ಉಪದೇಶರತ್ನಮಾಲಾ

ಅಸ್ಮಾಸು ವತ್ಸಲತಯಾ ಕೃಪಯಾ ಚ ಭೂಯಃ
ಸ್ವೇಚ್ಛಾವತೀರ್ಣಮಿವ ಸೌಮ್ಯವರಂ ಮುನೀನ್ದ್ರಮ್.
ಆಚಾರ್ಯ ಪೌತ್ರಮಭಿರಾಮವರಾ ಭಿಧಾನ
ಮಸ್ಮದ್ಗುರಂ ಪರಮ ಕಾರುಣಿಕಂ ನಮಾಮಿ..೧..

ಪ್ರಾಕ್ ಶ್ರೀಗಿರೀನ್ದ್ರಗುರುರಾಡುಪದಿಷ್ಟ ಮಾರ್ಗಂ
ಕಾರ್ತ್ಸ್ಯೇನ ಸಂನಿಗದತಾ ರುಚಿರೋಪಯನ್ತ್ರಾ.
ಸ್ವಪ್ರೇಮತಃ ಸುಕಲಿತಾ ಮುಪದೇಶರತ್ನ
ಮಾಲಾಂ ವಹನ್ತಿ ಹೃದಿ ಯೇ ಮಮ ತೇ ಶರಣ್ಯಾಃ..೨..

ಅಥ ಉಪದೇಶರತ್ನಮಾಲಾ
ಮದ್ದೇಶಿಕ ದ್ರವಿಡವೇದ ಗೂರೋಃ ಪ್ರಸಾದಾ-
ಲ್ಲಬ್ಧಂ ವಿಚಿನ್ತ್ಯ ಸರಸಾದುಪದೇಶ ಮಾರ್ಗಮ್.
ಪಶ್ಚಾತ್ತನಾರ್ಥ ಮುಪದೇಶಮಿಮಂ ಬ್ರವೀಮಿ
ವೃತ್ತೇ ವಸನ್ತ ತಿಲಕೇ ವಿನಿವೇಶ್ಯ ಸೌಮ್ಯೇ..೧..

ನನ್ದನ್ತಿ ಯೇ ಶ್ರುತಿಧನಾಃ ಸುಕೃತೀಪ್ಸವೋಽಪಿ
ಯತ್ನೋಯಮಸ್ಮದುಪಕಾರ ಇತಿ ಪ್ರಹೃಷ್ಟಾಃ.
ಅನ್ಯೇತು ಮತ್ಸರವಶಾದವಧೀರಯೇರನ್
ಕಿಂ ತೇನ ತೈ ರವಮತಿಃ ಕಿಮು ವಿಸ್ಮಯಾಯ..೨..

ಭದ್ರಂ ಶಠಾರಿಮುಖಭಕ್ತ ಜನಸ್ಯ ತತ್ತತ್
ದಿವ್ಯ ಪ್ರಬನ್ಧ ನಿವಹಸ್ಯ ಚ ದೋಷ ಲೇಶಾತ್.
ಮುಕ್ತಸ್ಯ ದೇಶಿಕಜನಸ್ಯ ತದುಕ್ತಿರಾಶೇ
ರೂಜ್ಜೀವನಸ್ಯ ಜಗತಾಂ ಸಹಿತಸ್ಯ ವೇದೈಃ..೩..

ಕಾಸಾರಭೂತಮಹದಾಹ್ವಯ ಭಕ್ತಿಸಾರ
ಶ್ರೀಮಚ್ಛಠಾರಿ ಕುಲಶೇಖರ ಭಟ್ಟನಾಥಾಃ.
ಭಕ್ತಾಘ್ರಿರೇಣು ಮುನಿಯಾನಕಲಿದ್ರುಹೋಽಪಿ
ಭೂಮೌ ವಿತೇನುರಮುತಃ ಕ್ರಮತೋ ಽವತಾರಮ್..೪..

ಆವಿದ್ಯಮನ್ಧತಮಸಂಪರಿಹರ್ತು ಮಸ್ಮಿನ್
ಲೋಕೇ ಽವತೀರ್ಯ ಸರಸೈರ್ದ್ರವಿಡ ಪ್ರಬನ್ಧೈಃ.
ವೇದಾನ್ ವಿವರ್ತಿತವತಾಮವತಾರಮಾಸ
ತಾರಾಃ ಕ್ರಮಾದಭಿದಧೇ ಶಠಜಿನ್ಮುಖಾನಾಮ್..೫..

ಸರ್ವತ್ರ ಗೀತಯಶಸಃ ಸರಆಹ್ವಯಸ್ಯ
ಭೂತಾಭಿಧಾನಮಹದಾಹ್ವಯ ಯೋಶ್ಚಗುರ್ವೋಃ.
ದಿವ್ಯಾವತಾರ ದಿವಸಾನಿ ತುಲಾಖ್ಯಮಾಸಿ
ತಿಸ್ರಃ ಕ್ರಮಾದಭಿದಧೇ ಶ್ರವಣಾದಿ ತಾರಾಃ..೬..

ಭಕ್ತೇಷ್ವಮೀಷು ದಶಸುಪ್ರಥಮಂ ಪರೇಭ್ಯ
ಏತೇ ತ್ರಯ: ಸಮುದಿತಾ ದ್ರವಿಡಾಗಮೈಃ ಸ್ವೈಃ.
ಯಸ್ಮಾಜ್ಜಗನ್ತಿ ಸಕಲಾನ್ಯುಪಜೀವಯನ್ತೋ
ಭಕ್ತಾಸ್ತತಃ ಪ್ರಥಮ ಇತ್ಯಭಿಧಾನಮೇಷಾಮ್..೭..

ನಾವೈಷಿ ವೈಭವಮಮುಸ್ಯ ದಿನಸ್ಯ ಮುಗ್ಧ
ಚೇತಃ ಕಿಮೇತದಿತಿಪೃಚ್ಛಸಿ ಚೇಬ್ರವೀಮಿ.
ಪಶ್ಯ ತ್ವಮದ್ಯ ಪರಕಾಲಕವೇಃ ಪ್ರದೀಪ್ತಾ
ದಿವ್ಯೋದಯೇನ ನನು ಕಾರ್ತಿಕಕೃತ್ತಿಕಾಸ್ತಾಃ..೮..

ಅಙ್ಗಾನಿಷಡ್ದ್ರವಿಡವೇದ ಚತುಷ್ಟಯಸ್ಯ
ಕರ್ತುಂ ಶಠಾರಿಕಲಿತಸ್ಯ ಕಲಿಪ್ರಶಾಸ್ತಾ.
ಯತ್ರಾವಿರಾಸ ಭುವಿ ಕಾರ್ತ್ತಿಕ ಕೃತ್ತಿಕಾಸು
ತದ್ವೈಭವಜ್ಞ ಪದಪದ್ಮಮುಪೈಹಿ ಚೇತಃ..೯..

ಅದ್ಯೋರ್ಜಮಾಸಿ ನನು ರೋಹಿಣಿತಾರಕಾ ಸಾ
ಯಸ್ಯಾಮವಾತರದಸೌ ಮುನಿವಾಹನಾರ್ಯಃ.
ಏತತ್ಕೃತಾವಮಲನಾದಿಪಿರಾನ್ ಪ್ರಬನ್ಧೇ
ರಜ್ಯದ್ಭಿರಾಸ್ತಿಕಜನೈ ರ್ದಿನಮದ್ಯಲಾಲ್ಯಮ್..೧೦..

ಜ್ಯೇಷ್ಠಾ ಽದ್ಯ ಮಾಸಿ ಧನುಷಿ ಪ್ರಥಿಮಾ ಕುತೋಽಸ್ಯಾಃ
ಪೃಚ್ಛ್ಯೇತ ಚೇದಿತಿಜನಾಃ ಕಥಯಾಮ್ಯಹಂ ವಃ.
ವಿಪ್ರೇನ್ದ್ರ ಭಕ್ತಪದರೇಣ್ವವತಾರಯೋಗಾತ್
ತ್ರೈವಿದ್ಯಬೃದ್ಧ ಬಹುಮಾನಪದಂ ಶುಭಾಹಃ..೧೧..

ತಾರಾಂ ಜನಾಃ ಶೃಣುತ ತೈಷಮಘಾ ಕಿಲಾದ್ಯ
ತಸ್ಯಾ ಬ್ರು ವೇಹ ಮತಿಶಾಯಿಮಹಾನುಭಾವಮ್.
ಲಬ್ಧಪ್ರಸನ್ನಮತಿಬೈಭವ ಭಕ್ತಿಸಾರ
ದಿವ್ಯಾವತಾರ ದಿವಸೋಽಯಮಭಿಜ್ಞ ಲಾಲ್ಯಃ..೧೨..

ಕುಮ್ಭೇಪುನರ್ವಸು ಭಮದ್ಯ ವಿಲೋಕಯಧ್ವಂ,
ತೇಜಃ ಕಿಮಹ್ನ ಇತಿ ಚೇದಹಮಸ್ಯ ವಕ್ಷ್ಯೇ.
ಕೋಲ್ಲೀಪುರೀಶ ಕುಲಶೇಖರ ಜನ್ಮ ಯೋಗಾತ್
ಶ್ಲಾಘಾಪದಂ ಭವತಿ ತಾರಮಿದಂ ಬುಧಾನಾಮ್..೧೩..

ಆಖ್ಯಾಮಿ ಚಾರುತರ ಮಾಧವಮಾಸಿ ರಾಧಾ
ತಾರಾನುಭಾವಮವನೀಜನ ಬೋಧನಾಯ.
ದ್ರಷ್ಟುಸ್ತ್ರಯೀಂ ದ್ರವಿಡತಃ ಕುರುಕೇಶ್ವರಸ್ಯ
ದಿವ್ಯಾವತಾರ ದಿವಸೋಽದ್ಯಹಿ ಸತ್ಯವಾಚಃ..೧೪..

ತಾರಂ ಕಿಮಸ್ತಿ ವತ ಮಾಧವ ಮಾಸಿ ರಾಧಾ
ತುಲ್ಯಂ ಕಿಮಸ್ತಿ ಶಠಕೋಪ ಸಮಾನ ಏಕಃ.
ಕಿ ವಾಸ್ತಿ ತದ್ದ್ರವಿಡ ವೇದಸಮಃ ಪ್ರಬನ್ಧಃ
ಕಿ ಪತ್ತನಂ ಕುರುಕಯಾ ಸಮಮಸ್ತಿ ಲೋಕೇ..೧೫..

ಅದ್ಯ ಪ್ರಭಾವಮಪಿ ಮಾನಸ ಕಿಂನ ವೇತ್ಸಿ
ಕೋಽಸ್ಯ ಪ್ರಭಾವ ಇತಿ ಚೇತ್ ಪ್ರತಿಪಾದಯಾಮಿ.
ಪಲ್ಲಾಣ್ಡುಗಾನಪರ ಭಟ್ಟಪತೇಃ ಪ್ರಸೂತಿಃ
ಸ್ವಾತೀ ಕಿಲಾದ್ಯ ಮಿಹಿರೇ ಮಿಥುನಂ ಪ್ರಪನ್ನೇ..೧೬..

ಭಟ್ಟಾಧಿಪೋದಯ ಇಹೇತ್ಯಧಿ ಶುಕ್ರ ಮಾಸಂ
ಸ್ವಾತೀಂ ಯ ಆರ್ದ್ರಹೃದಯಾ ಮುಹುರಾದ್ರಿಯನ್ತೇ.
ತೇಷಾಂ ನ ಸನ್ತಿ ಸದೃಶಾ ಜಗತೀತಿ ಚೇತ-
ಶ್ಚಿನ್ತಾಮಿಮಾಮನುಕಲಂ ಪರಿವಬೃಂಹಯೇಥಾಃ..೧೭..

ಭಕ್ತೇಷ್ವಮೀಷು ಮಧುಶಾಸನ ಮಂಗಲಾನಾ-
ಮಾಶಾಸನೇಽನವವಿಕಾ ಪ್ರಿಯತಾ ಯದಸ್ಯ.
ಭಟ್ಟೇಶ್ವರಸ್ಯ ಪಿರಿಯೋಪಪದಂ ಪ್ರತೀತ
ಮಾಲ್ವಾರಿತಿ ಪ್ರವವೃತೇ ತತ ಏವ ನಾಮ..೧೮..

ಅನ್ಯಸ್ಯಭಕ್ತನಿವಹಸ್ಯ ನಿಬನ್ಧನಾನಾ-
ಮೇತತ್ಕೃತಾದಿ ಮನಿಬನ್ಧನಮಾದಿರಾಸೀತ್.
ತತ್ಸಾರ ಸಂಗ್ರಹತಯಾಪಿ ಚ ಮಂಗಲಾನಾ-
ಮಾಪಾದನಾತ್ ಪ್ರಣವವನ್ನಿಖಿಲಾಗಮಾನಾಮ್..೧೯..

ಶ್ರೀ ಭಟ್ಟನಾಥತದುಪಜ್ಞ ನಿಬನ್ಧನಾಭ್ಯಾಂ
ಕೋ ವಾ ಪ್ರಬನ್ಧ ಪುರುಷೌ ಸದೃಶೌ ಭವೇತಾಮ್.
ದ್ರಷ್ಟ್ರೃಷ್ವಮೀಷು ನಿಖಿಲ ದ್ರವಿಡಾಗಮಾನಾಂ
ತೇಷ್ವಾಗಮೇಷು ಚ ವಿಚಿನ್ತಯ ಚೇತ? ಏತತ್..೨೦..

ಶ್ರೀ ವಿಷ್ಣುಚಿತ್ತದುಹಿತು ರ್ಜಗತಾಂ ಜನನ್ಯಾಃ
ಪ್ರಖ್ಯಾವತೋ ಮಧುರಪೂರ್ವಕವೇಶ್ಚ ನಾಮ್ನಾ.
ರಾಮಾನುಜಸ್ಯ ಕರುಣಾಮೃತವಾರಿ ರಾಶೇ-
ರ್ಮಾಸೇನ ಸಾಕಮವತಾರ ದಿನಂ ಬ್ರವೀಮಿ..೨೧..

ಮಾಸೇ ಶುಚೌ ಪ್ರಥಮಫಲ್ಗುನಿಕಾ ಹಿ ಸೈಷಾ
ಗೋದಾಽತ್ರ ಖಲ್ವವತತಾರ ಸುರಕ್ಷಿತುಂ ನಃ.
ಭೋಗಾಂಶ್ಚ ಪಾರಮಪದಾನವಮತ್ಯ ನಿತ್ಯಾನ್
ಭಟ್ಟೇಶ್ವರಸ್ಯ ಮಹಿತಾ ದುಹಿತಾ ಭವನ್ತೀ..೨೨..

ಶ್ರೀ ವಿಷ್ಣುಚಿತ್ತದುಹಿತೃತ್ವವರೇಣ್ಯ ಗೋದಾ
ದಿವ್ಯೋದಯೇನ ಮಹಿತಾ ಶುಚಿಫಲ್ಗುನೀಯಮ್.
ತತ್ತುಲ್ಯಮಸ್ತಿ ಕಿಮು ಚಿನ್ತಯ ಚಿತ್ತ ತಾರಂ
ಗೋದೋಪಮಾ ಯದಿ ಭವೇತ್ತದಿದಂ ತದಾ ಸ್ಯಾತ್..೨೩..

ವಹ್ವೀಯಸಃ ಪ್ರಣಯತೋ ಭಗವತ್ಯಜಸ್ರ-
ಮಸ್ಥಾನರಕ್ಷಣಭಯಾಕುಲವಂಶಜಾತಾಮ್.
ಭಕ್ತಾನಮೂನ್ ನಿಜಗುಣೈರತಿವರ್ತ ಮಾನಾಂ
ವಾಲ್ಯೇಽಪಿ ಪಕ್ವಚರಿತಾಂ ಭಜ ಚಿತ್ತ! ಗೋದಾಮ್..೨೪..

ಯತ್ರೋದಭೂನ್ಮಧುರಪೂರ್ವಕವಿರ್ಮಹೀಯಾನ್
ತಾಮದ್ವಿತೀಯವಿಭವಾಂ ಮಧುಮಾಸಿ ಚಿತ್ರಾಮ್.
ಉಕ್ತಾನ್ಯಭಕ್ತ ನಿವಹೋದಯವಾಸರಾನ್ನಃ
ಕ್ಷೇಮಂಕರೀಮನುದಿನಂ ಹೃದಯಾವಧೇಹಿ..೨೫..

ಮನ್ತ್ರಾಧಿಪೇ ಮಹತಿ ಮಧ್ಯಪದಂ ಯಥಾಽಽಸೀ-
ದೇವಂ ಹಿ ಪೂರ್ವಗುರವೋ ದ್ರಬಿಡಾಗಮಾನಾಮ್.
ಆಕೂತಮನ್ಯಜನದುರ್ಗ್ರಹಮತ್ರಮತ್ವಾ
ಮಧ್ಯೇ ನ್ಯಧುರ್ಮಧುರ ಪೂರ್ವಕವೇಃ ಪ್ರಬನ್ಧಮ್..೨೬..

ಆರ್ದ್ರಾಭಮದ್ಯ ಖಲು ಮಾಸಿ ಮಧೌ ಮನೋಜ್ಞೇ
ಕೋ ವಾಽನ್ಯತೋಽಸ್ಯಗರಿಮೇತ್ಯನುಯೋಗಕೃದ್ಭ್ಯಃ.
ವಕ್ಷ್ಯೇ ಯತೀಶ್ವರ ಸಮುದ್ಭವವೈಭವೇನ
ತಾರಂ ತದೇತದಖಿಲೈಃ ಪರಿಪಾಲನೀಯಮ್..೨೭..

ದಿವ್ಯೋದಯರ್ಕ್ಷ ನಿವಹಾಚ್ಛಠಜಿನ್ಮುಖಾನಾಂ
ನಕ್ಷತ್ರಮೇತದಧಿಕಂ ಕುಶಲಾವಹಂ ನಃ.
ಆರ್ದ್ರಾಹ್ವಯೇನ ವಿದಿತೇಮಧುಮಾಸಭಾಜಿ
ಯತ್ರಾವಿರಾಸ ಭಗವಾನ್ ಯತಿಸಾರ್ವಭೌಮಃ..೨೮..

ಅಸ್ಮದ್ಗುರೋ ರ್ಯತಿಪತೇಃ ಕರುಣಾಮ್ಬುರಾಶೇ-
ಸ್ತ್ರಾಣಾಯ ನೋ ಭುವಿ ಲಸದ್ಭವತಾರಕೇತಿ.
ಆರ್ದ್ರಾಭವೈಭವಮನನ್ಯ ಸಮಾನಮೇತ-
ದ್ವೇಲಾಸು ಚಿತ್ತ ನಿಖಿಲಾಸ್ವನುಸನ್ದಧೀಥಾಃ..೨೯..

ಏತಾಸ್ಸರಃ ಪ್ರಮುಖಜನ್ಮ ಭುವೋ ಹಿ ಕಾಞ್ಚೀ
ಮಲ್ಲೌ ಮಯೂರನಗರೀ ಕಲಿವೈರಿಣಸ್ತು.
ಜನ್ಮಸ್ಥಲೀ ಕುರೈಯ್ಯಲೂರಿತಿ ವಿಶ್ರುತಾಭೂ-
ರುತ್ಪತ್ತಿ ಭೂಮಿ ರುರೈಯ್ಯೂರ್ಮುನಿ ವಾಹನಸ್ಯ..೩೦..

ಪೃಥ್ವ್ಯಾಂಹಿ ಭಕ್ತಪದರೇಣ್ವವತಾರ ಭೂಮಿ
ಮಣ್ಡಙ್ಗುಡೀತಿ ನಗರೀ ಮಹಿತಾ ಪ್ರತೀತಾ.
ವಿಖ್ಯಾತಕೀರ್ತಿ ಕುಲಶೇಖರ ಜನ್ಮದೇಶಃ
ಪ್ರಖ್ಯಾವತೀ ನಿಚುಲನಾಮಪುರೀ ಜಗತ್ಯಾಮ್..೩೧..

ಮಾನ್ಯಾಪುರೀ ಮಲಿಶಯಿತ್ಯಭಿಧಾನರಮ್ಯಾ
ಪ್ರಾರ್ಥ್ಯಾಂ ಜನಸ್ಯ ಕುರುಕಾಪಿ ಚ ವಿಲ್ಲಿಪುತ್ತೂರ್.
ಶ್ರೀ ಭಕ್ತಿಸಾರ ಶಠಶಾತನ ವಿಷ್ಣುಚಿತ್ತ
ಜನ್ಮಸ್ಥಲಾನಿ ಭುವನ ಪ್ರಥಿತಾನ್ಯಮೂನಿ..೩೨..

ಗೋದಾಸಮುದ್ಭವಪುರಂ ಭುವಿ ವಿಲ್ಲಿಪುತ್ತುರ್
ಕೋಲೂರ್ಪುರಂಮಧುರಪೂರ್ವಕವೇಃ ಪ್ರಸೂತಿಃ.
ರಾಮಾನುಜಸ್ಯ ಕರುಣಾ ವರುಣಾಲಯಸ್ಯ
ಮಾನ್ಯೇ ಮಹೋಪಪದ ಭೂತಪುರೇ ಽವತಾರಃ..೩೩..

ಭಕ್ತಾನ್ ಪರಾಙ್ಕುಶಮುಖಾನಪಿತತ್ಪ್ರಬನ್ಧಾನ್
ತದ್ವೈ ಭವಾರ್ಹ ಮುಪಲಾಲಯತಾಂ ಗುರೂಣಾಮ್.
ಉಜ್ಜೀವನಾಯ ಜಗತಾಮುದಿತಾಃ ಪ್ರತೀತಾ
ದಿವ್ಯ ಪ್ರಬನ್ಧವಿಷಯಾಃ ಕಥಯಾಮಿ ಟೀಕಾಃ..೩೪..

ಭಕ್ತೇಷು ತೇಷು ವಕುಲಾ ಭರಣಾದಿಮೇಷು
ತತ್ತತ್ಪ್ರಬನ್ಧನಿವಹೇ ಕೃತ ಭಕ್ತಿಮಾನ್ದ್ಯಾಃ.
ಘೋರೇ ಪತನ್ತಿ ನರಕೇ ತು ಸಮೀಪ ಮೇಷಾಂ
ಪ್ರಾಪ್ತುಂ ಚ ಭೀಪರಿ ವೃತಃ ತ್ಯಜ ಚಿತ್ತ ತಾಂಸ್ತ್ವಮ್..೩೫..

ಪ್ರಜ್ಞಾವದಗ್ರಸರಕೇಸರಭೂಷಣಾದಿ
ಭಕ್ತಪ್ರಭಾವಮಪಿದಿವ್ಯ ನಿಬನ್ಧ ಭೂಮ್ನಃ.
ನಾಥಾದಯೋ ಯದಿಪರಂ ನಭವೇಯುರಾರ್ಯಾಃ
ಕೇ ವಾ ವಿದನ್ತಿ ಹೃದಯ ತ್ವಮಿದಂ ಮನುಷ್ವ..೩೬..

ಏಕೈಕಪೂರುಷ ಸುರಕ್ಷಿತವಂಶ ರಿತ್ಯಾ
ಗುಪ್ತಾ ಪ್ರಪತ್ತಿ ಪದವೀ ಗುರುಭಿಃ ಪುರಾಣೈಃ.
ರಾಮಾನುಜಸ್ತು ಪರಯಾ ದಯಯಾ ದಯಾಲುಃ
ಸೀಮಾಮಿಮಾಮತಿಯಯೌ ಜಗತಾಂ ಹಿತಾಯ..೩೭..

ಅಸ್ಯೋಚಿತಾಂ ಪರಮ ವೈದಿಕ ದರ್ಶನಸ್ಯ
ರಾಮಾನುಜಾರ್ಯರಚಿತೋ ಪಕೃತಿಂ ಕೃತಜ್ಞಃ.
ರಙ್ಗೇಶ್ವರಃ ಪ್ರಥಯಿತುಂ ರಚಯಾಞ್ಚಕಾರ
ರಾಮಾನುಜಸ್ಯ ಮತಮಿತ್ಯಭಿಧಾನಮಸ್ಯ..೩೮..

ಚನ್ದ್ರೋ ಯತೀನ್ದ್ರಜಲಧೇಃ ಕುರುಕಾಧಿಪಾರ್ಯಃ
ಶ್ರೀ ಮಾಧವೋಮುನಿರುಭಾವಪಿ ಕೃಷ್ಣಸೂರೀ.
ಯೋಗೀ ಚ ಸುನ್ದರಬರೋ ಹಿ ಸಹಸ್ರಗಾಥಾ
ವ್ಯಾಖ್ಯಾ ವ್ಯಧುರ್ಹದಯ ತಾನನಿಶಂ ಭಜೇಥಾಃ..೩೯..

ಏತಾಶ್ಶಠಾರಿ ಕೃತಗೀತಿ ಸಹಸ್ರಟೀಕಾ
ಕ್ಲೃಪ್ತಾ ನಚೇದ್ ಗುವರೈಃ ಕುರುಕೇಶಮುಖ್ಯೈಃ.
ತಸ್ಯ ಪ್ರಬನ್ಧ ತಿಲಕಸ್ಯ ಹಿ ಹನ್ತ ಭಾವಂ
ಜಾನನ್ತಿ ಕೇಽದ್ಯ ಹೃದಯ ತ್ವಮುದೀರಯೇಥಾಃ..೪೦..

ನಿಃಸೀಮ ನಿರ್ಮಲಧಿಯಾ ಕುರುಕಾಧಿಪೇನ
ಲಬ್ಧ್ವಾ ಪ್ರಸಾದಲಹರಿಂ ಯತಿ ಪುಂಗವಸ್ಯ.
ಗಾಥಾಸಹಸ್ರವಿಷಯಾ ವಿಹಿತಾ ಹಿ ಟೀಕಾ
ಸಂಗೃಹ್ಣತಿ ಸಕಲಮಾತ್ಮನಿ ಷಟ್ಸಹಸ್ರೀ..೪೧..

ಪ್ರಜ್ಞಾವತಾಂ ನಿರವಧಿ ಪ್ರಥಿತಾತ್ಮ ಭೂಮಾ
ಭಟ್ಟಾರಕಸ್ಯ ದಯಯಾ ನಿಗಮಾನ್ತ ಯೋಗೀ.
ಯಾಮಾತತಾನಶಠಜಿನ್ನಿಗಮಸ್ಯ ಟೀಕಾ
ಸಾ ಗ್ರನ್ಥತೋ ನವಸಹಸ್ರಮಿತಾ ಸಮಿನ್ಧೇ..೪೨..

ಲಬ್ಧ್ವಾ ಕೃಪಾಸಮುದಿತಂ ಕಲಿವೈರಿದಾಸ
ಸೂರೇರ್ನಿದೇಶಮಭಯ ಪ್ರದರಾಜನಾಮಾ.
ಯತ್ ಕ್ಲೃಪ್ತವಾನ್ ವಿವರಣಂ ದ್ರವಿಡಾಗಮಸ್ಯ
ತದ್ಗ್ರನ್ಥತಸ್ತ್ರಿ ಗುಣಿತಾಷ್ಟ ಸಹಸ್ರಸಂಖ್ಯಮ್..೪೩..

ಸೂಕ್ತೀಃಸುಧಾಕರಸಖೀ: ಕಲಿವೈರಿದಾಸ
ನಾಮ್ನೋ ಗುರೋಃ ಸಮವಲಮ್ವ್ಯ ಹಿ ಕೃಷ್ಣಪಾದ.
ಯಾಂ ದ್ರಾವಿಡೋಪನಿಷದೋ ವಿವೃತಿಞ್ಚಕಾರ
ಷಟ್ತ್ರಿಂಶತಾದಶಶತೈಃ ಪ್ರಮಿತಾ ಮತಾ ಸಾ..೪೪..

ಪಶ್ಚಾತ್ತನಾನಪಿಜನಾನನುಗೃಹ್ಣತಾಯಾ
ರಮ್ಯೋಪಯನ್ತೃ ಮುನಿಮಾ ಸ್ಫುಟವೈಭವೇನ.
ವೃತ್ತಿರ್ವ್ಯ॑ಧಾಯಿಶಠಜಿನ್ನಿಗಮಸ್ಯ ಸೇಯಂ
ಗ್ರನ್ಥೈರ್ದ್ವಿಷಡ್ದಶಶವ ಪ್ರಮಿತೈ ರ್ಧಿನೋತಿ..೪೫..

ಪ್ರಾಯೇಣ ಸಮ್ಯಗಿತರ ದ್ರವಿಡಾಗಮಾನಾಂ
ಟೋಕಾಃ ಕೃತಾಯದಭಯ ಪ್ರದರಾಜನಾಮ್ನಾ.
ತೇನೈವ ತೇಷು ಗಹನೇಷು ಮತಿ ರ್ಗುರುಣಾಂ
ಲೋಕೋಪದೇಶ ಸಮಯೇಷ್ವಧುನಾಸ್ತಿ ರಮ್ಯಾ..೪೬..

ಕೇಷಾಂಚಿದೇವ ವಿವೃತಿರ್ದ್ರವಿಡಾಗಮಾನಾಂ
ವೇದಾನ್ತಿಭಿ ವಿರಚಿತಾ ನ ಪುನಃ ಸಮೇಷಾಮ್.
ಪ್ರಜ್ಞಾಭರಾದವರಜೇನ ಜಗದ್ಗುರೋಸ್ತಾಃ
ಸೌಮ್ಯೋಪಯನ್ತೃ ಮುನಿನಾ ಕಲಿತಾಶ್ಚ ಕಾಶ್ಚಿತ್..೪೭..

ತಾಂ ಕೃಷ್ಣಪಾದ ಲಿಖಿತಾಂ ಶಠವೈರಿವೇದ
ವ್ಯಾಖ್ಯಾಂ ದದಸ್ವ ಮಹತೀಮಿತಿ ಕೃಷ್ಣಪಾದಾತ್.
ಆದಾಯ ದೇಶಿಕವರಃ ಕಲಿವೈರಿದಾಸಃ
ಪ್ರಾದತ್ತ ಮಾಧವ ಗುರೋ ರ್ದಯಮಾನ ಚೇತಾಃ..೪೮..

ತಾಂ ಮಾಧವಃ ಪುನರುಪಾ ಕುರುತಾತ್ಮಸೂನೋಃ
ಸೋಽಪ್ಯದ್ವಿತೀಯ ಕರುಣಾಖ್ಯ ವರಾಹಸೂರೇಃ.
ಸೋಽಪಿ ಸ್ವಕೀಯತನಯಸ್ಯ ಸ ಚಾಪ್ಯುದಾರಃ
ಪಶ್ಚಾತ್ತನಾನನುಜಿಘೃಕ್ಷುರತೀವ ತೇಭ್ಯಃ..೪೯..

ಆಖ್ಯೇಮನಃ ಕಲಯನಮ್ಪೇರುಮಾಲಥೋನ-
ಮ್ಮಾಲ್ವಾರಿತಿ ವ್ಯವಹೃತೇ ಪ್ರಣಯೇನ ಭಕ್ತೈಃ.
ನನ್ಜೀಯರಿತ್ಯಪಿ ಚ ನಾಮ ತಥಾ ಪ್ರವೃತ್ತಂ
ನಮ್ವಿಲ್ಲಯಿತ್ಯಪಿ ತಥಾ ವಿಹಿತಾಂ ಚ ಸಂಜ್ಞಾಮ್..೫೦..

ವಾಧೂಲವಂಶತಿಲಕೋ ಽಸಿತವಾರಣಾರ್ಯಃ,
ಪ್ರೀತ್ಯಾ ಕದಾಪಿ ಕಲಿಸೂದನ ದಾಸಸೂರೇಃ.
ಆಖ್ಯಾಂ ಜಗದ್ಗುರುರಿತಿ ಪ್ರಥಿತಾಮಕಾರ್ಷೀತ್
ತಸ್ಮಾತ್ತದಾ ಪ್ರಭೃತಿ ಸಾ ನಿಯತಾ ಚ ತಸ್ಮಿನ್..೫೧..

ತಾಂ ಕೃಷ್ಣಪಾದ ಉಪಲಾಲಯತಿಸ್ಮ ಸಂಜ್ಞಾಂ
ಕೃತ್ವಾತದರ್ಹ ಚರಿತಸ್ಯ ನಿಜಸ್ಯ ಸೂನೋಃ.
ತೇನೈವ ಸಾ ಜನಹಿತಾಯ ಭುವಿ ಪ್ರವೃತ್ತಾ
ಸಂಜ್ಞಾ ಜಗದ್ಗುರುರಿತಿ ಪ್ರಥಿತಾ ಸಮನ್ತಾತ್..೫೨..

ಶ್ರೀ ವಚನ ಭೂಷಣ ಮಹಿಮಾ
ಕೋ ವಾ ಪ್ರಬನ್ಧ ಇಹಲೋಕಗುರೋಃ ಪ್ರಬನ್ಧೈಃ
ಸಾದೃಶ್ಯಮೇತಿ ಸಕಲೇಷ್ವಪಿವಾಙ್ಮಯೇಷು.
ತತ್ರಾಪಿ ಕಿಂ ವಚನಭೂಷಣ ತುಲ್ಯಮನ್ಯತ್
ಸತ್ಯಂ ಬ್ರವೀಮಿ ತದಿದಂ ವಚನಂ ನ ಮಿಥ್ಯಾ..೫೩..

ಪ್ರಾಚಾಂ ಪ್ರಪತ್ತಿ ಪದವೀ ಮಯತಾಂ ಗುರೂಣಾಂ
ರೋಚಿಷ್ಣುನಾ ವಚನರತ್ನ ಕದಮ್ಬಕೇನ.
ಏತಾಂ ಕೃತಿಂ ಗ್ರಥಯತೈವ ಬುಧಾತ್ಮಭೂಷಾಂ
ದತ್ತಂ ಬರಂ ವಚನಭೂಷಣ ನಾಮಧೇಯಮ್..೫೪..

ಶ್ರೀವಚನ ಭೂಷಣಕಾ ಅಧಿಕಾರೀಕೋ ದುರ್ಲಭತಾ :-
ಜಾನನ್ತಿ ಕೇ ವಚನ ಭೂಷಣವಾರಿರಾಶೇ-
ರ್ಧಾರ್ಯಂ ಸದಾ ಹೃದಿ ಸತಾಮಭಿಧೇಯರತ್ನಮ್.
ಕೇ ತತ್ಪ್ರದರ್ಶಿತಪಥೇನ ಚ ಸಂಚರನ್ತಿ
ಯಃ ಕೋಽಪಿ ಸಂಭವತಿ ಚೇದ್ವಿರಲೋಹಿ ತಾದೃಕ್..೫೫..

ಉಗ್ರಾದ್ಭವಾಬ್ಧಿ ಕುಹರಾದ್ದ್ರು ತಮುತ್ತಿತೀರ್ಷಾ
ಜಾಯೇತ ವೋ ಯದಿ ಜನಾಸ್ತದುಪಾಯ ಏಷಃ.
ಆಲೋಚ್ಯತಾಂ ವಚನ ಭೂಷಣಮಾತ್ಮನೀದಂ
ನಿಷ್ಠೀಯತಾಂ ಚ ನಿಯಮೇನ ತದುಕ್ತ ಮಾರ್ಗೇ..೫೬..

ಯೇ ದೇಶಿಕಾದಧಿಗತಾನ್ಯುಪದೇಶ ವರ್ತ್ಮಾ
ನ್ಯಾಸಜ್ಯ ಚೇತಸಿ ತಥಾಽಽಚರಿತು ಚ ಶಕ್ತಾಃ.
ತೇ ಯತ್ನತೋ ವಚನ ಭೂಷಣಗೂಢ ಮರ್ಥಂ
ನೈವಾ ಚರನ್ತಿ ಪರಿಶೀಲ್ಯ ಕುತೋ ನ ವಿದ್ಮಃ..೫೭..

ಸತ್ಸಂಪ್ರದಾಯಸುಧಿಯಾ ಸತತೋಪಲಾಲ್ಯಾ
ಲಭ್ಯೇತ ಚೇದ್ವಚನ ಭೂಷಣ ವಾಕ್ಯ ಟೀಕಾ.
ಸಾವ್ಯಞ್ಜತೀ ಸಕಲಮಸ್ಯ ಪದಾರ್ಥಜಾತಂ
ಮಧ್ಯಸ್ಥಯೈವದಶಯಾ ನನು ಭಾವನೀಯಾ..೫೮..

ಸಾರ್ಥಾಃಸ್ಮರಾಮಿ ಯದಿ ವಾಕ್ಯ ವಿಭೂಷಣೀಯಾ
ವಾಚೋ ವದಾಮಿ ಯದಿ ವಾ ಮಧುರಾಮಮಾಪಿ.
ಆರ್ಯಾಃ ಕಥಂನು ಭವತಾಂ ಮನಸಿ ಪ್ರಥೇರನ್
ಭೂಮ್ನಾಧಿಯೋ ಹಿ ವಿಷಯಾತಿಶಯಾವಗಾಹಾಃ..೫೯..

ಭಕ್ತಿಂ ವಿಹಾಯ ಪದಯೋ ರ್ನಿಜದೇಶಿಕಸ್ಯ
ಭಕ್ತಿ ಪ್ರಕರ್ಷಮಪಿ ಯೇ ಭಗವತ್ಯಯನ್ತೇ.
ತೇಭ್ಯೋರಮಾಸಹಚರಃ ಪರಮಂ ಪದಂ ತ-
ದಾತುಂ ನ ಹೀಚ್ಛತಿ ನತೇಽಪಿ ಚ ತಲ್ಲಭನ್ತೇ..೬೦..

ಜ್ಞಾನಂ ಪರಂ ತದುಚಿತಾಚರಣಂ ಚ ಯಸ್ಯ
ತಸ್ಮಿನ್ ಗುರೌ ಪರಮಭಕ್ತಿಜುಷೇಜನಾಯ.
ಭೌಮಾಃ! ಸ್ವಯಂಮಧುರಸಾವಿಲಪದ್ಮ ಜಾಯಾಃ
ಕಾನ್ತಃಶ್ರಿಯಃ ಕರೂಣಯಾ ನಿಜಧಾಮ ದತ್ತೇ..೬೧..

ಉಜ್ಜೀವನಾಯ ಯದಿ ಮಾನಸ ಮುತ್ಸುಕಂ ವೋ
ನಿಷ್ಠೀಯತಾಂ ನಿಜಗುರೋ ಶ್ಚರಣಾರವಿನ್ದೇ.
ಸತ್ಯಂ ಬ್ರವೀಮಿ ಮನುಜಾಃ ಫಣಿಶಾಯಿನಸ್ತ-
ದ್ದಿವ್ಯಂಪದಂ ಕರತಲಾಮಲಕಂ ಭವೇದ್ವಃ..೬೨..

ಉಜ್ಜೀವನಾಯ ವಿಹಿತಾ ಗುರುಣೋಪಕಾರಾ-
ಶ್ಚಿತ್ತೇ ಲಗನ್ತಿ ವಿಮಲಾ ಯದಿ ಚೇತನಾನಾಮ್.
ದೇಶಾನ್ತರೇ ನಿವಸನಂ ನ ಮನೋಽಪಿ ಮೃಷ್ಯೇತ್
ವಾಸಃ ಕಥಂ ನು ಭವಿತೇತಿ ವಯಂ ನ ವಿದ್ಮಃ..೬೩..

ಅತ್ರೈವ ಕೇವಲಮನನ್ಯಪರಾ ಲಭೇರನ್
ಶುಶ್ರುಷಣಾಂ ನಿಜಗುರೋರುಪಸೇದಿವಾಂಸಃ.
ಏನಾಂ ಪ್ರಮೇಯಸರಣಿಂ ಪ್ರತಿಪದ್ಯಮಾನಾಃ
ಕೇ ವಾ ತ್ಯಜನ್ತಿ ನಿಜದೇಶಿಕಪಾದ ಮೂಲಮ್..೬೪..

ಅನ್ತೇಸತೋ ಗುರುರನಾರತಮಾತ್ಮರಕ್ಷಾಂ
ಶಿಷ್ಯಃ ಪ್ರಹೃಷ್ಯ ಕುರುತಾಂ ಗುರುದೇಹ ರಕ್ಷಾಮ್.
ಅರ್ಥಂ ಸುಸೂಕ್ಷ್ಮಮಿಮಮಾಕಲಯನ್ತಿ ಚಿತ್ತೇ
ಸ್ಯಾದ್ ದುರ್ಲಭಾ ತದಪಿ ವರ್ತ್ಮನಿ ತತ್ರ ನಿಷ್ಠಾ..೬೫..

ಅತ್ಯಾದರಾನ್ನಿಜಗುರುಂ ಕಲಿವೈರಿ ದಾಸಂ
ನಿತ್ಯಾಂ ವಿಭೂತಿಮವಮತ್ಯ ನಿರನ್ತರಂ ಯಃ.
ಶುಶ್ರೂಷತೇ ಸ್ಮ ಕುರು ಮಾನಸ! ತಸ್ಯ ನಿಷ್ಠಾಂ
ಪಶ್ಚಾನ್ಮನೋಹರಪತೇ ರ್ಯತಿ ಪುಙ್ಗವಸ್ಯ..೬೬..

ಸರ್ವೇಽಪಿ ಪೂರ್ವಗುರುವಃ ಸಮಯೇನ ಯೇನ
ಚೇರುಸ್ತಮಾಕಲಯತಾಮಯಥಾವದೇವ.
ವಾಚೋ ನಿಶಮ್ಯವರ ಮಾನಸ ಮಾ ಭ್ರಮೀಸ್ತ್ವಂ
ವರ್ತಸ್ವ ಪೂರ್ವತರದೇಶಿಕ ವರ್ತನೇನ..೬೭..

ಯೇ ನಾಸ್ತಿಕಾ ಹೃದಯ ತಾನ್ ವಿಜಹೀಹಿ ಮೂರ್ಖಾಂ
ಸ್ತಾನಪ್ಯಪಾಕುರು ಯ ಆಸ್ತಿಕ ನಾಸ್ತಿಕಾಂಶ್ಚ.
ಯೇ ತ್ವಾಸ್ತಿಕಾ ನಯಪಥಾನ್ನಪರಿ ಚ್ಯವನ್ತೇ
ತಾನನ್ವಹಂ ಪರಿಚಿನುಷ್ವತಮೋಪಹನ್ತೃನ್..೬೮..

ಆಮೋದವತ್ಕುಸುಮಸಂ ವಲನೇನ ಯದ್ವ-
ದಾಮೋದವಾನ್ ಭವತಿ ಕೇಶ ಭರೋಽಪ್ಯಗನ್ಧಃ.
ತದ್ವದ್ಭವನ್ತಿಗುಣವಜ್ಜನಸಂಗಮೇನ
ವೀತಾ ಗುಣೈರಪಿ ಜನಾ ಗುಣವನ್ತ ಏವ..೬೯..

ಯತ್ಪೂತಿಗನ್ಧಮಿಲನಂ ಸಮುಪೈತಿವಸ್ತು
ತತ್ಪೂತಿಗನ್ಧಮಚಿರಾದುಪಜಾಯತೇ ಹಿ.
ಏತತ್ಕ್ರಮೇಣ ರಮಣೀಯ ಗುಣೋ ಽಪಿ ಲೋಕೇ
ನಿನ್ದ್ಯಾನ್ ಗುಣಾನ್ ಭಜತಿ ನಿನ್ದ್ಯ ಗುಣಾಶ್ರಯೇಣ..೭೦..

ಪ್ರಾಚಾಂ ವಚಾಂಸಿ ಸಕಲಾನಿ ನಿಶಮ್ಯ ಸಮ್ಯಕ್
ಚಿತ್ತೇನ ತಾನ್ಯವಹಿತೇನ ನಿಜೇನ ಮತ್ವಾ.
ನೈವೋಪದಿಶ್ಯ ಕಥಯನ್ತಿ ಯಥಾವಭಾಸಂ
ಶುದ್ಧಾನ್ವಯೋ ಽಯಮಿತಿ ಯೇ ವತತೇ ಹಿ ಮೂರ್ಖಾಃ..೭೧..

ಪ್ರಾಚಾಂ ಪ್ರಬೋಧ ಚರಣೇ ವಿಮಲೇ ಗುರುಣಾಂ
ಯೇ ವ್ಯಾಹರನ್ತಿ ತದುದಾ ಹೃತಯಾ ಪದವ್ಯಾ.
ಪ್ರಜ್ಞಾ ನಿಧಿಂ ಗುರುವರಂ ಪ್ರತಿಪದ್ಯ ಲೋಕಾ
ಮೋಹಾಸ್ಪದೇ ಜಗತಿ ಸಂಪ್ರತಿ ಮೋದಿಷೀಧ್ವಮ್..೭೨..

ಬಧ್ದಾಂಗುಣೈರನುಗುಣೈರುಪದೇಶರತ್ನ
ಮಾಲಾಮಿಮಾಂ ದಧತಿ ಯೇ ಹೃದಯೇನ ನಿತ್ಯಮ್.
ಅಸ್ಮದ್ಗುರೋ ರ್ಯತಿಪತೇಃ ಕರುಣಾ ಪ್ರವಾಹ
ಪಾತ್ರೀಕೃತಾ ಪರಮ ಸಂಪದಮಾಶ್ರಯನ್ತೇ..೭೩..

ಅಙ್ಗಾನುಷಙ್ಗಿಪುರುಷಾರುಚಿರೋಪಯನ್ತು
ರತ್ರಾಭಿಲಸ್ಯಪದರಕ್ತ ಸರೋಜ ಸೂನೇ.
ಸಶ್ರದ್ಧಮಾತ್ಮ ಶಿರಸಾ ಯದಿ ಸಂಸ್ಪೃಶೇಮ
ಪ್ರಾಪ್ತಃ ಸನೋ ಧ್ರುವಮಮಾನವಪಾಣಿಸಙ್ಗಃ..೭೪..

ರುಚಿರವರಮುನೇಃ ಕೃತಿಂಪ್ರತೀತಾಂ
ದ್ರವಿಡಮಯೀಮುಪದೇಶರತ್ನಮಾಲಾಮ್.
ಅನುಸಮಧಿಸಿತಾತ್ಪದಾವಲೀನಾ-
ಮನುಪದಿಕಲ್ಪಪದಾಭಿಜಾತ ಪದ್ಯೈಃ..