శ్రీగోదాస్తుతిః

శ్రీగోదాస్తుతిః
శ్రీమాన్ వేఙ్కటనాథార్యః కవితార్కికకేసరీ.
వేదాన్తాచార్యవోం మే సన్నిధత్తాం సదా హృది ..

శ్రీవిష్ణుచిత్తకులనన్దనకల్పవల్లీం
శ్రీరఙ్గరాజహరిచన్దనయోగదృశ్యామ్.
సాక్షాత్ క్షమా కరుణయా కమలామివాన్యాం
గోదామనన్యశరణః శరణం ప్రపద్యే .. 1 ..

వైదేశికః శ్రుతిగిరామపి భూయసీనాం
వర్ణేషు మాతి మహిమా న హి మాదశాం తే.
ఇత్థం విదన్తమపి మాం సహసైవ గోదే
మౌనద్రుహో ముఖరయన్తి గుణాస్త్వదీయాః .. 2 ..

త్వత్ప్రేయసః శ్రవణయోరమృతాయమానాం
తుల్యాం త్వదీయమణినూపురశిఞ్జితానామ్.
గోదే త్వమేవ జనని త్వదభిష్టవాహీఀ
వాచం ప్రసన్నమధురాం మమ సంవిధేహి .. 3 ..

కృష్ణాన్వయేన దధతీం యమునానుభావం
తీర్థైర్యథావదవగాహ్య సరస్వతీ తే.
గోదే వికస్వరధియాం భవతీకటాక్షాత్
వాచః స్ఫురన్తి మకరన్దముచః కవీనామ్ .. 4 ..

అస్మాదృశామపకృతౌ చిరదీక్షితానామ్
అహ్రాయ దేవి దయతే యదసౌ ముకున్దః.
తన్నిశ్చితం నియమితస్తవ మౌళిదామ్నా
తన్త్రీనినాదమధురైశ్చ గిరాం నిగుమ్భైః .. 5 ..

శోణాఽధరేఽపి కుచయోరపి తుఙ్గభద్రా
వాచాం ప్రవాహనివహేఽపి సరస్వతీ త్వమ్.
అప్రాకృతైరపి రసైర్విరజా స్వభావాత్
గోదాఽపి దేవి కమితుర్నను నర్మదాఽసి .. 6 ..

వల్మీకతః శ్రవణతో వసుధాత్మనస్తే
జాతో బభూవ స మునిః కవిసార్వభౌమః.
గోదే కిమద్భతమిదం యదమీ స్వదన్తే
వక్త్రారవిన్దమకరన్దనిభాః ప్రబన్ధాః .. 7 ..

భోక్తుం తవ ప్రియతమం భవతీవ గోదే
భక్తిం నిజాం ప్రణయభావనయా గృణన్తః.
ఉచ్చావచైర్విరహసఙ్గమజైరుదన్తైః .
శృఙ్గారయన్తి హృదయం గురవస్త్వదీయాః .. 8 ..

మాతః సముత్థితవతీమధివిష్ణుచిత్తం
విశ్వోపజీవ్యమమృతం వచసా దుహానామ్.
తాపచ్ఛిదం హిమరుచేరివ మూర్తిమన్యాం
సన్తః పయోధిదుహితుః సహజాం విదుస్త్వామ్ .. 9 ..

తాతస్తు తే మధుభిదః స్తుతిలేశవశ్యాత్
కర్ణామృతైః స్తుతిశతైరనవాప్తపూర్వమ్.
త్వన్మౌళిగన్ధసుభగాముపహృత్య మాలాం
లేభే మహత్తరపదానుగుణం ప్రసాదమ్ .. 10 ..

దిక్ దక్షిణాఽపి పరిపక్త్రిమపుణ్యలభ్యాత్
సర్వోత్తరా భవతి దేవి తవావతారాత్.
యత్రైవ రఙ్గపతినా బహుమానపూర్వం
నిద్రాళునాఽపి నియతం నిహితాః కటాక్షాః .. 11 ..

ప్రాయేణ దేవి భవతీవ్యపదేశయోగాత్
గోదావరీ జగదిదం పయసా పునీతే.
యస్యాం సమేత్య సమయేషు చిరం నివాసాత్
భాగీరథీప్రభృతయోఽపి భవన్తి పుణ్యాః .. 12 ..

నాగేశయః సుతను పక్షిరథః కథం తే
జాతః స్వయంవరపతిః పురుషః పురాణః.
ఏవంవిధాః సముచితం ప్రణయం భవత్యాః
సన్దర్శయన్తి పరిహాసగిరః సఖీనామ్ .. 13 ..

త్వద్భుక్తమాల్యసురభీకృతచారుమౌళే:
హిత్వా భుజాన్తరగతామపి వైజయన్తీమ్.
పత్యుస్తవేశ్వరి మిథః ప్రతిఘాతలోలాః
బర్హాతపత్రరుచిమారచయన్తి భృఙ్గాః .. 14 ..

ఆమోదవత్యపి సదా హృదయఙ్గమాఽపి
రాగాన్వితాఽపి లళితాఽపి గుణోత్తరాపి.
మౌళిస్రజా తవ ముకున్దకిరీటభాజా
గోదే భవత్యధరితా ఖలు వైజయన్తీ .. 15 ..

త్వన్మౌళిదామని విభోః శిరసా గృహీతే
స్వచ్ఛన్దకల్పితసపీతిరసప్రమోదాః.
మఞ్జుస్వనా మధులిహో విదధుః స్వయం తే
స్వాయంవరం కమపి మఙ్గళతూర్యఘోషమ్ .. 16 ..

విశ్వాయమానరజసా కమలేన నాభౌ
వక్షఃస్థలే చ కమలాస్తనచన్దనేన.
ఆమోదితోఽపి నిగమైర్విభురఙియుగ్మే
ధత్తే నతేన శిరసా తవ మౌళిమాలామ్ .. 17 ..

చూడాపదేన పరిగృహ్య తవోత్తరీయం .
మాలామపి త్వదళకైరధివాస్య దత్తామ్.
ప్రాయేణ రఙ్గపతిరేష బిభర్తి గోదే
సౌభాగ్యసమ్పదభిషేకమహాధికారమ్ .. 18 ..

తుఙ్గైరకృత్రిమగిరః స్వయముత్తమాఙ్గైః
యం సర్వగన్ధ ఇతి సాదరముద్వహన్తి.
ఆమోదమన్యమధిగచ్ఛతి మాలికాభిః
సోఽపి త్వదీయకుటిలాళకవాసితాభిః.. 19 ..

ధన్యే సమస్తజగతాం పితురుత్తమాఙ్గే
త్వన్మౌళిమాల్యభరసమ్భరణేన భూయః.
ఇన్దీవరస్రజమివాదధతి త్వదీయా -
న్యాకేకరాణి బహుమానవిలోకితాని .. 20 ..

రఙ్గేశ్వరస్య తవ చ ప్రణయానుబన్ధాత్
అన్యోన్యమాల్యపరివృత్తిమభిష్టువన్తః..

వాచాలయన్తి వసుధే రసికాస్త్రిలోకీం
న్యూనాధికత్వసమతావిషయైర్వివాదైః .. 21 ..

దూర్వాదళప్రతిమయా తవ దేహకాన్త్యా
గోరోచనారుచిరయా చ రుచేన్దిరాయాః.
ఆసీదనుజ్ఝితశిఖావళకణ్ఠశోభం
మాఙ్గళ్యదం ప్రణమతాం మధువైరిగాత్రమ్ .. 22 ..

అర్ఘ్యం సమర్చ్య నియమైర్నిగమప్రసూనైః
నాథం త్వయా కమలయా చ సమేయివాంసమ్.
మాతశ్చిరం నిరవిశన్ నిజమాధిరాజ్యం
మాన్యా మనుప్రభృతయోఽపి మహీక్షితస్తే .. 23 ..

ఆర్ద్రాపరాధిని జనేఽప్యభిరక్షణార్థం
రఙ్గేశ్వరస్య రమయా వినివేద్యమానే.
పార్శ్వే పరత్ర భవతీ యది తత్ర నాసీత్
ప్రాయేణ దేవి వదనం పరివర్తితం స్యాత్ .. 24 ..

గోదే గుణైరపనయన్ ప్రణతాపరాధాన్
భ్రూక్షేప ఏవ తవ భోగరసానుకూలః.
కర్మానుబన్ధిఫలదానరతస్య భర్తుః
స్వాతన్త్ర్యదుర్వ్యసనమర్మభిదానిదానమ్ .. 25 ..

రఙ్గే తటిగుణవతో రమయైవ గోదే
కృష్ణామ్బుదస్య ఘటితాం కృపయా సువృష్ట్యా.
దౌర్గత్యదుర్విషవినాశసుధానదీం త్వాం
సన్తః ప్రపద్య శమయన్త్యచిరేణ తాపాన్ .. 26 ..

జాతాపరాధమపి మామనుకమ్ప్య గోదే
గోప్త్రీ యది త్వమసి యుక్తమిదం భవత్యాః.
వాత్సల్యనిర్భరతయా జననీ కుమారం
స్తన్యేన వర్ధయతి దష్టపయోధరాఽపి .. 27 ..

శతమఖమణినీలా చారుకల్హారహస్తా
స్తనభరనమితాఙ్గీ సాన్ద్రవాత్సల్యసిన్ధుః.
అళకవినిహితాభిః స్రగ్భిరాకృష్టనాథా
విలసతు హృది గోదా విష్ణుచిత్తాత్మజా నః .. 28 ..

ఇతి వికసితభక్తేరుత్థితాం వేఙ్కటేశాత్
బహుగుణరమణీయాం వక్తి గోదాస్తుతిం యః.
స భవతి బహుమాన్యః శ్రీమతో రఙ్గభర్తుః
చరణకమలసేవాం శాశ్వతీమభ్యుపైష్యన్ .. 29 ..

కవితార్కికసింహాయ కల్యాణగుణశాలినే.
శ్రీమతే వేఙ్కటేశాయ వేదాన్తగురవే నమః ..