ದೇವೀ ಚತುಃಷಷ್ಟ್ಯುಪಚಾರ ಪೂಜಾಸ್ತೋತ್ರಮ್

ಉಷಸಿ ಮಾಗಧಮಙ್ಗಲಗಾಯನೈಃ
ಝಟಿತಿ ಜಾಗೃಹಿ ಜಾಗೃಹಿ ಜಾಗೃಹಿ.
ಅತಿಕೃಪಾರ್ದ್ರಕಟಾಕ್ಷನಿರೀಕ್ಷಣೈಃ
ಜಗದಿದಂ ಜಗದಮ್ಬ ಸುಖೀಕುರು .. ೧ ..

ಕನಕಮಯವಿತರ್ದಿಶೋಭಮಾನಂ
ದಿಶಿ ದಿಶಿ ಪೂರ್ಣಸುವರ್ಣಕುಮ್ಭಯುಕ್ತಮ್.
ಮಣಿಮಯಮಣ್ಟಪಮಧ್ಯಮೇಹಿ ಮಾತಃ
ಮಯಿ ಕೃಪಯಾಶು ಸಮರ್ಚನಂ ಗ್ರಹೀತುಮ್ .. ೨ ..

ಕನಕಕಲಶಶೋಭಮಾನಶೀರ್ಷಂ
ಜಲಧರಲಮ್ಬಿ ಸಮುಲ್ಲಸತ್ಪತಾಕಮ್.
ಭಗವತಿ ತವ ಸಂನಿವಾಸಹೇತೋಃ
ಮಣಿಮಯಮನ್ದಿರಮೇತದರ್ಪಯಾಮಿ .. ೩ ..

ತಪನೀಯಮಯೀ ಸುತೂಲಿಕಾ
ಕಮನೀಯಾ ಮೃದುಲೋತ್ತರಚ್ಛದಾ.
ನವರತ್ನವಿಭೂಷಿತಾ ಮಯಾ
ಶಿಬಿಕೇಯಂ ಜಗದಮ್ಬ ತೇ ಅರ್ಪಿತಾ .. ೪ ..

ಕನಕಮಯವಿತರ್ದಿಸ್ಥಾಪಿತೇ ತೂಲಿಕಾಢಯೇ
ವಿವಿಧಕುಸುಮಕೀರ್ಣೇ ಕೋಟಿಬಾಲಾರ್ಕವರ್ಣೇ.
ಭಗವತಿ ರಮಣೀಯೇ ರತ್ನಸಿಂಹಾಸನೇ ಅಸ್ಮಿನ್
ಉಪವಿಶ ಪದಯುಗ್ಮಂ ಹೇಮಪೀಠೇ ನಿಧಾಯ .. ೫ ..

ಮಣಿಮೌಕ್ತಿಕನಿರ್ಮಿತಂ ಮಹಾನ್ತಂ
ಕನಕಸ್ತಮ್ಭಚತುಷ್ಟಯೇನ ಯುಕ್ತಮ್.
ಕಮನೀಯತಮಂ ಭವಾನಿ ತುಭ್ಯಂ
ನವಮುಲ್ಲೋಚಮಹಂ ಸಮರ್ಪಯಾಮಿ .. ೬ ..

ದೂರ್ವಯಾ ಸರಸಿಜಾನ್ವಿತವಿಷ್ಣು-
ಕಾನ್ತಯಾ ಚ ಸಹಿತಂ ಕುಸುಮಾಢ್ಯಮ್.
ಪದ್ಮಯುಗ್ಮಸದೃಶೇ ಪದಯುಗ್ಮೇ
ಪಾದ್ಯಮೇತದುರರೀಕುರು ಮಾತಃ ..೭..

ಗನ್ಧಪುಷ್ಪಯವಸರ್ಷಪದೂರ್ವಾ-
ಸಂಯುತಂ ತಿಲಕುಶಾಕ್ಷತಮಿಶ್ರಮ್.
ಹೇಮಪಾತ್ರನಿಹಿತಂ ಸಹ ರತ್ನೈಃ
ಅಧ್ಯರ್ಮೇತದುರರೀಕುರು ಮಾತಃ .. ೮ ..

ಜಲಜದ್ಯುತಿನಾ ಕರೇಣ ಜಾತೀ-
ಫಲತಕ್ಕೋಲಲವಙ್ಗಗನ್ಧಯುಕ್ತೈಃ.
ಅಮೃತೈರಮೃತೌರಿವಾತಿಶೀತೈಃ
ಭಗವತ್ಯಾಚಮನಂ ವಿಧೀಯತಾಮ್ .. ೯ ..

ನಿಹಿತಂ ಕನಕಸ್ಯ ಸಂಪುಟೇ
ಪಿಹಿತಂ ರತ್ನಪಿಧಾನಕೇನ ಯತ್.
ತದಿದಂ ಜಗದಮ್ಬ ತೇ ಅರ್ಪಿತಂ
ಮಧುಪರ್ಕಂ ಜನನಿ ಪ್ರಗೃಹ್ಯತಾಮ್ .. ೧೦ ..

ಏತಚ್ಚಮ್ಪಕತೈಲಮಮ್ಬ ವಿವಿಧೈಃ ಪುಷ್ಪೈಃ ಮುಹುರ್ವಾಸಿತಂ
ನ್ಯಸ್ತಂ ರತ್ನಮಯೇ ಸುವರ್ಣಚಷಕೇ ಭೃಙ್ಗೈಃ ಭ್ರಮದ್ಭಿಃ ವೃತಮ್.
ಸಾನನ್ದಂ ಸುರಸುನ್ದರೀಭಿರಭಿತೋ ಹಸ್ತೈಃ ಧೃತಂ ತೇ ಮಯಾ
ಕೇಶೇಷು ಭ್ರಮರಭ್ರಮೇಷು ಸಕಲೇಷ್ವಙ್ಗೇಷು ಚಾಲಿಪ್ಯತೇ .. ೧೧ ..

'
ಮಾತಃ ಕುಙ್ಕುಮಪಙ್ಕನಿರ್ಮಿತಮಿದಂ ದೇಹೇ ತವೋದ್ವರ್ತನಂ
ಭಕ್ತ್ಯಾಹಂ ಕಲಯಾಮಿ ಹೇಮರಜಸಾ ಸಂಮಿಶ್ರಿತಂ ಕೇಸರೈಃ.
ಕೇಶಾನಾಮಲಕೈಃ ವಿಶೋಧ್ಯ ವಿಶದಾನ್ಕಸ್ತೂರಿಕೋದಞ್ಚಿತೈಃ
ಸ್ನಾನಂ ತೇ ನವರತ್ನಕುಮ್ಭಸಹಿತೈಃ ಸಂವಾಸಿತೋಷ್ಣೋದಕೈಃ .. ೧೨ ..

ದುಧಿದುಗ್ಧಘೃತೈಃ ಸಮಾಕ್ಷಿಕೈಃ
ಸಿತಯಾ ಶರ್ಕರಯಾ ಸಮನ್ವಿತೈಃ.
ಸ್ನಪಯಾಮಿ ತವಾಹಮಾದರಾತ್
ಜನನಿ ತ್ವಾಂ ಪುನರುಷ್ಣವಾರಿಭಿಃ .. ೧೩ ..'
ಏಲೋಶೀರಸುವಾಸಿತೈಃ ಸಕುಸುಮೈರ್ಗಙ್ಗಾದಿ ತೀರ್ಥೋದಕೈಃ
ಮಾಣಿಕ್ಯಾಮಲಮೌಕ್ತಿಕಾಮೃತರಸೈಃ ಸ್ವಚ್ಛೈಃ ಸುವರ್ಣೋದಕೈಃ.
ಮನ್ತ್ರಾನ್ವೈದಿಕತಾನ್ತ್ರಿಕಾನ್ಪರಿಪಠನ್ಸಾನನ್ದಮತ್ಯಾದರಾತ್
ಸ್ನಾನಂ ತೇ ಪರಿಕಲ್ಪಯಾಮಿ ಜನನಿ ಸ್ನೇಹಾತ್ತ್ವಮಙ್ಗೀಕುರು .. ೧೪ ..

ಬಾಲಾರ್ಕದ್ಯುತಿ ದಾಡಿಮೀಯಕುಸುಮಪ್ರಸ್ಪರ್ಧಿ ಸರ್ವೋತ್ತಮಂ
ಮಾತಸ್ತ್ವಂ ಪರಿಧೇಹಿ ದಿವ್ಯವಸನಂ ಭಕ್ತ್ಯಾ ಮಯಾ ಕಲ್ಪಿತಮ್.
ಮುಕ್ತಾಭಿಃ ಗ್ರಥಿತಂ ಸುಕಞ್ಚುಕಮಿದಂ ಸ್ವೀಕೃತ್ಯ ಪೀತಪ್ರಭಂ
ತಪ್ತಸ್ವರ್ಣಸಮಾನವರ್ಣಮತುಲಂ ಪ್ರಾವರ್ಣಮಙ್ಗೀಕುರು .. ೧೫ ..

ನವರತ್ನಮಯೇ ಮಯಾರ್ಪಿತೇ
ಕಮನೀಯೇ ತಪನೀಯಪಾದುಕೇ.
ಸವಿಲಾಸಮಿದಂ ಪದದ್ವಯಂ
ಕೃಪಯಾ ದೇವಿ ತಯೋರ್ನಿಧೀಯತಾಮ್ .. ೧೬ ..

ಬಹುಭಿರಗರುಧೂಪೈಃ ಸಾದರಂ ಧೂಪಯಿತ್ವಾ
ಭಗವತಿ ತವ ಕೇಶಾನ್ಕಙ್ಕತೈರ್ಮಾರ್ಜಯಿತ್ವಾ.
ಸುರಭಿಭಿರರವಿನ್ದೈಶ್ಚಮ್ಪಕೈಶ್ಚಾರ್ಚಯಿತ್ವಾ
ಝಟಿತಿ ಕನಕಸೂತ್ರೈರ್ಜೂಟಯನ್ವೇಷ್ಟಯಾಮಿ .. ೧೭ ..

ಸೌವೀರಾಞ್ಜನಮಿದಮಮ್ಬ ಚಕ್ಷುಷೋಸ್ತೇ
ವಿನ್ಯಸ್ತಂ ಕನಕಶಲಾಕಯಾ ಮಯಾ ಯತ್.
ತನ್ನ್ಯೂನಂ ಮಲಿನಮಪಿ ತ್ವದಕ್ಷಿಸಙ್ಗಾತ್
ಬ್ರಹ್ಮೇನ್ದ್ರಾದ್ಯಭಿಲಷಣೀಯತಾಮಿಯಾಯ .. ೧೮ ..

ಮಞ್ಜೀರೇ ಪದಯೋರ್ನಿಧಾಯ ರುಚಿರಾಂ ವಿನ್ಯಸ್ಯ ಕಾಞ್ಚೀಂ ಕಟೌ
ಮುಕ್ತಾಹಾರಮುರೋಜಯೋರನುಪಮಾಂ ನಕ್ಷತ್ರಮಾಲಾಂ ಗಲೇ.
ಕೇಯೂರಾಣಿ ಭುಜೇಷು ರತ್ನವಲಯಶ್ರೇಣೀಂ ಕರೇಷು ಕ್ರಮಾ-
ತ್ತಾಟಙ್ಕೇ ತವ ಕರ್ಣಯೋರ್ವಿನಿದಧೇ ಶೀರ್ಷೇ ಚ ಚೂಡಾಮಣಿಮ್ .. ೧೯ ..

ಧಮ್ಮಿಲ್ಲೇ ತವ ದೇವಿ ಹೇಮಕುಸುಮಾನ್ಯಾಧಾಯ ಫಾಲಸ್ಥಲೇ
ಮುಕ್ತಾರಾಜಿವಿರಾಜಮಾನತಿಲಕಂ ನಾಸಾಪುಟೇ ಮೌಕ್ತಿಕಮ್.
ಮಾತರ್ಮೌಕ್ತಿಕಜಾಲಿಕಾಂ ಚ ಕುಚಯೋಃ ಸರ್ವಾಙ್ಗುಲೀಷೂರ್ಮಿಕಾಃ
ಕಟಖಾಂ ಕಾಞ್ಚನಕಿಙ್ಕಿಣೀರ್ವಿನಿದಧೇ ರತ್ನಾವತಂಸಂ ಶ್ರುತೌ .. ೨೦ ..

ಮಾತಃ ಫಾಲತಲೇ ತವಾತಿವಿಮಲೇ ಕಾಶ್ಮೀರಕಸ್ತೂರಿಕಾ-
ಕರ್ಪೂರಾಗರುಭಿಃ ಕರೋಮಿ ತಿಲಕಂ ದೇಹೇ ಅಙ್ಗರಾಗಂ ತತಃ.
ವಕ್ಷೋಜಾದಿಷು ಯಕ್ಷಕರ್ದಮರಸಂ ಸಿಕ್ತ್ವಾ ಚ ಪುಷ್ಪದ್ರವಂ
ಪಾದೌ ಚನ್ದನಲೇಪನಾದಿಭಿರಹಂ ಸಂಪೂಜಯಾಮಿ ಕ್ರಮಾತ್ .. ೨೧ ..

ರತ್ನಾಕ್ಷತೈಸ್ತ್ವಾಂ ಪರಿಪೂಜಯಾಮಿ
ಮುಕ್ತಾಫಲೈರ್ವಾ ರುಚಿರೈರವಿದ್ಧೈಃ.
ಅಖಣ್ಡಿತೈರ್ದೇವಿ ಯವಾದಿಭಿರ್ವಾ
ಕಾಶ್ಮೀರಪಙ್ಕಾಙ್ಕಿತತಣ್ಡುಲೈರ್ವಾ .. ೨೨ ..

ಜನನಿ ಚಮ್ಪಕತಲೈಮಿದಂ ಪುರೋ
ಮೃಗಮದೋಪಯುತಂ ಪಟವಾಸಕಮ್.
ಸುರಭಿಗನ್ಧಮಿದಂ ಚ ಚತುಃಸಮಂ
ಸಪದಿ ಸರ್ವಮಿದಂ ಪರಿಗೃಹ್ಯತಾಮ್ .. ೨೩ ..

ಸೀಮನ್ತೇ ತೇ ಭಗವತಿ ಮಯಾ ಸಾದರಂ ನ್ಯಸ್ತಮೇತತ್
ಸಿನ್ದೂರಂ ಮೇ ಹೃದಯಕಮಲೇ ಹರ್ಷವರ್ಷಂ ತನೋತಿ.
ಬಾಲಾದಿತ್ಯದ್ಯುತಿರಿವ ಸದಾ ಲೋಹಿತಾ ಯಸ್ಯ ಕಾನ್ತೀ-
ರನ್ತರ್ಧ್ವಾನ್ತಂ ಹರತಿ ಸಕಲಂ ಚೇತಸಾ ಚಿನ್ತಯೈವ .. ೨೪ ..

ಮನ್ದಾರಕುನ್ದಕರವೀರಲವಙ್ಗಪುಷ್ಪೈಃ
ತ್ವಾಂ ದೇವಿ ಸನ್ತತಂ ಅಹಂ ಪರಿಪೂಜಯಾಮಿ.
ಜಾತೀಜಪಾವಕುಲಚಮ್ಪಕಕೇತಕಾದಿ-
ನಾನಾವಿಧಾನಿ ಕುಸುಮಾನಿ ಚ ತೇ ಅರ್ಪಯಾಮಿ .. ೨೫ ..

ಮಾಲತೀವಕುಲಹೇಮಪುಷ್ಪಿಕಾ-
ಕಾಞ್ಚನಾರಕರವೀರಕೈತಕೈಃ.
ಕರ್ಣಿಕಾರಗಿರಿಕರ್ಣಿಕಾದಿಭಿಃ
ಪೂಜಯಾಮಿ ಜಗದಮ್ಬ ತೇ ವಪುಃ .. ೨೬ ..

ಪಾರಿಜಾತಶತಪತ್ರಪಾಟಲೈಃ
ಮಲ್ಲಿಕಾವಕುಲಚಮ್ಪಕಾದಿಭಿಃ.
ಅಮ್ಬುಜೈಃ ಸುಕುಸುಮೈಶ್ಚ ಸಾದರಂ
ಪೂಜಯಾಮಿ ಜಗದಮ್ಬ ತೇ ವಪುಃ .. ೨೭ ..

ಲಾಕ್ಷಾಸಂಮಿಲಿತೈಃ ಸಿತಾಭ್ರಸಹಿತೈಃ ಶ್ರೀವಾಸಸಂಮಿಶ್ರಿತೈಃ
ಕರ್ಪೂರಾಕಲಿತೈಃ ಶಿರೈರ್ಮಧುಯುತೈರ್ಗೋಸರ್ಪಿಷಾ ಲೋಡಿತೈಃ.
ಶ್ರೀಖಣ್ಡಾಗರುಗುಗ್ಗುಲುಪ್ರಭೃತಿಭಿರ್ನಾನಾವಿಧೈರ್ವಸ್ತ್ತುಭಿಃ
ಧೂಪಂ ತೇ ಪರಿಕಲ್ಪಯಾಮಿ ಜನನಿ ಸ್ನೇಹಾತ್ತ್ವಮಙ್ಗೀಕುರು .. ೨೮ ..

ರತ್ನಾಲಂಕೃತಹೇಮಪಾತ್ರನಿಹಿತೈರ್ಗೋಸರ್ಪಿಷಾ ಲೋಡಿತೈಃ
ದೀಪೈರ್ದೀರ್ಘತರಾನ್ಧಕಾರಭಿದುರೈರ್ಬಾಲಾರ್ಕಕೋಟಿಪ್ರಭೈಃ.
ಆತಾಮ್ರಜ್ವಲದುಜ್ಜ್ವಲಪ್ರವಿಲಸದ್ರತ್ನಪ್ರದೀಪೈಸ್ತಥಾ
ಮಾತಸ್ತ್ವಾಮಹಮಾದರಾದನುದಿನಂ ನೀರಾಜಯಾಮ್ಯುಚ್ಚಕೈಃ .. ೨೯ ..

ಮಾತಸ್ತ್ವಾಂ ದಧಿದುಗ್ಧಪಾಯಸಮಹಾಶಾಲ್ಯನ್ನಸಂತಾನಿಕಾಃ
ಸೂಪಾಪೂಪಸಿತಾಘೃತೈಃ ಸವಟಕೈಃ ಸಕ್ಷೌದ್ರರಮ್ಭಾಫಲೈಃ.
ಏಲಾಜೀರಕಹಿಙ್ಗುನಾಗರನಿಶಾಕುಸ್ತುಮ್ಭರೀಸಂಸ್ಕೃತೈಃ
ಶಾಕೈಃ ಸಾಕಮಹಂ ಸುಧಾಧಿಕರಸೈಃ ಸಂತರ್ಪಯಾಮ್ಯರ್ಚಯನ್ .. ೩೦ ..

ಸಾಪೂಪಸೂಪದಧಿದುಗ್ಧಸಿತಾಘೃತಾನಿ
ಸುಸ್ವಾದುಭಕ್ತಪರಮಾನ್ನಪುರಃಸರಾಣಿ.
ಶಾಕೋಲ್ಲಸನ್ಮರಿಚಿಜೀರಕಬಾಹ್ನಿಕಾನಿ
ಭಕ್ಷ್ಯಾಣಿ ಭುಙ್ಕ್ಷ್ವ ಜಗದಮ್ಬ ಮಯಾರ್ಪಿತಾನಿ .. ೩೧ ..

ಕ್ಷೀರಮೇತದಿದಂಮುತ್ತಮೋತ್ತಮಂ
ಪ್ರಾಜ್ಯಮಾಜ್ಯಮಿದಮುಜ್ಜ್ವಲಂ ಮಧು.
ಮಾತರೇತದಮೃತೋಪಮಂ ಪಯಃ
ಸಂಭ್ರಮೇಣ ಪರಿಪೀಯತಾಂ ಮುಹುಃ .. ೩೨ ..

ಉಷ್ಣೋದಕೈಃ ಪಾಣಿಯುಗಂ ಮುಖಂ ಚ
ಪ್ರಕ್ಷಾಲ್ಯ ಮಾತಃ ಕಲಧೌತಪಾತ್ರೇ.
ಕರ್ಪೂರಮಿಶ್ರೇಣ ಸಕುಙ್ಕುಮೇನ
ಹಸ್ತೌ ಸಮುದ್ವರ್ತಯ ಚನ್ದನೇನ .. ೩೩ ..

ಅತಿಶೀತಮುಶೀರವಾಸಿತಂ
ತಪನೀಯೇ ಕಲಶೇ ನಿವೇಶಿತಮ್.
ಪಟಪೂತಮಿದಂ ಜಿತಾಮೃತಂ
ಶುಚಿ ಗಙ್ಗಾಜಲಮಮ್ಬ ಪೀಯತಾಮ್ .. ೩೪ ..

ಜಮ್ಬವಾಮ್ರರಮ್ಭಾಫಲಸಂಯುತಾನಿ
ದ್ರಾಕ್ಷಾಫಲಕ್ಷೌದ್ರಸಮನ್ವಿತಾನಿ.
ಸನಾರಿಕೇಲಾನಿ ಸದಾಡಿಮಾನಿ
ಫಲಾನಿ ತೇ ದೇವಿ ಸಮರ್ಪಯಾಮಿ .. ೩೫ ..

ಕೂಶ್ಮಾಣ್ಡಕೋಶಾತಕಿಸಂಯುತಾನಿ
ಜಮ್ಬೀರನಾರಙ್ಗಸಮನ್ವಿತಾನಿ.
ಸಬೀಜಪೂರಾಣಿ ಸಬಾದರಾಣಿ
ಫಲಾನಿ ತೇ ದೇವಿ ಸಮರ್ಪಯಾಮಿ .. ೩೬ ..

ಕರ್ಪೂರೇಣ ಯುತೈರ್ಲವಙ್ಗಸಹಿತೈಸ್ತಕ್ಕೋಲಚೂರ್ಣಾನ್ವಿತೈಃ
ಸುಸ್ವಾದುಕ್ರಮುಕೈಃ ಸಗೌರಖದಿರೈಃ ಸುಸ್ನಿಗ್ಧಜಾತೀಫಲೈಃ.
ಮಾತಃ ಕೈತಕಪತ್ರಪಾಣ್ಡುರುಚಿಭಿಸ್ತಾಮ್ಬೂಲವಲ್ಲೀದಲೈಃ
ಸಾನನ್ದಂ ಮುಖಮಣ್ಡನಾರ್ಥಮತುಲಂ ತಾಮ್ಬೂಲಮಙ್ಗೀಕುರು .. ೩೭ ..

ಏಲಾಲವಙ್ಗಾದಿಸಮನ್ವಿತಾನಿ
ತಕ್ಕೋಲಕರ್ಪೂರವಿಮಿಶ್ರಿತಾನಿ.
ತಾಮ್ಬೂಲವಲ್ಲೀದಲಸಂಯುತಾನಿ
ಪೂಗಾನಿ ತೇ ದೇವಿ ಸಮರ್ಪಯಾಮಿ .. ೩೮ ..

ತಾಮ್ಬೂಲನಿರ್ಜಿತಸುತಪ್ತಸುವರ್ಣವರ್ಣಂ
ಸ್ವರ್ಣಾಕ್ತಪೂಗಫಲಮೌಕ್ತಿಕಚೂರ್ಣಯುಕ್ತಮ್.
ಸೌವರ್ಣಪಾತ್ರನಿಹಿತಂ ಖದಿರೇನ ಸಾರ್ಧಂ
ತಾಮ್ಬೂಲಮಮ್ಬ ವದನಾಮ್ಬುರುಹೇ ಗೃಹಾಣ .. ೩೯ ..

ಮಹತಿ ಕನಕಪಾತ್ರೇ ಸ್ಥಾಪಯಿತ್ವಾ ವಿಶಾಲಾನ್
ಡಮರುಸದೃಶರೂಪಾನ್ಬದ್ಧಗೋಧೂಮದೀಪಾನ್.
ಬಹುಘೃತಮಥ ತೇಷು ನ್ಯಸ್ಯ ದೀಪಾನ್ಪ್ರಕೃಷ್ಟಾ-
ನ್ಭುವನಜನನಿ ಕುರ್ವೇ ನಿತ್ಯಮಾರಾರ್ತಿಕಂ ತೇ .. ೪೦ ..

ಸವಿನಯಮಥ ದತ್ವಾ ಜಾನುಯುಗ್ಮಂ ಧರಣ್ಯಾಂ
ಸಪದಿ ಶಿರಸಿ ಧೃತ್ವಾ ಪಾತ್ರಮಾರಾರ್ತಿಕಸ್ಯ.
ಮುಖಕಮಲಸಮೀಪೇ ತೇ ಅಮ್ಬ ಸಾರ್ಥಂ ತ್ರಿವಾರಂ
ಭ್ರಮಯತಿ ಮಯಿ ಭೂಯಾತ್ತೇ ಕೃಪಾರ್ದ್ರಃ ಕಟಾಕ್ಷಃ .. ೪೧ ..

ತ್ರಿಭುವನಕಮನೀಯೈಃ ಪೂಜಯಿತ್ವಾ ಚ ವಸ್ತ್ರೈಃ.
ಮಿಲಿತವಿವಿಧಮುಕ್ತಾಂ ದಿವ್ಯಮಾಣಿಕ್ಯಯುಕ್ತಾಂ
ಜನನಿ ಕನಕವೃಷ್ಟಿಂ ದಕ್ಷಿಣಾಂ ತೇ ಅರ್ಪಯಾಮಿ .. ೪೨ ..

ಮಾತಃ ಕಾಞ್ಚನದಣ್ಡಮಣ್ಡಿತಮಿದಂ ಪೂರ್ಣೇನ್ದುಬಿಮ್ಬಪ್ರಭಂ
ನಾನಾರತ್ನವಿಶೋಭಿಹೇಮಕಲಶಂ ಲೋಕತ್ರಯಾಹ್ಲಾದಕಮ್.
ಭಾಸ್ವನ್ಮೌಕ್ತಿಕಜಾಲಿಕಾಪರಿವೃತಂ ಪ್ರೀತ್ಯಾತ್ಮಹಸ್ತೇ ಧೃತಂ
ಛತ್ರಂ ತೇ ಪರಿಕಲ್ಪಯಾಮಿ ಶಿರಸಿ ತ್ವಷ್ಟ್ರಾ ಸ್ವಯಂ ನಿರ್ಮಿತಮ್ .. ೪೩ ..

ಶರದಿನ್ದುಮರೀಚಿಗೌರಬರ್ಣೈ-
ರ್ಮಣಿಮುಕ್ತಾವಿಲಸತ್ಸುವರ್ಣದಣ್ಡೈಃ.
ಜಗದಮ್ಬ ವಿಚಿತ್ರಚಾಮರೈಸ್ತ್ವಾ-
ಮಹಮಾನನ್ದಭರೇಣ ಬೀಜಯಾಮಿ .. ೪೪ ..

ಮಾರ್ತಾಣ್ಡಮಣ್ಡಲನಿಭೋ ಜಗದಮ್ಬ ಯೋ ಅಯಂ
ಭಕ್ತ್ಯಾ ಮಯಾ ಮಣಿಮಯೋ ಮುಕುರೋ ಅರ್ಪಿತಸ್ತೇ.
ಪೂರ್ಣೇನ್ದುಬಿಮ್ಬರುಚಿರಂ ವದನಂ ಸ್ವಕೀಯ-
ಮಸ್ಮಿನ್ವಿಲೋಕಯ ವಿಲೋಲವಿಲೋಚನೇ ತ್ವಮ್ .. ೪೫ ..

ಇನ್ದ್ರಾದಯೋ ನತಿನತೈರ್ಮಕುಟಪ್ರದೀಪೈ-
ರ್ನೀರಾಜಯನ್ತಿ ಸತತಂ ತವ ಪಾದಪೀಠಮ್.
ತಸ್ಮಾದಹಂ ತವ ಸಮಸ್ತಶರೀರಮೇತ-
ನ್ನೀರಾಜಯಾಮಿ ಜಗದಮ್ಬ ಸಹಸ್ರದೀಪೈಃ .. ೪೬ ..

ಪ್ರಿಯಗತಿರತಿತುಙ್ಗೋ ರತ್ನಪಲ್ಯಾಣಯುಕ್ತಃ
ಕನಕಮಯವಿಭೂಷಃ ಸ್ನಿಗ್ಧಗಮ್ಭೀರಘೋಷಃ.
ಭಗವತಿ ಕಲಿತೋ ಅಯಂ ವಾಹನಾರ್ಥಂ ಮಯಾ ತೇ
ತುರಗಶತಸಮೇತೋ ವಾಯುವೇಗಸ್ತುರಂಗಃ .. ೪೭ ..

ಮಧುಕರವೃತಕುಮ್ಭನ್ಯಸ್ತಸಿನ್ದೂರರೇಣುಃ
ಕನಕಕಲಿತಘಣ್ಟಾಕಿಙ್ಕಣೀಶೋಭಿಕಣ್ಠಃ.
ಶ್ರವಣಯುಗಲಚಞ್ಚಚ್ಚಾಮರೋ ಮೇಘತುಲ್ಯೋ
ಜನನಿ ತವ ಮುದೇ ಸ್ಯಾನ್ಮತ್ತಮಾತಙ್ಗ ಏಷಃ .. ೪೮ ..

ದ್ರುತತರತುರಗೈರ್ವಿರಾಜಮಾನಂ
ಮಣಿಮಯಚಕ್ರಚತುಷ್ಟಯೇನ ಯುಕ್ತಮ್.
ಕನಕಮಯಮಮುಂ ವಿತಾನವನ್ತಂ
ಭಗವತಿ ತೇ ಹಿ ರಥಂ ಸಮರ್ಪಯಾಮಿ .. ೪೯ ..

ಹಯಗಜರಥಪತ್ತಿಶೋಭಮಾನಂ
ದಿಶಿ ದಿಶಿ ದುನ್ದುಭಿಮೇಘನಾದಯುಕ್ತಮ್.
ಅತಿಬಹು ಚತುರಙ್ಗಸೈನ್ಯಮೇತ-
ದ್ಭಗವತಿ ಭಕ್ತಿಭರೇಣ ತೇ ಅರ್ಪಯಾಮಿ .. ೫೦ ..

ಪರಿಘೀಕೃತಸಪ್ತಸಾಗರಂ
ಬಹುಸಂಪತ್ಸಹಿತಂ ಮಯಾಮ್ಬ ತೇ ವಿಪುಲಮ್.
ಪ್ರಬಲಂ ಧರಣೀತಲಾಭಿಧಂ
ದೃಢದುರ್ಗಂ ನಿಖಿಲಂ ಸಮರ್ಪಯಾಮಿ .. ೫೧ ..

ಶತಪತ್ರಯುತೈಃ ಸ್ವಭಾವಶೀತೈಃ
ಅತಿಸೌರಭ್ಯಯುತೈಃ ಪರಾಗಪೀತೈಃ.
ಭ್ರಮರೀಮುಖರೀಕೃತೈರನನ್ತೈಃ
ವ್ಯಜನೈಸ್ತ್ವಾಂ ಜಗದಮ್ಬ ವೀಜಯಾಮಿ .. ೫೨ ..

ಭ್ರಮರಲುಲಿತಲೋಲಕುನ್ತಲಾಲೀ-
ವಿಗಲಿತಮಾಲ್ಯವಿಕೀರ್ಣರಙ್ಗಭೂಮಿಃ.
ಇಯಮತಿರುಚಿರಾ ನಟೀ ನಟನ್ತೀ
ತವ ಹೃದಯೇ ಮುದಮಾತನೋತು ಮಾತಃ .. ೫೩ ..

ಮುಖನಯನವಿಲಾಸಲೋಲವೇಣೀ-
ವಿಲಸಿತನಿರ್ಜಿತಲೋಲಭೃಙ್ಗಮಾಲಾಃ.
ಯುವಜನಸುಖಕಾರಿಚಾರುಲೀಲಾ
ಭಗವತಿ ತೇ ಪುರತೋ ನಟನ್ತಿ ಬಾಲಾಃ .. ೫೪ ..

ಭ್ರಮದಲಿಕುಲತುಲ್ಯಾಲೋಲಧಮ್ಮಿಲ್ಲಭಾರಾಃ
ಸ್ಮಿತಮುಖಕಮಲೋದ್ಯದ್ದಿವ್ಯಲಾವಣ್ಯಪೂರಾಃ.
ಅನುಪಮಿತಸುವೇಷಾ ವಾರಯೋಷಾ ನಟನ್ತಿ
ಪರಭೃತಕಲಕಣ್ಠ್ಯೋ ದೇವಿ ದೈನ್ಯಂ ಧುನೋತು .. ೫೫ ..

ಡಮರುಡಿಣ್ಡಿಮಜರ್ಝರಝಲ್ಲರೀ-
ಮೃದುರವದ್ರಗಡದ್ದ್ರಗಡಾದಯಃ.
ಝಟಿತಿ ಝಾಙ್ಕೃತಝಾಙ್ಕೃತಝಾಙ್ಕೃತೈಃ
ಬಹುದಯಂ ಹೃದಯಂ ಸುಖಯನ್ತು ತೇ .. ೫೬ ..

ವಿಪಞ್ಚೀಷು ಸಪ್ತಸ್ವರಾನ್ವಾದಯನ್ತ್ಯ-
ಸ್ತವ ದ್ವಾರಿ ಗಾಯನ್ತಿ ಗನ್ಧರ್ವಕನ್ಯಾಃ.
ಕ್ಷಣಂ ಸಾವಧಾನೇನ ಚಿತ್ತೇನ ಮಾತಃ
ಸಮಾಕರ್ಣಯ ತ್ವಂ ಮಯಾ ಪ್ರಾರ್ಥಿತಾಸಿ .. ೫೭ ..

ಅಭಿನಯಕಮನೀಯೈರ್ನರ್ತನೈರ್ನರ್ತಕೀನಾಂ
ಕ್ಷನಮಪಿ ರಮಯಿತ್ವಾ ಚೇತ ಏತತ್ತ್ವದೀಯಮ್.
ಸ್ವಯಮಹಮತಿಚಿತೈರ್ನೃತ್ತವಾದಿತ್ರಗೀತೈಃ
ಭಗವತಿ ಭವದೀಯಂ ಮಾನಸಂ ರಞ್ಜಯಾಮಿ .. ೫೮ ..

ತವ ದೇವಿ ಗುಣಾನುವರ್ಣನೇ
ಚತುರಾ ನೋ ಚತುರಾನನಾದಯಃ.
ತದಿಹೈಕಮುಖೇಷು ಜನ್ತುಷು
ಸ್ತವನಂ ಕಸ್ತವ ಕರ್ತುಮೀಶ್ವರಃ .. ೫೯ ..

ಪದೇ ಪದೇ ಯತ್ಪರಿಪೂಜಕೇಭ್ಯಃ ಸದ್ಯೋ ಅಶ್ವಮೇಧಾದಿಫಲಂ ದದಾತಿ.
ತತ್ಸರ್ವಪಾಪಕ್ಷಯ ಹೇತುಭೂತಂ ಪ್ರದಕ್ಷಿಣಂ ತೇ ಪರಿತಃ ಕರೋಮಿ .. ೬೦ ..

ರಕ್ತೋತ್ಪಲಾರಕ್ತಲತಾಪ್ರಭಾಭ್ಯಾಂ ಧ್ವಜೋರ್ಧ್ವರೇಖಾಕುಲಿಶಾಙ್ಕಿತಾಭ್ಯಾಮ್.
ಅಶೇಷಬೃನ್ದಾರಕವನ್ದಿತಾಭ್ಯಾಂ ನಮೋ ಭವಾನೀಪದಪಙ್ಕಜಾಭ್ಯಾಮ್ .. ೬೧ ..

ಚರಣನಲಿನಯುಗ್ಮಂ ಪಙ್ಕಜೈಃ ಪೂಜಯಿತ್ವಾ
ಕನಕಕಮಲಮಾಲಾಂ ಕನ್ಠದೇಶೇ ಅರ್ಪಯಿತ್ವಾ.
ಶಿರಸಿ ವಿನಿಹಿತೋ ಅಯಂ ರತ್ನಪುಷ್ಪಾಞ್ಜಲಿಸ್ತೇ
ಹೃದಯಕಮಲಮಧ್ಯೇ ದೇವಿ ಹರ್ಷಂ ತನೋತು .. ೬೨ ..

ಕನಕಮಯವಿತಾನರಾಜಮಾನೇ.
ಪ್ರಸರದಗರುಧೂಪಧೂಪಿತೇ ಅಸ್ಮಿ-
ನ್ಭಗವತಿ ಭವನೇ ಅಸ್ತು ತೇ ನಿವಾಸಃ .. ೬೩ ..

ಏತಸ್ಮಿನ್ಮಣಿಖಚಿತೇ ಸುವರ್ಣಪೀಠೇ
ತ್ರೈಲೋಕ್ಯಾಭಯವರದೌ ನಿಧಾಯ ಹಸ್ತೌ.
ವಿಸ್ತೀರ್ಣೇ ಮೃದುಲತರೋತ್ತರಚ್ಛದೇ ಅಸ್ಮಿ-
ನ್ಪರ್ಯಙ್ಕೇ ಕನಕಮಯೇ ನಿಷೀದ ಮಾತಃ .. ೬೪ ..

ತವ ದೇವಿ ಸರೋಜಚಿಹ್ನಯೋಃ ಪದಯೋರ್ನಿರ್ಜಿತಪದ್ಮರಾಗಯೋಃ.
ಅತಿರಕ್ತತರೈರಲಕ್ತಕೈಃ ಪುನರುಕ್ತಾಂ ರಚಯಾಮಿ ರಕ್ತತಾಮ್ .. ೬೫ ..

ತಪನೀಯಮಯೇ ಹಿ ಪಟ್ಟಕೇ ಮುಖಗಣ್ಡೂಚಜಲಂ ವಿಧೀಯತಾಮ್ .. ೬೬ ..

ಕ್ಷಣಮಥ ಜಗದಮ್ಬ ಮಞ್ಚಕೇ ಅಸ್ಮಿ-
ನ್ಮೃದುತಲತೂಲಿಕಯಾ ವಿರಾಜಮಾನೇ.
ಅತಿರಹಸಿ ಮುದಾ ಶಿವೇನ ಸಾರ್ಧಂ
ಸುಖಶಯನಂ ಕುರು ತತ್ರ ಮಾಂ ಸ್ಮರನ್ತೀ .. ೬೭ ..

ಮುಕ್ತಾಕುನ್ದೇನ್ದುಗೌರಾಂ ಮಣಿಮಯಕುಟಾಂ ರತ್ನತಾಟಙ್ಕಯುಕ್ತಾ-
ಮಕ್ಷಸ್ರಕ್ಪುಷ್ಪಹಸ್ತಾಮಭಯವರಕರಾಂ ಚನ್ದ್ರಚೂಡಾಂ ತ್ರಿನೇತ್ರಾಮ್.
ನಾನಾಲಂಕಾರಯುಕ್ತಾಂ ಸುರಮಕುಟಮಣಿದ್ಯೋತಿತಸ್ವರ್ಣಪೀಠಾಂ
ಸಾನನ್ದಾಂ ಸುಪ್ರಸನ್ನಾಂ ತ್ರಿಭುವನಜನನೀಂ ಚೇತಸಾ ಚಿನ್ತಯಾಮಿ .. ೬೮ ..

ಏಷಾ ಭಕ್ತ್ಯಾ ತವ ವಿರಚಿತಾ ಯಾ ಮಯಾ ದೇವಿ ಪೂಜಾ
ಸ್ವೀಕೃತ್ಯೈನಾಂ ಸಪದಿ ಸಕಲಾನ್ಮೇ ಅಪರಾಧಾನ್ಕ್ಷಮಸ್ವ.
ನ್ಯೂನಂ ಯತ್ತತ್ತವ ಕರುಣಯಾ ಪೂರ್ಣತಾಮೇತು ಸದ್ಯಃ
ಸಾನನ್ದಂ ಮೇ ಹೃದಯಕಮಲೇ ತೇ ಅಸ್ತು ನಿತ್ಯಂ ನಿವಾಸಃ .. ೬೯ ..

ಪೂಜಾಮಿಮಾಂ ಯಃ ಪಠತಿ ಪ್ರಭಾತೇ
ಮಧ್ಯಾಹ್ನಕಾಲೇ ಯದಿ ವಾ ಪ್ರದೋಷೇ.
ಧ್ರಮಾರ್ಥಕಾಮಾನ್ಪುರುಷೋ ಅಭ್ಯುಪೈತಿ
ದೇಹಾವಸಾನೇ ಶಿವಭಾವಮೇತಿ .. ೭೦ ..

ಪೂಜಾಮಿಮಾಂ ಪಠೇನ್ನಿತ್ಯಂ ಪೂಜಾಂ ಕರ್ತುಮನೀಶ್ವರಃ.
ಪೂಜಾಫಲಮವಾಪ್ನೋತಿ ವಾಞ್ಛಿತಾರ್ಥಂ ಚ ವಿನ್ದತಿ .. ೭೧ ..

ಪ್ರತ್ಯಹಂ ಭಕ್ತಿಸಂಯುಕ್ತೋ ಯಃ ಪೂಜನಮಿದಂ ಪಠೇತ್.
ವಾಗ್ವಾದಿನ್ಯಾಃ ಪ್ರಸಾದೇನ ವತ್ಸರಾತ್ಸ ಕವಿರ್ಭವೇತ್ .. ೭೨ ..

.. ಇತಿ ಶ್ರೀಮತ್ಪರಮಹಂಸಪರಿವ್ರಾಜಕಾಚಾರ್ಯಸ್ಯ ಶ್ರೀಗೋವಿನ್ದಭಗವತ್ಪೂಜ್ಯಪಾದಶಿಷ್ಯಸ್ಯ ಶ್ರೀಮಚ್ಛಙ್ಕರಭಗವತಃ ಕೃತೌ ದೇವೀಚತುಃಷಷ್ಟ್ಯುಪಚಾರಪೂಜಾಸ್ತೋತ್ರಂ ಸಮ್ಪೂರ್ಣಮ್ ..