ಯತಿರಾಜ ಸಪ್ತತಿಃ

.. ಯತಿರಾಜ ಸಪ್ತತಿಃ ..

ಶ್ರೀಮಾನ್ ವೇಙ್ಕಟನಾಥಾರ್ಯಃ ಕವಿತಾರ್ಕಿಕಕೇಸರೀ .
ವೇದಾನ್ತಾಚಾರ್ಯ ವರ್ಯೋಮೇ ಸನ್ನಿಧತ್ತಾಂ ಸದಾ ಹೃದಿ ..

ಕಮಪ್ಯಾಧ್ಯಂ ಗುರುಂ ವನ್ದೇ ಕಮಲಾಗೃಹಮೇಧಿನಮ್ .
ಪ್ರವಕ್ತಾ ಛನ್ದಸಾಂ ವಕ್ತಾ ಪಞ್ಚರಾತ್ರಸ್ಯ ಯಃ ಸ್ವಯಮ್ .. ೧..

ಸಹಧರ್ಮಚರೀಂ ಶೌರೇಃ ಸಂಮನ್ತ್ರಿತಜಗಧ್ದಿತಾಮ್ .
ಅನುಗ್ರಹಮಯೀಂ ವನ್ದೇ ನಿತ್ಯಮಜ್ಞಾತನಿಗ್ರಹಾಮ್ .. ೨..

ವನ್ದೇ ವೈಕುಣ್ಠಸೇನಾನ್ಯಂ ದೇವಂ ಸೂತ್ರವತೀಸಖಮ್ .
ಯದ್ವೇತ್ರಶಿಖರಸ್ಪನ್ದೇ ವಿಶ್ವಮೇತದ್ ವ್ಯವಸ್ಥಿತಮ್ .. ೩..

ಯಸ್ಯ ಸಾರಸ್ವತಸ್ರೋತೋ ವಕುಲಾಮೋದವಾಸಿತಮ್ .
ಶ್ರುತೀನಾಂ ವಿಶ್ರಮಾಯಾಲಂ ಶಠಾರಿಂ ತಮುಪಾಸ್ಮಹೇ .. ೪..

ನಾಥೇನ ಮುನಿನಾ ತೇನ ಭವೇಯಂ ನಾಥವಾಹನಮ್ .
ಯಸ್ಯ ನೈಗಮಿಕಂ ತತ್ವಂ ಹಸ್ತಾಮಲಕತಾಂ ಗತಮ್ .. ೫..

ನಮಸ್ಯಾಮ್ಯರವಿನ್ದಾಕ್ಷಂ ನಾಥಭಾವೇ ವ್ಯವಸ್ಥಿತಮ್ .
ಶುಧ್ದಸತ್ವಮಯಂ ಶೌರೇರವತಾರಮಿವಾಪರಮ್ .. ೬..

ಅನುಜ್ಝಿತಕ್ಷಮಾಯೋಗಮಪುಣ್ಯಜನಬಾಧಕಮ್ .
ಅಸ್ಪೃಷ್ಟಮದಿರಾಗಂ ತಂ ರಾಮಂ ತುರ್ಯಮುಪಾಸ್ಮಹೇ .. ೭..

ವಿಗಾಹೇ ಯಾಮುನಂ ತೀರ್ಥಂ ಸಾಧು ಬೃನ್ದಾವನೇ ಸ್ಥಿತಮ್ .
ನಿರಸ್ತಜಿಹ್ಮಗಸ್ಪರ್ಶೇ ಯತ್ರ ಕೃಷ್ಣಃ ಕೃತಾದರಃ .. ೮..

ದಯಾ ನಿಘ್ನಂ ಯತೀನ್ದ್ರಸ್ಯ ದೇಶಿಕಂ ಪೂರ್ಣಮಾಶ್ರಯೇ.
ಯೇನ ವಿಶ್ವಸೃಜೋ ವಿಷ್ಣೋರಪೂರ್ಯತ ಮನೋರಥಃ .. ೯..

ಪ್ರಣಾಮಂ ಲಕ್ಷ್ಮಣಮುನಿಃ ಪ್ರತಿಗೃಹ್ಣಾತು ಮಾಮಕಮ್ .
ಪ್ರಸಾಧಯತಿ ಯತ್ಸೂಕ್ತಿಃ ಸ್ವಾಧೀನ ಪತಿಕಾಂ ಶ್ರುತಿಮ್ .. ೧೦..

ಉಪವೀತಿನಮೂರ್ಧ್ವಪುಣ್ಡ್ರವನ್ತಂ
ತ್ರಿಜಗತ್ಪುಣ್ಯಫಲಂ ತ್ರಿದಣ್ಡಹಸ್ತಮ್ .
ಶರಣಾಗತಸಾರ್ಥವಾಹಮೀಡೇ
ಶಿಖಯಾ ಶೇಖರಿಣಂ ಪತಿಂ ಯತೀನಾಮ್ .. ೧೧..

ಪ್ರಥಯನ್ ವಿಮತೇಷು ತೀಕ್ಷ್ಣಭಾವಂ
ಪ್ರಭುರಸ್ಮತ್ಪರಿರಕ್ಷಣೇ ಯತೀನ್ದ್ರಃ .
ಅಪೃಥಕ್ಪ್ರತಿಪನ್ನ ಯನ್ಮಯತ್ವೈಃ
ವವೃಧೇ ಪಞ್ಚಭಿರಾಯುಧೈರ್ಮುರಾರೇಃ .. ೧೨..

ಶಮಿತೋದಯಶಙ್ಕರಾದಿಗರ್ವಃ
ಸ್ವಬಲಾದುಧ್ದೃತಯಾದವಪ್ರಕಾಶಃ .
ಅವರೋಪಿತವಾನ್ ಶ್ರುತೇರಪಾರ್ಥಾನ್
ನನು ರಾಮಾವರಜಃ ಸ ಏಷ ಭೂಯಃ .. ೧೩.. var ಏವ
ಅಬಹುಶ್ರುತಸಂಭವಂ ಶ್ರುತೀನಾಂ
ಜರತೀನಾಮಯಥಾಯಥ ಪ್ರಚಾರಮ್ .
ವಿನಿವರ್ತಯಿತುಂ ಯತೀಶ್ವರೋಕ್ತಿಃ
ವಿದಧೇ ತಾಃ ಸ್ಥಿರನೀತಿಪಞ್ಜರಸ್ಥಾಃ .. ೧೪..

ಅಮುನಾ ತಪನಾತಿಶಾಯಿ ಭೂಮ್ನಾ
ಯತಿರಾಜೇನ ನಿಬಧ್ದನಾಯಕಶ್ರೀಃ .
ಮಹತೀ ಗುರುಪಙ್ಕ್ತಿಹಾರಯಷ್ಟಿಃ
ವಿಬುಧಾನಾಂ ಹೃದಯಙ್ಗಮಾ ವಿಭಾತಿ .. ೧೫..

ಅಲೂನಪಕ್ಷಸ್ಯ ಯತಿ ಕ್ಷಮಾಭೃತೋ
ವಿಭಾತಿ ವಂಶೇ ಹರಿತತ್ವಮಕ್ಷತಮ್ .
ಯದುದ್ಭವಾಃ ಶುಧ್ದಸುವೃತ್ತಶೀತಲಾಃ
ಭವನ್ತಿ ಮುಕ್ತಾವಲಿಭೂಷಣಂ ಭುವಃ .. ೧೬..

ಅನಪಾಯ ವಿಷ್ಣುಪದಸಂಶ್ರಯಂ ಭಜೇ
ಕಲಯಾ ಕಯಾಽಪಿ ಕಲಯಾಽಪ್ಯನುಜ್ಝಿತಮ್ .
ಅಕಲಙ್ಕಯೋಗಮಜಡಾಶಯೋದಯಂ
ಯತಿರಾಜಚನ್ದ್ರಮುಪರಾಗ ದೂರಗಮ್ .. ೧೭..

ಅಭಿಗಮ್ಯ ಸಮ್ಯಗನಘಾಃ ಸುಮೇಧಸೋ
ಯತಿ ಚಕ್ರವರ್ತಿಪದಪದ್ಮಪತ್ತನಮ್ .
ಹರಿಭಕ್ತದಾಸ್ಯರಸಿಕಾಃ ಪರಸ್ಪರಂ
ಕ್ರಯೈಕ್ರಯಾರ್ಹದಶಯಾ ಸಮಿನ್ಧತೇ .. ೧೮..

ಪರುಷಾತಿವಾದಪರಿವಾದಪೈಶುನ-
ಪ್ರಭೃತಿ ಪ್ರಭೂತಪತನೀಯಪಙ್ಕಿಲಾ .
ಸ್ವದತೇ ಮಮಾಧ್ಯ ಸುಭಗಾ ಸರಸ್ವತೀ
ಯತಿರಾಜಕೀರ್ತ್ತಿಕತಕೈರ್ವಿಶೋಧಿತಾ .. ೧೯..

ಅನುಕಲ್ಪಭೂತಮುರಭಿತ್ಪದಂ ಸತಾಂ
ಅಜಹತ್ತ್ರಿವರ್ಗಮಪವರ್ಗವೈಭವಮ್ .
ಚಲಚಿತ್ತವೃತ್ತಿವಿನಿವರ್ತ್ತನೌಷಧಂ
ಶರಣಂ ಯತೀನ್ದ್ರಚರಣಂ ವೃಣೀಮಹೇ .. ೨೦..

ಶ್ವಸಿತಾವಧೂತಪರವಾತಿವೈಭವಾಃ
ನಿಗಮಾನ್ತನೀತಿಜಲಧೇಸ್ತಲಸ್ಪೃಶಃ .
ಪ್ರತಿಪಾದಯನ್ತಿ ಗತಿಮಾಪವರ್ಗಿಕೀಂ
ಯತಿಸಾರ್ವಭೌಮಪದಸಾತ್ಕೃತಾಶಯಾಃ .. ೨೧..

ಮೂಲೇ ನಿವಿಶ್ಯ ಮಹತಾಂ ನಿಗಮದ್ರುಮಾಣಾಂ
ಮುಷ್ಣನ್ ಪ್ರತಾರಕಭಯಂ ಧೃತನೈಕದಣ್ಡಃ .
ರಙ್ಗೇಶ ಭಕ್ತಜನಮಾನಸರಾಜಹಂಸೋ
ರಾಮಾನುಜಃ ಶರಣಮಸ್ತು ಮುನಿಃ ಸ್ವಯಂ ನಃ .. ೨೨..

ಸನ್ಮನ್ತ್ರವಿತ್ ಕ್ಷಿಪತಿ ಸಂಯಮಿನಾಂ ನರೇನ್ದ್ರಃ
ಸಂಸಾರಜಿಹ್ಮಗಮುಖೈಃ ಸಮುಪಸ್ಥಿತಂ ನಃ .
ವಿಷ್ವಕ್ತತಂ ವಿಷಯಲೋಭವಿಷಂ ನಿಜಾಭಿಃ
ಗಾಢಾನುಭಾವಗರುಡಧ್ವಜಭಾವನಾಭಿಃ .. ೨೩..

ನಾಥಃ ಸ ಏಷ ಯಮಿನಾಂ ನಖರಶ್ಮಿಜಾಲೈಃ
ಅನ್ತ ನಿಲೀನಮಪನೀಯ ತಮೋ ಮದೀಯಮ್ .
ವಿಜ್ಞಾನಚಿತ್ರಮನಘಂ ಲಿಖತೀವ ಚಿತ್ತೇ
ವ್ಯಾಖ್ಯಾನಕೇಲಿರಸಿಕೇನ ಕರಾಮ್ಬುಜೇನ .. ೨೪..

ಉದ್ಗೃಹ್ಣತೀಮುಪನಿಷತ್ಸು ನಿಗೂಢಮರ್ಥಂ
ಚಿತ್ತೇ ನಿವೇಶಯಿತುಮಲ್ಪಧಿಯಾಂ ಸ್ವಯಂ ನಃ .
ಪಶ್ಯೇಮ ಲಖ಼್ಶ್ಮಣ್ ಮುನೇಃ ಪ್ರತಿಪನ್ನಹಸ್ತಾಂ
ಉನ್ನಿದ್ರಪದ್ಮಸುಭಗಾಮುಪದೇಶಮುದ್ರಾಮ್ .. ೨೫..

ಆಕರ್ಷಣಾನಿ ನಿಗಮಾನ್ತಸರಸ್ವತೀನಾಂ
ಉಚ್ಚಾಟನಾನಿ ಬಹಿರನ್ತರುಪಪ್ಲವಾನಾಮ್ .
ಪಥ್ಯಾನಿ ಘೋರಭವಸಂಜ್ವರಪೀಡಿತಾನಾಂ
ಹೃಧ್ಯಾನಿ ಭಾನ್ತಿ ಯತಿರಾಜಮುನೇರ್ವಚಾಂಸಿ .. ೨೬..

ಶೀತಸ್ವಭಾವಸುಭಗಾನುಭವಃ ಶಿಖಾವಾನ್
ದೋಷಾವಮರ್ದನಿಯತೋನ್ನತಿರೋಷಧೀಶಃ .
ತಾಪಾನುಬನ್ಧಶಮನಸ್ತಪನಃ ಪ್ರಜಾನಾಂ
ರಾಮಾನುಜೋ ಜಯತಿ ಸಂವಲಿತತ್ರಿಧಾಮಾ .. ೨೭..

ಜಯತಿ ಸಕಲವಿದ್ಯಾವಾಹಿನೀ ಜನ್ಮಶೈಲೋ
ಜನಿಪಥಪರಿವೃತ್ತಿಶ್ರಾನ್ತವಿಶ್ರಾನ್ತಿಶಾಖೀ .
ನಿಖಿಲಕುಮತಿ ಮಾಯಾ ಶರ್ವರೀ ಬಾಲಸೂರ್ಯೋ
ನಿಗಮಜಲಧಿವೇಲಾ ಪೂರ್ಣಚನ್ದ್ರೋ ಯತೀನ್ದ್ರಃ .. ೨೮..

ಮುನಿಬಹುಮತಸಾರಾ ಮುಕ್ತಿನಿಶ್ರೇಣಿಕೇಯಂ
ಸಹೃದಯಹೃದಯಾನಾಂ ಶಾಶ್ವತೀ ದಿಷ್ಟಸಿಧ್ದಿಃ .
ಶಮಿತದುರಿತಗನ್ಧಾ ಸಂಯಮೀನ್ದ್ರಸ್ಯ ಸೂಕ್ತಿಃ
ಪರಿಚಿತಗಹನಾ ನಃ ಪ್ರಸ್ನುವೀತ ಪ್ರಸಾದಮ್ .. ೨೯..

ಭವಮರುಪರಿಖಿನ್ನಸ್ಫೀತಪಾನೀಯಸಿನ್ಧುಃ
ದುರಿತರಹಿತಜಿಹ್ವಾ ದುಗ್ಧಕುಲ್ಯಾ ಸಕುಲ್ಯಾ .
ಶ್ರುತಿನಯನಸನಾಭಿಃ ಶೋಭತೇ ಲಕ್ಷ್ಮಣೋಕ್ತಿಃ
ನರಕಮಥನಸೇವಾಸ್ವಾದನಾಡಿಂಧಮಾ ನಃ .. ೩೦..

ಹರಿಪದಮಕರನ್ದಸ್ಯನ್ದಿನಃ ಸಂಶ್ರಿತಾನಾಂ
ಅನುಗತಬಹುಶಾಖಾಸ್ತಾಪಮುನ್ಮೂಲಯನ್ತಿ ..

ಶಮಿತದುರಿತಗನ್ಧಾಃ ಸಂಯಮೀನ್ದ್ರಪ್ರಬನ್ಧಾಃ
ಕಥಕಜನಮನೀಷಾ ಕಲ್ಪನಾ ಕಲ್ಪವೃಕ್ಷಾಃ .. ೩೧..

ನಾನಾಭೂತೈರ್ಜಗತಿ ಸಮಯೈರ್ನರ್ಮಲೀಲಾಂ ವಿಧಿತ್ಸೋಃ
ಅನ್ತ್ಯಂ ವರ್ಣಂ ಪ್ರಥಯತಿ ವಿಭೋರಾದಿಮವ್ಯೂಹಭೇದೇ .
ವಿಶ್ವಂ ತ್ರಾತುಂ ವಿಷಯನಿಯತಂ ವ್ಯಞ್ಜಿತಾನುಗ್ರಹಃ ಸನ್
ವಿಷ್ವಕ್ಸೇನೋ ಯತಿಪತಿರಭೂದ್ವೇತ್ರಸಾರಸ್ತ್ರಿದಣ್ಡಃ .. ೩೨..

ಲಕ್ಷ್ಯಂ ಬುಧ್ದೇ ರಸಿಕರಸನಾಲಾಸ್ಯಲೀಲಾನಿದಾನಂ
ಶುಧ್ದಾಸ್ವಾದಂ ಕಿಮಪಿ ಜಗತಿ ಶ್ರೋತ್ರದಿವ್ಯೌಷಧಂ ನಃ .
ಲಕ್ಷ್ಯಾಲಕ್ಷ್ಯೈಃ ಸಿತಜಲಧಿವದ್ಭಾತಿ ತಾತ್ಪರ್ಯರತ್ನೈಃ
ಲಕ್ಷ್ಮೀಕಾನ್ತ ಸ್ಫಟಿಕಮುಕುರೋ ಲಕ್ಷ್ಮಣಾರ್ಯೋಪದೇಶಃ .. ೩೩..

ಸ್ಥಿತಿಮವಧೀರಯನ್ತ್ಯತಿಮನೋರಥಸಿಧ್ದಿಮತೀಂ
ಯತಿಪತಿಸಂಪ್ರದಾಯನಿರಪಾಯಧನೋಪಚಿತಾಃ .
ಮಧುಕರಮೌಲಿದಘ್ನಮದದನ್ತುರದನ್ತಿಘಟಾ-
ಕರಟಕಟಾಹವಾಹಿ ಘನಶೀಕರಶೀಭರಿತಾಮ್ .. ೩೪..

ನಿರುಪಧಿ ರಙ್ಗವೃತ್ತಿ ರಸಿಕಾನಭಿತಾಣ್ಡವಯನ್
ನಿಗಮವಿಮರ್ಶಕೇಲಿರಸಿಕೈರ್ನಿಭೃತೈರ್ವಿಧೃತಃ .
ಗುಣಪರಿಣದ್ಧಸೂಕ್ತಿ ದೃಢಕೋಣವಿಘಟ್ಟನಯಾ
ರಟತಿ ದಿಶಾ ಮುಖೇಷು ಯತಿರಾಜಯಶಃ ಪಟಹಃ .. ೩೫..

ಇದಂ ಪ್ರಥಮಸಂಭವತ್ಕುಮತಿ ಜಾಲಕೂಲಙ್ಗಷಾಃ
ಮೃಷಾ ಮತವಿಷಾನಲಜ್ವಲಿತಜೀವಜೀವಾತವಃ .
ಕ್ಷರನ್ತ್ಯಮೃತಮಕ್ಷರಂ ಯತಿ ಪುರನ್ದರಸ್ಯೋಕ್ತಯಃ
ಚಿರನ್ತನಸರಸ್ವತಿ ಚಿಕುರಬನ್ಧಸೈರನ್ಧ್ರಿಕಾಃ .. ೩೬..

ಸುಧಾಶನಸುದುರ್ಗ್ರಹ ಶ್ರುತಿಸಮಷ್ಟಿಮುಷ್ಟಿನ್ಧ್ಯಃ
ಕಥಾಹವಮಸೌ ಗತಾನ್ ಕಪಟಸೌಗತಾನ್ ಖಣ್ಡಯನ್ .
ಮುನಿರ್ಮನಸಿ ಲಕ್ಷ್ಮಣೋ ಮುದಮ್ದಞ್ಚಯತ್ಯಞ್ಜಸಾ
ಮುಕುನ್ದ ಗುಣಮೌಕ್ತಿಕಪ್ರಕರಶುಕ್ತಿಭಿಃ ಸೂಕ್ತಿಭಿಃ .. ೩೭..

ಕಪರ್ದಿಮತಕರ್ದಮಂ ಕಪಿಲಕಲ್ಪನಾವಾಗುರಾಂ
ದುರತ್ಯಯಮತೀತ್ಯ ತದ್ದ್ರುಹಿಣತನ್ತ್ರಯನ್ತ್ರೋದರಮ್ .
ಕುದೃಷ್ಟಿ ಕುಹನಾಮುಖೇ ನಿಪತತಃ ಪರಬೃಹ್ಮಣಃ
ಕರಗ್ರಹವಿಚಕ್ಷಣೋ ಜಯತಿ ಲಕ್ಷ್ಮಣೋಽಯಂ ಮುನಿಃ .. ೩೮..

ಕಣಾದಪರಿಪಾಟಿಭಿಃ ಕಪಿಲಕಲ್ಪನಾನಾಟಕೈಃ
ಕುಮಾರಿಲಕುಭಾಷಿತೈರ್ಗುರುನಿಬನ್ಧನಗ್ರನ್ಥಿಭಿಃ .
ತಥಾಗತಕಥಾಶತೈಸ್ತದನುಸಾರಿ ಜಲ್ಪೈರಪಿ
ಪ್ರತಾರಿತಮಿದಂ ಜಗತ್ ಪ್ರಗುಣಿತಂ ಯತೀನ್ದ್ರೋಕ್ತಿಭಿಃ .. ೩೯..

ಕಥಾಕಲಹಕೌತುಕಗ್ರಹಗ್ರೃಹೀತಕೌತಸ್ಕುತ-
ಪ್ರಥಾ ಜಲಧಿ ಸಂಪ್ಲವಗ್ರಸನಕುಮ್ಭಸಮ್ಭೂತಯಃ .
ಜಯನ್ತಿ ಸುಧಿಯೋ ಯತಿಕ್ಷಿತಿಭೃದನ್ತಿಕೋಪಾಸನಾ-
ಪ್ರಭಾವಪರಿಪಕ್ತ್ರಿಮ ಪ್ರಮಿತಿ ಭಾರತೀ ಸಂಪದಃ .. ೪೦..

ಯತೀಶ್ವರಸರಸ್ವತೀ ಸುರಭಿತಾಶಯಾನಾಂ ಸತಾಂ
ವಹಾಮಿ ಚರಣಾಮ್ಬುಜಂ ಪ್ರಣತಿ ಶಾಲಿನಾ ಮೌಲಿನಾ .
ತದನ್ಯಮತದುರ್ಮದಜ್ವಲಿತಚೇತಸಾಂ ವಾದಿನಾಂ
ಶಿರಸ್ಸು ನಿಹಿತಂ ಮಯಾ ಪದಮದಕ್ಷಿಣಂ ಲಕ್ಷ್ಯತಾಮ್ .. ೪೧..

ಭಜಸ್ವ ಯತಿಭೂಪತೇರನಿದಮಾದಿದುರ್ವಾಸನಾ
ಕದಧ್ವ ಪರಿವರ್ತನಶ್ರಮನಿವರ್ತನೀಂ ವರ್ತನೀಮ್ .
ಲಭಸ್ಯ ಹೃದಯ ಸ್ವಯಂ ರಥಪದಾಯುಧಾನುಗ್ರಹ-
ದ್ರುತಪ್ರಹೃತಿ ನಿಸ್ತೃಟದ್ದುರಿತದುರ್ವೃತಿಂ ನಿರ್ವೃತಿಮ್ .. ೪೨..

ಕುಮತಿವಿಹಿತಗ್ರನ್ಥಗ್ರನ್ಥಿಪ್ರಭೂತಮತಾನ್ತರ-
ಗ್ರಹಿಲಮನಸಃ ಪಶ್ಯನ್ತ್ಯಲ್ಪಾಂ ಯತೀಶ್ವರಭಾರತೀಮ್ .
ವಿಕಟಮುರಭಿದ್ವಕ್ಷಃ ಪೀಠೀ ಪರಿಷ್ಕರಣೋಚಿತಃ
ಕುಲಗಿರಿತುಲಾರೋಹೇ ಭಾವೀ ಕಿಯಾನಿವ ಕೌಸ್ತುಭಃ .. ೪೩..

ಸ್ಥವಿರನಿಗಮಸ್ತೋಮಸ್ಥೇಯಾಂ ಯತೀಶ್ವರಭಾರತೀಂ
ಕುಮತಿಫಣಿತಿಕ್ಷೋಭಕ್ಷೀಬಾಃ ಕ್ಷಿಪನ್ತು ಭಜನ್ತು ವಾ .
ರಸಪರಿಮಲಶ್ಲಾಘಾ ಘೋಷಸ್ಫುಟತ್ಪುಟಭೇದನಂ
ಲವಣವಣಿಜಃ ಕರ್ಪೂರಾರ್ಘಂ ಕಿಮಿತ್ಯಭಿಮನ್ವತೇ .. ೪೪..

ವಹತಿ ಮಹಿಲಾಮಾಧ್ಯೋ ವೇಧಾಸ್ತ್ರಯೀ ಮುಖರೈರ್ಮುಖೈಃ
ವರತನುತಯಾ ವಾಮೋ ಭಾಗಃ ಶಿವಸ್ಯ ವಿವರ್ತತೇ .
ತದಪಿ ಪರಮಂ ತತ್ವಂ ಗೋಪೀಜನಸ್ಯ ವಶಂವದಂ
ಮದನಕದನೈರ್ನ ಕ್ಲಿಶ್ಯನ್ತೇ ಯತೀಶ್ವರಸಂಶ್ರಯಾಃ .. ೪೫..

ನಿಗಮಪಥಿಕಚ್ಛಾಯಾ ಶಾಖೀ ನಿರಾಶಮಹಾನಿಧಿಃ
ಮಹಿತವಿವಿಧಚ್ಛಾತ್ರಶ್ರೇಣೀ ಮನೋರಥಸಾರಥಿಃ .
ತ್ರಿಭುವನತಮಃಪ್ರತ್ಯೂಷೋಽಯಂ ತ್ರಿವಿದ್ಯಶಿಖಾಮಣಿಃ
ಪ್ರಥಯತಿ ಯತಿಕ್ಷ್ಮಾಭೃತ್ಪಾರಾವರೀಮವಿಪರ್ಯಯಾಮ್ .. ೪೬..

ಜಡಮತಿ ಮುಧಾ ದನ್ತಾದನ್ತಿವ್ಯಥೌಷಧಸಿಧ್ದಯಃ
ಪ್ರಮಿತಿನಿಧಯಃ ಪ್ರಜ್ಞಾಶಾಲಿ ಪ್ರಪಾಲನಯಷ್ಟಯಃ .
ಶ್ರುತಿಸುರಭಯಃ ಶುಧ್ದಾನನ್ದಾಭಿವರ್ಷುಕವಾರಿದಾಃ
ಯಮಗತಿ ಕಥಾ ವಿಚ್ಛೇದಿನ್ಯೋ ಯತೀಶ್ವರಸೂಕ್ತಯಃ .. ೪೭..

ಪ್ರತಿಕಲಮಿಹ ಪ್ರತ್ಯಕ್ತತ್ವಾವಲೋಕನದೀಪಿಕಾಃ
ಯತಿಪರಿಬೃಢಗ್ರನ್ಥಾಶ್ಚಿನ್ತಾಂ ನಿರನ್ತರಯನ್ತಿ ನಃ .
ಅಕಲುಷಪರಜ್ಞಾನೌತ್ಸುಕ್ಯಕ್ಷುಧಾತುರದುರ್ದಶಾ-
ಪರಿಣತ ಫಲ ಪ್ರತ್ಯಾಸೀದತ್ ಫಲೇಗ್ರಹಿ ಸುಗ್ರಹಾಃ .. ೪೮..

ಮುಕುನ್ದಾಙ್ಘ್ರಿಶ್ರಧ್ದಾ ಕುಮುದವನಚನ್ದ್ರಾತಪನಿಭಾಃ
ಮುಮುಕ್ಷಾಮಾಕ್ಷೋಭ್ಯಾಂ ದದತಿ ಮುನಿಬೃನ್ದಾರಕಗಿರಃ .
ಸ್ವಸಿಧ್ದಾನ್ತಧ್ವಾನ್ತಸ್ಥಿರಕುತುಕದುರ್ವಾದಿಪರಿಷದ್-
ದಿವಾಭೀತಪ್ರೇಕ್ಷಾ ದಿನಕರಸಮುತ್ಥಾನಪರುಷಾಃ .. ೪೯..

ನಿರಾಬಾಧಾ ಬೋಧಾಯನಭಣಿತಿ ನಿಷ್ಯನ್ದಸುಭಗಾಃ
ವಿಶುದ್ಧೋಪನ್ಯಾಸವ್ಯತಿಭಿದುರಶಾರೀರಕನಯಾಃ .
ಅಕುಣ್ಠೈಃ ಕಲ್ಪನ್ತೇ ಯತಿಪತಿನಿಬನ್ಧಾ ನಿಜಮುಖೈಃ
ಅನಿದ್ರಾಣಪ್ರಜ್ಞಾರಸಧಮನಿ ವೇಧಾಯ ಸುಧಿಯಾಮ್ .. ೫೦..

ವಿಕಲ್ಪಾಟೋಪೇನ ಶ್ರುತಿಪಥಮಶೇಷಂ ವಿಘಟಯನ್
ಯದೃಚ್ಛಾನಿರ್ದಿಷ್ಟೇ ಯತಿ ನೃಪತಿ ಶಬ್ದೇ ವಿರಮತಿ .
ವಿತಣ್ಡಾಹಂಕುರ್ವತ್ಪ್ರತಿಕಥಕವೇತಣ್ಡಪೃತನಾ-
ವಿಯಾತವ್ಯಾಪಾರವ್ಯತಿಮಥನಸಂರಮ್ಭಕಲಹಃ .. ೫೧..

ಪ್ರತಿಷ್ಠಾ ತರ್ಕಾಣಾಂ ಪ್ರತಿಪದಮೃಚಾಂ ಧಾಮ ಯಜುಷಾಂ
ಪರಿಷ್ಕಾರಃ ಸಾಮ್ನಾಂ ಪರಿಪಣಮಥರ್ವಾಙ್ಗಿರಸಯೋಃ .
ಪ್ರದೀಪಸ್ತತ್ವಾನಾಂ ಪ್ರತಿಕೃತಿರಸೌ ತಾಪಸಗಿರಾಂ
ಪ್ರಸತ್ತಿಮ್ ಸಂವಿತ್ತೇಃ ಪ್ರದಿಶತಿ ಯತೀಶಾನಫಣಿತಿಃ .. ೫೨..

ಹತಾವಧ್ಯೇ ಹೃಧ್ಯೇ ಹರಿಚರಣಪಙ್ಕೇರುಹಯುಗೇ
ನಿಬಧ್ನನ್ತ್ಯೈಕಾನ್ತ್ಯಂ ಕಿಮಪಿ ಯತಿ ಭೂಭೃತ್ಫಣಿತಯಃ .
ಶುನಾಸೀರಸ್ಕನ್ಧದ್ರುಹಿಣಹರಹೇರಮ್ಬಹುತಭುಕ್-
ಪ್ರಭೇಶಾದಿ ಕ್ಷುದ್ರಪ್ರಣತಿ ಪರಿಹಾರಪ್ರತಿಭುವಃ .. ೫೩..

ಯಥಾಭೂತ ಸ್ವಾರ್ಥಾ ಯತಿ ನೃಪತಿಸೂಕ್ತಿರ್ವಿಜಯತೇ
ಸುಧಾ ಸಂದೋಹಾಬ್ಧಿಃ ಸುಚರಿತವಿಪಕ್ತಿಃ ಶ್ರುತಿಮತಾಮ್ .
ಕಥಾ ದೃಪ್ಯತ್ಕೌತಸ್ಕುತಕಲಹಕೋಲಾಹಲಹತ-
ತ್ರಿವೇದೀ ನಿರ್ವೇದಪ್ರಶಮನವಿನೋದಪ್ರಣಯೀನೀ .. ೫೪..

ಶ್ರುತಿಶ್ರೇಣೀಚೂಡಾಪದಬಹುಮತೇ ಲಕ್ಷ್ಮಣಮತೇ
ಸ್ವಪಕ್ಷಸ್ಥಾನ್ ದೋಷಾನ್ ವಿತಥಮತಿರಾರೋಪಯತಿ ಯಃ .
ಸ್ವಹಸ್ತೇನೋತ್ಕ್ಷಿಪ್ತೈಃ ಸ ಖಲು ನಿಜಗಾತ್ರೇಷು ಬಹುಲಂ
ಗಲದ್ಭಿರ್ಜಮ್ಬಾಲೈರ್ಗಗನತಲಮಾಲಿಮ್ಪತಿ ಜಡಃ .. ೫೫..

ನಿರಾಲೋಕೇ ಲೋಕೇ ನಿರುಪಧಿ ಪರಸ್ನೇಹಭರಿತೋ
ಯತಿ ಕ್ಷ್ಮಾಭೃದ್ದೀಪೋ ಯದಿ ನ ಕಿಲ ಜಾಜ್ವಲ್ಯತ ಇಹ .
ಅಹಂಕಾರಧ್ವಾನ್ತಂ ವಿಜಹತಿ ಕಥಂಕಾರಮನಘಾಃ
ಕುತರ್ಕ ವ್ಯಾಲೌಘಂ ಕುಮತಿ ಮತಪಾತಾಳಕುಹರಮ್ .. ೫೬..

ಯತಿ ಕ್ಷಮಾಭೃದ್ಧೃಷ್ಟಂ ಮತಮಿಹ ನವೀನಂ ತದಪಿ ಕಿಂ
ತತಃ ಪ್ರಾಗೇವಾನ್ಯದ್ವದ ತದಪಿ ಕಿಂ ವರ್ಣನಿಕಷೇ .
ನಿಶಾಮ್ಯನ್ತಾಂ ಯದ್ವಾ ನಿಜಮತಿತಿರಸ್ಕಾರವಿಗಮಾತ್
ನಿರಾತಙ್ಕಾಷ್ಟಙ್ಕದ್ರಮಿಡಗುಹದೇವ ಪ್ರಭೃತಯಃ .. ೫೭..

ಸುಧಾಸಾರಂ ಶ್ರೀಮಧ್ಯತಿವರ ಭುವಃ ಶ್ರೋತ್ರಕುಹರೇ
ನಿಷಿಞ್ಚನ್ತಿ ನ್ಯಞ್ಚನ್ನಿಗಮಗರಿಮಾಣಃ ಫಣಿತಯಃ .
ಯದಾಸ್ವಾದಾಭ್ಯಾಸಪ್ರಚಯಮಹಿಮೋಲ್ಲಾಸಿತಧಿಯಾಂ
ಸದಾಸ್ವಾಧ್ಯಂ ಕಾಲೇ ತದಮೃತಮನನ್ತಂ ಸುಮನಸಾಮ್ .. ೫೮..

ಯತಿ ಕ್ಷೋಣೀಭರ್ತುರ್ಯದಿದಮನಿದಂ ಭೋಗಜನತಾ-
ಶಿರಃ ಶ್ರೇಣೀಜುಷ್ಟಂ ತದಿಹ ದೃಢಬನ್ಧಂ ಪ್ರಭವತಿ .
ಅವಿದ್ಯಾರಣ್ಯಾನೀ ಕುಹರವಿಹರನ್ಮಾಮಕಮನಃ-
ಪ್ರಮಾದ್ಯನ್ಮಾತಙ್ಗಪ್ರಥಮನಿಗಲಂ ಪಾದಯುಗಲಮ್ .. ೫೯..

ಸವಿತ್ರೀ ಮುಕ್ತಾನಾಂ ಸಕಲಜಗದೇನಃ ಪ್ರಶಮನೀ
ಗರೀಯೋಭಿಸ್ತೀರ್ತ್ಥೈರುಪಚಿತರಸಾ ಯಾಮುನಮುಖೈಃ .
ನಿರುಚ್ಛೇದಾ ನಿಮ್ನೇತರಮಪಿ ಸಮಾಪ್ಲಾವಯತಿ ಮಾಂ
ಯದೃಚ್ಛಾ ವಿಖ಼್ಶೇಪಾದ್ ಯತಿಪತಿದಯಾ ದಿವ್ಯತಟಿನೀ .. ೬೦..

ಚಿನ್ತಾಶೇಷದುರರ್ಥದನ್ತುರವಚಃ ಕನ್ಥಾ ಶತಗ್ರನ್ಥಿಲಾಃ
ಸಿಧ್ದಾನ್ತಾ ನ ಸಮಿನ್ಧತೇ ಯತಿವರಗ್ರನ್ಥಾನುಸಂಧಾಯಿನಿ .
ಮುಕ್ತಾ ಶುಕ್ತಿವಿಶುಧ್ದಸಿಧ್ದತಟಿನೀ ಚೂಡಾಲಚೂಡಾಪದಃ
ಕಿಂ ಕುಲ್ಯಾಂ ಕಲಯೇತ ಖಣ್ಡಪರಶುರ್ಮಣ್ಡೂಕಮಞ್ಜೂಷಿಕಾಮ್ .. ೬೧..

ವನ್ದೇ ತಂ ಯಮಿನಾಂ ಧುರನ್ಧರಮಹಂ ಮಾನಾನ್ಧಕಾರದ್ರುಹಾ
ಪನ್ಥಾನಂ ಪರಿಪನ್ಥಿನಾಂ ನಿಜದೃಶಾ ರುನ್ಧಾನಮಿನ್ಧಾನಯಾ .
ದತ್ತಂ ಯೇನ ದಯಾ ಸುಧಾಮ್ಬುನಿಧಿನಾ ಪೀತ್ವಾ ವಿಶುಧ್ದಂ ಪಯಃ
ಕಾಲೇ ನಃ ಕರಿಶೈಲಕೃಷ್ಣಜಲದಃ ಕಾಙ್ಕ್ಷಾಧಿಕಂ ವರ್ಷತಿ .. ೬೨..

ಕಾಷಾಯೇಣ ಗೃಹೀತಪೀತವಸನಾದಣ್ಡೈಸ್ತ್ರಭಿರ್ಮಣ್ಡಿತಾ
ಸಾ ಮೂರ್ತಿರ್ಮುರಮರ್ದನಸ್ಯ ಜಯತಿ ತ್ರಯ್ಯನ್ತಸಂರಕ್ಷಿಣೀ .
ಯತ್ ಪ್ರಖ್ಯಾಪಿತತೀರ್ಥವರ್ಧಿತಧಿಯಾಮಭ್ಯಸ್ಯತಾಂ ಯದ್ಗುಣಾನ್
ಆಸಿನ್ಧೋರನಿದಂ ಪ್ರದೇಶನಿಯತಾ ಕೀರ್ತಿಃ ಪ್ರಜಾಗರ್ತಿ ನಃ .. ೬೩..

ಲಿಪ್ಸೇ ಲಕ್ಷ್ಮಣಯೋಗಿನಃ ಪದಯುಗಂ ರಥ್ಯಾ ಪರಾಗಚ್ಛಟಾ
ರಕ್ಷಾರೋಪಣಧನ್ಯಸೂರಿಪರಿಷತ್ಸೀಮನ್ತಸೀಮಾನ್ತಿಕಮ್ .
ಭಿಕ್ಷಾ ಪರ್ಯಟನಕ್ಷಣೇಷು ಬಿಭರಾಂಚಕ್ರೇ ಗಳತ್ಕಿಲ್ಬಿಷಾ
ಯದ್ವಿನ್ಯಾಸಮಿಷೇಣ ಪತ್ರಮಕರೀಮುದ್ರಾಂ ಸಮುದ್ರಾಮ್ಬರಾ .. ೬೪..

ನಾನಾ ತನ್ತ್ರವಿಲೋಭಿತೇನ ಮನಸಾ ನಿರ್ಣೀತದುರ್ನೀತಿಭಿಃ
ಕಷ್ಟಂ ಕುತ್ಸಿತದೃಷ್ಟಿಭಿರ್ಯತಿಪತೇರಾದೇಶವೈದೇಶಿಕೈಃ .
ವ್ಯಾಸೋ ಹಾಸಪದೀ ಕೃತಃ ಪರಿಹೃತಃ ಪ್ರಾಚೇತಸಶ್ಚೇತಸಃ
ಕ್ಲುಪ್ತಃ ಕೇಲಿಶುಕಃ ಶುಕಃ ಸ ಚ ಮುಧಾ ಬಾಧಾಯ ಬೋಧಾಯನಃ .. ೬೫..

ಅರ್ಥ್ಯಾ ತಿಷ್ಠತಿ ಮಾಮಿಕಾ ಮತಿರಸಾವಾಜನ್ಮರಾಜನ್ವತೀ
ಪತ್ಯಾ ಸಂಯಮಿನಾಮನೇನ ಜಗತಾಮತ್ಯಾಹಿತಚ್ಛೇದಿನಾ .
ಯತ್ಸಾರಸ್ವತದುಗ್ಧಸಾಗರಸುಧಾ ಸಿದ್ಧೌಷಧಾಸ್ವಾದಿನಾಂ
ಪ್ರಸ್ವಾಪಾಯ ನ ಬೋಭವೀತಿ ಭಗವನ್ಮಾಯಾ ಮಹಾಯಾಮಿನೀ .. ೬೬..

ಶುಧ್ದಾದೇಶವಶಂದದೀಕೃತಯತಿಕ್ಷೋಣೀಶವಾಣೀಶತಾ-
ಪ್ರತ್ಯಾದಿಷ್ಟಬಹಿರ್ಗತಿಃ ಶ್ರುತಿಶಿರಃ ಪ್ರಸಾದಮಾಸೀದತಿ .
ದುಗ್ಧೋದನ್ವದಪತ್ಯಸನ್ನಿಧಿ ಸದಾ ಸಾಮೋದದಾಮೋದರ-
ಶ್ಲಕ್ಷ್ಣಾಲೋಕೇನ ದೌರ್ಲಲಿತ್ಯ ಲಲಿತೋನ್ಮೇಷಾ ಮನೀಷಾ ಮಮ .. ೬೭..

ಆಸ್ತಾಂ ನಾಮ ಯತೀನ್ದ್ರಪಧ್ದತಿ ಜುಷಾಮಾಜಾನಶುಧ್ದಾ ಮತಿಃ
ತಚ್ಚಾ ವ್ಯಾಜವಿದಗ್ಧಮುಗ್ಧಮಧುರಂ ಸಾರಸ್ವತಂ ಶಾಶ್ವತಮ್ .
ಕೋ ವಾ ಚಕ್ಷುರುದಞ್ಚಯೇದಪಿ ಪುರಃ ಸಾಟೋಪತರ್ಕಚ್ಛಟಾ
ಶಸ್ತ್ರಾಶಸ್ತ್ರಿವಿಹಾರಸಂಭೃತರಣಾಸ್ವಾಸ್ದೇಷು ವಾದೇಷು ನಃ .. ೬೮..

ಪರ್ಯಾಪ್ತಂ ಪರ್ಯಚೈಷಂ ಕಣಚರಣಕಥಾಮಾಕ್ಷಪಾದಂ ಶಿಶಿಕ್ಷೇ
ಮೀಮಾಂಸಾ ಮಾಂಸಲಾತ್ಮಾ ಸಮಜನಿಷಿ ಮುಹುಃ ಸಾಂಖ್ಯಯೋಗೌ ಸಮಾಖ್ಯಮ್ .
ಇತ್ಥಂ ತೈಸ್ತೈರ್ಯತೀನ್ದ್ರತ್ರುಟಿತಬಹುಮೃಷಾ ತನ್ತ್ರಕಾನ್ತಾರಪಾನ್ಥೈಃ
ಅನ್ತರ್ಮೋಹಕ್ಷಪಾನ್ಧೈರಹಹ ಕಿಮಿಹ ನಶ್ಚಿನ್ತನೀಯಂ ತನೀಯಃ .. ೬೯..

ಗಾಥಾ ತಾಥಾಗತಾನಾಂ ಗಲತಿ ಗಮನಿಕಾ ಕಾಪಿಲೀ ಕ್ವಾಽಪಿ ಲೀನಾ
ಕ್ಷೀಣಾ ಕಾಣಾದವಾಣೀ ದ್ರುಹಿಣಹರಗಿರಃ ಸೌರಭಂ ನಾರಭನ್ತೇ .
ಕ್ಷಾಮಾ ಕೌಮಾರಿಲೋಕ್ತಿರ್ಜಗತಿ ಗುರುಮತಂ ಗೌರವಾತ್ ದೂರವಾನ್ತಂ
ಕಾ ಶಙ್ಕಾ ಶಙ್ಕರಾದೇರ್ಭಜತಿ ಯತಿಪತೌ ಭದ್ರವೇದೀಂ ತ್ರಿವೇದೀಮ್ .. ೭೦..

ವಿಷ್ವಗ್ವ್ಯಾಪಿನ್ಯಗಾಧೇ ಯತಿನೃಪತಿ ಯಶಃ ಸಂಪದೇಕಾರ್ಣವೇಽಸ್ಮಿನ್
ಶ್ರಧ್ದಾ ಶುಧ್ದಾವಗಾಹೈಃ ಶುಭಮತಿಭಿರಸೌ ವೇಙ್ಕಟೇಶೋಽಭಿಷಿಕ್ತಃ .
ಪ್ರಜ್ಞಾದೌರ್ಜನ್ಯಗರ್ಜತ್ಪ್ರತಿಕಥಕವಚಸ್ತೂಲವಾತೂಲವೃತ್ಯಾ
ಸಪ್ತತ್ಯಾ ಸಾರವತ್ಯಾ ಸಮತನುತ ಸತಾಂ ಪ್ರೀತಿಮೇತಾಂ ಸಮೇತಾಮ್ .. ೭೧..

ಆಶಾಮತಙ್ಗಜಗಣಾನವಿಷಹ್ಯ ವೇಗಾನ್
ಪಾದೇ ಯತಿಕ್ಷಿತಿಭೃತಃ ಪ್ರಸಭಂ ನಿರುನ್ಧನ್ .
ಕಾರ್ಯಃ ಕಥಾಹವ ಕುತೂಹಲಿಭಿಃ ಪರೇಷಾಂ
ಕರ್ಣೇ ಸ ಏಷ ಕವಿತಾರ್ಕಿಕ್ ಸಿಂಹನಾದಃ .. ೭೨..

ಉಪಶಮಿತಕುದೃಷ್ಟಿವಿಪ್ಲವಾನಾಮ್
ಉಪನಿಷದಾಮುಪಚಾರದೀಪಿಕೇಯಮ್ .
ಕಬಲಿತಭಗವದ್ವಿಭೂತಿಯುಗ್ಮಾಂ
ದಿಷತು ಮತಿಂ ಯತಿರಾಜಸಪ್ತತಿರ್ನಃ .. ೭೩..

ಕರತಲಾಮಲಕೀಕೃತಸತ್ಪಥಾಃ
ಶ್ರುತಿವತಂಸಿತಸೂನೃತಸೂಕ್ತಯಃ .
ದಿವಸತಾರಕಯನ್ತಿ ಸಮತ್ಸರಾನ್
ಯತಿಪುರನ್ದರಸಪ್ತತಿಸಾದರಾಃ .. ೭೪..

ಕವಿತಾರ್ಕಿಕ ಸಿಂಹಾಯ ಕಲ್ಯಾಣಗುಣಶಾಲಿನೇ .