శ్రీమన్త్రరాజపదస్తోత్రమ్

శ్రీ మన్త్రరాజపదస్తోత్రమ్ ..

శ్రీ ఈశ్వర ఉవాచ
వృత్తోత్ఫుల్ల విశాలాక్షం విపక్షక్షయదీక్షితమ్.
నినాదత్రస్తవిశ్వాణ్డం విష్ణుం ఉగ్రం నమామ్యహమ్ .. 1 ..

సర్వైరవధ్యతాం ప్రాప్తం సబలౌఘం దితేః సుతమ్.
నఖాగ్రైః శకలీచక్రే యస్తం వీరం నమామ్యహమ్ .. 2 ..

పదావష్టవ్యపాతాళం మూర్ధావిష్టత్రివిష్టపమ్.
భుజప్రవిష్టాష్టదిశం మహావిష్ణుం నమామ్యహమ్ .. 3 ..

జ్యోతీంష్యకె॒​న్దు నక్షత్రజ్వలనాదీన్యనుక్రమాత్.
జ్వలన్తి తేజసా యస్య తం జ్వలన్తం నమామ్యహమ్ .. 4 ..

సర్వేన్ద్రియైరపి వినా సర్వ సర్వత్ర సర్వదా.
యో జానాతి నమామ్యాద్యం తమహం సర్వతోముఖమ్ .. 5 ..

నరవత్ సింహవచ్చైవ యస్య రూపం మహాత్మనః.
మహాసటం మహాదంష్ట్రమ్ తం నృసింహం నమామ్యహమ్ .. 6 ..

యన్నామస్మరణాద్ భీతాః భూతవేతాళరాక్షసాః.
రోగాద్యాశ్చ ప్రణశ్యన్తి భీషణం తం నమామ్యహమ్ .. 7 ..

సర్వోఽపి యం సమాశ్రిత్య సకలం భద్రమశ్రుతే.
శ్రియా చ భద్రయా జుష్టః యస్తం భద్రం నమామ్యహమ్ .. 8 ..

సాక్షాత్ స్వకాలే సంప్రాప్తం మృత్యుం శత్రుగణాన్వితమ్.
భక్తానాం నాశయేద్ యస్తు మృత్యుమృత్యుం నమామ్యహమ్ .. 9 ..

నమస్కారాత్మకం యస్మై విధాయాఽఽత్మనివేదనమ్.
త్యక్తదుఃఖోఽఖిలాన్ కామాన్ అశ్నన్తం తం నమామ్యహమ్ .. 10 ..

దాసభూతాః స్వతస్సర్వే హ్యాత్మానః పరమాత్మనః.
అతోఽహమపి తే దాసః ఇతి మత్వా నమామ్యహమ్ .. 11 ..

శఙ్కరేణాఽఽదాత్ ప్రోక్తం పదానాం తత్త్వనిర్ణయమ్.
త్రిసన్ధ్యం యః పఠేత్ తస్య శ్రీర్విద్యాఽఽయుశ్చ వర్ధతే .. 12 ..