ಅಥ ಶ್ರೀಸುದರ್ಶನಶತಕಮ್

ಶ್ರೀಸುದರ್ಶನಾಯ ನಮಃ
ಸೌದರ್ಶನ್ಯುಜ್ಜಿಹಾನಾ ದಿಶಿ ವಿದಿಶಿ ತಿರಸ್ಕೃತ್ಯ ಸಾವಿತ್ರಮರ್ಚಿ-
ರ್ಬಾಹ್ಯಾಬಾಹ್ಯಾನ್ಧಕಾರಕ್ಷತಜಗದಗದಙ್ಕಾರಭೂಮ್ನಾ ಸ್ವಧಾಮ್ನಾ .
ದೋಃಖರ್ಜೂದೂರಗರ್ಜದ್ವಿಬುಧರಿಪುವಧೂಕಣ್ಠವೈಕಲ್ಯಕಲ್ಯಾ
ಜ್ವಾಲಾ ಜಾಜ್ವಲ್ಯಮಾನಾ ವಿತರತು ಭವತಾಂ ವೀಪ್ಸಯಾಽಭೀಪ್ಸಿತಾನಿ .. ೧..

ಪ್ರತ್ಯುದ್ಯಾತಂ ಮಯೂಖೈರ್ನಭಸಿ ದಿನಕೃತಃ ಪ್ರಾಪ್ತಸೇವಂ ಪ್ರಭಾಭಿ-
ರ್ಭೂಮೌ ಸೌಮೇರವೀಭಿರ್ದಿವಿ ವರಿವಸಿತಂ ದೀಪ್ತಿಭಿರ್ದೇವಧಾಮ್ನಾಮ್ .
ಭುಯಸ್ಯೈ ಭೂತಯೇ ವಃ ಸ್ಫುರತು ಸಕಲದಿಗ್ಭ್ರಾನ್ತಸಾನ್ದ್ರಸ್ಫುಲಿಙ್ಗಂ
ಚಾಕ್ರಂ ಜಾಗ್ರತ್ಪ್ರತಾಪಂ ತ್ರಿಭುವನವಿಜಯವ್ಯಗ್ರಮುಗ್ರಂ ಮಹಸ್ತತ್ .. ೨..

ಪೂರ್ಣೇ ಪೂರೈಃ ಸುಧಾನಾಂ ಸುಮಹತಿ ಲಸತಸ್ಸೋಮಬಿಮ್ಬಾಲವಾಲೇ-
ಬಾಹಾಶಾಖಾವರುದ್ಧಕ್ಷಿತಿಗಗನದಿವಶ್ಚಕ್ರರಾಜದ್ರುಮಸ್ಯ .
ಜ್ಯೋತಿಶ್ಛದ್ಮಾ ಪ್ರವಾಲಃ ಪ್ರಕಟಿತಸುಮನಸ್ಸಮ್ಪದುತ್ತಂಸಲಕ್ಷ್ಮೀಂ
ಪುಷ್ಣನ್ನಾಶಾಮುಖೇಷು ಪ್ರದಿಶತು ಭವತಾಂ ಸಪ್ರಕರ್ಷಂ ಪ್ರಹರ್ಷಮ್ .. ೩..

ಆರಾದಾರಾತ್ಸಹಸ್ರಾದ್ವಿಸರತಿ ವಿಮತಕ್ಷೇಪದಕ್ಷಾದ್ಯದಕ್ಷಾ-
ನ್ನಾಭೇರ್ಭಾಸ್ವತ್ಸನಾಭೇರ್ನಿಜವಿಭವಪರಿಚ್ಛಿನ್ನಭೂಮೇಶ್ಚ ನೇಮೇಃ .
ಆಮ್ನಾಯೈರೇಕಕಣ್ಠೈಃ ಸ್ತುತಮಹಿಮ ಮಹೋ ಮಾಧವೀಯಸ್ಯ ಹೇತೇ-
ಸ್ತದ್ವೋ ದಿಕ್ಷ್ವೇಧಮಾನಂ ಚತಸೃಷು ಚತುರಃ ಪುಷ್ಯತಾತ್ಪೂರುಷಾರ್ಥಾನ್ .. ೪..

ಶ್ಯಾಮಂ ಧಾಮಪ್ರಸೃತ್ಯಾ ಕ್ವಚನ ಭಗವತಃ ಕ್ವಾಪಿ ಬಭ್ರು ಪ್ರಕೃತ್ಯಾ
ಶುಭ್ರಂ ಶೇಷಸ್ಯ ಭಾಷಾ ಕ್ವಚನ ಮಣಿರುಚಾ ಕ್ವಾಪಿ ತಸ್ಯೈವ ರಕ್ತಮ್ .
ನೀಲಂ ಶ್ರೀನೇತ್ರಕಾನ್ತ್ಯಾ ಕ್ವಚಿದಪಿ ಮಿಥುನಸ್ಯಾದಿಮಸ್ಯೇವ ಚಿತ್ರಂ
ವ್ಯಾಪ್ತನ್ವಾನಂ ವಿತಾನಶ್ರಿಯಮುಪಚಿನುತಾಚ್ಛರ್ಮ ವಶ್ಚಕ್ರಭಾನಮ್ .. ೫..

ಶಂಸನ್ತ್ಯುನ್ಮೇಷಮುಚ್ಛೋಷಿತಪರಮಹಸೋ ಭಾಸ್ವತಃ ಕೈಟಭಾರೇ-
ರಿನ್ಧೇ ಸನ್ಧ್ಯೇವ ನಕ್ತಞ್ಚರವಿಲಯಕರೀ ಯಾ ಜಗದ್ವನ್ದನೀಯಾ .
ಬನ್ಧೂಕಚ್ಛಾಯಬನ್ಧುಚ್ಛವಿಘಟಿತಘನಚ್ಛೇದಮೇದಸ್ವಿನೀ ಸಾ
ರಾಥಾಙ್ಗೀ ರಶ್ಮಿಭಙ್ಗೀ ಪ್ರಣುದತು ಭವತಾಂ ಪ್ರತ್ಯಹೋತ್ಥಾನಮೇನಃ .. ೬..

ಸಾಮ್ಯಂ ಧೂಮ್ಯಾಪ್ರವೃದ್ಧ್ಯಾ ಪ್ರಕಟಯತಿ ನಭಸ್ತಾರಕಾಜಾಲಕಾನಿ
ಸ್ಫೌಲಿಙ್ಗೀಂ ಯಾನ್ತಿ ಕಾನ್ತಿಂ ದಿಶತಿ ಯದುದಯೇ ಮೇರುರಙ್ಗಾರಶಙ್ಕಾಮ್ .
ಅಗ್ನಿರ್ಮಗ್ನಾರ್ಚಿರೈಕ್ಯಂ ಭಜತಿ ದಿನನಿಶಾವಲ್ಲಭೌ ದುರ್ಲಭಾಭೌ
ಜ್ವಾಲಾವರ್ತಾವಿವ ಸ್ತಃ ಪ್ರಹರಣಪತಿಜಂ ಧಾಮ ವಸ್ತದ್ಧಿನೋತು .. ೭..

ದೃಷ್ಟೇಽಧಿವ್ಯೋಮಚಕ್ರೇ ವಿಕಚನವಜಪಾಸನ್ನಿಕಾಶೇ ಸಕಾಶಂ
ಸ್ವರ್ಭಾನುರ್ಭಾನುರೇಷ ಸ್ಫುಟಮಿತಿ ಕಲಯನ್ನಾಗತೋ ವೇಗತೋಽಸ್ಯ .
ನಿಷ್ಟಪ್ತೋ ಯೈರ್ನಿವೃತ್ತೋ ವಿಧುಮಿವ ಸಹಸಾ ಸ್ಪ್ರಷ್ಟುಮದ್ಯಾಪಿ ನೇಷ್ಟೇ
ಘರ್ಮಾಂಶುಂ ತೇ ಘಟನ್ತಾಮಹಿತವಿಹತಯೇ ಭಾನವೋ ಭಾಸ್ವರಾ ವಃ .. ೮..

ದೇವಂ ಹೇಮಾದ್ರಿತುಙ್ಗಂ ಪೃಥುಭುಜಶಿಖರಂ ಬಿಭ್ರತೀಂ ಮಧ್ಯದೇಶೇ
ನಾಭಿದ್ವೀಪಾಭಿರಾಮಾಮರವಿಪಿನವತೀಂ ಶೇಷಶೀರ್ಷಾಸನಸ್ಥಾಮ್ .
ನೇಮಿಂ ಪರ್ಯಾಯಭೂಮಿಂ ದಿನಕರಕಿರಣಾದೃಷ್ಟಸೀಮಃಪರೀತ್ಯ
ಪ್ರೀತ್ಯೈ ವಶ್ಚಕ್ರವಾಲಾಚಲ ಇವ ವಿಲಸನ್ನಸ್ತು ದಿವ್ಯಾಸ್ತ್ರರಶ್ಮಿಃ .. ೯..

ಏಕಂ ಲೋಕಸ್ಯ ಚಕ್ಷುರ್ದ್ವಿವಿಧಮಪನುದತ್ಕರ್ಮ ನಮ್ರತ್ರಿನೇತ್ರಂ
ದಾತ್ರರ್ಥಾನಾಂ ಚತುರ್ಣಾಂ ಗಮಯದರಿಗಣಂ ಪಞ್ಚತಾಂ ಷಡ್ಗುಣಾಢ್ಯಮ್ .
ಸಪ್ತಾರ್ಚಿಃಶೋಷಿತಾಷ್ಟಾಪದನವಕಿರಣಶ್ರೇಣಿರಜ್ಯದ್ದಶಾಂಶಂ
ಪರ್ಯಸ್ಯಾದ್ವಃ ಶತಾಙ್ಗಾವಯವಪರಿವೃಢಜ್ಯೋತಿರೀತೀಃ ಸಹಸ್ರಮ್ .. ೧೦..

ಉಚ್ಚಣ್ಡೇ ಯಚ್ಛಿಖಣ್ಡೇ ನಿಬಿಡಯತಿ ನಭಃ ಕ್ರೋಡಮರ್ಕೋಽಟತಿ ದ್ಯಾ-
ಮಭ್ಯಸ್ಯ ಪ್ರೌಢತಾಪಗ್ಲಪಿತವಪುರಪೋ ಬಿಭ್ರತೀರಭ್ರಪಙ್ಕ್ತೀಃ .
ಧತ್ತೇ ಶುಷ್ಯತ್ಸುಧೋತ್ಸೋ ವಿಧುರಪಮಧುನಃ ಕ್ಷೌದ್ರಕೋಶಸ್ಯ ಸಾಮ್ಯಂ
ರಕ್ಷನ್ತ್ವಸ್ತ್ರಪ್ರಭೋಸ್ತೇ ರಚಿತಸುಚರಿತವ್ಯುಷ್ಟಯೋ ಘುಷ್ಟಯೋಃ ವಃ .. ೧೧..

ಪದ್ಮೌಘೋ ದೀರ್ಘಿಕಾಮ್ಭಸ್ಯವನಿಧರತಟೇ ಗೈರಿಕಾಮ್ಬುಪ್ರಪಾತಃ
ಸಿನ್ದೂರಂ ಕುಞ್ಜರಾಣಾಂ ದಿಶಿ ದಿಶಿ ಗಗನೇ ಸಾನ್ಧ್ಯಮೇಘಪ್ರಬನ್ಧಃ .
ಪಾರಾವಾರೇ ಪ್ರವಾಲೋ ವನಭುವಿ ಚ ತಥಾ ಪ್ರೇಕ್ಷ್ಯಮಾಣಃ ಪ್ರಮುಗ್ಧೈಃ
ಸಾಧಿಷ್ಠಂ ವಃ ಪ್ರಮೋದಂ ಜನಯತು ದನುಜದ್ವೇಷಿಣಸ್ತ್ವೈಷರಾಶಿಃ .. ೧೨..

ಭಾನೋ ಭಾ ನೋ ತ್ವದೀಯಾ ಸ್ಫುರತಿ ಕುಮುದಿನೀಮಿತ್ರ ತೇ ಕುತ್ರ ತೇಜ-
ಸ್ತಾರಾಸ್ತಾರಾದಧೀರೋಽಸ್ಯನಲ ನ ಭವತಃ ಸ್ವೈರಮೈರಮ್ಮದಾರ್ಚಿಃ .
ಶಂಸನ್ತೀತ್ಥಂ ನಭಃಸ್ಥಾ ಯದುದಯಸಮಯೇ ಚಕ್ರರಾಜಾಂಶವಸ್ತೇ
ಯುಷ್ಮಾಕಂ ಪ್ರೌಢತಾಪಪ್ರಭವಗದಾಪಕ್ರಮಾಯ ಕ್ರಮನ್ತಾಮ್ .. ೧೩..

ಜಗ್ಧ್ವಾ ಕರ್ಣೇಷು ದೂರ್ವಾಙ್ಕುರಮರಿಸುದೃಶಾಮಕ್ಷಿಷು ಸ್ವರ್ವಧೂನಾಂ
ಪೀತ್ವಾ ಚಾಮ್ಭಶ್ಚರನ್ತ್ಯಃ ಸವೃಷಮನುಗತಾ ವಲ್ಲವೇನಾದಿಮೇನ .
ಗಾವೋ ವಶ್ಚಕ್ರಭರ್ತುಃ ಪರಮಮೃತರಸಂ ಪ್ರಶ್ರಿತಾನಾಂ ದುಹಾನಾಃ
ಋದ್ಧಿಂ ಸ್ವಾಲೋಕಲುಪ್ತತ್ರಿಭುನತಮಸಃ ಸಾನುಬನ್ಧಾಂ ದದನ್ತಾಮ್ .. ೧೪..

ಸೇನಾಂ ಸೇನಾಂ ಮಘೋನೋ ಮಹತಿ ರಣಮುಖೇಽಲಂ ಭಯಂ ಲಮ್ಭಯನ್ತೀ-
ರುತ್ಸೇಕೋಷ್ಣಾಲುದೋಷ್ಣಾಂ ಪ್ರಥಮದಿವಿಷದಾಮಾವಲೀರ್ಯಾವಲೀಢೇ .
ವಿಶ್ವಂ ವಿಶ್ವಮ್ಭರಾದ್ಯಂ ರಥಪದಧಿಪತೇರ್ಲೀಲಯಾ ಪಾಲಯನ್ತೀ
ಋದ್ಧಿಃ ಸಾ ದೀಧಿತೀನಾಂ ವೃಜಿನಮನುಜನುರ್ಮಾರ್ಜಯತ್ವಾರ್ಜಿತಂ ವಃ .. ೧೫..

ತಪ್ತಾ ಸ್ವೇನೋಷ್ಮಣೇವ ಪ್ರತಿಭಟವಪುಷಾಮಸ್ರಧಾರಾಂ ಧಯನ್ತೀ
ಪ್ರಾಪ್ತೇವ ಕ್ಷೀಬಭಾವಂ ಪ್ರತಿದಿಶಮಸಕೃತ್ತನ್ವತೀ ಘೂರ್ಣಿತಾನಿ .
ವಂಶಾಸ್ಥಿಸ್ಫೋಟಶಬ್ದಂ ಪ್ರಕಟಯತಿ ಪಟೂನ್ಯಾಽಽವಹನ್ತ್ಯಟ್ಟಹಾಸಾನ್
ಭಾ ಸಾ ವಃ ಸ್ಯನ್ದನಾಙ್ಗಪ್ರಭುಸಮುದಯಿನೀ ಸ್ಪನ್ದತಾಂ ಚಿನ್ತಿತಾಯ .. ೧೬..

ದೇವೈರಾಸೇವ್ಯಮಾನೋ ದನುಜಭಟಭುಜಾದಣ್ಡದರ್ಪೋಷ್ಣತಪ್ತೈ-
ರಾಶಾರೋಧೋಽತಿಲಙ್ಘೀ ಲುಠದುಡುಪಟಲೀಲಕ್ಷ್ಯಡಿಣ್ಡೀರಪಿಣ್ಡಃ .
ರಿಙ್ಗಜ್ಜ್ವಾಲಾತರಙ್ಗತ್ರುಟಿತರಿಪುತರುವ್ರಾತಪಾತೋಗ್ರಮಾರ್ಗ-
ಶ್ಚಾಕ್ರೋ ವಃ ಶೋಚಿರೋಧಃ ಶಮಯತು ದುರಿತಾಪಹ್ನವಂ ದಾವವಹ್ನಿಮ್ .. ೧೭..

ಭ್ರಾಮ್ಯತೀ ಸಂಶ್ರಿತಾನಾಂ ಭ್ರಮಶಮನಕರೀ ಚ್ಛನ್ನ ಸೂರ್ಯಪ್ರಕಾಶಾ
ಸೂರ್ಯಾಲೋಕಾನುರೂಪಾ ರಿಪುಹೃದಯತಮಸ್ಕಾರಿಣೀ ನಿಸ್ತಮಸ್ಕಾ .
ಧಾರಾಸಮ್ಪಾತಿನೀ ಚ ಪ್ರಕಟಿತದಹನಾ ದೀಪ್ತಿರಸ್ತ್ರೇಶಿತುರ್ವ-
ಶ್ಚಿತ್ರಾ ಭದ್ರಾಯ ವಿದ್ರಾವಿತವಿಮತಜನಾ ಜಾಯತಾಮಾಯತಾಯ .. ೧೮..

ನಿನ್ಯೇ ವನ್ಯೇವ ಕಾಶೀದವಶಿಖಿಜಟಿಲಜ್ಯೋತಿಷಾ ಯೇನ ದಾಹಂ
ಕೃತ್ಯಾ ವೃತ್ತ್ಯಾ ವಿಲಿಲ್ಯೇ ಶಲಭಸುಲಭಯಾ ಯತ್ರ ಚಿತ್ರಪ್ರಭಾವೇ .
ರುದ್ರೋಽಪ್ಯದ್ರೇರ್ದುಹಿತ್ರಾ ಸಹ ಗಹನಗುಹಾಂ ಯದ್ಭಯಾದಭ್ಯಯಾಸೀತ್
ದಿಶ್ಯಾದ್ವಿಶ್ವಾರ್ಚಿತೋ ವಃ ಸ ಶುಭಮನಿಭೃತಂ ಶೌರಿಹೇತಿಪ್ರತಾಪಃ .. ೧೯..

ಉದ್ಯನ್ಬಿಮ್ಬಾದುದಾರಾನ್ನಯನಜಲಹಿಮಂ ಮಾರ್ಜಯನ್ನಿರ್ಜರೀಣಾ-
ಮಜ್ಞಾನಧ್ವಾನ್ತಮೂರ್ಚ್ಛಾಕರಜನಿರಜನೀಭಞ್ಜನವ್ಯಞ್ಜಿತಾಧ್ವಾ .
ನ್ಯಕ್ಕುರ್ವಾಣೋ ಗ್ರಹಾಣಾಂ ಸ್ಫುರಣಮಪಹರನ್ನರ್ಚಿಷಃ ಪಾವಕೀಯಾ-
ಶ್ಚಕ್ರೇಶಾರ್ಕಪ್ರಕಾಶೋ ದಿಶತು ದಶ ದಿಶೋ ವ್ಯಶ್ನುವಾನಂ ಯಶೋ ವಃ .. ೨೦..

ವರ್ಗಸ್ಯ ಸ್ವರ್ಗಧಾಮ್ನಾಮಪಿ ದನುಜನುಷಾಂ ವಿಗ್ರಹಂ ನಿಗ್ರಹೀತುಂ
ದಾತುಂ ಸದ್ಯೋಽಬಲಾನಾಂ ಶ್ರಿಯಮತಿಶಯಿನೀಂ ಪತ್ರಭಙ್ಗಾನುವೃತ್ಯಾ .
ಯೋಕ್ತುಂ ದೇದೀಪ್ಯತೇ ಯಾ ಯುಗಪದಪಿ ಪುರೋ ಭೂತಿಮಯ್ಯಾ ಪ್ರಕೃತ್ಯಾ
ಸಾ ವೋ ನುದ್ಯಾದವಿದ್ಯಾಂ ದ್ಯುತಿರಮೃತರಸಸ್ಯನ್ದಿನೀ ಸ್ಯಾನ್ದನಾಙ್ಗೀ .. ೨೧..

ದಾಹಂ ದಾಹಂ ಸಪತ್ನಾನ್ಸಮರಭುವಿ ಲಸದ್ಭಸ್ಮನಾ ವರ್ತ್ಮನಾ ಯಾನ್
ಕ್ರವ್ಯಾದಪ್ರೇತಭೂತಾದ್ಯಭಿಲಷಿತಪುಷಾ ಪ್ರೀತಕಾಪಾಲಿಕೇನ .
ಕಙ್ಕಾಲೈಃ ಕಾಲಧೌತಂ ಗಿರಿಮಿವ ಕುರುತೇ ಯಃ ಸ್ವಕೀರ್ತೇರ್ವಿಹರ್ತುಂ
ಘೃಷ್ಟಿಃ ಸಾನ್ದೃಷ್ಟಿಕಂ ವಃ ಸಕಲಮುಪನಯತ್ವಾಯುಧಾಗ್ರೇಸರಸ್ಯ .. ೨೨..

ದಗ್ಧಾನಾಂ ದಾನವಾನಾಂ ಸಭಸಿತನಿಚಯೈರಸ್ಥಿಭಿಃ ಸರ್ವಶುಭ್ರಾಂ
ಪೃಥ್ವೀಂ ಕೃತ್ವಾಪಿ ಭೂಯೋ ನವರುಧಿರಝರೀಕೌತುಕಂ ಕೌಣಪೇಭ್ಯಃ .
ಕುರ್ವಾಣಂ ವಾಷ್ಪಪೂರೈಃ ಕುಚತಟಘುಸೃಣಕ್ಷಾಲನೈಸ್ತದ್ವಧೂನಾಂ
ಪಾಪಂ ಪಾಪಚ್ಯಮಾನಂ ಶಮಯತು ಭವತಾಂ ಶಸ್ತ್ರರಾಜಸ್ಯ ತೇಜಃ .. ೨೩..

ಮಾಗಾನ್ಮೋಷಂ ಲಲಾಟಾನಲ ಇತಿ ಮದನದ್ವೇಷಿಣಾ ಧ್ಯಾಯತೇವ
ಸ್ರಷ್ಟ್ರಾ ಪ್ರೋನ್ನಿದ್ರವಾಸಾಮ್ಬುಜದಲಪಟಲಪ್ಲೋಷಮುತ್ಪಶ್ಯತೇವ .
ವಜ್ರಾಗ್ನಿರ್ಮಾ ಸ್ಮ ನಾಶಂ ವ್ರಜದಿತಿ ಚಕಿತೇನೇವ ಶಕ್ರೇಣ ಬದ್ಧೈಃ
ಸ್ತೋತ್ರೈರಸ್ತ್ರೇಶ್ವರಸ್ಯ ದ್ಯತು ದುರಿತಶತಂ ದ್ಯೋತಮಾನಾ ದ್ಯುತಿರ್ವಃ .. ೨೪..

ಶಸ್ತ್ರಾಸ್ತ್ರಂ ಶಾತ್ರವಾಣಾಂ ಶಲಭಕುಲಮಿವ ಜ್ವಾಲಯಾ ಲೇಲಿಹಾನಾ
ಘೌಷೈಃ ಸ್ವೈಃ ಕ್ಷೋಭಯನ್ತೀ ವಿಘಟಿತಭಗವದ್ಯೋಗನಿದ್ರಾನ್ಸಮುದ್ರಾನ್ .
ವ್ಯೂಢೋರಃಪ್ರೌಢಚಾರತ್ರುಟಿತಪಟುರಟತ್ಕೀಕಸಕ್ಷುಣ್ಣದೈತ್ಯಾ
ನೇಮಿಃ ಸೌದರ್ಶನೀ ವಃ ಶ್ರಿಯಮತಿಶಯಿನೀಂ ದಾಶತಾಶತಾಬ್ದಮ್ .. ೨೫..

ಧಾರಾ ಚಕ್ರಸ್ಯ ತಾರಾಗಣಕಪಿಶಘೃಣಿದ್ಯೋತಿತದ್ಯುಪ್ರಚಾರಾ
ಪಾರಾವಾರಾಮ್ಬುಪೂರಕ್ವಥನಪಿಶುನಿತೋತ್ತಾಲಪಾತಾಲಯಾತ್ರಾ .
ಗೋತ್ರಾದ್ರಿಸ್ಫೋಟಶಬ್ದಪ್ರಕಟಿತವಸುಧಾಮಣ್ಡಲೀಚಣ್ಡಯಾನಾ
ಪನ್ಥಾನಂ ವಃ ಪ್ರದಿಶ್ಯಾತ್ಪ್ರಶಮನಕುಶಲಾ ಪಾಪ್ಮನಾಮಾತ್ಮನೀನಮ್ .. ೨೬..

ಯಾತ್ರಾ ಯಾ ತ್ರಾತಲೋಕಾ ಪ್ರಕಟಿತವರುಣತ್ರಾಸಮುದ್ರೇ ಸಮುದ್ರೇ
ಸತ್ತ್ವಾಸತ್ತ್ವಾಸಹೋಷ್ಣಾಕೃತಸಗರುದಗಸ್ಪನ್ದದಾನಾ ದದಾನಾ .
ಹಾನಿಂ ಹಾ ನಿನ್ದಿತಾನಾಂ ಜಗತಿ ಪರಿಷದಾಂ ದಾನವೀನಾಂ ನವೀನಾಂ
ಚಕ್ರೇ ಚಕ್ರೇಶನೇಮಿಃ ಶಮಮುಪಹರತು ಸಪ್ರಭಾವಪ್ರಭಾ ವಃ .. ೨೭..

ಯತ್ರಾಮಿತ್ರಾನ್ದಿಧಕ್ಷೌ ಪ್ರವಿಶತಿ ಬಲಿನೋ ಧಾಮ ನಿಃಸೀಮಧಾಮ್ನಿ
ಗ್ರಸ್ತಾಪಸ್ತಾಪಶೀರ್ಣೈಃ ಪ್ರಗುಣಿತಸಿಕತೋ ಮೌಕ್ತಿಕೈಃಶೌಕ್ತಿಕೇಯೈಃ .
ರಾಶಿರ್ವಾರಾಮಪಾರಾಂ ಪ್ರಕಟಯತಿ ಪುನರ್ವೈರಿದಾರಾಶ್ರುಪೂರೈಃ
ವೃದ್ಧಿಂ ನಿರ್ಯಾತಿ ನಿರ್ಯಾಪಯತು ಸ ದುರಿತಾನ್ಯಸ್ತ್ರರಾಜಪ್ರಧಿರ್ವಃ .. ೨೮..

ಕಕ್ಷ್ಯಾತೌಲ್ಯೇನ ಕದ್ರೂತನಯಫಣಮಣೀನ್ಕಲ್ಯದೀಪಸ್ಯ ಯುಞ್ಜನ್
ಪಾತಾಲಾನ್ತಃ ಪ್ರತಾಪೀ ನಿಖಿಲಮಪಿ ತಮಃ ಸ್ವೇನ ಧಾಮ್ನಾ ನಿಗೀರ್ಯ .
ದೈತೇಯಪ್ರೇಯಸೀನಾಂ ವಮತಿ ಹೃದಿ ಹತಪ್ರೇಯಸಾಂ ಭೂಯಸಾಂ ಯ-
ಶ್ಚಕ್ರಾಗ್ರೀಯಾಗ್ರದೇಶೋ ದಹತು ವಿಲಸಿತಂ ಭೂಯಸಾಮಂಹಸಾಂ ವಃ .. ೨೯..

ಕೃಷ್ಣಾಮ್ಭೋದಸ್ಯ ಭೂಷಾ ಕೃತನಯನನಯವ್ಯಾಹತಿರ್ಭಾರ್ಗವಸ್ಯ
ಪ್ರಾಪ್ತಾಮಾವೇದಯನ್ತೀ ಪ್ರತಿಭಟಸುದೃಶಾಮುದ್ಭಟಾಂ ವಾಷ್ಪವೃಷ್ಟಿಮ್ .
ನಿಷ್ಟಪ್ತಾಷ್ಟಾಪದಶ್ರೀಃ ಸಮಮಮರಚಮೂಗರ್ಜಿತೈರುಜ್ಜಿಹಾನಾ
ಕೀರ್ತಿ ವಃ ಕೇತಕೀಭಿಃ ಪ್ರಥಯತು ಸದೃಶೀಂ ಚಞ್ಚಲಾ ಚಕ್ರಧಾರಾ .. ೩೦..

ವಪ್ರಾಣಾಂ ಭೇದಿನೀಂ ಯಃ ಪರಿಣತಿಮಖಿಲಶ್ಲಾಘನೀಯಾಂ ದಧಾನಃ
ಕ್ಷುಣ್ಣಾಂ ನಕ್ಷತ್ರಮಾಲಾಂ ದಿಶಿ ದಿಶಿ ವಿಕಿರನ್ವಿದ್ಯುತಾ ತುಲ್ಯಕಕ್ಷ್ಯಃ .
ನಿರ್ಯಾಣೇನೋತ್ಕಟೇನ ಪ್ರಕಟಯತಿ ನವಂ ದಾನವಾರಿಪ್ರಕರ್ಷಂ
ಚಕ್ರಾಧೀಶಸ್ಯ ಭದ್ರೋ ವಶಯತು ಭವತಾಂ ಸ ಪ್ರಧಿಶ್ಚಿತ್ತವೃತ್ತಿಮ್ .. ೩೧..

ನಾಕೌಕಃ ಶತ್ರುಜತ್ರುತ್ರುಟನವಿಘಟಿತಸ್ಕನ್ಧನೀರನ್ಧ್ರನಿರ್ಯನ್
ನವ್ಯಕ್ರವ್ಯಾಸ್ರಹವ್ಯಗ್ರಸನರಸಲಸಜ್ಜ್ವಾಲಜಿಹ್ವಾಲವಹ್ನಿಮ್ .
ಯಂ ದೃಷ್ಟ್ವಾ ಸಾಂಯುಗೀನಂ ಪುನರಪಿ ವಿದಧತ್ಯಾಶಿಷೋ ವೀರ್ಯವೃದ್ಧ್ಯೈ
ಗೀರ್ವಾಣಾ ನಿರ್ವೃಣಾನಾ ವಿತರತು ಸ ಜಯಂ ವಿಷ್ಣುಹೇತಿಪ್ರಧಿರ್ವಃ .. ೩೨..

ಧನ್ವಾಧ್ವನ್ಯಸ್ಯ ಧಾರಾಸಲಿಲಮಿವ ಧನಂ ದುರ್ಗತಸ್ಯೇವ ದೃಷ್ಟಿ-
ರ್ಜಾತ್ಯನ್ಧಸ್ಯೇವ ಪಙ್ಗೋಃ ಪದವಿಹೃತಿರಿವ ಪ್ರೀಣನೀ ಪ್ರೇಮಭಾಜಾಮ್ .
ಪತ್ಯುರ್ಮಾಯಾಕ್ರಿಯಾಯಾಂ ಪ್ರಕಟಪರಿಣತಿರ್ವಿಶ್ವರಕ್ಷಾಕ್ಷಮಾಯಾಂ
ಮಾಯಾಮಾಯಾಮಿನೀಂ ವಸ್ತ್ರುಟಯತು ಮಹತೀ ನೇಮಿರಸ್ತ್ರೇಶ್ವರಸ್ಯ .. ೩೩..

ತ್ರಾಣಂ ಯಾ ವಿಷ್ಟಪಾನಾಂ ವಿತರತಿ ಚ ಯಯಾ ಕಲ್ಪ್ಯತೇ ಕಾಮಪೂರ್ತಿ-
ರ್ನ ಸ್ಥಾತುಂ ಯತ್ಪುರಸ್ತಾತ್ಪ್ರಭವತಿ ಕಲಯಾಪ್ಯೋಷಧೀನಾಮಧೀಶಃ .
ಉನ್ಮೇಷೋ ಯಾತಿ ಯಸ್ಯಾ ನ ಸಮಯನಿಯತಿಂ ಸಾ ಶ್ರಿಯಂ ವಃ ಪ್ರದೇಯಾ-
ನ್ನ್ಯಕ್ಕೃತ್ಯ ದ್ಯೋತಮಾನಾ ತ್ರಿಪುರಹರದೃಶಂ ನೇಮಿರಸ್ತ್ರೇಶ್ವರಸ್ಯ .. ೩೪..

ನಕ್ಷತ್ರಕ್ಷೋದಭೂತಿಪ್ರಕರವಿಕಿರಣಶ್ವೇತಿತಾಶಾವಕಾಶಾ
ಜೀರ್ಣೈಃ ಪರ್ಣೈರಿವ ದ್ಯಾಂ ಜಲಧರಪಟಲೈಶ್ಚೂರ್ಣಿತೈರೂರ್ಣುವಾನಾ .
ಆಜಾವಾಜಾನವಾಜಾನತರಿಪುಜನತಾರಣ್ಯಮಾವರ್ತಮಾನಾ
ನೇಮಿರ್ವಾತ್ಯೇವ ಚಾಕ್ರೀ ಪ್ರಣುದತು ಭವತಾಂ ಸಂಹತಂ ಪಾಪತೂಲಮ್ .. ೩೫..

ಕ್ಷಿಪ್ತ್ವಾ ನೇಪಥ್ಯಶಾಟೀಮಿವ ಜಲದಘಟಾಂ ಜಿಷ್ಣುಕೋದಣ್ಡಚಿತ್ರಾಂ
ತಾರಾಪುಞ್ಜಂ ಪ್ರಸೂನಾಞ್ಜಲಿಮಿವ ವಿಪುಲೇ ವ್ಯೋಮರಙ್ಗೇ ವಿಕೀರ್ಯ .
ನಿರ್ವೇದಗ್ಲಾನಿಚಿನ್ತಾಪ್ರಭೃತಿಪರವಶಾನನ್ತರಾ ದಾನವೇನ್ದ್ರಾನ್
ನೃತ್ಯನ್ನಾನಾಲಯಾಢ್ಯಂ ನಟ ಇವ ತನುತಾಂ ಶರ್ಮ ಚಕ್ರಪ್ರಧಿರ್ವಃ .. ೩೬..

ದೌರ್ಗತ್ಯಪ್ರೌಢತಾಪಪ್ರತಿಭಟವಿಭವಾ ವಿತ್ತಧಾರಾಃಸೃಜನ್ತೀ
ಗರ್ಜನ್ತೀ ಚೀತ್ಕ್ರಿಯಾಭಿರ್ಜ್ವಲದನಲಶಿಖೋದ್ದಾಮಸೌದಾಮನೀಕಾ .
ಅವ್ಯಾತ್ಕ್ರವ್ಯಾದ್ವಧೂಟೀನಯನಜಲಭರೈರ್ದಿಕ್ಷು ನವ್ಯಾನನಾವ್ಯಾನ್
ಪುಷ್ಯನ್ತೀ ಸಿನ್ಧುಪೂರಾನ್ ರಥಚರಣಪತೇರ್ನೇಮಿಕಾದಮ್ಬಿನೀ ವಃ .. ೩೭..

ಸನ್ದೋಹಂ ದಾನವಾನಾಮಜಸಮಜಮಿವಾಲಭ್ಯ ಜಾಜ್ವಲ್ಯಮಾನೇ
ವಹ್ನಾವಹ್ನಾಯ ಜುಹ್ವತ್ತ್ರಿದಶಪರಿಷದೇ ಸ್ವಸ್ವಭಾಗಪ್ರದಾಯೀ .
ಸ್ತೋತ್ರೈರ್ಬಹ್ಮಾದಿಗೀತೈರ್ಮುಖರಪರಿಸರಂ ಶ್ಲಾಘ್ಯಶಸ್ತ್ರಪ್ರಯೋಗಂ
ಪ್ರಾಪ್ತಃ ಸಙ್ಗ್ರಾಮಸತ್ರಂ ಪ್ರಧಿರಸುರರಿಪೋಃ ಪ್ರಾರ್ಥಿತಂ ಪ್ರಸ್ನುತಾಂ ವಃ .. ೩೮..

ಉತ್ಪಾತಾಲಾತಕಲ್ಪಾನ್ಯಸುರಪರಿಷದಾಮಾಹವಪ್ರಾರ್ಥಿನೀನಾ-
ಮಧ್ವಾನಧ್ವಾವವೋಧಕ್ಷಪಣಚಣತಮಃ ಕ್ಷೇಪದೀಪೋಪಮಾನಿ .
ತ್ರೈಲೋಕ್ಯಾಗಾರಭಾರೋದ್ವಹನಸಹಮಣಿಸ್ತಮ್ಭಸಮ್ಪತ್ಸಖಾನಿ
ತ್ರಾಯನ್ತಾಮನ್ತಿಮಾಯಾಂ ವಿಪದಿ ಸಪದಿ ವೋಽರಾಣಿ ಸೌದರ್ಶನಾನಿ .. ೩೯..

ಜ್ವಾಲಾಜಾಲಪ್ರವಾಲಸ್ತಬಕಿತಶಿರಸೋ ನಾಭಿಮಾವಾಲಯನ್ತ್ಯಃ
ಸಿಕ್ತಾ ರಕ್ತಾಮ್ಬುಪೂರೈಃ ಶಕಲಿತವಪುಷಾಂ ಶಾತ್ರವಾನೀಕಿನೀನಾಮ್ .
ಚಕ್ರಾಕ್ರೀಡಪ್ರರೂಢಾಭುಜಗಶಯಭುಜೋಪಘ್ನನಿಘ್ನಪ್ರಚಾರಾಃ
ಪುಷ್ಪ್ಯನ್ತ್ಯಃಕೀರ್ತಿಪುಷ್ಪಾಣ್ಯರಕನಕಲತಾಃ ಪ್ರೀತಯೇ ವಃ ಪ್ರಥನ್ತಾಮ್ .. ೪೦..

ಜ್ವಾಲಾಜಾಲಾಬ್ಧಿಮುದ್ರಂ ಕ್ಷ್ತೀವಲಯಮಿವಾಬಿಭ್ರತೀ ನೇಮಿಚಕ್ರಂ
ನಾಗೇನ್ದ್ರಸ್ಯೇವ ನಾಭೇಃ ಫಣಪರಿಷದಿವ ಪ್ರೌಢರತ್ನಪ್ರಕಾಶಾ .
ದತ್ತಾಂ ವೋ ದಿವ್ಯಹೇತೇರ್ಮತಿಮರವಿತತಿಃ ಖ್ಯಾತಸಾಹಸ್ರಸಙ್ಖ್ಯಾ
ಸಙ್ಖ್ಯಾವತ್ಸಙ್ಘಚಿತ್ತಶ್ರವಣಹರಗುಣಸ್ಯನ್ದಿಸನ್ದರ್ಭಗರ್ಭಾಮ್ .. ೪೧..

ಬ್ರಹ್ಮೇಶೋಪಕ್ರಮಾಣಾಂ ಬಹುವಿಧವಿಮತಕ್ಷೋದಸಮ್ಮೋದಿತಾನಾಂ
ಸೇವಾಯೈ ದೇವತಾನಾಂ ದನುಜಕುಲರಿಪೋಃ ಪಿಣ್ಡಿಕಾದ್ಯಙ್ಗಭಾಜಾಮ್ .
ತತ್ತದ್ಧಾಮಾನ್ತಸೀಮಾವಿಭಜನವಿಧಯೇ ಮಾನದಣ್ಡಾಯಮಾನಾ
ಭೂಮಾನಂ ಭೂಯಸಾ ವೋ ದಿಶತು ದಶಶತೀ ಭಾಸ್ವರಾಣಾಮರಾಣಾಮ್ .. ೪೨..

ಜ್ವಾಲಾಕಲ್ಲೋಲಮಾಲಾನಿಬಿಡಪರಿಸರಾಂ ನೇಮಿವೇಲಾಂ ದಧಾನೇ
ಪೂರ್ವೇಣಾಕ್ರಾನ್ತಮಧ್ಯೇ ಭುವನಮಯಹವಿರ್ಭೋಜಿನಾ ಪೂರುಷೇಣ .
ಪ್ರಸ್ಫೂರ್ಜತ್ಪ್ರಾಜ್ಯರತ್ನೇ ರಥಪದಜಲಧಾವೇಧಮಾನೈಃ ಸ್ಫುಲಿಙ್ಗೈಃ
ಭದ್ರಂ ವೋ ವಿದ್ರುಮಾಣಾಂ ಶ್ರಿಯಮರವಿತತಿರ್ವಿಸ್ತೃಣಾನಾ ವಿಧತ್ತಾಮ್ .. ೪೩..

ನಾಸೀರಸ್ವೈರಭಗ್ನಪ್ರತಿಭಟರುಧಿರಾಸಾರಧಾರಾವಸೇಕಾ-
ನೇಕಾನ್ತಸ್ಮೇರಪದ್ಮಪ್ರಕರಸಹಚರಚ್ಛಾಯಯಾ ಪ್ರಾಪ್ಯ ನಾಭ್ಯಾ .
ಮುಕ್ತಾನೀವಾಙ್ಕುರಾಣಿ ಸ್ಫುರದನಲಶಿಖಾದರ್ಶಿತಪ್ರಾಕ್ಪ್ರವಾಲಾ-
ನ್ಯವ್ಯಾಘಾತೇನ ಭವ್ಯಂ ಪ್ರದದತು ಭವತಾಂ ದಿವ್ಯಹೇತೇರರಾಣಿ .. ೪೪..

ದಾವೋಲ್ಕಾಮಣ್ಡಲೀವ ದ್ರುಮಗಣಗಹನೇ ಬಾಡವಸ್ಯೇವ ವಹ್ನೇ-
ರ್ಜ್ವಾಲಾವೃದ್ಧಿರ್ಮಹಾಬ್ಧೌ ಪ್ರವಯಸಿ ತಮಸಿ ಪ್ರಾತರರ್ಕಪ್ರಭೇವ .
ಚಕ್ರೇ ಯಾ ದಾನವಾನಾಂ ಹಯಕರಟಿಘಟಾಸಙ್ಕಟೇ ಜಾಘಟೀತಿ
ಪ್ರಾಜ್ಯಂ ಸಾ ವಃ ಪ್ರೇದೇಯಾತ್ಪದಮರಪರಿಷತ್ಪದ್ಮನಾಭಾಯುಧಸ್ಯ .. ೪೫..

ತಾಪಾದ್ದೈತ್ಯಪ್ರತಾಪಾತಪಸಮುಚಿತಾತ್ತ್ರಾಯಮಾಣಂ ತ್ರಿಲೋಕೀಂ
ಲೋಲೈರ್ಜ್ವಾಲಾಕಲಾಪೈಃ ಪ್ರಕಟಯದಭಿತಶ್ಚೀನಪಟ್ಟಾಞ್ಚಲಾನಿ .
ಛತ್ರಾಕಾರಂ ಶಲಾಕಾ ಇವ ಕನಕಕೃತಾಃ ಶೌರಿದೋರ್ದಣ್ಡಲಗ್ನಂ
ಭೂಯಾಸುರ್ಭೂಷಯನ್ತ್ಯೋ ರಥಚರಣಮರಸ್ಫೂರ್ತಯಃಕೀರ್ತಯೇ ವಃ .. ೪೬..

ನಾಭೀಶಾಲಾನಿಖಾತಾಂ ನಹನಸಮುಚಿತಾಂ ವೈರಿಲಕ್ಷ್ಮೀವಶಾನಾಂ
ಸಂಯದ್ವಾರೀಹೃತಾನಾಂ ಸಮನುವಿದಧತೀ ಕಾಞ್ಚನಾಲಾನಪಙ್ಕ್ತಿಮ್ .
ರಾಜ್ಯಾ ಚ ಪ್ರಾಜ್ಯದೈತ್ಯವ್ರಜವಿಜಯಮಹೋತ್ತಮ್ಭಿತಾನಾಂ ಭುಜಾನಾಂ
ತುಲ್ಯಾ ಚಕ್ರಾರಮಾಲಾ ತುಲಯತು ಭವತಾಂ ತೂಲವಚ್ಛತ್ರುಲೋಕಮ್ .. ೪೭..

ಆನೇಮೇಶ್ಚಕ್ರವಾಲಾತ್ತ್ವಿಷ ಇವ ವಿತತಾಃಪಿಣ್ಡಿಕಾಚಣ್ಡದೀಪ್ತೇ-
ರ್ದೀಪ್ತಾ ದೀಪಾ ಇವಾರಾದ್ಗಹನರಣತಮೀಗಾಹಿನಃ ಪೂರುಷಸ್ಯ .
ಶಾಣೇ ರೇಖಾಯಿತಾನಾಂ ರಥಚರಣಮಯೇ ಶತ್ರುಶೌಣ್ಡೀರ್ಯಹೇಮ್ನಾಂ
ರೇಖಾಃ ಪ್ರತ್ಯಗ್ರಲಗ್ನಾ ಇವ ಭುವನಮರಶ್ರೇಯಣಃ ಪ್ರೀಣಯನ್ತು .. ೪೮..

ದೀಪ್ತೈರರ್ಚಿಃಪ್ರರೋಹೈರ್ದಲವತಿ ವಿಧೃತೇ ಬಾಹುನಾಲೇನವಿಷ್ಣೋ-
ರುದ್ಯತ್ಪ್ರದ್ಯೋತನಾಭಮ್ಪ್ರಥಯತಿ ಪುರುಷಂ ಕರ್ಣಿಕಾವರ್ಣಿಕಾಯಾಮ್ .
ಚೂಡಾಲಂ ವೇದಮೌಲಿಂ ಕಲಯತಿ ಕಮಲೇ ಚಕ್ರನಾಮ್ನೋಪಲಕ್ಷ್ಯೇ
ಲಕ್ಷ್ಮೀಂ ಸ್ಫಾರಾಮರಾಣಿ ಪ್ರತಿವಿದಧತು ವಃ ಕೇಸರಶ್ರೀಕರಾಣಿ .. ೪೯..

ಧಾತುಸ್ಯನ್ದೈರಮನ್ದೈಃ ಕಲುಷಿತವಪುಷೋ ನಿರ್ಝರಾಮ್ಭಃಪ್ರಪಾತಾ-
ನರ್ಚಿಷ್ಮತ್ಯಾ ಸ್ವಮೂರ್ತ್ಯಾ ರಥಚರಣಗಿರೇರ್ನೇಮಿನಾಭೀತಟಸ್ಯ .
ವ್ಯಾಕುರ್ವಾಣಾರಪಙ್ಕ್ತಿರ್ವಿತರತು ವಿಭುತಾವಿಸ್ತೃತಿಂ ವಿತ್ತಕೋಟೀ-
ಕೋಟೀರಚ್ಛತ್ರಪೀಠೀಕಟಕಕರಿಘಟಾಚಾಮರಸ್ರಗ್ವಿಣೀಂ ವಃ .. ೫೦..

ಐಕ್ಯೇನ ದ್ವಾದಶಾನಾಮಶಿಶಿರಮಹಸಾಂ ದರ್ಶಯನ್ತೀ ಪ್ರವೃತ್ತಿಂ
ದತ್ತಃ ಸ್ವರ್ಲೋಕಲಕ್ಷ್ಮ್ಯಾಸ್ತಿಲಕ ಇವ ಮುಖೇ ಪದ್ಮರಾಗದ್ರವೇಣ .
ದೇಯಾದ್ದೈತೇಯದರ್ಪಕ್ಷತಿಕರಣರಣಪ್ರೀಣಿತಾಮ್ಭೋಜನಾಭಿ-
ರ್ನಾಭಿರ್ನಾಭಿತ್ವಮುರ್ವ್ಯಾಸ್ಸುರಪತಿವಿಭವಸ್ಪರ್ಶಿ ಸೌದರ್ಶನೀ ವಃ .. ೫೧..

ಶಸ್ತ್ರಶ್ಯಾಮೇ ಶತಾಙ್ಗಕ್ಷಿತಿಭೃತಿ ತರಲೈರುತ್ತರಙ್ಗೇ ತುರಙ್ಗೈ-
ಸ್ತ್ವಙ್ಗನ್ಮಾತಙ್ಗನಕ್ರೇ ಕುಪಿತಭಟಮುಖಚ್ಛಾಯಮುಗ್ಧಪ್ರವಾಲೇ .
ಅಸ್ತೋಕಂ ಪ್ರಸ್ನುವಾನಾ ಪ್ರತಿಭಟಜಲಧೌ ಪಾಟವಂ ವಾಡವಸ್ಯ
ಶ್ರೇಯೋ ವಸ್ಸಂವಿಧತ್ತಾಂ ಶ್ರಿತದುರಿತಹರಾ ಶ್ರೀಧರಾಸ್ತ್ರಸ್ಯ ನಾಭಿಃ .. ೫೨..

ಜ್ವಾಲಾಚೂಡಾಲಕಾಲಾನಲಚಲನಸಮಾಡಮ್ಬರಾ ಸಾಮ್ಪರಾಯಂ
ಯಾಸಾವಾಸಾದ್ಯ ಮಾದ್ಯತ್ಸುರಸುಭಟಭುಜಾಸ್ಫೋಟಕೋಲಾಹಲಾಢ್ಯಮ್ .
ದೈತ್ಯಾರಣ್ಯಂ ದಹನ್ತೀ ವಿರಚಯತಿ ಯಶೋಭೂತಿಶುಭ್ರಾಂ ಧರಿತ್ರೀಂ
ಸಾ ವಶ್ಚಕ್ರಸ್ಯ ನಕ್ರಸ್ಯದಮೃದಿತಗಜತ್ರಾಯಿಣೀ ನಾಭಿರವ್ಯಾತ್ .. ೫೩..

ವಿನ್ದನ್ತೀ ಸಾನ್ಧ್ಯಮರ್ಚಿರ್ವಿದಲಿತವಪುಷಃಪ್ರತ್ಯನೀಕಸ್ಯ ರಕ್ತೈಃ
ಸ್ಫಾಯನ್ನಕ್ಷತ್ರರಾಶಿರ್ದಿಶಿ ದಿಶಿ ಕಣಶಃ ಕೀಕಸೈಃ ಕೀರ್ಯಮಾಣೈಃ .
ನಾಕೌಕಃಪಕ್ಷ್ಮಲಾಕ್ಷೀನವಮದಹಸಿತಚ್ಛಾಯಯಾ ಚನ್ದ್ರಪಾದಾನ್
ರಾಥಾಙ್ಗೀ ವಿಸ್ತೃಣಾನಾ ರಚಯತು ಕುಶಲಂ ಪಿಣ್ಡಿಕಾಯಾಮಿನೀ ವಃ .. ೫೪..

ನಿಃಸೀಮಂ ನಿಸ್ಸೃತಾಯಾ ಭುಜಧರಣಿಧರಾಘಾಟತಃಕೈಟಭಾರೇ-
ರಾಶಾಕೂಲಙ್ಕಷರ್ದ್ಧೇರಹಿತಬಲಮಹಾಮ್ಭೋಧಿಮಾಸಾದಯನ್ತ್ಯಾಃ .
ಚಕ್ರಜ್ವಾಲಾಪಗಾಯಾಶ್ಚಲದರಲಹರೀಮಾಲಿಕಾದನ್ತುರಾಯಾಃ
ಬಿಭ್ರತ್ಯಾವರ್ತಭಾವಂ ಭ್ರಮಯತು ಭುವನೇ ಪಿಣ್ಡಿಕಾ ವಃ ಪ್ರಶಸ್ತಿಮ್ .. ೫೫..

ಪಾಣೌ ಕೃತ್ವಾಹವಾಗ್ರೇ ಪ್ರತಿಭಟವಿಜಯೋಪಾರ್ಜಿತಾಂ ವೀರಲಕ್ಷ್ಮೀ-
ಮಾನೀತಾಯಾಸ್ತತೋಽಸ್ಯಾಃ ಸ್ವಸವಿಧಮಸುರದ್ವೇಷಿಣಾ ಪೂರುಷೇಣ .
ಪ್ರಾಸಾದಂ ವಾಸಹೇತೋರ್ವಿರಚಿತಮರುಣೈ ರಶ್ಮಿಭಿಃ ಸೂಚಯನ್ತೀ
ನಾಭಿರ್ವೋ ನಿರ್ಮಿಮೀತಾಂ ರಥಚರಣಪತೇರ್ನಿವೃತಿಂ ನಿರ್ವಿಘಾತಾಮ್ .. ೫೬..

ಡಿಣ್ಡೀರಾಪಾಣ್ಡುಗಣ್ಡಿರರಿಯುವತಿಮುಖೈಃ ಪಿಣ್ಡಿಕಾ ಕೃಷ್ಣಹೇತೇ-
ರುಚ್ಚಣ್ಡಾಶ್ರುಪ್ರವರ್ಷೈರುಪರತತಿಲಕೈರುಕ್ತಶೌಣ್ಡೀರ್ಯಚರ್ಯಾ .
ದ್ವಿತ್ರಗ್ರಾಮಾಧಿಪತ್ಯದ್ರುಹಿಣಮದಮಷೀದೂಷಿತಾಕ್ಷಕ್ಷಮಾಭೃತ್
ಸೇವಾಹೇವಾಕಪಾಕಂ ಶಮಯತು ಭವತಾಂ ಕರ್ಮ ಶರ್ಮಪ್ರತೀಪಮ್ .. ೫೭..

ಪರ್ಯಾಪ್ತಾಮುನ್ನತಿಂ ಯಾ ಪ್ರಥಯತಿ ಕಮಲಂ ಯಾ ತಿರೋಭಾವ್ಯ ಭಾತಿ
ಸ್ರಷ್ಟುಸ್ಸೃಷ್ಟೇರ್ದವೀಯಃ ಕುವಲಯಮಹಿತಂ ಯಾ ಬಿಭರ್ತಿ ಸ್ವರೂಪಮ್ .
ಭೂಮ್ನಾ ಸ್ವೇನಾನ್ತರಿಕ್ಷಂ ಕಬಲಯತಿ ಚ ಯಾ ಸಾ ವಿಚಿತ್ರಾ ವಿಧತ್ತಾಂ
ದೈತೇಯಾರಾತಿನಾಭಿರ್ದ್ರವಿಣಪತಿಪದದ್ರೋಹಿಣೀಂ ಸಮ್ಪದಂ ವಃ .. ೫೮..

ವಾಣೀವಾಙ್ಗೈಶ್ಚತುರ್ಭಿಃ ಸದಸಿ ಸುಮನಸಾಂ ದ್ಯೋತಮಾನಸ್ವರೂಪಾ
ಬಾಹ್ವನ್ತಃಸ್ಥಾ ಮುರಾರೇರಭಿಮತಮಖಿಲಂ ಶ್ರೀರಿವ ಸ್ಪರ್ಶಯನ್ತೀ .
ದುರ್ಗೇವೋಗ್ರಾಕೃತಿರ್ಯಾ ತ್ರಿಭುವನಜನನಸ್ಥೇಮಸಂಹಾರಧುರ್ಯಾ
ಮರ್ಯಾದಾಲಙ್ಘನಂ ವಃ ಕ್ಷಪಯತು ಮಹತೀ ಹೇತಿವರ್ಯಸ್ಯ ನಾಭಿಃ .. ೫೯..

ಸ್ರಗ್ಭಿಃ ಸನ್ತಾನಜಾಭಿರ್ಮಧುರಮಧುರಸಸ್ಯನ್ದಸನ್ದೋಹಿನೀಭಿಃ
ಪಾಟೀರೈಃ ಪ್ರೌಢಚನ್ದ್ರಾತಪಚಯಸುಷಮಾಲೋಪನೈರ್ಲೇಪನೈಶ್ಚ .
ಧೂಪೈಃ ಕಾಲಾಗರೂಣಾಮಪಿ ಸುರಸುದೃಶೋ ವಿಸ್ರಮರ್ಚಾಸು ಯಸ್ಯಾಃ
ಗನ್ಧಂ ರುನ್ಧನ್ತಿ ಸಾ ವಶ್ಚಿರಮಸುರಭಿದೋ ನಾಭಿರವ್ಯಾದಭವ್ಯಾತ್ .. ೬೦..

ಅಂಹಸ್ಸಂಹೃತ್ಯ ದಗ್ಧ್ವಾ ಪ್ರೀತಿಜನಿಜನಿತಂ ಪ್ರೌಢಸಂಸಾರವನ್ಯಾ
ದೂರಾಧ್ವನ್ಯಾನಧನ್ಯಾನ್ಮಹತಿ ವಿನತಿಭಿರ್ಧಾಮನಿ ಸ್ಥಾಪಯನ್ತೀ .
ವಿಶ್ರಾನ್ತಿಂ ಶಾಶ್ವತೀಂ ಯಾ ನಯತಿ ರಮಯತಾಂ ಚಕ್ರರಾಜಸ್ಯ ನಾಭಿಃ
ಸಂಯನ್ಮೋಮುಹ್ಯಮಾನತ್ರಿದಶರಿಪುದಶಾಸಾಕ್ಷಿಣೀ ಸಾಽಕ್ಷಿಣೀ ವಃ .. ೬೧..

ಅಥಾಕ್ಷವರ್ಣನಮ್
ಶ್ರುತ್ವಾ ಯನ್ನಾಮ ಶಬ್ದಂ ಶ್ರುತಿಪಥಕಟುಕಂ ದೇವನಕ್ರಡನೇಷು
ಸ್ವರ್ವೈರಿಸ್ವೈರವತ್ಯೋ ಭಯವಿವಶಧಿಯಃ ಕಾತರನ್ಯಸ್ತಶಾರಾಃ .
ಮನ್ದಾಕ್ಷಂ ಯಾನ್ತ್ಯಮನ್ದಂ ಪ್ರತಿಯುವತಿಮುಖೈರ್ದರ್ಶಿತೋತ್ಪ್ರಾಸದರ್ಪೈ-
ರಕ್ಷಂ ಸೌದರ್ಶನಂ ತತ್ಕ್ಷಪಯತು ಭವತಾಮೇಧಮಾನಾಂ ಧನಾಯಾಮ್ .. ೬೨..

ವ್ಯಸ್ತಸ್ಕನ್ಧಂ ವಿಶೀರ್ಣಪ್ರಸವಪರಿಕರಂ ಪ್ರತ್ತಪತ್ರೋಪಮರ್ದಂ
ಸಂಯದ್ವರ್ಷಾಸು ತರ್ಷಾತುರಖಗಪರಿಷತ್ಪೀತರಕ್ತೋದಕಾಸು .
ಅಕ್ಷಂ ರಕ್ಷಸ್ತರೂಣಾಮಶನಿವದಶನೈರಾಪತನ್ಮೂರ್ಧ್ನಿ-ಮೂರ್ಧ್ನಿ
ಸ್ತಾದಸ್ತ್ರಾಧೀಶಿತುರ್ವಃ ಸ್ತಬಕಿತಯಶಸೇ ದ್ವೇಷಿಣಾಂ ಪ್ಲೋಷಣಾಯ .. ೬೩..

ದೀಕ್ಷಾಂ ಸಙ್ಗಾಮಸತ್ರೇ ಮಹತಿ ಕೃತವತೋ ದೀಪ್ತಿಭಿಸ್ಸಂಹತಾಭಿಃ
ಜಿಹ್ವಾಲೇ ಸಪ್ತಜಿಹ್ವೇ ದನುಜಕುಲಹವಿರ್ಜುಹ್ವತೋ ನೇಮಿಜುಹ್ವಾ .
ವೈಕುಣ್ಠಾಸ್ತ್ರಸ್ಯ ಕುಣ್ಡಂ ಮಹದಿವ ವಿಲಸತ್ಪಿಣ್ಡಿಕಾವೇದಿಮಧ್ಯೇ
ದಿಶ್ಯಾದ್ದಿವ್ಯರ್ದ್ಧಿದೇಶ್ಯಂ ಪದಮಿಹ ಭವತಾಮಕ್ಷತೋನ್ಮೇಷಮಕ್ಷಮ್ .. ೬೪..

ತುಙ್ಗಾದ್ದೋರದ್ರಿಶೃಙ್ಗಾದ್ದನುಜವಿಜಯಿನಃ ಸ್ಪಷ್ಟದಾನೋದ್ಯಮಾನಾಂ
ಶತ್ರುಸ್ತಮ್ಬೇರಮಾಣಂ ಶಿರಸಿ ನಿಪತತಃ ಸ್ರಸ್ತಮುಕ್ತಾಸ್ಥಿಪುಞ್ಜೇ .
ರಕ್ತೈರಭ್ಯಕ್ತಮೂರ್ತೇರ್ವಿದಲನಗಲಿತೈರ್ವ್ಯಕ್ತವೀರಾಯಿತರ್ದ್ಧೇ-
ರ್ಹರ್ಯಕ್ಷಸ್ಯಾರಿಭಙ್ಗಂ ಜನಯತು ಜಗತಾಮೀಡಿತಂ ಕ್ರೀಡಿತಂ ವಃ .. ೬೫..

ಉನ್ಮೀಲತ್ಪದ್ಮರಾಗಂ ಕಟಕಮಿವ ಧೃತಂ ಬಾಹುನಾ ಯನ್ಮುರಾರೇ-
ರ್ದೀಪ್ತಾನ್ ರಶ್ಮೀನ್ದಧಾನಂ ನಯನಮಿವ ಯದುತ್ತಾರಕಂ ವಿಷ್ಟಪಸ್ಯ .
ಚಕ್ರೇಶಾರ್ಕಸ್ಯ ಯದ್ವಾಪರಿಧಿರಭಿದಧದ್ದೈತ್ಯಹತ್ಯಾಮಿವ ದ್ರಾ-
ಗಕ್ಷಂ ಪಕ್ಷೇ ಪತಿತ್ವಾ ಪರಿಘಟಯತು ವಸ್ತದ್ದ್ರಢಿಷ್ಠಾಂ ಪ್ರತಿಷ್ಠಾಮ್ .. ೬೬..

ಕ್ರೀಡತ್ಪ್ರಾಕ್ಕ್ರೋಡದಂಷ್ಟ್ರಾಹತಿದಲಿತಹಿರಣ್ಯಾಕ್ಷವಕ್ಷಃಕವಾಟ-
ಪ್ರಾದುರ್ಭೂತಪ್ರಭೂತಕ್ಷತಜಸಮುದಿತಾರುಣ್ಯಮುದ್ರಂ ಸಮುದ್ರಮ್ ..

ಉನ್ಮೀಲತ್ಕಿಂಶುಕಾಭೈರುಪಹಸದಮಿತೈರಂಶುಭಿಃ ಸಂಶಯಘ್ನೀ-
ಮಕ್ಷಂ ಚಕ್ರಸ್ಯ ದತ್ತಾಮಘಶತಶಮನಂ ದಾಶುಷೀಂ ಶೇಮುಷೀಂ ವಃ .. ೬೭..

ಪದ್ಮೋಲ್ಲಾಸಪ್ರದಂ ಯಜ್ಜನಯತಿ ಜಗತೀಮೇಧಮಾನಪ್ರಬೋಧಾಂ
ಯಸ್ಯಚ್ಛಾಯಾಸಮಾನಾ ಲಸತಿ ಪರಿಸರೇ ರೋಹಿಣೀ ತಾರಕಾಗ್ರ್ಯಾ .
ನಾನಾಹೇತ್ಯುನ್ನತತ್ತ್ವಂ ಪ್ರಕಟಯತಿ ಚ ಯತ್ಪ್ರಾಪ್ತಕೃಷ್ಣಪ್ರಯಾಣಂ
ತ್ರೇಧಾ ಭಿನ್ನಸ್ಯ ಧಾಮ್ನಸ್ಸಮುದಯ ಇವ ತತ್ಪಾತು ವಶ್ಚಾಕ್ರಮಕ್ಷಮ್ .. ೬೮..

ಶೋಚಿರ್ಭಿಃ ಪದ್ಮರಾಗದ್ರವಸಮಸುಷಮೈಶ್ಶೋಭಮಾನಾವಕಾಶಂ
ಪ್ರತ್ಯಗ್ರಾಶೋಕರಾಗಪ್ರತಿಭಟವಪುಷಾ ಭೂಷಿತಂ ಪೂರುಷೇಣ .
ಅನ್ತಃ ಸ್ವಚ್ಛನ್ದಮಗ್ನೋತ್ಥಿತಭೃಗುತನಯಂ ಕ್ಷತ್ರಿಯಾಣಾಂ ಕ್ಷತಾನಾ-
ಮಾರಬ್ಧಂ ಶೋಣಿತೌಘೈಸ್ಸರ ಇವ ಭವತೋ ದಿವ್ಯಹೇತ್ಯಕ್ಷಮವ್ಯಾತ್ .. ೬೯..

ಮತ್ತಾನಾಮಿನ್ದ್ರಿಯಾಣಾಂ ಕೃತವಿಷಯಮಹಾಕಾನನಕ್ರೀಡನಾನಾಂ
ಸೃಷ್ಟಂ ಚಕ್ರೇಶ್ವರೇಣ ಗ್ರಹಣಧಿಷಣಯಾ ವಾರಿವದ್ವಾರಣಾನಾಮ್ .
ಗಮ್ಭೀರಂ ಯನ್ತ್ರಗರ್ತಂ ಕಮಪಿ ಕೃತಧಿಯೋ ಮನ್ವತೇ ಯತ್ಪ್ರದೇಯಾ-
ದಸ್ಥೂಲಾಂ ಸಂವಿದಂ ವಸ್ತ್ರಿಜಗದಭಿಮತಸ್ಥೂಲಲಕ್ಷಂ ತದಕ್ಷಮ್ .. ೭೦..

ಪ್ರಣಾದೀನ್ಸನ್ನಿಯಮ್ಯ ಪ್ರಣಿಹಿತಮನಸಾಂ ಯೋಗಿನಾಮನ್ತರಙ್ಗೇ
ತುಙ್ಗಂ ಸಙ್ಕೋಚ್ಯ ರೂಪಂ ವಿರಚಿತದಹರಾಕಾಶಕೃಚ್ಛ್ರಾಸಿಕೇನ .
ಪ್ರಾಪ್ತಂ ಯತ್ಪೂರುಷೇಣ ಸ್ವಮಹಿಮಸದೃಶಂ ಧಾಮ ಕಾಮಪ್ರದಂ ವೋ
ಭೂಯಾಭೂರ್ಭುವಸ್ಸ್ವಸ್ತ್ರಯವರಿವಸಿತಂ ಪುಷ್ಕರಾಕ್ಷಾಯುಧಾಕ್ಷಮ್ .. ೭೧..

ವಿದ್ಧಾನ್ವೀಧ್ರೇಣ ಧಾಮ್ನಾ ಚರಣನಖಭುವಾ ಬದ್ಧವಾಸಸ್ಯ ಮಧ್ಯೇ
ಚಕ್ರಾಧ್ಯಕ್ಷಸ್ಯ ಬಿಭ್ರತ್ಪರಿಹಸಿತಜಪಾಪುಷ್ಪಕೋಶಾನ್ಪ್ರಕಾಶಾನ್ .
ಶುಭ್ರೈರಭ್ರೈರದಭ್ರೈಶ್ಶರದಿ ತತ ಇತೋ ವ್ಯೋಮ ವಿಭ್ರಾಜಮಾನಂ
ಪ್ರಾತಸ್ತ್ಯಾದಿತ್ಯರೋಚಿಸ್ತತಮಿವ ಭವತಃ ಪಾತು ರಾಥಾಙ್ಗಮಕ್ಷಮ್ .. ೭೨..

ಶ್ರೀವಾಣೀವಾಙ್ಮೃಡಾನ್ಯೋ ವಿದಧತಿ ಭಜನಂ ಶಕ್ತಯೋ ಯಸ್ಯ ದಿಕ್ಷು
ಪ್ರಾಹ ವ್ಯೂಹಂ ಯದಾದ್ಯಂ ಪ್ರಥಮಮಪಿ ಗುಣಂ ಭಾರತೀ ಪಾಞ್ಚರಾತ್ರೀ .
ಘೋರಾಂ ಶಾನ್ತಾಂ ಚ ಮೂರ್ತಿಂ ಪ್ರಥಯತಿ ಪುರುಷಃ ಪ್ರಾಕ್ತನಃ ಪ್ರಾರ್ಥನಾಭಿ-
ರ್ಭಕ್ತಾನಾಂ ಯಸ್ಯ ಮಧ್ಯೇ ದಿಶತು ತದನಘಾಮಕ್ಷಮಧ್ಯಕ್ಷತಾಂ ವಃ .. ೭೩..

ರಕ್ಷಃಪಕ್ಷೇಣ ರಕ್ಷತ್ಕ್ಷತಮಮರಗಣಂ ಲಕ್ಷ್ಯವೈಲಕ್ಷ್ಯಮಾಜೌ
ಲಕ್ಷ್ಮೀಮಕ್ಷೀಯಮಾಣಾಂ ಬಲಮಥನಭುಜೇ ವಜ್ರಶಿಕ್ಷಾನಪೇಕ್ಷೇ .
ನಿಕ್ಷಿಪ್ಯ ಕ್ಷಿಪ್ರಮಧ್ಯಕ್ಷಯತಿ ಜಗತಿ ಯದ್ದಕ್ಷತಾಂ ದಿವ್ಯಹೇತೇ-
ರಕ್ಷಾಮಾಮಕ್ಷಮಾಂ ತಾಂ ಕ್ಷಪಯತು ಭವತಾಮಕ್ಷಜಿಲ್ಲಕ್ಷ್ಯಮಕ್ಷಮ್ .. ೭೪..

.. ಇತ್ಯಕ್ಷವರ್ಣನಮ್ ..

ಅಥಸುದರ್ಶನಪುರುಷವರ್ಣನಮ್
ಜ್ಯೋತಿಶ್ಚೂಡಾಲಮೌಲಿಸ್ತ್ರಿನಯನವದನಃ ಷೋಡಶೋತ್ತುಙ್ಗಬಾಹುಃ
ಪ್ರತ್ಯಾಲೀಢೇನ ತಿಷ್ಠನ್ಪ್ರಣವಶಶಧರಾಧಾರಷಟ್ಕೋಣವರ್ತೀ .
ನಿಸ್ಸೀಮೇನ ಸ್ವಧಾಮ್ನಾ ನಿಖಿಲಮಪಿ ಜಗತ್ಕ್ಷೇಮವನ್ನಿರ್ಮಿಮಾಣೋ
ಭೂಯಾತ್ಸೌದರ್ಶನೋ ವಃ ಪ್ರತಿಭಟಪರುಷಃ ಪೂರುಷಃ ಪೌರುಷಾಯ .. ೭೫..

ವಾಣೀ ಪೌರಾಣಿಕೀ ಯಂ ಪ್ರಥಯತಿ ಮಹಿತಂ ಪ್ರೇಕ್ಷಣಂ ಕೈಟಭಾರೇಃ
ಶಕ್ತಿರ್ಯಸ್ಯೇಷುದಂಷ್ಟ್ರಾನಖಪರಶುಮುಖವ್ಯಾಪಿನೀ ತದ್ವಿಭೂತ್ಯಾಮ್ .
ಕರ್ತುಂ ಯತ್ತತ್ತ್ವಬೋಧೋ ನ ನಿಶಿತಮತಿಭಿರ್ನಾರದಾದ್ಯೈಶ್ಚ ಶಕ್ಯೋ
ದೈವೀಂ ವೋ ಮಾನುಷೀಂ ಚ ಕ್ಷಿಪತು ಸ ವಿಪದಂ ದುಸ್ರಾಮಸ್ತ್ರರಾಜಃ .. ೭೬..

ರೂಢಸ್ತಾರಾಲವಾಲೇ ರುಚಿರದಲಚಯಃ ಶ್ಯಾಮಲೈಶ್ಶಸ್ತ್ರಜಾಲೈ-
ರ್ಜ್ವಾಲಾಭಿಸ್ಸಪ್ರವಾಲಃ ಪ್ರಕಟಿತಕುಸುಮೋ ಬದ್ಧಸಙ್ಘೈಃ ಸ್ಫುಲಿಙ್ಗೈಃ .
ಪ್ರಾಪ್ತಾನಾಂ ಪಾದಮೂಲಂ ಪ್ರಕೃತಿಮಧುರಯಾ ಛಾಯಯಾ ತಾಪಹೃದ್ವೋ
ದತ್ತಾಮುದ್ದೋಃಪ್ರಕಾಣ್ಡಃ ಫಲಮಭಿಲಷಿತಂ ವಿಷ್ಣುಸಙ್ಕಲ್ಪವೃಕ್ಷಃ .. ೭೭..

ಧಾಮ್ನಾಮೈರಮ್ಮದಾನಾಂ ನಿಚಯಮಿವ ಚಿರಸ್ಥಾಯಿನಾಂ ದ್ವಾದಶಾನಾಂ
ಮಾರ್ತಣ್ಡಾನಾಂ ಸಮೂಢಂ ಮಹ ಇವ ಬಹುಲಾಂ ರತ್ನಭಾಸಾಮಿವರ್ದ್ಧಿಮ್ .
ಅರ್ಚಿಸ್ಸಙ್ಘಾತಮೇಕೀಕೃತಮಿವ ಶಿಖಿನಾಂ ವಾಡವಾಗ್ರೇಸರಾಣಾಂ
ಶಙ್ಕನ್ತೇ ಯಸ್ಯ ರೂಪಂ ಸ ಭವತು ಭವತಾಂ ತೇಜಸೇ ಚಕ್ರರಾಜಃ .. ೭೮..

ಉಗ್ರಂ ಪಶ್ಯಾಕ್ಷಮುದ್ಯದ್ಭ್ರುಕುಟಿ ಸಮುಕುಟಂ ಕುಣ್ಡಲಿಸ್ಪಷ್ಟದಂಷ್ಟ್ರಂ
ಚಣ್ಡಾಸ್ತ್ರೈರ್ಬಾಹುದಣ್ಡೈರ್ಲಸದನಲಸಮಕ್ಷೌಮಲಕ್ಷ್ಯೋರುಕಾಣ್ಡಮ್ .
ಪ್ರತ್ಯಾಲೀಢಸ್ಥಪಾದಂ ಪ್ರಥಯತು ಭವತಾಂ ಪಾಲನವ್ಯಗ್ರಮಗ್ರೇ
ಚಕ್ರೇಶೋಽಕಾಲಕಾಲೇರಿತಭಟವಿಕಟಾಟೋಪಲೋಪಾಯ ರೂಪಮ್ .. ೭೯..

ಚಕ್ರಂ ಕುನ್ತಂ ಕೃಪಾಣಂ ಪರಶುಹುತವಹಾವಙ್ಕುಶಂ ದಣ್ಡಶಕ್ತೀ
ಶಙ್ಖಂ ಕೋದಣ್ಡಪಾಶೌ ಹಲಮುಸಲಗದಾವಜ್ರಶೂಲಾಂಶ್ಚ ಹೇತೀನ್ .
ದೋರ್ಭಿಸ್ಸವ್ಯಾಪಸವ್ಯೈರ್ದಧತತುಲಬಲಸ್ತಮ್ಭಿತಾರಾತಿದರ್ಪೈ-
ರ್ವ್ಯೂಹಸ್ತೇಜೋಭಿಮಾನೀ ನರಕವಿಜಯಿನೋ ಜೃಮ್ಭತಾಂ ಸಮ್ಪದೇ ವಃ .. ೮೦..

ಪೀತಂ ಕೇಶೇ ರಿಪೋರಪ್ಯಸೃಜಿ ರಥಪದೇ ಸಂಶ್ರಿತೇಽಪ್ಯುತ್ಕಟಾಕ್ಷಂ
ಚನ್ದ್ರಾಧಃಕಾರಿ ಯನ್ತ್ರೇ ವಪುಷಿ ಚ ದಲನೇ ಮಣ್ಡಲೇ ಚ ಸ್ವರಾಙ್ಕಮ್ .
ಹಸ್ತೇ ವಕ್ತ್ರೇ ಚ ಹೇತಿಸ್ತಬಕಿತಮಸಮಂ ಲೋಚನೇ ಮೋಚನೇ ಚ
ಸ್ತಾದಸ್ತೋಕಾಯ ಧಾಮ್ನೇ ಸುರವರಪರಿಷತ್ಸೇವಿತಂ ದೈವತಂ ವಃ .. ೮೧..

ಚಿತ್ರಾಕಾರೈಸ್ಸ್ವಚಾರೈರ್ಮಿತಸಕಲಜಗಜ್ಜಾಗರೂಕಪ್ರತಾಪೋ
ಮನ್ತ್ರಂ ತನ್ತ್ರಾನುರೂಪಂ ಮನಸಿ ಕಲಯತೋ ಮಾನಯನ್ನಾತ್ಮಗುಹ್ಯಾನ್ .
ಪಞ್ಚಾಙ್ಗಸ್ಫೂರ್ತಿನಿರ್ವರ್ತಿತರಿಪುವಿಜಯೋ ಧಾಮ ಷಣ್ಣಾಂ ಗುಣಾನಾಂ
ಲಕ್ಷ್ಮೀಂ ರಾಜಾಸನಸ್ಥೋ ವಿತರತು ಭವತಾಂ ಪೂರುಷಶ್ಚಕ್ರವರ್ತೀ .. ೮೨..

ಅಕ್ಷಾವೃತ್ತಾಭ್ರಮಾಲಾನ್ಯರವಿವರಲುಠಚ್ಚನ್ದ್ರಚಣ್ಡದ್ಯುತೀನಿ
ಜ್ವಾಲಾಜಾಲಾವಲೀಢಸ್ಫುಟದುಡುಪಟಲೀಪಾಣ್ಡುದಿಙ್ಮಣ್ಡಲಾನಿ .
ಚಕ್ರಾನ್ತಾಕ್ರಾನ್ತಚಕ್ರಾಚಲಚಲಿತಮಹೀಚಕ್ರವಾಲಾರ್ತಶೇಷಾ-
ಣ್ಯಸ್ತ್ರಗ್ರಾಮಾಗ್ರಿಮಸ್ಯ ಪ್ರದದತು ಭವತಾಂ ಪ್ರಾರ್ಥಿತಂ ಪ್ರಸ್ಥಿತಾನಿ .. ೮೩..

ಶೂಲಂ ತ್ಯಕ್ತಾತ್ಮಶೀಲಂ ಸೃಣಿರಣುಕಘೃಣಿಃ ಪಟ್ಟಸಃ ಸ್ಪಷ್ಟಸಾದಃ
ಶಕ್ತಿಶ್ಶಾಲೀನಶಕ್ತಿಃ ಕುಲಿಶಮಕುಶಲಂ ಕುಣ್ಠಧಾರಃ ಕುಠಾರಃ .
ದಣ್ಡಶ್ಚಣ್ಡತ್ವಶೂನ್ಯೋ ಭವತಿ ತನುಧನುರ್ಯತ್ಪುರಸ್ತಾತ್ಸ ವಃ ಸ್ತಾದ್
ಗ್ರಸ್ತಾಶೇಷಾಸ್ತ್ರಗರ್ವೋ ರಥಚರಣಪತಿಃ ಕರ್ಮಣೇ ಶಾರ್ಮಣಾಯ .. ೮೪..

ಕ್ಷುಣ್ಣಾಜಾನೇಯವೃನ್ದಂ ಕ್ಷುಭಿತರಥಗಣಂ ಸನ್ನಸಾನ್ನಾಹ್ಯಯೂಥಂ
ಕ್ಷ್ವೇಲಾಸಂರಮ್ಭಹೇಲಾಕಲಕಲವಿಗಲತ್ಪೂರ್ವಗೀರ್ವಾಣಗರ್ವಮ್ .
ಕುರ್ವಾಣಃಸಾಮ್ಪರಾಯಂ ರಥಚರಣಪತಿಃ ಸ್ಥೇಯಸೀಂ ವಃಪ್ರಶಸ್ತಿಂ
ದುಗ್ಧಾಂ ದುಗ್ಧಾಬ್ಧಿಭಾಸಂ ಭಯವಿವಶಶುನಾಸೀರನಾಸೀರವರ್ತೀ .. ೮೫..

ದ್ರುಹ್ಯದ್ದೋಶ್ಶಾಲಿಮಾಲಿಪ್ರಹರಣರಭಸೋತ್ತಾನಿತೇ ವೈನತೇಯೇ
ವಿದ್ರಾತಿ ದ್ರಾಕ್ಪ್ರಯುಕ್ತಃ ಪ್ರಧನಭುವಿ ಪರಾವರ್ತಮಾನೇನ ಭರ್ತ್ರಾ .
ನಿರ್ಜಿತ್ಯ ಪ್ರತ್ಯನೀಕಂ ನಿರವಧಿಕಚರದ್ಧಾಸ್ತಿಕಾಶ್ವೀಯರಥ್ಯಂ
ಪಥ್ಯಂ ವಿಶ್ವಸ್ಯ ದಾಶ್ವಾನ್ಪ್ರಥಯತು ಭವತೋ ಹೇತಿರಿನ್ದ್ರಾನುಜಸ್ಯ .. ೮೬..

ನನ್ದಿನ್ಯಾನನ್ದಶೂನ್ಯೇ ಗಲತಿ ಗಣಪತೌ ವ್ಯಾಕುಲೇ ಬಾಹುಲೇಯೇ
ಚಣ್ಡೇ ಚಾಕಿತ್ಯಕುಣ್ಠೇ ಪ್ರಮಥಪರಿಷದಿ ಪ್ರಾಪ್ತವತ್ಯಾಂ ಪ್ರಮಾಥಮ್ .
ಉಚ್ಛಿದ್ಯಾಜೌ ಬಲಿಷ್ಠಂ ವಲಿಜಭುಜವನಂ ಯೋ ದದಾವಾದಿಭಿಕ್ಷೋ-
ರ್ಭಿಕ್ಷಾಂ ತತ್ಪ್ರಾಣರೂಪಾಂ ಸ ಭವದಕುಶಲಂ ಕೃಷ್ಣಹೇತಿಃಕ್ಷಿಣೋತು .. ೮೭..

ರಕ್ತೌಘಾಭ್ಯಕ್ತಮುಕ್ತಾಫಲಲುಲಿತಲಲದ್ವೀಚಿವೃದ್ಧೌ ಮಹಾಬ್ಧೌ
ಸನ್ಧ್ಯಾಸಮ್ಬದ್ಧತಾರಾಜಲಧರಶಬಲಾಕಾಶನೀಕಾಶಕಾನ್ತೌ .
ಗಮ್ಭೀರಾರಮ್ಭಮಮ್ಭಶ್ಚರಮಸುರಕುಲಂ ವೇದವಿಘ್ನಂ ವಿನಿಘ್ನನ್
ನಿವಿಘ್ನಂ ವಃ ಪ್ರಸೂತಾಂ ವ್ಯಪಗತವಿಪದಂ ಸಮ್ಪದಂ ಚಕ್ರರಾಜಃ .. ೮೮..

ಕಾಶೀವಿಪ್ಲೋಷಚೈದ್ಯಕ್ಷಪಣಧರಣಿಜಧ್ವಂಸಸೂರ್ಯಾಪಿಧಾನ-
ಗ್ರಾಹದ್ವೇಧಾತ್ವಮಾಲಿತ್ರುಟನಮುಖಕಥಾವಸ್ತುಸತ್ಕೀರ್ತಿಗಾಥಾಃ .
ಗೀಯನ್ತೇ ಕಿನ್ನರೀಭಿಃ ಕನಕಗಿರಿಗುಹಾಗೇಹಿನೀಭಿರ್ಯದೀಯಾ
ದೇಯಾದ್ದೈತೇಯವೈರೀ ಸ ಸಕಲಭುವನಶ್ಲಾಘನೀಯಾಂ ಶ್ರಿಯಂ ವಃ .. ೮೯..

ನಾನಾವರ್ಣಾನ್ವಿವೃಣ್ವನ್ವಿರಚಿತಭುವನಾನುಗ್ರಹಾನ್ ವಿಗ್ರಹಾನ್ ಯಃ
ಚಕ್ರೇಷ್ವಷ್ಟಾಸು ಮೃಷ್ಟಾಸುರವರತರುಣೀಕಣ್ಠಕಸ್ತೂರಿಕೇಷು
. ಆತಾರಾದರ್ಣಮಾಲಾವಧಿಷು ವಸತಿ ಯಃ ಪೂರುಷೋ ವಸ್ಸ ದೇಯಾತ್
ವ್ಯಧ್ವೈರುದ್ಧೂತಸತ್ತ್ವೈರುಪಹಿತಮಬಹಿರ್ಧ್ವಾನ್ತಮಧ್ವಾನ್ತವರ್ತೀ .. ೯೦..

ದ್ವಾತ್ರಿಂಶತ್ಷೋಡಶಾಷ್ಟಪ್ರಭೃತಿಪೃಥುಭುಜಸ್ಫೂರ್ತಿರ್ಭಿಮೂರ್ತಿಭೇದೈಃ
ಕಾಲಾದ್ಯೇ ಚಕ್ರಷಟ್ಕೇ ಪ್ರಕಟಿತವಿಭವಃಪಞ್ಚಕೃತ್ಯಾನುರೂಪಮ್ .
ಅರ್ಥಾನಾಮರ್ಥಿತಾನಾಮಹರಹರಖಿಲಂ ನಿರ್ವಿಲಮ್ಬೈರ್ವಿಲಮ್ಬೈಃ
ಕುರ್ವಾಣೋ ಭಕ್ತವರ್ಗಂ ಕುಶಲಿನಮವತಾದಾಯುಧಗ್ರಾಮಣೀರ್ವಃ .. ೯೧..

ಕೋಣೈರರ್ಣೈಸ್ಸರೋಜೈರಪಿ ಕಪಿಶಗುಣೈಃ ಷಡ್ಭಿರುದ್ಭಿನ್ನಶೋಭೇ
ಶ್ರೀವಾಣೀಪೂರ್ವಿಕಾಭಿರ್ದಧತಿ ವಿಕಸತಶ್ಶಕ್ತಿಭಿಃ ಕೇಶವಾದೀನ್ .
ತಾರಾನ್ತೇ ಭೂಪುರಾದೌ ರಥಚರಣಗದಾಶಾರ್ಙ್ಗಖಡ್ಗಾಙ್ಕಿತಾಶೇ
ಯನ್ತ್ರೇ ತನ್ತ್ರೋದಿತೇ ವಃ ಸ್ಫುರತು ಕೃತಪದಂ ಲಕ್ಷ್ಮ ಲಕ್ಷ್ಮೀಸಖಸ್ಯ .. ೯೨..

ದಂಷ್ಟ್ರಾಕಾನ್ತ್ಯಾ ಕಡಾರೇ ಕಪಟಕಿಟಿತನೋಃ ಕೈಟಭಾರೇರಧಸ್ತಾ-
ದೂರ್ಧ್ವಂ ಹಾಸೇನ ವಿದ್ಧೇ ನರಹರಿವಪುಷೋ ಮಣ್ಡಲೇ ವಾಸವೀಯೇ .
ಪ್ರಾಕ್ಪ್ರತ್ಯಕ್ಸಾನ್ಧ್ಯಸಾನ್ದ್ರಚ್ಛವಿಭರಭರಿತೇ ವ್ಯೋಮ್ನಿ ವಿದ್ಯೋತಮಾನೋ
ದೈತೇಯೋತ್ಪಾತಶಂಸೀ ರವಿರಿವ ರಹಯತ್ವಸ್ತ್ರರಾಜೋ ರುಜಂ ವಃ .. ೯೩..

ಕೋಣೇ ಕ್ವಾಪಿ ಸ್ಥಿತೋಽಪಿ ತ್ರಿಭುವನವಿತತಶ್ಚನ್ದ್ರಧಾಮಾಪಿ ರೂಕ್ಷೋ
ರುಕ್ಮಚ್ಛಾಯೋಽಪಿ ಕೃಷ್ಣಾಕೃತಿರನಲಮಯೋಽಪ್ಯಾಶ್ರಿತತ್ರಾಣಕಾರೀ .
ಧಾರಾಸಾರೋಽಪಿ ದೀಪ್ತೋ ದಿನಕರರುಚಿರೋಽಪ್ಯುಲ್ಲಸತ್ತಾರಕಶ್ರೀ-
ಶ್ಚಕ್ರೇಶಶ್ಚಿತ್ರಭೂಮಾ ವಿತರತು ವಿಮತತ್ರಾಸನಂ ಶಾಸನಂ ವಃ .. ೯೪..

ಶುಕ್ಲಶ್ಶಕ್ರ ಸ್ತವಸ್ತೇ ಸಹ ದಹನ ಕಲಾಂ ಕಾಲ ತೇಽಯಂ ನ ಕಾಲಃ
ಕಿಂ ವೋ ರಕ್ಷಾಂಸಿ ರಕ್ಷಾ ತವ ಫಲತು ಪತೇ ಯಾದಸಾಂ ಪಾದಸೇವಾ .
ವಾಯೋ ಹೃದ್ಯೋಽಸಿ ಭರ್ತುಸ್ತ್ಯಜ ಧನದ ಮದಂ ಸೇವ್ಯತಾಂ ತ್ರಯಮ್ಬಕೇತಿ
ಪ್ರಾಹುರ್ಯದ್ಯನ್ತ್ರಪಾಲಾಸ್ಸ ದನುಜವಿಜಯೀ ಹನ್ತು ತನ್ದ್ರಾಲುತಾಂ ವಃ .. ೯೫..

ಗಾಯತ್ರ್ಯರ್ಣಾರಚಕ್ರೇ ಪ್ರಥಮಮನುಸಖಸ್ಸ್ಮೇರಪತ್ರಾರವಿನ್ದೇ
ಬಿಮ್ಬಂ ವಹ್ನೇಸ್ತ್ರಿಕೋಣಂ ವಹತಿ ಜಯಿಜಯಾದ್ಯಷ್ಟಶಕ್ತೌ ನಿಷಣ್ಣಾ .
ಶೋಕಂ ವೋಽಶೋಕಮೂಲೇ ಪದಸವಿಧಲಸದ್ಭೀಮಭೀಮಾಕ್ಷಭೀಮಾ-
ಪುಂಸೋ ದಿವ್ಯಾಸ್ತ್ರಧಾಮಾ ಪುರುಷಹರಿಮಯೀ ಮೂರ್ತಿರಸ್ಯತ್ವಪೂರ್ವಾ .. ೯೬..

ಪಾಶ್ಚಾತ್ಯಾಶೋಕಪುಷ್ಪಪ್ರಕರನಿಪತಿತೈಃ ಪ್ರಾಪ್ತರಾಗಂ ಪರಾಗೈಃ
ಸನ್ಧ್ಯಾರೋಚಿಸ್ಸಗನ್ಧೈಃ ಸ್ವಪದಶಶಧರಂ ಪ್ರೇಕ್ಷ್ಯ ತಾರಾನುಷಕ್ತಮ್ .
ಪದ್ಮಾನಾಬದ್ಧಕೋಶಾನಿವ ಸುರನಿವಹೈರಞ್ಜಲೀನ್ ಕಲ್ಪ್ಯಮಾನಾಂ-
ಶ್ಚಕ್ರಾಧೀಶೋಽಭಿನನ್ದನ್ಪ್ರದಿಶತು ಸದೃಶೀಮುತ್ತಮಶ್ಲೋಕತಾಂ ವಃ .. ೯೭..

ರಕ್ತಾಶೋಕಸ್ಯ ವೇದಸ್ಯ ಚ ವಿಹಿತಪದಂ ಪ್ರಾಪ್ತಶಾಖಸ್ಯ ಮೂಲೇ
ಚಕ್ರೈರಸ್ತ್ರೈಸ್ತದಾದ್ಯೈರಪಿ ಮಹಿತಚತುರ್ದ್ವಿಶ್ಚತುರ್ವಾಹುದಣ್ಡಮ್ .
ಆಸೀನಂ ಭಾಸಮಾನಂ ಸ್ಥಿತಮಪಿ ಭಯತಸ್ತ್ರಾಯತಾಂ ತತ್ತ್ವಮೇಕಂ
ಪಶ್ಚಾತ್ಪೂರ್ವತ್ರ ಭಾಗೇ ಸ್ಫುಟನರಹರಿತಾಮಾನುಷಂ ಜಾನುಷಾದ್ವಃ .. ೯೮..

ಪ್ರಾಣೇ ದತ್ತಪ್ರಯಾಣೇ ಮುಷಿತದಿಶಿ ದೃಶಿ ತ್ವಕ್ತಸಾರೇ ಶರೀರೇ
ಮತ್ಯಾಂ ವ್ಯಾಮೋಹವತ್ಯಾಂ ಸತಮಸಿ ಮನಸಿ ವ್ಯಾಹತೇ ವ್ಯಾಹೃತೇ ಚ .
ಚಕ್ರಾನ್ತರ್ವರ್ತಿ ಮೃತ್ಯುಪ್ರತಿಭಯಮುಭಯಾಕಾರಚಿತ್ರಂ ಪವಿತ್ರಂ
ತೇಜಸ್ತತ್ತಿಷ್ಠತಾಂ ವಸ್ತ್ರಿದಶಕುಲಧನಂ ತ್ರೀಕ್ಷಣಂ ತೀಕ್ಷ್ಣದಂಷ್ಟ್ರಮ್ .. ೯೯..

ಯಸ್ಮಿನ್ವಿನ್ಯಸ್ಯ ಭಾರಂ ವಿಜಯಿನಿ ಜಗತಾಂ ಜಙ್ಗಮಸ್ಥಾವರಾಣಾಂ
ಲಕ್ಷ್ಮೀನಾರಾಯಣಾಖ್ಯಂ ಮಿಥುನಮನುಭವತ್ಯತ್ಯುದಾರಾನ್ವಿಹಾರಾನ್ .
ಆರೋಗ್ಯಂ ಭೂತಿಮಾಯುಃ ಕೃತಮಿಹ ಬಹುನಾ ಯದ್ಯದಾಸ್ಥಾಪದಂ ವ-
ಸ್ತತ್ತತ್ಸದ್ಯಃ ಸಮಸ್ತಂ ದಿಶತು ಸ ಪುರುಷೋ ದಿವ್ಯಹೇತ್ಯಕ್ಷವರ್ತೀ .. ೧೦೦..

ಪದ್ಯಾನಾಂ ತತ್ತ್ವವಿದ್ಯಾದ್ಯುಮಣಿಗಿರಿಶವಿಧ್ಯಙ್ಗಸಙ್ಖ್ಯಾಧರಾಣಾ-
ಮರ್ಚಿಷ್ವಙ್ಗೇಷು ನೇಮ್ಯಾದಿಷು ಚ ಪರಮತಃ ಪುಂಸಿ ಷಡ್ವಿಂಶತೇಶ್ಚ .
ಸಙ್ಘೈಃ ಸೌದರ್ಶನಂ ಯಃ ಪಠತಿ ಕೃತಮಿದಂ ಕೂರನಾರಾಯಣೇನ -
ಸ್ತೋತ್ರಂ ನಿರ್ವಿಷ್ಟಭೋಗೋ ಭಜತಿ ಸ ಪರಮಾಂ ಚಕ್ರಸಾಯುಜ್ಯಲಕ್ಷ್ಮೀಮ್ .. ೧೦೧..