શ્રીરુદ્રયામલે શ્રીવિનાયકસ્તવરાજઃ

બીજાપૂરગદેક્ષુકાર્મુક રુજા ચક્રાબ્જપાશોત્પલ-
ત્રીહ્યગ્રસ્વવિષાણરત્નકલશપ્રોદ્યત્કરામ્ભોરુહઃ .
ધ્યેયો વલ્લભયા સપદ્મકરયાશ્લિષ્ટોજ્જ્વલદ્ભષયા
વિશ્વોત્પત્તિવિપત્તિસંસ્થિતિકરો વિઘ્નેશ ઇષ્ટાર્થદઃ .. ૧..

નમસ્તે સિદ્ધિલક્ષ્મીશ ગણાધિપ મહાપ્રભો .
વિઘ્નેશ્વર જગન્નાથ ગૌરીપુત્ર જગત્પ્રભો .. ૨..

જય વિઘ્નેશ્વર વિભો વિનાયક મહેશ્વર .
લમ્બોદર મહાબાહો સર્વદા ત્વં પ્રસીદ મે .. ૩..

મહાદેવ જગત્સ્વામિન્ મૂષિકારૂઢ શઙ્કર .
વિશાલાક્ષ મહાકાય માં ત્રાહિ પરમેશ્વર .. ૪..

કુઞ્જરાસ્ય સુરાધીશ મહેશ કરુણાનિધે .
દશબાહો મહારાજ મહાવક્ત્ર ચતુર્ભુજ .. ૫..

શૂર્પકર્ણ મહાકર્ણ ગણનાથ પ્રસીદ મે .
માતુલુઙ્ગધર સ્વામિન્ ગદાચક્રસમન્વિત .. ૬..

શઙ્ખશૂલસમાયુક્ત બીજાપૂરસમન્વિત .
ઇક્ષુકાર્મુકસંયુક્ત પદ્મહસ્ત પ્રસીદ મે .. ૭..

નાનાભરણસંયુક્ત રત્નકુમ્ભકર પ્રભો .
સર્ગસ્થિતિલયાધીશ પરમાત્મન્ જય પ્રભો .. ૮..

અનાથનાથ વિશ્વેશ વિઘ્નસઙ્ઘવિનાશન .
ત્રયીમૂર્તે સુરપતે બ્રહ્મવિષ્ણુશિવાત્મક .. ૯..

ત્રયીગુણ મહાદેવ પાહિ માં સર્વપાલક .
અણિમાદિગુણાધાર લક્ષ્મીભૂવિષ્ણુપૂજિત .. ૧૦..

ગૌરીશઙ્કરસમ્પૂજ્ય જય ત્વં ગણનાયક .
રતિમન્મથસંસેવ્ય મહીભૂદારસંસ્તુત .. ૧૧..

સિદ્ધ્યાઋદ્ધ્યામોદાદિસંસેવ્ય મહાગણપતે જય .
શઙ્ખપદ્માદિસંસેવ્ય નિરાલમ્બ નિરીશ્વર .. ૧૨..

નિષ્કલઙ્ક નિરાધાર પાહિ માં નિત્યમવ્યય .
અનાદ્ય જગતામાદ્ય પિતામહસુપૂજિત .. ૧૩..

ધૂમકેતો ગણાધ્યક્ષ મહામૂષકવાહન .
અનન્તપરમાનન્દ જય વિઘ્નેશ્વરેશ્વર .. ૧૪..

રત્નસિંહાસનાસીન કિરીટેન સુશોભિત .
પરાત્પર પરેશાન પરપૂરુષ પાહિ મામ્ .. ૧૫..

નિર્દ્વન્દ્વ નિર્ગુણાભાસ જપાપુષ્પસમપ્રભ .
સર્વપ્રમથસંસ્તુત્ય ત્રાહિ માં વિઘ્નનાયક .. ૧૬..

કુમારસ્ય ગુરો દેવ સર્વૈશ્વર્યપ્રદાયક .
સર્વાભીષ્ટપ્રદ સ્વામિન્ સર્વપ્રત્યૂહનાશક .. ૧૭..

શરણ્ય સર્વલોકાનાં શરણાગતવત્સલ .
મહાગણપતે નિત્યં માં પાલય કૃપાનિધે .. ૧૮..

એવં શ્રીગણનાથસ્ય સ્તવરાજમનુત્તમમ્ .
યઃ પઠેચ્છૃણુયાન્નિત્યં પ્રત્યૂહૈઃ સ વિમુચ્યતે .. ૧૯..

અશ્વમેધસમં પુણ્યફલં પ્રાપ્નોત્યનુત્તમમ્ .
વશીકરોતિ ત્રૈલોક્યં પ્રાપ્ય સૌભાગ્યમુત્તમમ્ .. ૨૦..

રમતે દેવકન્યાભિઃ સ નિત્યં સાધકોત્તમઃ .
સર્વાન્ ભોગાન્ પ્રભુઙ્ક્તેઽસૌ દુર્લભાંશ્ચ દિને દિને .. ૨૧..

સર્વાભીષ્ટમવાપ્નોતિ શીઘ્રમેવ સુદુર્લભમ્ .
મહાગણેશસાન્નિધ્યં પ્રાપ્નોત્યેવ ન સંશયઃ .. ૨૨..