శ్రీరుద్రయామలే శ్రీవినాయకస్తవరాజః

బీజాపూరగదేక్షుకార్ముక రుజా చక్రాబ్జపాశోత్పల-
త్రీహ్యగ్రస్వవిషాణరత్నకలశప్రోద్యత్కరామ్భోరుహః .
ధ్యేయో వల్లభయా సపద్మకరయాశ్లిష్టోజ్జ్వలద్భషయా
విశ్వోత్పత్తివిపత్తిసంస్థితికరో విఘ్నేశ ఇష్టార్థదః .. 1..

నమస్తే సిద్ధిలక్ష్మీశ గణాధిప మహాప్రభో .
విఘ్నేశ్వర జగన్నాథ గౌరీపుత్ర జగత్ప్రభో .. 2..

జయ విఘ్నేశ్వర విభో వినాయక మహేశ్వర .
లమ్బోదర మహాబాహో సర్వదా త్వం ప్రసీద మే .. 3..

మహాదేవ జగత్స్వామిన్ మూషికారూఢ శఙ్కర .
విశాలాక్ష మహాకాయ మాం త్రాహి పరమేశ్వర .. 4..

కుఞ్జరాస్య సురాధీశ మహేశ కరుణానిధే .
దశబాహో మహారాజ మహావక్త్ర చతుర్భుజ .. 5..

శూర్పకర్ణ మహాకర్ణ గణనాథ ప్రసీద మే .
మాతులుఙ్గధర స్వామిన్ గదాచక్రసమన్విత .. 6..

శఙ్ఖశూలసమాయుక్త బీజాపూరసమన్విత .
ఇక్షుకార్ముకసంయుక్త పద్మహస్త ప్రసీద మే .. 7..

నానాభరణసంయుక్త రత్నకుమ్భకర ప్రభో .
సర్గస్థితిలయాధీశ పరమాత్మన్ జయ ప్రభో .. 8..

అనాథనాథ విశ్వేశ విఘ్నసఙ్ఘవినాశన .
త్రయీమూర్తే సురపతే బ్రహ్మవిష్ణుశివాత్మక .. 9..

త్రయీగుణ మహాదేవ పాహి మాం సర్వపాలక .
అణిమాదిగుణాధార లక్ష్మీభూవిష్ణుపూజిత .. 10..

గౌరీశఙ్కరసమ్పూజ్య జయ త్వం గణనాయక .
రతిమన్మథసంసేవ్య మహీభూదారసంస్తుత .. 11..

సిద్ధ్యాఋద్ధ్యామోదాదిసంసేవ్య మహాగణపతే జయ .
శఙ్ఖపద్మాదిసంసేవ్య నిరాలమ్బ నిరీశ్వర .. 12..

నిష్కలఙ్క నిరాధార పాహి మాం నిత్యమవ్యయ .
అనాద్య జగతామాద్య పితామహసుపూజిత .. 13..

ధూమకేతో గణాధ్యక్ష మహామూషకవాహన .
అనన్తపరమానన్ద జయ విఘ్నేశ్వరేశ్వర .. 14..

రత్నసింహాసనాసీన కిరీటేన సుశోభిత .
పరాత్పర పరేశాన పరపూరుష పాహి మామ్ .. 15..

నిర్ద్వన్ద్వ నిర్గుణాభాస జపాపుష్పసమప్రభ .
సర్వప్రమథసంస్తుత్య త్రాహి మాం విఘ్ననాయక .. 16..

కుమారస్య గురో దేవ సర్వైశ్వర్యప్రదాయక .
సర్వాభీష్టప్రద స్వామిన్ సర్వప్రత్యూహనాశక .. 17..

శరణ్య సర్వలోకానాం శరణాగతవత్సల .
మహాగణపతే నిత్యం మాం పాలయ కృపానిధే .. 18..

ఏవం శ్రీగణనాథస్య స్తవరాజమనుత్తమమ్ .
యః పఠేచ్ఛృణుయాన్నిత్యం ప్రత్యూహైః స విముచ్యతే .. 19..

అశ్వమేధసమం పుణ్యఫలం ప్రాప్నోత్యనుత్తమమ్ .
వశీకరోతి త్రైలోక్యం ప్రాప్య సౌభాగ్యముత్తమమ్ .. 20..

రమతే దేవకన్యాభిః స నిత్యం సాధకోత్తమః .
సర్వాన్ భోగాన్ ప్రభుఙ్క్తేఽసౌ దుర్లభాంశ్చ దినే దినే .. 21..

సర్వాభీష్టమవాప్నోతి శీఘ్రమేవ సుదుర్లభమ్ .
మహాగణేశసాన్నిధ్యం ప్రాప్నోత్యేవ న సంశయః .. 22..