పురాతనపురేశ్వర్యాః భగవత్యాః స్తవః

ఓం అన్నపూర్ణేశ్వర్యై నమః
పురాణపురనాయికే సురవరేన్దుచూడప్రియే
సురాసురనమస్కృతే కురు కృపామనాథే మయి .
జరామరణనాశినీమధిగతాస్సురాం వై సురాః
చరాచరసవిత్రి తే చరణసేవయైవామరాః .. 1..

పురాతనపురాలయప్రియవిహారలోలే, శివే,
పురాన్తకమనఃప్రియే, పురుషసోదరి, శ్రీపురే .
సురారికులమర్దిని త్రిదివవీరసంరక్షిణి,
స్ఫురద్గురుకృపానిధే కురు కృపామనాథే మయి .. 2..

పురాణనిగమాగమప్రకరబోధితప్రాభవే,
పురాణపురుషార్చితే, శరణమమ్బ తేఽఙ్ఘ్రిద్వయమ్ .
పురాణసుకృతవ్రజప్రకటలబ్ధసన్దర్శనే,
పురాణపురనాయికే కురు కృపామనాథే మయి .. 3..

పురా కిల సురేశ్వరి, త్రిదశదుఃఖసమ్భేదనే
పురారిముఖదేవతానిచయలబ్ధరూపాఽభవః .
పురాపి భవతీ సతీ దితిజగర్వనిర్వాపిణీ,
పురాతనపురేశ్వరి, ప్రియమయీం కృపాం సన్తను .. 4..

పురా హి భవతస్సుతా కిల విశుద్ధధామ్నా భృతా
సురేశి భవగేహినీ సురశరణ్యపాదామ్బుజా .
గిరాం పథి న గోచరా తరుణచన్ద్రచూడామ్బికా
పురాణపురనాయికా జయతు చాన్నపూర్ణేశ్వరీ .. 5..

కరాకలితపాయసా పరకరోల్లసద్దర్వికా
సువర్ణమణిభూషణా సరసభక్తపూరప్రదా .
సుచారుముఖచన్ద్రధిక్కృతకలఙ్కిబిమ్బాఽమ్బికా
సురాసురనమస్కృతా విజయతాం పురాణేశ్వరీ .. 6..

చిరన్తనపురేశి తే చిరతరం విచిన్త్యాద్భుతం
చిరం కిల మునీశ్వరాశ్చరితసిన్ధుమగ్నాః పరమ్ .
చిరాదపి సురాస్పదం న ఖలు వాఞ్ఛితం మన్వతే
చిరార్జితతపఃఫలే జయ జయాన్నపూర్ణేశ్వరి .. 7..

కలానిధికలాధరే కలవిలాసవాణీగుణే
కలాధరకులార్చితే కలకలారణన్నూపురే .
కలాపజితతారకావలిలసన్నితమ్బోజ్జ్వలే
కలాపితపురాపురే జయ జయాన్నపూర్ణేశ్వరి .. 8..

క్షుధాన్ధజనజీవనే జనని సాధుసఞ్జీవనే
ముధాకృతసుధారసే బుధజనైస్సదా సేవితే .
బుధావలినుతేఽమ్బికే, వివిధవైభవానర్గలే,
విధాతృముఖపూజితే, జయ జయాన్నపూర్ణేశ్వరి .. 9..

మహీసురకులాయనే, కృతమహీసురారాధనే,
మహీకృతయుగార్ణవే, మహితభక్తదానవ్రతే .
మహీపతిసమర్చితే హిమమహీధ్రపుణ్యాఙ్కురే
మహీముఖరవైభవే జయ జయాన్నపూర్ణేశ్వరి .. 10..

సుచారురదనోజ్జ్వలత్స్మితలసచ్ఛరచ్ఛర్వరీ
కరాయుతసదృఙ్ముఖీ త్వమసి జీవనం ప్రాణినామ్ .
నిజోరుచరితామృతాదృతజనార్పితేష్టవ్రజే,
పురాణపురనాయికే జయ జయాన్నపూర్ణేశ్వరి .. 11..

కృపాం కురు కృపార్ణవే వికలమాశు కల్యం కురు
కలే కలుషసన్తతిం కలుషయామ్బ కల్యాణిని .
కులాచలనికేతనే కలితకుక్కుటాలిప్రియే,
పురాణపురనాయికే, జయ జయాన్నపూర్ణేశ్వరి .. 12..

విభఞ్జయ విపత్తతిం విదారయాన్తరాయావలిం
విభీషయ భయవ్రజం గదగణం వినిర్ఘాతయ .
వినిర్దహ విమూఢతాం వికలభావముచ్చాటయ
విపోథయ దరిద్రతాం జయ జయాన్నపూర్ణేశ్వరి .. 13..

సావిత్రి సదుపాసితే సకలనిష్కలాఽఽకారిణి,
త్వమత్రినయనోద్భవద్యుతివిహాసివక్త్రోజ్జ్వలే .
భవిత్రి భవమోచిని, ప్రమదకుక్కుటామోదిని,
ధరిత్రి, పరదేవతే, కురు కృపాం పురాణేశ్వరి .. 14..

త్వమన్నమమితం దదాస్యఖిలదుర్గతేభ్యః ప్రియా
త్వమమ్బ జగతామతస్త్వమసి జీవనం దేహినామ్ .
త్వదన్తికముపేత్య యే త్వయి వితన్వతే మానసం
త్వమాశు వితనోషి తానఖిలదుర్లభప్రాభవాన్ .. 15..

రమే పరమహం రమే తవపదాబ్జయో రమ్యయోః
రమేత కతమోఽపి వా భవసుఖే విరామార్తిదే .
రమారమణపూజితే రమితరామనాథాన్తరే,
రమాఽఽదృతగుణాకరే జయ జయాన్నపూర్ణేశ్వరి .. 16..

ఉదఞ్చితకృపాభరే సుకృతసఞ్చితాలోకనే,
కరాఞ్చితవిపఞ్చికాలలితగానలోలేఽమ్బికే .
పరాఞ్చితసుకాఞ్చనజ్వలితకాఞ్చికారఞ్జితే
పురాఞ్చితపురీప్రియే జయ జయాన్నపూర్ణేశ్వరి .. 17..

చరాచరవిధాయిని త్వదఖిలం జగజ్జాయతే,
త్వదన్నపరివర్ధితాస్త్వయి వసన్తి హి ప్రాణినః .
త్వమేవ విలయాస్పదం నిఖిలదేహినాం చణ్డికే,
పురాణపురనాయికే జయ జయాన్నపూర్ణేశ్వరి .. 18..

త్వదమ్బురుహడమ్బరప్రమథనాఙ్ఘ్రియుగ్మం వినా
జనస్య జగదమ్బికే శరణదం కిమన్యద్భువి .
అతస్తవ పదాబ్జయోః ప్రదిశ మే చ భక్తిం పరాం
పురాణపురనాయికే జయ జయాన్నపూర్ణేశ్వరి .. 19..

త్వమమ్బ భవభీషణప్రబలభోగివక్త్రాదిమం
విమోచయ కృపాకరి ప్రతిపదం తవాఙ్ఘ్రిశ్రితమ్ .
కుమారి కులపాలిని ప్రమథయాశు పీడాభరం
పరాణుద పరం భయం జయ జయాన్నపూర్ణేశ్వరి .. 20..

శిరఃకలితచన్ద్రయా కలితదివ్యభూషాఢ్యయా
సమస్తమునివన్ద్యయా యుధి నిరస్తదైత్యౌఘయా .
అనస్తమితబోధయా కరవరాత్తదివ్యాన్నయా
కయాపి కరుణార్ద్రయా సశరణా వయం సన్తతమ్ .. 21..

అమన్దమయి సమ్పదం పరిదదాసి పద్మాలయే
సుమన్దమపి వాక్పతిం వితనుషే గిరాం నాయికే .
ముకున్దసహజే ముహుః కలితకాలికారూపిణి
విహంసి దితిజావలిం జయ జయాన్నపూర్ణేశ్వరి .. 22..

ప్రసీద జగదమ్బికే శృణు మదీయదీనం వచః
విపత్సు శరణం భవ ప్రణుద దుర్గమాం దుర్గతిమ్ .
పురో మమ దృశోశ్శివే కనకభూషణాభూషితా
భవాని భవ భాసురా జయ జయాన్నపూర్ణేశ్వరి .. 23..

కదా తవ పదార్చకం హిమమహీధ్రపుణ్యాఙ్కురే
కిమర్భక తవేప్సితం కథయ సాధయామ్యాశు తే .
ఇతి ప్రియవచో మధుప్రకరవర్షమాతన్వతీ
పురాణపురనాయికే మమ పురస్సమాయాస్యసి .. 24..

కలక్వణితనూపురా కటినిబద్ధకాఞ్చీగుణా
రణన్మణివిభూషణా చరణకిఙ్కిణీరావిణీ .
శరచ్ఛశిముఖోద్గలన్మధురవాదమోదప్రదా
పురాణపురనాయికే జయ జయాన్నపూర్ణేశ్వరి .. 25..

అనన్తదురితక్రియాఽఽచరణచుఞ్చుమప్యమ్బికే
న ముఞ్చ తవ కిఙ్కరం పరమదీనదీనం శివే
విపత్సు హృది సంస్మృతా సకలపాతకధ్వంసినీ
ప్రసీద పరిపాలయ ప్రణతమన్నపూర్ణేశ్వరి .. 26..

మునీన్ద్రగణసేవితే మనుజపాలసమ్పూజితే
మతఙ్గకులనాయికే మధుమదోజ్జ్వలే మోహిని .
మరాలగమనాఞ్చితే మరకతప్రభాశ్యామలే
మనోహరి మనో మమ ప్రమదయాన్నపూర్ణేశ్వరి .. 27..

ఇదం కిల కృతం మయా ప్రణతకామదే మోదదే
సమర్పితమహర్పతేరణుకదీపికాదానవత్ .
పురాణపురనాయికే తవ పదాబ్జయోర్దీప్రయో-
రపాఙ్గయ చ మాం సదా జయ జయాన్నపూర్ణేశ్వరి .. 28..

ఇమాం నక్షత్రమాలాం -
భారద్వాజకులోత్పన్నః సుబ్బరామాభిధో ద్విజః .
పరాశక్తేః పాదమూలే భూషణం కల్పయామ్యహమ్ ..