પુરાતનપુરેશ્વર્યાઃ ભગવત્યાઃ સ્તવઃ

ૐ અન્નપૂર્ણેશ્વર્યૈ નમઃ
પુરાણપુરનાયિકે સુરવરેન્દુચૂડપ્રિયે
સુરાસુરનમસ્કૃતે કુરુ કૃપામનાથે મયિ .
જરામરણનાશિનીમધિગતાસ્સુરાં વૈ સુરાઃ
ચરાચરસવિત્રિ તે ચરણસેવયૈવામરાઃ .. ૧..

પુરાતનપુરાલયપ્રિયવિહારલોલે, શિવે,
પુરાન્તકમનઃપ્રિયે, પુરુષસોદરિ, શ્રીપુરે .
સુરારિકુલમર્દિનિ ત્રિદિવવીરસંરક્ષિણિ,
સ્ફુરદ્ગુરુકૃપાનિધે કુરુ કૃપામનાથે મયિ .. ૨..

પુરાણનિગમાગમપ્રકરબોધિતપ્રાભવે,
પુરાણપુરુષાર્ચિતે, શરણમમ્બ તેઽઙ્ઘ્રિદ્વયમ્ .
પુરાણસુકૃતવ્રજપ્રકટલબ્ધસન્દર્શને,
પુરાણપુરનાયિકે કુરુ કૃપામનાથે મયિ .. ૩..

પુરા કિલ સુરેશ્વરિ, ત્રિદશદુઃખસમ્ભેદને
પુરારિમુખદેવતાનિચયલબ્ધરૂપાઽભવઃ .
પુરાપિ ભવતી સતી દિતિજગર્વનિર્વાપિણી,
પુરાતનપુરેશ્વરિ, પ્રિયમયીં કૃપાં સન્તનુ .. ૪..

પુરા હિ ભવતસ્સુતા કિલ વિશુદ્ધધામ્ના ભૃતા
સુરેશિ ભવગેહિની સુરશરણ્યપાદામ્બુજા .
ગિરાં પથિ ન ગોચરા તરુણચન્દ્રચૂડામ્બિકા
પુરાણપુરનાયિકા જયતુ ચાન્નપૂર્ણેશ્વરી .. ૫..

કરાકલિતપાયસા પરકરોલ્લસદ્દર્વિકા
સુવર્ણમણિભૂષણા સરસભક્તપૂરપ્રદા .
સુચારુમુખચન્દ્રધિક્કૃતકલઙ્કિબિમ્બાઽમ્બિકા
સુરાસુરનમસ્કૃતા વિજયતાં પુરાણેશ્વરી .. ૬..

ચિરન્તનપુરેશિ તે ચિરતરં વિચિન્ત્યાદ્ભુતં
ચિરં કિલ મુનીશ્વરાશ્ચરિતસિન્ધુમગ્નાઃ પરમ્ .
ચિરાદપિ સુરાસ્પદં ન ખલુ વાઞ્છિતં મન્વતે
ચિરાર્જિતતપઃફલે જય જયાન્નપૂર્ણેશ્વરિ .. ૭..

કલાનિધિકલાધરે કલવિલાસવાણીગુણે
કલાધરકુલાર્ચિતે કલકલારણન્નૂપુરે .
કલાપજિતતારકાવલિલસન્નિતમ્બોજ્જ્વલે
કલાપિતપુરાપુરે જય જયાન્નપૂર્ણેશ્વરિ .. ૮..

ક્ષુધાન્ધજનજીવને જનનિ સાધુસઞ્જીવને
મુધાકૃતસુધારસે બુધજનૈસ્સદા સેવિતે .
બુધાવલિનુતેઽમ્બિકે, વિવિધવૈભવાનર્ગલે,
વિધાતૃમુખપૂજિતે, જય જયાન્નપૂર્ણેશ્વરિ .. ૯..

મહીસુરકુલાયને, કૃતમહીસુરારાધને,
મહીકૃતયુગાર્ણવે, મહિતભક્તદાનવ્રતે .
મહીપતિસમર્ચિતે હિમમહીધ્રપુણ્યાઙ્કુરે
મહીમુખરવૈભવે જય જયાન્નપૂર્ણેશ્વરિ .. ૧૦..

સુચારુરદનોજ્જ્વલત્સ્મિતલસચ્છરચ્છર્વરી
કરાયુતસદૃઙ્મુખી ત્વમસિ જીવનં પ્રાણિનામ્ .
નિજોરુચરિતામૃતાદૃતજનાર્પિતેષ્ટવ્રજે,
પુરાણપુરનાયિકે જય જયાન્નપૂર્ણેશ્વરિ .. ૧૧..

કૃપાં કુરુ કૃપાર્ણવે વિકલમાશુ કલ્યં કુરુ
કલે કલુષસન્તતિં કલુષયામ્બ કલ્યાણિનિ .
કુલાચલનિકેતને કલિતકુક્કુટાલિપ્રિયે,
પુરાણપુરનાયિકે, જય જયાન્નપૂર્ણેશ્વરિ .. ૧૨..

વિભઞ્જય વિપત્તતિં વિદારયાન્તરાયાવલિં
વિભીષય ભયવ્રજં ગદગણં વિનિર્ઘાતય .
વિનિર્દહ વિમૂઢતાં વિકલભાવમુચ્ચાટય
વિપોથય દરિદ્રતાં જય જયાન્નપૂર્ણેશ્વરિ .. ૧૩..

સાવિત્રિ સદુપાસિતે સકલનિષ્કલાઽઽકારિણિ,
ત્વમત્રિનયનોદ્ભવદ્યુતિવિહાસિવક્ત્રોજ્જ્વલે .
ભવિત્રિ ભવમોચિનિ, પ્રમદકુક્કુટામોદિનિ,
ધરિત્રિ, પરદેવતે, કુરુ કૃપાં પુરાણેશ્વરિ .. ૧૪..

ત્વમન્નમમિતં દદાસ્યખિલદુર્ગતેભ્યઃ પ્રિયા
ત્વમમ્બ જગતામતસ્ત્વમસિ જીવનં દેહિનામ્ .
ત્વદન્તિકમુપેત્ય યે ત્વયિ વિતન્વતે માનસં
ત્વમાશુ વિતનોષિ તાનખિલદુર્લભપ્રાભવાન્ .. ૧૫..

રમે પરમહં રમે તવપદાબ્જયો રમ્યયોઃ
રમેત કતમોઽપિ વા ભવસુખે વિરામાર્તિદે .
રમારમણપૂજિતે રમિતરામનાથાન્તરે,
રમાઽઽદૃતગુણાકરે જય જયાન્નપૂર્ણેશ્વરિ .. ૧૬..

ઉદઞ્ચિતકૃપાભરે સુકૃતસઞ્ચિતાલોકને,
કરાઞ્ચિતવિપઞ્ચિકાલલિતગાનલોલેઽમ્બિકે .
પરાઞ્ચિતસુકાઞ્ચનજ્વલિતકાઞ્ચિકારઞ્જિતે
પુરાઞ્ચિતપુરીપ્રિયે જય જયાન્નપૂર્ણેશ્વરિ .. ૧૭..

ચરાચરવિધાયિનિ ત્વદખિલં જગજ્જાયતે,
ત્વદન્નપરિવર્ધિતાસ્ત્વયિ વસન્તિ હિ પ્રાણિનઃ .
ત્વમેવ વિલયાસ્પદં નિખિલદેહિનાં ચણ્ડિકે,
પુરાણપુરનાયિકે જય જયાન્નપૂર્ણેશ્વરિ .. ૧૮..

ત્વદમ્બુરુહડમ્બરપ્રમથનાઙ્ઘ્રિયુગ્મં વિના
જનસ્ય જગદમ્બિકે શરણદં કિમન્યદ્ભુવિ .
અતસ્તવ પદાબ્જયોઃ પ્રદિશ મે ચ ભક્તિં પરાં
પુરાણપુરનાયિકે જય જયાન્નપૂર્ણેશ્વરિ .. ૧૯..

ત્વમમ્બ ભવભીષણપ્રબલભોગિવક્ત્રાદિમં
વિમોચય કૃપાકરિ પ્રતિપદં તવાઙ્ઘ્રિશ્રિતમ્ .
કુમારિ કુલપાલિનિ પ્રમથયાશુ પીડાભરં
પરાણુદ પરં ભયં જય જયાન્નપૂર્ણેશ્વરિ .. ૨૦..

શિરઃકલિતચન્દ્રયા કલિતદિવ્યભૂષાઢ્યયા
સમસ્તમુનિવન્દ્યયા યુધિ નિરસ્તદૈત્યૌઘયા .
અનસ્તમિતબોધયા કરવરાત્તદિવ્યાન્નયા
કયાપિ કરુણાર્દ્રયા સશરણા વયં સન્તતમ્ .. ૨૧..

અમન્દમયિ સમ્પદં પરિદદાસિ પદ્માલયે
સુમન્દમપિ વાક્પતિં વિતનુષે ગિરાં નાયિકે .
મુકુન્દસહજે મુહુઃ કલિતકાલિકારૂપિણિ
વિહંસિ દિતિજાવલિં જય જયાન્નપૂર્ણેશ્વરિ .. ૨૨..

પ્રસીદ જગદમ્બિકે શૃણુ મદીયદીનં વચઃ
વિપત્સુ શરણં ભવ પ્રણુદ દુર્ગમાં દુર્ગતિમ્ .
પુરો મમ દૃશોશ્શિવે કનકભૂષણાભૂષિતા
ભવાનિ ભવ ભાસુરા જય જયાન્નપૂર્ણેશ્વરિ .. ૨૩..

કદા તવ પદાર્ચકં હિમમહીધ્રપુણ્યાઙ્કુરે
કિમર્ભક તવેપ્સિતં કથય સાધયામ્યાશુ તે .
ઇતિ પ્રિયવચો મધુપ્રકરવર્ષમાતન્વતી
પુરાણપુરનાયિકે મમ પુરસ્સમાયાસ્યસિ .. ૨૪..

કલક્વણિતનૂપુરા કટિનિબદ્ધકાઞ્ચીગુણા
રણન્મણિવિભૂષણા ચરણકિઙ્કિણીરાવિણી .
શરચ્છશિમુખોદ્ગલન્મધુરવાદમોદપ્રદા
પુરાણપુરનાયિકે જય જયાન્નપૂર્ણેશ્વરિ .. ૨૫..

અનન્તદુરિતક્રિયાઽઽચરણચુઞ્ચુમપ્યમ્બિકે
ન મુઞ્ચ તવ કિઙ્કરં પરમદીનદીનં શિવે
વિપત્સુ હૃદિ સંસ્મૃતા સકલપાતકધ્વંસિની
પ્રસીદ પરિપાલય પ્રણતમન્નપૂર્ણેશ્વરિ .. ૨૬..

મુનીન્દ્રગણસેવિતે મનુજપાલસમ્પૂજિતે
મતઙ્ગકુલનાયિકે મધુમદોજ્જ્વલે મોહિનિ .
મરાલગમનાઞ્ચિતે મરકતપ્રભાશ્યામલે
મનોહરિ મનો મમ પ્રમદયાન્નપૂર્ણેશ્વરિ .. ૨૭..

ઇદં કિલ કૃતં મયા પ્રણતકામદે મોદદે
સમર્પિતમહર્પતેરણુકદીપિકાદાનવત્ .
પુરાણપુરનાયિકે તવ પદાબ્જયોર્દીપ્રયો-
રપાઙ્ગય ચ માં સદા જય જયાન્નપૂર્ણેશ્વરિ .. ૨૮..

ઇમાં નક્ષત્રમાલાં -
ભારદ્વાજકુલોત્પન્નઃ સુબ્બરામાભિધો દ્વિજઃ .
પરાશક્તેઃ પાદમૂલે ભૂષણં કલ્પયામ્યહમ્ ..