.. શ્રીગુરુપરમ્પરાપાઠ ..

સર્વદેશદશાકાલેષ્વવ્યાહતપરાક્રમા.
રામાનુજાર્યદિવ્યાજ્ઞા વર્દ્ધતામભિવર્દ્ધતામ્ ..૧..

શ્રીરામાનુજાર્યદિવ્યાજ્ઞા પ્રતિવાસરમુજ્વલા.
દિગન્તવ્યાપિની ભૂયાત્ સા હિ લોકહિતૈષિણી .. ૨..

શ્રીમન્ શ્રીરંગ શ્રિયમનુપદ્રવામનુદિનં સંવર્દ્ધય .
શ્રીમન્ શ્રીરંગ શ્રિયમનુપદ્રવામનુદિનં સંવર્દ્ધય ..૩..

નમઃ શ્રીશૈલનાથાય કુન્તીનગરજન્મને.
પ્રસાદલબ્ધપરમપ્રાપ્યકૈઙ્કર્યશાલિને ..૪..

શ્રીશૈલેશદયાપાત્રં ધીભક્ત્યાદિગુણાર્ણવમ્ .
યતીન્દ્રપ્રવણં વન્દે રમ્યજામાતરં મુનિમ્ .. ૫..

લક્ષ્મીનાથસમારમ્ભાં નાથયામુનમધ્યમામ્ ..

અસ્મદાચાર્યપર્યન્તાં વન્દે ગુરુપરમ્પરામ્ .. ૬..

યો નિત્યમચ્યુતપદામ્બુજયુગ્મરુક્મ
વ્યામોહતસ્તદિતરાણિ તૃણાય મેને ..

અસ્મદ્ગુરોર્ભગવતોસ્ય દયૈકસિન્ધોઃ
રામાનુજસ્ય ચરણૌ શરણં પ્રપદ્યે .. ૭..

માતા પિતા યુવતયસ્તનયા વિભૂતિ:
સર્વં યદેવ નિયમેન મદન્વયાનામ્ ..

આદ્યસ્ય ન: કુલપતેર્બકુલાભિરામં
શ્રીમત્તદંઘ્રિયુગલં પ્રણમામિ મૂર્ધ્ના ..૮..

ભૂતં સરશ્ચ મહદાહ્વયભટ્ટનાથ
શ્રીભક્તિસારકુલશેખરયોગિવાહાન્
ભક્તાંઘ્રિરેણુપરકાલયતીન્દ્રમિશ્રાન્
શ્રીમત્પરાંકુશમુનિં પ્રણતોઽસ્મિ નિત્યમ્ ..૯..

ગુરુમુખમનધીત્ય પ્રાહ વેદાનશેષાન્,
નરપતિપરિક્લૃપ્તં શુલ્કમાદાતુકામઃ ..

સ્વસુરમમરવન્દ્યં રઙ્ગનાથસ્ય સાક્ષાત્,
દ્વિજકુલતિલકં તં વિષ્ણુચિત્તં નમામિ .. ૧૦ ..

અસ્મદ્દેશિકમસ્મદીયપરમાચાર્યાનશેષાન્ ગુરૂન્
શ્રીમલ્લક્ષ્મણયોગિપુઙ્ગવમહાપૂર્ણૌ મુનિં યામુનમ્ .
રામં પદ્મવિલોચનં મુનિવરં નાથં શઠદ્વેશિણમ્
સેનેશં શ્રીયમિન્દિરાસહચરં નારાયણં સંશ્રયે .. ૧૧ ..