘనచ్ఛేదమేదస్వినీ సా
రాథాఙ్గీ రశ్మిభఙ్గీ ప్రణుదతు భవతాం ప్రత్యహోత్థానమేనః .. 6..

సామ్యం ధూమ్యాప్రవృద్ధ్యా ప్రకటయతి నభస్తారకాజాలకాని
స్ఫౌలిఙ్గీం యాన్తి కాన్తిం దిశతి యదుదయే మేరురఙ్గారశఙ్కామ్ .
అగ్నిర్మగ్నార్చిరైక్యం భజతి దిననిశావల్లభౌ దుర్లభాభౌ
జ్వాలావర్తావివ స్తః ప్రహరణపతిజం ధామ వస్తద్ధినోతు .. 7..

దృష్టేఽధివ్యోమచక్రే వికచనవజపాసన్నికాశే సకాశం
స్వర్భానుర్భానురేష స్ఫుటమితి కలయన్నాగతో వేగతోఽస్య .
నిష్టప్తో యైర్నివృత్తో విధుమివ సహసా స్ప్రష్టుమద్యాపి నేష్టే
ఘర్మాంశుం తే ఘటన్తామహితవిహతయే భానవో భాస్వరా వః .. 8..

దేవం హేమాద్రితుఙ్గం పృథుభుజశిఖరం బిభ్రతీం మధ్యదేశే
నాభిద్వీపాభిరామామరవిపినవతీం శేషశీర్షాసనస్థామ్ .
నేమిం పర్యాయభూమిం దినకరకిరణాదృష్టసీమఃపరీత్య
ప్రీత్యై వశ్చక్రవాలాచల ఇవ విలసన్నస్తు దివ్యాస్త్రరశ్మిః .. 9..

ఏకం లోకస్య చక్షుర్ద్వివిధమపనుదత్కర్మ నమ్రత్రినేత్రం
దాత్రర్థానాం చతుర్ణాం గమయదరిగణం పఞ్చతాం షడ్గుణాఢ్యమ్ .
సప్తార్చిఃశోషితాష్టాపదనవకిరణశ్రేణిరజ్యద్దశాంశం
పర్యస్యాద్వః శతాఙ్గావయవపరివృఢజ్యోతిరీతీః సహస్రమ్ .. 10..

ఉచ్చణ్డే యచ్ఛిఖణ్డే నిబిడయతి నభః క్రోడమర్కోఽటతి ద్యా-
మభ్యస్య ప్రౌఢతాపగ్లపితవపురపో బిభ్రతీరభ్రపఙ్క్తీః .
ధత్తే శుష్యత్సుధోత్సో విధురపమధునః క్షౌద్రకోశస్య సామ్యం
రక్షన్త్వస్త్రప్రభోస్తే రచితసుచరితవ్యుష్టయో ఘుష్టయోః వః .. 11..

పద్మౌఘో దీర్ఘికామ్భస్యవనిధరతటే గైరికామ్బుప్రపాతః
సిన్దూరం కుఞ్జరాణాం దిశి దిశి గగనే సాన్ధ్యమేఘప్రబన్ధః .
పారావారే ప్రవాలో వనభువి చ తథా ప్రేక్ష్యమాణః ప్రముగ్ధైః
సాధిష్ఠం వః ప్రమోదం జనయతు దనుజద్వేషిణస్త్వైషరాశిః .. 12..

భానో భా నో త్వదీయా స్ఫురతి కుముదినీమిత్ర తే కుత్ర తేజ-
స్తారాస్తారాదధీరోఽస్యనల న భవతః స్వైరమైరమ్మదార్చిః .
శంసన్తీత్థం నభఃస్థా యదుదయసమయే చక్రరాజాంశవస్తే
యుష్మాకం ప్రౌఢతాపప్రభవగదాపక్రమాయ క్రమన్తామ్ .. 13..

జగ్ధ్వా కర్ణేషు దూర్వాఙ్కురమరిసుదృశామక్షిషు స్వర్వధూనాం
పీత్వా చామ్భశ్చరన్త్యః సవృషమనుగతా వల్లవేనాదిమేన .
గావో వశ్చక్రభర్తుః పరమమృతరసం ప్రశ్రితానాం దుహానాః
ఋద్ధిం స్వాలోకలుప్తత్రిభునతమసః సానుబన్ధాం దదన్తామ్ .. 14..

సేనాం సేనాం మఘోనో మహతి రణముఖేఽలం భయం లమ్భయన్తీ-
రుత్సేకోష్ణాలుదోష్ణాం ప్రథమదివిషదామావలీర్యావలీఢే .
విశ్వం విశ్వమ్భరాద్యం రథపదధిపతేర్లీలయా పాలయన్తీ
ఋద్ధిః సా దీధితీనాం వృజినమనుజనుర్మార్జయత్వార్జితం వః .. 15..

తప్తా స్వేనోష్మణేవ ప్రతిభటవపుషామస్రధారాం ధయన్తీ
ప్రాప్తేవ క్షీబభావం ప్రతిదిశమసకృత్తన్వతీ ఘూర్ణితాని .
వంశాస్థిస్ఫోటశబ్దం ప్రకటయతి పటూన్యాఽఽవహన్త్యట్టహాసాన్
భా సా వః స్యన్దనాఙ్గప్రభుసముదయినీ స్పన్దతాం చిన్తితాయ .. 16..

దేవైరాసేవ్యమానో దనుజభటభుజాదణ్డదర్పోష్ణతప్తై-
రాశారోధోఽతిలఙ్ఘీ లుఠదుడుపటలీలక్ష్యడిణ్డీరపిణ్డః .
రిఙ్గజ్జ్వాలాతరఙ్గత్రుటితరిపుతరువ్రాతపాతోగ్రమార్గ-
శ్చాక్రో వః శోచిరోధః శమయతు దురితాపహ్నవం దావవహ్నిమ్ .. 17..

భ్రామ్యతీ సంశ్రితానాం భ్రమశమనకరీ చ్ఛన్న సూర్యప్రకాశా
సూర్యాలోకానురూపా రిపుహృదయతమస్కారిణీ నిస్తమస్కా .
ధారాసమ్పాతినీ చ ప్రకటితదహనా దీప్తిరస్త్రేశితుర్వ-
శ్చిత్రా భద్రాయ విద్రావితవిమతజనా జాయతామాయతాయ .. 18..

నిన్యే వన్యేవ కాశీదవశిఖిజటిలజ్యోతిషా యేన దాహం
కృత్యా వృత్త్యా విలిల్యే శలభసులభయా యత్ర చిత్రప్రభావే .
రుద్రోఽప్యద్రేర్దుహిత్రా సహ గహనగుహాం యద్భయాదభ్యయాసీత్
దిశ్యాద్విశ్వార్చితో వః స శుభమనిభృతం శౌరిహేతిప్రతాపః .. 19..

ఉద్యన్బిమ్బాదుదారాన్నయనజలహిమం మార్జయన్నిర్జరీణా-
మజ్ఞానధ్వాన్తమూర్చ్ఛాకరజనిరజనీభఞ్జనవ్యఞ్జితాధ్వా .
న్యక్కుర్వాణో గ్రహాణాం స్ఫురణమపహరన్నర్చిషః పావకీయా-
శ్చక్రేశార్కప్రకాశో దిశతు దశ దిశో వ్యశ్నువానం యశో వః .. 20..

వర్గస్య స్వర్గధామ్నామపి దనుజనుషాం విగ్రహం నిగ్రహీతుం
దాతుం సద్యోఽబలానాం శ్రియమతిశయినీం పత్రభఙ్గానువృత్యా .
యోక్తుం దేదీప్యతే యా యుగపదపి పురో భూతిమయ్యా ప్రకృత్యా
సా వో నుద్యాదవిద్యాం ద్యుతిరమృతరసస్యన్దినీ స్యాన్దనాఙ్గీ .. 21..

దాహం దాహం సపత్నాన్సమరభువి లసద్భస్మనా వర్త్మనా యాన్
క్రవ్యాదప్రేతభూతాద్యభిలషితపుషా ప్రీతకాపాలికేన .
కఙ్కాలైః కాలధౌతం గిరిమివ కురుతే యః స్వకీర్తేర్విహర్తుం
ఘృష్టిః సాన్దృష్టికం వః సకలముపనయత్వాయుధాగ్రేసరస్య .. 22..

దగ్ధానాం దానవానాం సభసితనిచయైరస్థిభిః సర్వశుభ్రాం
పృథ్వీం కృత్వాపి భూయో నవరుధిరఝరీకౌతుకం కౌణపేభ్యః .
కుర్వాణం వాష్పపూరైః కుచతటఘుసృణక్షాలనైస్తద్వధూనాం
పాపం పాపచ్యమానం శమయతు భవతాం శస్త్రరాజస్య తేజః .. 23..

మాగాన్మోషం లలాటానల ఇతి మదనద్వేషిణా ధ్యాయతేవ
స్రష్ట్రా ప్రోన్నిద్రవాసామ్బుజదలపటలప్లోషముత్పశ్యతేవ .
వజ్రాగ్నిర్మా స్మ నాశం వ్రజదితి చకితేనేవ శక్రేణ బద్ధైః
స్తోత్రైరస్త్రేశ్వరస్య ద్యతు దురితశతం ద్యోతమానా ద్యుతిర్వః .. 24..

శస్త్రాస్త్రం శాత్రవాణాం శలభకులమివ జ్వాలయా లేలిహానా
ఘౌషైః స్వైః క్షోభయన్తీ విఘటితభగవద్యోగనిద్రాన్సముద్రాన్ .
వ్యూఢోరఃప్రౌఢచారత్రుటితపటురటత్కీకసక్షుణ్ణదైత్యా
నేమిః సౌదర్శనీ వః శ్రియమతిశయినీం దాశతాశతాబ్దమ్ .. 25..

ధారా చక్రస్య తారాగణకపిశఘృణిద్యోతితద్యుప్రచారా
పారావారామ్బుపూరక్వథనపిశునితోత్తాలపాతాలయాత్రా .
గోత్రాద్రిస్ఫోటశబ్దప్రకటితవసుధామణ్డలీచణ్డయానా
పన్థానం వః ప్రదిశ్యాత్ప్రశమనకుశలా పాప్మనామాత్మనీనమ్ .. 26..

యాత్రా యా త్రాతలోకా ప్రకటితవరుణత్రాసముద్రే సముద్రే
సత్త్వాసత్త్వాసహోష్ణాకృతసగరుదగస్పన్దదానా దదానా .
హానిం హా నిన్దితానాం జగతి పరిషదాం దానవీనాం నవీనాం
చక్రే చక్రేశనేమిః శమముపహరతు సప్రభావప్రభా వః .. 27..

యత్రామిత్రాన్దిధక్షౌ ప్రవిశతి బలినో ధామ నిఃసీమధామ్ని
గ్రస్తాపస్తాపశీర్ణైః ప్రగుణితసికతో మౌక్తికైఃశౌక్తికేయైః .
రాశిర్వారామపారాం ప్రకటయతి పునర్వైరిదారాశ్రుపూరైః
వృద్ధిం నిర్యాతి నిర్యాపయతు స దురితాన్యస్త్రరాజప్రధిర్వః .. 28..

కక్ష్యాతౌల్యేన కద్రూతనయఫణమణీన్కల్యదీపస్య యుఞ్జన్
పాతాలాన్తః ప్రతాపీ నిఖిలమపి తమః స్వేన ధామ్నా నిగీర్య .
దైతేయప్రేయసీనాం వమతి హృది హతప్రేయసాం భూయసాం య-
శ్చక్రాగ్రీయాగ్రదేశో దహతు విలసితం భూయసామంహసాం వః .. 29..

కృష్ణామ్భోదస్య భూషా కృతనయననయవ్యాహతిర్భార్గవస్య
ప్రాప్తామావేదయన్తీ ప్రతిభటసుదృశాముద్భటాం వాష్పవృష్టిమ్ .
నిష్టప్తాష్టాపదశ్రీః సమమమరచమూగర్జితైరుజ్జిహానా
కీర్తి వః కేతకీభిః ప్రథయతు సదృశీం చఞ్చలా చక్రధారా .. 30..

వప్రాణాం భేదినీం యః పరిణతిమఖిలశ్లాఘనీయాం దధానః
క్షుణ్ణాం నక్షత్రమాలాం దిశి దిశి వికిరన్విద్యుతా తుల్యకక్ష్యః .
నిర్యాణేనోత్కటేన ప్రకటయతి నవం దానవారిప్రకర్షం
చక్రాధీశస్య భద్రో వశయతు భవతాం స ప్రధిశ్చిత్తవృత్తిమ్ .. 31..

నాకౌకః శత్రుజత్రుత్రుటనవిఘటితస్కన్ధనీరన్ధ్రనిర్యన్
నవ్యక్రవ్యాస్రహవ్యగ్రసనరసలసజ్జ్వాలజిహ్వాలవహ్నిమ్ .
యం దృష్ట్వా సాంయుగీనం పునరపి విదధత్యాశిషో వీర్యవృద్ధ్యై
గీర్వాణా నిర్వృణానా వితరతు స జయం విష్ణుహేతిప్రధిర్వః .. 32..

ధన్వాధ్వన్యస్య ధారాసలిలమివ ధనం దుర్గతస్యేవ దృష్టి-
ర్జాత్యన్ధస్యేవ పఙ్గోః పదవిహృతిరివ ప్రీణనీ ప్రేమభాజామ్ .
పత్యుర్మాయాక్రియాయాం ప్రకటపరిణతిర్విశ్వరక్షాక్షమాయాం
మాయామాయామినీం వస్త్రుటయతు మహతీ నేమిరస్త్రేశ్వరస్య .. 33..

త్రాణం యా విష్టపానాం వితరతి చ యయా కల్ప్యతే కామపూర్తి-
ర్న స్థాతుం యత్పురస్తాత్ప్రభవతి కలయాప్యోషధీనామధీశః .
ఉన్మేషో యాతి యస్యా న సమయనియతిం సా శ్రియం వః ప్రదేయా-
న్న్యక్కృత్య ద్యోతమానా త్రిపురహరదృశం నేమిరస్త్రేశ్వరస్య .. 34..

నక్షత్రక్షోదభూతిప్రకరవికిరణశ్వేతితాశావకాశా
జీర్ణైః పర్ణైరివ ద్యాం జలధరపటలైశ్చూర్ణితైరూర్ణువానా .
ఆజావాజానవాజానతరిపుజనతారణ్యమావర్తమానా
నేమిర్వాత్యేవ చాక్రీ ప్రణుదతు భవతాం సంహతం పాపతూలమ్ .. 35..

క్షిప్త్వా నేపథ్యశాటీమివ జలదఘటాం జిష్ణుకోదణ్డచిత్రాం
తారాపుఞ్జం ప్రసూనాఞ్జలిమివ విపులే వ్యోమరఙ్గే వికీర్య .
నిర్వేదగ్లానిచిన్తాప్రభృతిపరవశానన్తరా దానవేన్ద్రాన్
నృత్యన్నానాలయాఢ్యం నట ఇవ తనుతాం శర్మ చక్రప్రధిర్వః .. 36..

దౌర్గత్యప్రౌఢతాపప్రతిభటవిభవా విత్తధారాఃసృజన్తీ
గర్జన్తీ చీత్క్రియాభిర్జ్వలదనలశిఖోద్దామసౌదామనీకా .
అవ్యాత్క్రవ్యాద్వధూటీనయనజలభరైర్దిక్షు నవ్యాననావ్యాన్
పుష్యన్తీ సిన్ధుపూరాన్ రథచరణపతేర్నేమికాదమ్బినీ వః .. 37..

సన్దోహం దానవానామజసమజమివాలభ్య జాజ్వల్యమానే
వహ్నావహ్నాయ జుహ్వత్త్రిదశపరిషదే స్వస్వభాగప్రదాయీ .
స్తోత్రైర్బహ్మాదిగీతైర్ముఖరపరిసరం శ్లాఘ్యశస్త్రప్రయోగం
ప్రాప్తః సఙ్గ్రామసత్రం ప్రధిరసురరిపోః ప్రార్థితం ప్రస్నుతాం వః .. 38..

ఉత్పాతాలాతకల్పాన్యసురపరిషదామాహవప్రార్థినీనా-
మధ్వానధ్వావవోధక్షపణచణతమః క్షేపదీపోపమాని .
త్రైలోక్యాగారభారోద్వహనసహమణిస్తమ్భసమ్పత్సఖాని
త్రాయన్తామన్తిమాయాం విపది సపది వోఽరాణి సౌదర్శనాని .. 39..

జ్వాలాజాలప్రవాలస్తబకితశిరసో నాభిమావాలయన్త్యః
సిక్తా రక్తామ్బుపూరైః శకలితవపుషాం శాత్రవానీకినీనామ్ .
చక్రాక్రీడప్రరూఢాభుజగశయభుజోపఘ్ననిఘ్నప్రచారాః
పుష్ప్యన్త్యఃకీర్తిపుష్పాణ్యరకనకలతాః ప్రీతయే వః ప్రథన్తామ్ .. 40..

జ్వాలాజాలాబ్ధిముద్రం క్ష్తీవలయమివాబిభ్రతీ నేమిచక్రం
నాగేన్ద్రస్యేవ నాభేః ఫణపరిషదివ ప్రౌఢరత్నప్రకాశా .
దత్తాం వో దివ్యహేతేర్మతిమరవితతిః ఖ్యాతసాహస్రసఙ్ఖ్యా
సఙ్ఖ్యావత్సఙ్ఘచిత్తశ్రవణహరగుణస్యన్దిసన్దర్భగర్భామ్ .. 41..

బ్రహ్మేశోపక్రమాణాం బహువిధవిమతక్షోదసమ్మోదితానాం
సేవాయై దేవతానాం దనుజకులరిపోః పిణ్డికాద్యఙ్గభాజామ్ .
తత్తద్ధామాన్తసీమావిభజనవిధయే మానదణ్డాయమానా
భూమానం భూయసా వో దిశతు దశశతీ భాస్వరాణామరాణామ్ .. 42..

జ్వాలాకల్లోలమాలానిబిడపరిసరాం నేమివేలాం దధానే
పూర్వేణాక్రాన్తమధ్యే భువనమయహవిర్భోజినా పూరుషేణ .
ప్రస్ఫూర్జత్ప్రాజ్యరత్నే రథపదజలధావేధమానైః స్ఫులిఙ్గైః
భద్రం వో విద్రుమాణాం శ్రియమరవితతిర్విస్తృణానా విధత్తామ్ .. 43..

నాసీరస్వైరభగ్నప్రతిభటరుధిరాసారధారావసేకా-
నేకాన్తస్మేరపద్మప్రకరసహచరచ్ఛాయయా ప్రాప్య నాభ్యా .
ముక్తానీవాఙ్కురాణి స్ఫురదనలశిఖాదర్శితప్రాక్ప్రవాలా-
న్యవ్యాఘాతేన భవ్యం ప్రదదతు భవతాం దివ్యహేతేరరాణి .. 44..

దావోల్కామణ్డలీవ ద్రుమగణగహనే బాడవస్యేవ వహ్నే-
ర్జ్వాలావృద్ధిర్మహాబ్ధౌ ప్రవయసి తమసి ప్రాతరర్కప్రభేవ .
చక్రే యా దానవానాం హయకరటిఘటాసఙ్కటే జాఘటీతి
ప్రాజ్యం సా వః ప్రేదేయాత్పదమరపరిషత్పద్మనాభాయుధస్య .. 45..

తాపాద్దైత్యప్రతాపాతపసముచితాత్త్రాయమాణం త్రిలోకీం
లోలైర్జ్వాలాకలాపైః ప్రకటయదభితశ్చీనపట్టాఞ్చలాని .
ఛత్రాకారం శలాకా ఇవ కనకకృతాః శౌరిదోర్దణ్డలగ్నం
భూయాసుర్భూషయన్త్యో రథచరణమరస్ఫూర్తయఃకీర్తయే వః .. 46..

నాభీశాలానిఖాతాం నహనసముచితాం వైరిలక్ష్మీవశానాం
సంయద్వారీహృతానాం సమనువిదధతీ కాఞ్చనాలానపఙ్క్తిమ్ .
రాజ్యా చ ప్రాజ్యదైత్యవ్రజవిజయమహోత్తమ్భితానాం భుజానాం
తుల్యా చక్రారమాలా తులయతు భవతాం తూలవచ్ఛత్రులోకమ్ .. 47..

ఆనేమేశ్చక్రవాలాత్త్విష ఇవ వితతాఃపిణ్డికాచణ్డదీప్తే-
ర్దీప్తా దీపా ఇవారాద్గహనరణతమీగాహినః పూరుషస్య .
శాణే రేఖాయితానాం రథచరణమయే శత్రుశౌణ్డీర్యహేమ్నాం
రేఖాః ప్రత్యగ్రలగ్నా ఇవ భువనమరశ్రేయణః ప్రీణయన్తు .. 48..

దీప్తైరర్చిఃప్రరోహైర్దలవతి విధృతే బాహునాలేనవిష్ణో-
రుద్యత్ప్రద్యోతనాభమ్ప్రథయతి పురుషం కర్ణికావర్ణికాయామ్ .
చూడాలం వేదమౌలిం కలయతి కమలే చక్రనామ్నోపలక్ష్యే
లక్ష్మీం స్ఫారామరాణి ప్రతివిదధతు వః కేసరశ్రీకరాణి .. 49..

ధాతుస్యన్దైరమన్దైః కలుషితవపుషో నిర్ఝరామ్భఃప్రపాతా-
నర్చిష్మత్యా స్వమూర్త్యా రథచరణగిరేర్నేమినాభీతటస్య .
వ్యాకుర్వాణారపఙ్క్తిర్వితరతు విభుతావిస్తృతిం విత్తకోటీ-
కోటీరచ్ఛత్రపీఠీకటకకరిఘటాచామరస్రగ్విణీం వః .. 50..

ఐక్యేన ద్వాదశానామశిశిరమహసాం దర్శయన్తీ ప్రవృత్తిం
దత్తః స్వర్లోకలక్ష్మ్యాస్తిలక ఇవ ముఖే పద్మరాగద్రవేణ .
దేయాద్దైతేయదర్పక్షతికరణరణప్రీణితామ్భోజనాభి-
ర్నాభిర్నాభిత్వముర్వ్యాస్సురపతివిభవస్పర్శి సౌదర్శనీ వః .. 51..

శస్త్రశ్యామే శతాఙ్గక్షితిభృతి తరలైరుత్తరఙ్గే తురఙ్గై-
స్త్వఙ్గన్మాతఙ్గనక్రే కుపితభటముఖచ్ఛాయముగ్ధప్రవాలే .
అస్తోకం ప్రస్నువానా ప్రతిభటజలధౌ పాటవం వాడవస్య
శ్రేయో వస్సంవిధత్తాం శ్రితదురితహరా శ్రీధరాస్త్రస్య నాభిః .. 52..

జ్వాలాచూడాలకాలానలచలనసమాడమ్బరా సామ్పరాయం
యాసావాసాద్య మాద్యత్సురసుభటభుజాస్ఫోటకోలాహలాఢ్యమ్ .
దైత్యారణ్యం దహన్తీ విరచయతి యశోభూతిశుభ్రాం ధరిత్రీం
సా వశ్చక్రస్య నక్రస్యదమృదితగజత్రాయిణీ నాభిరవ్యాత్ .. 53..

విన్దన్తీ సాన్ధ్యమర్చిర్విదలితవపుషఃప్రత్యనీకస్య రక్తైః
స్ఫాయన్నక్షత్రరాశిర్దిశి దిశి కణశః కీకసైః కీర్యమాణైః .
నాకౌకఃపక్ష్మలాక్షీనవమదహసితచ్ఛాయయా చన్ద్రపాదాన్
రాథాఙ్గీ విస్తృణానా రచయతు కుశలం పిణ్డికాయామినీ వః .. 54..

నిఃసీమం నిస్సృతాయా భుజధరణిధరాఘాటతఃకైటభారే-
రాశాకూలఙ్కషర్ద్ధేరహితబలమహామ్భోధిమాసాదయన్త్యాః .
చక్రజ్వాలాపగాయాశ్చలదరలహరీమాలికాదన్తురాయాః
బిభ్రత్యావర్తభావం భ్రమయతు భువనే పిణ్డికా వః ప్రశస్తిమ్ .. 55..

పాణౌ కృత్వాహవాగ్రే ప్రతిభటవిజయోపార్జితాం వీరలక్ష్మీ-
మానీతాయాస్తతోఽస్యాః స్వసవిధమసురద్వేషిణా పూరుషేణ .
ప్రాసాదం వాసహేతోర్విరచితమరుణై రశ్మిభిః సూచయన్తీ
నాభిర్వో నిర్మిమీతాం రథచరణపతేర్నివృతిం నిర్విఘాతామ్ .. 56..

డిణ్డీరాపాణ్డుగణ్డిరరియువతిముఖైః పిణ్డికా కృష్ణహేతే-
రుచ్చణ్డాశ్రుప్రవర్షైరుపరతతిలకైరుక్తశౌణ్డీర్యచర్యా .
ద్విత్రగ్రామాధిపత్యద్రుహిణమదమషీదూషితాక్షక్షమాభృత్
సేవాహేవాకపాకం శమయతు భవతాం కర్మ శర్మప్రతీపమ్ .. 57..

పర్యాప్తామున్నతిం యా ప్రథయతి కమలం యా తిరోభావ్య భాతి
స్రష్టుస్సృష్టేర్దవీయః కువలయమహితం యా బిభర్తి స్వరూపమ్ .
భూమ్నా స్వేనాన్తరిక్షం కబలయతి చ యా సా విచిత్రా విధత్తాం
దైతేయారాతినాభిర్ద్రవిణపతిపదద్రోహిణీం సమ్పదం వః .. 58..

వాణీవాఙ్గైశ్చతుర్భిః సదసి సుమనసాం ద్యోతమానస్వరూపా
బాహ్వన్తఃస్థా మురారేరభిమతమఖిలం శ్రీరివ స్పర్శయన్తీ .
దుర్గేవోగ్రాకృతిర్యా త్రిభువనజననస్థేమసంహారధుర్యా
మర్యాదాలఙ్ఘనం వః క్షపయతు మహతీ హేతివర్యస్య నాభిః .. 59..

స్రగ్భిః సన్తానజాభిర్మధురమధురసస్యన్దసన్దోహినీభిః
పాటీరైః ప్రౌఢచన్ద్రాతపచయసుషమాలోపనైర్లేపనైశ్చ .
ధూపైః కాలాగరూణామపి సురసుదృశో విస్రమర్చాసు యస్యాః
గన్ధం రున్ధన్తి సా వశ్చిరమసురభిదో నాభిరవ్యాదభవ్యాత్ .. 60..

అంహస్సంహృత్య దగ్ధ్వా ప్రీతిజనిజనితం ప్రౌఢసంసారవన్యా
దూరాధ్వన్యానధన్యాన్మహతి వినతిభిర్ధామని స్థాపయన్తీ .
విశ్రాన్తిం శాశ్వతీం యా నయతి రమయతాం చక్రరాజస్య నాభిః
సంయన్మోముహ్యమానత్రిదశరిపుదశాసాక్షిణీ సాఽక్షిణీ వః .. 61..

అథాక్షవర్ణనమ్
శ్రుత్వా యన్నామ శబ్దం శ్రుతిపథకటుకం దేవనక్రడనేషు
స్వర్వైరిస్వైరవత్యో భయవివశధియః కాతరన్యస్తశారాః .
మన్దాక్షం యాన్త్యమన్దం ప్రతియువతిముఖైర్దర్శితోత్ప్రాసదర్పై-
రక్షం సౌదర్శనం తత్క్షపయతు భవతామేధమానాం ధనాయామ్ .. 62..

వ్యస్తస్కన్ధం విశీర్ణప్రసవపరికరం ప్రత్తపత్రోపమర్దం
సంయద్వర్షాసు తర్షాతురఖగపరిషత్పీతరక్తోదకాసు .
అక్షం రక్షస్తరూణామశనివదశనైరాపతన్మూర్ధ్ని-మూర్ధ్ని
స్తాదస్త్రాధీశితుర్వః స్తబకితయశసే ద్వేషిణాం ప్లోషణాయ .. 63..

దీక్షాం సఙ్గామసత్రే మహతి కృతవతో దీప్తిభిస్సంహతాభిః
జిహ్వాలే సప్తజిహ్వే దనుజకులహవిర్జుహ్వతో నేమిజుహ్వా .
వైకుణ్ఠాస్త్రస్య కుణ్డం మహదివ విలసత్పిణ్డికావేదిమధ్యే
దిశ్యాద్దివ్యర్ద్ధిదేశ్యం పదమిహ భవతామక్షతోన్మేషమక్షమ్ .. 64..

తుఙ్గాద్దోరద్రిశృఙ్గాద్దనుజవిజయినః స్పష్టదానోద్యమానాం
శత్రుస్తమ్బేరమాణం శిరసి నిపతతః స్రస్తముక్తాస్థిపుఞ్జే .
రక్తైరభ్యక్తమూర్తేర్విదలనగలితైర్వ్యక్తవీరాయితర్ద్ధే-
ర్హర్యక్షస్యారిభఙ్గం జనయతు జగతామీడితం క్రీడితం వః .. 65..

ఉన్మీలత్పద్మరాగం కటకమివ ధృతం బాహునా యన్మురారే-
ర్దీప్తాన్ రశ్మీన్దధానం నయనమివ యదుత్తారకం విష్టపస్య .
చక్రేశార్కస్య యద్వాపరిధిరభిదధద్దైత్యహత్యామివ ద్రా-
గక్షం పక్షే పతిత్వా పరిఘటయతు వస్తద్ద్రఢిష్ఠాం ప్రతిష్ఠామ్ .. 66..

క్రీడత్ప్రాక్క్రోడదంష్ట్రాహతిదలితహిరణ్యాక్షవక్షఃకవాట-
ప్రాదుర్భూతప్రభూతక్షతజసముదితారుణ్యముద్రం సముద్రమ్ ..

ఉన్మీలత్కింశుకాభైరుపహసదమితైరంశుభిః సంశయఘ్నీ-
మక్షం చక్రస్య దత్తామఘశతశమనం దాశుషీం శేముషీం వః .. 67..

పద్మోల్లాసప్రదం యజ్జనయతి జగతీమేధమానప్రబోధాం
యస్యచ్ఛాయాసమానా లసతి పరిసరే రోహిణీ తారకాగ్ర్యా .
నానాహేత్యున్నతత్త్వం ప్రకటయతి చ యత్ప్రాప్తకృష్ణప్రయాణం
త్రేధా భిన్నస్య ధామ్నస్సముదయ ఇవ తత్పాతు వశ్చాక్రమక్షమ్ .. 68..

శోచిర్భిః పద్మరాగద్రవసమసుషమైశ్శోభమానావకాశం
ప్రత్యగ్రాశోకరాగప్రతిభటవపుషా భూషితం పూరుషేణ .
అన్తః స్వచ్ఛన్దమగ్నోత్థితభృగుతనయం క్షత్రియాణాం క్షతానా-
మారబ్ధం శోణితౌఘైస్సర ఇవ భవతో దివ్యహేత్యక్షమవ్యాత్ .. 69..

మత్తానామిన్ద్రియాణాం కృతవిషయమహాకాననక్రీడనానాం
సృష్టం చక్రేశ్వరేణ గ్రహణధిషణయా వారివద్వారణానామ్ .
గమ్భీరం యన్త్రగర్తం కమపి కృతధియో మన్వతే యత్ప్రదేయా-
దస్థూలాం సంవిదం వస్త్రిజగదభిమతస్థూలలక్షం తదక్షమ్ .. 70..

ప్రణాదీన్సన్నియమ్య ప్రణిహితమనసాం యోగినామన్తరఙ్గే
తుఙ్గం సఙ్కోచ్య రూపం విరచితదహరాకాశకృచ్ఛ్రాసికేన .
ప్రాప్తం యత్పూరుషేణ స్వమహిమసదృశం ధామ కామప్రదం వో
భూయాభూర్భువస్స్వస్త్రయవరివసితం పుష్కరాక్షాయుధాక్షమ్ .. 71..

విద్ధాన్వీధ్రేణ ధామ్నా చరణనఖభువా బద్ధవాసస్య మధ్యే
చక్రాధ్యక్షస్య బిభ్రత్పరిహసితజపాపుష్పకోశాన్ప్రకాశాన్ .
శుభ్రైరభ్రైరదభ్రైశ్శరది తత ఇతో వ్యోమ విభ్రాజమానం
ప్రాతస్త్యాదిత్యరోచిస్తతమివ భవతః పాతు రాథాఙ్గమక్షమ్ .. 72..

శ్రీవాణీవాఙ్మృడాన్యో విదధతి భజనం శక్తయో యస్య దిక్షు
ప్రాహ వ్యూహం యదాద్యం ప్రథమమపి గుణం భారతీ పాఞ్చరాత్రీ .
ఘోరాం శాన్తాం చ మూర్తిం ప్రథయతి పురుషః ప్రాక్తనః ప్రార్థనాభి-
ర్భక్తానాం యస్య మధ్యే దిశతు తదనఘామక్షమధ్యక్షతాం వః .. 73..

రక్షఃపక్షేణ రక్షత్క్షతమమరగణం లక్ష్యవైలక్ష్యమాజౌ
లక్ష్మీమక్షీయమాణాం బలమథనభుజే వజ్రశిక్షానపేక్షే .
నిక్షిప్య క్షిప్రమధ్యక్షయతి జగతి యద్దక్షతాం దివ్యహేతే-
రక్షామామక్షమాం తాం క్షపయతు భవతామక్షజిల్లక్ష్యమక్షమ్ .. 74..

.. ఇత్యక్షవర్ణనమ్ ..

అథసుదర్శనపురుషవర్ణనమ్
జ్యోతిశ్చూడాలమౌలిస్త్రినయనవదనః షోడశోత్తుఙ్గబాహుః
ప్రత్యాలీఢేన తిష్ఠన్ప్రణవశశధరాధారషట్కోణవర్తీ .
నిస్సీమేన స్వధామ్నా నిఖిలమపి జగత్క్షేమవన్నిర్మిమాణో
భూయాత్సౌదర్శనో వః ప్రతిభటపరుషః పూరుషః పౌరుషాయ .. 75..

వాణీ పౌరాణికీ యం ప్రథయతి మహితం ప్రేక్షణం కైటభారేః
శక్తిర్యస్యేషుదంష్ట్రానఖపరశుముఖవ్యాపినీ తద్విభూత్యామ్ .
కర్తుం యత్తత్త్వబోధో న నిశితమతిభిర్నారదాద్యైశ్చ శక్యో
దైవీం వో మానుషీం చ క్షిపతు స విపదం దుస్రామస్త్రరాజః .. 76..

రూఢస్తారాలవాలే రుచిరదలచయః శ్యామలైశ్శస్త్రజాలై-
ర్జ్వాలాభిస్సప్రవాలః ప్రకటితకుసుమో బద్ధసఙ్ఘైః స్ఫులిఙ్గైః .
ప్రాప్తానాం పాదమూలం ప్రకృతిమధురయా ఛాయయా తాపహృద్వో
దత్తాముద్దోఃప్రకాణ్డః ఫలమభిలషితం విష్ణుసఙ్కల్పవృక్షః .. 77..

ధామ్నామైరమ్మదానాం నిచయమివ చిరస్థాయినాం ద్వాదశానాం
మార్తణ్డానాం సమూఢం మహ ఇవ బహులాం రత్నభాసామివర్ద్ధిమ్ .
అర్చిస్సఙ్ఘాతమేకీకృతమివ శిఖినాం వాడవాగ్రేసరాణాం
శఙ్కన్తే యస్య రూపం స భవతు భవతాం తేజసే చక్రరాజః .. 78..

ఉగ్రం పశ్యాక్షముద్యద్భ్రుకుటి సముకుటం కుణ్డలిస్పష్టదంష్ట్రం
చణ్డాస్త్రైర్బాహుదణ్డైర్లసదనలసమక్షౌమలక్ష్యోరుకాణ్డమ్ .
ప్రత్యాలీఢస్థపాదం ప్రథయతు భవతాం పాలనవ్యగ్రమగ్రే
చక్రేశోఽకాలకాలేరితభటవికటాటోపలోపాయ రూపమ్ .. 79..

చక్రం కున్తం కృపాణం పరశుహుతవహావఙ్కుశం దణ్డశక్తీ
శఙ్ఖం కోదణ్డపాశౌ హలముసలగదావజ్రశూలాంశ్చ హేతీన్ .
దోర్భిస్సవ్యాపసవ్యైర్దధతతులబలస్తమ్భితారాతిదర్పై-
ర్వ్యూహస్తేజోభిమానీ నరకవిజయినో జృమ్భతాం సమ్పదే వః .. 80..

పీతం కేశే రిపోరప్యసృజి రథపదే సంశ్రితేఽప్యుత్కటాక్షం
చన్ద్రాధఃకారి యన్త్రే వపుషి చ దలనే మణ్డలే చ స్వరాఙ్కమ్ .
హస్తే వక్త్రే చ హేతిస్తబకితమసమం లోచనే మోచనే చ
స్తాదస్తోకాయ ధామ్నే సురవరపరిషత్సేవితం దైవతం వః .. 81..

చిత్రాకారైస్స్వచారైర్మితసకలజగజ్జాగరూకప్రతాపో
మన్త్రం తన్త్రానురూపం మనసి కలయతో మానయన్నాత్మగుహ్యాన్ .
పఞ్చాఙ్గస్ఫూర్తినిర్వర్తితరిపువిజయో ధామ షణ్ణాం గుణానాం
లక్ష్మీం రాజాసనస్థో వితరతు భవతాం పూరుషశ్చక్రవర్తీ .. 82..

అక్షావృత్తాభ్రమాలాన్యరవివరలుఠచ్చన్ద్రచణ్డద్యుతీని
జ్వాలాజాలావలీఢస్ఫుటదుడుపటలీపాణ్డుదిఙ్మణ్డలాని .
చక్రాన్తాక్రాన్తచక్రాచలచలితమహీచక్రవాలార్తశేషా-
ణ్యస్త్రగ్రామాగ్రిమస్య ప్రదదతు భవతాం ప్రార్థితం ప్రస్థితాని .. 83..

శూలం త్యక్తాత్మశీలం సృణిరణుకఘృణిః పట్టసః స్పష్టసాదః
శక్తిశ్శాలీనశక్తిః కులిశమకుశలం కుణ్ఠధారః కుఠారః .
దణ్డశ్చణ్డత్వశూన్యో భవతి తనుధనుర్యత్పురస్తాత్స వః స్తాద్
గ్రస్తాశేషాస్త్రగర్వో రథచరణపతిః కర్మణే శార్మణాయ .. 84..

క్షుణ్ణాజానేయవృన్దం క్షుభితరథగణం సన్నసాన్నాహ్యయూథం
క్ష్వేలాసంరమ్భహేలాకలకలవిగలత్పూర్వగీర్వాణగర్వమ్ .
కుర్వాణఃసామ్పరాయం రథచరణపతిః స్థేయసీం వఃప్రశస్తిం
దుగ్ధాం దుగ్ధాబ్ధిభాసం భయవివశశునాసీరనాసీరవర్తీ .. 85..

ద్రుహ్యద్దోశ్శాలిమాలిప్రహరణరభసోత్తానితే వైనతేయే
విద్రాతి ద్రాక్ప్రయుక్తః ప్రధనభువి పరావర్తమానేన భర్త్రా .
నిర్జిత్య ప్రత్యనీకం నిరవధికచరద్ధాస్తికాశ్వీయరథ్యం
పథ్యం విశ్వస్య దాశ్వాన్ప్రథయతు భవతో హేతిరిన్ద్రానుజస్య .. 86..

నన్దిన్యానన్దశూన్యే గలతి గణపతౌ వ్యాకులే బాహులేయే
చణ్డే చాకిత్యకుణ్ఠే ప్రమథపరిషది ప్రాప్తవత్యాం ప్రమాథమ్ .
ఉచ్ఛిద్యాజౌ బలిష్ఠం వలిజభుజవనం యో దదావాదిభిక్షో-
ర్భిక్షాం తత్ప్రాణరూపాం స భవదకుశలం కృష్ణహేతిఃక్షిణోతు .. 87..

రక్తౌఘాభ్యక్తముక్తాఫలలులితలలద్వీచివృద్ధౌ మహాబ్ధౌ
సన్ధ్యాసమ్బద్ధతారాజలధరశబలాకాశనీకాశకాన్తౌ .
గమ్భీరారమ్భమమ్భశ్చరమసురకులం వేదవిఘ్నం వినిఘ్నన్
నివిఘ్నం వః ప్రసూతాం వ్యపగతవిపదం సమ్పదం చక్రరాజః .. 88..

కాశీవిప్లోషచైద్యక్షపణధరణిజధ్వంససూర్యాపిధాన-
గ్రాహద్వేధాత్వమాలిత్రుటనముఖకథావస్తుసత్కీర్తిగాథాః .
గీయన్తే కిన్నరీభిః కనకగిరిగుహాగేహినీభిర్యదీయా
దేయాద్దైతేయవైరీ స సకలభువనశ్లాఘనీయాం శ్రియం వః .. 89..

నానావర్ణాన్వివృణ్వన్విరచితభువనానుగ్రహాన్ విగ్రహాన్ యః
చక్రేష్వష్టాసు మృష్టాసురవరతరుణీకణ్ఠకస్తూరికేషు
. ఆతారాదర్ణమాలావధిషు వసతి యః పూరుషో వస్స దేయాత్
వ్యధ్వైరుద్ధూతసత్త్వైరుపహితమబహిర్ధ్వాన్తమధ్వాన్తవర్తీ .. 90..

ద్వాత్రింశత్షోడశాష్టప్రభృతిపృథుభుజస్ఫూర్తిర్భిమూర్తిభేదైః
కాలాద్యే చక్రషట్కే ప్రకటితవిభవఃపఞ్చకృత్యానురూపమ్ .
అర్థానామర్థితానామహరహరఖిలం నిర్విలమ్బైర్విలమ్బైః
కుర్వాణో భక్తవర్గం కుశలినమవతాదాయుధగ్రామణీర్వః .. 91..

కోణైరర్ణైస్సరోజైరపి కపిశగుణైః షడ్భిరుద్భిన్నశోభే
శ్రీవాణీపూర్వికాభిర్దధతి వికసతశ్శక్తిభిః కేశవాదీన్ .
తారాన్తే భూపురాదౌ రథచరణగదాశార్ఙ్గఖడ్గాఙ్కితాశే
యన్త్రే తన్త్రోదితే వః స్ఫురతు కృతపదం లక్ష్మ లక్ష్మీసఖస్య .. 92..

దంష్ట్రాకాన్త్యా కడారే కపటకిటితనోః కైటభారేరధస్తా-
దూర్ధ్వం హాసేన విద్ధే నరహరివపుషో మణ్డలే వాసవీయే .
ప్రాక్ప్రత్యక్సాన్ధ్యసాన్ద్రచ్ఛవిభరభరితే వ్యోమ్ని విద్యోతమానో
దైతేయోత్పాతశంసీ రవిరివ రహయత్వస్త్రరాజో రుజం వః .. 93..

కోణే క్వాపి స్థితోఽపి త్రిభువనవితతశ్చన్ద్రధామాపి రూక్షో
రుక్మచ్ఛాయోఽపి కృష్ణాకృతిరనలమయోఽప్యాశ్రితత్రాణకారీ .
ధారాసారోఽపి దీప్తో దినకరరుచిరోఽప్యుల్లసత్తారకశ్రీ-
శ్చక్రేశశ్చిత్రభూమా వితరతు విమతత్రాసనం శాసనం వః .. 94..

శుక్లశ్శక్ర స్తవస్తే సహ దహన కలాం కాల తేఽయం న కాలః
కిం వో రక్షాంసి రక్షా తవ ఫలతు పతే యాదసాం పాదసేవా .
వాయో హృద్యోఽసి భర్తుస్త్యజ ధనద మదం సేవ్యతాం త్రయమ్బకేతి
ప్రాహుర్యద్యన్త్రపాలాస్స దనుజవిజయీ హన్తు తన్ద్రాలుతాం వః .. 95..

గాయత్ర్యర్ణారచక్రే ప్రథమమనుసఖస్స్మేరపత్రారవిన్దే
బిమ్బం వహ్నేస్త్రికోణం వహతి జయిజయాద్యష్టశక్తౌ నిషణ్ణా .
శోకం వోఽశోకమూలే పదసవిధలసద్భీమభీమాక్షభీమా-
పుంసో దివ్యాస్త్రధామా పురుషహరిమయీ మూర్తిరస్యత్వపూర్వా .. 96..

పాశ్చాత్యాశోకపుష్పప్రకరనిపతితైః ప్రాప్తరాగం పరాగైః
సన్ధ్యారోచిస్సగన్ధైః స్వపదశశధరం ప్రేక్ష్య తారానుషక్తమ్ .
పద్మానాబద్ధకోశానివ సురనివహైరఞ్జలీన్ కల్ప్యమానాం-
శ్చక్రాధీశోఽభినన్దన్ప్రదిశతు సదృశీముత్తమశ్లోకతాం వః .. 97..

రక్తాశోకస్య వేదస్య చ విహితపదం ప్రాప్తశాఖస్య మూలే
చక్రైరస్త్రైస్తదాద్యైరపి మహితచతుర్ద్విశ్చతుర్వాహుదణ్డమ్ .
ఆసీనం భాసమానం స్థితమపి భయతస్త్రాయతాం తత్త్వమేకం
పశ్చాత్పూర్వత్ర భాగే స్ఫుటనరహరితామానుషం జానుషాద్వః .. 98..

ప్రాణే దత్తప్రయాణే ముషితదిశి దృశి త్వక్తసారే శరీరే
మత్యాం వ్యామోహవత్యాం సతమసి మనసి వ్యాహతే వ్యాహృతే చ .
చక్రాన్తర్వర్తి మృత్యుప్రతిభయముభయాకారచిత్రం పవిత్రం
తేజస్తత్తిష్ఠతాం వస్త్రిదశకులధనం త్రీక్షణం తీక్ష్ణదంష్ట్రమ్ .. 99..

యస్మిన్విన్యస్య భారం విజయిని జగతాం జఙ్గమస్థావరాణాం
లక్ష్మీనారాయణాఖ్యం మిథునమనుభవత్యత్యుదారాన్విహారాన్ .
ఆరోగ్యం భూతిమాయుః కృతమిహ బహునా యద్యదాస్థాపదం వ-
స్తత్తత్సద్యః సమస్తం దిశతు స పురుషో దివ్యహేత్యక్షవర్తీ .. 100..

పద్యానాం తత్త్వవిద్యాద్యుమణిగిరిశవిధ్యఙ్గసఙ్ఖ్యాధరాణా-
మర్చిష్వఙ్గేషు నేమ్యాదిషు చ పరమతః పుంసి షడ్వింశతేశ్చ .
సఙ్ఘైః సౌదర్శనం యః పఠతి కృతమిదం కూరనారాయణేన -
స్తోత్రం నిర్విష్టభోగో భజతి స పరమాం చక్రసాయుజ్యలక్ష్మీమ్ .. 101..