બ્રહ્માણ્ડમોહનાખ્યં દુર્ગાકવચમ્

બ્રહ્માણ્ડમોહનાખ્યં દુર્ગાકવચમ્

નારદ ઉવાચ .
ભગવન્સર્વધર્મજ્ઞ સર્વજ્ઞાનવિશારદ .
બ્રહ્માણ્ડમોહનં નામ પ્રકૃતે કવચં વદ .. ૧..

નારાયણ ઉવાચ .
શૃણુ વક્ષ્યામિ હે વત્સ કવચં ચ સુદુર્લભમ્ .
શ્રીકૃષ્ણેનૈવ કથિતં કૃપયા બ્રહ્મણે પુરા .. ૨..

બ્રહ્મણા કથિતં પૂર્વં ધર્માય જાહ્નવીતટે .
ધર્મેણ દત્તં મહ્યં ચ કૃપયા પુષ્કરે પુરા .. ૩..

ત્રિપુરારિશ્ચ યદ્ધૃત્વા જઘાન ત્રિપુરં પુરા .
મમોચ બ્રહ્મા યદ્ધૃત્વા મધુકૈટભયોર્ભયાત્ .. ૪..

સઞ્જહાર રક્તબીજં યદ્ધૃત્વા ભદ્રકાલિકા .
યદ્ધૃત્વા હિ મહેન્દ્રશ્ચ સમ્પ્રાપ કમલાલયામ્ .. ૫..

યદ્ધૃત્વા ચ મહાયોદ્ધા બાણઃ શત્રુભયઙ્કરઃ .
યદ્ધૃત્વા શિવતુલ્યશ્ચ દુર્વાસા જ્ઞાનિનાં વરઃ .. ૬..

ૐ દુર્ગેતિ ચતુર્થ્યન્તઃ સ્વાહાન્તો મે શિરોઽવતુ .
મન્ત્રઃ ષડક્ષરોઽયં ચ ભક્તાનાં કલ્પપાદપઃ .. ૭..

વિચારો નાસ્તિ વેદે ચ ગ્રહણેઽસ્ય મનોર્મુને .
મન્ત્રગ્રહણમાત્રેણ વિષ્ણુતુલ્યો ભવેન્નરઃ .. ૮..

મમ વક્ત્રં સદા પાતુ ૐ દુર્ગાયૈ નમોઽન્તકઃ .
ૐ દુર્ગે ઇતિ કણ્ઠં તુ મન્ત્રઃ પાતુ સદા મમ .. ૯..

ૐ હ્રીં શ્રીમિતિ મન્ત્રોઽયં સ્કન્ધં પાતુ નિરન્તરમ્ .
હ્રીં શ્રીં ક્લીમિતિ પૃષ્ઠં ચ પાતુ મે સર્વતઃ સદા .. ૧૦..

હ્રીં મે વક્ષસ્થલે પાતુ હં સં શ્રીમિતિ સન્તતમ્ .
ઐં શ્રીં હ્રીં પાતુ સર્વાઙ્ગં સ્વપ્ને જાગરણે સદા .. ૧૧..

પ્રાચ્યાં માં પાતુ પ્રકૃતિઃ પાતુ વહ્નૌ ચ ચણ્ડિકા .
દક્ષિણે ભદ્રકાલી ચ નૈરૃત્યાં ચ મહેશ્વરી .. ૧૨..

વારુણ્યાં પાતુ વારાહી વાયવ્યાં સર્વમઙ્ગલા .
ઉત્તરે વૈષ્ણવી પાતુ તથૈશાન્યાં શિવપ્રિયા .. ૧૩..

જલે સ્થલે ચાન્તરિક્ષે પાતુ માં જગદમ્બિકા .
ઇતિ તે કથિતં વત્સ કવચં ચ સુદુર્લભમ્ .. ૧૪..

યસ્મૈ કસ્મૈ ન દાતવ્યં પ્રવક્તવ્યં ન કસ્યચિત્ .
ગુરુમભ્યર્ચ્ય વિધિવદ્વસ્ત્રાલઙ્કારચન્દનૈઃ .. ૧૫..

કવચં ધારયેદ્યસ્તુ સોઽપિ વિષ્ણુર્ન સંશયઃ .
સ્નાને ચ સર્વતીર્થાનાં પૃથિવ્યાશ્ચ પ્રદક્ષિણે .. ૧૬..

યત્ફલં લભતે લોકસ્તદેતદ્ધારણે મુને .
પઞ્ચલક્ષજપેનૈવ સિદ્ધમેતદ્ભવેદ્ધ્રુવમ્ .. ૧૭..

લોકે ચ સિદ્ધકવચો નાવસીદતિ સઙ્કટે .
ન તસ્ય મૃત્યુર્ભવતિ જલે વહ્નૌ વિષે જ્વરે .. ૧૮..

જીવન્મુક્તો ભવેત્સોઽપિ સર્વસિદ્ધીશ્વરીશ્વરિ .
યદિ સ્યાત્સિદ્ધકવચો વિષ્ણુતુલ્યો ભવેદ્ધ્રુવમ્ .. ૧૯..