శ్రీగణేశనామాష్టకస్తోత్రమ్

శ్రీగణేశనామాష్టకస్తోత్రమ్

శ్రీకృష్ణ ఉవాచ
శ్రుణు దేవి మహాభాగే వేదోక్తం వచనం మమ .
యచ్ఛ్రుత్వా హర్షితా నూనం భవిష్యసి న సంశయః .
వినాయకస్తే తనయో మహాత్మా మహతాం మహాన్ ..

యం కామః క్రోధ ఉద్వేగో భయం నావిశతే కదా .
వేదస్మృతిపురాణేషు సంహితాసు చ భామిని ..

నామాన్యస్యోపదిష్టాని సుపుణ్యాని మహాత్మభిః .
యాని తాని ప్రవక్ష్యామి నిఖిలాఘహరాణి చ ..

ప్రమథానాం గణా యై చ నానారూపా మహాబలాః .
తేషామీశస్త్వయం యస్మాద్గణేశస్తేన కీర్త్తితః .. 1..

భూతాని చ భవిష్యాణి వర్తమానాని యాని చ .
బ్రహ్మాణ్డాన్యఖిలాన్యేవ యస్మింల్లమ్బోదరః స తు .. 2..

యః శిరో దేవయోగేన ఛిన్నం సంయోజితం పునః .
గజస్య శిరసా దేవి తేన ప్రోక్తో గజాననః .. 3..

చతుర్థ్యాముదితశ్చన్ద్రో దర్భిణా శప్త ఆతురః .
అనేన విధృతో భాలే భాలచన్ద్రస్తతః స్మృతః .. 4..

శప్తః పురా సప్తభిస్తు మునిభిః సఙ్క్షయం గతః .
జాతవేదా దీపితోఽభూద్యేనాసౌ శూర్పకర్ణకః .. 5..

పురా దేవాసురే యుద్ధే పూజితో దివిషద్గణైః .
విఘ్నం నివారయామాస విఘ్ననాశస్తతః స్మృతః .. 6..

అద్యాయం దేవి రామేణ కుఠారేణ నిపాత్య చ .
దశనం దైవతో భద్రే హ్యేకదన్తః కృతోఽమునా .. 7..

భవిష్యత్యథ పర్యాయే బ్రహ్మణో హరవల్లభః .
వక్రీభవిష్యత్తుణ్డత్వాద్వక్రతుణ్డః స్మృతో బుధైః .. 8..

ఏవం తవాస్య పుత్రస్య సన్తి నామాని పార్వతీ .
స్మరణాత్పాపహారీణి త్రికాలానుగతాన్యపి .. 9..

అస్మాత్త్రయోదశీకల్పాత్పూర్వస్మిన్దశమీభవే .
మయాస్మై తు వరో దత్తః సర్గదేవాగ్రపూజనే .. 10..

జాతకర్మాదిసంస్కారే గర్భాధానాదికేఽపి చ .
యాత్రాయాం చ వణిజ్యాదౌ యుద్ధే దేవార్చనే శుభే .. 11..

సఙ్కష్టే కామ్యసిద్ధ్యర్థం పూజయేద్యో గజాననమ్ .
తస్య సర్వాణి కార్యాణి సిద్ధ్యన్త్యేవ న సంశయః .. 12..