.. శ్రీగురుపరమ్పరాపాఠ ..

సర్వదేశదశాకాలేష్వవ్యాహతపరాక్రమా.
రామానుజార్యదివ్యాజ్ఞా వర్ద్ధతామభివర్ద్ధతామ్ ..1..

శ్రీరామానుజార్యదివ్యాజ్ఞా ప్రతివాసరముజ్వలా.
దిగన్తవ్యాపినీ భూయాత్ సా హి లోకహితైషిణీ .. 2..

శ్రీమన్ శ్రీరంగ శ్రియమనుపద్రవామనుదినం సంవర్ద్ధయ .
శ్రీమన్ శ్రీరంగ శ్రియమనుపద్రవామనుదినం సంవర్ద్ధయ ..3..

నమః శ్రీశైలనాథాయ కున్తీనగరజన్మనే.
ప్రసాదలబ్ధపరమప్రాప్యకైఙ్కర్యశాలినే ..4..

శ్రీశైలేశదయాపాత్రం ధీభక్త్యాదిగుణార్ణవమ్ .
యతీన్ద్రప్రవణం వన్దే రమ్యజామాతరం మునిమ్ .. 5..

లక్ష్మీనాథసమారమ్భాం నాథయామునమధ్యమామ్ ..

అస్మదాచార్యపర్యన్తాం వన్దే గురుపరమ్పరామ్ .. 6..

యో నిత్యమచ్యుతపదామ్బుజయుగ్మరుక్మ
వ్యామోహతస్తదితరాణి తృణాయ మేనే ..

అస్మద్గురోర్భగవతోస్య దయైకసిన్ధోః
రామానుజస్య చరణౌ శరణం ప్రపద్యే .. 7..

మాతా పితా యువతయస్తనయా విభూతి:
సర్వం యదేవ నియమేన మదన్వయానామ్ ..

ఆద్యస్య న: కులపతేర్బకులాభిరామం
శ్రీమత్తదంఘ్రియుగలం ప్రణమామి మూర్ధ్నా ..8..

భూతం సరశ్చ మహదాహ్వయభట్టనాథ
శ్రీభక్తిసారకులశేఖరయోగివాహాన్
భక్తాంఘ్రిరేణుపరకాలయతీన్ద్రమిశ్రాన్
శ్రీమత్పరాంకుశమునిం ప్రణతోఽస్మి నిత్యమ్ ..9..

గురుముఖమనధీత్య ప్రాహ వేదానశేషాన్,
నరపతిపరిక్లృప్తం శుల్కమాదాతుకామః ..

స్వసురమమరవన్ద్యం రఙ్గనాథస్య సాక్షాత్,
ద్విజకులతిలకం తం విష్ణుచిత్తం నమామి .. 10 ..

అస్మద్దేశికమస్మదీయపరమాచార్యానశేషాన్ గురూన్
శ్రీమల్లక్ష్మణయోగిపుఙ్గవమహాపూర్ణౌ మునిం యామునమ్ .
రామం పద్మవిలోచనం మునివరం నాథం శఠద్వేశిణమ్
సేనేశం శ్రీయమిన్దిరాసహచరం నారాయణం సంశ్రయే .. 11 ..