వరదగణేశకవచమ్

శ్రీరుద్రయామలే తన్త్రే శ్రీదేవీరహస్యే మహాగణపతికవచమ్

శ్రీభైరవ ఉవాచ .
మహాదేవి గణేశస్య వరదస్య మహాత్మనః .
కవచం తే ప్రవక్ష్యామి వజ్రపఞ్జరకాభిధమ్ .. 1..

🌸 ధ్యానమ్ . 🌸
విఘ్నేశం విశ్వవన్ద్యం సువిపులయశసం లోకరక్షాప్రదక్షం
సాక్షాత్ సర్వాపదాసు ప్రశమనసుమతిం పార్వతీప్రాణసూనుమ్ .
ప్రాయః సర్వాసురేన్ద్రైః ససురమునిగణైః సాధకైః పూజ్యమానం
కారుణ్యేనాన్తరాయామితభయశమనం విఘ్నరాజం నమామి .. 2..

ఓం శ్రీం హ్రీం గం శిరః పాతు మహాగణపతిః ప్రభుః .
వినాయకో లలాటం మే విఘ్నరాజో భ్రువౌ మమ .. 3..

పాతు నేత్రే గణాధ్యక్షో నాసికాం మే గజాననః .
శ్రుతి మేఽవతు హేరమ్బో గణ్డౌ మోదకాశనః .. 4..

ద్వైమాతరో ముఖం పాతు చాధరౌ పాత్వరిన్దమ్ .
దన్తాన్ మమైకదన్తోఽవ్యాద్ వక్రతుణ్డోఽవతాద్ రసామ్ .. 5..

గాఙ్గేయో మే గలం పాతు స్కన్ధౌ సింహాసనోఽవతు .
విఘ్నాన్తకో భుజౌ పాతు హస్తౌ మూషకవాహనః .. 6..

ఊరూ మమావతాన్నిత్యం దేవస్త్రిపురఘాతనః .
హృదయం మే కుమారోఽవ్యాఞ్జయన్తః పార్శ్వయుగ్మకమ్ .. 7..

ప్రద్యుమ్నో మేఽవతాత్ పృష్ఠం నాభిం శఙ్కరనన్దనః .
కటిం నన్దిగణః పాతు శిశ్నం వీరేశ్వరోఽవతు .. 8..

మేఢ్రే మేఽవతు సౌభాగ్యో భృఙ్గిరీటీ చ గుహ్యకమ్ .
విరాటకోఽవతాదూరూ జానూ మే పుష్పదన్తకః .. 9..

జఙ్ఘే మమ వికర్తోఽవ్యాద్ గుల్ఫావన్త్యగణోఽవతు .
పాదౌ చిత్తగణః పాతు పాదాధో లోహితోఽవతు .. 10..

పాదపృష్ఠం సున్దరోఽవ్యాద్ నూపురాఢ్యో వపుర్మమ .
విచారో జఠరం పాతు భూతాని చోగ్రరూపకః .. 11..

శిరసః పాదపర్యన్తం వపుః సుప్తగణోఽవతు .
పాదాదిమూర్ధపర్యన్తం వపుః పాతు వినర్తకః .. 12..

విస్మారితం తు యత్ స్థానం గణేశస్తత్ సదావతు .
పూర్వే మాం హ్రీం కరాలోఽవ్యాదాగ్రేయే వికరాలకః .. 13..

దక్షిణే పాతు సంహారో నైరృతే రురుభైరవః .
పశ్చిమే మాం మహాకాలో వాయౌ కాలాగ్నిభైరవః .. 14..

ఉత్తరే మాం సితాస్యుఽవ్యాదైశాన్యామసితాత్మకః .
ప్రభాతే శతపత్రోఽవ్యాత్ సహస్రారస్తు మధ్యమే .. 15..

దన్తమాలా దినాన్తేఽవ్యాన్నిశి పాత్రం సదావతు .
కలశో మాం నిశీథేఽవ్యాన్నిశాన్తే పరశుస్తథా .. 16..

సర్వత్ర సర్వదా పాతు శఙ్ఖయుగ్మం చ మద్వపుః .
ఓంఓం రాజకులే హహౌం రణభయే హ్రీంహ్రీం కుద్యూతేఽవతాత్
శ్రీంశ్రీం శత్రుగృహే శశౌం జలభయే క్లీంక్లీం వనాన్తేఽవతు .
గ్లౌంగ్లూంగ్లైంగ్లంగుం సత్వభీతిషు మహావ్యాధ్యార్తిషు గ్లౌంగగౌం
నిత్యం యక్షపిశాచభూతఫణిషు గ్లౌంగం గణేశోఽవతు .. 17..

ఇతీదం కవచం గుహ్యం సర్వతన్త్రేషు గోపితమ్ .
వజ్రపఞ్జరనామానం గణేశస్య మహాత్మనః .. 18..

అఙ్గభూతం మనుమయం సర్వాచారైకసాధనమ్ .
వినానేన న సిద్ధిః స్యాత్ పూజనస్య జపస్య చ .. 19..

తస్మాత్ తు కవచం పుణ్యం పఠేద్వా ధారయేత్ సదా .
తస్య సిద్ధిర్మహాదేవి కరస్థా పారలౌకికీ .. 20..

యంయం కామయతే కామం తం తం ప్రాప్నోతి పాఠతః .
అర్ధరాత్రే పఠేన్నిత్యం సర్వాభీష్టఫలం లభేత్ .. 21..

ఇతి గుహ్యం సుకవచం మహాగణపతేః ప్రియమ్ .
సర్వసిద్ధిమయం దివ్యం గోపయేత్ పరమేశ్వరి .. 22..