.. శ్రీశివతాణ్డవస్తోత్రమ్ ..

అథ రావణకృతశివతాణ్డవస్తోత్రమ్

జటాటవీగలజ్జలప్రవాహపావితస్థలే
గలేఽవలమ్బ్య లమ్బితాం భుజఙ్గతుఙ్గమాలికామ్ .
డమడ్డమడ్డమడ్డమన్నినాదవడ్డమర్వయం
చకార చణ్డతాణ్డవం తనోతు నః శివః శివమ్ .. 1..

జటాకటాహసమ్భ్రమభ్రమన్నిలిమ్పనిర్ఝరీ-
విలోలవీచివల్లరీవిరాజమానమూర్ద్ధని .
ధగద్ధగద్ధగజ్జ్వలల్లలాటపట్టపావకే
కిశోరచన్ద్రశేఖరే రతిః ప్రతిక్షణం మమ .. 2..

ధరాధరేన్ద్రనన్దినీవిలాసబన్ధుబన్ధుర-
స్ఫురద్దిగన్తసన్తతిప్రమోదమానమానసే .
కృపాకటాక్షధోరణీనిరుద్ధదుర్ధరాపది
క్వచిద్దిగమ్బరే(క్వచిచ్చిదమ్బరే) మనో వినోదమేతు వస్తుని .. 3..

జటాభుజఙ్గపిఙ్గలస్ఫురత్ఫణామణిప్రభా-
కదమ్బకుఙ్కుమద్రవప్రలిప్తదిగ్వధూముఖే .
మదాన్ధసిన్ధురస్ఫురత్త్వగుత్తరీయమేదురే (సిన్ధురాసురత్వ)
మనో వినోదమద్భుతం బిభర్తు భూతభర్తరి .. 4..

సహస్రలోచనప్రభృత్యశేషలేఖశేఖర-
ప్రసూనధూలిధోరణీవిధూసరాఙ్ఘ్రిపీఠభూః .
భుజఙ్గరాజమాలయా నిబద్ధజాటజూటకః
శ్రియై చిరాయ జాయతాం చకోరబన్ధుశేఖరః .. 5.. (శ్రియే)
లలాటచత్వరజ్వలద్ధనఞ్జయస్ఫులిఙ్గభా-
నిపీతపఞ్చసాయకం నమన్నిలిమ్పనాయకమ్ . (స్ఫులిఙ్గయా నిపీత)
సుధామయూఖలేఖయా విరాజమానశేఖరం
మహాకపాలి సమ్పదే శిరో జటాలమస్తు నః .. 6..

(మహః కపాలి సమ్పదే సరిజ్జటాలమస్తు నః ..)
కరాలభాలపట్టికాధగద్ధగద్ధగజ్జ్వల-
ద్ధనఞ్జయాహుతీకృతప్రచణ్డపఞ్చసాయకే .
ధరాధరేన్ద్రనన్దినీకుచాగ్రచిత్రపత్రక-
ప్రకల్పనైకశిల్పిని త్రిలోచనే రతిర్మమ .. 7..

నవీనమేఘమణ్డలీనిరుద్ధదుర్ధరస్ఫురత్-
కుహూనిశీథినీతమఃప్రబన్ధబద్ధకన్ధరః . (ప్రబద్ధబద్ధ)
నిలిమ్పనిర్ఝరీధరస్తనోతు కృత్తిసిన్ధురః
కలానిధానబన్ధురః శ్రియం జగద్ధురన్ధరః .. 8..

ప్రఫుల్లనీలపఙ్కజప్రపఞ్చకాలిమప్రభా-
ఽవలమ్బికణ్ఠకన్దలీరుచిప్రబద్ధకన్ధరమ్ .
స్మరచ్ఛిదం పురచ్ఛిదం భవచ్ఛిదం మఖచ్ఛిదం
గజచ్ఛిదాన్ధకచ్ఛిదం తమన్తకచ్ఛిదం భజే .. 9..

అఖర్వ(అగర్వ)సర్వమఙ్గలాకలాకదమ్బమఞ్జరీ-
రసప్రవాహమాధురీవిజృమ్భణామధువ్రతమ్ .
స్మరాన్తకం పురాన్తకం భవాన్తకం మఖాన్తకం
గజాన్తకాన్ధకాన్తకం తమన్తకాన్తకం భజే .. 10..

జయత్వదభ్రవిభ్రమభ్రమద్భుజఙ్గమశ్వస- (జయత్యద)
ద్వినిర్గమత్క్రమస్ఫురత్కరాలభాలహవ్యవాట్ .
ధిమిద్ధిమిద్ధిమిద్ధ్వనన్మృదఙ్గతుఙ్గమఙ్గల- (ధిమిం ధిమిం ధిమిం ధ్వనన్)
ధ్వనిక్రమప్రవర్తితప్రచణ్డతాణ్డవః శివః .. 11..

దృషద్విచిత్రతల్పయోర్భుజఙ్గమౌక్తికస్రజోర్-
గరిష్ఠరత్నలోష్ఠయోః సుహృద్విపక్షపక్షయోః .
తృణారవిన్దచక్షుషోః ప్రజామహీమహేన్ద్రయోః
సమప్రవృత్తికః కదా సదాశివం భజామ్యహమ్ .. 12..

(సమం ప్రవర్తయన్మనః కదా సదాశివం భజే ..)
కదా నిలిమ్పనిర్ఝరీనికుఞ్జకోటరే వసన్
విముక్తదుర్మతిః సదా శిరఃస్థమఞ్జలిం వహన్ .
విలోలలోలలోచనో లలామభాలలగ్నకః
(విముక్తలోలలోచనాలలామభాలలగ్నకం)
శివేతి మన్త్రముచ్చరన్ కదా సుఖీ భవామ్యహమ్ .. 13..

నిలిమ్పనాథనాగరీకదమ్బమౌలమల్లికా-
నిగుమ్ఫనిర్భరక్షరన్మధూష్ణికామనోహరః .
తనోతు నో మనోముదం వినోదినీమహర్నిశం
పరశ్రియః పరం పదం తదఙ్గజత్విషాం చయః .. 14..

ప్రచణ్డవాడవానలప్రభాశుభప్రచారణీ
మహాష్టసిద్ధికామినీజనాఽవహూతజల్పనా .
విముక్తవామలోచనావివాహకాలికధ్వనిః
శివేతి మన్త్రభూషణా జగజ్జయాయ జాయతామ్ .. 15..

ఇమం హి నిత్యమేవముక్తముత్తమోత్తమం స్తవం
పఠన్స్మరన్బ్రువన్నరో విశుద్ధిమేతిసన్తతమ్ .
హరే గురౌ సుభక్తిమాశు యాతి నాఽన్యథా గతిం
విమోహనం హి దేహినాం సుశఙ్కరస్య చిన్తనమ్ .. 16..

పూజావసానసమయే దశవక్త్రగీతం
యః శమ్భుపూజనపరం పఠతి ప్రదోషే .
తస్య స్థిరాం రథగజేన్ద్రతురఙ్గయుక్తాం
లక్ష్మీం సదైవ సుముఖీం ప్రదదాతి శమ్భుః .. 17..

(లక్ష్మీం ప్రసాదసమయే ప్రదదాతి శమ్భుః)