ಶ್ರೀಗಣೇಶನಾಮಾಷ್ಟಕಸ್ತೋತ್ರಮ್

ಶ್ರೀಗಣೇಶನಾಮಾಷ್ಟಕಸ್ತೋತ್ರಮ್

ಶ್ರೀಕೃಷ್ಣ ಉವಾಚ
ಶ್ರುಣು ದೇವಿ ಮಹಾಭಾಗೇ ವೇದೋಕ್ತಂ ವಚನಂ ಮಮ .
ಯಚ್ಛ್ರುತ್ವಾ ಹರ್ಷಿತಾ ನೂನಂ ಭವಿಷ್ಯಸಿ ನ ಸಂಶಯಃ .
ವಿನಾಯಕಸ್ತೇ ತನಯೋ ಮಹಾತ್ಮಾ ಮಹತಾಂ ಮಹಾನ್ ..

ಯಂ ಕಾಮಃ ಕ್ರೋಧ ಉದ್ವೇಗೋ ಭಯಂ ನಾವಿಶತೇ ಕದಾ .
ವೇದಸ್ಮೃತಿಪುರಾಣೇಷು ಸಂಹಿತಾಸು ಚ ಭಾಮಿನಿ ..

ನಾಮಾನ್ಯಸ್ಯೋಪದಿಷ್ಟಾನಿ ಸುಪುಣ್ಯಾನಿ ಮಹಾತ್ಮಭಿಃ .
ಯಾನಿ ತಾನಿ ಪ್ರವಕ್ಷ್ಯಾಮಿ ನಿಖಿಲಾಘಹರಾಣಿ ಚ ..

ಪ್ರಮಥಾನಾಂ ಗಣಾ ಯೈ ಚ ನಾನಾರೂಪಾ ಮಹಾಬಲಾಃ .
ತೇಷಾಮೀಶಸ್ತ್ವಯಂ ಯಸ್ಮಾದ್ಗಣೇಶಸ್ತೇನ ಕೀರ್ತ್ತಿತಃ .. ೧..

ಭೂತಾನಿ ಚ ಭವಿಷ್ಯಾಣಿ ವರ್ತಮಾನಾನಿ ಯಾನಿ ಚ .
ಬ್ರಹ್ಮಾಣ್ಡಾನ್ಯಖಿಲಾನ್ಯೇವ ಯಸ್ಮಿಂಲ್ಲಮ್ಬೋದರಃ ಸ ತು .. ೨..

ಯಃ ಶಿರೋ ದೇವಯೋಗೇನ ಛಿನ್ನಂ ಸಂಯೋಜಿತಂ ಪುನಃ .
ಗಜಸ್ಯ ಶಿರಸಾ ದೇವಿ ತೇನ ಪ್ರೋಕ್ತೋ ಗಜಾನನಃ .. ೩..

ಚತುರ್ಥ್ಯಾಮುದಿತಶ್ಚನ್ದ್ರೋ ದರ್ಭಿಣಾ ಶಪ್ತ ಆತುರಃ .
ಅನೇನ ವಿಧೃತೋ ಭಾಲೇ ಭಾಲಚನ್ದ್ರಸ್ತತಃ ಸ್ಮೃತಃ .. ೪..

ಶಪ್ತಃ ಪುರಾ ಸಪ್ತಭಿಸ್ತು ಮುನಿಭಿಃ ಸಙ್ಕ್ಷಯಂ ಗತಃ .
ಜಾತವೇದಾ ದೀಪಿತೋಽಭೂದ್ಯೇನಾಸೌ ಶೂರ್ಪಕರ್ಣಕಃ .. ೫..

ಪುರಾ ದೇವಾಸುರೇ ಯುದ್ಧೇ ಪೂಜಿತೋ ದಿವಿಷದ್ಗಣೈಃ .
ವಿಘ್ನಂ ನಿವಾರಯಾಮಾಸ ವಿಘ್ನನಾಶಸ್ತತಃ ಸ್ಮೃತಃ .. ೬..

ಅದ್ಯಾಯಂ ದೇವಿ ರಾಮೇಣ ಕುಠಾರೇಣ ನಿಪಾತ್ಯ ಚ .
ದಶನಂ ದೈವತೋ ಭದ್ರೇ ಹ್ಯೇಕದನ್ತಃ ಕೃತೋಽಮುನಾ .. ೭..

ಭವಿಷ್ಯತ್ಯಥ ಪರ್ಯಾಯೇ ಬ್ರಹ್ಮಣೋ ಹರವಲ್ಲಭಃ .
ವಕ್ರೀಭವಿಷ್ಯತ್ತುಣ್ಡತ್ವಾದ್ವಕ್ರತುಣ್ಡಃ ಸ್ಮೃತೋ ಬುಧೈಃ .. ೮..

ಏವಂ ತವಾಸ್ಯ ಪುತ್ರಸ್ಯ ಸನ್ತಿ ನಾಮಾನಿ ಪಾರ್ವತೀ .
ಸ್ಮರಣಾತ್ಪಾಪಹಾರೀಣಿ ತ್ರಿಕಾಲಾನುಗತಾನ್ಯಪಿ .. ೯..

ಅಸ್ಮಾತ್ತ್ರಯೋದಶೀಕಲ್ಪಾತ್ಪೂರ್ವಸ್ಮಿನ್ದಶಮೀಭವೇ .
ಮಯಾಸ್ಮೈ ತು ವರೋ ದತ್ತಃ ಸರ್ಗದೇವಾಗ್ರಪೂಜನೇ .. ೧೦..

ಜಾತಕರ್ಮಾದಿಸಂಸ್ಕಾರೇ ಗರ್ಭಾಧಾನಾದಿಕೇಽಪಿ ಚ .
ಯಾತ್ರಾಯಾಂ ಚ ವಣಿಜ್ಯಾದೌ ಯುದ್ಧೇ ದೇವಾರ್ಚನೇ ಶುಭೇ .. ೧೧..

ಸಙ್ಕಷ್ಟೇ ಕಾಮ್ಯಸಿದ್ಧ್ಯರ್ಥಂ ಪೂಜಯೇದ್ಯೋ ಗಜಾನನಮ್ .
ತಸ್ಯ ಸರ್ವಾಣಿ ಕಾರ್ಯಾಣಿ ಸಿದ್ಧ್ಯನ್ತ್ಯೇವ ನ ಸಂಶಯಃ .. ೧೨..