శ్రీగజేన్ద్రస్తోత్రమ్

.. శ్రీగజేన్ద్రమోక్షస్తోత్రమ్ ..

శ్రీగజేన్ద్ర ఉవాచ
ఓం నమో భగవతే తస్మై యత ఏతచ్చిదాత్మకమ్.
పురుషాయాదిబీజాయ పరేశాయాభిధీమహి..2..

యస్మిన్నిదం యతశ్చేదం యేనేదం య ఇదం స్వయమ్.
యోఽస్మాత్పరస్మాచ్చ పరస్తం ప్రపద్యే స్వయమ్భువమ్..3..

యః స్వాత్మనీదం నిజమాయయార్పితం
క్వచిద్విభాతం క్వ చ తత్తిరోహితమ్.
అవిద్ధదృక్సాక్ష్యుభయం తదీక్షతే
స ఆత్మమూలోఽవతు మాం పరాత్పరః..4..

కాలేన పఞ్చత్వమితేషు కృత్స్నశో
లోకేషు పాలేషు చ సర్వహేతుషు.
తమస్తదాసీద్గహనం గభీరం య-
స్తస్య పారేఽభివిరాజతే విభుః..5..

న యస్య దేవా ఋషయః పదం విదు-
ర్జన్తుః పునః కోఽర్హతి గన్తుమీరితుమ్.
యథా నటస్యాకృతిభిర్విచేష్టతో
దురత్యయానుక్రమణః స మావతు..6..

దిదృక్షవో యస్య పదం సుమఙ్గలం
విముక్తసఙ్గా మునయః సుసాధవః.
చరన్త్యలోకవ్రతమవ్రణం
వనే భూతాత్మభూతాః సుహృదః స మే గతిః..7..

న విద్యతే యస్య చ జన్మ కర్మ వా
న నామరూపే గుణదోష ఏవ వా.
తథాపి లోకాప్యయసమ్భవాయ
యః స్వమాయయా తాన్యనుకాలమృచ్ఛతి..8..

తస్మై నమః పరేశాయ బ్రహ్మణేఽనన్తశక్తయే.
అరూపాయోరురూపాయ నమ ఆశ్చర్యకర్మణే..9..

నమ ఆత్మప్రదీపాయ సాక్షిణే పరమాత్మనే.
నమో గిరాం విదూరాయ మనసశ్చేతసామపి..10..

సత్త్వేన ప్రతిలభ్యాయ నైష్కర్మ్యేణ విపశ్చితా.
నమః కైవల్యనాథాయ నిర్వాణసుఖసంవిదే..11..

నమః శాన్తాయ ఘోరాయ మూఢాయ గుణధర్మిణే.
నిర్విశేషాయ సామ్యాయ నమో జ్ఞానఘనాయ చ..12..

క్షేత్రజ్ఞాయ నమస్తుభ్యం సర్వాధ్యక్షాయ సాక్షిణే.
పురుషాయాత్మమూలాయ మూలప్రకృతయే నమః..13..

సర్వేన్ద్రియగుణద్రష్ట్రే సర్వప్రత్యయహేతవే.
అసతా చ్ఛాయయోక్తాయ సదాభాసాయ తే నమః..14..

నమో నమస్తేఽఖిలకారణాయ
నిష్కారణాయాద్భుతకారణాయ.
సర్వాగమామ్నాయమహార్ణవాయ
నమోఽపవర్గాయ పరాయణాయ..15..

గుణారణిచ్ఛన్నచిదుష్మపాయ
తత్క్షోభవిస్ఫూర్జితమానసాయ.
నైష్కర్మ్యభావేన వివర్జితాగమ
స్వయంప్రకాశాయ నమస్కరోమి..16..

మాదృక్ప్రపన్నపశుపాశవిమోక్షణాయ
ముక్తాయ భూరికరుణాయ నమోఽలయాయ.
స్వాంశేన సర్వతనుభృన్మనసి ప్రతీత
ప్రత్యగ్దృశే భగవతే బృహతే నమస్తే..17..

ఆత్మాత్మజాప్తగృహవిత్తజనేషు సక్తై-
ర్దుష్ప్రాపణాయ గుణసఙ్గవివర్జితాయ.
ముక్తాత్మభిః స్వహృదయే పరిభావితాయ
జ్ఞానాత్మనే భగవతే నమ ఈశ్వరాయ..18..

యం ధర్మకామార్థవిముక్తికామా
భజన్త ఇష్టాం గతిమాప్నువన్తి.
కిం చాశిషో రాత్యపి దేహమవ్యయం
కరోతు మేఽదభ్రదయో విమోక్షణమ్..19..

ఏకాన్తినో యస్య న కఞ్చనార్థం
వాఞ్ఛన్తి యే వై భగవత్ప్రపన్నాః.
అత్యద్భుతం తచ్చరితం సుమఙ్గలం
గాయన్త ఆనన్దసముద్రమగ్నాః..20..

తమక్షరం బ్రహ్మ పరం పరేశమవ్యక్తమాధ్యాత్మికయోగగమ్యమ్.
అతీన్ద్రియం సూక్ష్మమివాతిదూరమనన్తమాద్యం పరిపూర్ణమీడే..21..

యస్య బ్రహ్మాదయో దేవా వేదా లోకాశ్చరాచరాః.
నామరూపవిభేదేన ఫల్గ్వ్యా చ కలయా కృతాః..22..

యథార్చిషోఽగ్నేః సవితుర్గభస్తయో
నిర్యాన్తి సంయాన్త్యసకృత్స్వరోచిషః.
తథా యతోఽయం గుణసమ్ప్రవాహో
బుద్ధిర్మనః ఖాని శరీరసర్గాః..23..

స వై న దేవాసురమర్త్యతిర్యఙ్
న స్త్రీ న షణ్ఢో న పుమాన్న జన్తుః.
నాయం గుణః కర్మ న సన్న చాస-
న్నిషేధశేషో జయతాదశేషః..24..

జిజీవిషే నాహమిహాముయా కి-
మన్తర్బహిశ్చావృతయేభయోన్యా.
ఇచ్ఛామి కాలేన న యస్య విప్లవ-
స్తస్యాత్మలోకావరణస్య మోక్షమ్..25..

సోఽహం విశ్వసృజం విశ్వమవిశ్వం విశ్వవేదసమ్.
విశ్వాత్మానమజం బ్రహ్మ ప్రణతోఽస్మి పరం పదమ్..26..

యోగరన్ధితకర్మాణో హృది యోగవిభావితే.
యోగినో యం ప్రపశ్యన్తి యోగేశం తం నతోఽస్మ్యహమ్..27..

నమో నమస్తుభ్యమసహ్యవేగ శక్తిత్రయాయాఖిలధీగుణాయ.
ప్రపన్నపాలాయ దురన్తశక్తయే కదిన్ద్రియాణామనవాప్యవర్త్మనే..28..

నాయం వేద స్వమాత్మానం యచ్ఛక్త్యాహం ధియా హతమ్.
తం దురత్యయమాహాత్మ్యం భగవన్తమితోఽస్మ్యహమ్..29..