ధనదాలక్ష్మీస్తోత్రమ్

.. ధనదాలక్ష్మీస్తోత్రమ్ ..

.. ధనదా ఉవాచ ..

దేవీ దేవముపాగమ్య నీలకణ్ఠం మమ ప్రియమ్.
కృపయా పార్వతీ ప్రాహ శఙ్కరం కరుణాకరమ్ ..1..

దేవ్యువాచ
బ్రూహి వల్లభ సాధూనాం దరిద్రాణాం కుటుమ్బినామ్.
దరిద్ర దలనోపాయమఞ్జసైవ ధనప్రదమ్ ..2..

.. శివ ఉవాచ ..

పూజయన్పార్వతీవాక్యమిదమాహ మహేశ్వరః.
ఉచితం జగదమ్బాసి తవ భూతానుకమ్పయా ..3..

స సీతం సానుజం రామం సాఞ్జనేయం సహానుగమ్.
ప్రణమ్య పరమానన్దం వక్ష్యేఽహం స్తోత్రముత్తమమ్ ..4..

ధనదం శ్రద్ధానానాం సద్యః సులభకారకమ్.
యోగక్షేమకరం సత్యం సత్యమేవ వచో మమ ..5..

పఠన్తః పాఠయన్తోఽపి బ్రహ్మణైరాస్తికోత్తమైః.
ధనలాభో భవేదాశు నాశమేతి దరిద్రతా ..6..

భూభవాంశభవాం భూత్యై భక్తికల్పలతాం శుభామ్.
ప్రార్థయత్తాం యథాకామం కామధేనుస్వరూపిణీమ్ ..7..

ధనదే ధనదే దేవి దానశీలే దయాకరే.
త్వం ప్రసీద మహేశాని ! యదర్థం ప్రార్థయామ్యహమ్ ..8..

ధరాఽమరప్రియే పుణ్యే ధన్యే ధనదపూజితే.
సుధనం ర్ధామికే దేహి యజమానాయ సత్వరమ్ ..9..

రమ్యే రుద్రప్రియే రూపే రామరూపే రతిప్రియే.
శిఖీసఖమనోమూర్త్తే ప్రసీద ప్రణతే మయి ..10..

ఆరక్తచరణామ్భోజే సిద్ధిసర్వార్థదాయికే.
దివ్యామ్బరధరే దివ్యే దివ్యమాల్యానుశోభితే ..11..

సమస్తగుణసమ్పన్నే సర్వలక్షణలక్షితే.
శరచ్చన్ద్రముఖే నీలే నీల నీరజ లోచనే ..12..

చఞ్చరీక చమూ చారు శ్రీహార కుటిలాలకే.
మత్తే భగవతీ మాతః కలకణ్ఠరవామృతే ..13..

హాసాఽవలోకనైర్దివ్యై-ర్భక్తచిన్తాపహారికే.
రూప లావణ్య తారూణ్య కారూణ్య గుణభాజనే ..14..

క్వణత్కఙ్కణమఞ్జీరే లసల్లీలాకరామ్బుజే.
రుద్రప్రకాశితే తత్త్వే ధర్మాధరే ధరాలయే ..15..

ప్రయచ్ఛ యజమానాయ ధనం ధర్మేకసాధనమ్.
మాతస్త్వం మేఽవిలమ్బేన దిశస్వ జగదమ్బికే ..16..

కృపయా కరురాగారే ప్రార్థితం కురు మే శుభే.
వసుధే వసుధారూపే వసు వాసవ వన్దితే ..17..

ధనదే యజమానాయ వరదే వరదా భవ.
బ్రహ్మణ్యైర్బ్రాహ్మణైః పూజ్యే పార్వతీశివశఙ్కరే ..18..

స్తోత్రం దరిద్రతావ్యాధిశమనం సుధనప్రదమ్.
శ్రీకరే శఙ్కరే శ్రీదే ప్రసీద మయికింకరే ..19..

పార్వతీశప్రసాదేన సురేశ కిఙ్కరేరితమ్.
శ్రద్ధయా యే పఠిష్యన్తి పాఠయిష్యన్తి భక్తితః ..20..

సహస్రమయుతం లక్షం ధనలాభో భవేద్ ధ్రువమ్
ధనదాయ నమస్తుభ్యం నిధిపద్మాధిపాయ చ.
భవన్తు త్వత్ప్రసాదాన్మే ధనధాన్యాదిసమ్పదః ..21..