॥ শ্রীশিভ়তাণ্ডভ়স্তোত্রম্ ॥

অথ রাভ়ণকৃতশিভ়তাণ্ডভ়স্তোত্রম্

জটাটভ়ীগলজ্জলপ্রভ়াহপাভ়িতস্থলে
গলেঽভ়লম্ব্য লম্বিতাং ভুজঙ্গতুঙ্গমালিকাম্ ।
ডমড্ডমড্ডমড্ডমন্নিনাদভ়ড্ডমর্ভ়যং
চকার চণ্ডতাণ্ডভ়ং তনোতু নঃ শিভ়ঃ শিভ়ম্ ॥ ১॥

জটাকটাহসম্ভ্রমভ্রমন্নিলিম্পনির্ঝরী-
ভ়িলোলভ়ীচিভ়ল্লরীভ়িরাজমানমূর্দ্ধনি ।
ধগদ্ধগদ্ধগজ্জ্বলল্ললাটপট্টপাভ়কে
কিশোরচন্দ্রশেখরে রতিঃ প্রতিক্ষণং মম ॥ ২॥

ধরাধরেন্দ্রনন্দিনীভ়িলাসবন্ধুবন্ধুর-
স্ফুরদ্দিগন্তসন্ততিপ্রমোদমানমানসে ।
কৃপাকটাক্ষধোরণীনিরুদ্ধদুর্ধরাপদি
ক্বচিদ্দিগম্বরে(ক্বচিচ্চিদম্বরে) মনো ভ়িনোদমেতু ভ়স্তুনি ॥ ৩॥

জটাভুজঙ্গপিঙ্গলস্ফুরৎফণামণিপ্রভা-
কদম্বকুঙ্কুমদ্রভ়প্রলিপ্তদিগ্বধূমুখে ।
মদান্ধসিন্ধুরস্ফুরত্ত্বগুত্তরীযমেদুরে (সিন্ধুরাসুরত্ব)
মনো ভ়িনোদমদ্ভুতং বিভর্তু ভূতভর্তরি ॥ ৪॥

সহস্রলোচনপ্রভৃত্যশেষলেখশেখর-
প্রসূনধূলিধোরণীভ়িধূসরাঙ্ঘ্রিপীঠভূঃ ।
ভুজঙ্গরাজমালযা নিবদ্ধজাটজূটকঃ
শ্রিযৈ চিরায জাযতাং চকোরবন্ধুশেখরঃ ॥ ৫॥ (শ্রিযে)
ললাটচত্বরজ্বলদ্ধনঞ্জযস্ফুলিঙ্গভা-
নিপীতপঞ্চসাযকং নমন্নিলিম্পনাযকম্ । (স্ফুলিঙ্গযা নিপীত)
সুধামযূখলেখযা ভ়িরাজমানশেখরং
মহাকপালি সম্পদে শিরো জটালমস্তু নঃ ॥ ৬॥

(মহঃ কপালি সম্পদে সরিজ্জটালমস্তু নঃ ॥)
করালভালপট্টিকাধগদ্ধগদ্ধগজ্জ্বল-
দ্ধনঞ্জযাহুতীকৃতপ্রচণ্ডপঞ্চসাযকে ।
ধরাধরেন্দ্রনন্দিনীকুচাগ্রচিত্রপত্রক-
প্রকল্পনৈকশিল্পিনি ত্রিলোচনে রতির্মম ॥ ৭॥

নভ়ীনমেঘমণ্ডলীনিরুদ্ধদুর্ধরস্ফুরৎ-
কুহূনিশীথিনীতমঃপ্রবন্ধবদ্ধকন্ধরঃ । (প্রবদ্ধবদ্ধ)
নিলিম্পনির্ঝরীধরস্তনোতু কৃত্তিসিন্ধুরঃ
কলানিধানবন্ধুরঃ শ্রিযং জগদ্ধুরন্ধরঃ ॥ ৮॥

প্রফুল্লনীলপঙ্কজপ্রপঞ্চকালিমপ্রভা-
ঽভ়লম্বিকণ্ঠকন্দলীরুচিপ্রবদ্ধকন্ধরম্ ।
স্মরচ্ছিদং পুরচ্ছিদং ভভ়চ্ছিদং মখচ্ছিদং
গজচ্ছিদান্ধকচ্ছিদং তমন্তকচ্ছিদং ভজে ॥ ৯॥

অখর্ভ়(অগর্ভ়)সর্ভ়মঙ্গলাকলাকদম্বমঞ্জরী-
রসপ্রভ়াহমাধুরীভ়িজৃম্ভণামধুভ়্রতম্ ।
স্মরান্তকং পুরান্তকং ভভ়ান্তকং মখান্তকং
গজান্তকান্ধকান্তকং তমন্তকান্তকং ভজে ॥ ১০॥

জযত্বদভ্রভ়িভ্রমভ্রমদ্ভুজঙ্গমশ্বস- (জযত্যদ)
দ্বিনির্গমৎক্রমস্ফুরৎকরালভালহভ়্যভ়াট্ ।
ধিমিদ্ধিমিদ্ধিমিদ্ধ্বনন্মৃদঙ্গতুঙ্গমঙ্গল- (ধিমিং ধিমিং ধিমিং ধ্বনন্)
ধ্বনিক্রমপ্রভ়র্তিতপ্রচণ্ডতাণ্ডভ়ঃ শিভ়ঃ ॥ ১১॥

দৃষদ্বিচিত্রতল্পযোর্ভুজঙ্গমৌক্তিকস্রজোর্-
গরিষ্ঠরত্নলোষ্ঠযোঃ সুহৃদ্বিপক্ষপক্ষযোঃ ।
তৃণারভ়িন্দচক্ষুষোঃ প্রজামহীমহেন্দ্রযোঃ
সমপ্রভ়ৃত্তিকঃ কদা সদাশিভ়ং ভজাম্যহম্ ॥ ১২॥

(সমং প্রভ়র্তযন্মনঃ কদা সদাশিভ়ং ভজে ॥)
কদা নিলিম্পনির্ঝরীনিকুঞ্জকোটরে ভ়সন্
ভ়িমুক্তদুর্মতিঃ সদা শিরঃস্থমঞ্জলিং ভ়হন্ ।
ভ়িলোললোললোচনো ললামভাললগ্নকঃ
(ভ়িমুক্তলোললোচনাললামভাললগ্নকং)
শিভ়েতি মন্ত্রমুচ্চরন্ কদা সুখী ভভ়াম্যহম্ ॥ ১৩॥

নিলিম্পনাথনাগরীকদম্বমৌলমল্লিকা-
নিগুম্ফনির্ভরক্ষরন্মধূষ্ণিকামনোহরঃ ।
তনোতু নো মনোমুদং ভ়িনোদিনীমহর্নিশং
পরশ্রিযঃ পরং পদং তদঙ্গজত্বিষাং চযঃ ॥ ১৪॥

প্রচণ্ডভ়াডভ়ানলপ্রভাশুভপ্রচারণী
মহাষ্টসিদ্ধিকামিনীজনাঽভ়হূতজল্পনা ।
ভ়িমুক্তভ়ামলোচনাভ়িভ়াহকালিকধ্বনিঃ
শিভ়েতি মন্ত্রভূষণা জগজ্জযায জাযতাম্ ॥ ১৫॥

ইমং হি নিত্যমেভ়মুক্তমুত্তমোত্তমং স্তভ়ং
পঠন্স্মরন্‌ব্রুভ়ন্নরো ভ়িশুদ্ধিমেতিসন্ততম্ ।
হরে গুরৌ সুভক্তিমাশু যাতি নাঽন্যথা গতিং
ভ়িমোহনং হি দেহিনাং সুশঙ্করস্য চিন্তনম্ ॥ ১৬॥

পূজাভ়সানসমযে দশভ়ক্ত্রগীতং
যঃ শম্ভুপূজনপরং পঠতি প্রদোষে ।
তস্য স্থিরাং রথগজেন্দ্রতুরঙ্গযুক্তাং
লক্ষ্মীং সদৈভ় সুমুখীং প্রদদাতি শম্ভুঃ ॥ ১৭॥

(লক্ষ্মীং প্রসাদসমযে প্রদদাতি শম্ভুঃ)