ಶ್ರೀಚಿದಮ್ಬರಸೂರಿಕೃತಂ ಶ್ರೀವಿಘ್ನೇಶ್ವರಮಾನಸಿಕಮ್

ವಿಘ್ನೇಶ್ವರಮಾನಸಿಕಮ್
ಶ್ರೀಮಹಾಗಣಪತಯೇ ನಮಃ .
ವಿಘ್ನೇಶ್ವರಸ್ಯ ವಿಷಯೇ ಹೃದಿ ಮಾನಸಾಖ್ಯಾಂ
ಪೂಜಾಂ ವಿಧಾತುಮುಚಿತಂ ಸರಸಂ ಪ್ರಬನ್ಧಮ್ .
ವಿದ್ವಜ್ಜನೇ ಧುರಿ ಚಿದಮ್ಬರ ಏಷ ನಮ್ರಃ
ಶ್ಲೋಕೈರ್ವಸನ್ತತಿಲಕೈರ್ವಿತನೋತಿ ಶೀಘ್ರಮ್ .. ೧..

ಕಾನ್ತಾಕೃತಿಂ ಗಮಿತಯಾ ಕಮನೀಯಕಾನ್ತ್ಯಾ
ಸತ್ಯಾ ಸದಾಪಿ ನಿಜಯಾ ನವರತ್ನಪೀಠೇ .
ಕಾನ್ತಂ ವಸನ್ತಮಮರೇನ್ದ್ರಮುಖಾಗ್ರವನ್ದ್ಯಂ
ದನ್ತಾವಲೇನವದನಂ ಹೃದಿ ಭಾವಯಾಮಿ .. ೨..

ಆಗಚ್ಛ ದನ್ತಿವದನಾದ್ಯ ಜಯಾಸಮೇತಃ
ಸತ್ಯಾಖ್ಯಯಾ ದಯಿತಯಾ ಸಹ ಪೂಜನಾಯ .
ಅಲ್ಪಾಂ ಕೃತಾಮಪಿ ಮಯಾ ತ್ವಯಿ ದೇವ ಪೂಜಾಂ
ಸ್ವೀಕೃತ್ಯ ಭಕ್ತವಶಗೇಶ ಮಯಿ ಪ್ರಸೀದ .. ೩..

ರತ್ನೈಃ ಕೃತಂ ನವಭಿರತ್ರ ತು ಚಿತ್ರಚಿತ್ರಂ
ಪಾರೀನ್ದ್ರವೇಷಮಮರೇನ್ದ್ರಕರೋಪನೀತಮ್ .
ಆಸ್ಥಾಯ ಚಾಸನಮಿದಂ ಧೃತವಲ್ಲಭಸ್ತ್ವಂ
ಸಾಮ್ರಾಜ್ಯಮಾಕಲಯ ಮೇ ಗಜವಕ್ತ್ರ ಚಿತ್ತೇ .. ೪..

ವೇದಾನ್ತಕಾನನಚರಂ ವಿವಿಧಾಹವಾದಿ-
ವೇಶನ್ತಕೢಪ್ತವಿಹೃತಿಂ ವಿಬುಧೇನ್ದ್ರಭಾವ್ಯಮ್ .
ವಿಘ್ನೇಶ್ವರಂ ವಿಧೃತವಲ್ಲಭಮಙ್ಕದೇಶ
ಆವಾಹಯಾಮಿ ಹೃದಯೇ ಸದಯಾನ್ತರಙ್ಗಮ್ .. ೫..

ಗಙ್ಗಾಯಮಸ್ವಸೃಜಲೈರ್ಹರಿರತ್ನಮುಕ್ತಾ-
ಪಾತ್ರೇಽರ್ಪಿತೈಃ ಸುರಭಿಭಿಃ ಸುಖಶೀತಲೈಶ್ಚ .
ಮೃದ್ವಙ್ಗುಲೀದಲಯುತೇ ಪದಪದ್ಮಯುಗ್ಮೇ
ಪಾದ್ಯಕ್ರಮಂ ಕಲಯ ಪದ್ಮಮುಖ ಪ್ರಭೋ ತ್ವಮ್ .. ೬..

ಸಹ್ಯಾದ್ರಿಜಾಹೃತಮಸಹ್ಯಮಹಾಘಹಾರಿ
ದೂರ್ವಾಗ್ರದರ್ಭಸುಮಗರ್ಭಮದಕ್ಷತಾಢ್ಯಮ್ .
ಭರ್ಮಾಗ್ರಪಾತ್ರಪರಿಪೂರ್ಣಮಿದಂ ಮಹಾರ್ಘ-
ಮರ್ಧ್ಯಂ ಗೃಹಾಣ ಮದನರ್ಧವಪುರ್ಗಜಾಸ್ಯ .. ೭..

ಮಲ್ಲೀಪ್ರಸೂನನವಚಮ್ಪಕಕುಡ್ಮಲೌಘ-
ಸೌರಭ್ಯನಿರ್ನರಮುಪಾಸಕಚಿತ್ತಶುಭ್ರಮ್ .
ವ್ಯೋಮಾಪಗಾಸಲಿಲಮದ್ಯ ಮಯಾ ಪ್ರದತ್ತ-
ಮಾಚಮ್ಯತಾಂ ಗಜಮುಖ ಪ್ರಣತಾರ್ತಿಹಾರಿನ್ .. ೮..

ಮೋಚಾಫಲೇನ ನವಶರ್ಕರಯಾ ಘೃತೇನ
ಗವ್ಯೇನ ಸಾಧು ಮಧುನಾ ತ್ವಧುನಾ ಪ್ರಣೀತಮ್ .
ಪಞ್ಚಾಮೃತಂ ಗಜಮುಖಾನತಪಞ್ಚತಾರೇ
ಪಞ್ಚಾನನಾತ್ಮಜ ವಿಧೇಹಿ ನಿಮಜ್ಜನಾಯ .. ೯..

ಸನ್ಮಾನಸಾದಿಶುಚಿಭಿರ್ಧುರಿ ಮಾನಸಾಖ್ಯಂ
ಸತ್ತೀರ್ಥ ಕೋಟಿಜಠರಾಹೃತತೀರ್ಥಸಾರ್ಥೈಃ .
ಸಂಸ್ನಾಪಯಾಮಿ ತವ ಮಙ್ಗಲದಿವ್ಯದೇಹ-
ಮುದ್ವರ್ತನೇನ ಸಹ ವಾರಣರಾಜವಕ್ತ್ರ .. ೧೦..

ಚೀನಾಮ್ಬರೇಣ ಕನಕಾಞ್ಚಲಮಞ್ಜುಲೇನ
ದಿವ್ಯಂ ತ್ವದಙ್ಗಮಖಿಲಂ ಜಲಮಜ್ಜನಾರ್ದ್ರಮ್ .
ದ್ರಾಙ್ ಮಾರ್ಜಯಾಮಿ ನಿಖಿಲಾಘನಿಮಾರ್ಜನಾಯ
ಕಿಞ್ಚಿದ್ ಗಜಾಸ್ಯ ಧುರಿ ತಿಷ್ಠ ಮಮ ಪ್ರಭೋ ತ್ವಮ್ .. ೧೧..

ಕಾರ್ಪಾಸಸೂತ್ರಗುಣಿತಂ ವಿಶದಂ ಪ್ರಕೢಪ್ತಂ
ಯಜ್ಞೋಪವೀತಯುಗಲಂ ನಿಗಲಂ ದ್ವಿಜತ್ವೇ .
ಹೈಮೈರಥಾಸಮಗುಣೈಃ ಸಹ ಯಜ್ಞಸೂತ್ರೈ-
ರಾಮಂ ಚ ಮುಞ್ಜಮಯಿ ಕಾರ್ಷ್ಣ್ಯಹತಂ ಧೃತಂ ಚ (? ) .. ೧೨..

ಜಾಮ್ಬೂನದೈರ್ವಿರಚಿತೇ ನವಭಾಜನೇಽಗ್ರೇ
ದಘ್ನಾ ಸಹೈವ ಮಧುನಾ ಮಿಲಿತಂ ಪ್ರಕ್ಲೃಪ್ತಮ್ .
ತದ್ವಚ್ಛರಾವಪಿಹಿತಂ ಮಧುಪರ್ಕಮೇತ
ಹಸ್ತೇ ತವಾದ್ಯ ವಿತರಾಮಿ ಚ ಹಸ್ತಿವಕ್ತ್ರ .. ೧೩..

ಕಸ್ತೂರಿಕಾಮೃಗಮದೈಃ ಪರಿಮೃದ್ಯ ಕ್ಲೃಪ್ತಂ
ತ್ವತ್ಕೀರ್ತಿಸಾರಮಿವ ಶೋಭನಗನ್ಧಪೂರಮ್ .
ಹಸ್ತೀನ್ದ್ರವಕ್ತ್ರ ಸುಗುಣೋರ್ಮಿಲಮಙ್ಗಮಙ್ಗ
ಶ್ರೀಗನ್ವಪಙ್ಕಮನುಲಿಮ್ಪ ನಿಲಿಮ್ಪನಾಯ .. ೧೪..

ಶಾಲ್ಯಕ್ಷತೈರತಿತರಾಮಪರಿಕ್ಷತಾಗ್ರೈಃ
ಶ್ರೀಕುಙ್ಕುಮಾಙ್ಕಪರಿಶೋಭಿನಿಜಾಙ್ಗಭಾಗೈಃ .
ಗನ್ಧೋಪರಿ ಸ್ಫುಟತರೀಕರಣಾಯ ಹಸ್ತಿ-
ವಕ್ತ್ರಾರ್ಚಯಾಮಿ ಹರಿಚನ್ದನಚರ್ಚಿತ ತ್ವಾಮ್ .. ೧೫..

ಮನ್ದಾರಕುನ್ದಕರವೀರಕಚಮ್ಪಕಾಗ್ರ್ಯ-
ಮಲ್ಲೀಮುಖಾನಿ ಕುಸುಮಾನಿ ತವಾರ್ಪಯಾಮಿ .
ತಾನ್ಯಙ್ಗಮಙ್ಗಮಪರಿಕ್ಷತ ಭೂಷಯ ತ್ವಂ
ಸತ್ರ್ಯೇಕವಿಂಶತಿದಲೈರ್ಗಜರಾಜವಕ್ತ್ರ .. ೧೬..

ಛತ್ರಧ್ವಜಾಮ್ಬುಜಘಟಾಙ್ಕುಶರೇಖಿಕಾಙ್ಕೌ
ಪಾಥೋಜಮಾರ್ದವವಿಮರ್ದನನಿರ್ದಯಾಙ್ಗೌ .
ಹಸ್ತೀನ್ದ್ರವಕ್ತ್ರ ತವ ಭರ್ಮವಿನಿರ್ಮಿತಾಭ್ಯಾಂ
ಸಂಯೋಜಯಾಮಿ ಚರಣೌ ಮಣಿಪಾದುಕಾಭ್ಯಾಮ್ .. ೧೭..

ಕಣ್ಠೇ ಕರೇ ಶಿರಸಿ ತೇ ಮಣಿನಿಷ್ಕಭೂಷಾಂ
ರತ್ನಚಿತಂ ಚ ಕಟಕಂ ಮಕುಟಂ ಮಣೀದ್ಧಮ್ .
ಅಙ್ಗೇಽಖಿಲೇ ಕನಕಭೂಷಣಜಾಲಕಾ ನಿ
ಭಕ್ತ್ಯಾ ಸಹೈವ ಘಟಯೇ ಕರಟೇನ್ದ್ರವಕ್ತ್ರ .. ೧೮..

ನಕ್ಷತ್ರಪಙ್ಕ್ತಿನಿಭಮೌಕ್ತಿಕರಾಜಿರಾಜ-
ಮಾನಾಞ್ಚಲಂ ಚರಸುಧಾಕರಮಣ್ಡಲಾಭಮ್ .
ಶ್ವೇತಾತಪತ್ರಮತಿಚಿತ್ರಮಿಭೇನ್ದ್ರವಕ್ತ್ರ
ಮೂರ್ಧೋಪರಿ ಸ್ಫುಟತರಂ ತವ ಧಾರಯಾಮಿ .. ೧೯..

ಚಾಮೀಕರಸ್ಫುರಿತರತ್ನವಿಚಿತ್ರದಣ್ಡೌ
ಚಾರುಪ್ರಭಾಲಿರುಚಿರೌ ತವ ಚಾಮರೌ ದ್ವೌ .
ಸ್ನಾನಕ್ಷಣಾವಸರಘರ್ಮಪಯಃಕಣಾರ್ದ್ರೇ
ಸಞ್ಚಾಲಯಾಮಿ ಗಜವಕ್ತ್ರ ಮುಖೇ ಕರಾಭ್ಯಾಮ್ .. ೨೦..

ನೂತ್ನಂ ಚ ರತ್ನಚರಮಾಙ್ಗಮುದಾರಮಗ್ರೇ
ರೂಪೋದ್ವಹಂ ಚ ಮಣಿದರ್ಪಣಮರ್ಪಯಾಮಿ .
ಭಾದರ್ಪದರ್ಪಕವಪುರ್ಜಯಿನೀಂ ತವಾದ್ಯ
ಕಲ್ಯಾಣಮೂರ್ತಿಮಿಭವಕ್ತ್ರ ವಿಲೋಕಯಾತ್ರ .. ೨೧..

ಅಙ್ಗಾರಸಙ್ಗಸುರಭಿಂ ಸುರಭಿಪ್ರಜಾತ-
ಹೈಯಙ್ಗವೀನಘೃತಯುಕ್ತದಶಾಙ್ಗಧೂಪಮ್ .
ಘ್ರಾಣೇನ್ದ್ರಿಯಪ್ರಿಯಕರಂ ಪರಿಜಿಘ್ರ ಶೀಘ್ರಂ
ಭಕ್ತ್ಯಾರ್ಪಿತಂ ಗಜಮುಖ ಪ್ರಿಯಗನ್ಧ ದೇವ .. ೨೨..

ಬಾಹ್ಯಾನ್ಧಕಾರಗುಣಬನ್ಧನಲೋಕಬನ್ಧು-
ಮಾಜ್ಯಾಢ್ಯಪಾತ್ರಕೃತವರ್ತಿಸಮುಜ್ಜ್ವಲಂ ತೇ .
ತ್ರೈಲೋಕ್ಯಗಾಢತಿಮಿರಾಪಹಭಾಸಿ ವಕ್ತ್ರೇ
ಸನ್ದರ್ಶಯಾಮಿ ಧುರಿ ದೀಪಮಿಭೇನ್ದ್ರವಕ್ತ್ರ .. ೨೩..

ಮೋಚಾದ ಘಿತ್ಥಪನಸಾಮ್ರಫಲಾದಿಯುಕ್ತಂ
ಭಕ್ಷೌಘಶಷ್ಕುಲಿಸಲಡ್ಡುಕಮೋದಕಾಢ್ಯಂ
ಸೌವರ್ಣವರ್ಣಸಮಸೂಪಘೃತೌಘಪೂರ್ಣಮ್ .
ಶಾಲ್ಯನ್ನಮೇತದುಪಭುಙ್ಕ್ಷ್ವ ಗಜಾಸ್ಯ ಚಾರು .. ೨೪..

ಏಲಾಲವಙ್ಗಸುಮಚಮ್ಪಕಕುಡ್ಮಲಾಗ್ರ-
ಕರ್ಪೂರವಾಸಿತಮುದಾರಮುಶೀರಗನ್ಧಿ .
ಪಾನೀಯಮಭ್ರಸರಿತಃ ಕಮನೀಯಶುಭ್ರ-
ಮಾನೀಯತಾಂ ಗಜಮುಖಾನನಮೇಕದನ್ತಮ್ .. ೨೫..

ವಾರ್ತಾಕಕಣ್ಟಕಿರಸಾರಕಕಾರವಲ್ಲಿ-
ರಮ್ಭಾಶಲಾಟುಮುಖಚಾರುಪದಾರ್ಥಜಾತಮ್ .
ಆಜ್ಯಾಕ್ತಸರ್ಷಪಸಜೀರಕಹಿಙ್ಗುಕೈಲಾ-
ಸಮ್ಭರ್ಜಿತಂ ಗಜಮುಖಾದ್ಧಿ ಪದೇ ಪದೇ ಚ .. ೨೬..

ಹಸ್ತೀನ್ದ್ರವಕ್ತ್ರ ಸರಸಂ ತು ಮಯಾ ಪ್ರದತ್ತಂ
ರಮ್ಭಾಫಲೈರ್ಮಧುಚರೈಃ ಸಿತಶರ್ಕರಾಭಿಃ .
ಏಲಾಮರೀಚಿಸಮಶರ್ಕರದುಗ್ಧಸಿದ್ಧಂ
ಗೋಧೂಮತಣ್ಡುಲಸುರಾನ್ನಮುಪಾದದಸ್ವ .. ೨೭..

ಮಾಷೈಸ್ತಿಲೈಃ ಸಗುಡಶರ್ಕರನಾಲಿಕೇರೈ-
ರ್ಜಮ್ಬೀರಸರ್ಷಪವರಾಮ್ಲಫಲೈರುತಾನ್ಯೈಃ .
ತತ್ರ ಪ್ರಯೋಗಕಲಿತಾನಿ ವಿಚಿತ್ರಿತಾನಿ
ಸ್ವನ್ನಾನಿ ಭುಙ್ಕ್ಷ್ವ ಗಜವಕ್ತ್ರ ರಸೇನ ಸಾಕಮ್ .. ೨೮..

ಮಲ್ಲೀಸುಮಚ್ಛವಿಸುವರ್ಣಸವರ್ಣಶಾಲಿ
ಶಾಲ್ಯನ್ನಮೇತದುಪಮರ್ದ್ಯ ಪಯಸ್ತಥೈವ .
ಏತೇ ಕರೇಣ ಮಿಲಿತೇ ವಿರಚಯ್ಯ ಶುದ್ಧೇ
ಭುಙ್ಕ್ಷ್ವೋಪದಂಶಿತಗುಡಂ ಗಜರಾಜವಕ್ತ್ರ .. ೨೯..

ಮಣ್ಡೋಪಯುಕ್ತದಧಿಖಣ್ಡಕಮೇತದೇತ-
ಚ್ಛುದ್ಧಾನ್ನಮಾಶು ಮಿಲಿತಂ ದ್ವಯಮದ್ಯ ಕ್ಲೃಪ್ತ್ವಾ .
ಖಣ್ಡಾಮ್ಲಸರ್ಷಪರಸಾಲವರೋಪದಂಶೈ-
ರ್ಭುಙ್ಕ್ಷ್ವೇಭವಕ್ತ್ರ ಸಹ ನಿಮ್ಬಕಖಣ್ಡಚೂರ್ಣೈಃ .. ೩೦..

ಜಮ್ಬೀರತಾಚ್ಚುತ ಸುಬಿಲ್ವಕರೀರಚೂತ-
ನಾರಙ್ಗಮುಖ್ಯಮುಪದಂಶಕುಲಂ ಸುಜಾತಮ್ .
ಹಿಙ್ಗ್ವಗ್ರಸರ್ಷಪರಸಾಲವರೋಟಮುಖ್ಯೈಃ (ಬಹುಸಾಧನಾಗ್ರೈಃ)
ಸಮ್ಮಿಶ್ರಿತಂ ಚ ಪರಿಶೀಲಯ ಭುಕ್ತಿಕಾಲೇ .. ೩೧..

ಔರ್ವಾರುಕಂ ಧುರಿ ರಸಾಯನಮೇತದೇತದ್
ಗೌಡಂ ತು ಪಾನಕಮಿದಂ ಸರಸೇಕ್ಷುಸಾರಮ್ .
ಕಾಪಿತ್ಥಪಾನಕಮಿದಂ ಕರಿವಕ್ತ್ರ ಕಿಞ್ಚಿತ್
ಕಿಞ್ಚಿತ್ ಪಿಬೈಷು ವಿಭವಾಯ ಯಥೇಷ್ಟತೋಽದ್ಯ ... ೩೨..

ಸತ್ಕೃಷ್ಣನಿಮ್ಬದಲನಾಗರಹಿಙ್ಗುಬಾಲ-
ರಮ್ಭಾಗ್ರದಣ್ಡವರಸೈನ್ಧವಜಮ್ಭಸಾರೈಃ .
ಆಲೋಡಿತಂ ಪರಿಮಲೈರ್ಮಿಲಿತಂ ಗಜಾಸ್ಯ
ತ್ವಂ ನೀರತಕ್ರಮುಪಭುಙ್ಕ್ಷ್ವ ಚ ದಾಹಶಾನ್ತ್ಯೈ .. ೩೩..

ಹೇಮ್ನಾ ಕೃತೇ ಮಣಿಚಿತೇ ರುಚಿರೇಽತ್ರ ಪಾತ್ರೇ
ಹೇಮಾವತೀಜಲಮಿದಂ ಗಜವಕ್ತ್ರ ಶುಭ್ರಮ್ .
ಏಲಾ ದಿವ ಸಿತಗುಣಂ ಹಿಮನೀರಶೀತ-
ಮಾಪೋಽಶನ ಚರಮಮಾಶು ಸಮಾಚರ ತ್ವಮ್ .. ೩೪..

ಶೋಣಾಮ್ಬುಜಾಧರತಲಂ ಶುಭಮಾರ್ದವಾಢ್ಯ-
ಮುಷ್ಣಾಮ್ಬುನಾ ಸುರಭಿಲೇನ ತವಾದ್ಯ ಪಾಣಿಮ್ .
ದ್ರವ್ಯೇಣ ಘರ್ಷಣವಿಧೌ ಸಿತಯೋಪಮೃದ್ಯ
ಪ್ರಕ್ಷಾಲಯೇಭಮುಖ ಕಲ್ಮಷಲೇಶಹೀನ .. ೩೫..

ನಿರ್ದೋಷತಾಮುಪಗತೇನ ವಿಭೋ ಸುವರ್ಣ-
ಸ್ಥಾಲ್ಯಾಂ ಸ್ಥಿತೇನ ಹಿಮಶೀತಗುಣೇನ ಸದ್ಯಃ .
ಹಸ್ತೀನ್ದ್ರವಕ್ತ್ರ ಪಯಸಾ ಪುನರಾದರೇಣ
ಶುದ್ಧಂ ತ್ವಮಾಚಮನಮಾಚರ ಭೋಜನಾನ್ತೇ .. ೩೬..

ಪೂಗಾ ಇಮೇ ಕಪಿಶಿತಾ ಪರಿಪಾಕರೀತ್ಯಾ
ಶ್ವೇತಾ ಇಮೇ ಕಟುರಸಾ ಮಧುನಾಗವಲ್ಯಃ .
ಕರ್ಪೂರಚೂರ್ಣಮಿದಮೇಭಿರಿಭಾಸ್ಯ ರಾಗಾ-
ಚ್ಛೋಣೀಕುರು ತ್ವದಧರಂ ಸಮಮಾಸ್ಯಶುದ್ಧಯಾ .. ೩೭..

ದೇದೀಪ್ಯಮಾನಮಹಸಿ ದ್ರುತಹೇಮಪಾತ್ರೇ
ಮುಕ್ತಾಮಣೀವಿರಚಿತಾಮ್ಬುಜರೇಖಿಕಾನ್ತಃ .
ಕರ್ಪೂರಖಣ್ಡಪರಿದೀಪಿತಮೇತದಗ್ರೇ
ನೀರಾಜನಂ ಗಜವರಾನನ ದರ್ಶಯಾಮಿ .. ೩೮..

ಗಙ್ಗಾಕವೇರತನಯಾವರತುಙ್ಗಭದ್ರಾ-
ಗೋದಾವರೀರವಿಸುತಾಸುಸಮಾಹೃತಾಭಿಃ .
ಅದ್ಭಿರ್ದದಾಮಿ ಪುನರರ್ಧ್ಯಮಿಭೇನ್ದ್ರವಕ್ತ್ರ
(ಸ) ತತ್ ತ್ವಂ ಗೃಹಾಣ ನಿಗೃಹಾಣ ತಮೋ ಮದೀಯಮ್ .. ೩೯..

ಮಲ್ಲೀಪ್ರಸೂನನವಚಮ್ಪಕಕುನ್ದಜಾತಿ-
ಮನ್ದಾರಮುಖ್ಯಸುಮನೋಭಿರಭಿಸ್ಫುಟಾಭಿಃ .
ಮನ್ತ್ರೈಃ ಸಮಂ ಶ್ರುತಿಚತುಷ್ಟಯಸಂಸ್ತುತೈಸ್ತೇ
ಪುಷ್ಪಾಞ್ಜಲಿಂ ಗಜಮುಖಾನಿಶಮರ್ಪಯಾಮಿ .. ೪೦..

ವೇದಾನ್ತಮೂರ್ಧಶತಗೂಢ ಶತೋಙ್ಘ್ರಿತಸ್ತ-(? )
ನಾಥಾನ್ತಭಾವಿತ ಗಣಾಧಿಪ ಶಕ್ತಿನಾಥ .
ಶ್ರೀಮನ್ ತ್ವದೀಯಪದಭಕ್ತಮಿಮಂ ಸದಾ ಮಾ
ಮಾಮನ್ತಕಾನ್ತಕಸುತಾಮಲ ಮುಞ್ಚ ಮುಞ್ಚ .. ೪೧..

ಭಾಗ್ಯಾಧಿನೋಗ್ಯಕರಮದ್ಯ ಪದೇ ಪದೇ ಚ
ಭಕ್ತ್ಯಾ ಪ್ರದಕ್ಷಿಣಮಹಂ ಕಲಯೇ ಗಜಾಸ್ಯ .
ರಕ್ಷ ಪ್ರತೀಕ್ಷಣಮಪಾಸ್ಯ ಹೃದಾವಿಲಮ್ಬಂ
ವೀಕ್ಷಸ್ವ ಮಾಂ ಪರಿಗೃಹೀತದಯಾವಲಮ್ಬಮ್ .. ೪೨..

ಹಸ್ತೀನ್ದ್ರವಕ್ತ್ರ ಗಣನಾಥ ನಮೋ ನಮಸ್ತೇ
ಸ್ವಸ್ತೀನ್ದ್ರ ಮುಖ್ಯನುತ ದೇಹಿ ನಮೋ ನಮಸ್ತೇ .
ನಸ್ತೀವ್ರಮಗ್ರಮುಪಯಾಹಿ ನಮೋ ನಮಸ್ತೇ
ವಿಸ್ತೀರ್ಣವೈಭವನಿಧೇಽದ್ಯ ನಮೋ ನಮಸ್ತೇ .. ೪೩..

ಮಞ್ಚೇ ಸುವರ್ಣವಿತತೇ ಮಣಿಜಾಲಚಿತ್ರೇ
ಡೋಲಾವೃತೇಽಪ್ಯುಪರಿಭಾಗವಿತಾನಚಿತ್ರೇ .
ಮೃದ್ವಾಸ್ತರಾ ಮುಪರಿಮಞ್ಜುಲಹಂಸತೂಲಿ-
ಮಧ್ಯಾಸ್ಯ ಶೇಷ್ವ ಗಜವಕ್ತ್ರ ಮೃದೂಪವಾನಾಮ್ .. ೪೪..

ಆಲಿಙ್ಗಿತೋ ದಯಿತಯಾ ಗಣನಾಥ ಶಕ್ತ್ಯಾ
ಸರ್ವಾಙ್ಗಶೋಭನಗುಣೋಜ್ಜ್ವಲರೂಪಲಕ್ಷ್ಮ್ಯಾ .
ಆನಙ್ಗಸಙ್ಗರಮುಖೈರ್ವಿವಿಧೈರ್ವಿಲಾಸೈ-
ರಾನನ್ದಭಾರಮಧಿಕಂ ಭಜ ಹಸ್ತಿವಕ್ತ್ರ .. ೪೫
ಬಾಹ್ಯಂ ವಿಧಾತುಮಪಟುಸ್ತವ ಪೂಜನಂ ಯತ್
ಪದ್ಮೇನ್ದ್ರವಕ್ತ್ರ ತದಹಂ ಹೃದಿ ಮಾನಸಾಖ್ಯಮ್ .
ತ್ವತ್ಪೂಜನಂ ರಚಿತವಾಂಶ್ಚತುರುತ್ತರೈಶ್ಚ
ಪದ್ಯೈಸ್ತಥಾ ದಶಚತುಷ್ಟಯಸಂಸ್ಥಿತೈಶ್ಚ .. ೪೬..

ತ್ವಾಂ ಪೂಜಯನ್ ಹೃದಿ ಭಜನ್ ದೃಶಿ ಲಕ್ಷಯಂಶ್ಚ
ಶೃಣ್ವಞ್ಛ್ರುತೌ ಚ ಗದಿತಂ ತವ ರೂಪಮೇವ .
ಸಮ್ಭಾವಯನ್ ಗಜವರಾನನ ದರ್ಶಯಾಮಿ
ತ್ವಂ ದೇವ ದೇವ ಮಯಿ ಧೇಹಿ ಕೃಪಾಕಟಾಕ್ಷಮ್ .. ೪೭..

ಚಸ್ವಾರಿಂಶದುಪರ್ಯಧಿಷ್ಠಿತಚತುಃಶ್ಲೋಕಾತ್ಮಸಙ್ಖ್ಯಾನ್ವಿತಾನ್
ಪ್ರೋಕ್ತಾನ್ ಯಾನುಪಚಾರಕಾಂಸ್ತವ ವಿಭೋ ಹಸ್ತೀನ್ದ್ರವಕ್ತ್ರಾನಿಶಮ್ .
ಪ್ರತ್ಯೂಷೇ ಹೃದಿ ಭಾವಯನ್ತಿ ಪುರುಷಾ ಯೇ ತೇಷು ಕುರ್ಯಾದ್ ಭವಾನ್
ಸಮ್ಪೂರ್ಣಾಂ ಪುರುಷಾರ್ಥಸಿದ್ಧಿಮತುಲಾಂ ಸನ್ತೋಷಧಾರಾಧಿಕಾಮ್ .. ೪೮..

ವಿಘ್ನಾಧಿನೇತರಿ ಚಿದಮ್ಬರಸೂರಿಕ್ಲೃಪ್ತಾ
ಸಮ್ಭಾವನಾದಿಪರಮಪ್ರಮದಾವಸಾನೈಃ .
ಪೂಜೋಪಚಾರವಿಧಿಭಿರ್ಭುವಿ ಮಾನಸಾಖ್ಯಾ
ಜೀಯಾಚ್ಚಿರಂ ಸುವಿದುಷಾಂ ಹೃದಯಙ್ಗಮೇಯಮ್ .. ೪೯..

ಇತಿ ಶ್ರೀಚಿದಮ್ಬರಸೂರಿಕೃತಂ ಶ್ರೀವಿಘ್ನೇಶ್ವರಮಾನಸಿಕಮ್ .