ಪುರಾತನಪುರೇಶ್ವರ್ಯಾಃ ಭಗವತ್ಯಾಃ ಸ್ತವಃ

ಓಂ ಅನ್ನಪೂರ್ಣೇಶ್ವರ್ಯೈ ನಮಃ
ಪುರಾಣಪುರನಾಯಿಕೇ ಸುರವರೇನ್ದುಚೂಡಪ್ರಿಯೇ
ಸುರಾಸುರನಮಸ್ಕೃತೇ ಕುರು ಕೃಪಾಮನಾಥೇ ಮಯಿ .
ಜರಾಮರಣನಾಶಿನೀಮಧಿಗತಾಸ್ಸುರಾಂ ವೈ ಸುರಾಃ
ಚರಾಚರಸವಿತ್ರಿ ತೇ ಚರಣಸೇವಯೈವಾಮರಾಃ .. ೧..

ಪುರಾತನಪುರಾಲಯಪ್ರಿಯವಿಹಾರಲೋಲೇ, ಶಿವೇ,
ಪುರಾನ್ತಕಮನಃಪ್ರಿಯೇ, ಪುರುಷಸೋದರಿ, ಶ್ರೀಪುರೇ .
ಸುರಾರಿಕುಲಮರ್ದಿನಿ ತ್ರಿದಿವವೀರಸಂರಕ್ಷಿಣಿ,
ಸ್ಫುರದ್ಗುರುಕೃಪಾನಿಧೇ ಕುರು ಕೃಪಾಮನಾಥೇ ಮಯಿ .. ೨..

ಪುರಾಣನಿಗಮಾಗಮಪ್ರಕರಬೋಧಿತಪ್ರಾಭವೇ,
ಪುರಾಣಪುರುಷಾರ್ಚಿತೇ, ಶರಣಮಮ್ಬ ತೇಽಙ್ಘ್ರಿದ್ವಯಮ್ .
ಪುರಾಣಸುಕೃತವ್ರಜಪ್ರಕಟಲಬ್ಧಸನ್ದರ್ಶನೇ,
ಪುರಾಣಪುರನಾಯಿಕೇ ಕುರು ಕೃಪಾಮನಾಥೇ ಮಯಿ .. ೩..

ಪುರಾ ಕಿಲ ಸುರೇಶ್ವರಿ, ತ್ರಿದಶದುಃಖಸಮ್ಭೇದನೇ
ಪುರಾರಿಮುಖದೇವತಾನಿಚಯಲಬ್ಧರೂಪಾಽಭವಃ .
ಪುರಾಪಿ ಭವತೀ ಸತೀ ದಿತಿಜಗರ್ವನಿರ್ವಾಪಿಣೀ,
ಪುರಾತನಪುರೇಶ್ವರಿ, ಪ್ರಿಯಮಯೀಂ ಕೃಪಾಂ ಸನ್ತನು .. ೪..

ಪುರಾ ಹಿ ಭವತಸ್ಸುತಾ ಕಿಲ ವಿಶುದ್ಧಧಾಮ್ನಾ ಭೃತಾ
ಸುರೇಶಿ ಭವಗೇಹಿನೀ ಸುರಶರಣ್ಯಪಾದಾಮ್ಬುಜಾ .
ಗಿರಾಂ ಪಥಿ ನ ಗೋಚರಾ ತರುಣಚನ್ದ್ರಚೂಡಾಮ್ಬಿಕಾ
ಪುರಾಣಪುರನಾಯಿಕಾ ಜಯತು ಚಾನ್ನಪೂರ್ಣೇಶ್ವರೀ .. ೫..

ಕರಾಕಲಿತಪಾಯಸಾ ಪರಕರೋಲ್ಲಸದ್ದರ್ವಿಕಾ
ಸುವರ್ಣಮಣಿಭೂಷಣಾ ಸರಸಭಕ್ತಪೂರಪ್ರದಾ .
ಸುಚಾರುಮುಖಚನ್ದ್ರಧಿಕ್ಕೃತಕಲಙ್ಕಿಬಿಮ್ಬಾಽಮ್ಬಿಕಾ
ಸುರಾಸುರನಮಸ್ಕೃತಾ ವಿಜಯತಾಂ ಪುರಾಣೇಶ್ವರೀ .. ೬..

ಚಿರನ್ತನಪುರೇಶಿ ತೇ ಚಿರತರಂ ವಿಚಿನ್ತ್ಯಾದ್ಭುತಂ
ಚಿರಂ ಕಿಲ ಮುನೀಶ್ವರಾಶ್ಚರಿತಸಿನ್ಧುಮಗ್ನಾಃ ಪರಮ್ .
ಚಿರಾದಪಿ ಸುರಾಸ್ಪದಂ ನ ಖಲು ವಾಞ್ಛಿತಂ ಮನ್ವತೇ
ಚಿರಾರ್ಜಿತತಪಃಫಲೇ ಜಯ ಜಯಾನ್ನಪೂರ್ಣೇಶ್ವರಿ .. ೭..

ಕಲಾನಿಧಿಕಲಾಧರೇ ಕಲವಿಲಾಸವಾಣೀಗುಣೇ
ಕಲಾಧರಕುಲಾರ್ಚಿತೇ ಕಲಕಲಾರಣನ್ನೂಪುರೇ .
ಕಲಾಪಜಿತತಾರಕಾವಲಿಲಸನ್ನಿತಮ್ಬೋಜ್ಜ್ವಲೇ
ಕಲಾಪಿತಪುರಾಪುರೇ ಜಯ ಜಯಾನ್ನಪೂರ್ಣೇಶ್ವರಿ .. ೮..

ಕ್ಷುಧಾನ್ಧಜನಜೀವನೇ ಜನನಿ ಸಾಧುಸಞ್ಜೀವನೇ
ಮುಧಾಕೃತಸುಧಾರಸೇ ಬುಧಜನೈಸ್ಸದಾ ಸೇವಿತೇ .
ಬುಧಾವಲಿನುತೇಽಮ್ಬಿಕೇ, ವಿವಿಧವೈಭವಾನರ್ಗಲೇ,
ವಿಧಾತೃಮುಖಪೂಜಿತೇ, ಜಯ ಜಯಾನ್ನಪೂರ್ಣೇಶ್ವರಿ .. ೯..

ಮಹೀಸುರಕುಲಾಯನೇ, ಕೃತಮಹೀಸುರಾರಾಧನೇ,
ಮಹೀಕೃತಯುಗಾರ್ಣವೇ, ಮಹಿತಭಕ್ತದಾನವ್ರತೇ .
ಮಹೀಪತಿಸಮರ್ಚಿತೇ ಹಿಮಮಹೀಧ್ರಪುಣ್ಯಾಙ್ಕುರೇ
ಮಹೀಮುಖರವೈಭವೇ ಜಯ ಜಯಾನ್ನಪೂರ್ಣೇಶ್ವರಿ .. ೧೦..

ಸುಚಾರುರದನೋಜ್ಜ್ವಲತ್ಸ್ಮಿತಲಸಚ್ಛರಚ್ಛರ್ವರೀ
ಕರಾಯುತಸದೃಙ್ಮುಖೀ ತ್ವಮಸಿ ಜೀವನಂ ಪ್ರಾಣಿನಾಮ್ .
ನಿಜೋರುಚರಿತಾಮೃತಾದೃತಜನಾರ್ಪಿತೇಷ್ಟವ್ರಜೇ,
ಪುರಾಣಪುರನಾಯಿಕೇ ಜಯ ಜಯಾನ್ನಪೂರ್ಣೇಶ್ವರಿ .. ೧೧..

ಕೃಪಾಂ ಕುರು ಕೃಪಾರ್ಣವೇ ವಿಕಲಮಾಶು ಕಲ್ಯಂ ಕುರು
ಕಲೇ ಕಲುಷಸನ್ತತಿಂ ಕಲುಷಯಾಮ್ಬ ಕಲ್ಯಾಣಿನಿ .
ಕುಲಾಚಲನಿಕೇತನೇ ಕಲಿತಕುಕ್ಕುಟಾಲಿಪ್ರಿಯೇ,
ಪುರಾಣಪುರನಾಯಿಕೇ, ಜಯ ಜಯಾನ್ನಪೂರ್ಣೇಶ್ವರಿ .. ೧೨..

ವಿಭಞ್ಜಯ ವಿಪತ್ತತಿಂ ವಿದಾರಯಾನ್ತರಾಯಾವಲಿಂ
ವಿಭೀಷಯ ಭಯವ್ರಜಂ ಗದಗಣಂ ವಿನಿರ್ಘಾತಯ .
ವಿನಿರ್ದಹ ವಿಮೂಢತಾಂ ವಿಕಲಭಾವಮುಚ್ಚಾಟಯ
ವಿಪೋಥಯ ದರಿದ್ರತಾಂ ಜಯ ಜಯಾನ್ನಪೂರ್ಣೇಶ್ವರಿ .. ೧೩..

ಸಾವಿತ್ರಿ ಸದುಪಾಸಿತೇ ಸಕಲನಿಷ್ಕಲಾಽಽಕಾರಿಣಿ,
ತ್ವಮತ್ರಿನಯನೋದ್ಭವದ್ಯುತಿವಿಹಾಸಿವಕ್ತ್ರೋಜ್ಜ್ವಲೇ .
ಭವಿತ್ರಿ ಭವಮೋಚಿನಿ, ಪ್ರಮದಕುಕ್ಕುಟಾಮೋದಿನಿ,
ಧರಿತ್ರಿ, ಪರದೇವತೇ, ಕುರು ಕೃಪಾಂ ಪುರಾಣೇಶ್ವರಿ .. ೧೪..

ತ್ವಮನ್ನಮಮಿತಂ ದದಾಸ್ಯಖಿಲದುರ್ಗತೇಭ್ಯಃ ಪ್ರಿಯಾ
ತ್ವಮಮ್ಬ ಜಗತಾಮತಸ್ತ್ವಮಸಿ ಜೀವನಂ ದೇಹಿನಾಮ್ .
ತ್ವದನ್ತಿಕಮುಪೇತ್ಯ ಯೇ ತ್ವಯಿ ವಿತನ್ವತೇ ಮಾನಸಂ
ತ್ವಮಾಶು ವಿತನೋಷಿ ತಾನಖಿಲದುರ್ಲಭಪ್ರಾಭವಾನ್ .. ೧೫..

ರಮೇ ಪರಮಹಂ ರಮೇ ತವಪದಾಬ್ಜಯೋ ರಮ್ಯಯೋಃ
ರಮೇತ ಕತಮೋಽಪಿ ವಾ ಭವಸುಖೇ ವಿರಾಮಾರ್ತಿದೇ .
ರಮಾರಮಣಪೂಜಿತೇ ರಮಿತರಾಮನಾಥಾನ್ತರೇ,
ರಮಾಽಽದೃತಗುಣಾಕರೇ ಜಯ ಜಯಾನ್ನಪೂರ್ಣೇಶ್ವರಿ .. ೧೬..

ಉದಞ್ಚಿತಕೃಪಾಭರೇ ಸುಕೃತಸಞ್ಚಿತಾಲೋಕನೇ,
ಕರಾಞ್ಚಿತವಿಪಞ್ಚಿಕಾಲಲಿತಗಾನಲೋಲೇಽಮ್ಬಿಕೇ .
ಪರಾಞ್ಚಿತಸುಕಾಞ್ಚನಜ್ವಲಿತಕಾಞ್ಚಿಕಾರಞ್ಜಿತೇ
ಪುರಾಞ್ಚಿತಪುರೀಪ್ರಿಯೇ ಜಯ ಜಯಾನ್ನಪೂರ್ಣೇಶ್ವರಿ .. ೧೭..

ಚರಾಚರವಿಧಾಯಿನಿ ತ್ವದಖಿಲಂ ಜಗಜ್ಜಾಯತೇ,
ತ್ವದನ್ನಪರಿವರ್ಧಿತಾಸ್ತ್ವಯಿ ವಸನ್ತಿ ಹಿ ಪ್ರಾಣಿನಃ .
ತ್ವಮೇವ ವಿಲಯಾಸ್ಪದಂ ನಿಖಿಲದೇಹಿನಾಂ ಚಣ್ಡಿಕೇ,
ಪುರಾಣಪುರನಾಯಿಕೇ ಜಯ ಜಯಾನ್ನಪೂರ್ಣೇಶ್ವರಿ .. ೧೮..

ತ್ವದಮ್ಬುರುಹಡಮ್ಬರಪ್ರಮಥನಾಙ್ಘ್ರಿಯುಗ್ಮಂ ವಿನಾ
ಜನಸ್ಯ ಜಗದಮ್ಬಿಕೇ ಶರಣದಂ ಕಿಮನ್ಯದ್ಭುವಿ .
ಅತಸ್ತವ ಪದಾಬ್ಜಯೋಃ ಪ್ರದಿಶ ಮೇ ಚ ಭಕ್ತಿಂ ಪರಾಂ
ಪುರಾಣಪುರನಾಯಿಕೇ ಜಯ ಜಯಾನ್ನಪೂರ್ಣೇಶ್ವರಿ .. ೧೯..

ತ್ವಮಮ್ಬ ಭವಭೀಷಣಪ್ರಬಲಭೋಗಿವಕ್ತ್ರಾದಿಮಂ
ವಿಮೋಚಯ ಕೃಪಾಕರಿ ಪ್ರತಿಪದಂ ತವಾಙ್ಘ್ರಿಶ್ರಿತಮ್ .
ಕುಮಾರಿ ಕುಲಪಾಲಿನಿ ಪ್ರಮಥಯಾಶು ಪೀಡಾಭರಂ
ಪರಾಣುದ ಪರಂ ಭಯಂ ಜಯ ಜಯಾನ್ನಪೂರ್ಣೇಶ್ವರಿ .. ೨೦..

ಶಿರಃಕಲಿತಚನ್ದ್ರಯಾ ಕಲಿತದಿವ್ಯಭೂಷಾಢ್ಯಯಾ
ಸಮಸ್ತಮುನಿವನ್ದ್ಯಯಾ ಯುಧಿ ನಿರಸ್ತದೈತ್ಯೌಘಯಾ .
ಅನಸ್ತಮಿತಬೋಧಯಾ ಕರವರಾತ್ತದಿವ್ಯಾನ್ನಯಾ
ಕಯಾಪಿ ಕರುಣಾರ್ದ್ರಯಾ ಸಶರಣಾ ವಯಂ ಸನ್ತತಮ್ .. ೨೧..

ಅಮನ್ದಮಯಿ ಸಮ್ಪದಂ ಪರಿದದಾಸಿ ಪದ್ಮಾಲಯೇ
ಸುಮನ್ದಮಪಿ ವಾಕ್ಪತಿಂ ವಿತನುಷೇ ಗಿರಾಂ ನಾಯಿಕೇ .
ಮುಕುನ್ದಸಹಜೇ ಮುಹುಃ ಕಲಿತಕಾಲಿಕಾರೂಪಿಣಿ
ವಿಹಂಸಿ ದಿತಿಜಾವಲಿಂ ಜಯ ಜಯಾನ್ನಪೂರ್ಣೇಶ್ವರಿ .. ೨೨..

ಪ್ರಸೀದ ಜಗದಮ್ಬಿಕೇ ಶೃಣು ಮದೀಯದೀನಂ ವಚಃ
ವಿಪತ್ಸು ಶರಣಂ ಭವ ಪ್ರಣುದ ದುರ್ಗಮಾಂ ದುರ್ಗತಿಮ್ .
ಪುರೋ ಮಮ ದೃಶೋಶ್ಶಿವೇ ಕನಕಭೂಷಣಾಭೂಷಿತಾ
ಭವಾನಿ ಭವ ಭಾಸುರಾ ಜಯ ಜಯಾನ್ನಪೂರ್ಣೇಶ್ವರಿ .. ೨೩..

ಕದಾ ತವ ಪದಾರ್ಚಕಂ ಹಿಮಮಹೀಧ್ರಪುಣ್ಯಾಙ್ಕುರೇ
ಕಿಮರ್ಭಕ ತವೇಪ್ಸಿತಂ ಕಥಯ ಸಾಧಯಾಮ್ಯಾಶು ತೇ .
ಇತಿ ಪ್ರಿಯವಚೋ ಮಧುಪ್ರಕರವರ್ಷಮಾತನ್ವತೀ
ಪುರಾಣಪುರನಾಯಿಕೇ ಮಮ ಪುರಸ್ಸಮಾಯಾಸ್ಯಸಿ .. ೨೪..

ಕಲಕ್ವಣಿತನೂಪುರಾ ಕಟಿನಿಬದ್ಧಕಾಞ್ಚೀಗುಣಾ
ರಣನ್ಮಣಿವಿಭೂಷಣಾ ಚರಣಕಿಙ್ಕಿಣೀರಾವಿಣೀ .
ಶರಚ್ಛಶಿಮುಖೋದ್ಗಲನ್ಮಧುರವಾದಮೋದಪ್ರದಾ
ಪುರಾಣಪುರನಾಯಿಕೇ ಜಯ ಜಯಾನ್ನಪೂರ್ಣೇಶ್ವರಿ .. ೨೫..

ಅನನ್ತದುರಿತಕ್ರಿಯಾಽಽಚರಣಚುಞ್ಚುಮಪ್ಯಮ್ಬಿಕೇ
ನ ಮುಞ್ಚ ತವ ಕಿಙ್ಕರಂ ಪರಮದೀನದೀನಂ ಶಿವೇ
ವಿಪತ್ಸು ಹೃದಿ ಸಂಸ್ಮೃತಾ ಸಕಲಪಾತಕಧ್ವಂಸಿನೀ
ಪ್ರಸೀದ ಪರಿಪಾಲಯ ಪ್ರಣತಮನ್ನಪೂರ್ಣೇಶ್ವರಿ .. ೨೬..

ಮುನೀನ್ದ್ರಗಣಸೇವಿತೇ ಮನುಜಪಾಲಸಮ್ಪೂಜಿತೇ
ಮತಙ್ಗಕುಲನಾಯಿಕೇ ಮಧುಮದೋಜ್ಜ್ವಲೇ ಮೋಹಿನಿ .
ಮರಾಲಗಮನಾಞ್ಚಿತೇ ಮರಕತಪ್ರಭಾಶ್ಯಾಮಲೇ
ಮನೋಹರಿ ಮನೋ ಮಮ ಪ್ರಮದಯಾನ್ನಪೂರ್ಣೇಶ್ವರಿ .. ೨೭..

ಇದಂ ಕಿಲ ಕೃತಂ ಮಯಾ ಪ್ರಣತಕಾಮದೇ ಮೋದದೇ
ಸಮರ್ಪಿತಮಹರ್ಪತೇರಣುಕದೀಪಿಕಾದಾನವತ್ .
ಪುರಾಣಪುರನಾಯಿಕೇ ತವ ಪದಾಬ್ಜಯೋರ್ದೀಪ್ರಯೋ-
ರಪಾಙ್ಗಯ ಚ ಮಾಂ ಸದಾ ಜಯ ಜಯಾನ್ನಪೂರ್ಣೇಶ್ವರಿ .. ೨೮..

ಇಮಾಂ ನಕ್ಷತ್ರಮಾಲಾಂ -
ಭಾರದ್ವಾಜಕುಲೋತ್ಪನ್ನಃ ಸುಬ್ಬರಾಮಾಭಿಧೋ ದ್ವಿಜಃ .
ಪರಾಶಕ್ತೇಃ ಪಾದಮೂಲೇ ಭೂಷಣಂ ಕಲ್ಪಯಾಮ್ಯಹಮ್ ..