શ્રીગોદાસ્તુતિઃ

શ્રીગોદાસ્તુતિઃ
શ્રીમાન્ વેઙ્કટનાથાર્યઃ કવિતાર્કિકકેસરી.
વેદાન્તાચાર્યવોં મે સન્નિધત્તાં સદા હૃદિ ..

શ્રીવિષ્ણુચિત્તકુલનન્દનકલ્પવલ્લીં
શ્રીરઙ્ગરાજહરિચન્દનયોગદૃશ્યામ્.
સાક્ષાત્ ક્ષમા કરુણયા કમલામિવાન્યાં
ગોદામનન્યશરણઃ શરણં પ્રપદ્યે .. ૧ ..

વૈદેશિકઃ શ્રુતિગિરામપિ ભૂયસીનાં
વર્ણેષુ માતિ મહિમા ન હિ માદશાં તે.
ઇત્થં વિદન્તમપિ માં સહસૈવ ગોદે
મૌનદ્રુહો મુખરયન્તિ ગુણાસ્ત્વદીયાઃ .. ૨ ..

ત્વત્પ્રેયસઃ શ્રવણયોરમૃતાયમાનાં
તુલ્યાં ત્વદીયમણિનૂપુરશિઞ્જિતાનામ્.
ગોદે ત્વમેવ જનનિ ત્વદભિષ્ટવાહીઁ
વાચં પ્રસન્નમધુરાં મમ સંવિધેહિ .. ૩ ..

કૃષ્ણાન્વયેન દધતીં યમુનાનુભાવં
તીર્થૈર્યથાવદવગાહ્ય સરસ્વતી તે.
ગોદે વિકસ્વરધિયાં ભવતીકટાક્ષાત્
વાચઃ સ્ફુરન્તિ મકરન્દમુચઃ કવીનામ્ .. ૪ ..

અસ્માદૃશામપકૃતૌ ચિરદીક્ષિતાનામ્
અહ્રાય દેવિ દયતે યદસૌ મુકુન્દઃ.
તન્નિશ્ચિતં નિયમિતસ્તવ મૌળિદામ્ના
તન્ત્રીનિનાદમધુરૈશ્ચ ગિરાં નિગુમ્ભૈઃ .. ૫ ..

શોણાઽધરેઽપિ કુચયોરપિ તુઙ્ગભદ્રા
વાચાં પ્રવાહનિવહેઽપિ સરસ્વતી ત્વમ્.
અપ્રાકૃતૈરપિ રસૈર્વિરજા સ્વભાવાત્
ગોદાઽપિ દેવિ કમિતુર્નનુ નર્મદાઽસિ .. ૬ ..

વલ્મીકતઃ શ્રવણતો વસુધાત્મનસ્તે
જાતો બભૂવ સ મુનિઃ કવિસાર્વભૌમઃ.
ગોદે કિમદ્ભતમિદં યદમી સ્વદન્તે
વક્ત્રારવિન્દમકરન્દનિભાઃ પ્રબન્ધાઃ .. ૭ ..

ભોક્તું તવ પ્રિયતમં ભવતીવ ગોદે
ભક્તિં નિજાં પ્રણયભાવનયા ગૃણન્તઃ.
ઉચ્ચાવચૈર્વિરહસઙ્ગમજૈરુદન્તૈઃ .
શૃઙ્ગારયન્તિ હૃદયં ગુરવસ્ત્વદીયાઃ .. ૮ ..

માતઃ સમુત્થિતવતીમધિવિષ્ણુચિત્તં
વિશ્વોપજીવ્યમમૃતં વચસા દુહાનામ્.
તાપચ્છિદં હિમરુચેરિવ મૂર્તિમન્યાં
સન્તઃ પયોધિદુહિતુઃ સહજાં વિદુસ્ત્વામ્ .. ૯ ..

તાતસ્તુ તે મધુભિદઃ સ્તુતિલેશવશ્યાત્
કર્ણામૃતૈઃ સ્તુતિશતૈરનવાપ્તપૂર્વમ્.
ત્વન્મૌળિગન્ધસુભગામુપહૃત્ય માલાં
લેભે મહત્તરપદાનુગુણં પ્રસાદમ્ .. ૧૦ ..

દિક્ દક્ષિણાઽપિ પરિપક્ત્રિમપુણ્યલભ્યાત્
સર્વોત્તરા ભવતિ દેવિ તવાવતારાત્.
યત્રૈવ રઙ્ગપતિના બહુમાનપૂર્વં
નિદ્રાળુનાઽપિ નિયતં નિહિતાઃ કટાક્ષાઃ .. ૧૧ ..

પ્રાયેણ દેવિ ભવતીવ્યપદેશયોગાત્
ગોદાવરી જગદિદં પયસા પુનીતે.
યસ્યાં સમેત્ય સમયેષુ ચિરં નિવાસાત્
ભાગીરથીપ્રભૃતયોઽપિ ભવન્તિ પુણ્યાઃ .. ૧૨ ..

નાગેશયઃ સુતનુ પક્ષિરથઃ કથં તે
જાતઃ સ્વયંવરપતિઃ પુરુષઃ પુરાણઃ.
એવંવિધાઃ સમુચિતં પ્રણયં ભવત્યાઃ
સન્દર્શયન્તિ પરિહાસગિરઃ સખીનામ્ .. ૧૩ ..

ત્વદ્ભુક્તમાલ્યસુરભીકૃતચારુમૌળે:
હિત્વા ભુજાન્તરગતામપિ વૈજયન્તીમ્.
પત્યુસ્તવેશ્વરિ મિથઃ પ્રતિઘાતલોલાઃ
બર્હાતપત્રરુચિમારચયન્તિ ભૃઙ્ગાઃ .. ૧૪ ..

આમોદવત્યપિ સદા હૃદયઙ્ગમાઽપિ
રાગાન્વિતાઽપિ લળિતાઽપિ ગુણોત્તરાપિ.
મૌળિસ્રજા તવ મુકુન્દકિરીટભાજા
ગોદે ભવત્યધરિતા ખલુ વૈજયન્તી .. ૧૫ ..

ત્વન્મૌળિદામનિ વિભોઃ શિરસા ગૃહીતે
સ્વચ્છન્દકલ્પિતસપીતિરસપ્રમોદાઃ.
મઞ્જુસ્વના મધુલિહો વિદધુઃ સ્વયં તે
સ્વાયંવરં કમપિ મઙ્ગળતૂર્યઘોષમ્ .. ૧૬ ..

વિશ્વાયમાનરજસા કમલેન નાભૌ
વક્ષઃસ્થલે ચ કમલાસ્તનચન્દનેન.
આમોદિતોઽપિ નિગમૈર્વિભુરઙિયુગ્મે
ધત્તે નતેન શિરસા તવ મૌળિમાલામ્ .. ૧૭ ..

ચૂડાપદેન પરિગૃહ્ય તવોત્તરીયં .
માલામપિ ત્વદળકૈરધિવાસ્ય દત્તામ્.
પ્રાયેણ રઙ્ગપતિરેષ બિભર્તિ ગોદે
સૌભાગ્યસમ્પદભિષેકમહાધિકારમ્ .. ૧૮ ..

તુઙ્ગૈરકૃત્રિમગિરઃ સ્વયમુત્તમાઙ્ગૈઃ
યં સર્વગન્ધ ઇતિ સાદરમુદ્વહન્તિ.
આમોદમન્યમધિગચ્છતિ માલિકાભિઃ
સોઽપિ ત્વદીયકુટિલાળકવાસિતાભિઃ.. ૧૯ ..

ધન્યે સમસ્તજગતાં પિતુરુત્તમાઙ્ગે
ત્વન્મૌળિમાલ્યભરસમ્ભરણેન ભૂયઃ.
ઇન્દીવરસ્રજમિવાદધતિ ત્વદીયા -
ન્યાકેકરાણિ બહુમાનવિલોકિતાનિ .. ૨૦ ..

રઙ્ગેશ્વરસ્ય તવ ચ પ્રણયાનુબન્ધાત્
અન્યોન્યમાલ્યપરિવૃત્તિમભિષ્ટુવન્તઃ..

વાચાલયન્તિ વસુધે રસિકાસ્ત્રિલોકીં
ન્યૂનાધિકત્વસમતાવિષયૈર્વિવાદૈઃ .. ૨૧ ..

દૂર્વાદળપ્રતિમયા તવ દેહકાન્ત્યા
ગોરોચનારુચિરયા ચ રુચેન્દિરાયાઃ.
આસીદનુજ્ઝિતશિખાવળકણ્ઠશોભં
માઙ્ગળ્યદં પ્રણમતાં મધુવૈરિગાત્રમ્ .. ૨૨ ..

અર્ઘ્યં સમર્ચ્ય નિયમૈર્નિગમપ્રસૂનૈઃ
નાથં ત્વયા કમલયા ચ સમેયિવાંસમ્.
માતશ્ચિરં નિરવિશન્ નિજમાધિરાજ્યં
માન્યા મનુપ્રભૃતયોઽપિ મહીક્ષિતસ્તે .. ૨૩ ..

આર્દ્રાપરાધિનિ જનેઽપ્યભિરક્ષણાર્થં
રઙ્ગેશ્વરસ્ય રમયા વિનિવેદ્યમાને.
પાર્શ્વે પરત્ર ભવતી યદિ તત્ર નાસીત્
પ્રાયેણ દેવિ વદનં પરિવર્તિતં સ્યાત્ .. ૨૪ ..

ગોદે ગુણૈરપનયન્ પ્રણતાપરાધાન્
ભ્રૂક્ષેપ એવ તવ ભોગરસાનુકૂલઃ.
કર્માનુબન્ધિફલદાનરતસ્ય ભર્તુઃ
સ્વાતન્ત્ર્યદુર્વ્યસનમર્મભિદાનિદાનમ્ .. ૨૫ ..

રઙ્ગે તટિગુણવતો રમયૈવ ગોદે
કૃષ્ણામ્બુદસ્ય ઘટિતાં કૃપયા સુવૃષ્ટ્યા.
દૌર્ગત્યદુર્વિષવિનાશસુધાનદીં ત્વાં
સન્તઃ પ્રપદ્ય શમયન્ત્યચિરેણ તાપાન્ .. ૨૬ ..

જાતાપરાધમપિ મામનુકમ્પ્ય ગોદે
ગોપ્ત્રી યદિ ત્વમસિ યુક્તમિદં ભવત્યાઃ.
વાત્સલ્યનિર્ભરતયા જનની કુમારં
સ્તન્યેન વર્ધયતિ દષ્ટપયોધરાઽપિ .. ૨૭ ..

શતમખમણિનીલા ચારુકલ્હારહસ્તા
સ્તનભરનમિતાઙ્ગી સાન્દ્રવાત્સલ્યસિન્ધુઃ.
અળકવિનિહિતાભિઃ સ્રગ્ભિરાકૃષ્ટનાથા
વિલસતુ હૃદિ ગોદા વિષ્ણુચિત્તાત્મજા નઃ .. ૨૮ ..

ઇતિ વિકસિતભક્તેરુત્થિતાં વેઙ્કટેશાત્
બહુગુણરમણીયાં વક્તિ ગોદાસ્તુતિં યઃ.
સ ભવતિ બહુમાન્યઃ શ્રીમતો રઙ્ગભર્તુઃ
ચરણકમલસેવાં શાશ્વતીમભ્યુપૈષ્યન્ .. ૨૯ ..

કવિતાર્કિકસિંહાય કલ્યાણગુણશાલિને.
શ્રીમતે વેઙ્કટેશાય વેદાન્તગુરવે નમઃ ..