அத₂ க₃ணேஶகீ₃தா
.. ௐ நம꞉ ஶ்ரீக₃ணேஶாய ..
.. ப்ரத₂மோ(அ)த்₄யாய꞉ ..
.. ஸாங்க்₂யஸாரார்த₂ யோக₃꞉ ..
க உவாச -
ஏவமேவ புரா ப்ருஷ்ட꞉ ஶௌநகேந மஹாத்மநா .
ஸ ஸூத꞉ கத₂யாமாஸ கீ₃தாம் வ்யாஸமுகா₂ச்ச்₂ருதாம் ..1 ..
ஸூத உவாச -
அஷ்டாத₃ஶபுராணோக்தமம்ருதம் ப்ராஶிதம் த்வயா .
ததோ(அ)திரஸவத்பாதுமிச்சா₂ம்யம்ருதமுத்தமம் ..2 ..
யேநாம்ருதமயோ பூ₄த்வா புமாந்ப்₃ரஹ்மாம்ருதம் யத꞉ .
யோகா₃ம்ருதம் மஹாபா₄க₃ தந்மே கருணயா வத₃ ..3 ..
வ்யாஸ உவாச -
அத₂ கீ₃தாம் ப்ரவக்ஷ்யாமி யோக₃மார்க₃ப்ரகாஶிநீம் .
நியுக்தா ப்ருச்ச₂தே ஸூத ராஜ்ஞே க₃ஜமுகே₂ந யா ..4 ..
வரேண்ய உவாச -
விக்₄நேஶ்வர மஹாபா₃ஹோ ஸர்வவித்₃யாவிஶாரத₃ .
ஸர்வஶாஸ்த்ரார்த₂தத்த்வஜ்ஞ யோக₃ம் மே வக்துமர்ஹஸி ..5 ..
ஶ்ரீக₃ஜாநந உவாச -
ஸம்யக்₃வ்யவஸிதா ராஜந்மதிஸ்தே(அ)நுக்₃ரஹாந்மம .
ஶ்ருணு கீ₃தாம் ப்ரவக்ஷ்யாமி யோகா₃ம்ருதமயீம் ந்ருப ..6 ..
ந யோக₃ம் யோக₃மித்யாஹுர்யோகோ₃ யோகோ₃ ந ச ஶ்ரிய꞉ .
ந யோகோ₃ விஷயைர்யோகோ₃ ந ச மாத்ராதி₃பி₄ஸ்ததா₃ ..7 ..
யோகோ₃ ய꞉ பித்ருமாத்ராதே₃ர்ந ஸ யோகோ₃ நராதி₄ப .
யோ யோகோ₃ ப₃ந்து₄புத்ராதே₃ர்யஶ்சாஷ்டபூ₄திபி₄꞉ ஸஹ ..8 ..
ந ஸ யோக₃ஸ்த்ரியா யோகோ₃ ஜக₃த₃த்₃பு₄தரூபயா .
ராஜ்யயோக₃ஶ்ச நோ யோகோ₃ ந யோகோ₃ க₃ஜவாஜிபி₄꞉ ..9 ..
யோகோ₃ நேந்த்₃ரபத₃ஸ்யாபி யோகோ₃ யோகா₃ர்தி₂ந꞉ ப்ரிய꞉ .
யோகோ₃ ய꞉ ஸத்யலோகஸ்ய ந ஸ யோகோ₃ மதோ மம ..10 ..
ஶைவஸ்ய யோகோ₃ நோ யோகோ₃ வைஷ்ணவஸ்ய பத₃ஸ்ய ய꞉ .
ந யோகோ₃ பூ₄ப ஸூர்யத்வம் சந்த்₃ரத்வம் ந குபே₃ரதா ..11 ..
நாநிலத்வம் நாநலத்வம் நாமரத்வம் ந காலதா .
ந வாருண்யம் ந நைர்ருத்யம் யோகோ₃ ந ஸார்வபௌ₄மதா ..12 ..
யோக₃ம் நாநாவித₄ம் பூ₄ப யுஞ்ஜந்தி ஜ்ஞாநிநஸ்ததம் .
ப₄வந்தி வித்ருஷா லோகே ஜிதாஹாரா விரேதஸ꞉ ..13 ..
பாவயந்த்யகி₂லாந்லோகாந்வஶீக்ருதஜக₃த்த்ரயா꞉ .
கருணாபூர்ணஹ்ருத₃யா போ₃த₄யந்த்யபி காம்ஶ்சந ..14 ..
ஜீவந்முக்தா ஹ்ருதே₃ மக்₃நா꞉ பரமாநந்த₃ரூபிணி .
நிமீல்யாக்ஷீணி பஶ்யந்த꞉ பரம் ப்₃ரஹ்ம ஹ்ருதி₃ ஸ்தி₂தம் ..15 ..
த்₄யாயந்த꞉ பரமம் ப்₃ரஹ்ம சித்தே யோக₃வஶீக்ருதம் .
பூ₄தாநி ஸ்வாத்மநா துல்யம் ஸர்வாணி க₃ணயந்தி தே ..16 ..
யேந கேநசிதா₃ச்சி₂ந்நா யேந கேநசிதா₃ஹதா꞉ .
யேந கேநசிதா₃க்ருஷ்டா யேந கேநசிதா₃ஶ்ரிதா꞉ ..17 ..
கருணாபூர்ணஹ்ருத₃யா ப்₄ரமந்தி த₄ரணீதலே .
அநுக்₃ரஹாய லோகாநாம் ஜிதக்ரோதா₄ ஜிதேந்த்₃ரியா꞉ ..18 ..
தே₃ஹமாத்ரப்₄ருதோ பூ₄ப ஸமலோஷ்டாஶ்மகாஞ்சநா꞉ .
ஏதாத்₃ருஶா மஹாபா₄க்₃யா꞉ ஸ்யுஶ்சக்ஷுர்கோ₃சரா꞉ ப்ரிய ..19 ..
தமிதா₃நீமஹம் வக்ஷ்யே ஶ்ருணு யோக₃மநுத்தமம் .
ஶ்ருத்வா யம் முச்யதே ஜந்து꞉ பாபேப்₄யோ ப₄வஸாக₃ராத் ..20 ..
ஶிவே விஷ்ணௌ ச ஶக்தௌ ச ஸூர்யே மயி நராதி₄ப .
யா(அ)பே₄த₃பு₃த்₃தி₄ர்யோக₃꞉ ஸ ஸம்யக்₃யோகோ₃ மதோ மம ..21 ..
அஹமேவ ஜக₃த்₃யஸ்மாத்ஸ்ருஜாமி பாலயாமி ச .
க்ருத்வா நாநாவித₄ம் வேஷம் ஸம்ஹராமி ஸ்வலீலயா ..22 ..
அஹமேவ மஹாவிஷ்ணுரஹமேவ ஸதா₃ஶிவ꞉ .
அஹமேவ மஹாஶக்திரஹமேவார்யமா ப்ரிய ..23 ..
அஹமேகோ ந்ருணாம் நாதோ₂ ஜாத꞉ பஞ்சவித₄꞉ புரா .
அஜ்ஞாநாந்மா ந ஜாநந்தி ஜக₃த்காரணகாரணம் ..24 ..
மத்தோ(அ)க்₃நிராபோ த₄ரணீ மத்த ஆகாஶமாருதௌ .
ப்₃ரஹ்மா விஷ்ணுஶ்ச ருத்₃ரஶ்ச லோகபாலா தி₃ஶோ த₃ஶ ..25 ..
வஸவோ மநவோ கா₃வோ மநவ꞉ பஶவோ(அ)பி ச .
ஸரித꞉ ஸாக₃ரா யக்ஷா வ்ருக்ஷா꞉ பக்ஷிக₃ணா அபி ..26 ..
ததை₂கவிம்ஶதி꞉ ஸ்வர்கா₃ நாகா₃꞉ ஸப்த வநாநி ச .
மநுஷ்யா꞉ பர்வதா꞉ ஸாத்₄யா꞉ ஸித்₃தா₄ ரக்ஷோக₃ணாஸ்ததா₂ ..27 ..
அஹம் ஸாக்ஷீ ஜக₃ச்சக்ஷுரலிப்த꞉ ஸர்வகர்மபி₄꞉ .
அவிகாரோ(அ)ப்ரமேயோ(அ)ஹமவ்யக்தோ விஶ்வகோ₃(அ)வ்யய꞉ ..28 ..
அஹமேவ பரம் ப்₃ரஹ்மாவ்யயாநந்தா₃த்மகம் ந்ருப .
மோஹயத்யகி₂லாந்மாயா ஶ்ரேஷ்டா₂ந்மம நராநமூந் ..29 ..
ஸர்வதா₃ ஷட்₃விகாரேஷு தாநியம் யோஜயேத் ப்₄ருஶம் .
ஹித்வாஜாபடலம் ஜந்துரநேகைர்ஜந்மபி₄꞉ ஶநை꞉ ..30 ..
விரஜ்ய விந்த₃தி ப்₃ரஹ்ம விஷயேஷு ஸுபோ₃த₄த꞉ .
அச்சே₂த்₃யம் ஶஸ்த்ரஸங்கா₄தைரதா₃ஹ்யமநலேந ச ..31 ..
அக்லேத்₃யம் பூ₄ப பு₄வநைரஶோஷ்யம் மாருதேந ச .
அவத்₄யம் வத்₄யமாநே(அ)பி ஶரீரே(அ)ஸ்மிந்நராதி₄ப ..32 ..
யாமிமாம் புஷ்பிதாம் வாசம் ப்ரஶம்ஸந்தி ஶ்ருதீரிதாம் .
த்ரயீவாத₃ரதா மூடா₄ஸ்ததோ(அ)ந்யந்மந்வதே(அ)பி ந ..33 ..
குர்வந்தி ஸததம் கர்ம ஜந்மம்ருத்யுப₂லப்ரத₃ம் .
ஸ்வர்கை₃ஶ்வர்யரதா த்₄வஸ்தசேதநா போ₄க₃பு₃த்₃த₄ய꞉ ..34 ..
ஸம்பாத₃யந்தி தே பூ₄ப ஸ்வாத்மநா நிஜப₃ந்த₄நம் .
ஸம்ஸாரசக்ரம் யுஞ்ஜந்தி ஜடா₃꞉ கர்மபரா நரா꞉ ..35 ..
யஸ்ய யத்₃விஹிதம் கர்ம தத்கர்தவ்யம் மத₃ர்பணம் .
ததோ(அ)ஸ்ய கர்மபீ₃ஜாநாமுச்சி₂ந்நா꞉ ஸ்யுர்மஹாங்குரா꞉ ..36 ..
சித்தஶுத்₃தி₄ஶ்ச மஹதீ விஜ்ஞாநஸாதி₄கா ப₄வேத் .
விஜ்ஞாநேந ஹி விஜ்ஞாதம் பரம் ப்₃ரஹ்ம முநீஶ்வரை꞉ ..37 ..
தஸ்மாத்கர்மாணி குர்வீத பு₃த்₃தி₄யுக்தோ நராதி₄ப .
ந த்வகர்மா ப₄வேத்கோ(அ)பி ஸ்வத₄ர்மத்யாக₃வாம்ஸ்ததா₂ ..38 ..
ஜஹாதி யதி₃ கர்மாணி தத꞉ ஸித்₃தி₄ம் ந விந்த₃தி .
ஆதௌ₃ ஜ்ஞாநே நாதி₄கார꞉ கர்மண்யேவ ஸ யுஜ்யதே ..39 ..
கர்மணா ஶுத்₃த₄ஹ்ருத₃யோ(அ)பே₄த₃பு₃த்₃தி₄முபைஷ்யதி .
ஸ ச யோக₃꞉ ஸமாக்₂யாதோ(அ)ம்ருதத்வாய கல்பதே ..40 ..
யோக₃மந்யம் ப்ரவக்ஷ்யாமி ஶ்ருணு பூ₄ப தமுத்தமம் .
பஶௌ புத்ரே ததா₂ மித்ரே ஶத்ரௌ ப₃ந்தௌ₄ ஸுஹ்ருஜ்ஜநே ..41 ..
ப₃ஹிர்த்₃ருஷ்ட்யா ச ஸமயா ஹ்ருத்ஸ்த₂யாலோகயேத்புமாந் .
ஸுகே₂ து₃꞉கே₂ ததா₂(அ)மர்ஷே ஹர்ஷே பீ₄தௌ ஸமோ ப₄வேத் ..42 ..
ரோகா₃ப்தௌ சைவ போ₄கா₃ப்தௌ ஜயே வா விஜயே(அ)பி ச .
ஶ்ரியோ(அ)யோகே₃ ச யோகே₃ ச லாபா₄லாபே₄ ம்ருதாவபி ..43 ..
ஸமோ மாம் வஸ்துஜாதேஷு பஶ்யந்நந்தர்ப₃ஹி꞉ஸ்தி₂தம் .
ஸூர்யே ஸோமே ஜலே வஹ்நௌ ஶிவே ஶக்தௌ ததா₂நிலே ..44 ..
த்₃விஜே ஹ்ருதி₃ மஹாநத்₃யாம் தீர்தே₂ க்ஷேத்ரே(அ)க₄நாஶிநி .
விஷ்ணௌ ச ஸர்வதே₃வேஷு ததா₂ யக்ஷோரகே₃ஷு ச ..45 ..
க₃ந்த₄ர்வேஷு மநுஷ்யேஷு ததா₂ திர்யக்₃ப₄வேஷு ச .
ஸததம் மாம் ஹி ய꞉ பஶ்யேத்ஸோ(அ)யம் யோக₃விது₃ச்யதே ..46 ..
ஸம்பராஹ்ருத்ய ஸ்வார்தே₂ப்₄ய இந்த்₃ரியாணி விவேகத꞉ .
ஸர்வத்ர ஸமதாபு₃த்₃தி₄꞉ ஸ யோகோ₃ பூ₄ப மே மத꞉ ..47 ..
ஆத்மாநாத்மவிவேகேந யா பு₃த்₃தி₄ர்தை₃வயோக₃த꞉ .
ஸ்வத₄ர்மாஸக்தசித்தஸ்ய தத்₃யோகோ₃ யோக₃ உச்யதே ..48 ..
த₄ர்மாத₄ரமௌ ஜஹாதீஹ தயா யுக்த உபா₄வபி .
அதோ யோகா₃ய யுஞ்ஜீத யோகோ₃ வைதே₄ஷு கௌஶலம் ..49 ..
த₄ர்மாத₄ர்மப₂லே த்யக்த்வா மநீஷீ விஜிதேந்த்₃ரிய꞉ .
ஜந்மப₃ந்த₄விநிர்முக்த꞉ ஸ்தா₂நம் ஸம்யாத்யநாமயம் ..50 ..
யதா₃ ஹ்யஜ்ஞாநகாலுஷ்யம் ஜந்தோர்பு₃த்₃தி₄꞉ க்ரமிஷ்யதி .
ததா₃ஸௌ யாதி வைராக்₃யம் வேத₃வாக்யாதி₃ஷு க்ரமாத் ..51 ..
த்ரயீவிப்ரதிபந்நஸ்ய ஸ்தா₂ணுத்வம் யாஸ்யதே யதா₃ .
பராத்மந்யசலா பு₃த்₃தி₄ஸ்ததா₃ஸௌ யோக₃மாப்நுயாத் ..52 ..
மாநஸாநகி₂லாந்காமாந்யதா₃ தீ₄மாம்ஸ்த்யஜேத்ப்ரிய .
ஸ்வாத்மநி ஸ்வேந ஸந்துஷ்ட꞉ ஸ்தி₂ரபு₃த்₃தி₄ஸ்ததோ₃ச்யதே ..53 ..
வித்ருஷ்ண꞉ ஸர்வஸௌக்₂யேஷு நோத்₃விக்₃நோ து₃꞉க₂ஸங்க₃மே .
க₃தஸாத்₄வஸருட்₃ராக₃꞉ ஸ்தி₂ரபு₃த்₃தி₄ஸ்ததோ₃ச்யதே ..54 ..
யதா₂(அ)யம் கமடோ₂(அ)ங்கா₃நி ஸம்கோசயதி ஸர்வத꞉ .
விஷயேப்₄யஸ்ததா₂ கா₂நி ஸம்கர்பேத்₃யோக₃தத்பர꞉ ..55 ..
வ்யாவர்தந்தே(அ)ஸ்ய விஷயாஸ்த்யக்தாஹாரஸ்ய வர்ஷ்மிண꞉ .
விநா ராக₃ம் ச ராகோ₃(அ)பி த்₃ருஷ்ட்வா ப்₃ரஹ்ம விநஶ்யதி ..56 ..
விபஶ்சித்₃யததே பூ₄ப ஸ்தி₂திமாஸ்தா₂ய யோகி₃ந꞉ .
மந்த₂யித்வேந்த்₃ரியாண்யஸ்ய ஹரந்தி ப₃லதோ மந꞉ ..57 ..
யுக்தஸ்தாநி வஶே க்ருத்வா ஸர்வதா₃ மத்பரோ ப₄வேத் .
ஸம்யதாநீந்த்₃ரியாணீஹ யஸ்யாஸௌ க்ருததீ₄ர்மத꞉ ..58 ..
சிந்தயாநஸ்ய விஷயாந்ஸம்க₃ஸ்தேஷூபஜாயதே .
காம꞉ ஸம்ஜாயதே தஸ்மாத்தத꞉ க்ரோதோ₄(அ)பி₄வர்ததே ..59 ..
க்ரோதா₄த₃ஜ்ஞாநஸம்பூ₄திர்விப்₄ரமஸ்து தத꞉ ஸ்ம்ருதே꞉ .
ப்₄ரம்ஶாத்ஸ்ம்ருதேர்மதேர்த்₄வம்ஸஸ்தத்₃த்₄வம்ஸாத்ஸோ(அ)பி நஶ்யதி ..60 ..
விநா த்₃வேஷம் ச ராக₃ம் ச கோ₃சராந்யஸ்து கை₂ஶ்சரேத் .
ஸ்வாதீ₄நஹ்ருத₃யோ வஶ்யை꞉ ஸம்தோஷம் ஸ ஸம்ருச்ச₂தி ..61 ..
த்ரிவித₄ஸ்யாபி து₃꞉க₂ஸ்ய ஸம்தோஷே விலயோ ப₄வேத் .
ப்ரஜ்ஞயா ஸம்ஸ்தி₂தஶ்சாயம் ப்ரஸந்நஹ்ருத₃யோ ப₄வேத் ..62 ..
விநா ப்ரஸாத₃ம் ந மதிர்விநா மத்யா ந பா₄வநா .
விநா தாம் ந ஶமோ பூ₄ப விநா தேந குத꞉ ஸுக₂ம் ..63 ..
இந்த்₃ரியாஶ்வாந்விசரதோ விஷயாநநு வர்ததே .
யந்மநஸ்தந்மதிம் ஹந்யாத₃ப்ஸு நாவம் மருத்₃யதா₂ ..64 ..
யா ராத்ரி꞉ ஸர்வபூ₄தாநாம் தஸ்யாம் நித்₃ராதி நைவ ஸ꞉ .
ந ஸ்வபந்தீஹ தே யத்ர ஸா ராத்ரிஸ்தஸ்ய பூ₄மிப ..65 ..
ஸரிதாம் பதிமாயாந்தி வநாநி ஸர்வதோ யதா₂ .
ஆயாந்தி யம் ததா₂ காமா ந ஸ ஶாந்திம் க்வசில்லபே₄த் ..66 ..
அதஸ்தாநீஹ ஸம்ருத்₄ய ஸர்வத꞉ கா₂நி மாநவ꞉ .
ஸ்வஸ்வார்தே₂ப்₄ய꞉ ப்ரதா₄வந்தி பு₃த்₃தி₄ரஸ்ய ஸ்தி₂ரா ததா₃ ..67 ..
மமதாஹம்க்ருதீ த்யக்த்வா ஸர்வாந்காமாம்ஶ்ச யஸ்த்யஜேத் .
நித்யம் ஜ்ஞாநரதோ பூ₄த்வா ஜ்ஞாநாந்முக்திம் ஸ யாஸ்யதி ..68 ..
ஏவம் ப்₃ரஹ்மதி₄யம் பூ₄ப யோ விஜாநாதி தை₃வத꞉ .
துர்யாமவஸ்தா₂ம் ப்ராப்யாபி ஜீவந்முக்திம் ப்ரயாஸ்யதி ..69 ..
யோகா₃ம்ருதார்த₂ஶாஸ்த்ரே
ஶ்ரீக₃ணேஶபுராணே உத்தரக₂ண்டே₃ க₃ஜாநநவரேண்யஸம்வாதே₃
ஸாம்க்₂யஸாரார்த₂யோகோ₃ நாம ப்ரத₂மோ(அ)த்₄யாய꞉ ..
.. த்₃விதீயோ(அ)த்₄யாய꞉ ..
.. கர்மயோக₃꞉ ..
வரேண்ய உவாச -
ஜ்ஞாநநிஷ்டா₂ கர்மநிஷ்டா₂ த்₃வயம் ப்ரோக்தம் த்வயா விபோ₄ .
அவதா₄ர்ய வதை₃கம் மே நி꞉ஶ்ரேயஸகரம் நு கிம் ..1 ..
க₃ஜாநந உவாச -
அஸ்மிம்ஶ்சராசரே ஸ்தி₂த்யௌ புரோக்தே த்₃வே மயா ப்ரிய .
ஸாம்க்₂யாநாம் பு₃த்₃தி₄யோகே₃ந வைத₄யோகே₃ந கர்மிணாம் ..2 ..
அநாரம்பே₄ண வைதா₄நாம் நிஷ்க்ரிய꞉ புருஷோ ப₄வேத் .
ந ஸித்₃தி₄ம் யாதி ஸம்த்யாகா₃த்கேவலாத்கர்மணோ ந்ருப ..3 ..
கதா₃சித₃க்ரிய꞉ கோ(அ)பி க்ஷணம் நைவாவதிஷ்ட₂தே .
அஸ்வதந்த்ர꞉ ப்ரக்ருதிஜைர்கு₃ணை꞉ கர்ம ச கார்யதே ..4 ..
கர்மகாரீந்த்₃ரியக்₃ராமம் நியம்யாஸ்தே ஸ்மரந்புமாந் .
தத்₃கோ₃சராந்மந்த₃சித்தோ தி₄கா₃சார꞉ ஸ பா₄ஷ்யதே ..5 ..
தத்₃க்₃ராமம் ஸம்நியம்யாதௌ₃ மநஸா கர்ம சாரபே₄த் .
இந்த்₃ரியை꞉ கர்மயோக₃ம் யோ வித்ருஷ்ண꞉ ஸ பரோ ந்ருப ..6 ..
அகர்மண꞉ ஶ்ரேஷ்ட₂தமம் கர்மாநீஹாக்ருதம் து யத் .
வர்ஷ்மண꞉ ஸ்தி₂திரப்யஸ்யாகர்மணோ நைவ ஸேத்ஸ்யதி ..7 ..
அஸமர்ப்ய நிப₃த்₄யந்தே கர்ம தேந ஜநா மயி .
குர்வீத ஸததம் கர்மாநாஶோ(அ)ஸங்கோ₃ மத₃ர்பணம் ..8 ..
மத₃ர்தே₂ யாநி கர்மாணி தாநி ப₃த்₄நந்தி ந க்வசித் .
ஸவாஸநமித₃ம் கர்ம ப₃த்₄நாதி தே₃ஹிநம் ப₃லாத் ..9 ..
வர்ணாந்ஸ்ருஷ்ட்வாவத₃ம் சாஹம் ஸயஜ்ஞாம்ஸ்தாந்புரா ப்ரிய .
யஜ்ஞேந ருத்₄யதாமேஷ காமத₃꞉ கல்பவ்ருக்ஷவத் ..10 ..
ஸுராம்ஶ்சாந்நேந ப்ரீணத்₄வம் ஸுராஸ்தே ப்ரீணயந்து வ꞉ .
லப₄த்₄வம் பரமம் ஸ்தா₂நமந்யோந்யப்ரீணநாத்ஸ்தி₂ரம் ..11 ..
இஷ்டா தே₃வா꞉ ப்ரதா₃ஸ்யந்தி போ₄கா₃நிஷ்டாந்ஸுதர்பிதா꞉ .
தைர்த₃த்தாம்ஸ்தாந்நரஸ்தேப்₄யோ(அ)த₃த்வா பு₄ங்க்தே ஸ தஸ்கர꞉ ..12 ..
ஹுதாவஶிஷ்டபோ₄க்தாரோ முக்தா꞉ ஸ்யு꞉ ஸர்வபாதகை꞉ .
அத₃ந்த்யேநோ மஹாபாபா ஆத்மஹேதோ꞉ பசந்தி யே ..13 ..
ஊர்ஜோ ப₄வந்தி பூ₄தாநி தே₃வாத₃ந்நஸ்ய ஸம்ப₄வ꞉ .
யஜ்ஞாச்ச தே₃வஸம்பூ₄திஸ்தது₃த்பத்திஶ்ச வைத₄த꞉ ..14 ..
ப்₃ரஹ்மணோ வைத₄முத்பந்நம் மத்தோ ப்₃ரஹ்மஸமுத்₃ப₄வ꞉ .
அதோ யஜ்ஞே ச விஶ்வஸ்மிந் ஸ்தி₂தம் மாம் வித்₃தி₄ பூ₄மிப ..15 ..
ஸம்ஸ்ருதீநாம் மஹாசக்ரம் க்ராமிதவ்யம் விசக்ஷணை꞉ .
ஸ முதா₃ ப்ரீணதே பூ₄பேந்த்₃ரியக்ரீடோ₃(அ)த₄மோ ஜந꞉ ..16 ..
அந்தராத்மநி ய꞉ ப்ரீத ஆத்மாராமோ(அ)கி₂லப்ரிய꞉ .
ஆத்மத்ருப்தோ நரோ ய꞉ ஸ்யாத்தஸ்யார்தோ₂ நைவ வித்₃யதே ..17
கார்யாகார்யக்ருதீநாம் ஸ நைவாப்நோதி ஶுபா₄ஶுபே₄ .
கிம்சித₃ஸ்ய ந ஸாத்₄யம் ஸ்யாத்ஸர்வஜந்துஷு ஸர்வதா₃ ..18 ..
அதோ(அ)ஸக்ததயா பூ₄ப கர்தவ்யம் கர்ம ஜந்துபி₄꞉ .
ஸக்தோ(அ)க₃திமவாப்நோதி மாமவாப்நோதி தாத்₃ருஶ꞉ ..19 ..
பரமாம் ஸித்₃தி₄மாபந்நா꞉ புரா ராஜர்ஷயோ த்₃விஜா꞉ .
ஸம்க்₃ரஹாய ஹி லோகாநாம் தாத்₃ருஶம் கர்ம சாரபே₄த் ..20 ..
ஶ்ரேயாந்யத்குருதே கர்ம தத்கரோத்யகி₂லோ ஜந꞉ .
மநுதே யத்ப்ரமாணம் ஸ ததே₃வாநுஸரத்யஸௌ ..21 ..
விஷ்டபே மே ந ஸாத்₄யோ(அ)ஸ்தி கஶ்சித₃ர்தோ₂ நராதி₄ப .
அநாலப்₃த₄ஶ்ச லப்₃த₄வ்ய꞉ குர்வே கர்ம ததா₂ப்யஹம் ..22 ..
ந குர்வே(அ)ஹம் யதா₃ கர்ம ஸ்வதந்த்ரோ(அ)லஸபா₄வித꞉ .
கரிஷ்யந்தி மம த்₄யாநம் ஸர்வே வர்ணா மஹாமதே ..23 ..
ப₄விஷ்யந்தி ததோ லோகா உச்சி₂ந்நா꞉ ஸம்ப்ரதா₃யிந꞉ .
ஹம்தா ஸ்யாமஸ்ய லோகஸ்ய விதா₄தா ஸம்கரஸ்ய ச ..24 ..
காமிநோ ஹி ஸதா₃ காமைரஜ்ஞாநாத்கர்மகாரிண꞉ .
லோகாநாம் ஸம்க்₃ரஹாயைதத்₃வித்₃வாந் குர்யாத₃ஸக்ததீ₄꞉ ..25 ..
விபி₄ந்நத்வமதிம் ஜஹ்யாத₃ஜ்ஞாநாம் கர்மசாரிணாம்
பா₄கா₃த்₃கு₃ணகர்ம
யோக₃யுக்த꞉ ஸர்வகர்மாண்யர்பயேந்மயி கர்மக்ருத் ..26 ..
அவித்₃யாகு₃ணஸாசிவ்யாத்குர்வந்கர்மாண்யதந்த்₃ரித꞉ .
அஹம்காராத்₃பி₄ந்நபு₃த்₃தி₄ரஹம்கர்தேதி யோ(அ)ப்₃ரவீத் ..27 ..
யஸ்து வேத்த்யாத்மநஸ்தத்த்வம் விபா₄கா₃த்₃கு₃ணகர்மணோ꞉ .
கரணம் விஷயே வ்ருத்தமிதி மத்வா ந ஸஜ்ஜதே ..28 ..
குர்வந்தி ஸப₂லம் கர்ம கு₃ணைஸ்த்ரிபி₄ர்விமோஹிதா꞉ .
அவிஶ்வஸ்த꞉ ஸ்வாத்மத்₃ருஹோ விஶ்வவிந்நைவ லம்க₄யேத் ..29 ..
நித்யம் நைமித்திகம் தஸ்மாந்மயி கர்மார்பயேத்₃பு₃த₄꞉ .
த்யக்த்வாஹம்மமதாபு₃த்₃தி₄ம் பராம் க₃திமவாப்நுயாத் ..30 ..
அநீர்ஷ்யந்தோ ப₄க்திமந்தோ யே மயோக்தமித₃ம் ஶுப₄ம் .
அநுதிஷ்ட₂ந்தி யே ஸர்வே முக்தாஸ்தே(அ)கி₂லகர்மபி₄꞉ ..31 ..
யே சைவ நாநுதிஷ்ட₂ந்தி த்வஶுபா₄ ஹதசேதஸ꞉ .
ஈர்ஷ்யமாணாந்மஹாமூடா₄ந்நஷ்டாம்ஸ்தாந்வித்₃தி₄ மே ரிபூந் ..32 ..
துல்யம் ப்ரக்ருத்யா குருதே கர்ம யஜ்ஜ்ஞாநவாநபி .
அநுயாதி ச தாமேவாக்₃ரஹஸ்தத்ர முதா₄ மத꞉ ..33 ..
காமஶ்சைவ ததா₂ க்ரோத₄꞉ கா₂நாமர்தே₂ஷு ஜாயதே .
நைதயோர்வஶ்யதாம் யாயாத₃ம்யவித்₄வம்ஸகௌ யத꞉ ..34 ..
ஶஸ்தோ(அ)கு₃ணோ நிஜோ த₄ர்ம꞉ ஸாம்கா₃த₃ந்யஸ்ய த₄ர்மத꞉ .
நிஜே தஸ்மிந்ம்ருதி꞉ ஶ்ரேயோ(அ)பரத்ர ப₄யத₃꞉ பர꞉ ..35 ..
வரேண்ய உவாச -
புமாந்யத்குருதே பாபம் ஸ ஹி கேந நியுஜ்யதே .
அகாங்க்ஷந்நபி ஹேரம்ப₃ ப்ரேரித꞉ ப்ரப₃லாதி₃வ ..36 ..
ஶ்ரீக₃ஜாநந உவாச -
காமக்ரோதௌ₄ மஹாபாபௌ கு₃ணத்₃வயஸமுத்₃ப₄வௌ .
நயந்தௌ வஶ்யதாம் லோகாந் வித்₃த்₄யேதௌ த்₃வேஷிணௌ வரௌ ..37 ..
ஆவ்ருணோதி யதா₂ மாயா ஜக₃த்₃பா₃ஷ்போ ஜலம் யதா₂ .
வர்ஷாமேகோ₄ யதா₂ பா₄நும் தத்₃வத்காமோ(அ)கி₂லாம்ஶ்ச ருட் ..38 ..
ப்ரதிபத்திமதோ ஜ்ஞாநம் சா₂தி₃தம் ஸததம் த்₃விஷா .
இச்சா₂த்மகேந தரஸா து₃ஷ்போஷ்யேண ச ஶுஷ்மிணா ..39 ..
ஆஶ்ரித்ய பு₃த்₃தி₄மநஸீ இந்த்₃ரியாணி ஸ திஷ்ட₂தி .
தைரேவாச்சா₂தி₃தப்ரஜ்ஞோ ஜ்ஞாநிநம் மோஹயத்யஸௌ ..40 ..
தஸ்மாந்நியம்ய தாந்யாதௌ₃ ஸமநாம்ஸி நரோ ஜயேத் .
ஜ்ஞாநவிஜ்ஞாநயோ꞉ ஶாந்திகரம் பாபம் மநோப₄வம் ..41 ..
யதஸ்தாநி பராண்யாஹுஸ்தேப்₄யஶ்ச பரமம் மந꞉ .
ததோ(அ)பி ஹி பரா பு₃த்₃தி₄ராத்மா பு₃த்₃தே₄꞉ பரோ மத꞉ ..42 ..
பு₃த்₃த்₄வைவமாத்மநாத்மாநம் ஸம்ஸ்தப்₄யாத்மாநமாத்மநா .
ஹத்வா ஶத்ரும் காமரூபம் பரம் பத₃மவாப்நுயாத் ..43 ..
இதி ஶ்ரீமத்₃க₃ணேஶகீ₃தாஸூபநிஷத₃ர்த₂க₃ர்பா₄ஸு யோகா₃ம்ருதார்த₂ஶாஸ்த்ரே ஶ்ரீக₃ணேஶபுராணே உத்தரக₂ண்டே₃ க₃ஜாநநவரேண்யஸம்வாதே₃ கர்மயோகோ₃ நாம த்₃விதீயோ(அ)த்₄யாய꞉ ..
.. விஜ்ஞாநப்ரதிபாத₃ந ..
ஶ்ரீக₃ஜாநந உவாச -
புரா ஸர்கா₃தி₃ஸமயே த்ரைகு₃ண்யம் த்ரிதநூருஹம் .
நிர்மாய சைநமவத₃ம் விஷ்ணவே யோக₃முத்தமம் ..1 ..
அர்யம்ணே ஸோ(அ)ப்₃ரவீத்ஸோ(அ)பி மநவே நிஜஸூநவே .
தத꞉ பரம்பராயாதம் விது₃ரேநம் மஹர்ஷய꞉ ..2 ..
காலேந ப₃ஹுநா சாயம் நஷ்ட꞉ ஸ்யாச்சரமே யுகே₃ .
அஶ்ரத்₃தே₄யோ ஹ்யவிஶ்வாஸ்யோ விகீ₃தவ்யஶ்ச பூ₄மிப ..3 ..
ஏவம் புராதநம் யோக₃ம் ஶ்ருதவாநஸி மந்முகா₂த் .
கு₃ஹ்யாத்₃கு₃ஹ்யதரம் வேத₃ரஹஸ்யம் பரமம் ஶுப₄ம் ..4 ..
வரேண்ய உவாச -
ஸாம்ப்ரதம் சாவதீர்ணோ(அ)ஸி க₃ர்ப₄தஸ்த்வம் க₃ஜாநந .
ப்ரோக்தவாந்கத₂மேதம் த்வம் விஷ்ணவே யோக₃முத்தமம் ..5 ..
க₃ணேஶ உவாச -
அநேகாநி ச தே ஜந்மாந்யதீதாநி மமாபி ச .
ஸம்ஸ்மரே தாநி ஸர்வாணி ந ஸ்ம்ருதிஸ்தவ வர்ததே ..6 ..
மத்த ஏவ மஹாபா₃ஹோ ஜாதா விஷ்ண்வாத₃ய꞉ ஸுரா꞉ .
மய்யேவ ச லயம் யாந்தி ப்ரலயேஷு யுகே₃ யுகே₃ ..7 ..
அஹமேவ பரோ ப்₃ரஹ்ம மஹாருத்₃ரோ(அ)ஹமேவ ச .
அஹமேவ ஜக₃த்ஸர்வம் ஸ்தா₂வரம் ஜங்க₃மம் ச யத் ..8 ..
அஜோ(அ)வ்யயோ(அ)ஹம் பூ₄தாத்மா(அ)நாதி₃ரீஶ்வர ஏவ ச .
ஆஸ்தா₂ய த்ரிகு₃ணாம் மாயாம் ப₄வாமி ப₃ஹுயோநிஷு ..9 ..
அத₄ர்மோபசயோ த₄ர்மாபசயோ ஹி யதா₃ ப₄வேத் .
ஸாதூ₄ந்ஸம்ரக்ஷிதும் து₃ஷ்டாம்ஸ்தாடி₃தும் ஸம்ப₄வாம்யஹம் ..10 ..
உச்சி₂த்₃யாத₄ர்மநிசயம் த₄ர்மம் ஸம்ஸ்தா₂பயாமி ச .
ஹந்மி து₃ஷ்டாம்ஶ்ச தை₃த்யாம்ஶ்ச நாநாலீலாகரோ முதா₃ ..11 ..
வர்ணாஶ்ரமாந்முநீந்ஸாதூ₄ந்பாலயே ப₃ஹுரூபத்₄ருக் .
ஏவம் யோ வேத்தி ஸம்பூ₄திர்மம தி₃வ்யா யுகே₃ யுகே₃ ..12 ..
தத்தத்கர்ம ச வீர்யம் ச மம ரூபம் ஸமாஸத꞉ .
த்யக்தாஹம்மமதாபு₃த்₃தி₄ம் ந புநர்பூ₄꞉ ஸ ஜாயதே ..13 ..
நிரீஹா நிர்பி₄யோரோஷா மத்பரா மத்₃வ்யபாஶ்ரயா꞉ .
விஜ்ஞாநதபஸா ஶுத்₃தா₄ அநேகே மாமுபாக₃தா꞉ ..14 ..
யேந யேந ஹி பா₄வேந ஸம்ஸேவந்தே நரோத்தமா꞉ .
ததா₂ ததா₂ ப₂லம் தேப்₄ய꞉ ப்ரயச்சா₂ம்யவ்யய꞉ ஸ்பு₂டம் ..15 ..
ஜநா꞉ ஸ்யுரிதரே ராஜந்மம மார்கா₃நுயாயிந꞉ .
ததை₂வ வ்யவஹாரம் தே ஸ்வேஷு சாந்யேஷு குர்வதே ..16 ..
குர்வந்தி தே₃வதாப்ரீதிம் காங்க்ஷந்த꞉ கர்மணாம் ப₂லம் .
ப்ராப்நுப₃ம்தீஹ தே லோகே ஶீக்₄ரம் ஸித்₃தி₄ம் ஹி கர்மஜாம் ..17 ..
சத்வாரோ ஹி மயா வர்ணா ரஜ꞉ஸத்த்வதமோம்(அ)ஶத꞉ .
கர்மாம்ஶதஶ்ச ஸம்ஸ்ருஷ்டா ம்ருத்யுலோகே மயாநக₄ ..18 ..
கர்தாரமபி தேஷாம் மாமகர்தாரம் விது₃ர்பு₃தா₄꞉ .
அநாதி₃மீஶ்வரம் நித்யமலிப்தம் கர்மஜைர்கு₃ணை꞉ ..19 ..
நிரீஹம் யோ(அ)பி₄ஜாநாதி கர்ம ப₃த்₄நாதி நைவ தம் .
சக்ரு꞉ கர்மாணி பு₃த்₃த்₄யைவம் பூர்வம் பூர்வம் முமுக்ஷவ꞉ ..20 ..
வாஸநாஸஹிதாதா₃த்₃யாத்ஸம்ஸாரகாரணாத்₃த்₃ருடா₄த் .
அஜ்ஞாநப₃ந்த₄நாஜ்ஜந்துர்பு₃த்₃த்₄வாயம் முச்யதே(அ)கி₂லாத் ..21 ..
தத₃கர்ம ச கர்மாபி கத₂யாம்யது₄நா தவ .
யத்ர மௌநம் க₃தா மோஹாத்₃ருஷயோ பு₃த்₃தி₄ஶாலிந꞉ ..22 ..
தத்த்வம் முமுக்ஷுணா ஜ்ஞேயம் கர்மாகர்மவிகர்மணாம் .
த்ரிவிதா₄நீஹ கர்மாணி ஸுநிம்நைஷாம் க₃தி꞉ ப்ரிய ..23 ..
க்ரியாயாமக்ரியாஜ்ஞாநமக்ரியாயாம் க்ரியாமதி꞉ .
யஸ்ய ஸ்யாத்ஸ ஹி மர்த்யே(அ)ஸ்மிம்ல்லோகே முக்தோ(அ)கி₂லார்த₂க்ருத் ..24 ..
கர்மாம்குரவியோகே₃ந ய꞉ கர்மாண்யாரபே₄ந்நர꞉ .
தத்த்வத₃ர்ஶநநிர்த₃க்₃த₄க்ரியமாஹுர்பு₃தா₄ பு₃த₄ம் ..25 ..
ப₂லத்ருஷ்ணாம் விஹாய ஸ்யாத்ஸதா₃ த்ருப்தோ விஸாத₄ந꞉ .
உத்₃யுக்தோ(அ)பி க்ரியாம் கர்தும் கிம்சிந்நைவ கரோதி ஸ꞉ ..26 ..
நிரீஹோ நிக்₃ருஹீதாத்மா பரித்யக்தபரிக்₃ரஹ꞉ .
கேவலம் வை க்₃ருஹம் கர்மாசரந்நாயாதி பாதகம் ..27 ..
அத்₃வந்த்₃வோ(அ)மத்ஸரோ பூ₄த்வா ஸித்₃த்₄யஸித்₃த்₄யோ꞉ ஸமஶ்ச ய꞉ .
யதா₂ப்ராப்த்யேஹ ஸம்துஷ்ட꞉ குர்வந்கர்ம ந ப₃த்₄யதே ..28 ..
அகி₂லைர்விஷயைர்முக்தோ ஜ்ஞாநவிஜ்ஞாநவாநபி .
யஜ்ஞார்த₂ம் தஸ்ய ஸகலம் க்ருதம் கர்ம விலீயதே ..29 ..
அஹமக்₃நிர்ஹவிர்ஹோதா ஹுதம் யந்மயி சார்பிதம் .
ப்₃ரஹ்மாப்தவ்யம் ச தேநாத₂ ப்₃ரஹ்மண்யேவ யதோ ரத꞉ ..30 ..
யோகி₃ந꞉ கேசித₃பரே தி₃ஷ்டம் யஜ்ஞம் வத₃ந்தி ச .
ப்₃ரஹ்மாக்₃நிரேவ யஜ்ஞோ வை இதி கேசந மேநிரே ..31 ..
ஸம்யமாக்₃நௌ பரே பூ₄ப இந்த்₃ரியாண்யுபஜுஹ்வதி .
கா₂க்₃நிஷ்வந்யே தத்₃விஷயாம்ஶ்ச₂ப்₃தா₃தீ₃நுபஜுஹ்வதி ..32 ..
ப்ராணாநாமிந்த்₃ரியாணாம் ச பரே கர்மாணி க்ருத்ஸ்நஶ꞉ .
நிஜாத்மரதிரூபே(அ)க்₃நௌ ஜ்ஞாநதீ₃ப்தே ப்ரஜுஹ்வதி ..33 ..
த்₃ரவ்யேண தபஸா வாபி ஸ்வாத்₄யாயேநாபி கேசந .
தீவ்ரவ்ரதேந யதிநோ ஜ்ஞாநேநாபி யஜந்தி மாம் ..34 ..
ப்ராணே(அ)பாநம் ததா₂ ப்ராணமபாநே ப்ரக்ஷிபந்தி யே .
ருத்₃த்₄வா க₃தீஶ்சோப₄யஸ்தே ப்ராணாயாமபராயணா꞉ ..35 ..
ஜித்வா ப்ராணாந்ப்ராணக₃தீருபஜுஹ்வதி தேஷு ச .
ஏவம் நாநாயஜ்ஞரதா யஜ்ஞத்₄வம்ஸிதபாதகா꞉ ..36 ..
நித்யம் ப்₃ரஹ்ம ப்ரயாந்த்யேதே யஜ்ஞஶிஷ்டாம்ருதாஶிந꞉ .
அயஜ்ஞகாரிணோ லோகோ நாயமந்ய꞉ குதோ ப₄வேத் ..37 ..
காயிகாதி₃த்ரிதா₄பூ₄தாந்யஜ்ஞாந்வேதே₃ ப்ரதிஷ்டி₂தாந் .
ஜ்ஞாத்வா தாநகி₂லாந்பூ₄ப மோக்ஷ்யஸே(அ)கி₂லப₃ந்த₄நாத் ..38 ..
ஸர்வேஷாம் பூ₄ப யஜ்ஞாநாம் ஜ்ஞாநயஜ்ஞ꞉ பரோ மத꞉ .
அகி₂லம் லீயதே கர்ம ஜ்ஞாநே மோக்ஷஸ்ய ஸாத₄நே ..39 ..
தஜ்ஜ்ஞேயம் புருஷவ்யாக்₄ர ப்ரஶ்நேந நதித꞉ ஸதாம் .
ஶுஶ்ரூஷயா வதி₃ஷ்யந்தி ஸம்தஸ்தத்த்வவிஶாரதா₃꞉ ..40 ..
நாநாஸம்கா₃ஞ்ஜந꞉ குர்வந்நைகம் ஸாது₄ஸமாக₃மம் .
கரோதி தேந ஸம்ஸாரே ப₃ந்த₄நம் ஸமுபைதி ஸ꞉ ..41 ..
ஸத்ஸம்கா₃த்₃கு₃ணஸம்பூ₄திராபதா₃ம் லய ஏவ ச .
ஸ்வஹிதம் ப்ராப்யதே ஸர்வைரிஹ லோகே பரத்ர ச ..42 ..
இதரத்ஸுலப₄ம் ராஜந்ஸத்ஸம்கோ₃(அ)தீவ து₃ர்லப₄꞉ .
யஜ்ஜ்ஞாத்வா புநர்வேத₄மேதி ஜ்ஞேயம் ததஸ்தத꞉ ..43 ..
தத꞉ ஸர்வாணி பூ₄தாநி ஸ்வாத்மந்யேவாபி₄பஶ்யதி .
அதிபாபரதோ ஜம்துஸ்ததஸ்தஸ்மாத்ப்ரமுச்யதே ..44 ..
த்₃விவிதா₄ந்யபி கர்மாணி ஜ்ஞாநாக்₃நிர்த₃ஹதி க்ஷணாத் .
ப்ரஸித்₃தோ₄(அ)க்₃நிர்யதா₂ ஸர்வம் ப₄ஸ்மதாம் நயதி க்ஷணாத் ..45 ..
ந ஜ்ஞாநஸமதாமேதி பவித்ரமிதரந்ந்ருப .
ஆத்மந்யேவாவக₃ச்ச₂ந்தி யோகா₃த்காலேந யோகி₃ந꞉ ..46 ..
ப₄க்திமாநிந்த்₃ரியஜயீ தத்பரோ ஜ்ஞாநமாப்நுயாத் .
லப்₃த்₄வா தத்பரமம் மோக்ஷம் ஸ்வல்பகாலேந யாத்யஸௌ ..47 ..
ப₄க்திஹீநோ(அ)ஶ்ரத்₃த₃தா₄ந꞉ ஸர்வத்ர ஸம்ஶயீ து ய꞉ .
தஸ்ய ஶம் நாபி விஜ்ஞாநமிஹ லோகோ(அ)த₂ வா பர꞉ ..48 ..
ஆத்மஜ்ஞாநரதம் ஜ்ஞாநநாஶிதாகி₂லஸம்ஶயம் .
யோகா₃ஸ்தாகி₂லகர்மாணம் ப₃த்₄நந்தி பூ₄ப தாநி ந ..49 ..
ஜ்ஞாநக₂ட்₃க₃ப்ரஹாரேண ஸம்பூ₄தாமஜ்ஞதாம் ப₃லாத் .
சி₂த்வாந்த꞉ஸம்ஶயம் தஸ்மாத்₃யோக₃யுக்தோ ப₄வேந்நர꞉ ..50 ..
இதி ஶ்ரீமத்₃க₃ணேஶகீ₃தாஸூபநிஷத₃ர்த₂க₃ர்பா₄ஸு யோகா₃ம்ருதார்த₂ஶாஸ்த்ரே ஶ்ரீக₃ணேஶபுராணே உத்தரக₂ண்டே₃ க₃ஜாநநவரேண்யஸம்வாதே₃ விஜ்ஞாநப்ரதிபாத₃நோ நாம த்ருதீயோ(அ)த்₄யாய꞉ ..
.. வைத₄ஸம்ந்யாஸயோக₃꞉ ..
வரேண்ய உவாச -
ஸம்ந்யஸ்திஶ்சைவ யோக₃ஶ்ச கர்மணாம் வர்ண்யதே த்வயா .
உப₄யோர்நிஶ்சிதம் த்வேகம் ஶ்ரேயோ யத்₃வத₃ மே ப்ரபோ₄ ..1 ..
ஶ்ரீக₃ஜாநந உவாச -
க்ரியாயோகோ₃ வியோக₃ஶ்சாப்யுபௌ₄ மோக்ஷஸ்ய ஸாத₄நே .
தயோர்மத்₄யே க்ரியாயோக₃ஸ்த்யாகா₃த்தஸ்ய விஶிஷ்யதே ..2 ..
த்₃வந்த்₃வது₃꞉க₂ஸஹோ(அ)த்₃வேஷ்டா யோ ந காங்க்ஷதி கிம்சந .
முச்யதே ப₃ந்த₄நாத்ஸத்₃யோ நித்யம் ஸம்ந்யாஸவாந்ஸுக₂ம் ..3 ..
வத₃ந்தி பி₄ந்நப₂லகௌ கர்மணஸ்த்யாக₃ஸம்க்₃ரஹௌ .
மூடா₄ல்பஜ்ஞாஸ்தயோரேகம் ஸம்யுஞ்ஜீத விசக்ஷண꞉ ..4 ..
யதே₃வ ப்ராப்யதே த்யாகா₃த்ததே₃வ யோக₃த꞉ ப₂லம் .
ஸம்க்₃ரஹம் கர்மணோ யோக₃ம் யோ விந்த₃தி ஸ விந்த₃தி ..5 ..
கேவலம் கர்மணாம் ந்யாஸம் ஸம்ந்யாஸம் ந விது₃ர்பு₃தா₄꞉ .
குர்வந்நநிச்ச₂யா கர்ம யோகீ₃ ப்₃ரஹ்மைவ ஜாயதே ..6 ..
நிர்மலோ யதசித்தாத்மா ஜிதகோ₂ யோக₃தத்பர꞉ .
ஆத்மாநம் ஸர்வபூ₄தஸ்த₂ம் பஶ்யந்குர்வந்ந லிப்யதே ..7 ..
தத்த்வவித்₃யோக₃யுக்தாத்மா கரோமீதி ந மந்யதே .
ஏகாத₃ஶாநீந்த்₃ரியாணி குர்வந்தி கர்மஸம்க்₂யயா ..8 ..
தத்ஸர்வமர்பயேத்₃ப்₃ரஹ்மண்யபி கர்ம கரோதி ய꞉ .
ந லிப்யதே புண்யபாபைர்பா₄நுர்ஜலக₃தோ யதா₂ ..9 ..
காயிகம் வாசிகம் பௌ₃த்₃த₄மைந்த்₃ரியம் மாநஸம் ததா₂ .
த்யக்த்வாஶாம் கர்ம குர்வந்தி யோக₃ஜ்ஞாஶ்சித்தஶுத்₃த₄யே ..10 ..
யோக₃ஹீநோ நர꞉ கர்ம ப₂லேஹயா கரோத்யலம் .
ப₃த்₄யதே கர்மபீ₃ஜை꞉ ஸ ததோ து₃꞉க₂ம் ஸமஶ்நுதே ..11 ..
மநஸா ஸகலம் கர்ம த்யக்த்வா யோகீ₃ ஸுக₂ம் வஸேத் .
ந குர்வந்காரயந்வாபி நந்த₃ந்ஶ்வப்₄ரே ஸுபத்தநே ..12 ..
ந க்ரியா ந ச கர்த்ருத்வம் கஸ்ய சித்ஸ்ருஜ்யதே மயா .
ந க்ரியாபீ₃ஜஸம்பர்க꞉ ஶக்த்யா தத்க்ரியதே(அ)கி₂லம் ..13 ..
கஸ்யசித்புண்யபாபாநி ந ஸ்ப்ருஶாமி விபு₄ர்ந்ருப .
ஜ்ஞாநமூடா₄ விமுஹ்யந்தே மோஹேநாவ்ருதபு₃த்₃த₄ய꞉ ..14 ..
விவேகேநாத்மநோ(அ)ஜ்ஞாநம் யேஷாம் நாஶிதமாத்மநா .
தேஷாம் விகாஶமாயாதி ஜ்ஞாநமாதி₃த்யவத்பரம் ..15 ..
மந்நிஷ்டா₂ மத்₃தி₄யோ(அ)த்யந்தம் மச்சித்தா மயி தத்பரா꞉ .
அபுநர்ப₄வமாயாந்தி விஜ்ஞாநாந்நாஶிதைநஸ꞉ ..16 ..
ஜ்ஞாநவிஜ்ஞாநஸம்யுக்தே த்₃விஜே க₃வி க₃ஜாதி₃ஷு .
ஸமேக்ஷணா மஹாத்மாந꞉ பண்டி₃தா꞉ ஶ்வபசே ஶுநி ..17 ..
வஶ்ய꞉ ஸ்வர்கோ₃ ஜக₃த்தேஷாம் ஜீவந்முக்தா꞉ ஸமேக்ஷணா꞉ .
யதோ(அ)தோ₃ஷம் ப்₃ரஹ்ம ஸமம் தஸ்மாத்தைர்விஷயீக்ருதம் ..18 ..
ப்ரியாப்ரியே ப்ராப்ய ஹர்ஷத்₃வேஷௌ யே ப்ராப்நுவந்தி ந .
ப்₃ரஹ்மாஶ்ரிதா அஸம்மூடா₄ ப்₃ரஹ்மஜ்ஞா꞉ ஸமபு₃த்₃த₄ய꞉ ..19 ..
வரேண்ய உவாச -
கிம் ஸுக₂ம் த்ரிஷு லோகேஷு தே₃வக₃ந்த₄ர்வயோநிஷு .
ப₄க₃வந்க்ருபயா தந்மே வத₃ வித்₃யாவிஶாரத₃ ..20 ..
ஶ்ரீக₃ஜாநந உவாச -
ஆநந்த₃மஶ்நுதே(அ)ஸக்த꞉ ஸ்வாத்மாராமோ நிஜாத்மநி .
அவிநாஶி ஸுக₂ம் தத்₃தி₄ ந ஸுக₂ம் விஷயாதி₃ஷு ..21 ..
விஷயோத்தா₂நி ஸௌக்₂யாநி து₃꞉கா₂நாம் தாநி ஹேதவ꞉ .
உத்பத்திநாஶயுக்தாநி தத்ராஸக்தோ ந தத்த்வவித் ..22 ..
காரணே ஸதி காமஸ்ய க்ரோத₄ஸ்ய ஸஹதே ச ய꞉ .
தௌ ஜேதும் வர்ஷ்மவிரஹாத்ஸ ஸுக₂ம் சிரமஶ்நுதே ..23 ..
அந்தர்நிஷ்டோ₂(அ)ந்த꞉ப்ரகாஶோ(அ)ந்த꞉ஸுகோ₂(அ)ந்தாரதிர்லபே₄த் .
அஸம்தி₃க்₃தோ₄(அ)க்ஷயம் ப்₃ரஹ்ம ஸர்வபூ₄தஹிதார்த₂க்ருத் ..24 ..
ஜேதார꞉ ஷட்₃ரிபூணாம் யே ஶமிநோ த₃மிநஸ்ததா₂ .
தேஷாம் ஸமந்ததோ ப்₃ரஹ்ம ஸ்வாத்மஜ்ஞாநாம் விபா₄த்யஹோ ..25 ..
ஆஸநேஷு ஸமாஸீநஸ்த்யக்த்வேமாந்விஷயாந்ப₃ஹி꞉ .
ஸம்ஸ்தப்₄ய ப்₄ருகுடீமாஸ்தே ப்ராணாயாமபராயண꞉ ..26 ..
ப்ராணாயாமம் து ஸம்ரோத₄ம் ப்ராணாபாநஸமுத்₃ப₄வம் .
வத₃ந்தி முநயஸ்தம் ச த்ரிதா₄பூ₄தம் விபஶ்சித꞉ ..27 ..
ப்ரமாணம் பே₄த₃தோ வித்₃தி₄ லகு₄மத்₄யமமுத்தமம் .
த₃ஶபி₄ர்த்₃வ்யதி₄கைர்வர்ணை꞉ ப்ராணாயாமோ லகு₄꞉ ஸ்ம்ருத꞉ ..28 ..
சதுர்விம்ஶத்யக்ஷரோ யோ மத்₄யம꞉ ஸ உதா₃ஹ்ருத꞉ .
ஷட்த்ரிம்ஶல்லகு₄வர்ணோ ய உத்தம꞉ ஸோ(அ)பி₄தீ₄யதே ..29 ..
ஸிம்ஹம் ஶார்தூ₃லகம் வாபி மத்தேப₄ம் ம்ருது₃தாம் யதா₂ .
நயந்தி ப்ராணிநஸ்தத்₃வத்ப்ராணாபாநௌ ஸுஸாத₄யேத் ..30 ..
பீட₃யந்தி ம்ருகா₃ஸ்தே ந லோகாந்வஶ்யம் க₃தா ந்ருப .
த₃ஹத்யேநஸ்ததா₂ வாயு꞉ ஸம்ஸ்தப்₃தோ₄ ந ச தத்தநும் ..31 ..
யதா₂ யதா₂ நர꞉ கஶ்சித்ஸோபாநாவலிமாக்ரமேத் .
ததா₂ ததா₂ வஶீகுர்யாத்ப்ராணாபாநௌ ஹி யோக₃வித் ..32 ..
பூரகம் கும்ப₄கம் சைவ ரேசகம் ச ததோ(அ)ப்₄யஸேத் .
அதீதாநாக₃தஜ்ஞாநீ தத꞉ ஸ்யாஜ்ஜக₃தீதலே ..33 ..
ப்ராணாயாமைர்த்₃வாத₃ஶபி₄ருத்தமைர்தா₄ரணா மதா .
யோக₃ஸ்து தா₄ரணே த்₃வே ஸ்யாத்₃யோகீ₃ஶஸ்தே ஸதா₃ப்₄யஸேத் ..34 ..
ஏவம் ய꞉ குருதே ராஜம்ஸ்த்ரிகாலஜ்ஞ꞉ ஸ ஜாயதே .
அநாயாஸேந தஸ்ய ஸ்யாத்₃வஶ்யம் லோகத்ரயம் ந்ருப ..35 ..
ப்₃ரஹ்மரூபம் ஜக₃த்ஸர்வம் பஶ்யதி ஸ்வாந்தராத்மநி .
ஏவம் யோக₃ஶ்ச ஸம்ந்யாஸ꞉ ஸமாநப₂லதா₃யிநௌ ..36 ..
ஜந்தூநாம் ஹிதகர்தாரம் கர்மணாம் ப₂லதா₃யிநம் .
மாம் ஜ்ஞாத்வா முக்திமாப்நோதி த்ரைலோக்யஸ்யேஶ்வரம் விபு₄ம் ..37 ..
யோகா₃ம்ருதார்த₂ஶாஸ்த்ரே
ஶ்ரீக₃ணேஶபுராணே உத்தரக₂ண்டே₃ க₃ஜாநநவரேண்யஸம்வாதே₃
வைத₄ஸம்ந்யாஸயோகோ₃ நாம சதுர்தோ₂(அ)த்₄யாய꞉ ..
.. பஞ்சமோ(அ)த்₄யாய꞉ ..
.. யோகா₃வ்ருத்திப்ரஶம்ஸந꞉ ..
ஶ்ரீக₃ஜாநந உவாச -
ஶ்ரௌதஸ்மார்தாநி கர்மாணி ப₂லம் நேச்ச₂ந்ஸமாசரேத் .
ஶஸ்த꞉ ஸ யோகீ₃ ராஜேந்த்₃ர அக்ரியாத்₃யோக₃மாஶ்ரிதாத் ..1 ..
யோக₃ப்ராப்த்யை மஹாபா₃ஹோ ஹேது꞉ கர்மைவ மே மதம் .
ஸித்₃தி₄யோக₃ஸ்ய ஸம்ஸித்₃த்₄யை ஹேதூ ஶமத₃மௌ மதௌ ..2 ..
இந்த்₃ரியார்தா₂ம்ஶ்ச ஸம்கல்ப்ய குர்வந்ஸ்வஸ்ய ரிபுர்ப₄வேத் .
ஏதாநநிச்ச₂ந்ய꞉ குர்வந்ஸித்₃தி₄ம் யோகீ₃ ஸ ஸித்₃த்₄யதி ..3 ..
ஸுஹ்ருத்வே ச ரிபுத்வே ச உத்₃தா₄ரே சைவ ப₃ந்த₄நே .
ஆத்மநைவாத்மநி ஹ்யாத்மா நாத்மா ப₄வதி கஶ்சந ..4 ..
மாநே(அ)பமாநே து₃꞉கே₂ ச ஸுகே₂(அ)ஸுஹ்ருதி₃ ஸாது₄ஷு .
மித்ரே(அ)மித்ரே(அ)ப்யுதா₃ஸீநே த்₃வேஷ்யே லோஷ்டே₂ ச காஞ்சநே ..5 ..
ஸமோ ஜிதாத்மா விஜ்ஞாநீ ஜ்ஞாநீந்த்₃ரியஜயாவஹ꞉ .
அப்₄யஸேத்ஸததம் யோக₃ம் யதா₃ யுக்ததமோ ஹி ஸ꞉ ..6 ..
தப்த꞉ ஶ்ராந்தோ வ்யாகுலோ வா க்ஷுதி₄தோ வ்யக்₃ரசித்தக꞉ .
காலே(அ)திஶீதே(அ)த்யுஷ்ணே வாநிலாக்₃ந்யம்பு₃ஸமாகுலே ..7 ..
ஸத்₄வநாவதிஜீர்ணே கோ₃꞉ஸ்தா₂நே ஸாக்₃நௌ ஜலாந்திகே .
கூபகூலே ஶ்மஶாநே ச நத்₃யாம் பி₄த்தௌ ச மர்மரே ..8 ..
சைத்யே ஸவல்மிகே தே₃ஶே பிஶாசாதி₃ஸமாவ்ருதே .
நாப்₄யஸேத்₃யோக₃வித்₃யோக₃ம் யோக₃த்₄யாநபராயண꞉ ..9 ..
ஸ்ம்ருதிலோபஶ்ச மூகத்வம் பா₃தி₄ர்யம் மந்த₃தா ஜ்வர꞉ .
ஜட₃தா ஜாயதே ஸத்₃யோ தோ₃ஷாஜ்ஞாநாத்₃தி₄ யோகி₃ந꞉ ..10 ..
ஏதே தோ₃ஷா꞉ பரித்யாஜ்யா யோகா₃ப்₄யஸநஶாலிநா .
அநாத₃ரே ஹி சைதேஷாம் ஸ்ம்ருதிலோபாத₃யோ த்₄ருவம் ..11 ..
நாதிபு₄ஞ்ஜந்ஸதா₃ யோகீ₃ நாபு₄ஞ்ஜந்நாதிநித்₃ரித꞉ .
நாதிஜாக்₃ரத்ஸித்₃தி₄மேதி பூ₄ப யோக₃ம் ஸதா₃ப்₄யஸந் ..12 ..
ஸம்கல்பஜாம்ஸ்த்யஜேத்காமாந்நியதாஹாரஜாக₃ர꞉ .
நியம்ய க₂க₃ணம் பு₃த்₃த்₄யா விரமேத ஶநை꞉ ஶநை꞉ ..13 ..
ததஸ்தத꞉ க்ருஷேதே₃தத்₃யத்ர யத்ராநுக₃ச்ச₂தி .
த்₄ருத்யாத்மவஶக₃ம் குர்யாச்சித்தம் சஞ்சலமாத்₃ருத꞉ ..14 ..
ஏவம் குர்வந்ஸதா₃ யோகீ₃ பராம் நிர்வ்ருதிம்ருச்ச₂தி .
விஶ்வஸ்மிந்நிஜமாத்மாநம் விஶ்வம் ச ஸ்வாத்மநீக்ஷதே ..15 ..
யோகே₃ந யோ மாமுபைதி தமுபைம்யஹமாத₃ராத் .
மோசயாமி ந முஞ்சாமி தமஹம் மாம் ஸ ந த்யஜேத் ..16 ..
ஸுகே₂ ஸுகே₂தரே த்₃வேஷே க்ஷுதி₄ தோஷே ஸமஸ்த்ருஷி .
ஆத்மஸாம்யேந பூ₄தாநி ஸர்வக₃ம் மாம் ச வேத்தி ய꞉ ..17 ..
ஜீவந்முக்த꞉ ஸ யோகீ₃ந்த்₃ர꞉ கேவலம் மயி ஸம்க₃த꞉ .
ப்₃ரஹ்மாதீ₃நாம் ச தே₃வாநாம் ஸ வந்த்₃ய꞉ ஸ்யாஜ்ஜக₃த்ரயே ..18 ..
வரேண்ய உவாச -
த்₃விவிதோ₄(அ)பி ஹி யோகோ₃(அ)யமஸம்பா₄வ்யோ ஹி மே மத꞉ .
யதோ(அ)ந்த꞉கரணம் து₃ஷ்டம் சஞ்சலம் து₃ர்க்₃ரஹம் விபோ₄ ..19 ..
ஶ்ரீக₃ஜாநந உவாச -
யோ நிக்₃ரஹம் து₃ர்க்₃ரஹஸ்ய மநஸ꞉ ஸம்ப்ரகல்பயேத் .
க₄டீயந்த்ரஸமாத₃ஸ்மாந்முக்த꞉ ஸம்ஸ்ருதிசக்ரகாத் ..20 ..
விஷயை꞉ க்ரகசைரேதத்ஸம்ஸ்ருஷ்டம் சக்ரகம் த்₃ருட₄ம் .
ஜநஶ்சே₂த்தும் ந ஶக்நோதி கர்மகீல꞉ ஸுஸம்வ்ருதம் ..21 ..
அதிது₃꞉க₂ம் ச வைராக்₃யம் போ₄கா₃த்₃வைத்ருஷ்ண்யமேவ ச .
கு₃ருப்ரஸாத₃꞉ ஸத்ஸங்க₃ உபாயாஸ்தஜ்ஜயே அமீ ..22 ..
அப்₄யாஸாத்₃வா வஶீகுர்யாந்மநோ யோக₃ஸ்ய ஸித்₃த₄யே .
வரேண்ய து₃ர்லபோ₄ யோகோ₃ விநாஸ்ய மநஸோ ஜயாத் ..23 ..
வரேண்ய உவாச -
யோக₃ப்₄ரஷ்டஸ்ய கோ லோக꞉ கா க₃தி꞉ கிம் ப₂லம் ப₄வேத் .
விபோ₄ ஸர்வஜ்ஞ மே சி₂ந்தி₄ ஸம்ஶயம் பு₃த்₃தி₄சக்ரப்₄ருத் ..24 ..
ஶ்ரீக₃ஜாநந உவாச -
தி₃வ்யதே₃ஹத₄ரோ யோகா₃த்₃ப்₄ரஷ்ட꞉ ஸ்வர்போ₄க₃முத்தமம் .
பு₄க்த்வா யோகி₃குலே ஜந்ம லபே₄ச்சு₂த்₃தி₄மதாம் குலே ..25 ..
புநர்யோகீ₃ ப₄வத்யேஷ ஸம்ஸ்காராத்பூர்வகர்மஜாத் .
ந ஹி புண்யக்ருதாம் கஶ்சிந்நரகம் ப்ரதிபத்₃யதே ..26 ..
ஜ்ஞாநநிஷ்டா₂த்தபோநிஷ்டா₂த்கர்மநிஷ்டா₂ந்நராதி₄ப .
ஶ்ரேஷ்டோ₂ யோகீ₃ ஶ்ரேஷ்ட₂தமோ ப₄க்திமாந்மயி தேஷு ய꞉ ..27 ..
இதி ஶ்ரீமத்₃க₃ணேஶகீ₃தாஸூபநிஷத₃ர்த₂க₃ர்பா₄ஸு யோகா₃ம்ருதார்த₂ஶாஸ்த்ரே ஶ்ரீக₃ணேஶபுராணே உத்தரக₂ண்டே₃ க₃ஜாநநவரேண்யஸம்வாதே₃ யோகா₃வ்ருத்திப்ரஶம்ஸநோ நாம பஞ்சமோ(அ)த்₄யாய꞉ ..
.. பு₃த்₃தி₄யோக₃꞉ ..
ஶ்ரீக₃ஜாநந உவாச -
ஈத்₃ருஶம் வித்₃தி₄ மே தத்த்வம் மத்₃க₃தேநாந்தராத்மநா .
யஜ்ஜ்ஞாத்வா மாமஸந்தி₃க்₃த₄ம் வேத்ஸி மோக்ஷ்யஸி ஸர்வக₃ம் ..1 ..
தத்தே(அ)ஹம் ஶ்ருணு வக்ஷ்யாமி லோகாநாம் ஹிதகாம்யயா .
அஸ்தி ஜ்ஞேயம் யதோ நாந்யந்முக்தேஶ்ச ஸாத₄நம் ந்ருப ..2 ..
ஜ்ஞேயா மத்ப்ரக்ருதி꞉ பூர்வம் தத꞉ ஸ்யாம் ஜ்ஞாநகோ₃சர꞉ .
ததோ விஜ்ஞாநஸம்பத்திர்மயி ஜ்ஞாதே ந்ருணாம் ப₄வேத் ..3 ..
க்வநலௌ க₂மஹங்கார꞉ கம் சித்தம் தீ₄ஸமீரணௌ .
ரவீந்தூ₃ யாக₃க்ருச்சைகாத₃ஶதா₄ ப்ரக்ருதிர்மம ..4 ..
அந்யாம் மத்ப்ரக்ருதிம் வ்ருத்₃தா₄ முநய꞉ ஸம்கி₃ரந்தி ச .
ததா₂ த்ரிவிஷ்டபம் வ்யாப்தம் ஜீவத்வம் க₃தயாநயா ..5 ..
ஆப்₄யாமுத்பாத்₃யதே ஸர்வம் சராசரமயம் ஜக₃த் .
ஸம்கா₃த்₃விஶ்வஸ்ய ஸம்பூ₄தி꞉ பரித்ராணம் லயோ(அ)ப்யஹம் ..6 ..
தத்த்வமேதந்நிபோ₃த்₃து₄ம் மே யததே கஶ்சிதே₃வ ஹி .
வர்ணாஶ்ரமவதாம் பும்ஸாம் புரா சீர்ணேந கர்மணா ..7 ..
ஸாக்ஷாத்கரோதி மாம் கஶ்சித்₃யத்நவத்ஸ்வபி தேஷு ச .
மத்தோ(அ)ந்யந்நேக்ஷதே கிம்சிந்மயி ஸர்வம் ச வீக்ஷதே ..8 ..
க்ஷிதௌ ஸுக₃ந்த₄ரூபேண தேஜோரூபேண சாக்₃நிஷு .
ப்ரபா₄ரூபேண பூஷ்ண்யப்₃ஜே ரஸரூபேண சாப்ஸு ச ..9 ..
தீ₄தபோப₃லிநாம் சாஹம் தீ₄ஸ்தபோப₃லமேவ ச .
த்ரிவிதே₄ஷு விகாரேஷு மது₃த்பந்நேஷ்வஹம் ஸ்தி₂த꞉ ..10 ..
ந மாம் விந்த₃தி பாபீயாந்மாயாமோஹிதசேதந꞉ .
த்ரிவிகாரா மோஹயதி ப்ரக்ருதிர்மே ஜக₃த்த்ரயம் ..11 ..
யோ மே தத்த்வம் விஜாநாதி மோஹம் த்யஜதி ஸோ(அ)கி₂லம் .
அநேகைர்ஜந்மபி₄ஶ்சைவம் ஜ்ஞாத்வா மாம் முச்யதே தத꞉ ..12 ..
அந்யே நாநாவிதா₄ந்தே₃வாந்ப₄ஜந்தே தாந்வ்ரஜந்தி தே .
யதா₂ யதா₂ மதிம் க்ருத்வா ப₄ஜதே மாம் ஜநோ(அ)கி₂ல꞉ ..13 ..
ததா₂ ததா₂ஸ்ய தம் பா₄வம் பூரயாம்யஹமேவ தம் .
அஹம் ஸர்வம் விஜாநாமி மாம் ந கஶ்சித்₃விபு₃த்₄யதே ..14 ..
அவ்யக்தம் வ்யக்திமாபந்நம் ந விது₃꞉ காமமோஹிதா꞉ .
நாஹம் ப்ரகாஶதாம் யாமி அஜ்ஞாநாம் பாபகர்மணாம் ..15 ..
ய꞉ ஸ்ம்ருத்வா த்யஜதி ப்ராணமந்தே மாம் ஶ்ரத்₃த₄யாந்வித꞉ .
ஸ யாத்யபுநராவ்ருத்திம் ப்ரஸாதா₃ந்மம பூ₄பு₄ஜ ..16 ..
யம் யம் தே₃வம் ஸ்மரந்ப₄க்த்யா த்யஜதி ஸ்வம் கலேவரம் .
தத்தத்ஸாலோக்யமாயாதி தத்தத்₃ப₄க்த்யா நராதி₄ப ..17 ..
அதஶ்சாஹர்நிஶம் பூ₄ப ஸ்மர்தவ்யோ(அ)நேகரூபவாந் .
ஸர்வேஷாமப்யஹம் க₃ம்ய꞉ ஸ்ரோதஸாமர்ணவோ யதா₂ ..18 ..
ப்₃ரஹ்மவிஷ்ணுஶிவேந்த்₃ராத்₃யாம்ல்லோகாந்ப்ராப்ய புந꞉ பதேத் .
யோ மாமுபைத்யஸம்தி₃க்₃த₄꞉ பதநம் தஸ்ய ந க்வசித் ..19 ..
அநந்யஶரணோ யோ மாம் ப₄க்த்யா ப₄ஜதி பூ₄மிப .
யோக₃க்ஷேமௌ ச தஸ்யாஹம் ஸர்வதா₃ ப்ரதிபாத₃யே ..20 ..
த்₃விவிதா₄ க₃திருத்₃தி₃ஷ்டா ஶுக்லா க்ருஷ்ணா ந்ருணாம் ந்ருப .
ஏகயா பரமம் ப்₃ரஹ்ம பரயா யாதி ஸம்ஸ்ருதிம் ..21 ..
யோகா₃ம்ருதார்த₂ஶாஸ்த்ரே
ஶ்ரீக₃ணேஶபுராணே உத்தரக₂ண்டே₃ க₃ஜாநநவரேண்யஸம்வாதே₃
பு₃த்₃தி₄யோகோ₃ நாம ஷஷ்டோ₂(அ)த்₄யாய꞉ ..
.. ஸப்தமோ(அ)த்₄யாய꞉ ..
.. உபாஸநா யோக₃꞉ ..
வரேண்ய உவாச -
கா ஶுக்லா க₃திருத்₃தி₃ஷ்டா கா ச க்ருஷ்ணா க₃ஜாநந .
கிம் ப்₃ரஹ்ம ஸம்ஸ்ருதி꞉ கா மே வக்துமர்ஹஸ்யநுக்₃ரஹாத் ..1 ..
ஶ்ரீக₃ஜாநந உவாச -
அக்₃நிர்ஜ்யோதிரஹ꞉ ஶுக்லா கர்மார்ஹமயநம் க₃தி꞉ .
சாந்த்₃ரம் ஜ்யோதிஸ்ததா₂ தூ₄மோ ராத்ரிஶ்ச த₃க்ஷிணாயநம் ..2 ..
க்ருஷ்ணைதே ப்₃ரஹ்மஸம்ஸ்ருத்யோரவாப்தே꞉ காரணம் க₃தீ .
த்₃ருஶ்யாத்₃ருஶ்யமித₃ம் ஸர்வம் ப்₃ரஹ்மைவேத்யவதா₄ரய ..3 ..
க்ஷரம் பஞ்சாத்மகம் வித்₃தி₄ தத₃ந்தரக்ஷரம் ஸ்ம்ருதம் .
உபா₄ப்₄யாம் யத₃திக்ராந்தம் ஶுத்₃த₄ம் வித்₃தி₄ ஸநாதநம் ..4 ..
அநேகஜந்மஸம்பூ₄தி꞉ ஸம்ஸ்ருதி꞉ பரிகீர்திதா .
ஸம்ஸ்ருதிம் ப்ராப்நுவந்த்யேதே யே து மாம் க₃ணயந்தி ந ..5 ..
யே மாம் ஸம்யகு₃பாஸந்தே பரம் ப்₃ரஹ்ம ப்ரயாந்தி தே .
த்₄யாநாத்₃யைருபசாரைர்மாம் ததா₂ பஞ்சாம்ருதாதி₃பி₄꞉ ..6 ..
ஸ்நாநவஸ்த்ராத்₃யலம்காரஸுக₃ந்த₄தூ₄பதீ₃பகை꞉ .
நைவேத்₃யை꞉ ப₂லதாம்பூ₃லைர்த₃க்ஷிணாபி₄ஶ்ச யோ(அ)ர்சயேத் ..7 ..
ப₄க்த்யைகசேதஸா சைவ தஸ்யேஷ்டம் பூரயாம்யஹம் .
ஏவம் ப்ரதிதி₃நம் ப₄க்த்யா மத்₃ப₄க்தோ மாம் ஸமர்சயேத் ..8 ..
அத₂வா மாநஸீம் பூஜாம் குர்வீத ஸ்தி₂ரசேதஸா .
அத₂வா ப₂லபத்ராத்₃யை꞉ புஷ்பமூலஜலாதி₃பி₄꞉ ..9 ..
பூஜயேந்மாம் ப்ரயத்நேந தத்ததி₃ஷ்டம் ப₂லம் லபே₄த் .
த்ரிவிதா₄ஸ்வபி பூஜாஸு ஶ்ரேயஸீ மாநஸீ மதா ..10 ..
ஸாப்யுத்தமா மதா பூஜாநிச்ச₂யா யா க்ருதா மம .
ப்₃ரஹ்மசாரீ க்₃ருஹஸ்தோ₂ வா வாநப்ரஸ்தோ₂ யதிஶ்ச ய꞉ ..11 ..
ஏகாம் பூஜாம் ப்ரகுர்வாணோ(அ)ப்யந்யோ வா ஸித்₃தி₄ம்ருச்ச₂தி .
மத₃ந்யதே₃வம் யோ ப₄க்த்யா த்₃விஷந்மாமந்யதே₃வதாம் ..12 ..
ஸோ(அ)பி மாமேவ யஜதே பரம் த்வவிதி₄தோ ந்ருப .
யோ ஹ்யந்யதே₃வதாம் மாம் ச த்₃விஷந்நந்யாம் ஸமர்சயேத் ..13 ..
யாதி கல்பஸஹஸ்ரம் ஸ நிரயாந்து₃꞉க₂பா₄க் ஸதா₃ .
பூ₄தஶுத்₃தி₄ம் விதா₄யாதௌ₃ ப்ராணாநாம் ஸ்தா₂பநம் தத꞉ ..14 ..
ஆக்ருஷ்ய சேதஸோ வ்ருத்திம் ததோ ந்யாஸம் உபக்ரமேத் .
க்ருத்வாந்தர்மாத்ருகாந்யாஸம் ப₃ஹிஶ்சாத₂ ஷட₃ங்க₃கம் ..15 ..
ந்யாஸம் ச மூலமந்த்ரஸ்ய ததோ த்₄யாத்வா ஜபேந்மநும் .
ஸ்தி₂ரசித்தோ ஜபேந்மந்த்ரம் யதா₂ கு₃ருமுகா₂க₃தம் ..16 ..
ஜபம் நிவேத்₃ய தே₃வாய ஸ்துத்வா ஸ்தோத்ரைரநேகதா₄ .
ஏவம் மாம் ய உபாஸீத ஸ லபே₄ந்மோக்ஷமவ்யயம் ..17 ..
ய உபாஸநயா ஹீநோ தி₄ங்நரோ வ்யர்த₂ஜந்மபா₄க் .
யஜ்ஞோ(அ)ஹமௌஷத₄ம் மந்ரோ(அ)க்₃நிராஜ்யம் ச ஹவிர்ஹுதம் ..18 ..
த்₄யாநம் த்₄யேயம் ஸ்துதிம் ஸ்தோத்ரம் நதிர்ப₄க்திருபாஸநா .
த்ரயீஜ்ஞேயம் பவித்ரம் ச பிதாமஹபிதாமஹ꞉ ..19 ..
ௐகார꞉ பாவந꞉ ஸாக்ஷீ ப்ரபு₄ர்மித்ரம் க₃திர்லய꞉ .
உத்பத்தி꞉ போஷகோ பீ₃ஜம் ஶரணம் வாஸ ஏவ ச ..20 ..
அஸந்ம்ருத்யு꞉ ஸத₃ம்ருதமாத்மா ப்₃ரஹ்மாஹமேவ ச .
தா₃நம் ஹோமஸ்தபோ ப₄க்திர்ஜப꞉ ஸ்வாத்₄யாய ஏவ ச ..21 ..
யத்₃யத்கரோதி தத்ஸர்வம் ஸ மே மயி நிவேத₃யேத் .
யோஷிதோ(அ)த₂ து₃ராசாரா꞉ பாபாஸ்த்ரைவர்ணிகாஸ்ததா₂ ..22 ..
மதா₃ஶ்ரயா விமுச்யந்தே கிம் மத்₃ப₄க்த்யா த்₃விஜாத₃ய꞉ .
ந விநஶ்யதி மத்₃ப₄க்தோ ஜ்ஞாத்வேமா மத்₃விபூ₄தய꞉ ..23 ..
ப்ரப₄வம் மே விபூ₄திஶ்ச ந தே₃வா ருஷயோ விது₃꞉ .
நாநாவிபூ₄திபி₄ரஹம் வ்யாப்ய விஶ்வம் ப்ரதிஷ்டி₂த꞉ ..24 ..
யத்₃யச்ச்₂ரேஷ்ட₂தமம் லோகே ஸ விபூ₄திர்நிபோ₃த₄ மே ..25 ..
யோகா₃ம்ருதார்த₂ஶாஸ்த்ரே
ஶ்ரீக₃ணேஶபுராணே உத்தரக₂ண்டே₃ க₃ஜாநநவரேண்யஸம்வாதே₃
உபாஸநாயோகோ₃ நாம ஸப்தமோ(அ)த்₄யாய꞉ ..
.. அஷ்டமோ(அ)த்₄யாய꞉ ..
.. விஶ்வரூபத₃ர்ஶந ..
வரேண்ய உவாச -
ப₄க₃வந்நாரதோ₃ மஹ்யம் தவ நாநா விபூ₄தய꞉ .
உக்தவாம்ஸ்தா அஹம் வேத₃ ந ஸர்வா꞉ ஸோ(அ)பி வேத்தி தா꞉ ..1 ..
த்வமேவ தத்த்வத꞉ ஸர்வா வேத்ஸி தா த்₃விரதா₃நந .
நிஜம் ரூபமிதா₃நீம் மே வ்யாபகம் சாரு த₃ர்ஶய ..2 ..
ஶ்ரீக₃ஜாநந உவாச -
ஏகஸ்மிந்மயி பஶ்ய த்வம் விஶ்வமேதச்சராசரம் .
நாநாஶ்சர்யாணி தி₃வ்யாநி புரா(அ)த்₃ருஷ்டாநி கேநசித் ..3 ..
ஜ்ஞாநசக்ஷுரஹம் தே(அ)த்₃ய ஸ்ருஜாமி ஸ்வப்ரபா₄வத꞉ .
சர்மசக்ஷு꞉ கத₂ம் பஶ்யேந்மாம் விபு₄ம் ஹ்யஜமவ்யயம் ..4 ..
க உவாச -
ததோ ராஜா வரேண்ய꞉ ஸ தி₃வ்யசக்ஷுரவைக்ஷத .
ஈஶிது꞉ பரமம் ரூபம் க₃ஜாஸ்யஸ்ய மஹாத்₃பு₄தம் ..5 ..
அஸம்க்₂யவக்த்ரம் லலிதமஸம்க்₂யாம்க்₄ரிகரம் மஹத் .
அநுலிப்தம் ஸுக₃ந்தே₄ந தி₃வ்யபூ₄ஷாம்ப₃ரஸ்ரஜம் ..6 ..
அஸம்க்₂யநயநம் கோடிஸூர்யரஶ்மித்₄ருதாயுத₄ம் .
தத்₃வர்ஷ்மணி த்ரயோ லோகா த்₃ருஷ்டாஸ்தேந ப்ருத₂க்₃விதா₄꞉ ..7 ..
த்₃ருஷ்ட்வைஶ்வரம் பரம் ரூபம் ப்ரணம்ய ஸ ந்ருபோ(அ)ப்₃ரவீத் .
வரேண்ய உவாச -
வீக்ஷே(அ)ஹம் தவ தே₃ஹே(அ)ஸ்மிந்தே₃வாந்ருஷிக₃ணாந்பித்ரூந் ..8 ..
பாதாலாநாம் ஸமுத்₃ராணாம் த்₃வீபாநாம் சைவ பூ₄ப்₄ருதாம் .
மஹர்ஷீணாம் ஸப்தகம் ச நாநார்தை₂꞉ ஸம்குலம் விபோ₄ ..9 ..
பு₄வோ(அ)ந்தரிக்ஷஸ்வர்கா₃ம்ஶ்ச மநுஷ்யோரக₃ராக்ஷஸாந் .
ப்₃ரஹ்மாவிஷ்ணுமஹேஶேந்த்₃ராந்தே₃வாந்ஜந்தூநநேகதா₄ ..10 ..
அநாத்₃யநந்தம் லோகாதி₃மநந்தபு₄ஜஶீர்ஷகம் .
ப்ரதீ₃ப்தாநலஸம்காஶமப்ரமேயம் புராதநம் ..11 ..
கிரீடகுண்ட₃லத₄ரம் து₃ர்நிரீக்ஷ்யம் முதா₃வஹம் .
ஏதாத்₃ருஶம் ச வீக்ஷே த்வாம் விஶாலவக்ஷஸம் ப்ரபு₄ம் ..12 ..
ஸுரவித்₃யாத₄ரைர்யக்ஷை꞉ கிந்நரைர்முநிமாநுஷை꞉ .
ந்ருத்யத்₃பி₄ரப்ஸரோபி₄ஶ்ச க₃ந்த₄ர்வைர்கா₃நதத்பரை꞉ ..13 ..
வஸுருத்₃ராதி₃த்யக₃ணை꞉ ஸித்₃தை₄꞉ ஸாத்₄யைர்முதா₃ யுதை꞉ .
ஸேவ்யமாநம் மஹாப₄க்த்யா வீக்ஷ்யமாணம் ஸுவிஸ்மிதை꞉ ..14 ..
வேத்தாரமக்ஷரம் வேத்₃யம் த₄ர்மகோ₃ப்தாரமீஶ்வரம் .
பாதாலாநி தி₃ஶ꞉ ஸ்வர்கா₃ந்பு₄வம் வ்யாப்யா(அ)கி₂லம் ஸ்தி₂தம் ..15 ..
பீ₄தா லோகாஸ்ததா₂ சாஹமேவம் த்வாம் வீக்ஷ்ய ரூபிணம் .
நாநாத₃ம்ஷ்ட்ராகராலம் ச நாநாவித்₃யாவிஶாரத₃ம் ..16 ..
ப்ரலயாநலதீ₃ப்தாஸ்யம் ஜடிலம் ச நப₄꞉ஸ்ப்ருஶம் .
த்₃ருஷ்ட்வா க₃ணேஶ தே ரூபமஹம் ப்₄ராந்த இவாப₄வம் ..17 ..
தே₃வா மநுஷ்யநாகா₃த்₃யா꞉ க₂லாஸ்த்வது₃த₃ரேஶயா꞉ .
நாநாயோநிபு₄ஜஶ்சாந்தே த்வய்யேவ ப்ரவிஶந்தி ச ..18 ..
அப்₃தே₄ருத்பத்₃யமாநாஸ்தே யதா₂ஜீமூதபி₃ந்த₃வ꞉ .
த்வமிந்த்₃ரோ(அ)க்₃நிர்யமஶ்சைவ நிர்ருதிர்வருணோ மருத் ..19 ..
கு₃ஹ்யகேஶஸ்ததே₂ஶாந꞉ ஸோம꞉ ஸூர்யோ(அ)கி₂லம் ஜக₃த் .
நமாமி த்வாமத꞉ ஸ்வாமிந்ப்ரஸாத₃ம் குரு மே(அ)து₄நா ..20 ..
த₃ர்ஶயஸ்வ நிஜம் ரூபம் ஸௌம்யம் யத்பூர்வமீக்ஷிதம் .
கோ வேத₃ லீலாஸ்தே பூ₄மந் க்ரியமாணா நிஜேச்ச₂யா ..21 ..
அநுக்₃ரஹாந்மயா த்₃ருஷ்டமைஶ்வரம் ரூபமீத்₃ருஶம் .
ஜ்ஞாநசக்ஷுர்யதோ த₃த்தம் ப்ரஸந்நேந த்வயா மம ..22 ..
ஶ்ரீக₃ஜாநந உவாச -
நேத₃ம் ரூபம் மஹாபா₃ஹோ மம பஶ்யந்த்யயோகி₃ந꞉ .
ஸநகாத்₃யா நாரதா₃த்₃யா꞉ பஶ்யந்தி மத₃நுக்₃ரஹாத் .. 23 ..
சதுர்வேதா₃ர்த₂தத்த்வஜ்ஞா꞉ ஸர்வஶாஸ்த்ரவிஶாரதா₃꞉ .
யஜ்ஞதா₃நதபோநிஷ்டா₂ ந மே ரூபம் வித₃ந்தி தே ..24 ..
ஶக்யோ(அ)ஹம் வீக்ஷிதும் ஜ்ஞாதும் ப்ரவேஷ்டும் ப₄க்திபா₄வத꞉ .
த்யஜ பீ₄திம் ச மோஹம் ச பஶ்ய மாம் ஸௌம்யரூபிணம் ..25 ..
மத்₃ப₄க்தோ மத்பர꞉ ஸர்வஸம்க₃ஹீநோ மத₃ர்த₂க்ருத் .
நிஷ்க்ரோத₄꞉ ஸர்வபூ₄தேஷு ஸமோ மாமேதி பூ₄பு₄ஜ ..26 ..
இதி ஶ்ரீமத்₃க₃ணேஶகீ₃தாஸூபநிஷத₃ர்த₂க₃ர்பா₄ஸு யோகா₃ம்ருதார்த₂ஶாஸ்த்ரே ஶ்ரீக₃ணேஶபுராணே உத்தரக₂ண்டே₃ க₃ஜாநநவரேண்யஸம்வாதே₃ விஶ்வரூபத₃ர்ஶநோ நாமாஷ்டமோ(அ)த்₄யாய꞉ ..
.. க்ஷேத்ரஜ்ஞாத்ருஜ்ஞேயவிவேகயோக₃꞉ ..
வரேண்ய உவாச -
அநந்யபா₄வஸ்த்வாம் ஸம்யங்மூர்திமந்தமுபாஸதே .
யோ(அ)க்ஷரம் பரமவ்யக்தம் தயோ꞉ கஸ்தே மதோ(அ)தி₄க꞉ ..1 ..
அஸி த்வம் ஸர்வவித்ஸாக்ஷீ பூ₄தபா₄வந ஈஶ்வர꞉ .
அதஸ்த்வாம் பரிப்ருச்சா₂மி வத₃ மே க்ருபயா விபோ₄ ..2 ..
ஶ்ரீக₃ஜாநந உவாச -
யோ மாம் மூர்தித₄ரம் ப₄க்த்யா மத்₃ப₄க்த꞉ பரிஸேவதே .
ஸ மே மாந்யோ(அ)நந்யப₄க்திர்நியுஜ்ய ஹ்ருத₃யம் மயி ..3 ..
க₂க₃ணம் ஸ்வவஶம் க்ருத்வாகி₂லபூ₄தஹிதார்த₂க்ருத் .
த்₄யேயமக்ஷரமவ்யக்தம் ஸர்வக₃ம் கூடக₃ம் ஸ்தி₂ரம் ..4 ..
ஸோ(அ)பி மாமேத்யநிர்தே₃ஶ்யம் மத்பரோ ய உபாஸதே .
ஸம்ஸாரஸாக₃ராத₃ஸ்மாது₃த்₃த₄ராமி தமப்யஹம் ..5 ..
அவ்யக்தோபாஸநாத்₃து₃꞉க₂மதி₄கம் தேந லப்₄யதே .
வ்யக்தஸ்யோபாஸநாத்ஸாத்₄யம் ததே₃வாவ்யக்தப₄க்தித꞉ ..6 ..
ப₄க்திஶ்சைவாத₃ரஶ்சாத்ர காரணம் பரமம் மதம் .
ஸர்வேஷாம் விது₃ஷாம் ஶ்ரேஷ்டோ₂ ஹ்யகிம்சிஜ்ஜ்ஞோ(அ)பி ப₄க்திமாந் ..7 ..
ப₄ஜந்ப₄க்த்யா விஹீநோ ய꞉ ஸ சாண்டா₃லோ(அ)பி₄தீ₄யதே .
சாண்டா₃லோ(அ)பி ப₄ஜந்ப₄க்த்யா ப்₃ராஹ்மணேப்₄யோ(அ)தி₄கோ மத꞉ ..8 ..
ஶுகாத்₃யா꞉ ஸநகாத்₃யாஶ்ச புரா முக்தா ஹி ப₄க்தித꞉ .
ப₄க்த்யைவ மாமநுப்ராப்தா நாரதா₃த்₃யாஶ்சிராயுஷ꞉ ..9 ..
அதோ ப₄க்த்யா மயி மநோ விதே₄ஹி பு₃த்₃தி₄மேவ ச .
ப₄க்த்யா யஜஸ்வ மாம் ராஜம்ஸ்ததோ மாமேவ யாஸ்யஸி ..10 ..
அஸமர்தோ₂(அ)ர்பிதும் ஸ்வாந்தம் ஏவம் மயி நராதி₄ப .
அப்₄யாஸேந சே யோகே₃ந ததோ க₃ந்தும் யதஸ்வ மாம் ..11 ..
தத்ராபி த்வமஶக்தஶ்சேத்குரு கர்ம மத₃ர்பணம் .
மாமநுக்₃ரஹதஶ்சைவம் பராம் நிர்வ்ருதிமேஷ்யஸி ..12 ..
அதை₂தத₃ப்யநுஷ்டா₂தும் ந ஶக்தோ(அ)ஸி ததா₃ குரு .
ப்ரயத்நத꞉ ப₂லத்யாக₃ம் த்ரிவிதா₄நாம் ஹி கர்மணாம் ..13 ..
ஶ்ரேயஸீ பு₃த்₃தி₄ராவ்ருத்தேஸ்ததோ த்₄யாநம் பரம் மதம் .
ததோ(அ)கி₂லபரித்யாக₃ஸ்தத꞉ ஶாந்திர்க₃ரீயஸீ ..14 ..
நிரஹம்மமதாபு₃த்₃தி₄ரத்₃வேஷ꞉ ஶரண꞉ ஸம꞉ .
லாபா₄லாபே₄ ஸுகே₂ து₃꞉கே₂ மாநாமாநே ஸ மே ப்ரிய꞉ ..15 ..
யம் வீக்ஷ்ய ந ப₄யம் யாதி ஜநஸ்தஸ்மாந்ந ச ஸ்வயம் .
உத்₃வேக₃பீ₄꞉ கோபமுத்₃பீ₄ரஹிதோ ய꞉ ஸ மே ப்ரிய꞉ ..16 ..
ரிபௌ மித்ரே(அ)த₂ க₃ர்ஹாயாம் ஸ்துதௌ ஶோகே ஸம꞉ ஸமுத் .
மௌநீ நிஶ்சலதீ₄ப₄க்திரஸம்க₃꞉ ஸ ச மே ப்ரிய꞉ ..17 ..
ஸம்ஶீலயதி யஶ்சைநமுபதே₃ஶம் மயா க்ருதம் .
ஸ வந்த்₃ய꞉ ஸர்வலோகேஷு முக்தாத்மா மே ப்ரிய꞉ ஸதா₃ ..18 ..
அநிஷ்டாப்தௌ ச ந த்₃வேஷ்டீஷ்டப்ராப்தௌ ச ந துஷ்யதி .
க்ஷேத்ரதஜ்ஜ்ஞௌ ச யோ வேத்தி ஸமே ப்ரியதமோ ப₄வேத் ..19 ..
வரேண்ய உவாச -
கிம் க்ஷேத்ரம் கஶ்ச தத்₃வேத்தி கிம் தஜ்ஜ்ஞாநம் க₃ஜாநந .
ஏததா₃சக்ஷ்வ மஹ்யம் த்வம் ப்ருச்ச₂தே கருணாம்பு₃தே₄ ..20 ..
ஶ்ரீக₃ஜாநந உவாச -
பஞ்ச பூ₄தாநி தந்மாத்ரா꞉ பஞ்ச கர்மேந்த்₃ரியாணி ச .
அஹம்காரோ மநோ பு₃த்₃தி₄꞉ பஞ்ச ஜ்ஞாநேந்த்₃ரியாணி ச ..21 ..
இச்சா₂வ்யக்தம் த்₄ருதித்₃வேஷௌ ஸுக₂து₃꞉கே₂ ததை₂வ ச .
சேதநாஸஹிதஶ்சாயம் ஸமூஹ꞉ க்ஷேத்ரமுச்யதே ..22 ..
தஜ்ஜ்ஞம் த்வம் வித்₃தி₄ மாம் பூ₄ப ஸர்வாந்தர்யாமிணம் விபு₄ம் .
அயம் ஸமூஹோ(அ)ஹம் சாபி யஜ்ஜ்ஞாநவிஷயௌ ந்ருப ..23 ..
ஆர்ஜவம் கு₃ருஶுஶ்ரூஷா விரக்திஶ்சேந்த்₃ரியார்த₂த꞉ .
ஶௌசம் க்ஷாந்திரத₃ம்ப₄ஶ்ச ஜந்மாதி₃தோ₃ஷவீக்ஷணம் ..24 ..
ஸமத்₃ருஷ்டிர்த்₃ருடா₄ ப₄க்திரேகாந்தித்வம் ஶமோ த₃ம꞉ .
ஏதைர்யச்ச யுதம் ஜ்ஞாநம் தஜ்ஜ்ஞாநம் வித்₃தி₄ பா₃ஹுஜ ..25 ..
தஜ்ஜ்ஞாநவிஷயம் ராஜந்ப்₃ரவீமி த்வம் ஶ்ருணுஷ்வ மே .
யஜ்ஜ்ஞாத்வைதி ச நிர்வாணம் முக்த்வா ஸம்ஸ்ருதிஸாக₃ரம் ..26 ..
யத₃நாதீ₃ந்த்₃ரியைர்ஹீநம் கு₃ணபு₄க்₃கு₃ணவர்ஜிதம் .
அவ்யக்தம் ஸத₃ஸத்₃பி₄ந்நமிந்த்₃ரியார்தா₂வபா₄ஸகம் .. 27 ..
விஶ்வப்₄ருச்சாகி₂லவ்யாபி த்வேகம் நாநேவ பா₄ஸதே .
பா₃ஹ்யாப்₄யந்தரத꞉ பூர்ணமஸம்க₃ம் தமஸ꞉ பரம் ..28 ..
து₃ர்ஜ்ஞேயம் சாதிஸூக்ஷ்மத்வாத்₃தீ₃ப்தாநாமபி பா₄ஸகம் .
ஜ்ஞேயமேதாத்₃ருஶம் வித்₃தி₄ ஜ்ஞாநக₃ம்யம் புராதநம் ..29 ..
ஏததே₃வ பரம் ப்₃ரஹ்ம ஜ்ஞேயமாத்மா பரோ(அ)வ்யய꞉ .
கு₃ணாந்ப்ரக்ருதிஜாந்பு₄ங்க்தே புருஷ꞉ ப்ரக்ருதே꞉ பர꞉ ..30 ..
கு₃ணைஸ்த்ரிபி₄ரியம் தே₃ஹே ப₃த்₄நாதி புருஷம் த்₃ருட₄ம் .
யதா₃ ப்ரகாஶ꞉ ஶாந்திஶ்ச வ்ருத்₃தே₄ ஸத்த்வம் ததா₃தி₄கம் ..31 ..
லோபோ₄(அ)ஶம꞉ ஸ்ப்ருஹாரம்ப₄꞉ கர்மணாம் ரஜஸோ கு₃ண꞉ .
மோஹோ(அ)ப்ரவ்ருத்திஶ்சாஜ்ஞாநம் ப்ரமாத₃ஸ்தமஸோ கு₃ண꞉ ..32 ..
ஸத்த்வாதி₄க꞉ ஸுக₂ம் ஜ்ஞாநம் கர்மஸம்க₃ம் ரஜோ(அ)தி₄க꞉ .
தமோ(அ)தி₄கஶ்ச லப₄தே நித்₃ராலஸ்யம் ஸுகே₂தரத் ..33 ..
ஏஷு த்ரிஷு ப்ரவ்ருத்₃தே₄ஷு முக்திஸம்ஸ்ருதிது₃ர்க₃தீ꞉ .
ப்ரயாந்தி மாநவா ராஜம்ஸ்தஸ்மாத்ஸத்த்வயுதோ ப₄வ ..34 ..
ததஶ்ச ஸர்வபா₄வேந ப₄ஜ த்வம் மாம் நரேஶ்வர .
ப₄க்த்யா சாவ்யபி₄சாரிண்யா ஸர்வத்ரைவ ச ஸம்ஸ்தி₂தம் ..35 ..
அக்₃நௌ ஸூர்யே ததா₂ ஸோமே யச்ச தாராஸு ஸம்ஸ்தி₂தம் .
விது₃ஷி ப்₃ராஹ்மணே தேஜோ வித்₃தி₄ தந்மாமகம் ந்ருப ..36 ..
அஹமேவாகி₂லம் விஶ்வம் ஸ்ருஜாமி விஸ்ருஜாமி ச .
ஔஷதீ₄ஸ்தேஜஸா ஸர்வா விஶ்வம் சாப்யாயயாம்யஹம் ..37 ..
ஸர்வேந்த்₃ரியாண்யதி₄ஷ்டா₂ய ஜாட₂ரம் ச த₄நம்ஜயம் .
பு₄நஜ்மி சாகி₂லாந்போ₄கா₃ந்புண்யபாபவிவர்ஜித꞉ ..38 ..
அஹம் விஷ்ணுஶ்ச ருத்₃ரஶ்ச ப்₃ரஹ்மா கௌ₃ரீ க₃ணேஶ்வர꞉ .
இந்த்₃ராத்₃யா லோகபாலாஶ்ச மமைவாம்ஶஸமுத்₃ப₄வா꞉ ..39 ..
யேந யேந ஹி ரூபேண ஜநோ மாம் பர்யுபாஸதே .
ததா₂ ததா₂ த₃ர்ஶயாமி தஸ்மை ரூபம் ஸுப₄க்தித꞉ ..40 ..
இதி க்ஷேத்ரம் ததா₂ ஜ்ஞாதா ஜ்ஞாநம் ஜ்ஞேயம் மயேரிதம் .
அகி₂லம் பூ₄பதே ஸம்யகு₃பபந்நாய ப்ருச்ச₂தே ..41 ..
இதி ஶ்ரீமத்₃க₃ணேஶகீ₃தாஸூபநிஷத₃ர்த₂க₃ர்பா₄ஸு யோகா₃ம்ருதார்த₂ஶாஸ்த்ரே ஶ்ரீக₃ணேஶபுராணே உத்தரக₂ண்டே₃ க₃ஜாநநவரேண்யஸம்வாதே₃ க்ஷேத்ரஜ்ஞாத்ருஜ்ஞேயவிவேகயோகோ₃ நாம நவமோ(அ)த்₄யாய꞉ ..
.. உபதே₃ஶயோக₃꞉ ..
ஶ்ரீக₃ஜாநந உவாச -
தை₃வ்யாஸுரீ ராக்ஷஸீ ச ப்ரக்ருதிஸ்த்ரிவிதா₄ ந்ருணாம் .
தாஸாம் ப₂லாநி சிந்ஹாநி ஸம்க்ஷேபாத்தே(அ)து₄நா ப்₃ருவே ..1 ..
ஆத்₃யா ஸம்ஸாத₄யேந்முக்திம் த்₃வே பரே ப₃ந்த₄நம் ந்ருப .
சிந்ஹம் ப்₃ரவீமி சாத்₃யாயாஸ்தந்மே நிக₃த₃த꞉ ஶ்ருணு ..2 ..
அபைஶூந்யம் த₃யா(அ)க்ரோத₄ஶ்சாபல்யம் த்₄ருதிரார்ஜவம் .
தேஜோ(அ)ப₄யமஹிம்ஸா ச க்ஷமா ஶௌசமமாநிதா ..3 ..
இத்யாதி₃ சிந்ஹமாத்₃யாயா ஆஸுர்யா꞉ ஶ்ருணு ஸாம்ப்ரதம் .
அதிவாதோ₃(அ)பி₄மாநஶ்ச த₃ர்போ ஜ்ஞாநம் ஸகோபதா ..4 ..
ஆஸுர்யா ஏவமாத்₃யாநி சிந்ஹாநி ப்ரக்ருதேர்ந்ருப .
நிஷ்டு₂ரத்வம் மதோ₃ மோஹோ(அ)ஹம்காரோ க₃ர்வ ஏவ ச ..5 ..
த்₃வேஷோ ஹிம்ஸா(அ)த₃யா க்ரோத₄ ஔத்₃த₄த்யம் து₃ர்விநீததா .
ஆபி₄சாரிககர்த்ருத்வம் க்ரூரகர்மரதிஸ்ததா₂ ..6 ..
அவிஶ்வாஸ꞉ ஸதாம் வாக்யே(அ)ஶுசித்வம் கர்மஹீநதா .
நிந்த₃கத்வம் ச வேதா₃நாம் ப₄க்தாநாமஸுரத்₃விஷாம் ..7 ..
முநிஶ்ரோத்ரியவிப்ராணாம் ததா₂ ஸ்ம்ருதிபுராணயோ꞉ .
பாக₂ண்ட₃வாக்யே விஶ்வாஸ꞉ ஸம்க₃திர்மலிநாந்மநாம் ..8 ..
ஸத₃ம்ப₄கர்மகர்த்ருத்வம் ஸ்ப்ருஹா ச பரவஸ்துஷு .
அநேககாமநாவத்த்வம் ஸர்வதா₃(அ)ந்ருதபா₄ஷணம் ..9 ..
பரோத்கர்ஷாஸஹிஷ்ணுத்வம் பரக்ருத்யபராஹதி꞉ .
இத்யாத்₃யா ப₃ஹவஶ்சாந்யே ராக்ஷஸ்யா꞉ ப்ரக்ருதேர்கு₃ணா꞉ ..10 ..
ப்ருதி₂வ்யாம் ஸ்வர்க₃லோகே ச பரிவ்ருத்ய வஸந்தி தே .
மத்₃ப₄க்திரஹிதா லோகா ராக்ஷஸீம் ப்ரக்ருதிம் ஶ்ரிதா꞉ ..11 ..
தாமஸீம் யே ஶ்ரிதா ராஜந்யாந்தி தே ரௌரவம் த்₄ருவம் .
அநிர்வாச்யம் ச தே து₃꞉க₂ம் பு₄ஞ்ஜதே தத்ர ஸம்ஸ்தி₂தா꞉ ..12 .
தை₃வாந்நி꞉ஸ்ருத்ய நரகாஜ்ஜாயந்தே பு₄வி குப்₃ஜகா꞉ .
ஜாத்யந்தா₄꞉ பங்க₃வோ தீ₃நா ஹீநஜாதிஷு தே ந்ருப ..13 ..
புந꞉ பாபஸமாசாரா மய்யப₄க்தா꞉ பதந்தி தே .
உத்பதந்தி ஹி மத்₃ப₄க்தா யாம் காம்சித்₃யோநிமாஶ்ரிதா꞉ ..14 ..
லப₄ந்தே ஸ்வர்க₃திம் யஜ்ஞைரந்யைர்த₄ர்மஶ்ச பூ₄மிப .
ஸுலபா₄ஸ்தா꞉ ஸகாமாநாம் மயி ப₄க்தி꞉ ஸுது₃ர்லபா₄ ..15 ..
விமூடா₄ மோஹஜாலேந ப₃த்₃தா₄꞉ ஸ்வேந ச கர்மணா .
அஹம் ஹந்தா அஹம் கர்தா அஹம் போ₄க்தேதி வாதி₃ந꞉ ..16 ..
அஹமேவேஶ்வர꞉ ஶாஸ்தா அஹம் வேத்தா அஹம் ஸுகீ₂ .
ஏதாத்₃ருஶீ மதிர்ந்ரூணாமத₄꞉ பாதயதீஹ தாந் ..17 ..
தஸ்மாதே₃தத்ஸமுத்ஸ்ருஜ்ய தை₃வீம் ப்ரக்ருதிமாஶ்ரய .
ப₄க்திம் குரு மதீ₃யாம் த்வமநிஶம் த்₃ருட₄சேதஸா ..18 ..
ஸாபி ப₄க்திஸ்த்ரிதா₄ ராஜந்ஸாத்த்விகீ ராஜஸீதரா .
யத்₃தே₃வாந்ப₄ஜதே ப₄க்த்யா ஸாத்த்விகீ ஸா மதா ஶுபா₄ ..19 ..
ராஜஸீ ஸா து விஜ்ஞேயா ப₄க்திர்ஜந்மம்ருதிப்ரதா₃ .
யத்₃யக்ஷாம்ஶ்சைவ ரக்ஷாம்ஸி யஜந்தே ஸர்வபா₄வத꞉ ..20 ..
வேதே₃நாவிஹிதம் க்ரூரம் ஸாஹம்காரம் ஸத₃ம்ப₄கம் .
ப₄ஜந்தே ப்ரேதபூ₄தாதீ₃ந்கர்ம குர்வந்தி காமுகம் ..21 ..
ஶோஷயந்தோ நிஜம் தே₃ஹமந்த꞉ஸ்த₂ம் மாம் த்₃ருடா₄க்₃ரஹா꞉ .
தாமஸ்யேதாத்₃ருஶீ ப₄க்திர்ந்ருணாம் ஸா நிரயப்ரதா₃ ..22 ..
காமோ லோப₄ஸ்ததா₂ க்ரோதோ₄ த₃ம்ப₄ஶ்சத்வார இத்யமீ .
மஹாத்₃வாராணி வீசீநாம் தஸ்மாதே₃தாம்ஸ்து வர்ஜயேத் ..23 ..
இதி ஶ்ரீமத்₃க₃ணேஶகீ₃தாஸூபநிஷத₃ர்த₂க₃ர்பா₄ஸு யோகா₃ம்ருதார்த₂ஶாஸ்த்ரே ஶ்ரீக₃ணேஶபுராணே உத்தரக₂ண்டே₃ க₃ஜாநநவரேண்யஸம்வாதே₃ உபதே₃ஶயோகோ₃ நாம த₃ஶமோ(அ)த்₄யாய꞉ ..
.. த்ரிவித₄வஸ்துவிவேகநிரூபணம் ..
ஶ்ரீக₃ஜாநந உவாச -
தபோ(அ)பி த்ரிவித₄ம் ராஜந்காயிகாதி₃ப்ரபே₄த₃த꞉ .
ருஜுதார்ஜவஶௌசாநி ப்₃ரஹ்மசர்யமஹிம்ஸநம் ..1 ..
கு₃ருவிஜ்ஞத்₃விஜாதீநாம் பூஜநம் சாஸுரத்₃விஷாம் .
ஸ்வத₄ர்மபாலநம் நித்யம் காயிகம் தப ஈத்₃ருஶம் ..2 ..
மர்மாஸ்ப்ருக்ச ப்ரியம் வாக்யமநுத்₃வேக₃ம் ஹிதம் ருதம் .
அதீ₄திர்வேத₃ஶாஸ்த்ராணாம் வாசிகம் தப ஈத்₃ருஶம் ..3 ..
அந்த꞉ப்ரஸாத₃꞉ ஶாந்தத்வம் மௌநமிந்த்₃ரியநிக்₃ரஹ꞉ .
நிர்மலாஶயதா நித்யம் மாநஸம் தப ஈத்₃ருஶம் ..4 ..
அகாமத꞉ ஶ்ரத்₃த₄யா ச யத்தப꞉ ஸாத்த்விகம் ச தத் .
ருத்₄யை ஸத்காரபூஜார்த₂ம் ஸத₃ம்ப₄ம் ராஜஸம் தப꞉ ..5 ..
தத₃ஸ்தி₂ரம் ஜந்மம்ருதீ ப்ரயச்ச₂தி ந ஸம்ஶய꞉ .
பராத்மபீட₃கம் யச்ச தபஸ்தாமஸமுச்யதே ..6 ..
விதி₄வாக்யப்ரமாணார்த₂ம் ஸத்பாத்ரே தே₃ஶகாலத꞉ .
ஶ்ரத்₃த₄யா தீ₃யமாநம் யத்₃தா₃நம் தத்ஸாத்த்விகம் மதம் ..7 ..
உபகாரம் ப₂லம் வாபி காங்க்ஷத்₃பி₄ர்தீ₃யதே நரை꞉ .
க்லேஶதோ தீ₃யமாநம் வா ப₄க்த்யா ராஜஸமுச்யதே ..8 ..
அகாலதே₃ஶதோ(அ)பாத்ரே(அ)வஜ்ஞயா தீ₃யதே து யத் .
அஸத்காராச்ச யத்₃த₃த்தம் தத்₃தா₃நம் தாமஸம் ஸ்ம்ருதம் ..9 ..
ஜ்ஞாநம் ச த்ரிவித₄ம் ராஜந் ஶ்ருணுஷ்வ ஸ்தி₂ரசேதஸா .
த்ரிதா₄ கர்ம ச கர்தாரம் ப்₃ரவீமி தே ப்ரஸம்க₃த꞉ ..10 ..
நாநாவிதே₄ஷு பூ₄தேஷு மாமேகம் வீக்ஷதே து ய꞉ .
நாஶவத்ஸு ச நித்யம் மாம் தஜ்ஜ்ஞாநம் ஸாத்விகம் ந்ருப ..11 ..
தேஷு வேத்தி ப்ருத₂க்₃பூ₄தம் விவித₄ம் பா₄வமாஶ்ரித꞉ .
மாமவ்யயம் ச தஜ்ஜ்ஞாநம் ராஜஸம் பரிகீர்திதம் ..12 ..
ஹேதுஹீநமஸத்யம் ச தே₃ஹாத்மவிஷயம் ச யத் .
அஸத₃ல்பார்த₂விஷயம் தாமஸம் ஜ்ஞாநமுச்யதே ..13 ..
பே₄த₃தஸ்த்ரிவித₄ம் கர்ம வித்₃தி₄ ராஜந்மயேரிதம் .
காமநாத்₃வேஷத₃ம்பை₄ர்யத்₃ரஹிதம் நித்யகர்ம யத் ..14 ..
க்ருதம் விநா ப₂லேச்சா₂ம் யத்கர்ம ஸாத்த்விகமுச்யதே .
யத்₃ப₃ஹுக்லேஶத꞉ கர்ம க்ருதம் யச்ச ப₂லேச்ச₂யா ..15 ..
க்ரியமாணம் ந்ருபி₄ர்த₃ம்பா₄த்கர்ம ராஜஸமுச்யதே .
அநபேக்ஷ்ய ஸ்வஶக்திம் யத₃ர்த₂க்ஷயகரம் ச யத் ..16 ..
அஜ்ஞாநாத்க்ரியமாணம் யத்கர்ம தாமஸமீரிதம் .
கர்தாரம் த்ரிவித₄ம் வித்₃தி₄ கத்₂யமாநம் மயா ந்ருப ..17 ..
தை₄ர்யோத்ஸாஹீ ஸமோ(அ)ஸித்₃தௌ₄ ஸித்₃தௌ₄ சாவிக்ரியஸ்து ய꞉ .
அஹம்காரவிமுக்தோ ய꞉ ஸ கர்தா ஸாத்த்விகோ ந்ருப ..18 ..
குர்வந்ஹர்ஷம் ச ஶோகம் ச ஹிம்ஸாம் ப₂லஸ்ப்ருஹாம் ச ய꞉ .
அஶுசிர்லுப்₃த₄கோ யஶ்ச ராஜஸோ(அ)ஸௌ நிக₃த்₃யதே ..19 ..
ப்ரமாதா₃ஜ்ஞாநஸஹித꞉ பரோச்சே₂த₃பர꞉ ஶட₂꞉ .
அலஸஸ்தர்கவாந்யஸ்து கர்தாஸௌ தாமஸோ மத꞉ ..20 ..
ஸுக₂ம் ச த்ரிவித₄ம் ராஜந்து₃꞉க₂ம் ச க்ரமத꞉ ஶ்ருணு .
ஸாத்த்விகம் ராஜஸம் சைவ தாமஸம் ச மயோச்யதே ..21 ..
விஷவத்₃பா₄ஸதே பூர்வம் து₃꞉க₂ஸ்யாந்தகரம் ச யத் .
இஷ்யமாநம் ததா₂(ஆ)வ்ருத்த்யா யத₃ந்தே(அ)ம்ருதவத்₃ப₄வேத் ..22 ..
ப்ரஸாதா₃த்ஸ்வஸ்ய பு₃த்₃தே₄ர்யத்ஸாத்த்விகம் ஸுக₂மீரிதம் .
விஷயாணாம் து யோ போ₄கோ₃ பா₄ஸதே(அ)ம்ருதவத்புரா ..23 ..
ஹாலாஹலமிவாந்தே யத்₃ராஜஸம் ஸுக₂மீரிதம் .
தந்த்₃ரிப்ரமாத₃ஸம்பூ₄தமாலஸ்யப்ரப₄வம் ச யத் ..24 ..
ஸர்வதா₃ மோஹகம் ஸ்வஸ்ய ஸுக₂ம் தாமஸமீத்₃ருஶம் .
ந தத₃ஸ்தி யதே₃தைர்யந்முக்தம் ஸ்யாத்த்ரிவிதை₄ர்கு₃ணை꞉ ..25 ..
ராஜந்ப்₃ரஹ்மாபி த்ரிவித₄மோம்தத்ஸதி₃தி பே₄த₃த꞉ .
த்ரிலோகேஷு த்ரிதா₄ பூ₄தமகி₂லம் பூ₄ப வர்ததே ..26 ..
ப்₃ரஹ்மக்ஷத்ரியவிட்ஶூத்₃ரா꞉ ஸ்வபா₄வாத்₃பி₄ந்நகர்மிண꞉ .
தாநி தேஷாம் து கர்மாணி ஸம்க்ஷேபாத்தே(அ)து₄நா வதே₃ ..27 ..
அந்தர்பா₃ஹ்யேந்த்₃ரியாணாம் ச வஶ்யத்வமார்ஜவம் க்ஷமா .
நாநாதபாம்ஸி ஶௌசம் ச த்₃விவித₄ம் ஜ்ஞாநமாத்மந꞉ ..28 ..
வேத₃ஶாஸ்த்ரபுராணாநாம் ஸ்ம்ருதீநாம் ஜ்ஞாநமேவ ச .
அநுஷ்டா₂நம் தத₃ர்தா₂நாம் கர்ம ப்₃ராஹ்மமுதா₃ஹ்ருதம் ..29 ..
தா₃ர்ட்₄யம் ஶௌர்யம் ச தா₃க்ஷ்யம் ச யுத்₃தே₄ ப்ருஷ்டா₂ப்ரத₃ர்ஶநம் .
ஶரண்யபாலநம் தா₃நம் த்₄ருதிஸ்தேஜ꞉ ஸ்வபா₄வஜம் ..30 ..
ப்ரபு₄தா மந ஔநத்யம் ஸுநீதிர்லோகபாலநம் .
பஞ்சகர்மாதி₄காரித்வம் க்ஷாத்ரம் கர்ம ஸமீரிதம் ..31 ..
நாநாவஸ்துக்ரயோ பூ₄மே꞉ கர்ஷணம் ரக்ஷணம் க₃வாம் .
த்ரிதா₄ கர்மாதி₄காரித்வம் வைஶ்யகர்ம ஸமீரிதம் ..32 ..
தா₃நம் த்₃விஜாநாம் ஶுஶ்ரூஷா ஸர்வதா₃ ஶிவஸேவநம் .
ஏதாத்₃ருஶம் நரவ்யாக்₄ர கர்ம ஶௌத்₃ரமுதீ₃ரிதம் ..33 ..
ஸ்வஸ்வகர்மரதா ஏதே மய்யர்ப்யாகி₂லகாரிண꞉ .
மத்ப்ரஸாதா₃த்ஸ்தி₂ரம் ஸ்தா₂நம் யாந்தி தே பரமம் ந்ருப .. 34..
இதி தே கதி₂தோ ராஜந்ப்ரஸாதா₃த்₃யோகௌ₃த்தம꞉ .
ஸாம்கோ₃பாம்க₃꞉ ஸவிஸ்தாரோ(அ)நாதி₃ஸித்₃தோ₄ மயா ப்ரிய .. 35 ..
யுங்க்ஷ்வ யோக₃ம் மயாக்₂யாதம் நாக்₂யாதம் கஸ்யசிந்ந்ருப .
கோ₃பயைநம் தத꞉ ஸித்₃தி₄ம் பராம் யாஸ்யஸ்யநுத்தமாம் ..36 ..
வ்யாஸ உவாச -
இதி தஸ்ய வச꞉ ஶ்ருத்வா ப்ரஸந்நஸ்ய மஹாத்மந꞉ .
க₃ணேஶஸ்ய வரேண்ய꞉ ஸ சகார ச யதோ₂தி₃தம் ..37 ..
த்யக்த்வா ராஜ்யம் குடும்ப₃ம் ச காந்தாரம் ப்ரயயௌ ரயாத் .
உபதி₃ஷ்டம் யதா₂ யோக₃மாஸ்தா₂ய முக்திமாப்நவாந் ..38 ..
இமம் கோ₃ப்யதமம் யோக₃ம் ஶ்ருணோதி ஶ்ரத்₃த₄யா து ய꞉ .
ஸோ(அ)பி கைவல்யமாப்நோதி யதா₂ யோகீ₃ ததை₂வ ஸ꞉ ..39 ..
ய இமம் ஶ்ராவயேத்₃யோக₃ம் க்ருத்வா ஸ்வார்த₂ம் ஸுபு₃த்₃தி₄மாந் .
யதா₂ யோகீ₃ ததா₂ ஸோ(அ)பி பரம் நிர்வாணம்ருச்ச₂தி ..40 ..
யோ கீ₃தாம் ஸம்யக₃ப்₄யஸ்ய ஜ்ஞாத்வா சார்த₂ம் கு₃ரோர்முகா₂த் .
க்ருத்வா பூஜாம் க₃ணேஶஸ்ய ப்ரத்யஹம் பட₂தே து ய꞉ ..41 ..
ஏககாலம் த்₃விகாலம் வா த்ரிகாலம் வாபி ய꞉ படே₂த் .
ப்₃ரஹ்மீபூ₄தஸ்ய தஸ்யாபி த₃ர்ஶநாந்முச்யதே நர꞉ ..42 ..
ந யஜ்ஞைர்ந வ்ரதைர்தா₃நைர்நாக்₃நிஹோத்ரைர்மஹாத₄நை꞉ .
ந வேதை₃꞉ ஸம்யக₃ப்₄யஸ்தை꞉ ஸஹாங்க₃கை꞉ ..43 ..
புராணஶ்ரவணைர்நைவ ந ஶாஸ்த்ரை꞉ ஸாது₄சிந்திதை꞉ .
ப்ராப்யதே ப்₃ரஹ்ம பரமமநயா ப்ராப்யதே நரை꞉ ..44 ..
ப்₃ரஹ்மக்₄நோ மத்₃யப꞉ ஸ்தேயீ கு₃ருதல்பக₃மோ(அ)பி ய꞉ .
சதுர்ணாம் யஸ்து ஸம்ஸர்கீ₃ மஹாபாதககாரிணாம் ..45 ..
ஸ்த்ரீஹிம்ஸாகோ₃வதா₄தீ₃நாம் கர்தாரோ யே ச பாபிந꞉ .
தே ஸர்வே ப்ரதிமுச்யந்தே கீ₃தாமேதாம் பட₂ந்தி சேத் ..46 ..
ய꞉ படே₂த்ப்ரயதோ நித்யம் ஸ க₃ணேஶோ ந ஸம்ஶய꞉ .
சதுர்த்₂யாம் ய꞉ படே₂த்₃ப₄க்த்யா ஸோ(அ)பி மோக்ஷாய கல்பதே ..47 ..
தத்தத்க்ஷேத்ரம் ஸமாஸாத்₃ய ஸ்நாத்வாப்₄யர்ச்ய க₃ஜாநநம் .
ஸக்ருத்₃கீ₃தாம் பட₂ந்ப₄க்த்யா ப்₃ரஹ்மபூ₄யாய கல்பதே ..48 ..
பா₄த்₃ரே மாஸே ஸிதே பக்ஷே சதுர்த்₂யாம் ப₄க்திமாந்நர꞉ .
க்ருத்வா மஹீமயீம் மூர்திம் க₃ணேஶஸ்ய சதுர்பு₄ஜாம் ..49 ..
ஸவாஹநாம் ஸாயுதா₄ம் ச ஸமப்₄யர்ச்ய யதா₂விதி₄ .
ய꞉ படே₂த்ஸப்தக்ருத்வஸ்து கீ₃தாமேதாம் ப்ரயத்நத꞉ ..50 ..
த₃தா₃தி தஸ்ய ஸந்துஷ்டோ க₃ணேஶோ போ₄க₃முத்தமம் .
புத்ராந்பௌத்ராந்த₄நம் தா₄ந்யம் பஶுரத்நாதி₃ஸம்பத₃꞉ ..51 ..
வித்₃யார்தி₂நோ ப₄வேத்₃வித்₃யா ஸுகா₂ர்தீ₂ ஸுக₂மாப்நுயாத் .
காமாநந்யாம்ல்லபே₄த்காமீ முக்திமந்தே ப்ரயாந்தி தே ..52 ..
இதி ஶ்ரீமத்₃க₃ணேஶகீ₃தாஸூபநிஷத₃ர்த₂க₃ர்பா₄ஸு யோகா₃ம்ருதார்த₂ஶாஸ்த்ரே ஶ்ரீக₃ணேஶபுராணே உத்தரக₂ண்டே₃ க₃ஜாநநவரேண்யஸம்வாதே₃ த்ரிவித₄வஸ்துவிவேகநிரூபணம் நாம ஏகாத₃ஶோ(அ)த்₄யாய꞉ ..