ಶ್ರೀಗೋದಾಸ್ತುತಿಃ

ಶ್ರೀಗೋದಾಸ್ತುತಿಃ
ಶ್ರೀಮಾನ್ ವೇಙ್ಕಟನಾಥಾರ್ಯಃ ಕವಿತಾರ್ಕಿಕಕೇಸರೀ.
ವೇದಾನ್ತಾಚಾರ್ಯವೋಂ ಮೇ ಸನ್ನಿಧತ್ತಾಂ ಸದಾ ಹೃದಿ ..

ಶ್ರೀವಿಷ್ಣುಚಿತ್ತಕುಲನನ್ದನಕಲ್ಪವಲ್ಲೀಂ
ಶ್ರೀರಙ್ಗರಾಜಹರಿಚನ್ದನಯೋಗದೃಶ್ಯಾಮ್.
ಸಾಕ್ಷಾತ್ ಕ್ಷಮಾ ಕರುಣಯಾ ಕಮಲಾಮಿವಾನ್ಯಾಂ
ಗೋದಾಮನನ್ಯಶರಣಃ ಶರಣಂ ಪ್ರಪದ್ಯೇ .. ೧ ..

ವೈದೇಶಿಕಃ ಶ್ರುತಿಗಿರಾಮಪಿ ಭೂಯಸೀನಾಂ
ವರ್ಣೇಷು ಮಾತಿ ಮಹಿಮಾ ನ ಹಿ ಮಾದಶಾಂ ತೇ.
ಇತ್ಥಂ ವಿದನ್ತಮಪಿ ಮಾಂ ಸಹಸೈವ ಗೋದೇ
ಮೌನದ್ರುಹೋ ಮುಖರಯನ್ತಿ ಗುಣಾಸ್ತ್ವದೀಯಾಃ .. ೨ ..

ತ್ವತ್ಪ್ರೇಯಸಃ ಶ್ರವಣಯೋರಮೃತಾಯಮಾನಾಂ
ತುಲ್ಯಾಂ ತ್ವದೀಯಮಣಿನೂಪುರಶಿಞ್ಜಿತಾನಾಮ್.
ಗೋದೇ ತ್ವಮೇವ ಜನನಿ ತ್ವದಭಿಷ್ಟವಾಹೀಁ
ವಾಚಂ ಪ್ರಸನ್ನಮಧುರಾಂ ಮಮ ಸಂವಿಧೇಹಿ .. ೩ ..

ಕೃಷ್ಣಾನ್ವಯೇನ ದಧತೀಂ ಯಮುನಾನುಭಾವಂ
ತೀರ್ಥೈರ್ಯಥಾವದವಗಾಹ್ಯ ಸರಸ್ವತೀ ತೇ.
ಗೋದೇ ವಿಕಸ್ವರಧಿಯಾಂ ಭವತೀಕಟಾಕ್ಷಾತ್
ವಾಚಃ ಸ್ಫುರನ್ತಿ ಮಕರನ್ದಮುಚಃ ಕವೀನಾಮ್ .. ೪ ..

ಅಸ್ಮಾದೃಶಾಮಪಕೃತೌ ಚಿರದೀಕ್ಷಿತಾನಾಮ್
ಅಹ್ರಾಯ ದೇವಿ ದಯತೇ ಯದಸೌ ಮುಕುನ್ದಃ.
ತನ್ನಿಶ್ಚಿತಂ ನಿಯಮಿತಸ್ತವ ಮೌಳಿದಾಮ್ನಾ
ತನ್ತ್ರೀನಿನಾದಮಧುರೈಶ್ಚ ಗಿರಾಂ ನಿಗುಮ್ಭೈಃ .. ೫ ..

ಶೋಣಾಽಧರೇಽಪಿ ಕುಚಯೋರಪಿ ತುಙ್ಗಭದ್ರಾ
ವಾಚಾಂ ಪ್ರವಾಹನಿವಹೇಽಪಿ ಸರಸ್ವತೀ ತ್ವಮ್.
ಅಪ್ರಾಕೃತೈರಪಿ ರಸೈರ್ವಿರಜಾ ಸ್ವಭಾವಾತ್
ಗೋದಾಽಪಿ ದೇವಿ ಕಮಿತುರ್ನನು ನರ್ಮದಾಽಸಿ .. ೬ ..

ವಲ್ಮೀಕತಃ ಶ್ರವಣತೋ ವಸುಧಾತ್ಮನಸ್ತೇ
ಜಾತೋ ಬಭೂವ ಸ ಮುನಿಃ ಕವಿಸಾರ್ವಭೌಮಃ.
ಗೋದೇ ಕಿಮದ್ಭತಮಿದಂ ಯದಮೀ ಸ್ವದನ್ತೇ
ವಕ್ತ್ರಾರವಿನ್ದಮಕರನ್ದನಿಭಾಃ ಪ್ರಬನ್ಧಾಃ .. ೭ ..

ಭೋಕ್ತುಂ ತವ ಪ್ರಿಯತಮಂ ಭವತೀವ ಗೋದೇ
ಭಕ್ತಿಂ ನಿಜಾಂ ಪ್ರಣಯಭಾವನಯಾ ಗೃಣನ್ತಃ.
ಉಚ್ಚಾವಚೈರ್ವಿರಹಸಙ್ಗಮಜೈರುದನ್ತೈಃ .
ಶೃಙ್ಗಾರಯನ್ತಿ ಹೃದಯಂ ಗುರವಸ್ತ್ವದೀಯಾಃ .. ೮ ..

ಮಾತಃ ಸಮುತ್ಥಿತವತೀಮಧಿವಿಷ್ಣುಚಿತ್ತಂ
ವಿಶ್ವೋಪಜೀವ್ಯಮಮೃತಂ ವಚಸಾ ದುಹಾನಾಮ್.
ತಾಪಚ್ಛಿದಂ ಹಿಮರುಚೇರಿವ ಮೂರ್ತಿಮನ್ಯಾಂ
ಸನ್ತಃ ಪಯೋಧಿದುಹಿತುಃ ಸಹಜಾಂ ವಿದುಸ್ತ್ವಾಮ್ .. ೯ ..

ತಾತಸ್ತು ತೇ ಮಧುಭಿದಃ ಸ್ತುತಿಲೇಶವಶ್ಯಾತ್
ಕರ್ಣಾಮೃತೈಃ ಸ್ತುತಿಶತೈರನವಾಪ್ತಪೂರ್ವಮ್.
ತ್ವನ್ಮೌಳಿಗನ್ಧಸುಭಗಾಮುಪಹೃತ್ಯ ಮಾಲಾಂ
ಲೇಭೇ ಮಹತ್ತರಪದಾನುಗುಣಂ ಪ್ರಸಾದಮ್ .. ೧೦ ..

ದಿಕ್ ದಕ್ಷಿಣಾಽಪಿ ಪರಿಪಕ್ತ್ರಿಮಪುಣ್ಯಲಭ್ಯಾತ್
ಸರ್ವೋತ್ತರಾ ಭವತಿ ದೇವಿ ತವಾವತಾರಾತ್.
ಯತ್ರೈವ ರಙ್ಗಪತಿನಾ ಬಹುಮಾನಪೂರ್ವಂ
ನಿದ್ರಾಳುನಾಽಪಿ ನಿಯತಂ ನಿಹಿತಾಃ ಕಟಾಕ್ಷಾಃ .. ೧೧ ..

ಪ್ರಾಯೇಣ ದೇವಿ ಭವತೀವ್ಯಪದೇಶಯೋಗಾತ್
ಗೋದಾವರೀ ಜಗದಿದಂ ಪಯಸಾ ಪುನೀತೇ.
ಯಸ್ಯಾಂ ಸಮೇತ್ಯ ಸಮಯೇಷು ಚಿರಂ ನಿವಾಸಾತ್
ಭಾಗೀರಥೀಪ್ರಭೃತಯೋಽಪಿ ಭವನ್ತಿ ಪುಣ್ಯಾಃ .. ೧೨ ..

ನಾಗೇಶಯಃ ಸುತನು ಪಕ್ಷಿರಥಃ ಕಥಂ ತೇ
ಜಾತಃ ಸ್ವಯಂವರಪತಿಃ ಪುರುಷಃ ಪುರಾಣಃ.
ಏವಂವಿಧಾಃ ಸಮುಚಿತಂ ಪ್ರಣಯಂ ಭವತ್ಯಾಃ
ಸನ್ದರ್ಶಯನ್ತಿ ಪರಿಹಾಸಗಿರಃ ಸಖೀನಾಮ್ .. ೧೩ ..

ತ್ವದ್ಭುಕ್ತಮಾಲ್ಯಸುರಭೀಕೃತಚಾರುಮೌಳೇ:
ಹಿತ್ವಾ ಭುಜಾನ್ತರಗತಾಮಪಿ ವೈಜಯನ್ತೀಮ್.
ಪತ್ಯುಸ್ತವೇಶ್ವರಿ ಮಿಥಃ ಪ್ರತಿಘಾತಲೋಲಾಃ
ಬರ್ಹಾತಪತ್ರರುಚಿಮಾರಚಯನ್ತಿ ಭೃಙ್ಗಾಃ .. ೧೪ ..

ಆಮೋದವತ್ಯಪಿ ಸದಾ ಹೃದಯಙ್ಗಮಾಽಪಿ
ರಾಗಾನ್ವಿತಾಽಪಿ ಲಳಿತಾಽಪಿ ಗುಣೋತ್ತರಾಪಿ.
ಮೌಳಿಸ್ರಜಾ ತವ ಮುಕುನ್ದಕಿರೀಟಭಾಜಾ
ಗೋದೇ ಭವತ್ಯಧರಿತಾ ಖಲು ವೈಜಯನ್ತೀ .. ೧೫ ..

ತ್ವನ್ಮೌಳಿದಾಮನಿ ವಿಭೋಃ ಶಿರಸಾ ಗೃಹೀತೇ
ಸ್ವಚ್ಛನ್ದಕಲ್ಪಿತಸಪೀತಿರಸಪ್ರಮೋದಾಃ.
ಮಞ್ಜುಸ್ವನಾ ಮಧುಲಿಹೋ ವಿದಧುಃ ಸ್ವಯಂ ತೇ
ಸ್ವಾಯಂವರಂ ಕಮಪಿ ಮಙ್ಗಳತೂರ್ಯಘೋಷಮ್ .. ೧೬ ..

ವಿಶ್ವಾಯಮಾನರಜಸಾ ಕಮಲೇನ ನಾಭೌ
ವಕ್ಷಃಸ್ಥಲೇ ಚ ಕಮಲಾಸ್ತನಚನ್ದನೇನ.
ಆಮೋದಿತೋಽಪಿ ನಿಗಮೈರ್ವಿಭುರಙಿಯುಗ್ಮೇ
ಧತ್ತೇ ನತೇನ ಶಿರಸಾ ತವ ಮೌಳಿಮಾಲಾಮ್ .. ೧೭ ..

ಚೂಡಾಪದೇನ ಪರಿಗೃಹ್ಯ ತವೋತ್ತರೀಯಂ .
ಮಾಲಾಮಪಿ ತ್ವದಳಕೈರಧಿವಾಸ್ಯ ದತ್ತಾಮ್.
ಪ್ರಾಯೇಣ ರಙ್ಗಪತಿರೇಷ ಬಿಭರ್ತಿ ಗೋದೇ
ಸೌಭಾಗ್ಯಸಮ್ಪದಭಿಷೇಕಮಹಾಧಿಕಾರಮ್ .. ೧೮ ..

ತುಙ್ಗೈರಕೃತ್ರಿಮಗಿರಃ ಸ್ವಯಮುತ್ತಮಾಙ್ಗೈಃ
ಯಂ ಸರ್ವಗನ್ಧ ಇತಿ ಸಾದರಮುದ್ವಹನ್ತಿ.
ಆಮೋದಮನ್ಯಮಧಿಗಚ್ಛತಿ ಮಾಲಿಕಾಭಿಃ
ಸೋಽಪಿ ತ್ವದೀಯಕುಟಿಲಾಳಕವಾಸಿತಾಭಿಃ.. ೧೯ ..

ಧನ್ಯೇ ಸಮಸ್ತಜಗತಾಂ ಪಿತುರುತ್ತಮಾಙ್ಗೇ
ತ್ವನ್ಮೌಳಿಮಾಲ್ಯಭರಸಮ್ಭರಣೇನ ಭೂಯಃ.
ಇನ್ದೀವರಸ್ರಜಮಿವಾದಧತಿ ತ್ವದೀಯಾ -
ನ್ಯಾಕೇಕರಾಣಿ ಬಹುಮಾನವಿಲೋಕಿತಾನಿ .. ೨೦ ..

ರಙ್ಗೇಶ್ವರಸ್ಯ ತವ ಚ ಪ್ರಣಯಾನುಬನ್ಧಾತ್
ಅನ್ಯೋನ್ಯಮಾಲ್ಯಪರಿವೃತ್ತಿಮಭಿಷ್ಟುವನ್ತಃ..

ವಾಚಾಲಯನ್ತಿ ವಸುಧೇ ರಸಿಕಾಸ್ತ್ರಿಲೋಕೀಂ
ನ್ಯೂನಾಧಿಕತ್ವಸಮತಾವಿಷಯೈರ್ವಿವಾದೈಃ .. ೨೧ ..

ದೂರ್ವಾದಳಪ್ರತಿಮಯಾ ತವ ದೇಹಕಾನ್ತ್ಯಾ
ಗೋರೋಚನಾರುಚಿರಯಾ ಚ ರುಚೇನ್ದಿರಾಯಾಃ.
ಆಸೀದನುಜ್ಝಿತಶಿಖಾವಳಕಣ್ಠಶೋಭಂ
ಮಾಙ್ಗಳ್ಯದಂ ಪ್ರಣಮತಾಂ ಮಧುವೈರಿಗಾತ್ರಮ್ .. ೨೨ ..

ಅರ್ಘ್ಯಂ ಸಮರ್ಚ್ಯ ನಿಯಮೈರ್ನಿಗಮಪ್ರಸೂನೈಃ
ನಾಥಂ ತ್ವಯಾ ಕಮಲಯಾ ಚ ಸಮೇಯಿವಾಂಸಮ್.
ಮಾತಶ್ಚಿರಂ ನಿರವಿಶನ್ ನಿಜಮಾಧಿರಾಜ್ಯಂ
ಮಾನ್ಯಾ ಮನುಪ್ರಭೃತಯೋಽಪಿ ಮಹೀಕ್ಷಿತಸ್ತೇ .. ೨೩ ..

ಆರ್ದ್ರಾಪರಾಧಿನಿ ಜನೇಽಪ್ಯಭಿರಕ್ಷಣಾರ್ಥಂ
ರಙ್ಗೇಶ್ವರಸ್ಯ ರಮಯಾ ವಿನಿವೇದ್ಯಮಾನೇ.
ಪಾರ್ಶ್ವೇ ಪರತ್ರ ಭವತೀ ಯದಿ ತತ್ರ ನಾಸೀತ್
ಪ್ರಾಯೇಣ ದೇವಿ ವದನಂ ಪರಿವರ್ತಿತಂ ಸ್ಯಾತ್ .. ೨೪ ..

ಗೋದೇ ಗುಣೈರಪನಯನ್ ಪ್ರಣತಾಪರಾಧಾನ್
ಭ್ರೂಕ್ಷೇಪ ಏವ ತವ ಭೋಗರಸಾನುಕೂಲಃ.
ಕರ್ಮಾನುಬನ್ಧಿಫಲದಾನರತಸ್ಯ ಭರ್ತುಃ
ಸ್ವಾತನ್ತ್ರ್ಯದುರ್ವ್ಯಸನಮರ್ಮಭಿದಾನಿದಾನಮ್ .. ೨೫ ..

ರಙ್ಗೇ ತಟಿಗುಣವತೋ ರಮಯೈವ ಗೋದೇ
ಕೃಷ್ಣಾಮ್ಬುದಸ್ಯ ಘಟಿತಾಂ ಕೃಪಯಾ ಸುವೃಷ್ಟ್ಯಾ.
ದೌರ್ಗತ್ಯದುರ್ವಿಷವಿನಾಶಸುಧಾನದೀಂ ತ್ವಾಂ
ಸನ್ತಃ ಪ್ರಪದ್ಯ ಶಮಯನ್ತ್ಯಚಿರೇಣ ತಾಪಾನ್ .. ೨೬ ..

ಜಾತಾಪರಾಧಮಪಿ ಮಾಮನುಕಮ್ಪ್ಯ ಗೋದೇ
ಗೋಪ್ತ್ರೀ ಯದಿ ತ್ವಮಸಿ ಯುಕ್ತಮಿದಂ ಭವತ್ಯಾಃ.
ವಾತ್ಸಲ್ಯನಿರ್ಭರತಯಾ ಜನನೀ ಕುಮಾರಂ
ಸ್ತನ್ಯೇನ ವರ್ಧಯತಿ ದಷ್ಟಪಯೋಧರಾಽಪಿ .. ೨೭ ..

ಶತಮಖಮಣಿನೀಲಾ ಚಾರುಕಲ್ಹಾರಹಸ್ತಾ
ಸ್ತನಭರನಮಿತಾಙ್ಗೀ ಸಾನ್ದ್ರವಾತ್ಸಲ್ಯಸಿನ್ಧುಃ.
ಅಳಕವಿನಿಹಿತಾಭಿಃ ಸ್ರಗ್ಭಿರಾಕೃಷ್ಟನಾಥಾ
ವಿಲಸತು ಹೃದಿ ಗೋದಾ ವಿಷ್ಣುಚಿತ್ತಾತ್ಮಜಾ ನಃ .. ೨೮ ..

ಇತಿ ವಿಕಸಿತಭಕ್ತೇರುತ್ಥಿತಾಂ ವೇಙ್ಕಟೇಶಾತ್
ಬಹುಗುಣರಮಣೀಯಾಂ ವಕ್ತಿ ಗೋದಾಸ್ತುತಿಂ ಯಃ.
ಸ ಭವತಿ ಬಹುಮಾನ್ಯಃ ಶ್ರೀಮತೋ ರಙ್ಗಭರ್ತುಃ
ಚರಣಕಮಲಸೇವಾಂ ಶಾಶ್ವತೀಮಭ್ಯುಪೈಷ್ಯನ್ .. ೨೯ ..

ಕವಿತಾರ್ಕಿಕಸಿಂಹಾಯ ಕಲ್ಯಾಣಗುಣಶಾಲಿನೇ.
ಶ್ರೀಮತೇ ವೇಙ್ಕಟೇಶಾಯ ವೇದಾನ್ತಗುರವೇ ನಮಃ ..