ವರದಗಣೇಶಕವಚಮ್

ಶ್ರೀರುದ್ರಯಾಮಲೇ ತನ್ತ್ರೇ ಶ್ರೀದೇವೀರಹಸ್ಯೇ ಮಹಾಗಣಪತಿಕವಚಮ್

ಶ್ರೀಭೈರವ ಉವಾಚ .
ಮಹಾದೇವಿ ಗಣೇಶಸ್ಯ ವರದಸ್ಯ ಮಹಾತ್ಮನಃ .
ಕವಚಂ ತೇ ಪ್ರವಕ್ಷ್ಯಾಮಿ ವಜ್ರಪಞ್ಜರಕಾಭಿಧಮ್ .. ೧..

🌸 ಧ್ಯಾನಮ್ . 🌸
ವಿಘ್ನೇಶಂ ವಿಶ್ವವನ್ದ್ಯಂ ಸುವಿಪುಲಯಶಸಂ ಲೋಕರಕ್ಷಾಪ್ರದಕ್ಷಂ
ಸಾಕ್ಷಾತ್ ಸರ್ವಾಪದಾಸು ಪ್ರಶಮನಸುಮತಿಂ ಪಾರ್ವತೀಪ್ರಾಣಸೂನುಮ್ .
ಪ್ರಾಯಃ ಸರ್ವಾಸುರೇನ್ದ್ರೈಃ ಸಸುರಮುನಿಗಣೈಃ ಸಾಧಕೈಃ ಪೂಜ್ಯಮಾನಂ
ಕಾರುಣ್ಯೇನಾನ್ತರಾಯಾಮಿತಭಯಶಮನಂ ವಿಘ್ನರಾಜಂ ನಮಾಮಿ .. ೨..

ಓಂ ಶ್ರೀಂ ಹ್ರೀಂ ಗಂ ಶಿರಃ ಪಾತು ಮಹಾಗಣಪತಿಃ ಪ್ರಭುಃ .
ವಿನಾಯಕೋ ಲಲಾಟಂ ಮೇ ವಿಘ್ನರಾಜೋ ಭ್ರುವೌ ಮಮ .. ೩..

ಪಾತು ನೇತ್ರೇ ಗಣಾಧ್ಯಕ್ಷೋ ನಾಸಿಕಾಂ ಮೇ ಗಜಾನನಃ .
ಶ್ರುತಿ ಮೇಽವತು ಹೇರಮ್ಬೋ ಗಣ್ಡೌ ಮೋದಕಾಶನಃ .. ೪..

ದ್ವೈಮಾತರೋ ಮುಖಂ ಪಾತು ಚಾಧರೌ ಪಾತ್ವರಿನ್ದಮ್ .
ದನ್ತಾನ್ ಮಮೈಕದನ್ತೋಽವ್ಯಾದ್ ವಕ್ರತುಣ್ಡೋಽವತಾದ್ ರಸಾಮ್ .. ೫..

ಗಾಙ್ಗೇಯೋ ಮೇ ಗಲಂ ಪಾತು ಸ್ಕನ್ಧೌ ಸಿಂಹಾಸನೋಽವತು .
ವಿಘ್ನಾನ್ತಕೋ ಭುಜೌ ಪಾತು ಹಸ್ತೌ ಮೂಷಕವಾಹನಃ .. ೬..

ಊರೂ ಮಮಾವತಾನ್ನಿತ್ಯಂ ದೇವಸ್ತ್ರಿಪುರಘಾತನಃ .
ಹೃದಯಂ ಮೇ ಕುಮಾರೋಽವ್ಯಾಞ್ಜಯನ್ತಃ ಪಾರ್ಶ್ವಯುಗ್ಮಕಮ್ .. ೭..

ಪ್ರದ್ಯುಮ್ನೋ ಮೇಽವತಾತ್ ಪೃಷ್ಠಂ ನಾಭಿಂ ಶಙ್ಕರನನ್ದನಃ .
ಕಟಿಂ ನನ್ದಿಗಣಃ ಪಾತು ಶಿಶ್ನಂ ವೀರೇಶ್ವರೋಽವತು .. ೮..

ಮೇಢ್ರೇ ಮೇಽವತು ಸೌಭಾಗ್ಯೋ ಭೃಙ್ಗಿರೀಟೀ ಚ ಗುಹ್ಯಕಮ್ .
ವಿರಾಟಕೋಽವತಾದೂರೂ ಜಾನೂ ಮೇ ಪುಷ್ಪದನ್ತಕಃ .. ೯..

ಜಙ್ಘೇ ಮಮ ವಿಕರ್ತೋಽವ್ಯಾದ್ ಗುಲ್ಫಾವನ್ತ್ಯಗಣೋಽವತು .
ಪಾದೌ ಚಿತ್ತಗಣಃ ಪಾತು ಪಾದಾಧೋ ಲೋಹಿತೋಽವತು .. ೧೦..

ಪಾದಪೃಷ್ಠಂ ಸುನ್ದರೋಽವ್ಯಾದ್ ನೂಪುರಾಢ್ಯೋ ವಪುರ್ಮಮ .
ವಿಚಾರೋ ಜಠರಂ ಪಾತು ಭೂತಾನಿ ಚೋಗ್ರರೂಪಕಃ .. ೧೧..

ಶಿರಸಃ ಪಾದಪರ್ಯನ್ತಂ ವಪುಃ ಸುಪ್ತಗಣೋಽವತು .
ಪಾದಾದಿಮೂರ್ಧಪರ್ಯನ್ತಂ ವಪುಃ ಪಾತು ವಿನರ್ತಕಃ .. ೧೨..

ವಿಸ್ಮಾರಿತಂ ತು ಯತ್ ಸ್ಥಾನಂ ಗಣೇಶಸ್ತತ್ ಸದಾವತು .
ಪೂರ್ವೇ ಮಾಂ ಹ್ರೀಂ ಕರಾಲೋಽವ್ಯಾದಾಗ್ರೇಯೇ ವಿಕರಾಲಕಃ .. ೧೩..

ದಕ್ಷಿಣೇ ಪಾತು ಸಂಹಾರೋ ನೈರೃತೇ ರುರುಭೈರವಃ .
ಪಶ್ಚಿಮೇ ಮಾಂ ಮಹಾಕಾಲೋ ವಾಯೌ ಕಾಲಾಗ್ನಿಭೈರವಃ .. ೧೪..

ಉತ್ತರೇ ಮಾಂ ಸಿತಾಸ್ಯುಽವ್ಯಾದೈಶಾನ್ಯಾಮಸಿತಾತ್ಮಕಃ .
ಪ್ರಭಾತೇ ಶತಪತ್ರೋಽವ್ಯಾತ್ ಸಹಸ್ರಾರಸ್ತು ಮಧ್ಯಮೇ .. ೧೫..

ದನ್ತಮಾಲಾ ದಿನಾನ್ತೇಽವ್ಯಾನ್ನಿಶಿ ಪಾತ್ರಂ ಸದಾವತು .
ಕಲಶೋ ಮಾಂ ನಿಶೀಥೇಽವ್ಯಾನ್ನಿಶಾನ್ತೇ ಪರಶುಸ್ತಥಾ .. ೧೬..

ಸರ್ವತ್ರ ಸರ್ವದಾ ಪಾತು ಶಙ್ಖಯುಗ್ಮಂ ಚ ಮದ್ವಪುಃ .
ಓಂಓಂ ರಾಜಕುಲೇ ಹಹೌಂ ರಣಭಯೇ ಹ್ರೀಂಹ್ರೀಂ ಕುದ್ಯೂತೇಽವತಾತ್
ಶ್ರೀಂಶ್ರೀಂ ಶತ್ರುಗೃಹೇ ಶಶೌಂ ಜಲಭಯೇ ಕ್ಲೀಂಕ್ಲೀಂ ವನಾನ್ತೇಽವತು .
ಗ್ಲೌಂಗ್ಲೂಂಗ್ಲೈಂಗ್ಲಂಗುಂ ಸತ್ವಭೀತಿಷು ಮಹಾವ್ಯಾಧ್ಯಾರ್ತಿಷು ಗ್ಲೌಂಗಗೌಂ
ನಿತ್ಯಂ ಯಕ್ಷಪಿಶಾಚಭೂತಫಣಿಷು ಗ್ಲೌಂಗಂ ಗಣೇಶೋಽವತು .. ೧೭..

ಇತೀದಂ ಕವಚಂ ಗುಹ್ಯಂ ಸರ್ವತನ್ತ್ರೇಷು ಗೋಪಿತಮ್ .
ವಜ್ರಪಞ್ಜರನಾಮಾನಂ ಗಣೇಶಸ್ಯ ಮಹಾತ್ಮನಃ .. ೧೮..

ಅಙ್ಗಭೂತಂ ಮನುಮಯಂ ಸರ್ವಾಚಾರೈಕಸಾಧನಮ್ .
ವಿನಾನೇನ ನ ಸಿದ್ಧಿಃ ಸ್ಯಾತ್ ಪೂಜನಸ್ಯ ಜಪಸ್ಯ ಚ .. ೧೯..

ತಸ್ಮಾತ್ ತು ಕವಚಂ ಪುಣ್ಯಂ ಪಠೇದ್ವಾ ಧಾರಯೇತ್ ಸದಾ .
ತಸ್ಯ ಸಿದ್ಧಿರ್ಮಹಾದೇವಿ ಕರಸ್ಥಾ ಪಾರಲೌಕಿಕೀ .. ೨೦..

ಯಂಯಂ ಕಾಮಯತೇ ಕಾಮಂ ತಂ ತಂ ಪ್ರಾಪ್ನೋತಿ ಪಾಠತಃ .
ಅರ್ಧರಾತ್ರೇ ಪಠೇನ್ನಿತ್ಯಂ ಸರ್ವಾಭೀಷ್ಟಫಲಂ ಲಭೇತ್ .. ೨೧..

ಇತಿ ಗುಹ್ಯಂ ಸುಕವಚಂ ಮಹಾಗಣಪತೇಃ ಪ್ರಿಯಮ್ .
ಸರ್ವಸಿದ್ಧಿಮಯಂ ದಿವ್ಯಂ ಗೋಪಯೇತ್ ಪರಮೇಶ್ವರಿ .. ೨೨..