శ్రీచిదమ్బరసూరికృతం శ్రీవిఘ్నేశ్వరమానసికమ్

విఘ్నేశ్వరమానసికమ్
శ్రీమహాగణపతయే నమః .
విఘ్నేశ్వరస్య విషయే హృది మానసాఖ్యాం
పూజాం విధాతుముచితం సరసం ప్రబన్ధమ్ .
విద్వజ్జనే ధురి చిదమ్బర ఏష నమ్రః
శ్లోకైర్వసన్తతిలకైర్వితనోతి శీఘ్రమ్ .. 1..

కాన్తాకృతిం గమితయా కమనీయకాన్త్యా
సత్యా సదాపి నిజయా నవరత్నపీఠే .
కాన్తం వసన్తమమరేన్ద్రముఖాగ్రవన్ద్యం
దన్తావలేనవదనం హృది భావయామి .. 2..

ఆగచ్ఛ దన్తివదనాద్య జయాసమేతః
సత్యాఖ్యయా దయితయా సహ పూజనాయ .
అల్పాం కృతామపి మయా త్వయి దేవ పూజాం
స్వీకృత్య భక్తవశగేశ మయి ప్రసీద .. 3..

రత్నైః కృతం నవభిరత్ర తు చిత్రచిత్రం
పారీన్ద్రవేషమమరేన్ద్రకరోపనీతమ్ .
ఆస్థాయ చాసనమిదం ధృతవల్లభస్త్వం
సామ్రాజ్యమాకలయ మే గజవక్త్ర చిత్తే .. 4..

వేదాన్తకాననచరం వివిధాహవాది-
వేశన్తకౢప్తవిహృతిం విబుధేన్ద్రభావ్యమ్ .
విఘ్నేశ్వరం విధృతవల్లభమఙ్కదేశ
ఆవాహయామి హృదయే సదయాన్తరఙ్గమ్ .. 5..

గఙ్గాయమస్వసృజలైర్హరిరత్నముక్తా-
పాత్రేఽర్పితైః సురభిభిః సుఖశీతలైశ్చ .
మృద్వఙ్గులీదలయుతే పదపద్మయుగ్మే
పాద్యక్రమం కలయ పద్మముఖ ప్రభో త్వమ్ .. 6..

సహ్యాద్రిజాహృతమసహ్యమహాఘహారి
దూర్వాగ్రదర్భసుమగర్భమదక్షతాఢ్యమ్ .
భర్మాగ్రపాత్రపరిపూర్ణమిదం మహార్ఘ-
మర్ధ్యం గృహాణ మదనర్ధవపుర్గజాస్య .. 7..

మల్లీప్రసూననవచమ్పకకుడ్మలౌఘ-
సౌరభ్యనిర్నరముపాసకచిత్తశుభ్రమ్ .
వ్యోమాపగాసలిలమద్య మయా ప్రదత్త-
మాచమ్యతాం గజముఖ ప్రణతార్తిహారిన్ .. 8..

మోచాఫలేన నవశర్కరయా ఘృతేన
గవ్యేన సాధు మధునా త్వధునా ప్రణీతమ్ .
పఞ్చామృతం గజముఖానతపఞ్చతారే
పఞ్చాననాత్మజ విధేహి నిమజ్జనాయ .. 9..

సన్మానసాదిశుచిభిర్ధురి మానసాఖ్యం
సత్తీర్థ కోటిజఠరాహృతతీర్థసార్థైః .
సంస్నాపయామి తవ మఙ్గలదివ్యదేహ-
ముద్వర్తనేన సహ వారణరాజవక్త్ర .. 10..

చీనామ్బరేణ కనకాఞ్చలమఞ్జులేన
దివ్యం త్వదఙ్గమఖిలం జలమజ్జనార్ద్రమ్ .
ద్రాఙ్ మార్జయామి నిఖిలాఘనిమార్జనాయ
కిఞ్చిద్ గజాస్య ధురి తిష్ఠ మమ ప్రభో త్వమ్ .. 11..

కార్పాససూత్రగుణితం విశదం ప్రకౢప్తం
యజ్ఞోపవీతయుగలం నిగలం ద్విజత్వే .
హైమైరథాసమగుణైః సహ యజ్ఞసూత్రై-
రామం చ ముఞ్జమయి కార్ష్ణ్యహతం ధృతం చ (? ) .. 12..

జామ్బూనదైర్విరచితే నవభాజనేఽగ్రే
దఘ్నా సహైవ మధునా మిలితం ప్రక్లృప్తమ్ .
తద్వచ్ఛరావపిహితం మధుపర్కమేత
హస్తే తవాద్య వితరామి చ హస్తివక్త్ర .. 13..

కస్తూరికామృగమదైః పరిమృద్య క్లృప్తం
త్వత్కీర్తిసారమివ శోభనగన్ధపూరమ్ .
హస్తీన్ద్రవక్త్ర సుగుణోర్మిలమఙ్గమఙ్గ
శ్రీగన్వపఙ్కమనులిమ్ప నిలిమ్పనాయ .. 14..

శాల్యక్షతైరతితరామపరిక్షతాగ్రైః
శ్రీకుఙ్కుమాఙ్కపరిశోభినిజాఙ్గభాగైః .
గన్ధోపరి స్ఫుటతరీకరణాయ హస్తి-
వక్త్రార్చయామి హరిచన్దనచర్చిత త్వామ్ .. 15..

మన్దారకున్దకరవీరకచమ్పకాగ్ర్య-
మల్లీముఖాని కుసుమాని తవార్పయామి .
తాన్యఙ్గమఙ్గమపరిక్షత భూషయ త్వం
సత్ర్యేకవింశతిదలైర్గజరాజవక్త్ర .. 16..

ఛత్రధ్వజామ్బుజఘటాఙ్కుశరేఖికాఙ్కౌ
పాథోజమార్దవవిమర్దననిర్దయాఙ్గౌ .
హస్తీన్ద్రవక్త్ర తవ భర్మవినిర్మితాభ్యాం
సంయోజయామి చరణౌ మణిపాదుకాభ్యామ్ .. 17..

కణ్ఠే కరే శిరసి తే మణినిష్కభూషాం
రత్నచితం చ కటకం మకుటం మణీద్ధమ్ .
అఙ్గేఽఖిలే కనకభూషణజాలకా ని
భక్త్యా సహైవ ఘటయే కరటేన్ద్రవక్త్ర .. 18..

నక్షత్రపఙ్క్తినిభమౌక్తికరాజిరాజ-
మానాఞ్చలం చరసుధాకరమణ్డలాభమ్ .
శ్వేతాతపత్రమతిచిత్రమిభేన్ద్రవక్త్ర
మూర్ధోపరి స్ఫుటతరం తవ ధారయామి .. 19..

చామీకరస్ఫురితరత్నవిచిత్రదణ్డౌ
చారుప్రభాలిరుచిరౌ తవ చామరౌ ద్వౌ .
స్నానక్షణావసరఘర్మపయఃకణార్ద్రే
సఞ్చాలయామి గజవక్త్ర ముఖే కరాభ్యామ్ .. 20..

నూత్నం చ రత్నచరమాఙ్గముదారమగ్రే
రూపోద్వహం చ మణిదర్పణమర్పయామి .
భాదర్పదర్పకవపుర్జయినీం తవాద్య
కల్యాణమూర్తిమిభవక్త్ర విలోకయాత్ర .. 21..

అఙ్గారసఙ్గసురభిం సురభిప్రజాత-
హైయఙ్గవీనఘృతయుక్తదశాఙ్గధూపమ్ .
ఘ్రాణేన్ద్రియప్రియకరం పరిజిఘ్ర శీఘ్రం
భక్త్యార్పితం గజముఖ ప్రియగన్ధ దేవ .. 22..

బాహ్యాన్ధకారగుణబన్ధనలోకబన్ధు-
మాజ్యాఢ్యపాత్రకృతవర్తిసముజ్జ్వలం తే .
త్రైలోక్యగాఢతిమిరాపహభాసి వక్త్రే
సన్దర్శయామి ధురి దీపమిభేన్ద్రవక్త్ర .. 23..

మోచాద ఘిత్థపనసామ్రఫలాదియుక్తం
భక్షౌఘశష్కులిసలడ్డుకమోదకాఢ్యం
సౌవర్ణవర్ణసమసూపఘృతౌఘపూర్ణమ్ .
శాల్యన్నమేతదుపభుఙ్క్ష్వ గజాస్య చారు .. 24..

ఏలాలవఙ్గసుమచమ్పకకుడ్మలాగ్ర-
కర్పూరవాసితముదారముశీరగన్ధి .
పానీయమభ్రసరితః కమనీయశుభ్ర-
మానీయతాం గజముఖాననమేకదన్తమ్ .. 25..

వార్తాకకణ్టకిరసారకకారవల్లి-
రమ్భాశలాటుముఖచారుపదార్థజాతమ్ .
ఆజ్యాక్తసర్షపసజీరకహిఙ్గుకైలా-
సమ్భర్జితం గజముఖాద్ధి పదే పదే చ .. 26..

హస్తీన్ద్రవక్త్ర సరసం తు మయా ప్రదత్తం
రమ్భాఫలైర్మధుచరైః సితశర్కరాభిః .
ఏలామరీచిసమశర్కరదుగ్ధసిద్ధం
గోధూమతణ్డులసురాన్నముపాదదస్వ .. 27..

మాషైస్తిలైః సగుడశర్కరనాలికేరై-
ర్జమ్బీరసర్షపవరామ్లఫలైరుతాన్యైః .
తత్ర ప్రయోగకలితాని విచిత్రితాని
స్వన్నాని భుఙ్క్ష్వ గజవక్త్ర రసేన సాకమ్ .. 28..

మల్లీసుమచ్ఛవిసువర్ణసవర్ణశాలి
శాల్యన్నమేతదుపమర్ద్య పయస్తథైవ .
ఏతే కరేణ మిలితే విరచయ్య శుద్ధే
భుఙ్క్ష్వోపదంశితగుడం గజరాజవక్త్ర .. 29..

మణ్డోపయుక్తదధిఖణ్డకమేతదేత-
చ్ఛుద్ధాన్నమాశు మిలితం ద్వయమద్య క్లృప్త్వా .
ఖణ్డామ్లసర్షపరసాలవరోపదంశై-
ర్భుఙ్క్ష్వేభవక్త్ర సహ నిమ్బకఖణ్డచూర్ణైః .. 30..

జమ్బీరతాచ్చుత సుబిల్వకరీరచూత-
నారఙ్గముఖ్యముపదంశకులం సుజాతమ్ .
హిఙ్గ్వగ్రసర్షపరసాలవరోటముఖ్యైః (బహుసాధనాగ్రైః)
సమ్మిశ్రితం చ పరిశీలయ భుక్తికాలే .. 31..

ఔర్వారుకం ధురి రసాయనమేతదేతద్
గౌడం తు పానకమిదం సరసేక్షుసారమ్ .
కాపిత్థపానకమిదం కరివక్త్ర కిఞ్చిత్
కిఞ్చిత్ పిబైషు విభవాయ యథేష్టతోఽద్య ... 32..

సత్కృష్ణనిమ్బదలనాగరహిఙ్గుబాల-
రమ్భాగ్రదణ్డవరసైన్ధవజమ్భసారైః .
ఆలోడితం పరిమలైర్మిలితం గజాస్య
త్వం నీరతక్రముపభుఙ్క్ష్వ చ దాహశాన్త్యై .. 33..

హేమ్నా కృతే మణిచితే రుచిరేఽత్ర పాత్రే
హేమావతీజలమిదం గజవక్త్ర శుభ్రమ్ .
ఏలా దివ సితగుణం హిమనీరశీత-
మాపోఽశన చరమమాశు సమాచర త్వమ్ .. 34..

శోణామ్బుజాధరతలం శుభమార్దవాఢ్య-
ముష్ణామ్బునా సురభిలేన తవాద్య పాణిమ్ .
ద్రవ్యేణ ఘర్షణవిధౌ సితయోపమృద్య
ప్రక్షాలయేభముఖ కల్మషలేశహీన .. 35..

నిర్దోషతాముపగతేన విభో సువర్ణ-
స్థాల్యాం స్థితేన హిమశీతగుణేన సద్యః .
హస్తీన్ద్రవక్త్ర పయసా పునరాదరేణ
శుద్ధం త్వమాచమనమాచర భోజనాన్తే .. 36..

పూగా ఇమే కపిశితా పరిపాకరీత్యా
శ్వేతా ఇమే కటురసా మధునాగవల్యః .
కర్పూరచూర్ణమిదమేభిరిభాస్య రాగా-
చ్ఛోణీకురు త్వదధరం సమమాస్యశుద్ధయా .. 37..

దేదీప్యమానమహసి ద్రుతహేమపాత్రే
ముక్తామణీవిరచితామ్బుజరేఖికాన్తః .
కర్పూరఖణ్డపరిదీపితమేతదగ్రే
నీరాజనం గజవరానన దర్శయామి .. 38..

గఙ్గాకవేరతనయావరతుఙ్గభద్రా-
గోదావరీరవిసుతాసుసమాహృతాభిః .
అద్భిర్దదామి పునరర్ధ్యమిభేన్ద్రవక్త్ర
(స) తత్ త్వం గృహాణ నిగృహాణ తమో మదీయమ్ .. 39..

మల్లీప్రసూననవచమ్పకకున్దజాతి-
మన్దారముఖ్యసుమనోభిరభిస్ఫుటాభిః .
మన్త్రైః సమం శ్రుతిచతుష్టయసంస్తుతైస్తే
పుష్పాఞ్జలిం గజముఖానిశమర్పయామి .. 40..

వేదాన్తమూర్ధశతగూఢ శతోఙ్ఘ్రితస్త-(? )
నాథాన్తభావిత గణాధిప శక్తినాథ .
శ్రీమన్ త్వదీయపదభక్తమిమం సదా మా
మామన్తకాన్తకసుతామల ముఞ్చ ముఞ్చ .. 41..

భాగ్యాధినోగ్యకరమద్య పదే పదే చ
భక్త్యా ప్రదక్షిణమహం కలయే గజాస్య .
రక్ష ప్రతీక్షణమపాస్య హృదావిలమ్బం
వీక్షస్వ మాం పరిగృహీతదయావలమ్బమ్ .. 42..

హస్తీన్ద్రవక్త్ర గణనాథ నమో నమస్తే
స్వస్తీన్ద్ర ముఖ్యనుత దేహి నమో నమస్తే .
నస్తీవ్రమగ్రముపయాహి నమో నమస్తే
విస్తీర్ణవైభవనిధేఽద్య నమో నమస్తే .. 43..

మఞ్చే సువర్ణవితతే మణిజాలచిత్రే
డోలావృతేఽప్యుపరిభాగవితానచిత్రే .
మృద్వాస్తరా ముపరిమఞ్జులహంసతూలి-
మధ్యాస్య శేష్వ గజవక్త్ర మృదూపవానామ్ .. 44..

ఆలిఙ్గితో దయితయా గణనాథ శక్త్యా
సర్వాఙ్గశోభనగుణోజ్జ్వలరూపలక్ష్మ్యా .
ఆనఙ్గసఙ్గరముఖైర్వివిధైర్విలాసై-
రానన్దభారమధికం భజ హస్తివక్త్ర .. 45
బాహ్యం విధాతుమపటుస్తవ పూజనం యత్
పద్మేన్ద్రవక్త్ర తదహం హృది మానసాఖ్యమ్ .
త్వత్పూజనం రచితవాంశ్చతురుత్తరైశ్చ
పద్యైస్తథా దశచతుష్టయసంస్థితైశ్చ .. 46..

త్వాం పూజయన్ హృది భజన్ దృశి లక్షయంశ్చ
శృణ్వఞ్ఛ్రుతౌ చ గదితం తవ రూపమేవ .
సమ్భావయన్ గజవరానన దర్శయామి
త్వం దేవ దేవ మయి ధేహి కృపాకటాక్షమ్ .. 47..

చస్వారింశదుపర్యధిష్ఠితచతుఃశ్లోకాత్మసఙ్ఖ్యాన్వితాన్
ప్రోక్తాన్ యానుపచారకాంస్తవ విభో హస్తీన్ద్రవక్త్రానిశమ్ .
ప్రత్యూషే హృది భావయన్తి పురుషా యే తేషు కుర్యాద్ భవాన్
సమ్పూర్ణాం పురుషార్థసిద్ధిమతులాం సన్తోషధారాధికామ్ .. 48..

విఘ్నాధినేతరి చిదమ్బరసూరిక్లృప్తా
సమ్భావనాదిపరమప్రమదావసానైః .
పూజోపచారవిధిభిర్భువి మానసాఖ్యా
జీయాచ్చిరం సువిదుషాం హృదయఙ్గమేయమ్ .. 49..

ఇతి శ్రీచిదమ్బరసూరికృతం శ్రీవిఘ్నేశ్వరమానసికమ్ .