શ્રીકૃષ્ણાષ્ટોત્તરશતનામસ્તોત્રમ્

શ્રીકૃષ્ણાષ્ટોત્તરશતનામસ્તોત્રમ્

શ્રીશેષ ઉવાચ .
ૐ શ્રીકૃષ્ણઃ કમલાનાથો વાસુદેવઃ સનાતનઃ .
વસુદેવાત્મજઃ પુણ્યો લીલામાનુષવિગ્રહઃ .. ૧..

શ્રીવત્સકૌસ્તુભધરો યશોદાવત્સલો હરિઃ .
ચતુર્ભુજાત્તચક્રાસિગદાશઙ્ખામ્બુજાયુધઃ .. ૨..

દેવકીનન્દનઃ શ્રીશો નન્દગોપપ્રિયાત્મજઃ .
યમુનાવેગસંહારી બલભદ્રપ્રિયાનુજઃ .. ૩..

પૂતનાજીવિતહરઃ શકટાસુરભઞ્જનઃ .
નન્દવ્રજજનાનન્દી સચ્ચિદાનન્દવિગ્રહઃ .. ૪..

નવનીતનવાહારી મુચુકુન્દપ્રસાદકઃ .
ષોડશસ્ત્રીસહસ્રેશસ્ત્રિભઙ્ગો મધુરાકૃતિઃ .. ૫..

શુકવાગમૃતાબ્ધીન્દુર્ગોવિન્દો ગોવિદામ્પતિઃ .
વત્સપાલનસઞ્ચારી ધેનુકાસુરભઞ્જનઃ .. ૬..

તૃણીકૃતતૃણાવર્તો યમલાર્જુનભઞ્જનઃ .
ઉત્તાલતાલભેત્તા ચ તમાલશ્યામલાકૃતિઃ .. ૭..

ગોપગોપીશ્વરો યોગી સૂર્યકોટિસમપ્રભઃ .
ઇલાપતિઃ પરંજ્યોતિર્યાદવેન્દ્રો યદૂદ્વહઃ .. ૮..

વનમાલી પીતવાસાઃ પારિજાતાપહારકઃ .
ગોવર્ધનાચલોદ્ધર્તા ગોપાલઃ સર્વપાલકઃ .. ૯..

અજો નિરઞ્જનઃ કામજનકઃ કઞ્જલોચનઃ .
મધુહા મથુરાનાથો દ્વારકાનાયકો બલી .. ૧૦..

વૃન્દાવનાન્તસઞ્ચારી તુલસીદામભૂષણઃ .
સ્યમન્તકમણેર્હર્તા નરનારાયણાત્મકઃ .. ૧૧..

કુબ્જાકૃષ્ણામ્બરધરો માયી પરમપૂરુષઃ .
મુષ્ટિકાસુરચાણૂરમહાયુદ્ધવિશારદઃ .. ૧૨..

સંસારવૈરી કંસારિર્મુરારિર્નરકાન્તકઃ .
અનાદિર્બ્રહ્મચારી ચ કૃષ્ણાવ્યસનકર્ષકઃ .. ૧૩..

શિશુપાલશિરચ્છેત્તા દુર્યોધનકુલાન્તકૃત્ .
વિદુરાક્રૂરવરદો વિશ્વરૂપપ્રદર્શકઃ .. ૧૪..

સત્યવાક્ સત્યસઙ્કલ્પઃ સત્યભામારતો જયી .
સુભદ્રાપૂર્વજો વિષ્ણુર્ભીષ્મમુક્તિપ્રદાયકઃ .. ૧૫..

જગદ્ગુરુર્જગન્નાથો વેણુવાદ્યવિશારદઃ .
વૃષભાસુરવિધ્વંસી બકારિર્બાણબાહુકૃત્ .. ૧૬..

યુધિષ્ઠિરપ્રતિષ્ઠાતા બર્હિબર્હાવતંસકઃ .
પાર્થસારથિરવ્યક્તો ગીતામૃતમહોદધિઃ .. ૧૭..

કાલીયફણિમાણિક્યરઞ્જિતશ્રીપદામ્બુજઃ .
દામોદરો યજ્ઞભોક્તા દાનવેન્દ્રવિનાશનઃ .. ૧૮..

નારાયણઃ પરમ્બ્રહ્મ પન્નગાશનવાહનઃ .
જલક્રીડાસમાસક્તગોપીવસ્ત્રાપહારકઃ .. ૧૯..

પુણ્યશ્લોકસ્તીર્થકરો વેદવેદ્યો દયાનિધિઃ .
સર્વતીર્થાત્મકઃ સર્વગ્રહરૂપી પરાત્પરઃ .. ૨૦..

ઇત્યેવં કૃષ્ણદેવસ્ય નામ્નામષ્ટોત્તરં શતમ્ .
કૃષ્ણેન કૃષ્ણભક્તેન શ્રુત્વા ગીતામૃતં પુરા .. ૨૧..

સ્તોત્રં કૃષ્ણપ્રિયકરં કૃતં તસ્માન્મયા પુરા .
કૃષ્ણનામામૃતં નામ પરમાનન્દદાયકમ્ .. ૨૨..

અનુપદ્રવદુઃખઘ્નં પરમાયુષ્યવર્ધનમ્
દાનં શ્રુતં તપસ્તીર્થં યત્કૃતં ત્વિહ જન્મનિ .. ૨૩..

પઠતાં શૃણ્વતાં ચૈવ કોટિકોટિગુણં ભવેત્ .
પુત્રપ્રદમપુત્રાણામગતીનાં ગતિપ્રદમ્ .. ૨૪..

ધનાવહં દરિદ્રાણાં જયેચ્છૂનાં જયાવહમ્ .
શિશૂનાં ગોકુલાનાં ચ પુષ્ટિદં પુષ્ટિવર્ધનમ્ .. ૨૫..

વાતગ્રહજ્વરાદીનાં શમનં શાન્તિમુક્તિદમ્ .
સમસ્તકામદં સદ્યઃ કોટિજન્માઘનાશનમ્ .. ૨૬..

અન્તે કૃષ્ણસ્મરણદં ભવતાપભયાપહમ્ .
કૃષ્ણાય યાદવેન્દ્રાય જ્ઞાનમુદ્રાય યોગિને .
નાથાય રુક્મિણીશાય નમો વેદાન્તવેદિને .. ૨૭..

ઇમં મન્ત્રં મહાદેવિ જપન્નેવ દિવાનિશમ્ .
સર્વગ્રહાનુગ્રહભાક્ સર્વપ્રિયતમો ભવેત્ .. ૨૮..

પુત્રપૌત્રૈઃ પરિવૃતઃ સર્વસિદ્ધિસમૃદ્ધિમાન્ .
નિર્વિશ્ય ભોગાનન્તેઽપિ કૃષ્ણસાયુજ્યમાપ્યુનાત્ .. ૨૯..