દેવી ચતુઃષષ્ટ્યુપચાર પૂજાસ્તોત્રમ્

ઉષસિ માગધમઙ્ગલગાયનૈઃ
ઝટિતિ જાગૃહિ જાગૃહિ જાગૃહિ.
અતિકૃપાર્દ્રકટાક્ષનિરીક્ષણૈઃ
જગદિદં જગદમ્બ સુખીકુરુ .. ૧ ..

કનકમયવિતર્દિશોભમાનં
દિશિ દિશિ પૂર્ણસુવર્ણકુમ્ભયુક્તમ્.
મણિમયમણ્ટપમધ્યમેહિ માતઃ
મયિ કૃપયાશુ સમર્ચનં ગ્રહીતુમ્ .. ૨ ..

કનકકલશશોભમાનશીર્ષં
જલધરલમ્બિ સમુલ્લસત્પતાકમ્.
ભગવતિ તવ સંનિવાસહેતોઃ
મણિમયમન્દિરમેતદર્પયામિ .. ૩ ..

તપનીયમયી સુતૂલિકા
કમનીયા મૃદુલોત્તરચ્છદા.
નવરત્નવિભૂષિતા મયા
શિબિકેયં જગદમ્બ તે અર્પિતા .. ૪ ..

કનકમયવિતર્દિસ્થાપિતે તૂલિકાઢયે
વિવિધકુસુમકીર્ણે કોટિબાલાર્કવર્ણે.
ભગવતિ રમણીયે રત્નસિંહાસને અસ્મિન્
ઉપવિશ પદયુગ્મં હેમપીઠે નિધાય .. ૫ ..

મણિમૌક્તિકનિર્મિતં મહાન્તં
કનકસ્તમ્ભચતુષ્ટયેન યુક્તમ્.
કમનીયતમં ભવાનિ તુભ્યં
નવમુલ્લોચમહં સમર્પયામિ .. ૬ ..

દૂર્વયા સરસિજાન્વિતવિષ્ણુ-
કાન્તયા ચ સહિતં કુસુમાઢ્યમ્.
પદ્મયુગ્મસદૃશે પદયુગ્મે
પાદ્યમેતદુરરીકુરુ માતઃ ..૭..

ગન્ધપુષ્પયવસર્ષપદૂર્વા-
સંયુતં તિલકુશાક્ષતમિશ્રમ્.
હેમપાત્રનિહિતં સહ રત્નૈઃ
અધ્યર્મેતદુરરીકુરુ માતઃ .. ૮ ..

જલજદ્યુતિના કરેણ જાતી-
ફલતક્કોલલવઙ્ગગન્ધયુક્તૈઃ.
અમૃતૈરમૃતૌરિવાતિશીતૈઃ
ભગવત્યાચમનં વિધીયતામ્ .. ૯ ..

નિહિતં કનકસ્ય સંપુટે
પિહિતં રત્નપિધાનકેન યત્.
તદિદં જગદમ્બ તે અર્પિતં
મધુપર્કં જનનિ પ્રગૃહ્યતામ્ .. ૧૦ ..

એતચ્ચમ્પકતૈલમમ્બ વિવિધૈઃ પુષ્પૈઃ મુહુર્વાસિતં
ન્યસ્તં રત્નમયે સુવર્ણચષકે ભૃઙ્ગૈઃ ભ્રમદ્ભિઃ વૃતમ્.
સાનન્દં સુરસુન્દરીભિરભિતો હસ્તૈઃ ધૃતં તે મયા
કેશેષુ ભ્રમરભ્રમેષુ સકલેષ્વઙ્ગેષુ ચાલિપ્યતે .. ૧૧ ..

'
માતઃ કુઙ્કુમપઙ્કનિર્મિતમિદં દેહે તવોદ્વર્તનં
ભક્ત્યાહં કલયામિ હેમરજસા સંમિશ્રિતં કેસરૈઃ.
કેશાનામલકૈઃ વિશોધ્ય વિશદાન્કસ્તૂરિકોદઞ્ચિતૈઃ
સ્નાનં તે નવરત્નકુમ્ભસહિતૈઃ સંવાસિતોષ્ણોદકૈઃ .. ૧૨ ..

દુધિદુગ્ધઘૃતૈઃ સમાક્ષિકૈઃ
સિતયા શર્કરયા સમન્વિતૈઃ.
સ્નપયામિ તવાહમાદરાત્
જનનિ ત્વાં પુનરુષ્ણવારિભિઃ .. ૧૩ ..'
એલોશીરસુવાસિતૈઃ સકુસુમૈર્ગઙ્ગાદિ તીર્થોદકૈઃ
માણિક્યામલમૌક્તિકામૃતરસૈઃ સ્વચ્છૈઃ સુવર્ણોદકૈઃ.
મન્ત્રાન્વૈદિકતાન્ત્રિકાન્પરિપઠન્સાનન્દમત્યાદરાત્
સ્નાનં તે પરિકલ્પયામિ જનનિ સ્નેહાત્ત્વમઙ્ગીકુરુ .. ૧૪ ..

બાલાર્કદ્યુતિ દાડિમીયકુસુમપ્રસ્પર્ધિ સર્વોત્તમં
માતસ્ત્વં પરિધેહિ દિવ્યવસનં ભક્ત્યા મયા કલ્પિતમ્.
મુક્તાભિઃ ગ્રથિતં સુકઞ્ચુકમિદં સ્વીકૃત્ય પીતપ્રભં
તપ્તસ્વર્ણસમાનવર્ણમતુલં પ્રાવર્ણમઙ્ગીકુરુ .. ૧૫ ..

નવરત્નમયે મયાર્પિતે
કમનીયે તપનીયપાદુકે.
સવિલાસમિદં પદદ્વયં
કૃપયા દેવિ તયોર્નિધીયતામ્ .. ૧૬ ..

બહુભિરગરુધૂપૈઃ સાદરં ધૂપયિત્વા
ભગવતિ તવ કેશાન્કઙ્કતૈર્માર્જયિત્વા.
સુરભિભિરરવિન્દૈશ્ચમ્પકૈશ્ચાર્ચયિત્વા
ઝટિતિ કનકસૂત્રૈર્જૂટયન્વેષ્ટયામિ .. ૧૭ ..

સૌવીરાઞ્જનમિદમમ્બ ચક્ષુષોસ્તે
વિન્યસ્તં કનકશલાકયા મયા યત્.
તન્ન્યૂનં મલિનમપિ ત્વદક્ષિસઙ્ગાત્
બ્રહ્મેન્દ્રાદ્યભિલષણીયતામિયાય .. ૧૮ ..

મઞ્જીરે પદયોર્નિધાય રુચિરાં વિન્યસ્ય કાઞ્ચીં કટૌ
મુક્તાહારમુરોજયોરનુપમાં નક્ષત્રમાલાં ગલે.
કેયૂરાણિ ભુજેષુ રત્નવલયશ્રેણીં કરેષુ ક્રમા-
ત્તાટઙ્કે તવ કર્ણયોર્વિનિદધે શીર્ષે ચ ચૂડામણિમ્ .. ૧૯ ..

ધમ્મિલ્લે તવ દેવિ હેમકુસુમાન્યાધાય ફાલસ્થલે
મુક્તારાજિવિરાજમાનતિલકં નાસાપુટે મૌક્તિકમ્.
માતર્મૌક્તિકજાલિકાં ચ કુચયોઃ સર્વાઙ્ગુલીષૂર્મિકાઃ
કટખાં કાઞ્ચનકિઙ્કિણીર્વિનિદધે રત્નાવતંસં શ્રુતૌ .. ૨૦ ..

માતઃ ફાલતલે તવાતિવિમલે કાશ્મીરકસ્તૂરિકા-
કર્પૂરાગરુભિઃ કરોમિ તિલકં દેહે અઙ્ગરાગં તતઃ.
વક્ષોજાદિષુ યક્ષકર્દમરસં સિક્ત્વા ચ પુષ્પદ્રવં
પાદૌ ચન્દનલેપનાદિભિરહં સંપૂજયામિ ક્રમાત્ .. ૨૧ ..

રત્નાક્ષતૈસ્ત્વાં પરિપૂજયામિ
મુક્તાફલૈર્વા રુચિરૈરવિદ્ધૈઃ.
અખણ્ડિતૈર્દેવિ યવાદિભિર્વા
કાશ્મીરપઙ્કાઙ્કિતતણ્ડુલૈર્વા .. ૨૨ ..

જનનિ ચમ્પકતલૈમિદં પુરો
મૃગમદોપયુતં પટવાસકમ્.
સુરભિગન્ધમિદં ચ ચતુઃસમં
સપદિ સર્વમિદં પરિગૃહ્યતામ્ .. ૨૩ ..

સીમન્તે તે ભગવતિ મયા સાદરં ન્યસ્તમેતત્
સિન્દૂરં મે હૃદયકમલે હર્ષવર્ષં તનોતિ.
બાલાદિત્યદ્યુતિરિવ સદા લોહિતા યસ્ય કાન્તી-
રન્તર્ધ્વાન્તં હરતિ સકલં ચેતસા ચિન્તયૈવ .. ૨૪ ..

મન્દારકુન્દકરવીરલવઙ્ગપુષ્પૈઃ
ત્વાં દેવિ સન્તતં અહં પરિપૂજયામિ.
જાતીજપાવકુલચમ્પકકેતકાદિ-
નાનાવિધાનિ કુસુમાનિ ચ તે અર્પયામિ .. ૨૫ ..

માલતીવકુલહેમપુષ્પિકા-
કાઞ્ચનારકરવીરકૈતકૈઃ.
કર્ણિકારગિરિકર્ણિકાદિભિઃ
પૂજયામિ જગદમ્બ તે વપુઃ .. ૨૬ ..

પારિજાતશતપત્રપાટલૈઃ
મલ્લિકાવકુલચમ્પકાદિભિઃ.
અમ્બુજૈઃ સુકુસુમૈશ્ચ સાદરં
પૂજયામિ જગદમ્બ તે વપુઃ .. ૨૭ ..

લાક્ષાસંમિલિતૈઃ સિતાભ્રસહિતૈઃ શ્રીવાસસંમિશ્રિતૈઃ
કર્પૂરાકલિતૈઃ શિરૈર્મધુયુતૈર્ગોસર્પિષા લોડિતૈઃ.
શ્રીખણ્ડાગરુગુગ્ગુલુપ્રભૃતિભિર્નાનાવિધૈર્વસ્ત્તુભિઃ
ધૂપં તે પરિકલ્પયામિ જનનિ સ્નેહાત્ત્વમઙ્ગીકુરુ .. ૨૮ ..

રત્નાલંકૃતહેમપાત્રનિહિતૈર્ગોસર્પિષા લોડિતૈઃ
દીપૈર્દીર્ઘતરાન્ધકારભિદુરૈર્બાલાર્કકોટિપ્રભૈઃ.
આતામ્રજ્વલદુજ્જ્વલપ્રવિલસદ્રત્નપ્રદીપૈસ્તથા
માતસ્ત્વામહમાદરાદનુદિનં નીરાજયામ્યુચ્ચકૈઃ .. ૨૯ ..

માતસ્ત્વાં દધિદુગ્ધપાયસમહાશાલ્યન્નસંતાનિકાઃ
સૂપાપૂપસિતાઘૃતૈઃ સવટકૈઃ સક્ષૌદ્રરમ્ભાફલૈઃ.
એલાજીરકહિઙ્ગુનાગરનિશાકુસ્તુમ્ભરીસંસ્કૃતૈઃ
શાકૈઃ સાકમહં સુધાધિકરસૈઃ સંતર્પયામ્યર્ચયન્ .. ૩૦ ..

સાપૂપસૂપદધિદુગ્ધસિતાઘૃતાનિ
સુસ્વાદુભક્તપરમાન્નપુરઃસરાણિ.
શાકોલ્લસન્મરિચિજીરકબાહ્નિકાનિ
ભક્ષ્યાણિ ભુઙ્ક્ષ્વ જગદમ્બ મયાર્પિતાનિ .. ૩૧ ..

ક્ષીરમેતદિદંમુત્તમોત્તમં
પ્રાજ્યમાજ્યમિદમુજ્જ્વલં મધુ.
માતરેતદમૃતોપમં પયઃ
સંભ્રમેણ પરિપીયતાં મુહુઃ .. ૩૨ ..

ઉષ્ણોદકૈઃ પાણિયુગં મુખં ચ
પ્રક્ષાલ્ય માતઃ કલધૌતપાત્રે.
કર્પૂરમિશ્રેણ સકુઙ્કુમેન
હસ્તૌ સમુદ્વર્તય ચન્દનેન .. ૩૩ ..

અતિશીતમુશીરવાસિતં
તપનીયે કલશે નિવેશિતમ્.
પટપૂતમિદં જિતામૃતં
શુચિ ગઙ્ગાજલમમ્બ પીયતામ્ .. ૩૪ ..

જમ્બવામ્રરમ્ભાફલસંયુતાનિ
દ્રાક્ષાફલક્ષૌદ્રસમન્વિતાનિ.
સનારિકેલાનિ સદાડિમાનિ
ફલાનિ તે દેવિ સમર્પયામિ .. ૩૫ ..

કૂશ્માણ્ડકોશાતકિસંયુતાનિ
જમ્બીરનારઙ્ગસમન્વિતાનિ.
સબીજપૂરાણિ સબાદરાણિ
ફલાનિ તે દેવિ સમર્પયામિ .. ૩૬ ..

કર્પૂરેણ યુતૈર્લવઙ્ગસહિતૈસ્તક્કોલચૂર્ણાન્વિતૈઃ
સુસ્વાદુક્રમુકૈઃ સગૌરખદિરૈઃ સુસ્નિગ્ધજાતીફલૈઃ.
માતઃ કૈતકપત્રપાણ્ડુરુચિભિસ્તામ્બૂલવલ્લીદલૈઃ
સાનન્દં મુખમણ્ડનાર્થમતુલં તામ્બૂલમઙ્ગીકુરુ .. ૩૭ ..

એલાલવઙ્ગાદિસમન્વિતાનિ
તક્કોલકર્પૂરવિમિશ્રિતાનિ.
તામ્બૂલવલ્લીદલસંયુતાનિ
પૂગાનિ તે દેવિ સમર્પયામિ .. ૩૮ ..

તામ્બૂલનિર્જિતસુતપ્તસુવર્ણવર્ણં
સ્વર્ણાક્તપૂગફલમૌક્તિકચૂર્ણયુક્તમ્.
સૌવર્ણપાત્રનિહિતં ખદિરેન સાર્ધં
તામ્બૂલમમ્બ વદનામ્બુરુહે ગૃહાણ .. ૩૯ ..

મહતિ કનકપાત્રે સ્થાપયિત્વા વિશાલાન્
ડમરુસદૃશરૂપાન્બદ્ધગોધૂમદીપાન્.
બહુઘૃતમથ તેષુ ન્યસ્ય દીપાન્પ્રકૃષ્ટા-
ન્ભુવનજનનિ કુર્વે નિત્યમારાર્તિકં તે .. ૪૦ ..

સવિનયમથ દત્વા જાનુયુગ્મં ધરણ્યાં
સપદિ શિરસિ ધૃત્વા પાત્રમારાર્તિકસ્ય.
મુખકમલસમીપે તે અમ્બ સાર્થં ત્રિવારં
ભ્રમયતિ મયિ ભૂયાત્તે કૃપાર્દ્રઃ કટાક્ષઃ .. ૪૧ ..

ત્રિભુવનકમનીયૈઃ પૂજયિત્વા ચ વસ્ત્રૈઃ.
મિલિતવિવિધમુક્તાં દિવ્યમાણિક્યયુક્તાં
જનનિ કનકવૃષ્ટિં દક્ષિણાં તે અર્પયામિ .. ૪૨ ..

માતઃ કાઞ્ચનદણ્ડમણ્ડિતમિદં પૂર્ણેન્દુબિમ્બપ્રભં
નાનારત્નવિશોભિહેમકલશં લોકત્રયાહ્લાદકમ્.
ભાસ્વન્મૌક્તિકજાલિકાપરિવૃતં પ્રીત્યાત્મહસ્તે ધૃતં
છત્રં તે પરિકલ્પયામિ શિરસિ ત્વષ્ટ્રા સ્વયં નિર્મિતમ્ .. ૪૩ ..

શરદિન્દુમરીચિગૌરબર્ણૈ-
ર્મણિમુક્તાવિલસત્સુવર્ણદણ્ડૈઃ.
જગદમ્બ વિચિત્રચામરૈસ્ત્વા-
મહમાનન્દભરેણ બીજયામિ .. ૪૪ ..

માર્તાણ્ડમણ્ડલનિભો જગદમ્બ યો અયં
ભક્ત્યા મયા મણિમયો મુકુરો અર્પિતસ્તે.
પૂર્ણેન્દુબિમ્બરુચિરં વદનં સ્વકીય-
મસ્મિન્વિલોકય વિલોલવિલોચને ત્વમ્ .. ૪૫ ..

ઇન્દ્રાદયો નતિનતૈર્મકુટપ્રદીપૈ-
ર્નીરાજયન્તિ સતતં તવ પાદપીઠમ્.
તસ્માદહં તવ સમસ્તશરીરમેત-
ન્નીરાજયામિ જગદમ્બ સહસ્રદીપૈઃ .. ૪૬ ..

પ્રિયગતિરતિતુઙ્ગો રત્નપલ્યાણયુક્તઃ
કનકમયવિભૂષઃ સ્નિગ્ધગમ્ભીરઘોષઃ.
ભગવતિ કલિતો અયં વાહનાર્થં મયા તે
તુરગશતસમેતો વાયુવેગસ્તુરંગઃ .. ૪૭ ..

મધુકરવૃતકુમ્ભન્યસ્તસિન્દૂરરેણુઃ
કનકકલિતઘણ્ટાકિઙ્કણીશોભિકણ્ઠઃ.
શ્રવણયુગલચઞ્ચચ્ચામરો મેઘતુલ્યો
જનનિ તવ મુદે સ્યાન્મત્તમાતઙ્ગ એષઃ .. ૪૮ ..

દ્રુતતરતુરગૈર્વિરાજમાનં
મણિમયચક્રચતુષ્ટયેન યુક્તમ્.
કનકમયમમું વિતાનવન્તં
ભગવતિ તે હિ રથં સમર્પયામિ .. ૪૯ ..

હયગજરથપત્તિશોભમાનં
દિશિ દિશિ દુન્દુભિમેઘનાદયુક્તમ્.
અતિબહુ ચતુરઙ્ગસૈન્યમેત-
દ્ભગવતિ ભક્તિભરેણ તે અર્પયામિ .. ૫૦ ..

પરિઘીકૃતસપ્તસાગરં
બહુસંપત્સહિતં મયામ્બ તે વિપુલમ્.
પ્રબલં ધરણીતલાભિધં
દૃઢદુર્ગં નિખિલં સમર્પયામિ .. ૫૧ ..

શતપત્રયુતૈઃ સ્વભાવશીતૈઃ
અતિસૌરભ્યયુતૈઃ પરાગપીતૈઃ.
ભ્રમરીમુખરીકૃતૈરનન્તૈઃ
વ્યજનૈસ્ત્વાં જગદમ્બ વીજયામિ .. ૫૨ ..

ભ્રમરલુલિતલોલકુન્તલાલી-
વિગલિતમાલ્યવિકીર્ણરઙ્ગભૂમિઃ.
ઇયમતિરુચિરા નટી નટન્તી
તવ હૃદયે મુદમાતનોતુ માતઃ .. ૫૩ ..

મુખનયનવિલાસલોલવેણી-
વિલસિતનિર્જિતલોલભૃઙ્ગમાલાઃ.
યુવજનસુખકારિચારુલીલા
ભગવતિ તે પુરતો નટન્તિ બાલાઃ .. ૫૪ ..

ભ્રમદલિકુલતુલ્યાલોલધમ્મિલ્લભારાઃ
સ્મિતમુખકમલોદ્યદ્દિવ્યલાવણ્યપૂરાઃ.
અનુપમિતસુવેષા વારયોષા નટન્તિ
પરભૃતકલકણ્ઠ્યો દેવિ દૈન્યં ધુનોતુ .. ૫૫ ..

ડમરુડિણ્ડિમજર્ઝરઝલ્લરી-
મૃદુરવદ્રગડદ્દ્રગડાદયઃ.
ઝટિતિ ઝાઙ્કૃતઝાઙ્કૃતઝાઙ્કૃતૈઃ
બહુદયં હૃદયં સુખયન્તુ તે .. ૫૬ ..

વિપઞ્ચીષુ સપ્તસ્વરાન્વાદયન્ત્ય-
સ્તવ દ્વારિ ગાયન્તિ ગન્ધર્વકન્યાઃ.
ક્ષણં સાવધાનેન ચિત્તેન માતઃ
સમાકર્ણય ત્વં મયા પ્રાર્થિતાસિ .. ૫૭ ..

અભિનયકમનીયૈર્નર્તનૈર્નર્તકીનાં
ક્ષનમપિ રમયિત્વા ચેત એતત્ત્વદીયમ્.
સ્વયમહમતિચિતૈર્નૃત્તવાદિત્રગીતૈઃ
ભગવતિ ભવદીયં માનસં રઞ્જયામિ .. ૫૮ ..

તવ દેવિ ગુણાનુવર્ણને
ચતુરા નો ચતુરાનનાદયઃ.
તદિહૈકમુખેષુ જન્તુષુ
સ્તવનં કસ્તવ કર્તુમીશ્વરઃ .. ૫૯ ..

પદે પદે યત્પરિપૂજકેભ્યઃ સદ્યો અશ્વમેધાદિફલં દદાતિ.
તત્સર્વપાપક્ષય હેતુભૂતં પ્રદક્ષિણં તે પરિતઃ કરોમિ .. ૬૦ ..

રક્તોત્પલારક્તલતાપ્રભાભ્યાં ધ્વજોર્ધ્વરેખાકુલિશાઙ્કિતાભ્યામ્.
અશેષબૃન્દારકવન્દિતાભ્યાં નમો ભવાનીપદપઙ્કજાભ્યામ્ .. ૬૧ ..

ચરણનલિનયુગ્મં પઙ્કજૈઃ પૂજયિત્વા
કનકકમલમાલાં કન્ઠદેશે અર્પયિત્વા.
શિરસિ વિનિહિતો અયં રત્નપુષ્પાઞ્જલિસ્તે
હૃદયકમલમધ્યે દેવિ હર્ષં તનોતુ .. ૬૨ ..

કનકમયવિતાનરાજમાને.
પ્રસરદગરુધૂપધૂપિતે અસ્મિ-
ન્ભગવતિ ભવને અસ્તુ તે નિવાસઃ .. ૬૩ ..

એતસ્મિન્મણિખચિતે સુવર્ણપીઠે
ત્રૈલોક્યાભયવરદૌ નિધાય હસ્તૌ.
વિસ્તીર્ણે મૃદુલતરોત્તરચ્છદે અસ્મિ-
ન્પર્યઙ્કે કનકમયે નિષીદ માતઃ .. ૬૪ ..

તવ દેવિ સરોજચિહ્નયોઃ પદયોર્નિર્જિતપદ્મરાગયોઃ.
અતિરક્તતરૈરલક્તકૈઃ પુનરુક્તાં રચયામિ રક્તતામ્ .. ૬૫ ..

તપનીયમયે હિ પટ્ટકે મુખગણ્ડૂચજલં વિધીયતામ્ .. ૬૬ ..

ક્ષણમથ જગદમ્બ મઞ્ચકે અસ્મિ-
ન્મૃદુતલતૂલિકયા વિરાજમાને.
અતિરહસિ મુદા શિવેન સાર્ધં
સુખશયનં કુરુ તત્ર માં સ્મરન્તી .. ૬૭ ..

મુક્તાકુન્દેન્દુગૌરાં મણિમયકુટાં રત્નતાટઙ્કયુક્તા-
મક્ષસ્રક્પુષ્પહસ્તામભયવરકરાં ચન્દ્રચૂડાં ત્રિનેત્રામ્.
નાનાલંકારયુક્તાં સુરમકુટમણિદ્યોતિતસ્વર્ણપીઠાં
સાનન્દાં સુપ્રસન્નાં ત્રિભુવનજનનીં ચેતસા ચિન્તયામિ .. ૬૮ ..

એષા ભક્ત્યા તવ વિરચિતા યા મયા દેવિ પૂજા
સ્વીકૃત્યૈનાં સપદિ સકલાન્મે અપરાધાન્ક્ષમસ્વ.
ન્યૂનં યત્તત્તવ કરુણયા પૂર્ણતામેતુ સદ્યઃ
સાનન્દં મે હૃદયકમલે તે અસ્તુ નિત્યં નિવાસઃ .. ૬૯ ..

પૂજામિમાં યઃ પઠતિ પ્રભાતે
મધ્યાહ્નકાલે યદિ વા પ્રદોષે.
ધ્રમાર્થકામાન્પુરુષો અભ્યુપૈતિ
દેહાવસાને શિવભાવમેતિ .. ૭૦ ..

પૂજામિમાં પઠેન્નિત્યં પૂજાં કર્તુમનીશ્વરઃ.
પૂજાફલમવાપ્નોતિ વાઞ્છિતાર્થં ચ વિન્દતિ .. ૭૧ ..

પ્રત્યહં ભક્તિસંયુક્તો યઃ પૂજનમિદં પઠેત્.
વાગ્વાદિન્યાઃ પ્રસાદેન વત્સરાત્સ કવિર્ભવેત્ .. ૭૨ ..

.. ઇતિ શ્રીમત્પરમહંસપરિવ્રાજકાચાર્યસ્ય શ્રીગોવિન્દભગવત્પૂજ્યપાદશિષ્યસ્ય શ્રીમચ્છઙ્કરભગવતઃ કૃતૌ દેવીચતુઃષષ્ટ્યુપચારપૂજાસ્તોત્રં સમ્પૂર્ણમ્ ..