దేవీ చతుఃషష్ట్యుపచార పూజాస్తోత్రమ్

ఉషసి మాగధమఙ్గలగాయనైః
ఝటితి జాగృహి జాగృహి జాగృహి.
అతికృపార్ద్రకటాక్షనిరీక్షణైః
జగదిదం జగదమ్బ సుఖీకురు .. 1 ..

కనకమయవితర్దిశోభమానం
దిశి దిశి పూర్ణసువర్ణకుమ్భయుక్తమ్.
మణిమయమణ్టపమధ్యమేహి మాతః
మయి కృపయాశు సమర్చనం గ్రహీతుమ్ .. 2 ..

కనకకలశశోభమానశీర్షం
జలధరలమ్బి సముల్లసత్పతాకమ్.
భగవతి తవ సంనివాసహేతోః
మణిమయమన్దిరమేతదర్పయామి .. 3 ..

తపనీయమయీ సుతూలికా
కమనీయా మృదులోత్తరచ్ఛదా.
నవరత్నవిభూషితా మయా
శిబికేయం జగదమ్బ తే అర్పితా .. 4 ..

కనకమయవితర్దిస్థాపితే తూలికాఢయే
వివిధకుసుమకీర్ణే కోటిబాలార్కవర్ణే.
భగవతి రమణీయే రత్నసింహాసనే అస్మిన్
ఉపవిశ పదయుగ్మం హేమపీఠే నిధాయ .. 5 ..

మణిమౌక్తికనిర్మితం మహాన్తం
కనకస్తమ్భచతుష్టయేన యుక్తమ్.
కమనీయతమం భవాని తుభ్యం
నవముల్లోచమహం సమర్పయామి .. 6 ..

దూర్వయా సరసిజాన్వితవిష్ణు-
కాన్తయా చ సహితం కుసుమాఢ్యమ్.
పద్మయుగ్మసదృశే పదయుగ్మే
పాద్యమేతదురరీకురు మాతః ..7..

గన్ధపుష్పయవసర్షపదూర్వా-
సంయుతం తిలకుశాక్షతమిశ్రమ్.
హేమపాత్రనిహితం సహ రత్నైః
అధ్యర్మేతదురరీకురు మాతః .. 8 ..

జలజద్యుతినా కరేణ జాతీ-
ఫలతక్కోలలవఙ్గగన్ధయుక్తైః.
అమృతైరమృతౌరివాతిశీతైః
భగవత్యాచమనం విధీయతామ్ .. 9 ..

నిహితం కనకస్య సంపుటే
పిహితం రత్నపిధానకేన యత్.
తదిదం జగదమ్బ తే అర్పితం
మధుపర్కం జనని ప్రగృహ్యతామ్ .. 10 ..

ఏతచ్చమ్పకతైలమమ్బ వివిధైః పుష్పైః ముహుర్వాసితం
న్యస్తం రత్నమయే సువర్ణచషకే భృఙ్గైః భ్రమద్భిః వృతమ్.
సానన్దం సురసున్దరీభిరభితో హస్తైః ధృతం తే మయా
కేశేషు భ్రమరభ్రమేషు సకలేష్వఙ్గేషు చాలిప్యతే .. 11 ..

'
మాతః కుఙ్కుమపఙ్కనిర్మితమిదం దేహే తవోద్వర్తనం
భక్త్యాహం కలయామి హేమరజసా సంమిశ్రితం కేసరైః.
కేశానామలకైః విశోధ్య విశదాన్కస్తూరికోదఞ్చితైః
స్నానం తే నవరత్నకుమ్భసహితైః సంవాసితోష్ణోదకైః .. 12 ..

దుధిదుగ్ధఘృతైః సమాక్షికైః
సితయా శర్కరయా సమన్వితైః.
స్నపయామి తవాహమాదరాత్
జనని త్వాం పునరుష్ణవారిభిః .. 13 ..'
ఏలోశీరసువాసితైః సకుసుమైర్గఙ్గాది తీర్థోదకైః
మాణిక్యామలమౌక్తికామృతరసైః స్వచ్ఛైః సువర్ణోదకైః.
మన్త్రాన్వైదికతాన్త్రికాన్పరిపఠన్సానన్దమత్యాదరాత్
స్నానం తే పరికల్పయామి జనని స్నేహాత్త్వమఙ్గీకురు .. 14 ..

బాలార్కద్యుతి దాడిమీయకుసుమప్రస్పర్ధి సర్వోత్తమం
మాతస్త్వం పరిధేహి దివ్యవసనం భక్త్యా మయా కల్పితమ్.
ముక్తాభిః గ్రథితం సుకఞ్చుకమిదం స్వీకృత్య పీతప్రభం
తప్తస్వర్ణసమానవర్ణమతులం ప్రావర్ణమఙ్గీకురు .. 15 ..

నవరత్నమయే మయార్పితే
కమనీయే తపనీయపాదుకే.
సవిలాసమిదం పదద్వయం
కృపయా దేవి తయోర్నిధీయతామ్ .. 16 ..

బహుభిరగరుధూపైః సాదరం ధూపయిత్వా
భగవతి తవ కేశాన్కఙ్కతైర్మార్జయిత్వా.
సురభిభిరరవిన్దైశ్చమ్పకైశ్చార్చయిత్వా
ఝటితి కనకసూత్రైర్జూటయన్వేష్టయామి .. 17 ..

సౌవీరాఞ్జనమిదమమ్బ చక్షుషోస్తే
విన్యస్తం కనకశలాకయా మయా యత్.
తన్న్యూనం మలినమపి త్వదక్షిసఙ్గాత్
బ్రహ్మేన్ద్రాద్యభిలషణీయతామియాయ .. 18 ..

మఞ్జీరే పదయోర్నిధాయ రుచిరాం విన్యస్య కాఞ్చీం కటౌ
ముక్తాహారమురోజయోరనుపమాం నక్షత్రమాలాం గలే.
కేయూరాణి భుజేషు రత్నవలయశ్రేణీం కరేషు క్రమా-
త్తాటఙ్కే తవ కర్ణయోర్వినిదధే శీర్షే చ చూడామణిమ్ .. 19 ..

ధమ్మిల్లే తవ దేవి హేమకుసుమాన్యాధాయ ఫాలస్థలే
ముక్తారాజివిరాజమానతిలకం నాసాపుటే మౌక్తికమ్.
మాతర్మౌక్తికజాలికాం చ కుచయోః సర్వాఙ్గులీషూర్మికాః
కటఖాం కాఞ్చనకిఙ్కిణీర్వినిదధే రత్నావతంసం శ్రుతౌ .. 20 ..

మాతః ఫాలతలే తవాతివిమలే కాశ్మీరకస్తూరికా-
కర్పూరాగరుభిః కరోమి తిలకం దేహే అఙ్గరాగం తతః.
వక్షోజాదిషు యక్షకర్దమరసం సిక్త్వా చ పుష్పద్రవం
పాదౌ చన్దనలేపనాదిభిరహం సంపూజయామి క్రమాత్ .. 21 ..

రత్నాక్షతైస్త్వాం పరిపూజయామి
ముక్తాఫలైర్వా రుచిరైరవిద్ధైః.
అఖణ్డితైర్దేవి యవాదిభిర్వా
కాశ్మీరపఙ్కాఙ్కితతణ్డులైర్వా .. 22 ..

జనని చమ్పకతలైమిదం పురో
మృగమదోపయుతం పటవాసకమ్.
సురభిగన్ధమిదం చ చతుఃసమం
సపది సర్వమిదం పరిగృహ్యతామ్ .. 23 ..

సీమన్తే తే భగవతి మయా సాదరం న్యస్తమేతత్
సిన్దూరం మే హృదయకమలే హర్షవర్షం తనోతి.
బాలాదిత్యద్యుతిరివ సదా లోహితా యస్య కాన్తీ-
రన్తర్ధ్వాన్తం హరతి సకలం చేతసా చిన్తయైవ .. 24 ..

మన్దారకున్దకరవీరలవఙ్గపుష్పైః
త్వాం దేవి సన్తతం అహం పరిపూజయామి.
జాతీజపావకులచమ్పకకేతకాది-
నానావిధాని కుసుమాని చ తే అర్పయామి .. 25 ..

మాలతీవకులహేమపుష్పికా-
కాఞ్చనారకరవీరకైతకైః.
కర్ణికారగిరికర్ణికాదిభిః
పూజయామి జగదమ్బ తే వపుః .. 26 ..

పారిజాతశతపత్రపాటలైః
మల్లికావకులచమ్పకాదిభిః.
అమ్బుజైః సుకుసుమైశ్చ సాదరం
పూజయామి జగదమ్బ తే వపుః .. 27 ..

లాక్షాసంమిలితైః సితాభ్రసహితైః శ్రీవాససంమిశ్రితైః
కర్పూరాకలితైః శిరైర్మధుయుతైర్గోసర్పిషా లోడితైః.
శ్రీఖణ్డాగరుగుగ్గులుప్రభృతిభిర్నానావిధైర్వస్త్తుభిః
ధూపం తే పరికల్పయామి జనని స్నేహాత్త్వమఙ్గీకురు .. 28 ..

రత్నాలంకృతహేమపాత్రనిహితైర్గోసర్పిషా లోడితైః
దీపైర్దీర్ఘతరాన్ధకారభిదురైర్బాలార్కకోటిప్రభైః.
ఆతామ్రజ్వలదుజ్జ్వలప్రవిలసద్రత్నప్రదీపైస్తథా
మాతస్త్వామహమాదరాదనుదినం నీరాజయామ్యుచ్చకైః .. 29 ..

మాతస్త్వాం దధిదుగ్ధపాయసమహాశాల్యన్నసంతానికాః
సూపాపూపసితాఘృతైః సవటకైః సక్షౌద్రరమ్భాఫలైః.
ఏలాజీరకహిఙ్గునాగరనిశాకుస్తుమ్భరీసంస్కృతైః
శాకైః సాకమహం సుధాధికరసైః సంతర్పయామ్యర్చయన్ .. 30 ..

సాపూపసూపదధిదుగ్ధసితాఘృతాని
సుస్వాదుభక్తపరమాన్నపురఃసరాణి.
శాకోల్లసన్మరిచిజీరకబాహ్నికాని
భక్ష్యాణి భుఙ్క్ష్వ జగదమ్బ మయార్పితాని .. 31 ..

క్షీరమేతదిదంముత్తమోత్తమం
ప్రాజ్యమాజ్యమిదముజ్జ్వలం మధు.
మాతరేతదమృతోపమం పయః
సంభ్రమేణ పరిపీయతాం ముహుః .. 32 ..

ఉష్ణోదకైః పాణియుగం ముఖం చ
ప్రక్షాల్య మాతః కలధౌతపాత్రే.
కర్పూరమిశ్రేణ సకుఙ్కుమేన
హస్తౌ సముద్వర్తయ చన్దనేన .. 33 ..

అతిశీతముశీరవాసితం
తపనీయే కలశే నివేశితమ్.
పటపూతమిదం జితామృతం
శుచి గఙ్గాజలమమ్బ పీయతామ్ .. 34 ..

జమ్బవామ్రరమ్భాఫలసంయుతాని
ద్రాక్షాఫలక్షౌద్రసమన్వితాని.
సనారికేలాని సదాడిమాని
ఫలాని తే దేవి సమర్పయామి .. 35 ..

కూశ్మాణ్డకోశాతకిసంయుతాని
జమ్బీరనారఙ్గసమన్వితాని.
సబీజపూరాణి సబాదరాణి
ఫలాని తే దేవి సమర్పయామి .. 36 ..

కర్పూరేణ యుతైర్లవఙ్గసహితైస్తక్కోలచూర్ణాన్వితైః
సుస్వాదుక్రముకైః సగౌరఖదిరైః సుస్నిగ్ధజాతీఫలైః.
మాతః కైతకపత్రపాణ్డురుచిభిస్తామ్బూలవల్లీదలైః
సానన్దం ముఖమణ్డనార్థమతులం తామ్బూలమఙ్గీకురు .. 37 ..

ఏలాలవఙ్గాదిసమన్వితాని
తక్కోలకర్పూరవిమిశ్రితాని.
తామ్బూలవల్లీదలసంయుతాని
పూగాని తే దేవి సమర్పయామి .. 38 ..

తామ్బూలనిర్జితసుతప్తసువర్ణవర్ణం
స్వర్ణాక్తపూగఫలమౌక్తికచూర్ణయుక్తమ్.
సౌవర్ణపాత్రనిహితం ఖదిరేన సార్ధం
తామ్బూలమమ్బ వదనామ్బురుహే గృహాణ .. 39 ..

మహతి కనకపాత్రే స్థాపయిత్వా విశాలాన్
డమరుసదృశరూపాన్బద్ధగోధూమదీపాన్.
బహుఘృతమథ తేషు న్యస్య దీపాన్ప్రకృష్టా-
న్భువనజనని కుర్వే నిత్యమారార్తికం తే .. 40 ..

సవినయమథ దత్వా జానుయుగ్మం ధరణ్యాం
సపది శిరసి ధృత్వా పాత్రమారార్తికస్య.
ముఖకమలసమీపే తే అమ్బ సార్థం త్రివారం
భ్రమయతి మయి భూయాత్తే కృపార్ద్రః కటాక్షః .. 41 ..

త్రిభువనకమనీయైః పూజయిత్వా చ వస్త్రైః.
మిలితవివిధముక్తాం దివ్యమాణిక్యయుక్తాం
జనని కనకవృష్టిం దక్షిణాం తే అర్పయామి .. 42 ..

మాతః కాఞ్చనదణ్డమణ్డితమిదం పూర్ణేన్దుబిమ్బప్రభం
నానారత్నవిశోభిహేమకలశం లోకత్రయాహ్లాదకమ్.
భాస్వన్మౌక్తికజాలికాపరివృతం ప్రీత్యాత్మహస్తే ధృతం
ఛత్రం తే పరికల్పయామి శిరసి త్వష్ట్రా స్వయం నిర్మితమ్ .. 43 ..

శరదిన్దుమరీచిగౌరబర్ణై-
ర్మణిముక్తావిలసత్సువర్ణదణ్డైః.
జగదమ్బ విచిత్రచామరైస్త్వా-
మహమానన్దభరేణ బీజయామి .. 44 ..

మార్తాణ్డమణ్డలనిభో జగదమ్బ యో అయం
భక్త్యా మయా మణిమయో ముకురో అర్పితస్తే.
పూర్ణేన్దుబిమ్బరుచిరం వదనం స్వకీయ-
మస్మిన్విలోకయ విలోలవిలోచనే త్వమ్ .. 45 ..

ఇన్ద్రాదయో నతినతైర్మకుటప్రదీపై-
ర్నీరాజయన్తి సతతం తవ పాదపీఠమ్.
తస్మాదహం తవ సమస్తశరీరమేత-
న్నీరాజయామి జగదమ్బ సహస్రదీపైః .. 46 ..

ప్రియగతిరతితుఙ్గో రత్నపల్యాణయుక్తః
కనకమయవిభూషః స్నిగ్ధగమ్భీరఘోషః.
భగవతి కలితో అయం వాహనార్థం మయా తే
తురగశతసమేతో వాయువేగస్తురంగః .. 47 ..

మధుకరవృతకుమ్భన్యస్తసిన్దూరరేణుః
కనకకలితఘణ్టాకిఙ్కణీశోభికణ్ఠః.
శ్రవణయుగలచఞ్చచ్చామరో మేఘతుల్యో
జనని తవ ముదే స్యాన్మత్తమాతఙ్గ ఏషః .. 48 ..

ద్రుతతరతురగైర్విరాజమానం
మణిమయచక్రచతుష్టయేన యుక్తమ్.
కనకమయమముం వితానవన్తం
భగవతి తే హి రథం సమర్పయామి .. 49 ..

హయగజరథపత్తిశోభమానం
దిశి దిశి దున్దుభిమేఘనాదయుక్తమ్.
అతిబహు చతురఙ్గసైన్యమేత-
ద్భగవతి భక్తిభరేణ తే అర్పయామి .. 50 ..

పరిఘీకృతసప్తసాగరం
బహుసంపత్సహితం మయామ్బ తే విపులమ్.
ప్రబలం ధరణీతలాభిధం
దృఢదుర్గం నిఖిలం సమర్పయామి .. 51 ..

శతపత్రయుతైః స్వభావశీతైః
అతిసౌరభ్యయుతైః పరాగపీతైః.
భ్రమరీముఖరీకృతైరనన్తైః
వ్యజనైస్త్వాం జగదమ్బ వీజయామి .. 52 ..

భ్రమరలులితలోలకున్తలాలీ-
విగలితమాల్యవికీర్ణరఙ్గభూమిః.
ఇయమతిరుచిరా నటీ నటన్తీ
తవ హృదయే ముదమాతనోతు మాతః .. 53 ..

ముఖనయనవిలాసలోలవేణీ-
విలసితనిర్జితలోలభృఙ్గమాలాః.
యువజనసుఖకారిచారులీలా
భగవతి తే పురతో నటన్తి బాలాః .. 54 ..

భ్రమదలికులతుల్యాలోలధమ్మిల్లభారాః
స్మితముఖకమలోద్యద్దివ్యలావణ్యపూరాః.
అనుపమితసువేషా వారయోషా నటన్తి
పరభృతకలకణ్ఠ్యో దేవి దైన్యం ధునోతు .. 55 ..

డమరుడిణ్డిమజర్ఝరఝల్లరీ-
మృదురవద్రగడద్ద్రగడాదయః.
ఝటితి ఝాఙ్కృతఝాఙ్కృతఝాఙ్కృతైః
బహుదయం హృదయం సుఖయన్తు తే .. 56 ..

విపఞ్చీషు సప్తస్వరాన్వాదయన్త్య-
స్తవ ద్వారి గాయన్తి గన్ధర్వకన్యాః.
క్షణం సావధానేన చిత్తేన మాతః
సమాకర్ణయ త్వం మయా ప్రార్థితాసి .. 57 ..

అభినయకమనీయైర్నర్తనైర్నర్తకీనాం
క్షనమపి రమయిత్వా చేత ఏతత్త్వదీయమ్.
స్వయమహమతిచితైర్నృత్తవాదిత్రగీతైః
భగవతి భవదీయం మానసం రఞ్జయామి .. 58 ..

తవ దేవి గుణానువర్ణనే
చతురా నో చతురాననాదయః.
తదిహైకముఖేషు జన్తుషు
స్తవనం కస్తవ కర్తుమీశ్వరః .. 59 ..

పదే పదే యత్పరిపూజకేభ్యః సద్యో అశ్వమేధాదిఫలం దదాతి.
తత్సర్వపాపక్షయ హేతుభూతం ప్రదక్షిణం తే పరితః కరోమి .. 60 ..

రక్తోత్పలారక్తలతాప్రభాభ్యాం ధ్వజోర్ధ్వరేఖాకులిశాఙ్కితాభ్యామ్.
అశేషబృన్దారకవన్దితాభ్యాం నమో భవానీపదపఙ్కజాభ్యామ్ .. 61 ..

చరణనలినయుగ్మం పఙ్కజైః పూజయిత్వా
కనకకమలమాలాం కన్ఠదేశే అర్పయిత్వా.
శిరసి వినిహితో అయం రత్నపుష్పాఞ్జలిస్తే
హృదయకమలమధ్యే దేవి హర్షం తనోతు .. 62 ..

కనకమయవితానరాజమానే.
ప్రసరదగరుధూపధూపితే అస్మి-
న్భగవతి భవనే అస్తు తే నివాసః .. 63 ..

ఏతస్మిన్మణిఖచితే సువర్ణపీఠే
త్రైలోక్యాభయవరదౌ నిధాయ హస్తౌ.
విస్తీర్ణే మృదులతరోత్తరచ్ఛదే అస్మి-
న్పర్యఙ్కే కనకమయే నిషీద మాతః .. 64 ..

తవ దేవి సరోజచిహ్నయోః పదయోర్నిర్జితపద్మరాగయోః.
అతిరక్తతరైరలక్తకైః పునరుక్తాం రచయామి రక్తతామ్ .. 65 ..

తపనీయమయే హి పట్టకే ముఖగణ్డూచజలం విధీయతామ్ .. 66 ..

క్షణమథ జగదమ్బ మఞ్చకే అస్మి-
న్మృదుతలతూలికయా విరాజమానే.
అతిరహసి ముదా శివేన సార్ధం
సుఖశయనం కురు తత్ర మాం స్మరన్తీ .. 67 ..

ముక్తాకున్దేన్దుగౌరాం మణిమయకుటాం రత్నతాటఙ్కయుక్తా-
మక్షస్రక్పుష్పహస్తామభయవరకరాం చన్ద్రచూడాం త్రినేత్రామ్.
నానాలంకారయుక్తాం సురమకుటమణిద్యోతితస్వర్ణపీఠాం
సానన్దాం సుప్రసన్నాం త్రిభువనజననీం చేతసా చిన్తయామి .. 68 ..

ఏషా భక్త్యా తవ విరచితా యా మయా దేవి పూజా
స్వీకృత్యైనాం సపది సకలాన్మే అపరాధాన్క్షమస్వ.
న్యూనం యత్తత్తవ కరుణయా పూర్ణతామేతు సద్యః
సానన్దం మే హృదయకమలే తే అస్తు నిత్యం నివాసః .. 69 ..

పూజామిమాం యః పఠతి ప్రభాతే
మధ్యాహ్నకాలే యది వా ప్రదోషే.
ధ్రమార్థకామాన్పురుషో అభ్యుపైతి
దేహావసానే శివభావమేతి .. 70 ..

పూజామిమాం పఠేన్నిత్యం పూజాం కర్తుమనీశ్వరః.
పూజాఫలమవాప్నోతి వాఞ్ఛితార్థం చ విన్దతి .. 71 ..

ప్రత్యహం భక్తిసంయుక్తో యః పూజనమిదం పఠేత్.
వాగ్వాదిన్యాః ప్రసాదేన వత్సరాత్స కవిర్భవేత్ .. 72 ..

.. ఇతి శ్రీమత్పరమహంసపరివ్రాజకాచార్యస్య శ్రీగోవిన్దభగవత్పూజ్యపాదశిష్యస్య శ్రీమచ్ఛఙ్కరభగవతః కృతౌ దేవీచతుఃషష్ట్యుపచారపూజాస్తోత్రం సమ్పూర్ణమ్ ..