યતિરાજ સપ્તતિઃ

.. યતિરાજ સપ્તતિઃ ..

શ્રીમાન્ વેઙ્કટનાથાર્યઃ કવિતાર્કિકકેસરી .
વેદાન્તાચાર્ય વર્યોમે સન્નિધત્તાં સદા હૃદિ ..

કમપ્યાધ્યં ગુરું વન્દે કમલાગૃહમેધિનમ્ .
પ્રવક્તા છન્દસાં વક્તા પઞ્ચરાત્રસ્ય યઃ સ્વયમ્ .. ૧..

સહધર્મચરીં શૌરેઃ સંમન્ત્રિતજગધ્દિતામ્ .
અનુગ્રહમયીં વન્દે નિત્યમજ્ઞાતનિગ્રહામ્ .. ૨..

વન્દે વૈકુણ્ઠસેનાન્યં દેવં સૂત્રવતીસખમ્ .
યદ્વેત્રશિખરસ્પન્દે વિશ્વમેતદ્ વ્યવસ્થિતમ્ .. ૩..

યસ્ય સારસ્વતસ્રોતો વકુલામોદવાસિતમ્ .
શ્રુતીનાં વિશ્રમાયાલં શઠારિં તમુપાસ્મહે .. ૪..

નાથેન મુનિના તેન ભવેયં નાથવાહનમ્ .
યસ્ય નૈગમિકં તત્વં હસ્તામલકતાં ગતમ્ .. ૫..

નમસ્યામ્યરવિન્દાક્ષં નાથભાવે વ્યવસ્થિતમ્ .
શુધ્દસત્વમયં શૌરેરવતારમિવાપરમ્ .. ૬..

અનુજ્ઝિતક્ષમાયોગમપુણ્યજનબાધકમ્ .
અસ્પૃષ્ટમદિરાગં તં રામં તુર્યમુપાસ્મહે .. ૭..

વિગાહે યામુનં તીર્થં સાધુ બૃન્દાવને સ્થિતમ્ .
નિરસ્તજિહ્મગસ્પર્શે યત્ર કૃષ્ણઃ કૃતાદરઃ .. ૮..

દયા નિઘ્નં યતીન્દ્રસ્ય દેશિકં પૂર્ણમાશ્રયે.
યેન વિશ્વસૃજો વિષ્ણોરપૂર્યત મનોરથઃ .. ૯..

પ્રણામં લક્ષ્મણમુનિઃ પ્રતિગૃહ્ણાતુ મામકમ્ .
પ્રસાધયતિ યત્સૂક્તિઃ સ્વાધીન પતિકાં શ્રુતિમ્ .. ૧૦..

ઉપવીતિનમૂર્ધ્વપુણ્ડ્રવન્તં
ત્રિજગત્પુણ્યફલં ત્રિદણ્ડહસ્તમ્ .
શરણાગતસાર્થવાહમીડે
શિખયા શેખરિણં પતિં યતીનામ્ .. ૧૧..

પ્રથયન્ વિમતેષુ તીક્ષ્ણભાવં
પ્રભુરસ્મત્પરિરક્ષણે યતીન્દ્રઃ .
અપૃથક્પ્રતિપન્ન યન્મયત્વૈઃ
વવૃધે પઞ્ચભિરાયુધૈર્મુરારેઃ .. ૧૨..

શમિતોદયશઙ્કરાદિગર્વઃ
સ્વબલાદુધ્દૃતયાદવપ્રકાશઃ .
અવરોપિતવાન્ શ્રુતેરપાર્થાન્
નનુ રામાવરજઃ સ એષ ભૂયઃ .. ૧૩.. var એવ
અબહુશ્રુતસંભવં શ્રુતીનાં
જરતીનામયથાયથ પ્રચારમ્ .
વિનિવર્તયિતું યતીશ્વરોક્તિઃ
વિદધે તાઃ સ્થિરનીતિપઞ્જરસ્થાઃ .. ૧૪..

અમુના તપનાતિશાયિ ભૂમ્ના
યતિરાજેન નિબધ્દનાયકશ્રીઃ .
મહતી ગુરુપઙ્ક્તિહારયષ્ટિઃ
વિબુધાનાં હૃદયઙ્ગમા વિભાતિ .. ૧૫..

અલૂનપક્ષસ્ય યતિ ક્ષમાભૃતો
વિભાતિ વંશે હરિતત્વમક્ષતમ્ .
યદુદ્ભવાઃ શુધ્દસુવૃત્તશીતલાઃ
ભવન્તિ મુક્તાવલિભૂષણં ભુવઃ .. ૧૬..

અનપાય વિષ્ણુપદસંશ્રયં ભજે
કલયા કયાઽપિ કલયાઽપ્યનુજ્ઝિતમ્ .
અકલઙ્કયોગમજડાશયોદયં
યતિરાજચન્દ્રમુપરાગ દૂરગમ્ .. ૧૭..

અભિગમ્ય સમ્યગનઘાઃ સુમેધસો
યતિ ચક્રવર્તિપદપદ્મપત્તનમ્ .
હરિભક્તદાસ્યરસિકાઃ પરસ્પરં
ક્રયૈક્રયાર્હદશયા સમિન્ધતે .. ૧૮..

પરુષાતિવાદપરિવાદપૈશુન-
પ્રભૃતિ પ્રભૂતપતનીયપઙ્કિલા .
સ્વદતે મમાધ્ય સુભગા સરસ્વતી
યતિરાજકીર્ત્તિકતકૈર્વિશોધિતા .. ૧૯..

અનુકલ્પભૂતમુરભિત્પદં સતાં
અજહત્ત્રિવર્ગમપવર્ગવૈભવમ્ .
ચલચિત્તવૃત્તિવિનિવર્ત્તનૌષધં
શરણં યતીન્દ્રચરણં વૃણીમહે .. ૨૦..

શ્વસિતાવધૂતપરવાતિવૈભવાઃ
નિગમાન્તનીતિજલધેસ્તલસ્પૃશઃ .
પ્રતિપાદયન્તિ ગતિમાપવર્ગિકીં
યતિસાર્વભૌમપદસાત્કૃતાશયાઃ .. ૨૧..

મૂલે નિવિશ્ય મહતાં નિગમદ્રુમાણાં
મુષ્ણન્ પ્રતારકભયં ધૃતનૈકદણ્ડઃ .
રઙ્ગેશ ભક્તજનમાનસરાજહંસો
રામાનુજઃ શરણમસ્તુ મુનિઃ સ્વયં નઃ .. ૨૨..

સન્મન્ત્રવિત્ ક્ષિપતિ સંયમિનાં નરેન્દ્રઃ
સંસારજિહ્મગમુખૈઃ સમુપસ્થિતં નઃ .
વિષ્વક્તતં વિષયલોભવિષં નિજાભિઃ
ગાઢાનુભાવગરુડધ્વજભાવનાભિઃ .. ૨૩..

નાથઃ સ એષ યમિનાં નખરશ્મિજાલૈઃ
અન્ત નિલીનમપનીય તમો મદીયમ્ .
વિજ્ઞાનચિત્રમનઘં લિખતીવ ચિત્તે
વ્યાખ્યાનકેલિરસિકેન કરામ્બુજેન .. ૨૪..

ઉદ્ગૃહ્ણતીમુપનિષત્સુ નિગૂઢમર્થં
ચિત્તે નિવેશયિતુમલ્પધિયાં સ્વયં નઃ .
પશ્યેમ લખ઼્શ્મણ્ મુનેઃ પ્રતિપન્નહસ્તાં
ઉન્નિદ્રપદ્મસુભગામુપદેશમુદ્રામ્ .. ૨૫..

આકર્ષણાનિ નિગમાન્તસરસ્વતીનાં
ઉચ્ચાટનાનિ બહિરન્તરુપપ્લવાનામ્ .
પથ્યાનિ ઘોરભવસંજ્વરપીડિતાનાં
હૃધ્યાનિ ભાન્તિ યતિરાજમુનેર્વચાંસિ .. ૨૬..

શીતસ્વભાવસુભગાનુભવઃ શિખાવાન્
દોષાવમર્દનિયતોન્નતિરોષધીશઃ .
તાપાનુબન્ધશમનસ્તપનઃ પ્રજાનાં
રામાનુજો જયતિ સંવલિતત્રિધામા .. ૨૭..

જયતિ સકલવિદ્યાવાહિની જન્મશૈલો
જનિપથપરિવૃત્તિશ્રાન્તવિશ્રાન્તિશાખી .
નિખિલકુમતિ માયા શર્વરી બાલસૂર્યો
નિગમજલધિવેલા પૂર્ણચન્દ્રો યતીન્દ્રઃ .. ૨૮..

મુનિબહુમતસારા મુક્તિનિશ્રેણિકેયં
સહૃદયહૃદયાનાં શાશ્વતી દિષ્ટસિધ્દિઃ .
શમિતદુરિતગન્ધા સંયમીન્દ્રસ્ય સૂક્તિઃ
પરિચિતગહના નઃ પ્રસ્નુવીત પ્રસાદમ્ .. ૨૯..

ભવમરુપરિખિન્નસ્ફીતપાનીયસિન્ધુઃ
દુરિતરહિતજિહ્વા દુગ્ધકુલ્યા સકુલ્યા .
શ્રુતિનયનસનાભિઃ શોભતે લક્ષ્મણોક્તિઃ
નરકમથનસેવાસ્વાદનાડિંધમા નઃ .. ૩૦..

હરિપદમકરન્દસ્યન્દિનઃ સંશ્રિતાનાં
અનુગતબહુશાખાસ્તાપમુન્મૂલયન્તિ ..

શમિતદુરિતગન્ધાઃ સંયમીન્દ્રપ્રબન્ધાઃ
કથકજનમનીષા કલ્પના કલ્પવૃક્ષાઃ .. ૩૧..

નાનાભૂતૈર્જગતિ સમયૈર્નર્મલીલાં વિધિત્સોઃ
અન્ત્યં વર્ણં પ્રથયતિ વિભોરાદિમવ્યૂહભેદે .
વિશ્વં ત્રાતું વિષયનિયતં વ્યઞ્જિતાનુગ્રહઃ સન્
વિષ્વક્સેનો યતિપતિરભૂદ્વેત્રસારસ્ત્રિદણ્ડઃ .. ૩૨..

લક્ષ્યં બુધ્દે રસિકરસનાલાસ્યલીલાનિદાનં
શુધ્દાસ્વાદં કિમપિ જગતિ શ્રોત્રદિવ્યૌષધં નઃ .
લક્ષ્યાલક્ષ્યૈઃ સિતજલધિવદ્ભાતિ તાત્પર્યરત્નૈઃ
લક્ષ્મીકાન્ત સ્ફટિકમુકુરો લક્ષ્મણાર્યોપદેશઃ .. ૩૩..

સ્થિતિમવધીરયન્ત્યતિમનોરથસિધ્દિમતીં
યતિપતિસંપ્રદાયનિરપાયધનોપચિતાઃ .
મધુકરમૌલિદઘ્નમદદન્તુરદન્તિઘટા-
કરટકટાહવાહિ ઘનશીકરશીભરિતામ્ .. ૩૪..

નિરુપધિ રઙ્ગવૃત્તિ રસિકાનભિતાણ્ડવયન્
નિગમવિમર્શકેલિરસિકૈર્નિભૃતૈર્વિધૃતઃ .
ગુણપરિણદ્ધસૂક્તિ દૃઢકોણવિઘટ્ટનયા
રટતિ દિશા મુખેષુ યતિરાજયશઃ પટહઃ .. ૩૫..

ઇદં પ્રથમસંભવત્કુમતિ જાલકૂલઙ્ગષાઃ
મૃષા મતવિષાનલજ્વલિતજીવજીવાતવઃ .
ક્ષરન્ત્યમૃતમક્ષરં યતિ પુરન્દરસ્યોક્તયઃ
ચિરન્તનસરસ્વતિ ચિકુરબન્ધસૈરન્ધ્રિકાઃ .. ૩૬..

સુધાશનસુદુર્ગ્રહ શ્રુતિસમષ્ટિમુષ્ટિન્ધ્યઃ
કથાહવમસૌ ગતાન્ કપટસૌગતાન્ ખણ્ડયન્ .
મુનિર્મનસિ લક્ષ્મણો મુદમ્દઞ્ચયત્યઞ્જસા
મુકુન્દ ગુણમૌક્તિકપ્રકરશુક્તિભિઃ સૂક્તિભિઃ .. ૩૭..

કપર્દિમતકર્દમં કપિલકલ્પનાવાગુરાં
દુરત્યયમતીત્ય તદ્દ્રુહિણતન્ત્રયન્ત્રોદરમ્ .
કુદૃષ્ટિ કુહનામુખે નિપતતઃ પરબૃહ્મણઃ
કરગ્રહવિચક્ષણો જયતિ લક્ષ્મણોઽયં મુનિઃ .. ૩૮..

કણાદપરિપાટિભિઃ કપિલકલ્પનાનાટકૈઃ
કુમારિલકુભાષિતૈર્ગુરુનિબન્ધનગ્રન્થિભિઃ .
તથાગતકથાશતૈસ્તદનુસારિ જલ્પૈરપિ
પ્રતારિતમિદં જગત્ પ્રગુણિતં યતીન્દ્રોક્તિભિઃ .. ૩૯..

કથાકલહકૌતુકગ્રહગ્રૃહીતકૌતસ્કુત-
પ્રથા જલધિ સંપ્લવગ્રસનકુમ્ભસમ્ભૂતયઃ .
જયન્તિ સુધિયો યતિક્ષિતિભૃદન્તિકોપાસના-
પ્રભાવપરિપક્ત્રિમ પ્રમિતિ ભારતી સંપદઃ .. ૪૦..

યતીશ્વરસરસ્વતી સુરભિતાશયાનાં સતાં
વહામિ ચરણામ્બુજં પ્રણતિ શાલિના મૌલિના .
તદન્યમતદુર્મદજ્વલિતચેતસાં વાદિનાં
શિરસ્સુ નિહિતં મયા પદમદક્ષિણં લક્ષ્યતામ્ .. ૪૧..

ભજસ્વ યતિભૂપતેરનિદમાદિદુર્વાસના
કદધ્વ પરિવર્તનશ્રમનિવર્તનીં વર્તનીમ્ .
લભસ્ય હૃદય સ્વયં રથપદાયુધાનુગ્રહ-
દ્રુતપ્રહૃતિ નિસ્તૃટદ્દુરિતદુર્વૃતિં નિર્વૃતિમ્ .. ૪૨..

કુમતિવિહિતગ્રન્થગ્રન્થિપ્રભૂતમતાન્તર-
ગ્રહિલમનસઃ પશ્યન્ત્યલ્પાં યતીશ્વરભારતીમ્ .
વિકટમુરભિદ્વક્ષઃ પીઠી પરિષ્કરણોચિતઃ
કુલગિરિતુલારોહે ભાવી કિયાનિવ કૌસ્તુભઃ .. ૪૩..

સ્થવિરનિગમસ્તોમસ્થેયાં યતીશ્વરભારતીં
કુમતિફણિતિક્ષોભક્ષીબાઃ ક્ષિપન્તુ ભજન્તુ વા .
રસપરિમલશ્લાઘા ઘોષસ્ફુટત્પુટભેદનં
લવણવણિજઃ કર્પૂરાર્ઘં કિમિત્યભિમન્વતે .. ૪૪..

વહતિ મહિલામાધ્યો વેધાસ્ત્રયી મુખરૈર્મુખૈઃ
વરતનુતયા વામો ભાગઃ શિવસ્ય વિવર્તતે .
તદપિ પરમં તત્વં ગોપીજનસ્ય વશંવદં
મદનકદનૈર્ન ક્લિશ્યન્તે યતીશ્વરસંશ્રયાઃ .. ૪૫..

નિગમપથિકચ્છાયા શાખી નિરાશમહાનિધિઃ
મહિતવિવિધચ્છાત્રશ્રેણી મનોરથસારથિઃ .
ત્રિભુવનતમઃપ્રત્યૂષોઽયં ત્રિવિદ્યશિખામણિઃ
પ્રથયતિ યતિક્ષ્માભૃત્પારાવરીમવિપર્યયામ્ .. ૪૬..

જડમતિ મુધા દન્તાદન્તિવ્યથૌષધસિધ્દયઃ
પ્રમિતિનિધયઃ પ્રજ્ઞાશાલિ પ્રપાલનયષ્ટયઃ .
શ્રુતિસુરભયઃ શુધ્દાનન્દાભિવર્ષુકવારિદાઃ
યમગતિ કથા વિચ્છેદિન્યો યતીશ્વરસૂક્તયઃ .. ૪૭..

પ્રતિકલમિહ પ્રત્યક્તત્વાવલોકનદીપિકાઃ
યતિપરિબૃઢગ્રન્થાશ્ચિન્તાં નિરન્તરયન્તિ નઃ .
અકલુષપરજ્ઞાનૌત્સુક્યક્ષુધાતુરદુર્દશા-
પરિણત ફલ પ્રત્યાસીદત્ ફલેગ્રહિ સુગ્રહાઃ .. ૪૮..

મુકુન્દાઙ્ઘ્રિશ્રધ્દા કુમુદવનચન્દ્રાતપનિભાઃ
મુમુક્ષામાક્ષોભ્યાં દદતિ મુનિબૃન્દારકગિરઃ .
સ્વસિધ્દાન્તધ્વાન્તસ્થિરકુતુકદુર્વાદિપરિષદ્-
દિવાભીતપ્રેક્ષા દિનકરસમુત્થાનપરુષાઃ .. ૪૯..

નિરાબાધા બોધાયનભણિતિ નિષ્યન્દસુભગાઃ
વિશુદ્ધોપન્યાસવ્યતિભિદુરશારીરકનયાઃ .
અકુણ્ઠૈઃ કલ્પન્તે યતિપતિનિબન્ધા નિજમુખૈઃ
અનિદ્રાણપ્રજ્ઞારસધમનિ વેધાય સુધિયામ્ .. ૫૦..

વિકલ્પાટોપેન શ્રુતિપથમશેષં વિઘટયન્
યદૃચ્છાનિર્દિષ્ટે યતિ નૃપતિ શબ્દે વિરમતિ .
વિતણ્ડાહંકુર્વત્પ્રતિકથકવેતણ્ડપૃતના-
વિયાતવ્યાપારવ્યતિમથનસંરમ્ભકલહઃ .. ૫૧..

પ્રતિષ્ઠા તર્કાણાં પ્રતિપદમૃચાં ધામ યજુષાં
પરિષ્કારઃ સામ્નાં પરિપણમથર્વાઙ્ગિરસયોઃ .
પ્રદીપસ્તત્વાનાં પ્રતિકૃતિરસૌ તાપસગિરાં
પ્રસત્તિમ્ સંવિત્તેઃ પ્રદિશતિ યતીશાનફણિતિઃ .. ૫૨..

હતાવધ્યે હૃધ્યે હરિચરણપઙ્કેરુહયુગે
નિબધ્નન્ત્યૈકાન્ત્યં કિમપિ યતિ ભૂભૃત્ફણિતયઃ .
શુનાસીરસ્કન્ધદ્રુહિણહરહેરમ્બહુતભુક્-
પ્રભેશાદિ ક્ષુદ્રપ્રણતિ પરિહારપ્રતિભુવઃ .. ૫૩..

યથાભૂત સ્વાર્થા યતિ નૃપતિસૂક્તિર્વિજયતે
સુધા સંદોહાબ્ધિઃ સુચરિતવિપક્તિઃ શ્રુતિમતામ્ .
કથા દૃપ્યત્કૌતસ્કુતકલહકોલાહલહત-
ત્રિવેદી નિર્વેદપ્રશમનવિનોદપ્રણયીની .. ૫૪..

શ્રુતિશ્રેણીચૂડાપદબહુમતે લક્ષ્મણમતે
સ્વપક્ષસ્થાન્ દોષાન્ વિતથમતિરારોપયતિ યઃ .
સ્વહસ્તેનોત્ક્ષિપ્તૈઃ સ ખલુ નિજગાત્રેષુ બહુલં
ગલદ્ભિર્જમ્બાલૈર્ગગનતલમાલિમ્પતિ જડઃ .. ૫૫..

નિરાલોકે લોકે નિરુપધિ પરસ્નેહભરિતો
યતિ ક્ષ્માભૃદ્દીપો યદિ ન કિલ જાજ્વલ્યત ઇહ .
અહંકારધ્વાન્તં વિજહતિ કથંકારમનઘાઃ
કુતર્ક વ્યાલૌઘં કુમતિ મતપાતાળકુહરમ્ .. ૫૬..

યતિ ક્ષમાભૃદ્ધૃષ્ટં મતમિહ નવીનં તદપિ કિં
તતઃ પ્રાગેવાન્યદ્વદ તદપિ કિં વર્ણનિકષે .
નિશામ્યન્તાં યદ્વા નિજમતિતિરસ્કારવિગમાત્
નિરાતઙ્કાષ્ટઙ્કદ્રમિડગુહદેવ પ્રભૃતયઃ .. ૫૭..

સુધાસારં શ્રીમધ્યતિવર ભુવઃ શ્રોત્રકુહરે
નિષિઞ્ચન્તિ ન્યઞ્ચન્નિગમગરિમાણઃ ફણિતયઃ .
યદાસ્વાદાભ્યાસપ્રચયમહિમોલ્લાસિતધિયાં
સદાસ્વાધ્યં કાલે તદમૃતમનન્તં સુમનસામ્ .. ૫૮..

યતિ ક્ષોણીભર્તુર્યદિદમનિદં ભોગજનતા-
શિરઃ શ્રેણીજુષ્ટં તદિહ દૃઢબન્ધં પ્રભવતિ .
અવિદ્યારણ્યાની કુહરવિહરન્મામકમનઃ-
પ્રમાદ્યન્માતઙ્ગપ્રથમનિગલં પાદયુગલમ્ .. ૫૯..

સવિત્રી મુક્તાનાં સકલજગદેનઃ પ્રશમની
ગરીયોભિસ્તીર્ત્થૈરુપચિતરસા યામુનમુખૈઃ .
નિરુચ્છેદા નિમ્નેતરમપિ સમાપ્લાવયતિ માં
યદૃચ્છા વિખ઼્શેપાદ્ યતિપતિદયા દિવ્યતટિની .. ૬૦..

ચિન્તાશેષદુરર્થદન્તુરવચઃ કન્થા શતગ્રન્થિલાઃ
સિધ્દાન્તા ન સમિન્ધતે યતિવરગ્રન્થાનુસંધાયિનિ .
મુક્તા શુક્તિવિશુધ્દસિધ્દતટિની ચૂડાલચૂડાપદઃ
કિં કુલ્યાં કલયેત ખણ્ડપરશુર્મણ્ડૂકમઞ્જૂષિકામ્ .. ૬૧..

વન્દે તં યમિનાં ધુરન્ધરમહં માનાન્ધકારદ્રુહા
પન્થાનં પરિપન્થિનાં નિજદૃશા રુન્ધાનમિન્ધાનયા .
દત્તં યેન દયા સુધામ્બુનિધિના પીત્વા વિશુધ્દં પયઃ
કાલે નઃ કરિશૈલકૃષ્ણજલદઃ કાઙ્ક્ષાધિકં વર્ષતિ .. ૬૨..

કાષાયેણ ગૃહીતપીતવસનાદણ્ડૈસ્ત્રભિર્મણ્ડિતા
સા મૂર્તિર્મુરમર્દનસ્ય જયતિ ત્રય્યન્તસંરક્ષિણી .
યત્ પ્રખ્યાપિતતીર્થવર્ધિતધિયામભ્યસ્યતાં યદ્ગુણાન્
આસિન્ધોરનિદં પ્રદેશનિયતા કીર્તિઃ પ્રજાગર્તિ નઃ .. ૬૩..

લિપ્સે લક્ષ્મણયોગિનઃ પદયુગં રથ્યા પરાગચ્છટા
રક્ષારોપણધન્યસૂરિપરિષત્સીમન્તસીમાન્તિકમ્ .
ભિક્ષા પર્યટનક્ષણેષુ બિભરાંચક્રે ગળત્કિલ્બિષા
યદ્વિન્યાસમિષેણ પત્રમકરીમુદ્રાં સમુદ્રામ્બરા .. ૬૪..

નાના તન્ત્રવિલોભિતેન મનસા નિર્ણીતદુર્નીતિભિઃ
કષ્ટં કુત્સિતદૃષ્ટિભિર્યતિપતેરાદેશવૈદેશિકૈઃ .
વ્યાસો હાસપદી કૃતઃ પરિહૃતઃ પ્રાચેતસશ્ચેતસઃ
ક્લુપ્તઃ કેલિશુકઃ શુકઃ સ ચ મુધા બાધાય બોધાયનઃ .. ૬૫..

અર્થ્યા તિષ્ઠતિ મામિકા મતિરસાવાજન્મરાજન્વતી
પત્યા સંયમિનામનેન જગતામત્યાહિતચ્છેદિના .
યત્સારસ્વતદુગ્ધસાગરસુધા સિદ્ધૌષધાસ્વાદિનાં
પ્રસ્વાપાય ન બોભવીતિ ભગવન્માયા મહાયામિની .. ૬૬..

શુધ્દાદેશવશંદદીકૃતયતિક્ષોણીશવાણીશતા-
પ્રત્યાદિષ્ટબહિર્ગતિઃ શ્રુતિશિરઃ પ્રસાદમાસીદતિ .
દુગ્ધોદન્વદપત્યસન્નિધિ સદા સામોદદામોદર-
શ્લક્ષ્ણાલોકેન દૌર્લલિત્ય લલિતોન્મેષા મનીષા મમ .. ૬૭..

આસ્તાં નામ યતીન્દ્રપધ્દતિ જુષામાજાનશુધ્દા મતિઃ
તચ્ચા વ્યાજવિદગ્ધમુગ્ધમધુરં સારસ્વતં શાશ્વતમ્ .
કો વા ચક્ષુરુદઞ્ચયેદપિ પુરઃ સાટોપતર્કચ્છટા
શસ્ત્રાશસ્ત્રિવિહારસંભૃતરણાસ્વાસ્દેષુ વાદેષુ નઃ .. ૬૮..

પર્યાપ્તં પર્યચૈષં કણચરણકથામાક્ષપાદં શિશિક્ષે
મીમાંસા માંસલાત્મા સમજનિષિ મુહુઃ સાંખ્યયોગૌ સમાખ્યમ્ .
ઇત્થં તૈસ્તૈર્યતીન્દ્રત્રુટિતબહુમૃષા તન્ત્રકાન્તારપાન્થૈઃ
અન્તર્મોહક્ષપાન્ધૈરહહ કિમિહ નશ્ચિન્તનીયં તનીયઃ .. ૬૯..

ગાથા તાથાગતાનાં ગલતિ ગમનિકા કાપિલી ક્વાઽપિ લીના
ક્ષીણા કાણાદવાણી દ્રુહિણહરગિરઃ સૌરભં નારભન્તે .
ક્ષામા કૌમારિલોક્તિર્જગતિ ગુરુમતં ગૌરવાત્ દૂરવાન્તં
કા શઙ્કા શઙ્કરાદેર્ભજતિ યતિપતૌ ભદ્રવેદીં ત્રિવેદીમ્ .. ૭૦..

વિષ્વગ્વ્યાપિન્યગાધે યતિનૃપતિ યશઃ સંપદેકાર્ણવેઽસ્મિન્
શ્રધ્દા શુધ્દાવગાહૈઃ શુભમતિભિરસૌ વેઙ્કટેશોઽભિષિક્તઃ .
પ્રજ્ઞાદૌર્જન્યગર્જત્પ્રતિકથકવચસ્તૂલવાતૂલવૃત્યા
સપ્તત્યા સારવત્યા સમતનુત સતાં પ્રીતિમેતાં સમેતામ્ .. ૭૧..

આશામતઙ્ગજગણાનવિષહ્ય વેગાન્
પાદે યતિક્ષિતિભૃતઃ પ્રસભં નિરુન્ધન્ .
કાર્યઃ કથાહવ કુતૂહલિભિઃ પરેષાં
કર્ણે સ એષ કવિતાર્કિક્ સિંહનાદઃ .. ૭૨..

ઉપશમિતકુદૃષ્ટિવિપ્લવાનામ્
ઉપનિષદામુપચારદીપિકેયમ્ .
કબલિતભગવદ્વિભૂતિયુગ્માં
દિષતુ મતિં યતિરાજસપ્તતિર્નઃ .. ૭૩..

કરતલામલકીકૃતસત્પથાઃ
શ્રુતિવતંસિતસૂનૃતસૂક્તયઃ .
દિવસતારકયન્તિ સમત્સરાન્
યતિપુરન્દરસપ્તતિસાદરાઃ .. ૭૪..

કવિતાર્કિક સિંહાય કલ્યાણગુણશાલિને .