ಧನದಾಲಕ್ಷ್ಮೀಸ್ತೋತ್ರಮ್

.. ಧನದಾಲಕ್ಷ್ಮೀಸ್ತೋತ್ರಮ್ ..

.. ಧನದಾ ಉವಾಚ ..

ದೇವೀ ದೇವಮುಪಾಗಮ್ಯ ನೀಲಕಣ್ಠಂ ಮಮ ಪ್ರಿಯಮ್.
ಕೃಪಯಾ ಪಾರ್ವತೀ ಪ್ರಾಹ ಶಙ್ಕರಂ ಕರುಣಾಕರಮ್ ..೧..

ದೇವ್ಯುವಾಚ
ಬ್ರೂಹಿ ವಲ್ಲಭ ಸಾಧೂನಾಂ ದರಿದ್ರಾಣಾಂ ಕುಟುಮ್ಬಿನಾಮ್.
ದರಿದ್ರ ದಲನೋಪಾಯಮಞ್ಜಸೈವ ಧನಪ್ರದಮ್ ..೨..

.. ಶಿವ ಉವಾಚ ..

ಪೂಜಯನ್ಪಾರ್ವತೀವಾಕ್ಯಮಿದಮಾಹ ಮಹೇಶ್ವರಃ.
ಉಚಿತಂ ಜಗದಮ್ಬಾಸಿ ತವ ಭೂತಾನುಕಮ್ಪಯಾ ..೩..

ಸ ಸೀತಂ ಸಾನುಜಂ ರಾಮಂ ಸಾಞ್ಜನೇಯಂ ಸಹಾನುಗಮ್.
ಪ್ರಣಮ್ಯ ಪರಮಾನನ್ದಂ ವಕ್ಷ್ಯೇಽಹಂ ಸ್ತೋತ್ರಮುತ್ತಮಮ್ ..೪..

ಧನದಂ ಶ್ರದ್ಧಾನಾನಾಂ ಸದ್ಯಃ ಸುಲಭಕಾರಕಮ್.
ಯೋಗಕ್ಷೇಮಕರಂ ಸತ್ಯಂ ಸತ್ಯಮೇವ ವಚೋ ಮಮ ..೫..

ಪಠನ್ತಃ ಪಾಠಯನ್ತೋಽಪಿ ಬ್ರಹ್ಮಣೈರಾಸ್ತಿಕೋತ್ತಮೈಃ.
ಧನಲಾಭೋ ಭವೇದಾಶು ನಾಶಮೇತಿ ದರಿದ್ರತಾ ..೬..

ಭೂಭವಾಂಶಭವಾಂ ಭೂತ್ಯೈ ಭಕ್ತಿಕಲ್ಪಲತಾಂ ಶುಭಾಮ್.
ಪ್ರಾರ್ಥಯತ್ತಾಂ ಯಥಾಕಾಮಂ ಕಾಮಧೇನುಸ್ವರೂಪಿಣೀಮ್ ..೭..

ಧನದೇ ಧನದೇ ದೇವಿ ದಾನಶೀಲೇ ದಯಾಕರೇ.
ತ್ವಂ ಪ್ರಸೀದ ಮಹೇಶಾನಿ ! ಯದರ್ಥಂ ಪ್ರಾರ್ಥಯಾಮ್ಯಹಮ್ ..೮..

ಧರಾಽಮರಪ್ರಿಯೇ ಪುಣ್ಯೇ ಧನ್ಯೇ ಧನದಪೂಜಿತೇ.
ಸುಧನಂ ರ್ಧಾಮಿಕೇ ದೇಹಿ ಯಜಮಾನಾಯ ಸತ್ವರಮ್ ..೯..

ರಮ್ಯೇ ರುದ್ರಪ್ರಿಯೇ ರೂಪೇ ರಾಮರೂಪೇ ರತಿಪ್ರಿಯೇ.
ಶಿಖೀಸಖಮನೋಮೂರ್ತ್ತೇ ಪ್ರಸೀದ ಪ್ರಣತೇ ಮಯಿ ..೧೦..

ಆರಕ್ತಚರಣಾಮ್ಭೋಜೇ ಸಿದ್ಧಿಸರ್ವಾರ್ಥದಾಯಿಕೇ.
ದಿವ್ಯಾಮ್ಬರಧರೇ ದಿವ್ಯೇ ದಿವ್ಯಮಾಲ್ಯಾನುಶೋಭಿತೇ ..೧೧..

ಸಮಸ್ತಗುಣಸಮ್ಪನ್ನೇ ಸರ್ವಲಕ್ಷಣಲಕ್ಷಿತೇ.
ಶರಚ್ಚನ್ದ್ರಮುಖೇ ನೀಲೇ ನೀಲ ನೀರಜ ಲೋಚನೇ ..೧೨..

ಚಞ್ಚರೀಕ ಚಮೂ ಚಾರು ಶ್ರೀಹಾರ ಕುಟಿಲಾಲಕೇ.
ಮತ್ತೇ ಭಗವತೀ ಮಾತಃ ಕಲಕಣ್ಠರವಾಮೃತೇ ..೧೩..

ಹಾಸಾಽವಲೋಕನೈರ್ದಿವ್ಯೈ-ರ್ಭಕ್ತಚಿನ್ತಾಪಹಾರಿಕೇ.
ರೂಪ ಲಾವಣ್ಯ ತಾರೂಣ್ಯ ಕಾರೂಣ್ಯ ಗುಣಭಾಜನೇ ..೧೪..

ಕ್ವಣತ್ಕಙ್ಕಣಮಞ್ಜೀರೇ ಲಸಲ್ಲೀಲಾಕರಾಮ್ಬುಜೇ.
ರುದ್ರಪ್ರಕಾಶಿತೇ ತತ್ತ್ವೇ ಧರ್ಮಾಧರೇ ಧರಾಲಯೇ ..೧೫..

ಪ್ರಯಚ್ಛ ಯಜಮಾನಾಯ ಧನಂ ಧರ್ಮೇಕಸಾಧನಮ್.
ಮಾತಸ್ತ್ವಂ ಮೇಽವಿಲಮ್ಬೇನ ದಿಶಸ್ವ ಜಗದಮ್ಬಿಕೇ ..೧೬..

ಕೃಪಯಾ ಕರುರಾಗಾರೇ ಪ್ರಾರ್ಥಿತಂ ಕುರು ಮೇ ಶುಭೇ.
ವಸುಧೇ ವಸುಧಾರೂಪೇ ವಸು ವಾಸವ ವನ್ದಿತೇ ..೧೭..

ಧನದೇ ಯಜಮಾನಾಯ ವರದೇ ವರದಾ ಭವ.
ಬ್ರಹ್ಮಣ್ಯೈರ್ಬ್ರಾಹ್ಮಣೈಃ ಪೂಜ್ಯೇ ಪಾರ್ವತೀಶಿವಶಙ್ಕರೇ ..೧೮..

ಸ್ತೋತ್ರಂ ದರಿದ್ರತಾವ್ಯಾಧಿಶಮನಂ ಸುಧನಪ್ರದಮ್.
ಶ್ರೀಕರೇ ಶಙ್ಕರೇ ಶ್ರೀದೇ ಪ್ರಸೀದ ಮಯಿಕಿಂಕರೇ ..೧೯..

ಪಾರ್ವತೀಶಪ್ರಸಾದೇನ ಸುರೇಶ ಕಿಙ್ಕರೇರಿತಮ್.
ಶ್ರದ್ಧಯಾ ಯೇ ಪಠಿಷ್ಯನ್ತಿ ಪಾಠಯಿಷ್ಯನ್ತಿ ಭಕ್ತಿತಃ ..೨೦..

ಸಹಸ್ರಮಯುತಂ ಲಕ್ಷಂ ಧನಲಾಭೋ ಭವೇದ್ ಧ್ರುವಮ್
ಧನದಾಯ ನಮಸ್ತುಭ್ಯಂ ನಿಧಿಪದ್ಮಾಧಿಪಾಯ ಚ.
ಭವನ್ತು ತ್ವತ್ಪ್ರಸಾದಾನ್ಮೇ ಧನಧಾನ್ಯಾದಿಸಮ್ಪದಃ ..೨೧..