ಶ್ರೀಸರಸ್ವತ್ಯಷ್ಟೋತ್ತರಶತನಾಮಸ್ತೋತ್ರಮ್

.. ಶ್ರೀಸರಸ್ವತೀ ಅಷ್ಟೋತ್ತರಶತನಾಮಸ್ತೋತ್ರಮ್ ..

ಸರಸ್ವತೀ ಮಹಾಭದ್ರಾ ಮಹಾಮಾಯಾ ವರಪ್ರದಾ .
ಶ್ರೀಪ್ರದಾ ಪದ್ಮನಿಲಯಾ ಪದ್ಮಾಕ್ಷೀ ಪದ್ಮವಕ್ತ್ರಕಾ .. ೧..

ಶಿವಾನುಜಾ ಪುಸ್ತಕಭೃತ್ ಜ್ಞಾನಮುದ್ರಾ ರಮಾ ಪರಾ .
ಕಾಮರೂಪಾ ಮಹಾವಿದ್ಯಾ ಮಹಾಪಾತಕನಾಶಿನೀ .. ೨..

ಮಹಾಶ್ರಯಾ ಮಾಲಿನೀ ಚ ಮಹಾಭೋಗಾ ಮಹಾಭುಜಾ .
ಮಹಾಭಾಗಾ ಮಹೋತ್ಸಾಹಾ ದಿವ್ಯಾಙ್ಗಾ ಸುರವನ್ದಿತಾ .. ೩..

ಮಹಾಕಾಲೀ ಮಹಾಪಾಶಾ ಮಹಾಕಾರಾ ಮಹಾಙ್ಕುಶಾ .
ಪೀತಾ ಚ ವಿಮಲಾ ವಿಶ್ವಾ ವಿದ್ಯುನ್ಮಾಲಾ ಚ ವೈಷ್ಣವೀ .. ೪..

ಚನ್ದ್ರಿಕಾ ಚನ್ದ್ರವದನಾ ಚನ್ದ್ರಲೇಖಾವಿಭೂಷಿತಾ .
ಸಾವಿತ್ರೀ ಸುರಸಾ ದೇವೀ ದಿವ್ಯಾಲಙ್ಕಾರಭೂಷಿತಾ .. ೫..

ವಾಗ್ದೇವೀ ವಸುಧಾ ತೀವ್ರಾ ಮಹಾಭದ್ರಾ ಮಹಾಬಲಾ .
ಭೋಗದಾ ಭಾರತೀ ಭಾಮಾ ಗೋವಿನ್ದಾ ಗೋಮತೀ ಶಿವಾ .. ೬..

ಜಟಿಲಾ ವಿನ್ಧ್ಯವಾಸಾ ಚ ವಿನ್ಧ್ಯಾಚಲವಿರಾಜಿತಾ .
ಚಣ್ಡಿಕಾ ವೈಷ್ಣವೀ ಬ್ರಾಹ್ಮೀ ಬ್ರಹ್ಮಜ್ಞಾನೈಕಸಾಧನಾ .. ೭..

ಸೌದಾಮಿನೀ ಸುಧಾಮೂರ್ತಿಸ್ಸುಭದ್ರಾ ಸುರಪೂಜಿತಾ .
ಸುವಾಸಿನೀ ಸುನಾಸಾ ಚ ವಿನಿದ್ರಾ ಪದ್ಮಲೋಚನಾ .. ೮..

ವಿದ್ಯಾರೂಪಾ ವಿಶಾಲಾಕ್ಷೀ ಬ್ರಹ್ಮಜಾಯಾ ಮಹಾಫಲಾ .
ತ್ರಯೀಮೂರ್ತಿಃ ತ್ರಿಕಾಲಜ್ಞಾ ತ್ರಿಗುಣಾ ಶಾಸ್ತ್ರರೂಪಿಣೀ .. ೯..

ಶುಮ್ಭಾಸುರಪ್ರಮಥಿನೀ ಶುಭದಾ ಚ ಸ್ವರಾತ್ಮಿಕಾ .
ರಕ್ತಬೀಜನಿಹಂತ್ರೀ ಚ ಚಾಮುಣ್ಡಾ ಚಾಮ್ಬಿಕಾ ತಥಾ .. ೧೦..

ಮುಣ್ಡಕಾಯಪ್ರಹರಣಾ ಧೂಮ್ರಲೋಚನಮರ್ದನಾ .
ಸರ್ವದೇವಸ್ತುತಾ ಸೌಮ್ಯಾ ಸುರಾಸುರನಮಸ್ಕೃತಾ .. ೧೧..

ಕಾಲರಾತ್ರೀ ಕಲಾಧಾರಾ ರೂಪಸೌಭಾಗ್ಯದಾಯಿನೀ .
ವಾಗ್ದೇವೀ ಚ ವರಾರೋಹಾ ವಾರಾಹೀ ವಾರಿಜಾಸನಾ .. ೧೨..

ಚಿತ್ರಾಮ್ಬರಾ ಚಿತ್ರಗನ್ಧಾ ಚಿತ್ರಮಾಲ್ಯವಿಭೂಷಿತಾ .
ಕಾನ್ತಾ ಕಾಮಪ್ರದಾ ವನ್ದ್ಯಾ ವಿದ್ಯಾಧರಸುಪೂಜಿತಾ .. ೧೩..

ಶ್ವೇತಾನನಾ ನೀಲಭುಜಾ ಚತುರ್ವರ್ಗಫಲಪ್ರದಾ .
ಚತುರಾನನಸಾಮ್ರಾಜ್ಯಾ ರಕ್ತಮದ್ಯಾ ನಿರಞ್ಜನಾ .. ೧೪..

ಹಂಸಾಸನಾ ನೀಲಜಙ್ಘಾ ಬ್ರಹ್ಮವಿಷ್ಣುಶಿವಾತ್ಮಿಕಾ .
ಏವಂ ಸರಸ್ವತೀದೇವ್ಯಾ ನಾಮ್ನಾಮಷ್ಟೋತ್ತರಂ ಶತಮ್ .. ೧೫..